Nhwehwɛmuɛ Ma Abrabɔ Ne Asɛnga Adesua Nwomaa
MAY 2-8
NYAMEƐPIRI DWIRƐ NANU ASUADEƐ | 1 SAMUEL 27-29
“Atẽe Bɔ David Fale So Hɔle Kõɛ Ɔ”
it-1 41
Akish
Ye pɛen nyɔ so bɔ né David nwati fi Saul nyunu ne mukoraati ne, ɔɔfeale nekaa bɔ né Ɔhene Akish wɔ ne. Mmerɛ bɔ olimoa bɔ né besusu kyɛ David te bɛ pɔfoɛ ne, David yɛle yenwo kyɛ ebie bɔ wabɔ laen, yeti Akish hãne kyɛ bɛyakyi sɔ kwaseaa ne ma ɔhɔ. (1Sa 21:10-15; Ed 34:Ytfd; 56:Ytfd) Mmerɛ bɔ ɔtɔ so nyɔ ne, David ne sogyafoɛ 600 ne b’abusũa yeɛ bɛhɔle ɔ, na ɛhẽne ati, Akish maa bɛɛtenane Ziklag. Wɔ sɔ afoɛ kõ ne bosome nna bɔ né bɛwɔ berɛ ne, né Akish susu kyɛ, gyamia David ne ye mmenia nemɔ kɔto wura Yuda nguro nemɔ aso, nakoso né ɔte Geshurfoɛ, Girzifoɛ ne Amalekfoɛ mmom yeɛ né David kɔto wura bɛ so ɔ. (1Sa 27:1-12) Akish oolɛle David lili alaa maa ɔyele David kyɛ ye bɔbɔ ye bɔdigad mmerɛ bɔ né Filistifoɛ nemɔ kwaafa kõɛ bɛkɔtetá Ɔhene Saul ne. Nakoso ayieleɛ koraa ne, Filistifoɛ “ahemvo nemɔ” hãne kyɛ nnɛmaa ɔfa David boka bɛso maa bɛkɔ kõɛ ne, yeti Akish maa David sale yesĩ hɔle Ziklag. (1Sa 28:2; 29:1-11) Mmerɛ bɔ David ɔɔyɛle Ɔhene ne, ɔne Gatfoɛ bɛɛhõne, nakoso wangũ Akish. Akish tenane ase oodwuli mmerɛ bɔ Solomon oolili hene ne.—1Ah 2:39-41.
w21.03 4 ¶8
Mmrandeɛ—Nzu Yeɛ Ɔkɔmaa Afoforɛ Konya Ɛmɔ Nu Awerɛhyɛmuɛ Ɔ?
Yɛnea ɔhaw foforɛ bɔ David yiale ɔ. Mmerɛ bɔ bɛpopale David kyɛ Ɔhene ne, né odikyɛ ɔnwondɛ afoɛ pẽe kora, né waali bia kyɛ Yuda hene. (1 Sam. 16:13; 2 Sam. 2:3, 4) Mmerɛ bɔ né ɔnwondɛ ne, nzu yeɛ ɔbokale ye maa onyane aboterɛ ɔ? David amma ye aba nu ammu, mmom ɔfale y’adwene siele bɔ ne ɔkɔhora kɔyɛ naso. Kyɛ nneasoɛ ne, mmerɛ bɔ David nwati ɔɔfeale Filistifoɛ aseɛ so ne, ɔfale yenwo atẽe bɔ ɔte sɔ ne hõtiale Israel pɔfoɛ nemɔ. Sɔ bɔ ɔyɛle ne maa ɔhora bɔle Yuda aseɛ ahoroɛ nemɔ nwo waen.—1 Sam. 27:1-12.
it-2 245 ¶6
Ngondombo
Sɛ ebie hyɛda pɛ ngondombo a, Bible ne dwudwo tia, nakoso ɛhẽne ngyire kyɛ odikyɛ ebie kã edwirɛ bie nu nahorɛ kyire mmenia bɔ bellé yenwo atẽe kyɛ bɛte ne. Yesu Kristo hãne kyɛ: “Nnɛmɔfa nikyee bɔ ɔte krongron bɛma ngyea, na nnɛmɔto ɛmɔ afiré pá begua mbrako nyunu, ná b’amva begya b’andietia so, na b’ambɛ bɛnwo bamma andete ɛmɔ nu.” (Mat 7:6) Ɛhẽne ati yeɛ né ɔtɔ mmerɛ bie a, né Yesu ngyirekyire edwire bie nu anaa ɔmma edwire biemɔ nwo mmuaeɛ tẽe ne. Sɛ ɔyɛle sɔ a, ahãa ɔkɔfa ɔhaw pẽe kɔwa. (Mat 15:1-6; 21:23-27; Yoh 7:3-10) Na sɔ ala yeɛ Abraham, Isaac, Rahab, ɔne Elisa koso angã nahorɛ bɔ né ɔwɔ edwire biemɔ nu ne mukoraati bangyire mmenia bɔ né bɛtte Yehowa asomvoɛ ne ɔ.—Gye 12:10-19; yeti 20; 26:1-10; Yos 2:1-6; Yak 2:25; 2Ah 6:11-23.
Bible Nu Dwirɛ Titire
w10 1/1 20 ¶5-6
Aso Awufoɛ Kɔhora Kɔboka Ateasefoɛ Anaa?
Susu ɛhe anwo nea. Bible ne kã kyɛ, sɛ sona wu a, “osa kɔ ye nnɛterɛ nu”, na “ye nzusueɛ mukoraati mini.” (Edwein 146:4) Né Saul ne Samuel mukoraati se kyɛ Nyameɛpiri kyi ebie bɔ ɔkɔ abisa ɔ. Na bɔ ɔte yeɛ ole kyɛ, né Saul pó ali anyunu maa batu bɛbɔ bedi asumanzɛm ne mukoraati bo bafi aseɛ naso!—Levitikɔs 19:31.
Wɔde dwene yenwo nea. Sɛ né Samuel bɔ odi nahorɛ ne té te ase kyɛ honhom a, ahãa okobu Nyameɛpiri mmraa so, na wafa kɔmeɛ bie so ɔne Saul badwudwo anaa? Né Yehowa ne Saul ndwudwo kõ. Yeti ɛnea a, né honhom bie kɔhora kɔhyɛ Nyameɛpiri bɔ Tũmi Mukoraati te ye deɛ ne kyɛ, ɔfa Samuel bɔ wawu naso ɔne Saul bedwudwo anaa? Daabi. Nahorɛ nu ne, sɔ “Samuel” bɔ onwuni ye ne, né ɔtte Nyameɛpiri diyifoɛ bɔ odi nahorɛ ne. Na mmom, né ɔte adaemoni—honhom tɛ́ bie bɔ yetianu yɛse, yeɛ ɔyɛle yenwo kyɛ Samuel bɔ wawu ne ɔ.
