Watchtower INTANƐT SO NWOMAA AKORAEƐ
Ɛwɛnenɛ Waen
INTANƐT SO NWOMAA AKORAEƐ
Sehwi
@
  • á
  • ã
  • ɔ́
  • é
  • ɛ̃
  • ɛ́
  • ɛ
  • ɔ
  • BIBLE
  • NWOMAA NE VIDIO AHOROƐ
  • ASAFO NHYIAMU AHOROƐ
  • mwbr21 November krb. 1-krb. 9
  • Nhwehwɛmuɛ Ma “Abrabɔ Ne Asɛnga Adesua Nwomaa”

Vidio biala nne bɔ ɛyele nanu.

Yɛsrɛ wɔ, vidio ne wangora bukye.

  • Nhwehwɛmuɛ Ma “Abrabɔ Ne Asɛnga Adesua Nwomaa”
  • Nhwehwɛmuɛ Ma Abrabɔ Ne Asɛnga Adesua Nwomaa—2021
  • Edwirɛti Mmaamaa
  • NOVEMBER 1-7
  • NOVEMBER 8-14
  • NOVEMBER 15-21
  • it-1 75
  • NOVEMBER 22-28
  • NOVEMBER 29–DECEMBER 5
  • DECEMBER 6-12
  • DECEMBER 13-19
  • DECEMBER 20-26
  • DECEMBER 27–JANUARY 2
Nhwehwɛmuɛ Ma Abrabɔ Ne Asɛnga Adesua Nwomaa—2021
mwbr21 November krb. 1-krb. 9

Nhwehwɛmuɛ Ma Abrabɔ Ne Asɛnga Adesua Nwomaa

NOVEMBER 1-7

NYAMEƐPIRI DWIRƐ NANU ASUADEƐ | YOSHUA 18-19

“Atẽe Pá Bɔ Yehowa Maa Bɛfale So Bɛhyɛle Aseɛ Ne Ɔ”

it-1 359 ¶1

Ɛwɛen

Ɔkɔhora kɔwa kyɛ aseɛ bɔ bɛhyɛ bɛmane mmusuakue ne, né ogyĩ nikyee nyɔ bie so: kõ, né bekogua serewa, yeɛ nyɔ, bɛnea kyɛbɔ abusuakue bie piri si te ɔ. Né serewa bɔ bekogua ne kohyire nekaa pɔtẽe bɔ abusuakue bie konya kyɛ ye agyapadeɛ ɔ, na né ɛhẽne kɔmaa sɔ abusuakue ne konwu kyɛ okonya aseɛ ne Sorɔ anaa Ngwaen, Afitéleɛ anaa Atɔleɛ, bɔ ɔwɔ bokaa so, anaa bɔ ɔwɔ ɛpo ne noa ɔ. Né gyinaesie bɔ ɔfa serewa bɔ bekogua, bɔ Yehowa fa mane bɛ ne kɔboka maa aporowaasulɛ biala ngɔhɔ so wɔ mmusuakue ne afĩa. (An 16:33) Afei koso, Nyameɛpiri nate ngɔm bɔ abusua panyini Yakob hyɛle, mmerɛ bɔ né ɔla ewue bɛen so, bɔ bayɛ yenwo twerɛtohɔ wɔ Gyenɛsis 49:1-33 naso siesiele ɔhaw ahoroɛ bɔ né abusuakue biala koyia wɔ aseɛ ne kyekyɛlɛ nanwo ne.

it-1 1200 ¶1

Agyapadeɛ

Aseɛ bɔ benyane kyɛ agyapadeɛ ɔ. Yehowa yeɛ ɔfale agyapadeɛ bɔ Israelfoɛ nyane ne mane bɛ ɔ, na Yehowa nate Mose so hyirele aseɛ ne wɛen. (Nu 34:1-12; Yos 1:4) Gad abusuakue, Reuben abusuakue, ɔne Manase abusuakue nanu biemɔ de, Mose yeɛ ɔfale b’aseɛ ne mane bɛ ɔ. (Nu 32:33; Yos 14:3) Abusuakue bɔ baha ne, Yoshua ne Eleazar nate serewa bɔ beguale so maa bɛsa hãne b’agyapadeɛ. (Yos 14:1, 2) Bɔ ɔne ngɔm bɔ Yakob hyɛle bɔ ɔwɔ Gyenɛsis 49:5, 7 yia ne, baamma Simeon ne Levi abusuakue ne aseɛ kyɛ agyapadeɛ. Né Yuda nguro bɔ wate yenwo ne boka Simeon aseɛsĩi naso (Yos 19:1-9), na né Levi koso le nguro 48 wɔ Israel aseɛsĩi ne mukoraati nu. Ɔnate kyɛ bɛfale sõen nwo atẽe titire bɛmane Levifoɛ nemɔ wɔ ɛtena sua nanu nati, Yehowa hãne kyɛ, ye yeɛ ɔte b’agyapadeɛ ɔ. Benyane buru nu ngyemuɛ kõ kyɛ b’agyapadeɛ ɔnate bɛsõen adwuma nati. (Nu 18:20, 21; 35:6, 7) Bɛmane mmusua ahoroɛ ne dwumadié wɔ b’abusuakue ne aseɛsĩi nu. Ɔnate kyɛ né mmusua ahoroɛ ne kɔwo mmaa mmrienzua maa bɛboso kɔtrɛ nati, né bɛkɔkyekyɛ b’aseɛ nemɔ nu maa ɔkɔyɛ mmaamaa.

it-1 359 ¶2

Ɛwɛen

Sɛ serewa ne nya kyire nekaa bɔ abusuakue bie kɔtena, ɔne nekaa bɔ ye aseɛsĩi kodwu ne a, afei besusu nikyee bɔ ɔtɔ so nyɔ nanwo: kyɛbɔ abusuakue bie piri si te ɔ. “Ɛmɔgua serewa bɛhyɛ aseɛ ne bɛma ɛmɔ mmusua kyɛ agyapadeɛ. Abusua bɔ ɔte piri ne, odikyɛ ɛmɔma bɛ aseɛ piri, yeɛ bɔ ɔte kãa ne koso, ɛmɔma bɛ aseɛ kãamba. Nekaa bɔ serewagualɛ ne kɔye kɔma ebiala ne, ɛberɛ yeɛ ɔkɔyɛ ye agyapadeɛ ɔ.” (Nu 33:54) Nekaa bɔ né serewa ne kohyire ne, ɛberɛ ala yeɛ né ɔkɔyɛ abusuakue bie agyapadeɛ ɔ, nakoso né bɛkɔhora bɛkɔyɛ nzakraeɛ wɔ kyɛbɔ ye piri si te nanu. Ɛhẽne ati yeɛ mmerɛ bɔ benwuni kyɛ Yuda abusuakue ne aseɛsĩi te piri ne, bɛpɛle bie bɛmane Simeon abusuakue ne.—Yos 19:9.

