ADESUA 32
Nyameɛpiri Ahennie Di Tumi!
Nyameɛ Ahennie hyɛle yebo lili tumi wɔ anwuro wɔ afoɛ 1914 nu. Na sɔ mmerɛ ne yeɛ ewiase he ayieleɛ ne hyɛle yebo ɔ. Ɔyɛle sɛɛ yeɛ yenwuni ye ɔ? Ofi 1914 bɔ ɔba ne, Bible nu ngɔmhyɛ pẽe awa nu. Afei koso, nningyein pẽe asisi wɔ ewiase nanu, na mmenia subaen koso asesã. Yekosua ɛhe anwo dwirɛ pẽe wɔ adesua he anu.
1. Nzu yeɛ Bible ngɔmhyɛ ma yenwui ɔ?
Bible nu nwomaa bɔ bɛfrɛ ye Daniel ne ma yenwu kyɛ, Nyameɛ Ahennie kɔhyɛ yebo koli tumi mmerɛ bɔ “mmerɛ nzoo” ne awa ye ayieleɛ ne. (Daniel 4:16, 17) Afoɛ pẽe sĩ ne, Yesu hãne sɔ mmerɛ nanwo dwirɛ kyɛ ɔte “mmerɛ bɔ bafa bama maenmaen” ne, na osa hãne kyɛ onya walle ayieleɛ. (Luka 21:24) Yekonwu kyɛ, mmerɛ nzoo ne wale ayieleɛ wɔ afoɛ 1914 nu.
2. Ofi 1914 bɔ ɔba ne, nningyein beni yeɛ wasisi ɔ, na sɛɛ yeɛ mmenia subaen asesã ɔ?
Yesu asuafoɛ nemɔ bisale ye kyɛ: “Nzu yeɛ ɔkɔyɛ wɔ walɛ, ɔne mmerɛ bɔ ɔwɔ berɛ he ayieleɛ nwo nzɛngyerɛneɛ ɔ?” (Mateo 24:3) Yesu hãne kyɛ sɛ ɔhyɛ yebo kyɛ odi tumi wɔ anwuro a, nningyein pẽe kosisi. Sɔ nningyein ne bie yeɛ ole, kõɛ, ɛhɔen, ɔne aseɛwosolɛ. (Kenga Mateo 24:7.) Bible ne sa hãne kyɛ, subaen ahoroɛ bɔ mmenia kɔla y’ali wɔ “ayieleɛ mmerɛ nanu” ne, ɔkɔmaa “mmerɛ bɔ enu yɛse kɔwa.” (2 Timoteo 3:1-5) Ɔwɔ nu, né sɔ nningyein nemɔ wɔ berɛ dada, nakoso ofi 1914 bɔ ɔba ne, nningyein ale asaa nu koraa.
3. Nzuati yeɛ tebea ne asɛkye koraa fi mmerɛ bɔ Nyameɛpiri Ahennie ne hyɛle yebo kyɛ odi tumi ne, nzuati yeɛ nningyein ayɛ basaa sɔ ne ɔ?
Mmerɛ bɔ Yesu yɛle Nyameɛpiri Ahennie naso Hene ne, wangyɛ koraa yeɛ ɔne Satan ne sunzummɔne nemɔ hõne wɔ anwuro ɔ. Satan lili nguguo wɔ sɔ kõɛ nanu. Bible ne kã kyɛ “begyili ye bɛtole aseɛ so, na bɛtole y’abɔfo nemɔ koso bɛbokale ye so.” (Nyekyire 12:9, 10, 12) Satan afɛ yaa paa, ofikyɛ ɔse kyɛ bɛkɔsɛkye ye. Ɛhene ati yeɛ wamaa mmenia nwu amaneɛ wɔ aseɛ he aso ne. Nakoso Nyameɛ Ahennie ne kɔye sɔ haw ne mukoraati kofi berɛ.
SUA PẼE BOKASO
Yɛyɛ sɛɛ yeɛ yenwu kyɛ Nyameɛ Ahennie ne hyɛle yebo lili tumi wɔ 1914 nu ɔ, na nzu yeɛ odikyɛ ɛhe kã yɛ maa yɛyɛ ɔ? Má yɛnea yenwo mmuayɛɛ ne.