MAY 9-15
NYAMEƐPIRI DWIRƐ NANU ASUADEƐ | 1 SAMUEL 30-31
“Hyɛ Wɔnwo Serɛ Wɔ Yehowa Wɔ Nyameɛpiri Nu”
w06 8/1 28 ¶12
Suro Yehowa—Na Má Wɔnye Gye!
Ɔnate kyɛ né David suro Yehowa nati, ɔtte bɔne ngome yeɛ ɔhwẽne yenwo fili yenwo ɔ. Na mmom sɔ suroen ne hyɛle ye serɛ maa osili gyinaeɛ pá, na ɔyɛle ye nikyee nyanza nu wɔ tebea ahoroɛ bɔ né enu yɛ se nu. Afoɛ kõ ne bosome nna bɔ né David ne ye mmrienzua nemɔ nwati fi Saul nyunu ne, bɛhɔle Ziklag bɔ né ɔwɔ Filistifoɛ aseɛ so ne. (1 Samuel 27:5-7) Mmerɛ bie bɔ né David ne ye mmrienzua nemɔ nne berɛ ne, Amalekfoɛ beesili besĩ bɛɛyerale kuro ne, na bɛfale bɛyemɔ, bɛ mmaamɔ, ɔne bɛ ngaka bɛhɔle. Mmerɛ bɔ bɛwale beenwuni bɔ wasi ne, David ne ye mmrienzua nemɔ sũni paa. Aworaborɛ ne kakyili ɛyáafɛlɛ, na David mmrienzua nemɔ hãne kyɛ bekosi ye nyɔboɛ. Ɔwɔ nu kyɛ né David wora abɔ de, nakoso ye aba nu ammu. (Anyandera 24:10) Ɔnate Nyameɛpiri nwo suroen bɔ ole nati, David kakyi hɔle Yehowa berɛ, na “ɔfale yenwo tole Yehowa, ye Nyameɛpiri naso, na onyane anwoserɛ.” Ɔnate Nyameɛpiri mmokalɛ so ne, David ne ye mmrienzua ne pole Amalekfoɛ nemɔ aso, na bɛsa hãne benningyein bɔ bɛfale ne mukoraati.—1 Samuel 30:1-20.
w12 4/15 30 ¶14
Yehowa Bɔ Yɛnwo Waen Fa Dé Yɛ Ngõa
David nwuni amaneɛ pẽe wɔ ye asetena nu. (1 Sam. 30:3-6) Edwirɛ bɔ honhom hãne ye maa ɔhworɔle ne maa yenwu ye kyɛ, né Yehowa se kyɛbɔ David te ngã ɔ. (Kenga Edwein 34:18; 56:8.) Yɛkoso, Nyameɛpiri se kyɛbɔ yɛte ngã ɔ. Sɛ “yɛ worabɔ” anaa “yɛ boto a,” ɔtwẽ pingye yɛ. Sɔ nahorɛ dwirɛ he kɔhora kɔmaa y’ahõne kɔtɔ yekonu tekyɛ David bɔ ɔtole dwein kyɛ: “Wɔ dɔ bɔ onni hũamɔ nati, ngoli ahurusie, ofikyɛ anwu amaneɛ bɔ me fa nu ne, na aworaborɛ bɔ me di ne koso, wɔnye tua.” (Edw. 31:7) Nakoso, ɔtte amaneɛ bɔ yɛfa nu ne ngome yeɛ Yehowa nwu ye ɔ. Mmom ɔkyekye yɛwora, na ɔhyɛ yɛ ngunaen maa yɛkora yegyina nu. Atẽe kõ bɔ ɔfa so yɛ sɔ yeɛ ole Kristofoɛ nhyiam ahoroɛ bɔ yɛkɔ ne.
Bible Nu Dwirɛ Titire
w05 3/15 24 ¶8
Samuel Nwomaa Bɔ Olimoa Nanu Dwirɛ Titire
30:23, 24. Sɔ dwirɛ bɔ ogyĩ Numeri 31:27 so ne kyire kyɛ, bɛbɔ bɛyɛ adwuma serɛ bɛfa bɛboka asafo ne, bɛsombo bɛma Yehowa. Yeti, nikyee biala bɔ yɛyɛ ne, ɛmɔma “yefi yɛkra mukotaati nu yɛyɛ ye kyɛ yɛyɛ yɛma Yehowa na ɔtte sona”—Kolosefoɛ 3:23.
MAY 16-22
NYAMEƐPIRI DWIRƐ NANU ASUADEƐ | 2 SAMUEL 1-3
“Nzu Yeɛ Yesũa Yefi Edwirɛ Bɔ Ɔfa ‘Agyaen’ nwo nanu ɔ?”
w00 6/15 13 ¶9
Kyire Obuo Ma Bɛbɔ Bedi Tũmi Ne
Mmerɛ bɔ bɛfale ɔhaw bɛwale David so ne, ɔmaa ye aba nu buli anaa? David sũ frɛle Yehowa kyɛ: “Bɛbɔ. . .betianu yɛ se ne, bɛpena me bekũ me.” (Edwein 54:3) Ohwiele y’ahõne nu dwirɛ guale Yehowa nyunu kyɛ: O me Nyameɛpiri, dé me fi me pɔfoɛmɔ sa nu. . . O Yehowa anwoserɛfoɛ to wura me so, nakoso ndellé atũa na nyɛllé bɔne biala. Nnilli mvomsoɛ biala, nakoso bɛyɛ ndɛ bɛboɔboa bɛnwo bɛto bewura me so. Sɛ mefrɛ wɔ a, dwɔso na kakyi wɔnye banea me.” (Edwein 59:1-4) Aso ebie bɔ ole tũmi, bɔ ɛyɛllé ye bɔne biala ne ali wɔnye—maa ate ngã sɔ le anaa? David ammu Saul animtia llé. Mmerɛ bɔ Saul wuli ne, kyɛ ahãa David kɔmaa yenye kɔgye ne, wanyɛ sɔ na mmom ɔbɔle awuye kyɛ: “Saul ne Yonatan, anwonyemenefoɛ bɔ né mmenia kuro bedwirɛ ɔ . . . Né bɛnwo yɛ nyera tra kɔleɛ, na né bɛnwo yɛ sé tra gyata. O Israel mmrasua, ɛmɔsũ Saul.” (2 Samuel 1:23, 24) Nea obuo nwo nneasoɛ pirikua bɔ David lale y’ali hyirele ebie bɔ né Yehowa apopa ye ne, ɔmva yenwo kyɛ né Saul ayɛ David bɔne ne ɔ!
w12 4/15 10 ¶8
Mmenia Bɔ Bɛye Afoforɛ Bɛma—Ɔte Ayieleɛ Mmerɛ Nanwo Nzɛngyerɛneɛ!
