Nhwehwɛmuɛ Ma Abrabɔ Ne Asɛnga Adesua Nwomaa
JANUARY 3-9
NYAMEƐPIRI DWIRƐ NANU ASUADEƐ | ATEMUFOƐ 15-16
“Mmenia Bɔ Bɛye Afoforɛ Bɛma—Ɔte Atianuserɛ Nikyee Paa!”
w12 4/15 8 ¶4
Mmenia Bɔ Bɛye Afoforɛ Bɛma—Ayieleɛ Mmerɛ Nanwo Nzɛngyerɛneɛ!
Bɔ olimoa ne, susu temufoɛ Samson bɔ né wate watɔ Delila dɔ nu nanwo nea. Né Samson pena kyɛ odi Nyameɛpiri mmenia nyunu ne Filistifoɛ nemɔ kɔkõ. Ɔkɔyɛ kyɛ Filistifoɛ ahemvo nnu ne nwuni kyɛ Delila nnɔ Samson, yeti Filistifoɛ ahemvo nemɔ mane ye sikaa pirikua kyɛ ɔpena nikyehorɛtibɔ Samson nwo yɛ se sɔ ne, na wamaa bahora babrɛ y’ase. Delila bɔ né yenye boro nikyee ne penene so, na ɔbɔle mmɔden pɛen nza kyɛ ɔkonwu nikyehorɛtibɔ Sampson le anwoserɛ sɔ ne, nakoso waanyɛ yé. Yeti daa ne “ɔfa edwirɛ ne dwane yenwo.” Afei Samson “nwo teeteele ye, na onyane ewue pó a, ahãa okowu.” Yeti ɔhãhyirɛle ye kyɛ, ɔyelle ye ti nwiaa llé, yeti sɛ ɔye a, y’anwoserɛ mukoraati koyie. Mmerɛ bɔ Delila nwuni ye sɔ ne, ɔdedale Samson wɔ yesɔ so, na ɔmaa ebie ɔɔyele ye ti nwiaa ne, na ɔfale Samson mane yepɔfoɛ nemɔ maa bɛyɛle ye bɔ bekuro ɔ. (Ate. 16:4, 5, 15-21) Bɔ Delila yɛle ne kyire kyɛ né ye tianu yɛse paa! Ɔnate esikaa anyeborolɛ ti, Delila yele ebie bɔ né ɔdɔ ye ne mane.
w05 1/15 27 ¶5
Atemufoɛ Nwomaa Nanu Dwirɛ
14:16, 17; 16:16. Sɛ ebie fa nhyɛsoɛ ne ndeɛteamuɛ yɛ nikyee a, ɔkora sɛkye abusua.—Anyandera 19:13; 21:19.
w12 4/15 11-12 ¶15-16
Mmenia Bɔ Bɛye Afoforɛ Bɛma—Ayieleɛ Mmerɛ Nanwo Nzɛngyerɛneɛ!
Nzu yeɛ odikyɛ agyaafoɛ yɛ, na bahora bali bɛnwo nahorɛ daa ɔ? Nyameɛpiri Dwirɛ kã kyɛ: “Ɛne wɔ mmrandeɛ mmerɛ nu aye [anaa ehu] nye gye” osa kã kyɛ, “Ɛne ɛye [anaa ehu] bɔ ɛdɔ ye ne nye gye.” (Any. 5:18; Ɔsɛ. 9:9) Mmerɛ bɔ agyaafoɛ nemɔ nyi ne, odikyɛ “benu biala yɛ bɔ ɔkɔhora” maa agyaa ne só, ná bɛboka bɛnwo wɔ anwoɔnaen nu, ɔne ngãte fanu. Bɔ ɛhe kyire yeɛ ole kyɛ, agyaafoɛ ne kɔyɛ asoɛ bekotie bɛnwo yé, bekonya mmerɛ bɛkɔma bɛnwo, ná bapingyé bɛnwo koso. Odikyɛ bɛyere bɛnwo bɛmaa bagyaa ne gyina, ná bɛne Yehowa afĩa koso yɛ pá. Sɛ agyaafoɛ kɔhora kɔyɛ ɛhe a, odikyɛ bɛ bonu besua Bible ne, bɛ bonu bɛkɔ asɛnga, ná bɛ bonu bɛbɔ mbaeɛ bɛfa bɛpena Yehowa nhyiraa.
KƆSO DI YEHOWA NAHORƐ
Sɛ asafo nanuniɛ bie yɛ bɔne bɔ enu yɛ nõ a, bɛma ye ndeɛnsoɛ “bɔ enu yɛ se, kyɛbɔ ɔkɔyɛ a, ɔkɔyɛ se wɔ gyidie nanu ɔ.” (Tito 1:13) Ebiemɔ wɔ berɛ a, ɔnate bɛ subaen ti, betu bɛ befi asafo nanu. “Bɛbɔ bɛmaa ndeɛnsoɛ ne tete bɛ ne,” bɛkora begyina begyaso biekũ wɔ Nyameɛpiri sõen nu. (Heb. 12:11) Yede, sɛ betu yɛ busuaniɛ bie, anaa yɛ damvo bie bɔ yɛdɔ ye paa koso ɛ? Sɛ ɔba sɔ a, Nyameɛpiri bɔ yekoli nahorɛ yɛkɔma ye ne, yeɛ yenwo hia ɔ, na mmom ɔtte sona ne. Yehowa ahãhyire yɛ kyɛ nnɛmaa yɛne ebiala bɔ bekotu ye ne bɔ, yeti bɔ yɛkɔyɛ wɔ sɔ tebea nanwo biala ne, Yehowa nea yɛ.—Kenga 1 Korintofoɛ 5:11-13.
Bible Nu Dwirɛ Titire
w05 3/15 27 ¶6
Samson Nate Yehowa Anwoserɛ So Lili Ngunim!