Bible Nu Dwirɛ Titire

it-1 359 ¶5

Ɛwɛen

Wɔ edwirɛ bɔ ɔfa Yɔɔdan Atɔleɛ aseɛ kyekyɛle nwo ne, Yuda (Yos 15:1-63), Yosef (Efraim) (Yos 16:1-10), ɔne Manase abusuakue ne bue bie (Yos 17:1-13) yeɛ serewa ne limoa yele bɛ ɔ, na behyirele bɛwɛen ne nguro bɔ né bekonya ye ɔ. Ɛhe sĩ ne, ɔkɔyɛ kyɛ bɛyakyili aseɛ ne hyɛlɛ, ofikyɛ Israelfoɛ ne tuli b’asikyeleɛ ne fili Gilgal bɛhɔle Silo. (Yos 14:6; 18:1) Banngã mmerɛ dodoɔ bɔ belili wɔ berɛ nanwo dwirɛ de, nakoso Yoshua hãne Israel mmusuakue nzoo bɔ baha ne nyunu kyɛ bɛtwetwẽne bɛgya bo kyɛ bɛkɔɔfa aseɛ ne bue bɔ waha ne. (Yos 18:2, 3) Ebiemɔ ama ngyirekyiremuɛ pẽe afa sɔ subaen bɔ mmusuakue nzoo ne lale ye ali nanwo, bɛkã kyɛ kõɛ nu nzesadeɛ pẽe bɔ benyane, ɔne Kaananfoɛ bɔ bɛne sɔ mmusuakue nzoo ne anngõ nati, waamma bannwu kyɛbɔ né yenwo hia kyɛ odikyɛ bɛyɛ ndɛ bɛkɔfa aseɛ ne bue bɔ waha ne ɔ. Ɔkɔhora kɔwa kyɛ, kyɛbɔ né sɔ pɔfoɛ nemɔ nwo yɛ se ne koso bokaso yeɛ ɔmaa bɛtwetwẽne bɛgya bo kyɛ bɛkɔɔfa aseɛ ne. (Yos 13:1-7) Afei koso nimdeɛ bɔ né bele ye wɔ Bɔhyɛ Aseɛ ne bue bɔ waha nanwo ne, sɛ ɛfa toto bɔ né balimoa bafa nanwo a, né ɔte kãa.

NOVEMBER 8-14

NYAMEƐPIRI DWIRƐ NANU ASUADEƐ | YOSHUA 20-22

“Edwirɛ Bɔ Né B’adwene Nyia Wɔ Yenwo Ne, Nzu Yeɛ Yesua Yefi Nu Ɔ”

w06 4/15 5 ¶3

Bɔ Ɔkɔmaa Ɛne Wɔ Nwokãfoɛ Kɔbɔ Ngɔmmɔ Ɔ

Edwirɛ bɔ bɛkã nu nahorɛ ne maa ebiala te ye mangõ bo. Wɔ Israelfoɛ abakɔsɛm nu ne, Reuben, Gad ne Manase abusuakue ne bue, bɔ né bɛte Yɔɔdan Asue ne afitéleɛ ne, besili “afɔleɛ bokyea kandingã bie” wɔ Yɔɔdan nwo. Mmusuakue bɔ baha ne ande bɔ bɛyɛle nabo. Né besusu kyɛ beliemamɔ bɔ né bɛwɔ Yɔɔdan asue ne sĩ ne ate atũa, yeti mmusuakue bɔ bɛwɔ atɔleɛ ne boɔboale bɛnwo kyɛ bɛne “atũatelɛfoɛ” ne kwaahõ. Nakoso kora bɔ bɛkɔ ne, betuli bɔfoɛ maa bɛne mmusuakue bɔ bɛwɔ afitéleɛ ne beedwudwole. Né nworɛ wɔ bɔ bɛyɛle nanu paa! Beenwuni kyɛ né ɔtte kyɛ bɛbɔ afɔleɛ bɛma nyameɛ bie. Mmom ne, né mmusuakue bɔ bɛwɔ Yɔɔdan afitéleɛ ne suro kyɛ annea a, kyẽabie mmusuakue bɔ baha ne kɔhã kohyire bɛ kyɛ: “Ɛmɔ llé kyɛfa biala wɔ Yehowa nu.” Né afɔleɛ bokyea ne koli adanzeɛ kyɛ bɛ koso bɛte Yehowa asomvoɛ. (Yoshua 22:10-29) Bɛtole afɔleɛ bokyea ne dumaa kyɛ Adanzeɛ, ofikyɛ né ɔkɔyɛ adanzeɛ bɔ okyire kyɛ Yehowa yeɛ ɔte bɛ nahorɛ Nyameɛpiri ɔ.—Yoshua 22:34, yebo berɛ dwirɛ ne.

w08 11/15 18 ¶5

“Ɛmɔli Nningyein Bɔ Ɔfa Asomdwee Ba Ne Sĩ”

Né Israelfoɛ nanu biemɔ susu kyɛ, bele adanzeɛ bɔ odi mũ kyɛ beliema nemɔ ayɛ bɔne, yeti bɛyɛle b’adwene kyɛ bɛkɔyɛ nwãa na baato bawura bɛ so, kyɛbɔ ɔkɔyɛ a, mmeni pẽe ngowu ɔ. Baambere bɛnwo, na mmom, abusuakue bɔ bɛwɔ Yɔɔdan atɔleɛ ne sõmane mmenia maa bɛne beliema nemɔ bɛɛhãne tebea nanwo dwirɛ. Bebisale bɛ kyɛ: “Nzuati yeɛ ɛmɔ ayɛ sɔ mmusue nikyee he batia Israel Nyameɛpiri, ná ɛnɛ de ɛmɔakakyi besĩ bahyire Yehowa ye?” Nahorɛ nu, né ɔttekyɛ abusuakue bɔ besili afɔleɛ bokyea ne afi Yehowa sĩ. Nakoso sɛɛ yeɛ né bekoli edwirɛ bɔ bafa bato bɛso nanwo dwumaa ɔ? Aso né bɛkɔkẽkã b’adwene bekohyire bɛ, anaakyɛ né bengo dwudwo bɛnwo? Abusuakue bɔ babɔ bɛ sommoɛ ne fale ndoboaseɛ hyirele bɛnu pefee kyɛ bɛyɛle sɔ nikyee ne kyɛ bɛfa bɛsõ Yehowa. Bɛ mmuaeɛ ne bɔle bɛne Yehowa afĩa abusuabɔ nanwo waen, na olɛle bɛ ngõa. Ndoboaseɛ maa besiesiele edwirɛ ne asomdwee nu.—Yosh. 22:13-34.

