Nhwehwɛmuɛ Ma Abrabɔ Ne Asɛnga Adesua Nwomaa
MARCH 7-13
NYAMEƐPIRI DWIRƐ NANU ASUADEƐ | 1 SAMUEL 12-13
“Ahandaen Koyie Animguaseɛ Nu”
w00 8/1 13 ¶17
Ahandaen Koyie Animguaseɛ Nu
Sɛ edimoa nea edwirɛ ne a, né ɔte kyɛbɔ Saul yɛ nikyee pá ne. Ofikyɛ né ‘bɔ ɔbobɔ ba Nyameɛpiri mmenia so ne te piri,’ na né “bɛnwo hiahia bɛ paa,” ɔnate tebea bɔ ɔyɛ suro bɔ né bahɔ nu nati. (1 Samuel 13:6, 7) Nahorɛ nu, ɔtte bɔne kyɛ ɛkɔyɛ nikyeebie mmerɛ bɔ tebea n’awa kyɛ ɛyɛ sɔ ne. Nakoso, kae kyɛ, Yehowa kora nwu y’ahõne ne y’adwene nu nzusueɛ mukoraati. (1 Samuel 16:7) Yeti, ɔkɔhora kɔwa kyɛ ɔnwuni nningyein biemɔ wɔ Saul nwo bɔ wangã yenwo dwirɛ tẽe wɔ Bible nanu ɔ. Kyɛ nneasoɛ ne, ebia Yehowa nwuni kyɛ, ahandaen yeɛ ɔmaa Saul prele yenwo ne. Ebia Saul fɛle yaa paa wɔ bɔ yeti yeɛ odikyɛ ye bɔ ɔte—Israel mukoraati hene ne—ɔkɔnwondɛ diyifoɛ aworowaa bɔ onwui kyɛ ɔte frɔlɔɔ wɔ nningyein nwo ne ɔ! Kyɛbɔ ɔte biala ne, Saul tele ngã kyɛ, ɛwalɛ bɔ né Samuel mma ndɛ ne maa ole yenwo atẽe kyɛ, ye bɔbɔ ɔkɔyɛ nikyee biala, na wabu yenye wagua akwangyerɛ bɔ enu la berɛ bɔ bafa bama ye naso. Nzu yeɛ ofili nu wale ɔ? Samuel ammɔ Saul aba so wɔ bɔ ɔyɛle nanwo. Mmom ɔhãne Saul nyunu kyɛ: “W’ahennie ngogyina . . . ofikyɛ aanni edwirɛ bɔ Yehowa hyɛle wɔ naso.” (1 Samuel 13:13, 14) Yenwui biekũ kyɛ, ahandaen ooyiele animguaseɛ nu.
w07 6/15 27 ¶8
Yehowa Nye Sɔ Sotie Bɔ Ɛkɔyɛ Ne
Ɔhene Saul nwo dwirɛ bɔ ɔwɔ Bible nu ne maa yenwu kyɛ, sotie nwo hia paa. Saul hyɛle yebo lili bia ne, né ɔbrɛ yenwo ase, na né odwo paa, ‘na né obu yenwo kyɛ ɔte kwahweabaa.’ Nakoso sĩɛ ye, ɔɔyɛle ahandaen maa ɔhyɛle yebo nyane nzusueɛ tɛ́ na ɔhãne gyinaeɛ bɔ osisili ne pó. (1 Samuel 10:21, 22; 15:17) Mmerɛ bie, né odikyɛ Saul ne Filistifoɛ nemɔ kɔ kõ. Samuel hã hyirele ɔhene ne kyɛ ɔnwondɛ ye ma ɔbra ná ɔɔbɔ afɔleɛ ma Yehowa, ná ɔma Saul akwangyerɛ foforɛ. Nakoso, Samuel angora andwu berɛ mmerɛ bɔ né bɛnea y’atẽe ne, yeti mmenia ne hyɛle yebo kyɛ bɛkɔ. Saul nwuni ye sɔ ne, “ɔɔbɔle ɛyeralɛ afɔleɛ ne.” Nakoso ɛhe anzɔ Yehowa nye. Yesĩ koraa bɔ Samuel dwuli berɛ ne, ɔhene ne fale edwirɛ yele yenwo noa wɔ asoserɛ bɔ ɔyɛle nanwo, na ɔhãne kyɛ, ɔnate kyɛ Samuel amma ndɛ nati yeɛ ‘olili ye bɔbɔ yeti piri’ maa ɔbɔle afɔleɛ ne fa penane Yehowa nyunu animnyam ɔ. Né afɔleɛ bɔ Ɔhene Saul kɔbɔ nanwo hia ye koraa tra kyɛ okotie akwangyerɛ bɔ yeɛ ole kyɛ ɔwondɛ Samuel maa ɔɔbɔ afɔleɛ ne. Samuel hã hyirele ye kyɛ: “Ali ngwaseasɛm. Ahyɛdeɛ bɔ Yehowa wɔ Nyameɛpiri fa mane wɔ ne, anni so.” Yehowa so asoserɛ bɔ Saul yɛle ne maa y’ahennie fili ye sa.—1 Samuel 10:8; 13:5-13.
Bible Nu Dwirɛ Titire
w11 7/15 13 ¶15
Ekoli Yehowa Akwangyerɛ Bɔ Ofi Ɔdɔ Nu Naso Anaa?