Mmeni pẽe koso wɔ berɛ bɔ Bible né kã kyɛ belili nahorɛ ɔ. Ɛmɔma yesusu benu nyɔ nwo, na yɛnea bɔ yɛkɔhora yekosũa yekofi bɛ berɛ ɔ. Bɔ olimoa yeɛ ole biãa bie bɔ olili David nahorɛ ne. Né ahãa Ɔhene Saul awa panyi Yonatan yeɛ okoli ye baba bia kyɛ Israel hene ɔ—nakoso wamma nu sɔ. Ofikyɛ, Yehowa yele David mmom kyɛ Israel hene bɔ oli berɛ ɔ. Yonatan lɛle gyinaeɛ bɔ Nyameɛpiri sili ne tole nu. Wamma yenye ammoro David. Na mmom,“Yonatan hurole David dwirɛ kyɛ ye bɔbɔ yenwo” na ɔtale ye ndaen kyɛ okoli ye nahorɛ. Yonatan fale ye ataadeɛ, ye dadeɛ, ye agyaen, ɔne ye abɔsoɛ mane David fahyirele kyɛ, obu ye kyɛ ɔte dehyeɛ. (1 Sam. 18:1-4) Yonatan yɛle bɔ ɔkɔhora biala ‘hyɛle David serɛ,’ na ɔfale ye ngõa pó tole asane nu fa lɛle David fili Saul sanu. Né Yonatan di nahorɛ, na ɔhãhyirele David kyɛ: “Wɔ yeɛ ekoli Israel so hene ɔ, na ngɔyɛ w’abediakyire.” (1 Sam. 20:30-34; 23:16, 17) Ɛhe ati yeɛ ɔnyɛ nwanwa kyɛ, mmerɛ bɔ Yonatan wuli ne, David fale aworaborɛ bɔle awuye, na ɔtole dwein fahyirele kyɛ ɔdɔ ye paa ne.—2 Sam. 1:17, 26.
Bible Nu Dwirɛ Titire
it-1 369 ¶2
Aliemaa
Sɛ ebiemɔ le atirimbɔ ne botaeɛ kõ na bɛkã bɛnwo bɛbonu a, ɛyɛ a bɛka kyɛ bɛte “aliemaa.” Kyɛ nneasoɛ ne, Tiro Hene Hiram frɛle Ɔhene Solomon kyɛ oliema, né ɛhẽne ngyire kyɛ ɔne ye te pɛ wɔ tũmi ne dibea nu, na mmom né ɔne ye ayɛ apam kyɛ ɔkɔfa mmakaa ne nningyein ahoroɛ kɔberɛ ye maa ɔkɔfa kosi asɔre awuro ne. (1Ah 9:13; 5:1-12) David hworɔle kyɛ: “Nea! Kyɛbɔ osi yɛ nyemene kyɛ aliemaamɔ bonu tena ase wɔ kõyɛlɛ nu ɔ!” Bɔ David hworɔle ne maa yenwui kyɛ, ɔtte bɛbɔ yɛne bɛ fi maame ɔne baba ne ngome yeɛ yɛne bɛ kɔhora kɔtena asomdwee nu ɔ. (Ed 133:1) Nahorɛ nu, né David ne Yonatan beffí maame ne baba de, nakoso ɔnate kyɛbɔ né Yonatan kuro ye dwirɛ nati, ɔhora frɛle ye kyɛ oliema. (2Sa 1:26) Sɛ nnamvoa biemɔ le subaen ahoroɛ bie bɔ ɔte kõ, na sɛ sɔ subaen ne ttemayé po a, bɛtaa bɛka kyɛ bɛte aliemaa.—An 18:9.
MAY 23-29
NYAMEƐPIRI DWIRƐ NANU ASUADEƐ | 2 SAMUEL 4-6
“Esuroen Bɔ Ele Ye Kyɛ Ekobu Yehowa Mmraa So Ne, Ma Enu Yɛse”
w05 5/15 17 ¶8
Samuel Nwomaa Bɔ Ɔtɔ So Nyɔ Nanu Dwirɛ Titire
6:1-7. Ɔwɔ nu kyɛ ne David tira adwene pá wɔ bɔ ne ɔyɛ nanwo de, nakoso nhyehyɛeɛ bɔ ɔyɛle maa bɛfale Apam Alaka ne besiele teaseɛnam so ne, né otia Nyameɛpiri mmraa na ɔnate so maa ɔɔfale ɔhaw pẽe wale. (Ɛzadɔs 25:13, 14; Numeri 4:15, 19; 7:7-9)[10] Afei, Apam Alaka ne bɔ Uzza sɔle nu ne koso maa yenwu ye kyɛ adwene pá bɔ ebie le ye ne ngora nsesã Yehowa mmraa.
w05 2/1 27 ¶20
Yehowa Yɛ Bɔ Ɔtengyɛ Mmerɛ Mukoraati
Hyɛ ye nzorɛ kyɛ, né Uzza se nhyehyɛeɛ bɔ né ɔwɔ Alaka nanwo ɔ. Né Alaka bɔ ɔwɔ b’afĩa ne kyire kyɛ Yehowa boka bɛ so. Né Mmraa ne kyire kyɛ ɔnzɛkyɛ ebiala bɔ ollé yenwo atẽe né sɔ alaka nanu, na mmraa ne maa enu lale berɛ kyɛ ebiala bɔ okobu sɔ mmraa naso ne, okowu. (Numeri 4:18-20; 7:89) Yeti, né ɔnzɛkyɛ bebu alaka krongron bɔ bɛfa bɛkɔ nekaa foforɛ ne kyɛ ɔte nikyee kãa bie. Ne Uzza te Leviniɛ (ɔwɔ nu kyɛ né ɔtte sɔfo), yeti ne ahãa odikyɛ onwu mmraa nanu dwirɛ yé. Afei koso, bɔ ɔkɔyɛ né babɔ Alaka nanwo waen nati, bɛfa beesiele ye baba awuro afoɛ pẽe. (1 Samuel 6:20–7:1) Né wagyina berɛ kɔyɛ afoɛ 70, kora yeɛ David yɛle kyɛ ɔkwaaye fi berɛ ɔ. Yeti ɔkɔhora kɔwa kyɛ, né Uzza se mmraa bɔ ɔfa Alaka nanwo ne mukoraati fi ye ngwalaa nu.