Bible Nu Dwirɛ Titire

it-1 402 ¶3

Kaanan

Ɔwɔ nu kyɛ Israelfoɛ nemɔ angũ Kanaanfoɛ nemɔ mukoraati wɔ kõɛ nu de, nakoso né benguro kyɛ bekowura Israelfoɛ nemɔ bo, yɛkɔhora yɛkɔhã kyɛ, “Yehowa mane Israelfoɛ nemɔ sa hãne aseɛ bɔ ɔfa hyɛle bɛ babamɔ bɔ ne mukoraati,” na ɔmaa “belɛle bɛ nwomeɛ wɔ b’aseɛ mukoraati so,” na “nningyein pá bɔ Yehowa fa hyɛle Israelfoɛ bɔ nanu kõ pó ammini; yemukoraati wale nu.” (Yos 21:43-45) Ɔnate kyɛ maen ahoroɛ bɔ né bapɛ Israelfoɛ nwo bayia ne mukoraati suro bɛ nati, ɔmaa benyane asomdwee pẽe. Afei, né Yehowa alimoa ahã kyɛ, ɔkɔfõa Kaananfoɛ nemɔ kofi benyunu ngakãngakã, kyɛbɔ ɔkɔyɛ a, ngaka bɔ bɛnwo yɛ suro biala ngole aseɛ bɔ wakakyi kurofõe ne ngɔbɔ so ɔ. (Ɛza 23:29, 30; De 7:22) Ɔmva yenwo kyɛ né Kaananfoɛ ne le akõdeɛ pẽe tekyɛ, ndeaseɛnam bɔ buralɛ wura nu ne, sɛ Israelfoɛ ne di nguguo wɔ benyunu, ná bɛsa angora angã aseɛ biemɔ a, né bɛngɔhora bɛngɔbɔ Yehowa sõmoɛ kyɛ wanni ye bɔhyɛ so. (Yos 17:16-18; At 4:13) Mmom ne, twerɛtohɔ ne maa yenwui kyɛ, Israelfoɛ asoserɛ ti yeɛ belili nguguo ɔ.—Nu 14:44, 45; Yos 7:1-12.

NOVEMBER 15-21

NYAMEƐPIRI DWIRƐ NANU ASUADEƐ | YOSHUA 23-24

“Yoshua Afutue Bɔ Ɔpɛ Yebo Bɔ Ɔfa Mane Maen Ne”

it-1 75

Ngãbonu

Mmerɛ bɔ né waha kãa maa Israel maen ne dwu Kaanan, bɔ ɔte Bɔhyɛ Aseɛ naso ne, edwirɛ bie sili. Né Nikyee Mukoraati So Tumvoɛ Nyameɛpiri afa yenwo atẽe ama Israelfoɛ nemɔ kyɛ, beli aseɛ bɔ ɔfa hyɛle bɛ nanamɔ bɔ naso. Né bɛngɔhɔ aseɛ naso kyɛ ɛwɔfoɛ, nakoso Yehowa hãhyirɛle bɛ kyɛ, ɔnzɛkyɛ bɛne aseɛ nasofoɛ yɛ nikyee biala bɛbɔ nu. (Ɛza 23:31-33; 34:11-16) Né odikyɛ bɛ brɛ bɛnwo ase bewura Nyameɛpiri mmraa ne ye akwangyerɛ bo, na né ɔnzɛkyɛ bedi maen ahoroɛ bɔ bɛbaafõa bɛ ne sĩ. (Le 18:3, 4; 20:22-24) Ɔbɔle bɛ kɔkɔ kyɛ, ɔnzɛkyɛ bɛne sɔ maen nanufoɛ ne yɛ agyaa nhyehyɛeɛ biala. Ofikyɛ né nhyehyɛeɛ bɔ ɔte sɔ ne kɔmaa bekoogya mmrasua bɔ bɛsõ bosõen, na wamaa bafa bɛnwo bawura ngondombo sõen ne bɛ nneyɛe nu, na né ɛhe koswa bɛ ngaen maa bɛkɔɔyɛ awaefoɛ.—De 7:2-4; Ɛza 34:16; Yos 23:12, 13.

w07 11/1 26 ¶19-20

Yehowa Dwirɛ Nni Hwammɔ

Nahorɛ nu, bɔ yafa yɛnye yanwui nati, yɛkɔhora yɛkɔhã kyɛ: “Edwirɛ pá bɔ Yehowa ɛmɔ Nyameɛpiri ahã nanu kõmaapɛ pó nne berɛ bɔ wamini ɔ. Yemukoraati awa nu ama ɛmɔ. Enu kõ po nne berɛ bɔ wali hwammɔ ɔ.” (Yoshua 23:14) Yehowa dé ye asomvoɛ, ɔbɔ bɛnwo waen, na ɔboka bɛ. Aso ɛkɔhora kohyire ɛbɔ bie bɔ Yehowa hyɛle bɔ waamma nu wɔ mmerɛ bɔ ɔhyɛle nanu anaa? Ɔngɔhora ngɔwa sɔ lle. Nyanza wɔ nu kyɛ yekole Nyameɛpiri Dwirɛ bɔ onni hwammɔ llé ne yɛkɔto nu.

Na kyẽabie koso ɛ? Yehowa ama yɛ anyelasoɛ kyɛ, yenu pẽe nala kɔtena aseɛ bɔ basiesie ye kama bayɛ ye paradise naso. Yenu kãa bie yeɛ bele anyelasoɛ kyɛ bɛne Kristo koli bia wɔ anwuro ɔ. Ɔmva yenwo ne kyɛbɔ y’anyelasoɛ te biala ne, odikyɛ yɛbɔ mmɔden yedi nahorɛ kyɛbɔ Yoshua yɛle ne. Kyẽabie y’anyelasoɛ ne kɔwa nu. Na yɛkɔkakyi yɛnye yɛkɔnea ɛbɔ ahoroɛ bɔ Yehowa ahyɛ yɛ ne mukoraati, na yɛ koso yɛkɔhã kyɛ: “Yemukoraati awa nu.”