Samson fale y’adwene siele ye botaeɛ bɔ yeɛ ole kõɛ bɔ né ɔkɔhõ kotia Filistifoɛ naso. Samson botaeɛ bɔ yeɛ ole kyɛ, ɔkɔhõ kotia Nyameɛpiri pɔfoɛ ne maa ɔhɔle tuutuuniɛ bie awuro wɔ Gasa. Né Samson hia nekaa bɔ okosikye sɔ kɔngɔen ne wɔ ye pɔfoɛ kuro bie nu, na né nekaa bɔ okonya kɔla yeɛ ole sɔ tuutuuniɛ n’awuro. Né adwamammɔ nwo adwene biala ɔnne Samson tianu. Kɔngɔen mminigã yeɛ ofili brasua n’awuro berɛ ɔ, na ɔsɔle kuro nanoa, ne ye bonima nyɔ nanu, na otuli fa tole ye kɔme anwo fo hɔle bokaa bɔ opingye Hebron ne ti afĩa, na né efi berɛ bɔ ɛkɔ ne, ye tendenn te kɔyɛ kwanzii 37 [60 km]. Nyameɛpiri penene bɔ ɔyɛle naso, na ye yeɛ ɔmane y’anwoserɛ maa ɔfa yɛle sɔ ɔ.—Atemufoɛ 16:1-3.
JANUARY 10-16
NYAMEƐPIRI DWIRƐ NANU ASUADEƐ | ATEMUFOƐ 17-19
“Sɛ Yebu Nyameɛpiri Mmraa So A, Yenwu Amaneɛ”
it-2 390-391
Mika
Né ofi Efraim. Mika buli Mmraa Dwirɛ Bru nanu bɔ ɔtɔ so mmɔtwɛ naso (Ɛz 20:15), ofikyɛ owuale ye maame sikaa bɔ né ɔte dwetɛ 1,100. Mmerɛ bɔ ɔpakyele nu hãne bɔ wayɛ, na osa fale ye maame sikaa mane ye ne, ye maame hãne kyɛ: “Bɔ ɔte biala, ngoyira dwetɛ bɔ ɔwɔ mesa nu he aso ngɔma Yehowa, ná mma he afa ayɛ honi bɔ basé, ɔne buralɛ honi, yeti ngosa ngɔfa ngɔma wɔ.” Yeti ɔfale dwetɛ nanu 200 mane ebie bɔ ɔyɛ dwetɛ nwo adwuma, na ɔfa yɛle “honi bɔ basé ɔne buralɛ honi,” na ɔfa siele Mika awuro. Né Mika le “bosõen sua,” yeti ɔyɛle Efɔd ne Terafim honi fa siele nu, na ɔmaa ɔwa kõ yɛle sɔfo mane ye. Ɔwɔ nu kyɛ ne y’adwene yɛ ye kyɛ ɔyɛ sɔ nikyee ne fa hyɛ Yehowa animnyam de, nakoso né ɔttemaye koraa, ofikyɛ né wabu mmraa bɔ ɔfa abosonzom, (Ɛz 20:4-6) ɔne Yehowa asɔre awuro ne ye asɔfolilɛ nwo nhyehyɛeɛ naso. (At 17:1-6; De 12:1-14) Yesĩ ne, Mika fale Yonatan bɔ ɔte Mose awa Gershom ye bosoniɛ ne hɔle y’awuro, na ɔfale sɔ Leviniɛ abrandeɛ he maa ɔsõne kyɛ ye sɔfo bɔ ɔkɔtua ye kerɛ ɔ. (At 18:4, 30) Né Mika adwene yɛ ye kyɛ bɔ ɔyɛ ne te pá, yeti ɔhãne kyɛ: “Kesaalae de, Yehowa ne me koli ye yé.” (At 17:7-13) Nakoso né Yonatan tte Aaron bosoniɛ, yeti né ɔmvata kyɛ odi sɔfo koraa, ɛhe bɔ Mika yɛle ne maa ye mvomsoɛ yɛle pirikua.—Nu 3:10.
it-2 391 ¶2
Mika
Ɛhene sĩ mmerɛ tikaapẽ bie ne, Mika ne mmienzua bie bɔ bɛboka ye so ne pole Danfoɛ nemɔ aso. Mmerɛ bɔ ɔɔtole Danfoɛ ne, bebisale ye nikyehorɛtibɔ oli besi ne, yeɛ Mika hãne kyɛ: “Ɛmɔ afa me nyameɛ bɔ mayɛ nemɔ, na sɔfo ne koso ɛmɔ afa ye babokaso bahɔ, na nzu yeɛ waha me sa nu ɔ?” Ɔwale sɔ ne, Danfoɛ nemɔ bɔle ye kɔkɔ kyɛ, ɔyakyi ye ndeɛteamuɛ bɔ ɔfa di besĩ ne, wanyɛ sɔ a, bɔ okosi ne ttemayé. Mmerɛ bɔ Mika nwuni kyɛ bɛnwo yɛse tra ye ne, osale yesi hɔle ye awuro. (At 18:22-26) Ɛhene sĩ ne, Danfoɛ ne hũhũni Lais kuro nanufoɛ mukoraati, na bɛfale sẽe bɛtole kuro nanu, na bɛkyekyele foforɛ kyɛ Danfoɛ kuro. Yonatan ne ye mmaa nemɔ sõne kyɛ asɔfo wɔ Danfoɛ nemɔ aso, na bɛfale Mika “honi bɔ wasé ne besiele berɛ bɛmane bɛnwo wɔ ngyẽa bɔ ne nahorɛ Nyameɛpiri ne awuro [ɛtena sua ne] wɔ Silo ne mukoraati nu.”—At 18:27-31.