Aso né Israelfoɛ nemɔ susu kyɛ, sɛ ɔhene bɔ ɔte sona badi bɛ so a, bɛkɔhora bɛkonwui, ná bafa benwo bato ye so paa batra Yehowa anaa? Sɛ sɔ a, yede né bedi nikyee mbaen bie sĩ! Na né ɔnyɛ se koraa kyɛ Satan kɔhora kɔlakalaka bɛ maa bekoli ye sĩ ɔ. Né ɔnyɛ se kyɛ mmenia bɔ bekoli bɛ so hene ne kɔmaa bɛkɔɔsõ bosõen ɔ. Mmenia bɔ bɛsõ bosõen ne susu kyɛ bɛkɔhora bɛkɔfa bɛnwo bɛkɔto nningyein bɔ bɛnye nwui tekyɛ—nyameɛ bɔ bafa mmakaa anaa nyɔboɛ basé naso tra Yehowa Nyameɛpiri bɔ ɔbɔle nningyein mukoraati bɔ bɛnnwui ne. Nakoso kyɛbɔ somafoɛ Paul hãne ne, bosõen “tte húu.” (1 Kor. 8:4) Bennwu nikye, bɛnde dwudwolɛ, bɛngora dwudwo, na bɛngora hwee koso yɛ. Ɛkɔhora konwu bɛ na asɔ bɛ nu, nakoso sɛ ɛsõ bɛ a, né edi nikyee mbaen bie sĩ—nikye bɔ ɔnne berɛ bɔ ɔkɔfa wɔ kɔhɔ ɛsɛkyelɛ nu ɔ.—Ed. 115:4-8.
MARCH 14-20
NYAMEƐPIRI DWIRƐ NANU ASUADEƐ | 1 SAMUEL 14-15
“Sotie Te Pá Tra Afɔleɛbɔlɛ”
w07 6/15 26 ¶4
Yehowa Nye Sɔ Sotie Bɔ Ɛkɔyɛ Ne
Nikye biala bɔ yele ye wɔ asetena nu ne, ɔte Yehowa bɔ ɔte Ɔbɔadeɛ ne, ye deɛ. Sɛ sɔ a, aso nikyeebie wɔ berɛ bɔ yɛkɔhora yɛkɔfa yɛkɔma ye hɔ? Yóo, yɛkɔhora yɛkɔfa nikyeebie bɔ ɔsombo paa yɛkɔma ye. Yeɛ ole nzu? Yɛkɔhora yekonya mmuaeɛ ne yekofi afutue dwirɛ bɔ oli so he anu: “Mma, sua nworɛ, ná ma m’ahõne ɔtɔ me kunu, na manya edwirɛ mabua bɔ ɔbɔ me alapaa ne.” (Anyandera 27:11) Bɔ yɛkɔhora yɛkɔyɛ yɛkɔma Yehowa yeɛ ole kyɛ, yɛkɔyɛ asoɛ yekotie ye. Ɔwɔ nu, ɔsõno yenu biala ne ye dwirɛ tebea ne nekaa bɔ ofi de, nakoso, sɛ yɛyɛ sotie a, yɛkɔhora yekobua Satan Bɔnzam dwirɛ bɔ yeɛ ole kyɛ, sɛ sona yia nzɔhwɛ a, ongoli Nyameɛpiri nahorɛ ne. Yenwo atẽe beni ala ɛhe!
it-2 521 ¶2
Sotie
Ɛngohora ngɔfa hwee ngosi sotie gyanu, yeti sɛ ɛkɔsɔ Nyameɛpiri nye a, sana ɛyɛ sotie. Na kyɛbɔ Samuel hã hyirele Ɔhene Saul ne: “Aso Yehowa kuro ɛyeralɛ afɔleɛ ne afɔleɛbɔlɛ tra kyɛ ɛkɔyɛ asoɛ kotie [sha·maʽʹ] Yehowa hɔ? Nea! Sotie [anaa, kyɛ ekotie ne] ɔte pá tra afɔleɛbɔlɛ, na asoɛ mmerɛyɛlɛ te pá tra boaen nyĩ loe.” (1Sa 15:22) Sɛ y’anyɛ sotie a, okyire kyɛ y’apo Yehowa dwirɛ, sɛ ebie yɛ sɔ a, ne okyire kyɛ olle gyidie anaa anwotɔsoɛ wɔ sɔ dwirɛ ne, ɔne Nekaa bɔ edwirɛ ne fi ba nanu. Yeti sɛ ebie anyɛ sotie a, ɔte kyɛ ebie bɔ odi ahɔen anaa ɔsõ bosõen nala. (1Sa 15:23; Fa toto Rom 6:16.) Sɛ yɛfa yɛnoa yɛka edwirɛ bie, na y’amva yɛ nneyɛe y’angyire sɔ a, mvasoɛ biala nne so; na ɛhẽne koso kohyire kyɛ yellé gyidie anaa obuo biala yɛmma bɔ ɔfale sɔ dwirɛ ne mane yɛ ne. (Mt 21:28-32) Bɛbɔ bedé Nyameɛpiri bedi, ná betie ye dwirɛ, nakoso bɛmva bɛnyɛ húu ne, bengonya so mvasoɛ biala, na bɛkɔfa nzusueɛ mbaen bɛkɔlakalaka bɛnwo. (Yak 1:22-25) Nyameɛpiri Awa ne maa enu lale berɛ kyɛ, bɛbɔ bayɛ bɛnwo kyɛ bedi Nyameɛpiri mmraa so, nakoso bɛnyɛ ye wɔ atẽe pá so anaa betira adwene bɔ ɔttemayé ne, bengonya atẽe bɛngɔhɔ Ahennie nanu, na bɛkɔsɛkye bɛ korakora.—Mt 7:15-23.