4. Bible nu mmerɛbulɛ basi 1914 so
Nyameɛ mane tete Babilɔn Hene Nebukadnezza hyele nnaleɛ bie bɔ ne ɔte ngɔmhyɛ ɔ. Sɔ nnaleɛ ne, ɔne ngyerekyiremuɛ bɔ Daniel famane ne, né ɔfa Nebukadnezza tumidie ɔne Nyameɛpiri Ahennie nanwo.—Kenga Daniel 4:17.a
Kenga Daniel 4:20-26, na fa mvoni ne ye nzɛmmisa bɔ olili so ne noa:
(A) Nzu yeɛ Nebukadnezza nwuni ye wɔ ye nnaleɛ nanu ɔ?—Nea ngyekyɛmuɛ 20 ɔne 21.
(B) Nzu yeɛ ne ɔkɔto bakaa ne ɔ? —Nea ngyekyɛmue 23.
(D) Sɛ “mmerɛ nzoo” ne ba ayieleɛ a, nzu yeɛ ne okosi ɔ?—Nea ngyekyɛmuɛ 26.
Kyɛbɔ Nnaleɛ Ne Fa Nyameɛpiri Ahennie Nwo Ɔ
NGƆMHYƐ NE (Daniel 4:20-36)
Tumidie
(A) Bakaa pirikua ne
Bɛpɛle tumidie naso
(B) “Ɛmɔpɛ Bakaa Ne,” na ɛmɔma “mmerɛ nzoo ɔpɛ nu”
Tumidie ne sa siele ye gya nu
(D) “W’ahennie kosa kooli wɔ sanu biekũ”
Ngɔmhyɛ ne lili mmoa wale nu . . .
(E) Né bakaa ne gyi berɛ ma nwa? —Nea ngyekyɛmuɛ 22.
(Ɛ) Atẽe beni aso yeɛ bɛpɛle ye ahennie naso ɔ? —Kenga Daniel 4:29-33.
(F) “Mmerɛ nzoo” ne wale ayieleɛ ne, nzu yeɛ ɔtole Nebukadnezza ɔ? —Kenga Daniel 4:34-36.
YE MMAAMUƐ BƆ OLIMOA
Tumidie
(E) Babilɔn Hene, Nebukadnezza
Bɛpɛle tumidie naso
(Ɛ) Afoɛ 606 K.Y.B. nu sĩ ne, Nebukadnezza adwene sɛkyele na wangora wanni tumi afoɛ nzoo
Tumidie ne sa siele ye gya nu
(F) Nebukadnezza adwene yɛle yé, na osa oolili tumi
Ngɔmhyɛ ne mmaamuɛ bɔ ɔtɔ so nyɔ nu ne . . .
(G) Né bakaa ne gyi berɛ ma nwa? —Kenga 1 Beresosɛm 29:23.
(H) Sɛɛ yeɛ bɛpɛle bɛ tumidie naso ɔ? Yɛyɛ sɛɛ yeɛ yenwu kyɛ, mmerɛ bɔ né Yesu wɔ aseɛ he aso po ne, né benni tumi ɔ? —Kenga Luka 21:24.
(I) Niswa, ɔne mmerɛ beni yeɛ bɛsa bɛfale tumidie ne besieli ye gya nu ɔ?
YE MMAAMUƐ BƆ ƆTƆ SO NYƆ
Tumidie
(G) Israel ahemvo bɔ ne begyi berɛ bɛma Nyameɛpiri tumidie ne
Bɛpɛle tumidie naso
(H) Bɛsɛkyele Yerusalem ne, bɛpɛle Israel Ahemvo ahennie so afoɛ 2,520
Tumidie ne sa siele ye gya nu
(I) Yesu hyɛle yebo lili tumi kyɛ Nyameɛpiri Ahennie naso Hene
Mmerɛ nzoo ne tenden te nnyɛ?
Bible ne bue biemɔ boka yɛ maa yɛte ye bue foforɛ bo. Kyɛ nneasoɛ ne, Nyekyire nwomaa ne kã kyɛ, mmerɛ nzã ɔne bue ne te ngyẽa 1,260. (Nyekyire 12:6, 14) Sɛ ɛfa mmerɛ nzã ɔne bue ne bɔ yenwo nyɔ a, ekonya mmerɛ nzoo, anaa ngyẽa 2,520. Ɔtɔ mmerɛ bie a, Bible ne fa kyẽa kõ gyina berɛ ma afoɛ. (Ezekiel 4:6) Daniel nwomaa nanu ne, mmerɛ nzoo ne koso, sɔ ala yeɛ ne ɔte ɔ—ɔgyĩ berɛ ma afoɛ 2,520.