Bible Nu Dwirɛ Titire

w04 12/1 12 ¶1

Yoshua Nwomaa Nanu Dwirɛ Titire

24:2—Aso ne Abraham baba, Tera, sõ bosõen anaa? Ahyɛaseɛ ne, né Tera nzõ Yehowa Nyameɛpiri. Ɔkɔyɛ kyɛ ne ɔsõ ɛsraen nyameɛ bɔ bɛfrɛ ye Sin—nyameɛ bɔ né bɛsõ ye paa wɔ Ur ne. Kyɛbɔ Yudafoɛ amammerɛ kyire ne, bɛkã kyɛ né Tera bɔbɔ yɛ ahoni ahoroɛ ne bie. Nakoso, mmerɛ bɔ Nyameɛpiri hãne kyɛ Abraham tu fi Ur ne, Tera ne ye hɔle Haran.—Gyenɛsis 11:31.

NOVEMBER 22-28

NYAMEƐPIRI DWIRƐ NANU ASUADEƐ | ATEMUFOƐ 1-3

“Edwirɛ Bɔ Odé Akokoduro Bɔ Né Ɔyɛ Suro Ɔ”

w04 3/15 31 ¶3

Ehud Bubuli Pɔfoɛ Ne Kɔnnua Nu

Ɔtte kyɛ né Ehud se nworɛ, anaa ye pɔfoɛ nemɔ annyɛ b’adwuma yé ti yeɛ porɛ bɔ ɔbɔle ne yɛle yé ɔ. Sɛ Nyameɛpiri di ye atirimbɔ nwo dwumaa a, ɔmva yenwo ndo sona anwoserɛ so. Bɔ Ehud yɛle ne, ɔnate kyɛ né ɔne Yehowa apɛdeɛ bɔ ebiala ngora nzi ye atẽe bɔ yeɛ ole kyɛ, okole Ye mmenia ne yia nati yeɛ ɔmaa olili ngunim ɔ. Né Yehowa ama Ehud so, “na mmerɛ biala bɔ Yehowa kɔma ye mmenia atemufoɛ ne, né Yehowa gyina temufoɛ ne sĩ.”—Atemufoɛ 2:18; 3:15.

w04 3/15 30 ¶1-3

Ehud Bubuli Pɔfoɛ Ne Kɔnnua Nu

Anammɔn bɔ Ehud limoa tuli yeɛ ole kyɛ, ɔyɛle “ngrandɛ”—sɛpɔ bɔ ɔte sĩi, na yenoa yɛ nná, kyɛbɔ ɔkɔyɛ a, ɔkɔhora kɔfa kowura ye atadeɛ nu ɔ. Né ɔse kyɛ ebia bɛkɔneɛnea yenwo. Né bɛfa ngrandɛ bewura bɛ bɛen so, kyɛbɔ ɔkɔyɛ a bɛbɔ bɛfa bɛsa famaa bedi dwumaa ne kɔhora kɔhwẽ ye ndɛ ɔ. Ɔnate kyɛ ne ɔte bɛen nati, ɔfale ye ngrandɛ ne ‘‘wurale y’atadeɛ nabo wɔ ye sɔ famaa nanwo,’’ nekaa bɔ né ɔhene ne awɛmvoɛ ne ndaa nnea berɛ ɔ. Yeti “ɔfale ɛtoɔ ne ɔɔmane Moab hene Eglon” bɔ hwee anzi y’atẽe ɔ.—Atemufoɛ 3:16, 17.

Bannga edwirɛ bɔ osili wɔ Eglon ahemvie berɛ nanwo dwirɛ baangɔ sĩɛ. Bible ne kã ye tikapẽ kyɛ: “Mmerɛ bɔ Ehud fale ɛtoɔ ne mane bɛ yiele ne, oguale bɛbɔ bɛsõ ɛtoɔ ne atẽe maa bɛhɔle.” (Atemufoɛ 3:18) Ehud fale ɛtoɔ ne mane bɛ ne, oguale bɛbɔ bɛsõ ɛtoɔ ne atẽe maa bɛhɔle mmoa, nekaa bɔ né ombingye Eglon awuro ne ɔ, na oguale b’atẽe yiele ne, osa hɔle awuro berɛ. Nzuati ɔ? Aso ɔfale sɔ mmrienzua ne bokale ye so kyɛ bɛbɔ yenwo waen, anaa ɔte ɛberɛ nhyehyɛeɛ, anaakyɛ né bɛsõsõ ɛtoɔ ne mbaen? Anaakyɛ né okuro kyɛ befi berɛ kora né wali y’atirimbɔ nanwo dwumaa anaa? Bɔ né ɔte biala ne, Ehud ngome fili akokoduro nu sa hɔle awuro berɛ.

“[Ehud] sa fili nekaa bɔ bɛpakye nyɔboɛ bɔ né ɔwɔ Gilgal ne, na ɔhãne kyɛ: ‘O Ɔhene, me pena kyɛ me ne wɔ tu asure bie.’” Atẽe bɔ ɔfale so oofitéle Eglon nyunu ne de, Bible ne ngã. Nzuati yeɛ awɛmvoɛ nemɔ aanwu ye sĩ ɔ? Anaa né besusu kyɛ Israelniɛ kõmaapɛ de, ɔngɔhora ngoli ɔhene ne bɔne anaa? Anaa Ehud ngome bɔ osa wale berɛ ne maa benyane adwene kyɛ, waye ye mmenia nemɔ wama anaa? Bɔ né ɔte biala ne, né Ehud penakyɛ ɔne ɔhene ne ngome kodwudwo, na ɔhora yɛle sɔ koso.—Atemufoɛ 3:19.

Bible Nu Dwirɛ Titire

w05 1/15 24 ¶7

Atemufoɛ Nwomaa Nanu Dwirɛ Titire

2:10-12. Odikyɛ yɛyɛ nhyehyɛeɛ bɔ yɛkɔfa yekosua Bible ne daa, kyɛbɔ ɔkɔyɛ a ‘yɛwora ngofi nningyein bɔ Yehowa ayɛ ne.’ (Edwein 103:2) Odikyɛ awofoɛ fa nahorɛ bɔ ɔwɔ Nyameɛpiri Dwirɛ nanu ne bewura bɛ mmaamɔ ahõne nu.—Deuteronomi 6:6-9.