Bible Nu Dwirɛ Titire
it-1 493
Anwumvoinnwunɛ
Sɛ yɛda anwumvoinnwunɛ ali, ná ɔne bɔ Nyameɛpiri kuro nyia a, ɔkora fa ɔhaw pẽe ba. Bɔ ɔtole Ɔhene Saul ne maa yenwui sɔ. Né mmerɛ aso kyɛ Yehowa bua Amalekfoɛ nemɔ ndɛen, ofikyɛ mmerɛ bɔ Israelfoɛ fi Egypt bɛba ne, Amalekfoɛ nemɔ yeɛ belimoa bɛɛto bewurale Israelfoɛ nemɔ so ɔ. Bɛmane Saul akwangyerɛ kyɛ nnɛmaa onwu bɛ anwumvoin. Ɔnate kyɛ né Saul pena kyɛ ɔsɔ bɛbɔ bewura yebo ne nye nati, wanni akwangyerɛ bɔ Yehowa fa mane ye ne mukoraati so. Ɛhẽne ati, Yehowa pole Saul kyɛ ɔngɔma ongoli hene kõ. (1Sa 15:2-24) Sɛ ebie nya anisɔ bɔ enu yɛ se ma Yehowa akwangyerɛ bɔ ɔtengyɛ ne, na ɔmaa nahorɛ bɔ okoli kɔma ye nanwo hia ye a, ɔkɔboka ye ma ɔngɔyɛ bɔne tekyɛ Saul, na wamma Yehowa ambo ye.
MARCH 21-27
NYAMEƐPIRI DWIRƐ NANU ASUADEƐ | 1 SAMUEL 16-17
“Kõɛ Ne Te Yehowa Deɛ”
wp16.5 11 ¶2-3
“Kõɛ Ne Te Yehowa Deɛ”
Né David ahũ gyata ne kwabrafo le, yeti ɔhãne yenwo dwirɛ hyirele Saul fahyirele kyɛ ole anwotɔsoɛ. Aso né odwa ye noa nu hɔ? Daabi. Né David se bɔ ɔbokale ye maa ohũni sɔ ngaka nemɔ ɔ. Ɔhãne kyɛ: “Yehowa bɔ olɛle me fili gyata ne kwabrafo sa nu ne, ɔkole me kofi sɔ Filistiniɛ he sa nu.” Saul nye gyele bɔ David hãne nanwo, yeti ɔhãne kyɛ: “Kɔ, na Yehowa li wɔ sĩ.”—1 Samuel 17:37.
Ekuro kyɛ enya David gyidie ne bie anaa? Hyɛ ye nzorɛ kyɛ, ɔttekyɛ David la dwɔsole nala pɛ yeɛ onyane sɔ gyidie ne ɔ. Na mmom, né ole gyidie wɔ Nyameɛpiri nu, ofikyɛ ne ole yenwo nimdeɛ, ná ɔfa yɛle adwuma. Né ɔse kyɛ Yehowa te ɔdɔ, Ɔbɔ ye mmenia nwo waen, na Odi ye bɔhyɛ so. Sɛ yɛpena kyɛ yenya sɔ gyidie ne bie a, odikyɛ yɛyere yenwo yesua Bible ne, na yenwu Nyameɛpiri yé. Sɛ yɛfa bɔ yesua ne yɛbɔ yɛ bra a, yekonya so mvasoɛ, na ɔkɔmaa yɛ gyidie kɔyɛ se.—Hebrifoɛ 11:1.
wp16.5 11-12
“Kõɛ Ne Te Yehowa Deɛ”
Ɔbaadwu ɛnnɛ ne, yenwu kyɛ edwirɛ bɔ David hãne ne kyire kyɛ ne ole gyidie paa. Pɛ yenwo mvonini kyɛ abrandeɛ ne ka kyire Goliat kyɛ: “Wɔde, ngrandɛ ne pea ɔne buralɛ tendenn tworɔntworɔn yeɛ ɛfa ba me so ɔ, na me de, mefa Asafo Yehowa, Israel Nyameɛpiri bɔ abu ye animtia wɔ kõɛ noa ne dumaa yeɛ meba wɔ so ɔ.” Né David se kyɛ sona tumi ne ye akõdeɛ bɔ wahora wayɛ biala ne, ɔtte húu. Né Goliat abu Yehowa Nyameɛpiri ne animtia, yeti né Yehowa kɔkekã yenwo. Na kyɛbɔ David hãne ne, “kõɛ ne te Yehowa deɛ.”—1 Samuel 17:45-47.
Né David se kyɛ Goliat te kwabranoa bɔ osa le akõdeɛ ɔ. Nakoso David amma sɔ nningyein nemɔ anwunonwuna ye. Na wanni mvomsoɛ bɔ Saul ne ye sogyafoɛ nemɔ lili ne bie. David amva yenwo andoto Goliat nwo. Mmom ɔfale Goliat totole Yehowa nwo. Ɔwɔ nu, ne Goliat tendenn tekyɛ agyirɛ ngona ne bue (9.5 feet anaa 2.9 meters) de, nakoso sɛ ɛfa ye toto Amanzaen Hene nanwo a, né ɔte kyɛ ngyegyira bie—yeti né ɔnyɛ se mma Yehowa kyɛ ɔkɔye ye kofi berɛ ɔ!
wp16.5 12 ¶4
“Kõɛ Ne Te Yehowa Deɛ”
Ɛnnɛ, Nyameɛpiri asomvoɛ ngɔ kõɛ. Sɔ mmerɛ nemɔ apɛ nu. (Mateo 26:52) Nakoso yenwo hia kyɛ yesuesua David gyidie ne bie. Tekyɛ David ne, odikyɛ yenwu Yehowa kyɛ ɔte ebie bɔ ɔwɔ berɛ paa—na ye yeɛ ɔte Nyameɛpiri bɔ odikyɛ yɛsõen na yɛye y’ayɛ ɔ. Ɔtɔ mmerɛ bie na yɛnea ɔhaw ahoroɛ bɔ yɛfa nu nea, ɔte kyɛ bɔ ɔhaw ne mè yɛ ne, nakoso sɛ yɛfa yɛ haw ne yɛtoto Yehowa tumi nwo a, yenwui kyɛ ɔte kãa bie. Sɛ yɛfa Yehowa yɛyɛ yɛ Nyameɛpiri na yenya ye nu gyidie tekyɛ David a, yede ɔhaw biala nne berɛ bɔ ɔkɔhora konwunonwuna yɛ ɔ. Nikyeefee biala ngɔhora ngoli Yehowa so ngunim lé!