w05 2/1 27 ¶21
Yehowa Yɛ Bɔ Ɔtengyɛ Mmerɛ Mukoraati
Kyɛbɔ y’alimoa y’ahã ne, Yehowa kora nwu ahõne nu. Na ɔnate kyɛ Bible ne hãne kyɛ, bɔ Uzza yɛle ne, “ongyire obuo” nati, ebie a, Yehowa nwuni pɛsɛmangomenya adwene bie wɔ bɔ Uzza yɛle ne sĩ, bɔ tworɔnzɛm ne angã yenwo dwirɛ ɔ. Aso ne Uzza te ahandaen bɔ né ɔtaa yɛ nningyein bɔ ollé yenwo atẽe kyɛ ɔyɛ anaa? (Anyandera 11:2) Aso Alaka bɔ né y’abusũa ne anea so afoɛ pẽe, bɔ ne oli ye nyunu wɔ badwanu sɔ mmerɛ ne, yeɛ ɔmaa ɔyɛle anwomasoɛ anaa? (Anyandera 8:13) Aso ne Uzza llé gyidie maa yeti onyane adwene kyɛ, Yehowa sa te tika bɔ ɔngɔhora ngɔbɔ alaka krongron, bɔ okyire kyɛ ɔwɔ b’afĩa nanwo waen anaa? Kyɛbɔ ɔte biala ne, yɛkohora yekonya awerɛhyɛmuɛ kyɛ Yehowa yɛle bɔ ɔtengyɛ ɔ. Ɔkɔyɛ kyɛ Yehowa nwuni nikyee bie wɔ Uzza ahõne nu, na ɛhẽne ati yeɛ ɔfale ndɛen bɔ enu yɛse sɔ mane ye ne.—Anyandera 21:2.
Bible Nu Dwirɛ Titire
w96 4/1 29 ¶1
Fa W’adesoa To Yehowa So Mmerɛ Biala
Kyɛ Ɔhene ne, né ɛhe nwo asodie ne bie la David so. Bɔ ɔyɛle ne maa yenwu ye kyɛ ɔtɔ mmerɛ bie a, bɛbɔ bɛne Yehowa le abusũabɔ pá ne po kɔhora kɔyɛ nningyein bɔ ɔmvata wɔ mmerɛ bɔ enu yɛ se nu. Ahyɛaseɛ ne, David fɛle yaa. Afei, esuroen hãne ye. (2 Samuel 6:8, 9) Anwotosoɛ bɔ né ole ye wɔ Yehowa nu ne, oyiale yenwo nzɔhwɛ bɔ enu yɛ se ɔ. Sɔ mmerɛ he de, wangora wamva ye adesoa wando Yehowa so, ɔnate kyɛ wanni ye akwangyerɛ so. Ɔtɔ mmerɛ bie a, ɛhe bie kora to yɛ anaa? Sɛ y’amva Yehowa akwangyerɛ y’anyɛ adwuma na sɛ yeyia yenwo haw bie a, aso yɛbɔ Yehowa sõmoɛ anaa?—Anyandera 19:3.
MAY 30–JUNE 5
NYAMEƐPIRI DWIRƐ NANU ASUADEƐ | 2 SAMUEL 7-8
“Yehowa Ne David Yɛle Apam”
w10 4/1 20 ¶3
“W’ahennie Bo Kotĩmu”
Bɔ David susuli yenwo wɔ ye ahõne nu ne sɔle Yehowa nye. Bɔ ɔne ngɔmhyɛ yia ne, ɔnate David anwofama ti, Nyameɛpiri ne ye yɛle apam kyɛ, ɔkɔmaa ebie bɔ ɔte David bosoniɛ kofi ahemvo abusũa nanu koli bia afebɔɔ. Natan hãne ɛbɔ bɔ Nyameɛpiri ahyɛ nanwo dwirɛ hyirele David kyɛ: “W’awuro ne w’ahennie bo kotĩmu wɔ wɔ nyunu daa, na wɔ tũmidie koso kɔtena berɛ afebɔɔ.” (Nkyekyɛmuɛ 16) Nwa yeɛ ole koliagyáa bɔ b’ahã yenwo dwirɛ wɔ apam he anu—Bɔ okoli bia afebɔɔ ne?—Edwein 89:20, 29, 34-36.
w10 4/1 20 ¶4
“W’ahennie Bo Kotĩmu”
Né Yesu bɔ ofi Nazarɛt ne te David bosoniɛ. Mmerɛ bɔ né abɔfo bie kã Yesu aworɛ nwo dwirɛ ne, ɔhãne kyɛ: “Yehowa Nyameɛpiri kɔfa ye baba David ahennie bia kɔma ye, na okoli Yakob awuro so hene daa, na y’ahennie nngɔwa ayieleɛ llé.” (Luka 1:32, 33) Yeti apam bɔ Nyameɛpiri ne David yɛle ne, ɔwale nu wɔ Yesu Kristo so. Yeti, ɔtte sona bie yeɛ ɔyele kyɛ ooli bia ɔ, na mmom ɛbɔ bɔ Nyameɛpiri hyɛle ne, yeɛ ɔmaa Yesu nyane yenwo atẽe kyɛ okoli bia daa ɔ. Ɛmɔma yɛkae kyɛ, Nyameɛpiri bɔhyɛ ba nu mmerɛ biala.—Aizaya 55:10, 11.