Bible Nu Dwirɛ Titire
w15 12/15 10 ¶6
Nyameɛpiri Dwirɛ Ne Ngyerɛaseɛ Bɔ Enu La Berɛ Ɔ
Adanzeɛ bɔ yegyĩ so yɛfa Nyameɛpiri dumaa ne yedi dwumaa wɔ Bible nanu ne, omminini, mmom ebie aabokaso. Ewiase Foforɛ Ngyerɛaseɛ bɔ bayɛ ye foforɛ bɔ bɛyele y’ali wɔ 2013 nu ne, ɔfale Nyameɛpiri dumaa yɛle adwuma mbɛen 7,216, sɛ yɛfa 1984 ngyerɛaseɛ ne yɛtoto yenwo a, yasa y’anwu dumaa ne 6 yaboka so. Benwuni bɔ waaboka so nanu nnu wɔ 1 Samuel 2:25; 6:3; 10:26; 23:14, 16. Bɔ ɔmaa bɛfale sɔ nnu ne bɛbokale so yeɛ ole kyɛ, besa benwuni dumaa ne wɔ Ɛpo Bɔ Wawu Nwomaa Mmɔbɔeɛ bɔ ɔwale kɔbo afoɛ 1,000 kora yeɛ Hebri Masoretic ndworɔleɛ ne ba nanu. Bɔ ɔmaa bɛfale kõ bɔ ɔwɔ Atemufoɛ 19:18 ne bewurale berɛ ne yeɛ ole kyɛ, bayɛ nhwehwɛmuɛ wɔ tete asaanoa ndworɔleɛ nanu banwui kyɛ né ɔwɔ berɛ.
JANUARY 17-23
NYAMEƐPIRI DWIRƐ NANU ASUADEƐ | ATEMUFOƐ 20-21
“Kɔso Bisa Yehowa”
w11 9/15 32 ¶2
Sɛ Eyia Ɔhaw A, Aso Ɛkɔhora Kɔyɛ Tekyɛ Finehas?
Mmerɛ bɔ mmienzua biemɔ bɔ bɛte Gibeafoɛ, bɔ befi Bɛngyamin abusuakue nanu ne tole Leviniɛ bie sómaa monaa na behũni ye ne, abusuakue bɔ baha ne boaboale bɛnwo kyɛ bɛne Bɛngyaminfoɛ ne kwaahõ. (Ate. 20:1-11) Bɛbɔle Yehowa mbaeɛ kora yeɛ bɛne bɛ kwaahõ ɔ, nakoso belili nguguo pirikua pɛen nyɔ. (Ate. 20:14-25) Aso bɛhãne kyɛ mvasoɛ biala amma mbaeɛ bɔ bɛbɔle naso anaa? Ɛnea a, né Yehowa nye gye agyirɛ bɔ batu kyɛ, bekoli tebea tɛɛ bɔ ɔhɔle so nanwo dwumaa ne anaa?
w11 9/15 32 ¶4
Sɛ Eyia Ɔhaw A, Aso Ɛkɔhora Kɔyɛ Tekyɛ Finehas?
Asuadeɛ beni yeɛ yenya yefi ɛhe anu ɔ? Ɔtɔ mmerɛ bie a, ɔmva yenwo ne mmɔden ne mbaeɛ bɔ asafo nu mbanyi ne kɔbɔ kɔfa kɔpena Nyameɛpiri berɛ mmokalɛ mukoraati sĩ ne, ebia ɔhaw bie bɔ ɔkɔso wɔ asafo nanu ne ngofi berɛ. Sɛ ɔba sɔ a, mbanyi ne bɔ mmɔden kyɛ bɛkɔmaa Yesu dwirɛ he kɔtena b’adwene nu: “Ɛmɔhɔso bebisa [anaa bɛbɔ mbaeɛ] na ɔkɔfa kɔma ɛmɔ; ɛmɔhɔso bɛbɔ nu, na okobukye ɛmɔ.” (Luka 11:9) Sɛ mbanyi ne annya bɛ mbaeɛ nanwo mmuaeɛ ndɛ pó a, odikyɛ benya awerɛhyɛmuɛ kyɛ, Yehowa kɔma bɛ mbaeɛ nanwo mmuaeɛ wɔ mmerɛ bɔ ɔte pá nu.
Bible Nu Dwirɛ Titire
w14 5/1 11 ¶4-6
Ɛse?
Sɛɛ yeɛ né bɛfa tae bedi dwumaa wɔ kõɛ nu wɔ tete mmerɛ nu ɔ?
Tae yeɛ ɔte akõdeɛ bɔ David fa hũni Goliat bɔ né ɔte kwabranoa ne ɔ. Mmerɛ bɔ ne David te abɛmaa bɔ ne ɔnea mmoaen so ne, yeɛ osuane kyɛbɔ bɛfa sɔ akõdeɛ he bedi dwumaa ɔ.—1 Samuel 17:40-50.
Wɔ Bible mmerɛ nu ne, né Egyptfoɛ ne Asiriafoɛ ayɛ tae nwo mvonini pẽe. Ne sɔ tae ne te kaka nwomaa bɔ bafa nyamaa nyɔ basɔ bɛen ne famaa ɔ. Nyɔboɛ kurukuru bɔ yenwo yɛ ndonõ, bɔ ye piri tekyɛ akengaa, nakoso enu yɛ nõ tra akengaa yeɛ ne bɛfa bewura tae nanu bɛto ɔ. Sɛ ebie to sɔ tae ne a, né ɔma so kɔ anwuro, afei obiri ye wɔ anwuro alaa ná wayakyi nyamaa ne kõ anu, na nyɔboɛ ne afi tae nanu hwii waabɔ nekaa bɔ ɔkɔfa kohyire ne pɛpɛɛpɛ.
Sɛ ɛkɔ Middle East a, bɛbɔ betutu aseɛ nwo ne anwu tae nyɔboɛ pẽe bɔ bɛfa belili dwumaa wɔ kõɛ nu wɔ tete mmerɛ nu ɔ. Ɔkɔyɛ kyɛ ne kõfoɛ bɔ ɔse tae to paa ne, ɔkora to maa nyɔboɛ ne pɛ kwanzii 100 kodwu 150 wɔ dɔnhwere kõ nu. Animdifoɛ pẽe nné ndonu kyɛ ne sɔ tae ne kora kɔ ndɛndɛ tekyɛ agyan, nakoso kyɛbɔ ɔkora di awue ne de, bemu bɛdé bɛto nu.—Atemufoɛ 20:16.