Bible Nu Dwirɛ Titire
it-2 871-872
Saul
Ɛhe, ɔne mmerɛ bɔ bɛpopale David kyɛ Israel hene ne sĩ, yeɛ Yehowa honhom fili Saul so ɔ. Ofi sɔ mmerɛ ne, “Yehowa maa honhom tɛ́ bie ɔɔteeteele ye.” Ɔnate kyɛ ne Yehowa aye ye honhom n’afi Saul so nati, afei honhom tɛ́ bie wale ye so, na onyane ye so ngɛendɛenzoɛ, na wamma Saul annya asomdwee, na ɔteeteele ye alaa maa onyane adwene ne nzusueɛ tɛ́. Asoɛ bɔ Saul anyɛ amma Yehowa ne kyire kyɛ, né wafa y’adwene ne y’ahõne wasie nningyein tɛ́ so, ɛhene ati Yehowa honhom ammɔ yenwo waen kõ. Ɔnate kyɛ Yehowa mane yenwo atẽe maa “honhom tɛ́” oosili Ye honhom bɔ né ɔwɔ Saul so ne gyanu maa ɔɔteeteele ye nati, bɛkora bɛkã kyɛ “honhom tɛ́ bɔ ofi Yehowa” ɔ, yeti Saul ngoaa nemɔ hãne kyɛ ɔte “Nyameɛpiri honhom tɛ́.” Na ɔnate bɔ ye asomvoɛ nanu kõ hãne nati, Saul maa bɛɛfrɛle David kyɛ ɔɔtena ahemvie berɛ, na sɛ “honhom tɛ́” ne ba ye so a, wato dwein wama ye.—1Sa 16:14-23; 17:15.
MARCH 28–APRIL 3
NYAMEƐPIRI DWIRƐ NANU ASUADEƐ | 1 SAMUEL 18-19
“Sɛ Nningyein Kɔ Yé Ma Wɔ A, Brɛ Wɔnwo Ase”
w04 4/1 15 ¶4
Nzakraeɛ Ba W’asetena Nu A, Fa Wɔnwo To Nyameɛpiri Honhom So
Né ɔngɔhyɛ maa boaen neafoɛ abrandeɛ he alé dumaa wɔ maen nanu. Bɛfrɛle ye kyɛ ɔɔsõ ɔhene ne, ná ɔto dwein ma ye. Ohũni Goliat, kwabranoa bɔ né yenwo yɛ suro bɔ né Israel sogyafoɛ bɔ bɛse kõ pó ne suro kyɛ bɛne ye kɔhõ ne. Bɛmaa David lili sogyafoɛ nemɔ nyunu ne Filistifoɛ nemɔ hõne, na olili bɛso ngunim. Yeti mmenia ne hurole ye dwirɛ. Bɛtole dwein bɛfa bɛkamvole ye. Né Ɔhene Saul foɛtulɛfoɛ bie alimoa ahã abrandeɛ David nwo dwirɛ kyɛ, ɔte “ebie bɔ ɔse” sangoo bɔ paa, na osa te “kõɛhõnɛfoɛ bie bɔ ɔse nworɛ, ole akokoduro, ye noa awo, na yenwo koso yɛ nyemene ɔ.”—1 Samuel 16:18; 17:23, 24, 45-51; 18:5-7.
w18.01 28 ¶6-7
Nwu Nzozoneɛ Bɔ Ɔla Mmenia Afĩa Ɔ
Ebiemɔ anwoyemene, dumaa bɔ balé, dwein bɛ bɛse ye to, b’anwoserɛ anaa yenwo atẽe bɔ bɛle ye nati, bɛma bɛnwo so. Né David lé sɔ nningyein hemɔ mukoraati bie, nakoso ɔbrɛle yenwo ase ye ngõa ngyẽa mukoraati nu. Mmerɛ bɔ David hũni Goliat yiele na Ɔhene Saul fale ɔwa brasua mane ye kyɛ ogya ye ne, David hãne kyɛ: “Me yeɛ nné nwa, na me baba abusua koso te nzu wɔ Israel bɔ me baayɛ Ɔhene sia ɔ?” (1 Sam. 18:18) Nzu yeɛ ɔbokale David maa ɔhɔle so brɛle yenwo ase ɔ? Né David se kyɛ bɔ ɔmaa onyane subaen pá, ɔhora yɛle nningyein pẽe, ná onyane yenwo atẽe pẽe yeɛ ole kyɛ Nyameɛpiri ‘brɛle yenwo ase’ tiele ye. (Ed. 113:5-8) Né David se kyɛ nikyee pá biala bɔ né ole ne, Yehowa yeɛ ɔfa mane ye ɔ.—Fa toto 1 Korintofoɛ 4:7.
Ɛnnɛ, Yehowa mmenia bɔ mmɔden kyɛ bɛkɔbrɛ bɛnwo ase tekyɛ David. Anwobrɛaseɛ te subaen bɔ ɔyɛ nyemene, yeti sɛ yenwu kyɛ Yehowa bɔ ɔte Anwurowuroniɛ wɔ amanzaen nanu ne da sɔ subaen ne bie ali a, ɔkã y’ahõne paa. (Ed. 18:35) Yɛfa afutue bɔ ɔkã ahõne he yɛyɛ adwuma: “Ɛmɔfa anwunvoinnwunɛ, páyɛlɛ, anwobrɛaseɛ, edwolɛ, ɔne aboterɛ bɛyɛ ataadeɛ bewura.” (Kol. 3:12) Yɛse kyɛ ɔdɔ “nndwa yenoa nu, ɔmma yenwo so.” (1 Kor. 13:4) Sɛ yɛbrɛ yɛnwo ase a, ɔkɔhora kɔhwẽ mmenia kɔwa Yehowa nwo. Kyɛbɔ yeɛmɔ nate b’abrabɔ pá so kora nya behũmɔ mmerɛ bɔ bendwudwo ne, sɔ ala yeɛ sɛ Nyameɛpiri mmenia brɛ bɛnwo ase a, ɔkɔhora kɔhwẽ mmenia kɔwa yenwo ɔ.—1 Pet. 3:1.