w14 10/15 10 ¶14
Nya Gyidie Bɔ Enu Yɛ Se Wɔ Ahennie Nanu
Yehowa hyɛle tete Israel Hene David ɛbɔ bie, bɛfrɛ sɔ bɔhyɛ ne David apam. (Kenga 2 Samuel 7:12, 16.) Yehowa ne David yɛle sɔ apam he mmerɛ bɔ né David di bia wɔ Yerusalɛm ne, na ɔhyɛle ye bɔ kyɛ Mezaya ne kofi ye bosofoɛ nu yeɛ ɔkɔwa ɔ. (Luka 1:30-33) Afei de, né Yehowa bukye nningyein so ngakãngakã maa mmenia nwu abusũa bɔ né Mezaya ne kofi nu kɔwa ɔ, Yehowa hãne kyɛ David bosoniɛ he yeɛ né “ole yenwo atẽe” kyɛ odi Mezaya Ahennie naso hene ɔ. (Ezek. 21:25-27) Ɔnate Yesu so ne, David ahennie ne “bo kotĩmu afebɔɔ.” Nahorɛ nu ne, David bosoniɛ ne “kɔtena berɛ daa, na ye ahennie bia kɔtena berɛ daa tekyɛ eyia.” (Edw. 89:34-37) Yɛkɔhora yekonya awerɛhyɛmuɛ kyɛ, nikyee tɛ́ biala nngɔwa Mezaya ahennie nanwo, na ɔkɔfa nhyiraa bɔ ollé ayieleɛ kɔwa!
Bible Nu Dwirɛ Titire
it-2 206 ¶2
Ayieleɛ Mmerɛ
Balaam Ngɔmhyɛ Ne. Mmerɛ bɔ né waha kãa maa Israelfoɛ nemɔ dwu bɔhyɛ aseɛ naso ne, diyifoɛ Balaam hãhyirele Moab Hene Balak kyɛ: “Bra na ngyire wɔ bɔ mmenia hemɔ [Israelfoɛ ne] kɔfa kɔyɛ wɔ mmenia ne kyẽabie ɔ [anaa “ngyẽa ne ayieleɛ”]. . . . Nzramaa bie kofité kofi Yakob nu, na ahennie pɔmaa bie kofi Israel nu kodwɔso. Na kyɛbɔ ɔte biala ne, ɔkɔpakyepakye Moab ti, na wapakyepakye ye mmaamɔ bɔ bɛyɛ dédé ne ti kwangoa.” (Nu 24:14-17) Ngɔmhyɛ ne mmamuɛ bɔ oli mmoa na nu ne, né “nzramaa” ne yeɛ ole Ɔhene David, bɔ olili Moabfoɛ so ngunim ne. (2Sa 8:2) Yeti, wɔ sɔ ngɔmhyɛ he mmamuɛ nu ne, “ngyẽa ne ayieleɛ” ne hyɛle yebo fili mmerɛ bɔ David ɔɔyɛle Ɔhene ne. Ɔnate kyɛ né David te Yesu bɔ ɔkɔɔyɛ Mezaya Ahennie naso hene nanwo mvonini nati, sɔ ngɔmhyɛ he koso kɔfa Yesu nwo mmerɛ bɔ ɔkɔsɛkye ye pɔfoɛmɔ ne.—Aiz 9:7; Ed 2:8, 9.
JUNE 6-12
NYAMEƐPIRI DWIRƐ NANU ASUADEƐ | 2 SAMUEL 9-10
“David Lale Ɔdɔ Bɔ Onni Hwãmɔ Ali”
w06 6/15 14 ¶6
Amba, Ɛkɔhora Konya Anigye
David hworɔle kyɛ: “Anigye yeɛ ole sona bɔ ɔdwene bɔ ye dwirɛ yɛ anwumvo nanwo ɔ.” Na ɔtoale so kyɛ: “Odwu anwokyere kyẽa a, Yehowa kole ye. Yehowa kɔnea ye so, na wama ye ngõa. Mmenia kɔfrɛ ye anigye.” (Edwein 41:1, 2) Anwunvoin bɔ David lale y’ali hyirele Yonatan awa brienzua Mefibosɛt, bɔ né ɔte abafaen ne maa yenwu kyɛbɔ odikyɛ yɛne bɛbɔ bɛnwo yɛ anwumvo ne di dwirɛ ɔ.—2 Samuel 9:1-13.
w05 5/15 17 ¶12
Samuel Nwomaa Bɔ Ɔtɔ So Nyɔ Nanu Dwirɛ Titire
9:1, 6, 7. David lili ye bɔhyɛ so. Yeti, yɛkoso odikyɛ yɛbɔ mmɔden kyɛ yekoli yɛ bɔhyɛ so.
w02 2/15 14 ¶10
Begyinane Ɔhaw Bɔ Né Beyia Ne Noa
Afoɛ bie sĩ ne, ɔnate ɔdɔ pirikua bɔ né Ɔhene David le ma Yonatan nati, ɔlale adɔeɛ ali hyirele Mefibosɛt. David fale Saul agyapadeɛ mukoraati mane ye, na ɔmaa Saul somvoɛ Siba neane aseɛ naso. David sa hãhyirele Mefibosɛt kyɛ: ‘Ekodidi wɔ me poen so daa.’ (2 Samuel 9:6-10) Aporowaa biala nne yenwo kyɛ, adɔeɛ bɔ David yɛle Mefibosɛt ɔnate kyɛ né wali nnɛen nati ne, ɔbokale Mefibosɛt na ɔkyekyele yewora koso. Asũadeɛ beni ala ɛhe! Odikyɛ yɛkoso yɛda ayemyé ali yekyire bɛbɔ beyia ɔhaw wɔ b’asetena nu ne.
Bible Nu Dwirɛ Titire
it-1 266
Kanzà
Mmeni pẽe bɔ né bɛtetete Afitéleɛ wɔ tete mmerɛ nu, ɔne Israelfoɛ nemɔ nu ne, sɛ né brienzua bie sie ye kanzà a, né bebu ye kyɛ animnyam wɔ nu paa. Nyameɛpiri mmraa hyɛle Israelfoɛ nemɔ kyɛ nnɛmaa bɛpõa “bɛ mvoka,” bɛsó nda nu, bɛnye asĩ nwiãa, ɔne bɛ kanzà. (Le 19:27; 21:5) Aporowaa biala nne ɛhe anwo, ofikyɛ wɔ abosõnzomfoɛ biemɔ nu pó ne, né ɔte bɛ sõen nu amanneɛ.
JUNE 13-19
NYAMEƐPIRI DWIRƐ NANU ASUADEƐ | 2 SAMUEL 11-12
“Nnɛmaa Akɔnnɔ Tɛ́ Fa Wɔ Yɛ Akoaa”
w21.06 17 ¶10
Ɛkɔhora Kole Wɔnwo Kofi Satan Ngaen Nu!
