Nhwehwɛmuɛ Ma Abrabɔ Ne Asɛnga Adesua Nwomaa
JANUARY 2-8
NYAMEƐPIRI DWIRƐ NANU ASUADEƐ | 2 AHEMVO 22-23
“Nzuati Yeɛ Odikyɛ Ɛbrɛ Wɔnwo Ase Ɔ”?
w00 9/15 29-30
Yosia Nyane Yehowa Nyunu Adom Ɔnate Y’anwobrɛaseɛ Ti.
Né bɛbɔ besiesie asɔre awuro berɛ ne fa anwokekã yɛ adwuma fi ngyerɛmɔ tutuutu. Ɔda ali kyɛ Yosia lale Yehowa ase paa kyɛ adwumayɛfoɛ ne siesiele nningyein bɔ né ye nanamɔ bɔ né betianu yɛse ne asɛkye ye wɔ Nyameɛpiri awuro berɛ ne ɔ. Mmerɛ bɔ né begu so bɛyɛ adwuma ne, Safan fale amaneɛbɔ bie wale. Né ɔte amaneɛbɔ beni? Né otira nwomaa mmobɔeɛ bie! Ɔhãhyirele ɔhene ne kyɛ Sɔfo Panyi Hilkia anwu “mmraa nwomaa bɔ Yehowa nate Mose so hworɔle ne.” (2 Beresosɛm 34:12-18) Né ɛhe te anigye dwirɛ paa ofikyɛ, né banwu Mmraa nwomaa bɔ aporowaa biala nne yenwo kyɛ Mose bɔbɔ yeɛ ɔhworɔle ne bie.
Né Yosia ayɛ krado kyɛ okotie edwirɛ biala bɔ ɔwɔ nwomaa nanu ne. Mmerɛ bɔ né Safan kenga nwomaa ne, ɔhene ne bɔle mmɔden kyɛ okonwu kyɛbɔ enu ahyɛdeɛ biala fa ɔne mmenia nemɔ nwo ɔ. Bɔ ɔhene ne nye gyele yenwo paa yeɛ ole kyɛ, nwomaa ne hyɛle nahorɛ sõen nwo ngunaen, na osá hãne kyɛ sɛ né bɛfa bɛnwo bewura ngondombo sõen nu a, né bɛkɔhɔ ngoasom nu. Mmerɛ bɔ Yosia nwuni kyɛ nná Nyameɛpiri mmraa nanu dwirɛ mukoraati yeɛ bahora bali so ne, osunzuale y’ataadeɛ nu, na ɔhyɛle Hilkia, Safan, ɔne bɛbɔ baha ne kyɛ: ‘Ɔnate Nwomaa he anu dwirɛ bɔ ɛmɔ anwui nati, ɛmɔhɔ beebisa Yehowa noanu dwirɛ bɛma mene maen ne mukoraati; Yehowa afɛ yɛso yaa paa, ofikyɛ yɛ nanamɔ aandie nwomaa he anu dwirɛ.’—2 Ahemvo 22:11-13; 2 Beresosɛm 34:19-21.
w00 9/15 30 ¶2
Yosia Nyane Yehowa Nyunu Adom Ɔnate Y’anwobrɛaseɛ Ti
Bɛbɔ Yosia somane bɛ ne hɔle diyifoɛ brasua Hulda bɔ né ɔte Yerusalɛm ne berɛ, na bɛfale bɔ ɔhãne nanwo amaneɛ bɛɛbɔle ɔhene ne. Hulda sili edwirɛ bɔ Yehowa ahã naso dua hyirele bɛ kyɛ, ɔhaw bɔ ɔwɔ nwomaa foforɛ bɔ banwui nanu mukoraati kɔwa maen bɔ né bafi Yehowa sĩ naso. Ɔnate kyɛ Yosia brɛle yenwo ase wɔ Yehowa Nyameɛpiri nyunu nati, né ongonwu sɔ haw ne bie. Né bɛkɔfa ye bɛkɔɔboka ye babamɔ so, na né bekosie ye wɔ asomdwee nu.—2 Ahemvo 22:14-20; 2 Beresosɛm 34:22-28.