Bible Nu Dwirɛ Titire
it-2 695-696
Diyifoɛ
Ɔwɔ nu kyɛ Yehowa yeɛ ɔyele adiyifoɛ nemɔ de, nakoso nná daa biala yeɛ Yehowa nate bɛ so dwudwo ɔ. Mmom ɔtɔ mmerɛ bie a, né Nyameɛpiri honhom ‘ba bɛ so,’ na ne ɔda ye dwirɛ ali kyire bɛ maa bɛkã. (Eze 11:4, 5; Mik 3:8) Ɛhe nyane bɛso ngɛendɛenzoɛ maa bedwudwole. (1Sa 10:10; Yer 20:9; Am 3:8) Nná nningyein bɔ ne ɔte sorongõ ngome yeɛ bɛyɛle ɔ, na mmom atẽe bɔ né bɛfa so bedwudwo, ɔne kyɛbɔ bɛyɛ bɛ nikyee ne da yali kyɛ, tumi bɔ ɔbo sona deɛ so yeɛ né ɔfa bɛ yɛ adwuma ɔ. Ɛhe kyire bɔ yeti yeɛ mmenia biemɔ kora “yɛ bɛ nikyee tekyɛ adiyifoɛ” ne bue bie nu. (1Sa 10:6-11; 19:20-24; Yer 29:24-32; fa toto Aso 2:4, 12-17; 6:15; 7:55.) Kyɛbɔ bɛfa b’adwene mukoraati besie bɛ dwumadié naso, ɔne akokoduro bɔ bɛda yali ne maa bɛnwo yɛ mmenia nwanwa tekyɛ bɔ osili, mmerɛ bɔ diyifoɛ bie hɔle sahene nemɔ nyunu ɔɔpopale Yehu ne. Yeti, mmerɛ bɔ ahemvo nemɔ nwuni kyɛ ɔte diyifoɛ ne, ɛberɛ ala yeɛ belɛle bɔ ɔhãne ne bɛtole nu ɔ. (2Ah 9:1-13; fa toto Aso 26:24, 25.) Mmerɛ bɔ né Saul pena David kũ ye ne, Nyameɛpiri honhom maa Saul ‘yɛle ye nikyee tekyɛ diyifoɛ,’ ɔyeyele ye ndaadeɛ, na “ɔfale yenwo tole so sɔ kyẽa ne, eyia ne kɔngɔen namu,” na ɛhe maa David nyane yenwo atẽe nwatili. (1Sa 19:18–20:1) Ɛhe ngyire kyɛ ɛyɛ a adiyifoɛ ye bɛnwo to so, ofikyɛ Bible tworɔtohɔ ngyire sɔ. Wɔ tworɔtohɔ foforɛ nyɔ bie bɔ diyifoɛ ne yele yenwo tole so nu ne, nikyeebie ti yeɛ diyifoɛ ne yɛle sɔ ɔ, kyɛbɔ ɔkɔyɛ a mmenia kɔte ye ngɔmhyɛ nabo ɔ. (Aiz 20:2-4; Mik 1:8-11) Bɔ yeti yeɛ Saul yele yenwo tole so ne—kyɛ ebia ɔkɔmaa mmenia konwui kyɛ ɔte sona bie mbaen, anaakyɛ né ɔfa da yenwo ali kyɛ ɔtte ɔhene, anaa Yehowa tumidie bɔ odwɔso tiale, anaakyɛ ɔte nikyee foforɛ biala ti ahɔ oo—Bible ne angã.
APRIL 4-10
NYAMEƐPIRI DWIRƐ NANU ASUADEƐ | 1 SAMUEL 20-22
“Kyɛbɔ Ɛkɔyɛ Adamvoa Pá Ɔ”
w19.11 7 ¶18
Ɛne Aliemaamɔ Fa Adamvoa Serɛserɛ Kora Né Ayieleɛ Ne Awa
Ɛnnɛ, yeliemamɔ yia ɔhaw pẽe. Kyɛ nneasoɛ ne, atorɛngyɛm anaa kõɛ maa yeliemamɔ pẽe nwu amaneɛ. Sɛ nikyeebie bɔ ɔte sɔ si a, yenu biemɔ kɔhora kolé yeliema hemɔ kɔɔtena y’awuro. Ebiemɔ koso kɔhora kɔfa bɛ sikaa bɛkɔboka. Nakoso yemukoraati kɔhora kɔsrɛ Yehowa kyɛ ɔboka yeliema hemɔ. Sɛ yenwu kyɛ yeliema bie aba nu abu a, ebia yengonwu edwirɛ bɔ yɛhã anaa nikyee bɔ yɛyɛ ɔ. Nakoso nningyein pẽe wɔ berɛ bɔ yɛkɔhora yɛkɔyɛ ɔ. Kyɛ nneasoɛ ne, yɛkɔhora yɛkɔpena mmerɛ yɛkɔɔsra ye. Sɛ yɛyɛ asoɛ yetie yeliema ne yé a, okyire kyɛ yɛdwene yenwo. Afei koso, yɛkɔhora yɛkɔfa tworɔnzɛm bie bɔ ɔla y’ahõne so yɛkɔkyekye ye wora. (Aiza 50:4) Bɔ ohia paa yeɛ ole kyɛ ɛkɔboka wɔ nnamvomɔ mmerɛ bɔ behia wɔ ne.—Kenga Anyandera 17:17.