JANUARY 24-30
NYAMEƐPIRI DWIRƐ NANU ASUADEƐ | RUT 1-2
“Da Ɔdɔ Kann Ali”
w16.02 14 ¶5
Suesua Yehowa Nnamvo Bɔ Bepingyé Ye Ne
Né ahãa Rut kɔhora konya adwene ndɛ kyɛ ole abusuafoɛ wɔ Moab—ofikyɛ né ye maame ne ye mmusuafoɛ wɔ berɛ bɔ bɛkɔhora bɛkɔboka ye, na banea ye wɔ ye kuna lilɛ nu ɔ. Né Moab te ye kuro. Né ye nye gye ye amammerɛ, ye dwudwolɛ, ɔne ye mmenia nwo. Né Naomi ngɔhora ngɔhyɛ bɔ kyɛ, ɔkɔhora kɔmaa Rut sa kɔhã sɔ nningyein ne mukoraati wɔ Bɛtlɛhɛm. Yeti, ɔhyɛle Rut ngunaen kyɛ osa hɔ Moab. Né Naomi suro kyɛ, ogonya hũɛ ɔne awuro bɔ yesia nemɔ kɔtena nu ngɔma bɛ. Nzu yeɛ né Rut kɔyɛ ɔ? Rut de, né ɔtte kyɛ Orpa bɔ “osa hɔle ye mmenia ɔne ye nyameɛmɔ” berɛ ne koraa. (Rut 1:9-15) Aso né Rut kuro kyɛ osa kɔsõ bosõen bɔ ye mmenia sõ bɛ ne anaa? Daabi, né ɔmbena kyɛ ɔyɛ sɔ.
w16.02 14 ¶6
Suesua Yehowa Nnamvo Bɔ Bepingyé Ye Ne
Ɔkɔhora kɔwa kyɛ, né Rut ahũ bɔ né wawu ne, anaakyɛ Naomi yeɛ bɛbokale ye maa ɔɔtele Yehowa Nyameɛpiri nwo dwirɛ ɔ. Né Yehowa ttekyɛ Moab nyameɛ nemɔ. Né Rut se kyɛ, odikyɛ ɔsõ Yehowa ná ɔdɔ ye. Né Yehowa nwo nimdeɛ bɔ okonya ne ngome nzone. Né odikyɛ Rut si gyinaeɛ. Aso né ɔkɔfa Yehowa kyɛ ye Nyameɛpiri anaa? Rut sili gyinaeɛ pá. Ɔhãhyirɛle Naomi kyɛ “wɔ mmenia kɔyɛ me mmenia, na wɔ Nyameɛpiri ayɛ me Nyameɛpiri.” (Rut 1:16) Kyɛbɔ né Rut dɔ Naomi ne kã ahõne, nakoso ɔdɔ bɔ né Rut lé ma Yehowa ne te nikyee bɔ yenwo hia paa kyɛ yesusu yenwo ɔ. Nziɛen, Boaz bɔ ne ole agyapadeɛ pẽe ne kamvole Rut kyɛ, waafa yenwo waawura Yehowa ndaa bo ɔ. (Kenga Rut 2:12.) Bɔ Rut yɛle ne tekyɛ anomaa ba bie bɔ wanwati waawura ye maame ndaa bɔ anwoserɛ wɔ nu nabo ɔ. (Ed. 36:7; 91:1-4) Yehowa ɔɔyɛle awofoɛ mane Rut. Na otuale ye kerɛ wɔ gyidie bɔ ɔlale y’ali nanwo, na waanu yenwo llé kyɛ osili sɔ gyinaeɛ ne ɔ.
Bible Nu Dwirɛ Titire
w05 3/1 27 ¶1
Rut Nwomaa Nanu Dwirɛ
1:13, 21—Ɔhaw ahoroɛ bɔ ɔtole Naomi ne, aso Yehowa yeɛ ɔfawale yeso anaa? Daabi, na Naomi koso angã kyɛ Nyameɛpiri yeɛ wafa ɔhaw ne wawa ye so ɔ. Wɔ bɔ ɔtole ye ne mukoraati nu ne, né y’adwene yɛ ye kyɛ Yehowa ammoka ye. Ye wora bɔle, na ɔtele ngã kyɛ ɔmvata koraa. Afei koso, sɔ mmerɛ nanu ne, sɛ ebie wo mmaa a, ne bebu ye kyɛ b’ahyira ye, na sɛ ebie anwo a, né bebu ye kyɛ b’adome ye. Mmerɛ bɔ Naomi mmaa mmienzua nyɔ nemɔ wuwuli, ná waanya nnomaa biala ne, ɔtele ngã kyɛ Yehowa aberɛ ye ase.
JANUARY 31–FEBRUARY 6
NYAMEƐPIRI DWIRƐ NANU ASUADEƐ | RUT 3-4
“Bɔ Mmɔden Kyɛ Ekonya Dumaa Pá, Na Tira Nu Yé”
w12 10/1 22 ¶5
“Brasua Pá”
Aprowaa biala ne yenwo kyɛ, Boaz fale komviɛ bɔ ɔla ase yeɛ ɔkyekyele Rut wora ɔ. Ɔhãne kyɛ: “Yehowa yira wɔ mma. Ɔdɔ kann bɔ ala ye ali ɛnnɛ ne, ɔtra dàa deɛ ne koraa, ofikyɛ angɔ anni mmrandeɛ nemɔ sĩ, kyɛ bɛte ahiafoɛ anaa asikafoɛ.” (Rut 3:10) “Ɔdɔ kann bɔ ala ye ali ɛnnɛ,” bɔ Boaz hãne ne, né okyire kyɛbɔ Rut ali Naomi sĩ wawa Israel, ná ɔnea ye ne. “Ɔdɔ bɔ ɔtra dàa deɛ” ne te ye tebea bɔ né ɔwɔ nu sɔ mmerɛ ne. Né Boaz pena kyire kyɛ, ahãa Rut bɔ ɔte taliwa ne kɔhora koogya mmrandeɛ nemɔ bie ɔmva yenwo kyɛ bɛte asikafoɛ anaa ahiafoɛ ne. Nakoso, né Rut penakyɛ ɔyɛ Naomi, ɔne Naomi ahũ bɔ wawu ne pá, kyɛbɔ ɔkɔyɛ a, brienzua bɔ wawu ne dumaa ngofi ye abusua nu ɔ. Ɛhene ati yeɛ Boaz kamvole brasua bɔ né ɔtte pɛsɛmangomenya ne.