5. Ewiase ne asesã fi afoɛ 1914
Yesu hãne kyɛbɔ ewiase ne tebea kɔyɛ mmerɛ bɔ wayɛ Ɔhene ne. Kenga Luka 21:9-11, na susu nzɛmmisa he anwo:
Tebea hemɔ nu beni yeɛ anwui, anaa ate yenwo dwirɛ ɔ?
Somafoɛ Paul hãne kyɛbɔ mmenia subaen kɔyɛ, mmerɛ bɔ waha kãa ma sona tumidie awa ye ayieleɛ ne. Kenga 2 Timoteo 3:1-5, na susu nzɛmmisa he anwo:
Subaen hemɔ nu beni yeɛ anwui kyɛ mmenia da ye ali ɛnnɛ ɔ?
6. Odikyɛ yɛmaa tumi bɔ Nyameɛpiri Ahennie ne di ne hyɛ yɛ ngunaen
Kenga Mateo 24:3, 14, na susu nzɛmmisa hemɔ anwo:
Adwuma titire beni yeɛ okyire kyɛ Nyameɛpiri Ahennie ne di tumi kesaalae ɔ?
Ɛkɔyɛ sɛɛ na ahora ayɛ adwuma he bie?
Nyameɛpiri Ahennie di tumi, na ɔngɔhyɛ okoli aseɛ mukoraati so. Kenga Hebrifoɛ 10:24, 25, na susu nzɛmmisa he anwo:
Nzu yeɛ odi kyɛ yenu biala yɛ ɔ “mmerɛ bɔ yanwu kyɛ kyẽa ne pingye ne”?
Sɛ esua nikye bie bɔ ɔkɔhora kɔboka afoforɛ na wale bɛ ngõa a, nzu yeɛ odikyɛ ɔkã wɔ maa ɛyɛ ɔ?
EBIA EBIEMƆ KOBISA KYƐ: “Nzuati yeɛ Yehowa Adanzefoɛ kã afoɛ 1914 nwo dwirɛ sɔ ne?”
Nzu yeɛ ɛkɔhã ɔ?
YEMUABƆLƐ
Bible nu ngɔmhyɛ, mmerɛbulɛ, ɔne ewiase tebea ahoroɛ ne kyire kyɛ Nyameɛpiri Ahennie ne di tumi. Ɔnate kyɛ yedé ɛhe yedi ti, yɛkã yenwo dwirɛ yekyire afoforɛ na yɛkɔ asafo nhyiamu ahoroɛ.
Ndimu
Mmerɛ bɔ mmerɛ nzoo bɔ Daniel nwomaa ne hãne yenwo dwirɛ ne wale ayieleɛ ne, nzu yeɛ osili ɔ?
Nzu yeɛ ɔmaa edédi kyɛ Nyameɛ Ahennie hyɛle yebo lili tumi afoɛ 1914 ɔ?
Nzu yeɛ ɛkɔyɛ kɔfa kohyire kyɛ Ahennie ne di tumi kesaalae ɔ?
NEA ƐHE KOSO
Nea bɔ abakɔsɛm atworɔfoɛ ne afoforɛ kã fa nzakraeɛ bɔ wawa ewiase fi afoɛ 1914 nanwo ɔ.
Kenga kyɛbɔ ngɔmhyɛ bɔ ɔwɔ Mateo 24:14 ne sesãne bĩaa bie asetena ɔ.
“Né Menye Gye Baseball Nwo Tra Nikyee Biala!” (The Watchtower No. 3 2017)
Yɛyɛ sɛɛ yeɛ yenwu kyɛ ngɔmhyɛ bɔ ɔwɔ Daniel yeti 4 ne fa Nyameɛpiri Ahennie nanwo ɔ?
Nzu yeɛ okyire kyɛ “mmerɛ nzoo” bɔ bahã yenwo dwirɛ wɔ Daniel yeti 4 ne wale ayieleɛ wɔ afoɛ 1914 nu ɔ?
a Nea edwirɛti nyɔ bɔ ɔwɔ Nea Ɛhe Koso bue berɛ wɔ adesua he anu ne.