NOVEMBER 29–DECEMBER 5

NYAMEƐPIRI DWIRƐ NANU ASUADEƐ | ATEMUFOƐ 4-5

“Yehowa Nate Mmrasua Nyɔ So Lɛle Ye Mmenia”

w15 8/1 13 ¶1

“Ndwɔsole Kyɛ Brataen Wɔ Israel”

Sisera! Sɛ Israelfoɛ te sɔ dumaa ne a, né bɛpena nekaa bɛfa. Né awudisɛm ayi Kaananfoɛ amammerɛ ne bɛ sõen nu tɛkyɛ, né bɛfa ngwalaa bɛbɔ afɔleɛ, afei né bɛbɔ adwaman wɔ b’asɔre awuro berɛ. Yeti ɛnea a, sɛɛ yeɛ né Israelfoɛ nemɔ kɔte ngã wɔ Kaananfoɛ sahene ɔne ye asraafoɛ bɔ né bedi b’aseɛ so nanwo ɔ? Dwein bɔ Debora tole ne maa yenwu kyɛ né bɛngora bendu atẽe po, na né ebiala anwati afi namue nemɔ nu. (Atemufoɛ 5:6, 7) Wɔde nea kyɛ mmenia anwati aawura eburo ɔne mmokaa so, esuroen ti bɛngora eboo po yɛ, na benguro kyɛ bɛkɔtena namue bɔ bɛttolle yenwo fasue nu, bɛngora bɛmmva atimbire so bendu atẽe, ofikyɛ ebia né asraafoɛ ato awura bɛ so afa bɛ mmaamɔ, ná bato bɛ mmrasua nemɔ mmɔnaa.

w15 8/1 13 ¶2

“Ndwɔsole Kyɛ Brataen Wɔ Israel”

Esuroen hɔle so kyekyele Israelfoɛ nemɔ afoɛ 20 oodwuli kyɛ afei de, Yehowa nwuni kyɛ ye mmenia asoserɛfoɛ nemɔ ayɛ b’adwene kyɛ bɛkɔsesã, anaa kyɛbɔ dwein bɔ Debora ne Barak tole ne hãne ne, “Oodwuli kyɛ me, Debora ndwɔsole, oodwuli kyɛ ndwɔsole kyɛ brataen wɔ Israel.” Yɛnze kyɛ né Debora bɔ ɔte Lappidot aye ne te brataen, ofikyɛ bɛfale sɔ dwirɛ he belili dwumaa wɔ nzɛngyerɛneɛ atẽe so. Bɔ ɔte ole kyɛ, Yehowa mane Debora bɔle maen nanwo waen kyɛbɔ brataen bɔ ye mmaamɔ nwo waen ne. Ɔfa wurale ye sa kyɛ ɔmá Temufoɛ Barak, bienzua bɔ ye gyidie yɛ se ne, ɔto wura Sisera so.—Atemufoɛ 4:3, 6, 7; 5:7.

w15 8/1 15 ¶2

“Ndwɔsole Kyɛ Brataen Wɔ Israel”

Ɛberɛ ala yeɛ Yael nyane adwene bie ɔ. Ɔmane Sisera nekaa maa ɔlale. Sisera hãhyirele Yael kyɛ, sɛ ebie babisa yebo so a, nnɛmaa okyire nekaa bɔ ɔwɔ ɔ. Ɔlale ne, ɔfale nikyee katale yenwo, na obisale ye nzue ne, ɔmane ye nyɔfõnesue. Wangyɛ yeɛ Sisera lale hatee ɔ. Yael fale nningyein bɔ mmrasua bɔ bɛte ɛtena sua nu taa fa di dwumaa tekyɛ—ɛtena sua nu pɛmbɛen ɔne nikyee bɔ ɔkɔfa kɔbɔ so ɔ. Na ɔyɛle nwãa oogyinane nekaa bɔ Sisera ti kɔ ɔ, afei bɔ né waha ala ole kyɛ okogyina Yehowa gyanu kohũ ye ɔ. Sɛ y’adwene nu yɛle ye nãa anaakyɛ ɔnwondɛle kãa bie pó a, ahãa edwirɛ kosi. Aso osusuli Nyameɛpiri mmenia, ɔne kyɛbɔ biãa he ali bɛnye afoɛ pẽe nanwo anaa? Anaakyɛ osusuli yenwo atẽe bɔ wanyae kyɛ, okogyina Yehowa gyanu nanwo anaa? Twerɛtohɔ ne ngã yenwo dwirɛ. Bɔ yɛse ala ole kyɛ, brasua ne yɛle bɔ né odikyɛ ɔyɛ ne. Ohũni Sisera!—Atemufoɛ 4:18-21; 5:24-27.

Bible Nu Dwirɛ Titire

w05 1/15 25 ¶5

Atemufoɛ Nwomaa Nanu Dwirɛ Titire

5:20—Atẽe beni aso yeɛ nzramaa fili anwuro hõ mane Barak ɔ?

Bible ne ngã kyɛ ebia abɔfo bokale bɛ, anaa nzramaa fili anwuro tete guale maa Sisera anyanzafoɛ nemɔ nye so tãne, anaakyɛ Sisera fale yenwo tole nzramaa nu nnealɛfoɛ so maa belili ye hwammɔ. Nakoso kyɛbɔ né ɔte biala ne, Yehowa yeɛ ɔbokale bɛ ɔ.

DECEMBER 6-12

NYAMEƐPIRI DWIRƐ NANU ASUADEƐ | ATEMUFOƐ 6-7

“Fa Anwoserɛ Bɔ Ele Ye Nala Kɔ”

w02 2/15 6-7

Bible Nu Nnyinasoɛdwirɛ Kɔhora Kɔboka Wɔ

Ebie bɔ né ɔse yenwo kyɛ ole subaen pá, ná ɔbɔ mmɔden kyɛ ɔkɔyɛ yenwo awiɛmvoɛ, yeɛ ole Gideon, tete Hebrifoɛ atemufoɛ nanu kõ. Né onguro kyɛ okoli Israelfoɛ nemɔ nyunu. Yeti mmerɛ bɔ bɛfrɛle ye kyɛ ooli bɛ nyunu ne, Gideon hãne kyɛ ɔmvata. Ohyirehyirele nu kyɛ: “Manase abusuakue mukoraati nu ne, m’abusua yeɛ yɛte awiɛmvoɛ koraa ɔ, na me baba awuro koso, me yeɛ nde kãa ɔ.”—Atemufoɛ 6:12-16.

w05 7/15 16 ¶3

“Yehowa Ne Gideon Ngrandɛ!”

Esuroen hãne Midianfoɛ ne paa! Mbofire nu ne, bɛtele kwangoa 300 bɔ ɔyɛ dédé, totorobɛndo 300 bɔ behu ɔ, ɔne mmienzua 300 bɔ bɛteɛtea nu mmerɛ bɔ ewienu ayɛ dinn ne. Mmerɛ bɔ Midianfoɛ nemɔ tele dédé kyɛ, “Yehowa ne Gideon ngrandɛ!” ne, bekũnu tele bɛ maa bɛ koso bɛteɛteane nu. Mmerɛ bɔ né bɛnye so atã ne, né bennwu sona bɔ ɔte bɛ damvo anaa bɛ pɔfoɛ ɔ. Mmienzua 300 ne hɔle so gyinane nekahorɛ mmerɛ bɔ Nyameɛpiri mane pɔfoɛ nemɔ bɔbɔ hwẽne bɛ ngrandɛ hũhũni bɛnwo ne. Bɛhãne ɛlɔen ne beguale, besili b’atẽe, na bɛpɛle atẽe tendenn bɛfõane bɛbɔ baha ne beehũni bɛ, kyɛbɔ ɔkɔyɛ a, Midianfoɛ ngɔwa ngɔha bɛ kõ ɔ. Afei de, né atianuserɛ, ne nhyɛsoɛ bɔ wahɔ so afoɛ pẽe ne bo apɛ.—Atemufoɛ 7:19-25; 8:10-12, 28.