w12 10/1 23 ¶1
“Brasua Pá”
Mmerɛ bɔ Boaz hãhyirɛle Rut kyɛ, mmenia mukoraati se kyɛ ɔte “brasua pá ne”—nea kyɛbɔ ɔmaa y’ahõne tɔle ye kunu ɔ! Aprowaa biala ne yenwo kyɛ Rut hue bɔ né wasi kyɛ ɔkɔsõ Yehowa ne, yeɛ ɔmaa onyane sɔ dumaa pá ne ɔ. Ofili y’ahõne nu lɛle amammerɛ bɔ né ɔnze yenwo hwee ne tole nu, na ɔfa lale ayemyé pirikua ali hyirɛle Naomi ne ye mmenia. Sɛ yesuesua gyidie bɔ Rut lale ye ali ne a, yɛkɔbɔ mmɔden yekohyire obuo yɛkɔma afoforɛ, ɔne b’amammerɛ. Yɛyɛ sɔ a, yɛkoso yɛkonya dumaa pá.
w12 10/1 24 ¶3
“Brasua Pá”
Boaz gyale Rut. Ɛhene sĩ ne, Bible ne kã kyɛ: “Yehowa maa ɔnwonzɛle, na ɔwole baa brienzua.” Mmrasua bɔ bɛwɔ Bɛtlɛhɛm ne yirale Naomi, na bɛyele Rut ayɛ kyɛ mvasoɛ wɔ ye so ma Naomi tra mmaa mmienzua nzoo bɔ ahãa Naomi kɔwo bɛ pó ɔ. Nziɛen yeenwuni kyɛ, Rut ɔɔyɛle Ɔhene pirikua David nana brasua panyi. (Rut 4:11-22) Na David koso ɔɔyɛle nana brienzua panyi mane Yesu Kristo.—Mateo 1:1.
Bible Nu Dwirɛ Titire
w05 3/1 29 ¶3
Rut Nwomaa Nanu Dwirɛ
4:6—Atẽe beni aso yeɛ ebie kora “sɛkye” ye bɔbɔ deinn y’agyapadeɛ mmerɛ bɔ waatɔ agyapadeɛ foforɛ bie ne? Bɔ olimoa ne, sɛ hianiɛ bie tɔne ye agyapadeɛ na ɔbaasa tɔ a, odikyɛ ɔsesẽ fi afoɛ bɔ ɔtɔnene agyapadeɛ ne fa badwu anwofadie afoɛ naso, na ɔfá sona bɔ ɔtɔle agyapadeɛ ne sikaa ma ye, na odé y’agyapadeɛ. (Levitikɔs 25:25-27) Sɔ bɔ ɔkɔyɛ ne kɔmaa y’agyapadeɛ naso kɔte. Nakoso, sɛ Rut wo baa brienzua a, ɔwa sɔ ne yeɛ né agyapadeɛ ne kooli ye sa nu ɔ, na ɔtte koliagyaa ne, anaa ye bosoniɛ biala.
FEBRUARY 7-13
NYAMEƐPIRI DWIRƐ NANU ASUADEƐ | 1 SAMUEL 1-2
“Fi W’ahõne Nu Bɔ Yehowa Mbaeɛ”
ia 55 ¶12
Ofili Y’ahõne Mukoraati Nu Bɔle Nyameɛpiri Mbaeɛ
Hanna ayɛ mbaebɔ nwo nneasoɛ ama Nyameɛpiri asomvoɛ mukoraati. Yehowa penakyɛ ye asomvoɛ fi b’ahõne nu bɛbɔ ye mbaeɛ, bɔ bɛngɔfa hwee bengosie ye ɔ, kyɛbɔ akwalaa bɔ ole y’awofoɛ nu anwotɔsoɛ fi y’ahõne mukoraati nu kã ye haw kyire bɛ ne, sɔ ala yeɛ Yehowa penakyɛ yɛkã yɛ haw mukoraati yekyire ye ɔ. (Kenga Edwein 62:8; 1 Tɛsalonikafoɛ 5:17.) Honhom hãne somafoɛ Petro maa ɔhworɔle awerɛkyekye dwirɛ, bɔ ɔfa mbaeɛ bɔ yɛkɔbɔ Yehowa nanwo kyɛ: “Ɛmɔto ɛmɔ dadwene mukoraati begua ye so, ofikyɛ ɔdwene ɛmɔnwo.”—1 Pet. 5:7.
w07 3/15 16 ¶4
Kyɛbɔ Hanna Nyane Asomdwee Ɔ
Nzu yeɛ yɛkɔhora yekosua yekofi ɛhe amukoraati nu ɔ? Sɛ yɛbɔ Yehowa mbaeɛ a, odikyɛ yɛkã ɔhaw bɔ yɛfa nu, kyɛbɔ yɛte ngã, ɔne bɔ yɛ pena kyɛ ɔyɛ mayɛ nanwo dwirɛ yekyire ye. Sɛ yɛngɔhora yɛngɔyɛ ɔhaw nanwo hwee a, odikyɛ yɛyakyi nu yɛma ye. Ná yɛfa yɛnwo yɛto ye so.—Anyandera 3:5, 6.