Anyeborolɛ maa Ɔhene David wora fili bɔ né Yehowa ayɛ ama ye bɔ ebie yeɛ ole anwonyadeɛ, animnyam, ɔne kyɛbɔ né waboka ye maa wali ye pɔfoɛ pẽe so ngunim ne. David nye sɔle bɔ né Nyameɛpiri ayɛ ama ye ne, na ɔhãne yenwo dwirɛ po kyɛ “ɔsõne soma kyɛ ɔkɔhora kɔha ɔ!” (Edw. 40:5) Nakoso mmerɛ bie sĩ ne, David wora fili bɔ né Yehowa ayɛ ma ye ne. Yenye anzɔ bɔ né ole ye ne kõ, na mmom né ɔpena pẽe boka so. Ɔwɔ nu, né David ayemɔ sõne, nakoso onyane ebie aye nwo akɔnnɔ tɛ́ wɔ y’ahone nu. Brasua ne yeɛ ole Bat-Seba, bɔ ohũ yeɛ ole Uria bɔ ɔte Hitiniɛ ne. Pɛsɛmangomenya ti, David ne Bat-Seba nyane nnaa nu ngitanwodie, na brasua ne nwonzɛle. David amma agyaasɛkyelɛ ne anzo berɛ ala, na mmom osa yɛle nhyehyɛeɛ maa behũni Uria! (2 Sam. 11:2-15) Nzu yeɛ ɔmaa David yɛle sɔ ɔ? Aso né osusu kyɛ Yehowa ngonwu bɔ né ɔyɛ ne anaa? Yehowa somvoɛ bɔ né odi nahorɛ ne maa pɛsɛmangomenya ne anyeborolɛ nyane ye, na ɔpɛle so aba bɔ ɔyɛ yáa ɔ. Anigye dwirɛ yeɛ ole kyɛ, mmerɛ bie sĩ ne, David lɛle ye mvomsoɛ tole nu na onuni yenwo. Mmerɛ bɔ Yehowa fale ye bɔne ne hyɛle ye ne, nea kyɛbɔ yenye si gyele ɔ!—2 Sam. 12:7-13.
w19.09 17 ¶15
Fi Wɔ Pɛ Nu Fa Wɔnwo Wura Yehowa Bo—Nzuati Yeɛ Odikyɛ Ɛyɛ Sɔ Ɔ, Na Ɛkɔyɛ Ye Sɛ́?
Yehowa annye David kyɛ ɔyɛ abusũa ti ngome, na mmom osa yele ye kyɛ oli Israel maen ne mukoraati nyunu. Ɔnate kyɛ né David te ɔhene nati, né ole tũmi paa. Ɔtɔ mmerɛ bie a, né ɔmva ye tũmi ne nni dwumaa yé, na ɔmaa ɔyɛle bɔne bɔ anyeborolɛ wɔ nu ɔ. (2 Sam. 11:14, 15) Nakoso ɔbrɛle yenwo ase wurale Yehowa bo, na olɛle Yehowa ndeɛnzoɛ tole nu. Ofili ye ahõne nu bɔle Yehowa mbaeɛ. Na ɔyɛle bɔ ɔkɔhora biala kyɛ okotie Yehowa afutue. (Edw. 51:1-4) Ebiekũ koso ne, ɔbrɛle yenwo ase tiele afutue bɔ mmrienzua ne mmrasua fa mane ye ne. (1 Sam. 19:11, 12; 25:32, 33) David sũane nikyeebie fili mvomsoɛ bɔ olili nanu, na ɔfale Yehowa sõen lilí mmoa wɔ ye asetena nu.
w18.06 17 ¶7
Fa Nyameɛpiri Mmraa Ne Ye Nnyinasoɛdwirɛ Tete Wɔ Tiboa
Yenwo nhia kyɛ yekobu Nyameɛpiri mmraa so yekonwu yenwo amaneɛ kora ne y’asũa nworɛ. Ebiemɔ lili mvomsoɛ maa bɛyɛle yenwo tworɔtohɔ wɔ Nyameɛpiri dwirɛ nanu bɔ yɛkohora yekosua nikyeebie yekofi nu ɔ. Anyandera 1:5 kã kyɛ: “Bɔ ɔse nworɛ ne tie, na osũa nningyein pẽe.” Nahorɛ nu ne, sɛ yɛkenga edwirɛ bɔ osisili bɔ bayɛ yenwo tworɛtohɔ wɔ Bible nanu, na yɛ dwenedwene yenwo a, yenya akwangyerɛ bɔ ɔte pá tra biala bɔ ofi Nyameɛpiri berɛ ɔ. Kyɛ nneasoɛ ne, mmerɛ bɔ Ɔhene David buli yenye guale Yehowa mmraa so na ɔne Bat-Seba sɛkyele agyaa ne, nea ɛyalɛ bɔ ɔfale nu ɔ. (2 Sam. 12:7-14) Sɛ ebia, yɛkenga sɔ dwirɛ he na yɛdwenedwene yenwo a, yekobisa yɛnwo kyɛ: ‘Nzu yeɛ ahãa Ɔhene David kɔhora kɔyɛ, ná ɔne Bat-Seba b’anzɛkye agyaa maa wamva ɔhaw pẽe nu ɔ? Sɛ meyia nzɔhwɛ bɔ ɔte sɔ a, aso ngɔhora ngonya anwoserɛ ngɔhwẽ menwo ngofi yenwo anaa? Ngɔnwati kyɛbɔ Yosef yɛle ne, anaa ngɔyakyiyakyi menwo kyɛbɔ David yɛle ne anaa?’ (Gye. 39:11-15) Sɛ yɛdwenedwene ɔhaw ne amaneɛ bɔ bɔne fa ba nanwo a, ɔkɔboka yɛ maa yɛkɔhyɛ yɛnwo so, ná “yahyi bɔne’’.