w08 2/15 8 ¶7
Fa Yehowa Atẽe So
Nyameɛpiri pena kyɛ yɛyɛ nnamvoa bɔ yedi nahorɛ ɔ. (Any. 17:17) Ɔhene Saul awa Yonatan fale David adamvoa. Mmerɛ bɔ Yonatan tele kyɛ David ahũ Goliat ne, “Yonatan oohurole David dwirɛ, na bɛɛyɛle nnamvoa paa, na Yonatan lɔle ye tekyɛ yebɔbɔ yenwo.” (1 Sam. 18:1, 3) Mmerɛ bɔ Yonatan tele kyɛ Saul pena kyɛ okũ David ne, ɔbɔle David amaneɛ. Na David nwatili ne sĩ ne, Yonatan hɔ ooyiale ye, na ɔne ye yɛle apam. Saul tele kyɛ Yonatan ne David aadwudwo ne, ɔhale gyerɛ maa ahãa ohũni Yonatan, nakoso nnamvoa nyɔ ne sa yiale maa bɛhyɛle b’abiɛngõɛ nanu serɛ. (1 Sam. 20:24-41) Mmerɛ bɔ ɔpɛ yebo bɔ David ne Yonatan yiale ne, Yonatan hyɛle David serɛ “wɔ Yehowa nyunu.”—1 Sam. 23:16-18.
w09 10/15 19 ¶11
Da Ɔdɔ Ali Wɔ Ewiase Bɔ Ɔdɔ Nne Nu He Anu
Di Nahorɛ. Solomon hãne kyɛ “Adamvoa pá de, okyire ye dɔ mmerɛ biala, na ɔte aliemaa bɔ bɛwole ye bɛmane anwokyere kyẽa ɔ.” (Anyan. 17:17) Ɔkɔyɛ kyɛ mmerɛ bɔ né Solomon twerɛ sɔ dwirɛ ne, ne ye Baba David ne Yonatan adamvoa nanwo dwirɛ yeɛ ne ɔwɔ ye tianu ɔ. (1 Sam. 18:1) Ne Ɔhene Saul pena kyɛ ɔwa Yonatan yeɛ odi bia wɔ Israel ɔ. Nakoso Yonatan lé tole nu kyɛ, David yeɛ né Yehowa aye ye kyɛ oli hene wɔ Israel ɔ. Yonatan amma yenye ammoro David kyɛbɔ Saul yɛle ne. Wanyɛ ye yá kyɛ mmenia kamvole David ɔ, na sɔ ala yeɛ wanné ngondombo dwirɛ bɔ Saul kekã fale David nwo ne wanni ɔ. (1 Sam. 20:24-34) Aso, yɛte kyɛ Yonatan? Sɛ yɛ nnamvomɔ nya yenwo atẽe bie wɔ asafo nanu a, aso ɛyɛ a yɛnye gye? Sɛ bɛnwo kyere bɛ a, ɛyɛ a yɛ kyekye bɛ wora, na yɛboka bɛ hɔ? Sɛ yɛte kyɛ ebie ka yɛ damvo bie nwo dwirɛ tɛ́ a, ɛberɛ ala né yɛale yali anaa? Anaa yefi nahorɛlilɛ nu yegyina yɛ damvo ne sĩ tekyɛ Yonatan?
Bible Nu Dwirɛ Titire
w05 3/15 24 ¶4
Samuel Nwomaa Nanu Dwirɛ Titire
21:12, 13. Yehowa nea atẽe kyɛ yɛkɔfa y’adwene ne yɛ nyanza yekoli asetena nu haw ahoroɛ nwo dwumaa. Wafa ye Dwirɛ bɔ ofi ye honhom nu, bɔ ɔmaa yenya nyanza, nimdeɛ ɔne adwene pá wama yɛ. (Anyandera 1:4) Yesa yelé Kristofoɛ Asafo nanu mbanyi bɔ bɛboka yɛ ɔ.
APRIL 18-24
NYAMEƐPIRI DWIRƐ NANU ASUADEƐ | 1 SAMUEL 23-24
“Fa Ndoboaseɛ Nwondɛ Yehowa”
w04 4/1 16 ¶8
Nzakraeɛ Ba W’asetena Nu A, Fa Wɔnwo To Nyameɛpiri Honhom So
David anyɛ Saul bɔne. Gyidie ne ndoboaseɛ bɔ né ole ne maa ɔpenene bɔ ole naso, na ɔyakyili edwirɛ ne mane Yehowa. Mmerɛ bɔ ɔhene ne fité fili nyɔboɛ sua nanu ne, David frɛle ye, na ɔhã hyirele ye kyɛ: “Yehowa yeɛ obua me ne w’afĩa ndɛen ɔ; Yehowa yeɛ okotua wɔ kerɛ kɔma me ɔ, mede mengɔfa me sa mengɔhã wɔ.” (1 Samuel 24:12) Ɔwɔ nu kyɛ ne David se kyɛ Saul dwirɛ nyɛ fɛ de, nakoso wandua ye so kerɛ; na sɔ ala yeɛ wandwudwo wandia ye, ná wanngã yenwo dwirɛ tɛ́ ɔ. Mmerɛ pẽe yeɛ David hyɛle yenwo so bɔ wannyɛ bɔ yebɔbɔ okuro ɔ. Mmom, ɔfale yenwo tole Yehowa so maa Yehowa bɔbɔ totole nningyein yé.—1 Samuel 25:32-34; 26:10, 11.
w04 6/1 22-23
Ɛmaa Tebea Bɔ Ahɔ Nu Ne Sesã W’asetena Anaa?