Bible Nu Dwirɛ Titire
w05 3/15 21 ¶5
Samuel Nwomaa Bɔ Olimoa Nanu Dwirɛ
2:10—Nzuati yeɛ Hanna bɔle mbaeɛ kyɛ Yehowa “má ye hene ne anwoserɛ” mmerɛ bɔ né sona biala nni Israel so hene ne? Né bahã ye wɔ Mose Mmraa nanu kyɛ, Israelfoɛ konya ɔhene bɔ ɔte sona ɔ. (Deuteronomi 17:14-18) Mmerɛ bɔ ne Yakob la ye wue bɛen so ne, ɔhyɛle ngɔm kyɛ: “Ɛhɔtɔ [bɔ ɔte tumidie nwo nzɛngyerɛneɛ] ngofi Yuda sanu llé.” (Gyenɛsis 49:10) Afei koso, Yehowa hãfale Sara—bɔ ɔte Israelfoɛ nana brasua panyi—nanwo kyɛ: “Ahemvo kofi ye nu kɔwa.” (Gyenɛsis 17:16) Yeti ɛwa ne, né Hanna bɔ ɔhene bɔ ɔkɔwa kyẽabie nanwo mbaeɛ.
FEBRUARY 14-20
NYAMEƐPIRI DWIRƐ NANU ASUADEƐ | 1 SAMUEL 3-5
“Yehowa Dwene Sona Nwo”
w18.09 24 ¶3
Ɔte Nikyee Mukoraati So Tumvoɛ, Nakoso Ɔdwene Sona Nwo
Né Samuel te akwalaa koraa mmerɛ bɔ ɔhyɛle yebo “sõne Yehowa” wɔ ɛtena sua nanu ne. (1 Sam. 3:1) Ɛlɛhõ kɔngɔen bie, né Samuel dé ye nwomeɛ, na edwirɛ bɔ ɔyɛ nwanwa bie sili. (Kenga 1 Samuel 3:2-10.) Ɔtele kyɛ komviɛ bie bɔ ye dumaa frɛ ye. Né Samuel adwene yɛ ye kyɛ Sɔfo Panyi Eli yeɛ ɔfrɛ ye ɔ, yeti otuli mmirika hɔle ye berɛ ɔɔhãne kyɛ: “Me ɛhe, mate kyɛ ɛfrɛ me.” Eli hãne kyɛ ɔfrɛlle ye. Mmerɛ bɔ komviɛ ne frɛle ye pɛen nyɔ so ne, Eli nwuni kyɛ ɔte Nyameɛpiri yeɛ ɔfrɛ Samuel ɔ. Yeti ohyirɛle akwalaa ne kyɛbɔ okosuro so ɔ, na Samuel tiele. Nzuati yeɛ Yehowa bɔ né ɔnate ye bɔfoɛ so odwudwo ne, waanye yenwo ali wangyire Samuel mmerɛ bɔ olimoa ne? Ɛhene de Bible ngã, nakoso kyɛbɔ tebea ne yɛle ne maa ɔda ali kyɛ, né Nyameɛpiri dwene Samuel bɔ ɔte akwalaa nanwo. Atẽe beni aso?
w18.09 24 ¶4
Ɔte Nikyee Mukoraati So Tumvoɛ, Nakoso Ɔdwene Sona Nwo
Kenga 1 Samuel 3:11-18. Yehowa Mmraa hyɛ ngwalaa kyɛ, behyire obuo bɛma mbanyi, ye titire ne, ebie bɔ ole tumi ne. (Ɛz. 22:28; Lev. 19:32) Pɛ yenwo mvonini kyɛ Samuel kɔ Eli nyunu ngyerɛmɔ, aso ɔkɔhora konya akokoduro kɔhã Nyameɛpiri atemuo dwirɛ bɔ ye noa yɛ hye ne kohyire ye anaa? Daabi! Nahorɛ nu, tworɔtohɔ ne maa yenwui kyɛ, né Samuel “suro kyɛ ɔkɔhã anyeɛsonikyeenwunɛ nanwo dwirɛ kohyire Eli.” Nakoso, né Nyameɛpiri amaa Eli anwui kyɛ Ye yeɛ ɔfrɛ Samuel ne. Ɔnate ɛhe ati, Eli mane Samuel nwo atẽe kyɛ odwudwo. Eli hãhyirɛle ye kyɛ, “[nnɛfa] edwirɛ bɔ ɔhãhyirɛle wɔ nanu kõ po fea me.” Samuel yɛle sotie, yeti “ɔhãne edwirɛ ne mukoraati hyirɛle ye.”
Bible Nu Dwirɛ Titire
w05 3/15 21 ¶6
Samuel Nwomaa Bɔ Olimoa Nanu Dwirɛ
3:3—Aso Samuel lale Krongron Nu Krongron nekaa berɛ anaa? Daabi, wanna berɛ. Né Samuel te Leviniɛ bɔ né ofi Kohate abusua nu ɔ, na né ɔbboka abusua bɔ bɛsõ kyɛ asɔfo naso. (1 Beresosɛm 6:33-38) Yeti, né ollé yenwo atẽe kyɛ “okonwu nningyein bɔ ɔte krongron” ne. (Numeri 4:17-20) Nekaa bɔ né Samuel le yenwo atẽe kyɛ ɔkɔ yeɛ ole ɛtena sua ne aluo berɛ. Yeti ɛberɛ yeɛ ɔkɔyɛ kyɛ ɔlale ɔ. Na ɔkɔyɛ kyɛ né Eli koso la nekaa foforɛ wɔ ɛtena sua ne aluo berɛ ala. Edwirɛ, “nekaa bɔ Nyameɛpiri alaka ne wɔ ne,” okyire ɛtena sua ne nekaa bie.