Bible Nu Dwirɛ Titire
w01 4/15 26 ¶3-4
Ɔkɔhora Kosi Wɔ Yé, Ɔmva Yenwo Ne Kyɛbɔ Bɛtetele Wɔ Ne
Ɔmva yenwo ne ɔhaw bɔ Yosia yiale wɔ ye ngwalaa nu ne, ɔhɔle so yɛle bɔ ɔtengyɛ wɔ Yehowa nye so. Bible ne kã y’ahennie bɔ osili ye yé nanwo dwirɛ kyɛ: “Ahemvo bɔ belili bia kora yeɛ Yosia baali nikyee ne, benu biala nne berɛ bɔ Yehowa dwirɛ bɔ bahworɔ ye wɔ Mose nwomaa nanu ne, ɔfale y’ahõne mukoraati, ye kra mukoraati, ɔne y’anwoserɛ mukoraati lili so kyɛ Yosia ɔ; na ye sĩ ne, ebiala nne berɛ bɔ ɔtole ye ɔ.”—2 Ahemvo 23:19-25.
Bɛbɔ ebia beyiale ɔhaw bɔ enu yɛse wɔ bɛ ngwalaa nu ne, nea kyɛbɔ Yosia nneasoɛ ne hyɛ bɛ ngunaen ɔ! Nzu yeɛ yɛkɔhora yekosũa yekofi ye nneasoɛ nanu ɔ? Nzu yeɛ ɔbokale Yosia maa ɔhɔleso yɛle bɔ ɔtengyɛ ɔ?
JANUARY 9-15
NYAMEƐPIRI DWIRƐ NANU ASUADEƐ | 2 AHEMVO 24-25
“Ma Wɔnye La Berɛ Wɔ Ngyẽa Bɔ Yɛwɔ Nu Nanu”
w01 2/15 12 ¶2
Yehowa Ndɛenbualɛ Kyẽa Ne Apingyé!
Ngɔm bɔ Zefania hyɛle ne, aporowaa biala nne yenwo kyɛ, opusuli Yosia bɔ né ɔte akwalaa ne maa onwuni bɔ yeti yeɛ yenwo hia kyɛ otu ngondombo soẽn bo fi Yuda ɔ. Nakoso agyirɛ bɔ Yosia tuli kyɛ okotu ngondombo soẽn bo ne, wangora wannye nningyein tɛ́ bɔ ne mmenia nemɔ yɛ namukoraati waamvi berɛ, na sɔ ala koso yeɛ wangora wambata amma “mogya bɔ odi bẽ, bɔ ye nana Ɔhene Manase hwie guale wɔ Yerusalɛm ne ɔ.” (2 Ahemvo 24:3, 4; 2 Beresosɛm 34:3) Yeti kyɛbɔ ɔte biala ne, né Yehowa ndɛenbualɛ kyẽa ne kɔwa.
w07 3/15 11 ¶10
Yeremia Nwomaa Nanu Dwirɛ Titire
Né ɔte afoɛ 607 K.Y.B. wɔ Zedekia ahennie afoɛ bɔ ɔtɔ so 11 nanu. Né Babilɔn Hene Nebukadnezza apɛ Yerusalɛm nwo ayia bosome 18. Bosome bɔ ɔtɔ so nnu ne ngyẽa bɔ ɔtɔ so nzoo, kyire kyɛ Babilɔn hene Nebukadnezza ahennie afoɛ bɔ ɔtɔ so 19 ne, sogyafoɛ nemɔ so panyi Nebuzaradan bɔ ɔte Babilɔn hene akoaa ne ‘wale’ Yerusalɛm. (2 Ahemvo 25:8) Ɔkɔhora kɔwa kyɛ, Nebuzaradan gyinane y’asikyeleɛ bɔ né ɔwɔ kuro ne fasue ne sĩ ne, na ɔpenane atẽe bɔ ɔkɔfa so kɔsɛkye kuro ne ɔ. Na ye ɛlɛsa sĩ, bosome ne ngyẽa bɔ ɔtɔ so buru ne, ‘ɔwale’ Yerusalɛm so na ɔɔfale sẽe tole kuro nanu.—Yeremia 52:12, 13.
Bible Nu Dwirɛ Titire
w05 8/1 12 ¶1
Ahemvo Nwomaa Bɔ Ɔtɔ So Nyɔ Nanu Dwirɛ Titire
24:3, 4. Ɔnate mogya bɔ Manase hwie guale nati, Yehowa “yɛle ye adwene kyɛ ɔngɔfa sɔ bɔne ne ngɔhyɛ Yudafoɛ ne. Bɛbɔ bɛnwo llé dwirɛ ne mogya sombo ma Nyameɛpiri. Ɛhe maa yenya anwotɔsoɛ kyɛ, Yehowa kɔsɛkye bɛbɔ behwie mogya bɔ odi bẽ begua ne mukoraati.—Edwein 37:9-11; 145:20.