Bible Nu Dwirɛ Titire

w05 1/15 26 ¶6

Atemufoɛ Nwomaa Nanu Dwirɛ Titire

6:25-27. Gideon yɛle ye nikyee nyanza nu, kyɛbɔ ɔkɔyɛ a, ye pɔfoɛ nemɔ ngɔfɛ yaa ɔ. Sɛ yɛkã edwirɛ pá ne a, odikyɛ yɛnea yé, ná y’angã edwirɛ bie bɔ ɔttemayé y’andia afoforɛ.

DECEMBER 13-19

NYAMEƐPIRI DWIRƐ NANU ASUADEƐ | ATEMUFOƐ 8-9

“Anwobrɛaseɛ Te Pá Tra Anwomasoɛ”

w00 8/15 25 ¶3

Sɛɛ Yeɛ Esiesie Edwirɛ Bɔ Ɔwɔ Ɛne Afoforɛ Afĩa Ɔ?

Mmerɛ bɔ né Gideon ne Midianfoɛ ne kõ ne, ɔfrɛle Efraimfoɛ nemɔ kyɛ bɛboka ye. Nakoso kõɛ ne wale ayieleɛ ne, Efraimfoɛ ne kakyili bɛnwo bɛhɔle Gideon so, na bɛhãne kyɛ mmerɛ bɔ kõɛ ne hyɛle yebo ne wamvrɛ bɛ. Twerɛtohɔ ne hãne kyɛ: “bɛne ye pɛle so paa.” Yeti Gideon buale bɛ kyɛ: “Nikyee titire beni yeɛ mayɛ bɔ odwu bɔ ɛmɔ ayɛ ye ɔ? Aso Efraim bobe bɔ wate maa waha yesĩ ne, ɔnzone ndera Abieza bobe abiribra? Ɛmɔ sa nu yeɛ Yehowa fale Midianfoɛ safohene Oreb ne Zeeb wurale ɔ, bɔ ɛmɔ ayɛ ne, ɔtte pá ndera bɔ mayɛ ne anaa?” (Atemufoɛ 8:1-3) Edwirɛ bɔ ɔkã ahõne he bɔ Gideon hãne ne, ɔnate so maa abusua nu ngondĩi bɔ enu yɛ se paa bɔ ahãa ɔkɔwa ne bo pɛle. Ebia ne Efraimfoɛ nemɔ tu benwo, na né bɛte dwɛɛ. Nakoso ɛhẽne anzi Gideon atẽe kyɛ, ɔkɔbɔ mmɔden kɔpena asomdwee ɔ. Yɛkɔhora yekosuesua ye anaa?

w17.01 20 ¶15

Bɔ Yeti Yeɛ Anwobrɛaseɛ Nwo Té Hia Ɔ

Gideon yɛle anwobrɛaseɛ nwo nneasoɛ bɔ ɔda nzorɛ ɔ. Mmerɛ bɔ Yehowa abɔfo limoa wale ye berɛ ne, ɛberɛ ala yeɛ Gideon hãne kyɛ, ɔte sona bɔ ɔmvata ɔ. (Atemufoɛ 6:15) Mmerɛ bɔ ole tole nu kyɛ ɔkɔyɛ Yehowa adwuma ne, Gideon nea nwuni kyɛ né ɔte bɔ ɔkwaayɛ nabo yé, na ɔfale yenwo tole Yehowa so penane akwangyerɛ. (Atemufoɛ 6:36-40) Né Gideon nzuro nikye, né ole akokoduro. Nakoso ɔneane yenwo so yé, na ɔfale anifere yɛle adwuma ne. (Atemufoɛ 6:11, 27) Wamva yenwo atẽe bɔ onyane ne wambena animnyam, mmom mmerɛ bɔ oyiele adwuma ne ala yeɛ ɔhɔle ye awuro ɔ.—Atemufoɛ. 8:22, 23, 29.

w08 2/15 9 ¶9

Fa Yehowa Atẽe So

Odikyɛ yenya “anwobrɛaseɛ adwene” na wamaa y’ayɛ Yehowa nnamvo. (1 Pet. 3:8; Ed. 138:6) Atemufoɛ yeti 9 ne maa yenwu bɔ yeti yeɛ odikyɛ yɛbrɛ yenwo ase ɔ. Gideon awa Yotam hãne kyɛ: “Mmerɛ bie, mmakaa mukoraati hɔle kyɛ bɛkwaapopa benu kõ maa odi bɛ so hene.” Na bɛbɔle Olive bakaa, borɔdoma bakaa, ɔne bobe bakaa dumaa. Né begyi berɛ bɛma mmeni titire bie bɔ né bɛwɔ Israel nakoso né benguro dibea ɔ. Nakoso ɛfõne—bɔ né bɛfa bɛsɔ sẽe ngome ne—ne ogyi berɛ ma Abimɛlek bɔ né ɔte ahandaen, na osa te wudiniɛ ne ahennie. Ɔwɔ nu kyɛ olili Israel so afoɛ nzã de, nakoso owuli mbatuwuo. (Ate. 9:8-15, 22, 50-54) Nea kyɛbɔ yenwo hia kyɛ yekonya “anwobrɛaseɛ adwene” ɔ!

Bible Nu Dwirɛ Titire

it-1 753 ¶1

Efɔd, I

Ɔmva yenwo kyɛ né Gideon fa adwene pá di ngunim bɔ Yehowa afa ama Israel nanwo ahurisie, ná ɔfa yenwo animnyam ma Nyameɛpiri ne, bɛmane efɔd ne “swale Gideon ne ye awurofoɛ nemɔ ngaen,” ofikyɛ Israelfoɛ nemɔ sõne ye kyɛ bɛ nyameɛ. (At 8:27) Nakoso Bible ne ngã kyɛ Gideon sõne efɔd ne bie, mmom somafoɛ Paul bɔle ye dumaa bokale ‘adanzefoɛ munungum’ bɔ belili nahorɛ, ná belili Yehowa nwo adanzeɛ kora yeɛ Kristo ba naso.—Heb 11:32; 12:1.