Bible Nu Dwirɛ Titire
it-1 590 ¶1
David
Né Yehowa nea bɔ ɔkɔ so ne, na ɔmaa bɔne ne mukoraati nwo lale berɛ. Sɛ Yehowa mane yenwo atẽe kyɛ mmenia bɔ bɛte atemufoɛ yeɛ beli David ne Bat-Seba dwirɛ ne a, ahãa kyɛbɔ Mose Mmraa ne kyire ne, né bekohũ bɛ maa akwalaa bɔ né bɛwolle ye ne koso kowu. (De 5:18; 22:22) Nakoso, Yehowa bɔbɔ sɔle edwirɛ nanu, na onwuni David anwumvo ɔnate Ahennie nanwo apam nati (2Sa 7:11-16), ofikyɛ aporowaa biala nne yenwo kyɛ, né David koso anwu ebiemɔ anwunvoin (1Sa 24:4-7; fa toto Yak 2:13) afei koso, sɛ abɔnefoɛ nu bɛnwo a, Nyameɛpiri fa bɛ bɔne kyɛ bɛ. (Ed 51:1-4) Nakoso yenwo asotwẽ ne bie ba bɛso. Yehowa nate diyifoɛ Natan so hãne kyɛ: “Ngɔmaa musue kofi wɔ bɔbɔ w’awuro kɔwa wɔ so.”—2Sa 12:1-12.
JUNE 20-26
NYAMEƐPIRI DWIRƐ NANU ASUADEƐ | 2 SAMUEL 13-14
“Amnon Pɛsɛmangomenya Ne Fale Ɔhaw Pẽe Wale”
it-1 32
Absalom
Behũni Amnon. Ɔnate kyɛ né Absalom aliema brasua Tamar nwo yɛ nyemene nati, né oliema brienzua panyi Amnon kuro ye. Amnon hyɛle da yɛle yenwo kyɛ ɔnde apɔ, yeti ɔmaa bɛfale Tamar bɛwale ye awuro berɛ kyɛ ɔɔtõ aleɛ ma ye, na ɔtowurale yeso ne ye bɛlale. Mmerɛ bɔ Amnon ne Tamar la yiele ne, ɔdɔ bɔ né ole ma ye ne mukoraati tuminini, na onyane ɛpɔen bɔ enu yɛse mane ye, na ɔmaa bɛfõane Tamar befili y’awuro berɛ. Ataadeɛ bɔ né ɔmaa Tamar da nzorɛ kyɛ ɔhene awa brasua bɔ owunni biãa llé ne, Tamar sũnzwale nu, na ɔfale nzoen guale yeti so, na mmerɛ bɔ ɔkɔ ne, oyiale Absalom. Absalom nwuni tebea ne, na waanyɛ ye nwawa ofikyɛ né ɔse kyɛ, Amnon kɔhora kɔyɛ sɔ nikyee ne. Absalom hyɛle oliema brasua ne kyɛ nnɛmaa ɔyɛ edwirɛ bɔ wasi nanwo hwee, na ɔfale ye ɔɔtenane ye bɔbɔ y’awuro.—2Sa 13:1-20.
w17.09 5 ¶11
Hyɛ Wɔnwo So
Bible ne ma yɛ kɔkɔbɔ nwo nneasoɛ bɔ ɔfa mmenia biemɔ bɔ né bɛngora bɛnhyɛ bɛnwo so wɔ brienzua ne brasua nnaa nwo ɔ. Osa koso maa yenwu nzunzuansoɛ bɔ ɔyɛ aworabɔ, bɔ ofi ebie nwo so bɔ ɔngora nhyɛ nanu ba ɔ. Ebiala bɔ oyia tebea bɔ ɔte sɔ ne, ɔkɔhora kosusu abrandeɛ bɔ ɔnze nworɛ bɔ Anyandera yeti 7 ne kã yenwo dwirɛ nanwo. Wɔ de susu subaen bɔ Amnon lale y’ali, ɔne nikyee tɛ́ bɔ ofili nu wale nanwo nea. (2 Sam. 13:1, 2, 10-15, 28-32) Awofoɛ, ɛmɔboka ɛmɔ mmaamɔ ma bɛhora bɛhyɛ bɛnwo so wɔ brienzua ne brasua nnaa nwo mmerɛ bɔ bayia yenwo nzɔhwɛ ne. Na sɛ ɛmɔyɛ abusũa sõen a, ɛmɔkɔhora bekosusu Bible nu dwirɛ bɔ yahã yenwo dwirɛ kesalae deinn nanwo.
it-1 33 ¶1
Absalom
Afoɛ nyɔ sĩ ne, Absalom tole poen bie wɔ Baal-hazor mmerɛ bɔ né bɛpepɛ mmoaen nwo nwiãa, bɔ né ɔte afahyɛ mmerɛ ne, na ofi Yerusalɛm bɔ ɔkɔ berɛ ne te kilometer 22 (kwanzĩi 14), na ɔtole asaa frɛle ɔhene David ne ye mma mmrienzua nemɔ koso. Mmerɛ bɔ ye baba srɛle ye kyɛ ongonya atẽe ngɔwa ne, Absalom srɛle ye kyɛ ɔma Amnon, bɔ ɔte ɔwa panyi ne oosi ye gyanu. (An 10:18) Wɔ afahyɛ nabo ne, mmerɛ bɔ né Amnon “anõ nzãa wabo ne,” Absalom hãhyirele ye asomvoɛ nemɔ kyɛ behũ ye. Ɔhene ne mma mmrienzua bɔ baha ne nwati hɔle Yerusalɛm, na Absalom koso nwati ɔɔfeale ye nana bɔ né ɔte Sirianiɛ ne berɛ wɔ Geshur wɔ nekaa bɔ né opingye Galilea Po ne. (2Sa 13:23-38) “Ngrandɛ” bɔ diyifoɛ Natan hãne yenwo dwirɛ ne, yeɛ né wawa David “awuro” so ne, na né ongofi berɛ llé, ye ngõa ngyẽa mukoraati.—2Sa 12:10.
Bible Nu Dwirɛ Titire
g04 12/22 8-9
Anwonyemene Bɔ Mvasoɛ Wɔ So Paa Ɔ
Wɔde ma yɛnea kyɛbɔ David awa brienzua Absalom yɛle ye nikyee ɔ. Ɔmva yenwo kyɛ ne yenwo yɛ nyemene ne, né ye subaen ttemayé koraa. Bible ne kã yenwo dwirɛ kyɛ: “Wɔ Israelfoɛ mukoraati nu ne, brienzua biala nné berɛ bɔ né bɛkãmvo y’anwonyemene tekyɛ ye ɔ. Ofi ye gya bo bɔ ɔkwaadu ye ti so ne, ye nekaa biala nné berɛ bɔ ɛto yenwo a ɔyɛ yé ɔ.” (2 Samuel 14:25) Nakoso, bɔ Absalom fasiele yenye so ne maa ɔtele atũa tiale ye bɔbɔ ye baba, na ɔyɛle kyɛ okole ahennie ne kofi ye sanu. Ɔne ye baba sómaa nemɔ nyane nnaa nu ngitanwodie. Ayieleɛ koraa ne, Yehowa fɛle Absalom so yaa na owuli ewue yáayáa.—2 Samuel 15:10-14; 16:13-22; 17:14; 18:9, 15.