Asuadeɛ bɔ ɔtɔ so nza ne yeɛ ole kyɛ, sɛ tebea bie maa y’asetena sesã a, ɔte pá kyɛ yɛkɔnwondɛ Yehowa tra kyɛ yɛbɔbɔ yɛkɔfa atẽe tikaapẽ bie bɔ ɔttemayé so yekoli yenwo dwumaa ɔ. Suaniɛ Yakobo hworɔle kyɛ: “Ɛmɔma animia oyie y’adwuma, amaa ɛmɔ ali mũ wɔ nikyee biala nu bɔ hwee nhia ɛmɔ ɔ.” (Yakobo 1:4) Odikyɛ yɛmaa “animia yie y’adwuma” mmerɛ bɔ yɛfa tebea bie bɔ enu yɛ se nu tra kyɛ yekobu yɛnye yekogua Bible akwagyerɛ so yɛkɔfa yɔkɔpɛ so ndɛ ɔ. Yɛyɛ sɔ a, ɔkɔmaa yekonya gyidie bɔ basɔ banea, odi mũ, na enu yɛ se bɔ ɔkora gyina tebea biala noa ɔ. Yosef ne David lale animia bɔ ɔte sɔ ne bie ali. Baamva atẽe bie bɔ ɔne Yehowa akwangyerɛ nyia so banni bɛ haw nanwo dwumaa. Na mmom, bɛyɛle bɔ bɛkɔhora biala begyinane bɛ tebea nanu. Mmerɛ bɔ bɛnwodɛle Yehowa ne, nhyiraa bɔ benyane ne de, bɛngã! Yehowa nate bemu nyɔ naso lɛle ye mmenia na osa nate bɛso lili benyunu.—Gyenɛsis 41:39-41; 45:5; 2 Samuel 5:4, 5.
Yɛ koso, tebea bie kɔhora kɔto yɛ bɔ sɛ yaanea yé a, ɔkɔyɛ se kyɛ yɛkɔfa bɔ Bible ne kã ne yɛkɔyɛ adwuma ɔ. Kyɛ nneasoa ne, ɔnate kyɛ ennyane ebie bɔ ɔfata bɔ ekogya ye wɔ asafo nanu nati, w’abanu abu hɔ? Sɛ sɔ a, yede, mia wɔnye kyɛ ɛngɔyɛ Yehowa so asoserɛ, na gya “wɔ Awurade nu ngome.” (1 Korintofoɛ 7:39) Eyia ɔhaw wɔ w’agyaa nu anaa? Kyɛ ahãa ɛkɔmaa ewiase ne adwene bɔ ɔfa ndetemuɛ ne agyaayiralɛ nwo ne kole w’adwene ne, bɔ mmɔden na ɛne wɔ nwokãniɛ ne bɛfa animia begyina tebea bɔ enu yɛ se nanu. (Malaki 2:16; Ɛfesofoɛ 5:21-33) Aso ɔnate sikanzɛm nu anwokyere ti, ɔyɛ se ma wɔ kyɛ ɛkɔnea w’abusua anaa? Yede, bɔ mmɔden kyɛ ɛngɔyɛ adwuma bie bɔ ɔne Yehowa akwangyerɛ nyia ngɔfa ngɔpena esikaa, na mmom pena adwumaa bɔ ɔkɔmaa ekoli Yehowa nahorɛ na yɛ. (Edwein 37:25; Hebrifoɛ 13:18) Yeti, odikyɛ yenu biala yere yenwo kyɛ, ɔkɔyɛ bɔ ɔkɔhora biala kɔfa kogyina tebea bɔ ɔwɔ nu ne noa, na wamaa Yehowa anya nikyee bie wagyina so wayira ye. Mmerɛ bɔ yɛyɛ sɔ ne, ɛmɔma yesi yehũe kyɛ yɛkɔnwondɛ Yehowa maa ye bɔbɔ okoli tebea nanwo dwumaa.—Mika 7:7.
Bible Nu Dwirɛ Titire
w17.11 27 ¶11
Nnɛmaa Nikyefee Ma Ngunim Abotire Ne Bɔ Wɔ
Sɛ yefĩa yɛ kũnu yɛdɔ afoforɛ a, ɔkɔyɛ se kyɛ yenye kɔboro bɛ ɔ. Nyameɛpiri ka kyɛ: “Ɔdɔ le aboterɛ na ye tianu nyɛ se. Ɔdɔ de ɔtte ahoɔyea.” (1 Kor. 13:4) Sɛ yɛkɔhora yekotu ahoɔyea bo yekofi y’ahõne nu a, odikyɛ yɛyere yɛnwo yenya Nyameɛpiri adwene wɔ nningyein nwo, na yebu yɛne yeliemamɔ Kristofoɛ mukoraati kyɛ yɛte sona kõ. Yɛyɛ sɔ a, ɔkɔmaa yekonya tema yɛkɔma bɛ kyɛbɔ Bible nu afutue he kã ne: “Sɛ bɛhyɛ akwaa bie animnyam a, akwaa bɔ baha ne mukoraati ne ye nye gye.” (1 Kor. 12:16-18, 26) Yeti, sɛ ebie nya yenwo atẽe bie a, yɛmma ɔnyɛ yɛ yá, mmom yɛnye gye. Ɛmɔma yɛnea Ɔhene Saul awa Yonatan nneasoɛ ne. Mmerɛ bɔ Yehowa yele David kyɛ ye, yeɛ né okoli hene ne, Yonatan nye ammoro ye. Mmom ɔhyɛle David ngunaen. (1 Sam. 23:16-18) Aso yɛkohora yekosuesua Yonatan, na yafĩa yɛ kũnu yalɔ afoforɛ hɔ?