FEBRUARY 21-27
NYAMEƐPIRI DWIRƐ NANU ASUADEƐ | 1 SAMUEL 6-8
“Nwa Yeɛ Ɔte Wɔ Hene Ɔ?”
it-2 163 ¶1
Nyameɛpiri Ahennie
Né Bɛpena kyɛ Sona Di Bɛ So Hene. Israelfoɛ fili ngoaasõnɛ nu kɔyɛ afoɛ 400 sĩ, bɔ né ɔte kɔbo afoɛ 800 fi mmerɛ bɔ Nyameɛpiri ne Abraham yɛle apam ne, Israelfoɛ ne hãne kyɛ bɛpena kyɛ sona di bɛ so hene tekyɛ maen ahoroɛ bɔ bapɛ bɛnwo bayia nala. Sɔ bɔ bɛyɛle ne kyire kyɛ, né bapo Yehowa kyɛ nnɛmaa odi bɛ so hene. (1Sa 8:4-8) Nahorɛ nu ne, né mmenia nemɔ nea ahennie bie bɔ bahã yenwo dwirɛ bɔ Nyameɛpiri kɔfa kosie berɛ ne atẽe kyɛbɔ ne wahyɛ Abraham ne Yakob bɔ ne. Né besa bele anyelasoɛ wɔ Yakob ngɔm bɔ ɔhyɛ fale Yuda nwo, mmerɛ bɔ né ɔla yewue bɛen so ne (Gye 49:8-10), afei Yehowa dwirɛ bɔ ɔhãhyirɛle Israelfoɛ mmerɛ bɔ befili ngoaasõnɛ nu ne sĩ (Ɛz 19:3-6), Mmraa Apam nanu dwirɛ (De 17:14, 15), ɔne edwirɛ bɔ Nyameɛpiri maa diyifoɛ Balaam hãne ne bue bie nu nanu (Nu 24:2-7, 17). Samuel maame bɔ né ɔte nahorɛfoɛ ne hãne sɔ anyelasoɛ nanwo dwirɛ wɔ mbaeɛ nu. (1Sa 2:7-10) Nakoso, né Yehowa nnya yelle ‘mvealeɛ nu dwirɛ’ bɔ ɔfa Ahennie nanwo, mmerɛ pɔtẽe bɔ ɔkɔfa kosie berɛ, kyɛbɔ ne ahennie ne kɔyɛ, ɔne kyɛbɔ né ɔkɔfa kosie berɛ wɔ—anwuro anaa aseɛ so ne ali. Yeti ɔte ahandaen yeɛ ɔmaa mmenia ne hãne kyɛ bɛpena sona maa odi bɛ so hene ne.
w11 1/1 27 ¶1
Ɔhora Gyinane, Ɔmva Yenwo Kyɛ Belili Ye Hwãmɔ Ne
Mmerɛ bɔ Samuel fale edwirɛ ne ɔɔtole Yehowa nyunu wɔ mbaeɛ nu ne, hyɛ bɔ Yehowa hãhyirɛle ye ne nzorɛ: “Bɔ mmenia ne ahãhyire wɔ ne mukoraati ne tie bɛ, ofikyɛ nná wɔ yeɛ bapó wɔ ɔ, na mmom me yeɛ bapó me kyɛ nnɛmaa medi bɛ so hene kõ ɔ.” Sɔ dwirɛ ne kyekyele Samuel wora, nakoso ne babu Nikyee Mukoraati So Tumvoɛ Nyameɛpiri ne animtia! Yehowa hãhyirɛle ye diyifoɛ ne kyɛ, ɔbɔ Israelfoɛ nemɔ kɔkɔ kyɛ, ɔhene bɔ bɛkɔye ne kɔfa adesoa kɔto bɛso. Mmerɛ bɔ Samuel hãhyirɛle bɛ ne, bɛhãne kyɛ: “Yɛmva nu, ɔhene ala yeɛ yɛpena kyɛ odi yɛ so ɔ.” Samuel yɛle sotie mane Nyameɛpiri, na ɔhɔ ɔɔpopale ɔhene bɔ Yehowa aye ne.—1 Samuel 8:7-19.
w10 1/15 30 ¶9
Yehowa Tele Atẽe Bɔ Ɔfa So Di Hene Nanwo!
Abakɔsɛm maa ɔla ali kyɛ, kɔkɔbɔ bɔ Yehowa fa mane Israelfoɛ ne te nahorɛ. Mmerɛ dodoɔ bɔ sona lili Israelfoɛ so kyɛ ɔhene ne, benwuni amaneɛ paa, ye titire ne, mmerɛ bɔ ɔhene ne aani nahorɛ ne. Tekyɛ ahemvo bɔ belili Israelfoɛ nemɔ so ne, ɔnyɛ yɛ nwanwa koraa kyɛ, wɔ abakɔsɛm nu ne, sona awaen bɔ bɛnzo Yehowa ne, bɛhorra bɛfalle nningyein pá bɔ ɔtena berɛ daa bɛmanne bɛ mmenia. Ɔwɔ nu kyɛ, amanyɔfoɛ biemɔ serɛ Nyameɛpiri kyɛ oyira mmɔden bɔ bɛbɔ kyɛ bɛkɔfa asomdwee bɛkɔwa naso, nakoso, ɔkɔyɛ sɛɛ né Nyameɛpiri ahora ayira mmenia bɔ bɛmmrɛ bɛnwo ase bɛma ye tumidie ne?—Ed. 2:10-12.
Bible Nu Dwirɛ Titire
w02 4/1 12 ¶13
Nzuati Yeɛ Odikyɛ Ɛbɔ Asu Ɔ?
Odikyɛ ebie sakra ye adwene kora, né wahora wabɔ asu waayɛ Yehowa Danzeniɛ. Adwensakra te gyinaeɛ bɔ ebie fi y’ahõne mukoraati nu si kyɛ, okoli Kristo Yesu sĩ ɔ. Bɛbɔ bɛyɛ sɔ ne yakyi nningyein tɛɛ bɔ né bɛyɛ ye dáa ne, ná besi bɛ hue kyɛ bɛkɔyɛ nningyein bɔ ɔsɔ Nyameɛpiri nye ɔ. Wɔ Tworɔnzɛm nanu ne, Hebri ne Greek dwirɛ bɔ behyirɛle yebo ne kyire kyɛ, ebie kɔhwẽ yenwo anaa ɔkɔkakyi yenwo. Ɛhene kyire kyɛ sona ne kɔhwẽ yenwo kofi nningyein tɛɛ nwo, na waasõ Nyameɛpiri. (1 Ahemvo 8:33, 34) Odikyɛ ebie yɛ “nningyein bɔ okyire kyɛ wanu yenwo” fa kyire kyɛ wasakra ye adwene. (Asomafoɛ Ne Nnwumaa 26:20) Bɔ ɛhe kyire ole kyɛ yɛkɔhwẽ yɛnwo yekofi ngondombo sõen nwo, yɛkɔfa Nyameɛpiri mmraa yɛkɔyɛ adwuma, ná y’afi y’ahõne mukoraati nu y’asõ Yehowa. (Deuteronomi 30:2, 8-10; 1 Samuel 7:3) Adwensakra sa kyire kyɛ, yɛkɔsesã yɛ nzusueɛ, yɛ subaen, ɔne yɛ nneyeɛ. (Ezekiel 18:31) Sɛ “yɛkakyi yɛnwo” a, okyire kyɛ y’ayakyi yɛ subaen dàa ne, na yafa subaen pá foforɛ yasi ye gya nu.—Asomafoɛ Ne Nnwumaa 3:19; Ɛfesofoɛ 4:20-24; Kolosefoɛ 3:5-14.