DECEMBER 20-26

NYAMEƐPIRI DWIRƐ NANU ASUADEƐ | ATEMUFOƐ 10-12

“Yɛfta—Bienzua Bɔ Ɔte Honhom Nuniɛ”

w16.04 7 ¶9

Sɛ Yedi Nahorɛ A, Nyameɛpiri De Yɛ To Nu

Bɛbɔ belili nahorɛ tekyɛ Yosef, bɔ ɔlale anwumvoinnwunɛ ali hyirɛle oliemamɔ—ɔmva yenwo kyɛ “bɛpɔle ye ne”—ɔkɔhora kɔwa kyɛ nneasoɛ bɔ ɔte sɔ ne hyɛle Yɛfta ngunaen paa. (Gye. 37:4; 45:4, 5) Mmerɛ bɔ Yɛfta dwenedwenene nneasoɛ bɔ ɔte sɔ nanwo ne, ɔbokale ye maa ɔyɛle bɔ ɔkɔsɔ Yehowa nye ɔ. Ɔwɔ nu kyɛ oliema nemɔ subaen hale ye paa de, nakoso ɛhẽne amma wanyakyi kyɛ ɔkɔsõ Yehowa ne Ye mmenia ɔ. (Atemufoɛ 11:9) Né kõɛ bɔ né ɔkɔfa kɔte Yehowa dumaa nwo ne hia ye tra nikyee foforɛ biala. Né wasi ye hue kyɛ okoli Yehowa nahorɛ, na ɛhẽne maa osili ɔne afoforɛ yé.—Heb. 11:32, 33.

it-2 27 ¶2

Yɛfta

Yɛfta, bienzua kokodurofoɛ ne anzɛkye mmerɛ koraa kyɛ okoli ye mmenia nemɔ nyunu. Ɔfale ngraa ɔɔmane Amon hene, na ɔhãne ye péin kyɛ, Amonfoɛ yeɛ bafa Israelfoɛ aseɛ ɔ. Ɔhene ne hãne kyɛ, Israelfoɛ nemɔ mmom yeɛ bale Amonfoɛ aseɛ bafi bɛsa nu ɔ. (At 11:12, 13) Ɛhe anu ne, Yɛfta hyirɛle kyɛ ɔtte kõfoɛ bɔ odi atuturasɛm bɔ ɔnze amammerɛ, mmom ɔse abakɔsɛm, titire bɔ ɔfa kyɛbɔ Nyameɛpiri ne Israelfoɛ nemɔ lili nanwo ne. Ɔbɔle Amonfoɛ nemɔ dwirɛ ne guale, na ohyirɛle kyɛ (1) Israelfoɛ nemɔ andeetee Amonfoɛ, Moabfoɛ, anaa Edomfoɛ (At 11:14-18; De 2:9, 19, 37; 2Be 20:10, 11); (2) Israelfoɛ ne dwuli berɛ ne, né aseɛ bɔ bɛkã yenwo dwirɛ ne, ɔtte Amonfoɛ deɛ, ofikyɛ sɔ mmerɛ ne, né sɔ aseɛ ne wɔ Kaananfoɛ ne Amorifoɛ sa nu, yeɛ Nyameɛpiri fale bɛ hene Sihon ne b’aseɛ mukoraati mane Israelfoɛ nemɔ ɔ; (3) Kɔyɛ afoɛ 300 bɔ wapɛ nu ne, né Amonfoɛ ne Israelfoɛ hãnne sɔ aseɛ nanwo dwirɛ llé; yede, nzuati yeɛ kesaalae de né bɛyɛ sɔ ne?—At 11:19-27.

it-2 27 ¶3

Yɛfta

Yɛfta maa edwirɛ nanu lale berɛ, mmerɛ bɔ ohyirele nu kyɛ bɔ ɔkɔ so ne te edwirɛ bɔ ɔfa sõen nwo ne. Ɔmaa bɛtele yebo kyɛ Yehowa yeɛ wafa aseɛ ne wama Israelfoɛ ɔ, yeti bɛngɔfa aseɛ ne bue kãamba pó bɛngɔma mmenia bɔ bɛsõ bosõen ne. Ɔhãne kyɛ Amonfoɛ sõ Kemos nyameɛ. Ebiemɔ susu kyɛ, ɛhe te mvomsoɛ bie bɔ olili ɔ. Ɔwɔ nu, né Amonfoɛ sõ Milkom, yeɛ Moabfoɛ sõ Kemos de, nakoso né sɔ maen ahoroɛ hemɔ bɔ bepingye so ne sõ nyameɛ pẽe. Ɔnate kyɛ Solomon gyale mmrasua bɔ né befi maen foforɛ so nati, ɔmaa ɔfale Kemos sõen wale Israel. (At 11:24; 1Ah 11:1, 7, 8, 33; 2Ah 23:13) Animdefoɛ biemɔ kyire kyɛ ebia né “Kemos” kyire “Bɔ ɔhyɛ afoforɛ so” anaa “Bɔ odi ebiemɔ so” ɔ. (Nea Gesenius’s Hebrew ne Chaldee Lexicon, bɔ S. Tregelles hyirele ye bo ne, 1901, p. 401.) Ebia Yɛfta hwẽne adwene hɔle sɔ nyameɛ naso, ofikyɛ né Amonfoɛ fa ‘ngunim bɔ belili,’ ɔne aseɛ bɔ ‘benyane’ nanwo animnyam bɛma ye.

Bible Nu Dwirɛ Titire

it-2 26

Yɛfta

Yɛfta, Ebie Bɔ Ɔte Dehyeɛ. Né Yɛfta maame te “tuutuuniɛ,” nakoso ɛhe ngyire kyɛ né Yɛfta te adwaman awa anaakyɛ ɔtte dehyeɛ. Né ye maame si tuutuu kora yeɛ ɔbaagya Gilead, kyɛ ɔye bɔ ɔtɔ so nyɔ ɔ, kyɛbɔ né mmerɛ bie ne, né Rahab si tuutuu, bɔ yesĩ ne oogyale Salmon ne. (At 11:1; Yos 2:1; Mat 1:5) Bɔ ɔmaa yenwui kyɛ Yɛfta ɔtte adwaman awa yeɛ ole mmerɛ bɔ, ye baba Gilead aye panyi ne mmaamɔ fõane ye fili awuro kyɛbɔ ɔkɔyɛ a, ongonya agyapadeɛ ne bie ne. (At 11:2) Afei koso, belɛle Yɛfta bɛtole nu kyɛ oli Gilead mmienzua nemɔ nyunu (bɔ ne oliemamɔ yeɛ né bɛte atitire ɔ). (At 11:11) Ebiekũ koso ne, ɔbɔle afɔleɛ mane Nyameɛpiri wɔ asɔre awuro berɛ. (At 11:30, 31) Né adwaman awa biala nne berɛ bɔ né ole yenwo atẽe sɔ ɔ, ofikyɛ Mmraa ne hyɛda hãne kyɛ: “Ɔnzɛkyɛ adwaman awa biala ba Yehowa asafo nu. Ye aworɛ ndoɔtoasoɛ bɔ ɔtɔ so buru bɔ bɛkoli ye sĩ bɛkɔwa po ne, bɛngɔhora bɛngɔwa Yehowa asafo nanu.”—De 23:2.