Aso ahãa wɔnye kɔgye yenwo kyɛ ekopingye Absalom anaa? Daabi. Né ye subaen biala nne berɛ bɔ ɔte pá ɔ. Ye anwonyemene mukoraati sĩ ne, né ɔte anwomasoɛ, ebie bɔ onni nahorɛ, yeti ayieleɛ koraa ne, owuli. Nakoso wɔ Bible nanu ne, yenwu nneasoɛ pẽe bɔ ɔfa mmenia bɔ né bɛse nworɛ bɔ né bedé bɛ bɛto nu, ɔmva yenwo kyɛ Bible ne angã nikyeefee wamva b’anwonyemene nwo ne. Yeti subaen pá bɔ né bele ye ne, yeɛ né yenwo hia paa ɔ.
JUNE 27–JULY 3
NYAMEƐPIRI DWIRƐ NANU ASUADEƐ | 2 SAMUEL 15-17
“Ahandaen Maa Absalom Tele Atũa”
it-1 860
Bɛbɔ Betu Amirika Bedi Ɔhene Nyunu
Né ɔte amammerɛ kyɛ, kora bɔ ɔhene bie kodwu kuro bie aso ne, né bɛmaa mmenia biemɔ dimoa tu amirika di ndeaseɛnam nemɔ nyunu kɔbɔ amaneɛ, na bɛ ala yeɛ né besa bɛboka ɔhene ne ɔ. (1Sa 8:11) Absalom ne Adoniyah, suesũane sɔ amammerɛ he kyɛbɔ ɔkɔyɛ a, bekonya animnyam wɔ b’atũa bɔ bɛtele nanu, yeti bɛfale mmenia 50 kyɛ betu amirika beli bɛ ndeaseɛnam nemɔ nyunu.—2Sa 15:1; 1Ah 1:5.
w12 7/15 13 ¶5
Sõ Nyameɛpiri Bɔ Ɔmá Anwofadie Ne
Yenwu bɛbɔ benyane ebiemɔ so ngɛendɛenzoɛ tɛ́ nanwo dwirɛ wɔ Bible nanu. Sɔ nneasoɛ nanu kõ yeɛ ole Ɔhene David awa Absalom. Né ɔte ebie bɔ yenwo yɛ nyemene paa. Tekyɛ Satan ne, ɔmaa anyeborolɛ wale ye ahõne nu, na onyane adwene kyɛ okole bia ne kofi ye baba sa nu, mmerɛ bɔ né ollé yenwo atẽe kyɛ ɔyɛ sɔ ne. Ɔnate kyɛ né ɔpena kyɛ odé ahennie nati, Absalom hyɛɛda yɛle yenwo kyɛ ɔdwene ye mangõ Israelfoɛ nemɔ nwo, yeti ɔmaa mmenia nemɔ nyane adwene kyɛ ɔhene ne, ɔne ye mbanyi bɔ ɔne bɛwɔ ahemvie berɛ ne ndwene bɛnwo. Kyɛbɔ Abɔnzam yɛle ye nikyee wɔ Eden turo nanu ne, Absalom yɛle yenwo kyɛ ɔpena ye mmenia nemɔ yé, nakoso mmerɛ kõ nala nu ne, né ɔsɛkye ye baba dumaa.—2 Sam. 15:1-5.
it-1 1083-1084
Hebron
Afoɛ bie sĩ ne, David awa Absalom hɔle Hebron, nekaa bɔ né ɔpena kyɛ otu ye baba fi bia so nakoso waanyɛ yé ne. (2Sa 15:7-10) Bɔ yeti yeɛ Absalom yele Hebron kuro ne kyɛ ɛberɛ yeɛ né ɔkɔhyɛ yebo koli ye bia ne yeɛ ole kyɛ, wɔ abakɔsɛm nu ne, né ɔte Yuda maen ne ahenguro, na ɛberɛ ala koso yeɛ né Absalom fi ɔ. Nziɛen, David anomaa, Ɔhene Rehoboam sa kyekyele Hebron kuro ne. (2Be 11:5-10) Babilɔnfoɛ sɛkyele Yuda kuro ne sĩ ne, Yudafoɛ bɔ befili ngoaasõm nu bɛwale ne, benu biemɔ bɛɛtenane Hebron (Kiriat-arba).—Ne 11:25.
Bible Nu Dwirɛ Titire
w18.08 6 ¶11
Aso Ɛse Nahorɛ Bɔ Ɔwɔ Edwirɛ Nanu Anaa?
Kyɛ angorangora ne, bɛkɔhora bekobu yɛ ndɛengyea wɔ edwirɛ bie nu, ɔnate kyɛ ebia, né bahã edwirɛ bie bɔ ɔtte nahorɛ bato yɛ so. Susu nneasoɛ bɔ ɔfa Ɔhene David ne Mefibosɛt nwo nanwo nea. David lale ayemyé ali hyirɛle Mefibosɛt, ɔnate kyɛ osá fale ye nana Saul aseɛ ne mukoraati mane ye. (2 Sam. 9:6, 7) Nakoso nziɛen, David tele edwirɛ bie bɔ né ɔttemayé fale Mefibosɛt nwo. Ɔnate kyɛ David aanyɛ nhwehwɛmuɛ biala wɔ edwirɛ nanu ti, osili gyinaeɛ kyɛ okole Mefibosɛt agyapadeɛ namu kofi yesa nu. (2 Sam. 16:1-4) Ayieleɛ koraa ne, mmerɛ bɔ David ne Mefibosɛt bedwudwole ne, David oonwuni kyɛ wali mvomsoɛ, yeti osa fale agyapadeɛ ne bue bie mane Mefibosɛt. (2 Sam. 19:24-29) Nakoso sɛ David yɛle edwirɛ nanu nhwehwɛmuɛ yé a, ahãa wambere yenwo waanzi sɔ gyinaeɛ bɔ ɔmaa obuli ndɛengyea ne.