FEBRUARY 28–MARCH 6
NYAMEƐPIRI DWIRƐ NANU ASUADEƐ | 1 SAMUEL 9-11
“Ahyɛaseɛ Ne, Né Saul Le Anwobrɛaseɛ Na Né Odwo”
w20.08 10 ¶11
Ɛne Nyameɛpiri Bɛnate Wɔ Anwobrɛaseɛ Nu
Pɛ bɔ ɔtole Ɔhene Saul nanwo mvonini nea. Ahyɛaseɛ ne, ne ɔte abrandeɛ bɔ ole anwobrɛaseɛ ɔ. Ɔnate kyɛ né ɔbrɛ yenwo ase nati, né ɔse bɔ ɔkɔhora ye yɛ ɔ, yeti né ɔmbena kyɛ odé asɛyɛdeɛ pẽe to yenwo so. (1 Sam. 9:21; 10:20-22) Nakoso mmerɛ bie sĩ ne, Saul ɔɔyɛle ahandaen. Mmerɛ bɔ ɔɔyɛle ɔhene ne, wangyɛ yeɛ ye subaen tɛɛ ne lale ali ɔ. Mmerɛ bie, waanya aboterɛ aanwondɛ diyifoɛ Samuel. Kyɛ ahãa okonya anwobrɛaseɛ kɔfa yenwo kɔto Yehowa so maa ɔkɔboka mmenia ne, Saul bɔle afɔleɛ bɔ ne ollé yenwo atẽe ɔ. Ɛhene ati, Saul hwerele Yehowa nyunu adom, na ayieleɛ koraa ne ahennie ne fili ye sa. (1 Sam. 13:8-14) Sɛ yesua nikyeebie yefi sɔ kɔkɔbɔ he anu, na yamma yɛnwo so a, yekohyire kyɛ yɛse nworɛ.
w14 3/15 9 ¶8
Kyɛbɔ Yɛkɔhɔso Yɛkɔfa Yɛnwo Yɛkɔbɔ Afɔleɛ Ɔ
Ɔhene Saul bɔ né odi Israel so ne, ye nneasoɛ ne maa yenwu kyɛbɔ pɛsɛmangomenya kɔhora kɔmaa yɛkɔyakyi yɛnwo bɔ yɛkɔfa yɛkɔbɔ afɔleɛ ne. Ahyɛaseɛ bɔ Saul ɔɔyɛle ɔhene ne, né odwo, na né ɔbrɛ yenwo ase. (1 Sam. 9:21) Mmerɛ bɔ Israelfoɛ nanu biemɔ buli ye animtia wɔ y’ahennie bɔ odi nanwo ne, né ahãa ɔkɔhora kɔhwẽ bɛso kɔfa kɔbɔ yenwo atẽe bɔ Nyameɛpiri afa ama ye nanwo waen, nakoso waanyɛ sɔ. (1 Sam. 10:27) Ɔhene Saul mane Nyameɛpiri honhom hyirɛle y’atẽe, maa olili Israelfoɛ nemɔ nyunu ne Amonfoɛ bɛɛhõne lili bɛso ngunim. Ɛhene sĩ ne, ofili anwobrɛaseɛ nu fale ngunim bɔ olili nanwo animnyam mane Yehowa.—1 Sam. 11:6, 11-13.
w95 12/15 10 ¶1
Amonfoɛ—Mmenia Bɔ Bɛfale Bɔne Betuale Pá So Kerɛ Ɔ
Amonfoɛ sa fale bɔne tuale ayemye bɔ Yehowa lale y’ali hyirɛle bɛ naso kerɛ. Yehowa amma baamva bɛnwo banni wɔ bɔ bɛyɛle nanwo. “Mmerɛ bɔ Saul tele [Nahas] dwirɛ ne, Nyameɛpiri honhom wale yeso maa ɔfɛle yaa hãhĩi.” Ɔnate Nyameɛpiri honhom so ne, Saul boale asraafoɛ 330,000 noa, maa bɛne Amonfoɛ bɛɛfa besiele ye nye, na belili Amonfoɛ naso ngunim bɔ “benu mmenia nyɔ po banga nekahorɛ ɔ.”—1 Samuel 11:6, 11.
Bible Nu Dwirɛ Titire
w05 3/15 22 ¶8
Samuel Nwomaa Bɔ Olimoa Nanu Dwirɛ
9:9—Nzuati yeɛ né bɛkã kyɛ “diyifoɛ bɔ ɔwɔ berɛ ɛnnɛ ne, tete ne né bɛfrɛ ye nikyeenwunɛfoɛ ɔ”? Mmerɛ bɔ adiyifoɛ yɛle pẽe wɔ Samuel ne Israel ahemvo ne aberɛ so ne, bɛfale edwirɛ “diyifoɛ” beesiele “nikyeenwunɛfoɛ” gya nu. Samuel yeɛ olimoa bɔ bɛfrɛle ye diyifoɛ ɔ.—Asomafoɛ Ne Nnwumaa 3:24.