APRIL 25–MAY 1
NYAMEƐPIRI DWIRƐ NANU ASUADEƐ | 1 SAMUEL 25-26
“Aso Egyina W’atengã So Yeɛ Ɛyɛ Nikyee Anaa?”
ia 78 ¶10-12
Ɔyɛle Ye Nikyee Nyanza Nu
Sɛɛ yeɛ sogyafoɛ bɔ bɛbɔ mmɔden nemɔ ne mmoaen neafoɛ ne lili ɔ? Né ahãa ɔnyɛ se mma bɛ koraa kyɛ bekohũ mmoaen ne bie bekoli mmerɛ biala ɔ, nakoso banyɛ sɔ. Mmom, bɛbɔle Nabal ngoaa ne ye mmoaen nanwo waen. (Kenga 1 Samuel 25:15, 16.) Né mmoaen neafoɛ ne bɛ mmoaen nemɔ taa yia asiane pẽe. Né ngaka bɔ bɛnwo yɛ suro ne awudifoɛ koso taa to wura bɛ so, ofikyɛ né Israel ngwaen dɔ wɛen ne pingyé maen bɔ enu mmenia te awuefoɔ bɔ betianu yɛ se ɔ.
Né ɔkɔyɛ se paa kyɛ ɔkɔma sɔ mmienzua namukoraati aleɛ wɔ ɛserɛ naso. Yeti ɛlɛhõ bie, David somane mmienzua buru hɔle Nabal berɛ kyɛ ɔboka ye. David somane bɛ mmerɛ bɔ ɔte pá nu. Ofikyɛ né ɔte mmerɛ bɔ bɛpepɛ mmoaen nwo nwiãa, na né bɛtaa bɛyɛ adɔeɛ sɔ mmerɛ ne. David sa neane edwirɛ bɔ ɔfa somane bɛ ne yé, na ɔfale obuo ne nidie yeɛ ɔyɛle sɔ ɔ. Ɔfa bokale so pó kyɛ, bɛhã yenwo dwirɛ bɛhyire Nabal kyɛ “ɛwa David” yeɛ wasoma yɛ ɔ, ɔnate kyɛ né Nabal anyi atra ye nati yeɛ ɔhãne sɔ ne. Sɛɛ yeɛ Nabal yɛle ye nikye ɔ?—1 Sam. 25:5-8.
Ɔfɛle yaa paa! Abrandeɛ bɔ ɔɔbɔle Abigail amaneɛ ne hãhyirele ye kyɛ “ɔteɛteane nu guale bɛ so pepɛle bɛ nzoaa.” Nabal bɔ ne ye tianu yɛ se ne teɛteane nu guale bɛ so kyɛ, ɔngɔfa y’aleɛ, ye nzãa, ye nzue ɔne ye naen ne ngɔma bɛ llé. Ɔgorole David nwo kyɛ mvasoɛ biala nne ye so, na ɔte kyɛ akoaa bɔ wanwati wafi ye mene nwo ɔ. Ɔkɔyɛ kyɛ né Nabal tira adwene tɛ́ bɔ né Saul le ye wɔ David nwo ne bie. Né benu biala llé Yehowa adwene. Né Nyameɛpiri dɔ David, na né ɔse ye kyɛ ɔte ebie bɔ okoli Israel so hene kyeabie ɔ, na ɔtte akoaa bɔ wate atũa ɔ.—1 Sam. 25:10, 11, 14.
ia 80 ¶18
Ɔyɛle Ye Nikyee Nyanza Nu
Olɛle bɔ né wasi nanwo fɔ tole yenwo so, na ɔhã hyirɛle David kyɛ ɔfa ye bɔne hyɛ ye. Ɔhãne ye péin kyɛ ohũ n’agyimi kyɛbɔ ye dumaa ne kyire ne, ebia bɔ né ɔpena kyɛ okyire yeɛ ole kyɛ, ɔmvata kyɛ David ne ebie bɔ ɔte sɔ kɔhõ ɔ. Abigail fi anwotosoɛ nu hãne kyɛ David te Nyameɛpiri namusiniɛ, na kõɛ bɔ né David kõ ne koso te “Yehowa deɛ.” Osa lale yali kyɛ ɔse ɛbɔ bɔ Yehowa ahyɛ afa David ne y’ahennie nanwo ne, ofikyɛ ɔhãne kyɛ: “Yehowa . . . kɔyɛ wɔ Israel kannifoɛ atẽe biala so.” Afei, ɔhã hyirele David kyɛ nnɛmaa ɔyɛ nikyebie bɔ ɔkɔmaa okoli mogya nwo fɔ—kyire kyɛ nikyebie bɔ sɛ ɔyɛ a, yesĩ ne ye tiboa kobua ye fɔ wɔ yenwo ɔ. (Kenga 1 Samuel 25:24-31.) Ɛdwirɛ bɔ ɔka ahõne beni ala ɛhe!
Bible Nu Dwirɛ Titire
ia 80 ¶16
Ɔyɛle Ye Nikyee Nyanza Nu
Aso ɛhe kyire kyɛ né Abigail te atũa tia yenwo atẽe bɔ né ohũ le ye kyɛ abusua ti ne anaa? Daabi; kae kyɛ ne Nabal ayɛ bɔne atia Yehowa somvoɛ bɔ né wapopa ye ne, bɔne bɔ ahãa ɔkɔhora kɔmaa bekohũ Nabal awurofoɛ bɔ né benwo llé dwirɛ ne mukoraati ne. Sɛ Abigail hãne yenoa tole nu a, ennwui kyɛ ahãa yekoso okoli fɔ wɔ bɔne bɔ ohũ yɛle nanwo anaa? Wɔ edwirɛ he anu ne, né odikyɛ ɔbrɛ yenwo ase ma Nyameɛpiri tra kyɛ ɔkɔbrɛ yenwo ase kɔma ohũ ne ɔ.