DECEMBER 27–JANUARY 2

NYAMEƐPIRI DWIRƐ NANU ASUADEƐ | ATEMUFOƐ 13-14

“Bɔ Awofoɛ Kɔhora Kosua Kofi Manoa Ne Ɔye Brɛ Ɔ”

w13 8/15 16 ¶1

Awofoɛ—Ɛmɔtete Ɛmɔ Mmaamɔ Befi Bɛ Ngwalaa Nu

Má yɛnea ebie bɔ bɛfrɛ ye Manoa bɔ ofi Dan abusuakue nanu, bɔ né ɔte tete Israel kuro bie bɔ bɛfrɛ ye Zora nu ne. Yehowa bɔfo hãhyirɛle Manoa aye bɔ né ɔte bonini (mmotaen) ne kyɛ, ɔkɔwo baa bienzua. (Ate. 13:2, 3) Aporowaa biala nne yenwo kyɛ edwirɛ he mane Manoa ne ɔye nye gyele paa. Nakoso né adwendwene atɔ bɛ so. Yeti Manoa bɔle mbaeɛ kyɛ: “Yehowa mepa wɔ kyerɛ. Yɛsrɛ wɔ, maa nahorɛ Nyameɛpiri ne abɔfo bɔ ɛsomane ye kesaalae ne sa bra, na oohyire yɛ nikyee bɔ odikyɛ yɛyɛ yɛfa akwalaa bɔ yɛbaawo ye nanwo.” (Ate. 13:8) Né akwalaa ne kyẽabie hia Manoa ne ɔye paa. Aporowaa biala nne yenwo kyɛ bɛfale Nyameɛpiri mmraa behyirehyirɛle bɛwa Samson, na nikyee pá fili nu wale. Bible ne kã kyɛ “Mmerɛ bie sĩ ne, Nyameɛpiri honhom hyɛle yebo yɛle adwuma wɔ [Samson] so.” Yeti mmerɛ bɔ Samson ɔɔyɛle temufoɛ wɔ Israel ne, ɔyɛle nzɛngyerɛneɛ pẽe.—Ate. 13:25; 14:5, 6; 15:14, 15.

w05 3/15 25-26

Samson Nate Yehowa Anwoserɛ So Lili Ngunim!

Mmerɛ bɔ Samson gu so onyi ne, “Yehowa hɔle so hyirale ye.” (Atemufoɛ 13:24) Ɛlɛhõ bie, Samson wale ye baba ne ye maame berɛ, na ɔhãhyirɛle bɛ kyɛ: “Manwu Filistiniɛ brasua bie wɔ Timna, na me pena kyɛ ɛmɔ kogya ye bɛma me.” (Atemufoɛ 14:2) Nea kyɛbɔ bɛnwo kodwiri bɛ ɔ. Kyɛ ahãa bɛwa ne kole Israelfoɛ nemɔ kofi bɛ pɔfoɛ nemɔ sa nu ne, afei de, ɔpena kyɛ ɔne bɛ kɔyɛ agyaa nhyehyɛeɛ. Né Nyameɛpiri mmraa bra kyɛ ebie kogya bɔ ɔsõ bosõen ɔ. (Ɛzadɔs 34:11-16) Yeti, ye awofoɛ nemɔ ambẽne so, na bɛhãne kyɛ: “Aso engonya brasua biala wɔ w’abusuafoɛ ne yɛ mmenia mukoraati nu bɔ ekogya ye, bɔ yeti ɛkɔ Filistifoɛ bɔ bɛmbɛ bɛ bienzua hemɔ nu ekogya braa ɔ?” Nakoso Samson hãne kyɛ: “Kogya ye ma me, ofikyɛ ye ala yeɛ mekuro ye ɔ.”—Atemufoɛ 14:3.

Bible Nu Dwirɛ Titire

w05 3/15 26 ¶1

Samson Nate Yehowa Anwoserɛ So Lili Ngunim!

Nzuati yeɛ Filistiniɛ brasua he ala yeɛ né Samson “kuro ye” ɔ? McClintock ne Strong’s Cyclopedia ne kã kyɛ, ɔtte kyɛ né yenwo yɛ “nyemene bo so, anaa ne ole animnyam,” bɔ né ɔte ole kyɛ, “ye yeɛ né ɔpena kyɛ ɔfa ye so di ye atirimbɔ nwo dwumaa ɔ.” Atirimbɔ beni yeɛ né okoli yenwo dwumaa ne? Atemufoɛ 14:4 ne kyirekyire nu kyɛ, né Samson “pena atẽe bɔ ɔkɔfa so konya Filistifoɛ nemɔ.” Ɛhẽne ati yeɛ né Samson nye gye sɔ brasua nanwo ne. Mmerɛ bɔ Samson nyini ne, “Yehowa honhom hyɛle yebo yɛle adwuma wɔ ye so” maa ɔyɛle nningyein pẽe. (Atemufoɛ 13:25) Yeti Yehowa honhom yeɛ ɔmaa Samson ɔɔpenane braa fili nekaa bɔ né bɛnnea atẽe ne, na ɛhẽne ala yeɛ ɔbokale ye wɔ ye dwumadié mukoraati nu kyɛ Israel temufoɛ ne. Aso Samson nyane yenwo atẽe bɔ né ɔpena ne anaa? Yelimoa yesusu kyɛbɔ Yehowa mane ye awerɛhyɛmuɛ kyɛ ɔkɔtá yesĩ nanwo.

    Sehwi Nningyein Ahoroɛ (2015-2026)
    Fité
    Kɔ Nu
    • Sehwi
    • Fa Kɔma Ebie
    • Hyehyɛ Ye Kyɛbɔ Ekuro Ɔ
    • Copyright © 2025 Watch Tower Bible and Tract Society of Pennsylvania
    • Yenwo Mmraa
    • Wɔnwo Dwirɛ Nwo Mmraa
    • Kyɛbɔ Ɛpenakyɛ Yɛfa Wɔnwo Dwirɛ Yɛdi Dwumaa Ɔ
    • JW.ORG
    • Kɔ Nu
    Fa Kɔma Ebie