JANUARY 16-22
NYAMEƐPIRI DWIRƐ NANU ASUADEƐ | 1 BERESOSƐM 1-3
“Bible Ne—Enu Dwirɛ Ne Te Nahorɛ, Ɔtte Ɛhoaa”
w09 9/1 14 ¶1
Adam Ne Eve—Aso Bɛte Mmenia Bɔ Bɛtenane Ase Amba Ɔ?
Kyɛ nneasoɛ ne, susu edwirɛ bɔ ɔwɔ Beresosɛm Nwomaa Bɔ Olimoa yeti 1 kodwu 9, ɔne Luka Nzɛmba yeti 3 bɔ ɔfa Yudafoɛ aworɛndoɔtoasoɛ nwo nanwo nea. Sɔ mmusua nwo tworɔtohɔ bɔ enu la berɛ he kã aworɛndoɔtoasoɛ 48 ɔne 75 nwo dwirɛ pɛpɛɛpɛ. Luka hãne aworɛndoɔtoasoɛ bɔ Yesu Kristo fili nu wale nanwo dwirɛ, yeɛ Beresosɛm Nwomaa ne koso kã nnehyeɛ ne asɔfo bɔ né bɛwɔ Israel maen nanu ne aworɛndoɔtoasoɛ nwo dwirɛ. Tworɔtohɔ nyɔ ne mukoraati kã bɛbɔ mmenia se bɛ tekyɛ, Solomon, David, Gyékɔb, Aizek, Abraham, Nowa, ɔne Adam koso nwo dwirɛ. Dumaa bɔ ɔwɔ tworɔtohɔ nyɔ ne mukoraati nu ne te mmenia bɔ bɛtenane ase ɔ, na Adam dumaa bɔ ɔwɔ nu ne kyire kyɛ befi ye nu yeɛ bɛwale ɔ.
w08 6/1 3 ¶4
Nowa Ne Nzueyilɛ Pirikua Ne—Ɔte Nahorɛ Dwirɛ, Na Ɔtte Ɛhoaa
Aworɛndoɔtoasoɛ nyɔ bɔ Bible ne kã yenwo dwirɛ ne, ɔmaa yenwu kyɛ Nowa te ebie bɔ ɔtenane ase ɔ. (1 Beresosɛm 1:4; Luka 3:36) Ezra ne Luka bɔ bɛhworɔle sɔ aworɛndoɔtoasoɛ hemɔ nwo dwirɛ ne, né bɛte mmenia bɔ bɛto bɛboase bɛyɛ nhwehwɛmuɛ ɔ. Luka hãne aworɛndoɔtoasoɛ bɔ Yesu fi nu nanwo dwirɛ oodwuli Nowa so.
w09 9/1 14-15
Adam Ne Eve—Aso Bɛte Mmenia Bɔ Bɛtenane Ase Amba Ɔ?
Kyɛ nneasoɛ ne, susu Bible ngyerɛkyerɛ bɔ ɔla mmeni pẽe bɔ bɛkɔ asɔre ne ahõne so bɔ yeɛ ole—agyedeɛ nanwo nea. Sɔ ngyerɛkyerɛ ne maa ɔda ali kyɛ, Yesu Kristo fale ye ngõa bɔ ɔte pɛ ne mane kyɛ agyedeɛ falɛle mmenia fili bɔne nu. (Mateo 20:28; Yohane 3:16) Kyɛbɔ yɛse ne, agyedeɛ te nikyee bɔ ɔfata bɔ betua bɛfa besi nikyee bie bɔ wamini anaa wafi ebie sa ne gyanu, anaa bɛfa betua yenwo kerɛ ɔ. Ɛhẽne ati yeɛ Bible ne kã Yesu nwo dwirɛ kyɛ “ɔte agyedeɛ bɔ ɔfata” ne. (1 Timoteo 2:6) Ebia ekobisa kyɛ, nzuati yeɛ ɔfata ɔ? Bible ne maa yenya yenwo mmuaeɛ: “Kyɛbɔ ɔnate Adam ti mmenia mukoraati wu ne, sɔ ala yeɛ Kristo ti mmenia mukoraati konya ngõa ɔ.” (1 Korintofoɛ 15:22) Yesu ngõa bɔ ɔte pɛ bɔ ɔfa bɔle afɔleɛ falɛle mmenia bɔ bɛyɛ sotie ne, ɔne Adam ngõa bɔ né ɔte pɛ bɔ ɔhwerele wɔ Eden ne te kõ. (Romanfoɛ 5:12) Ɔda ali kyɛ, sɛ Adam te ebie bɔ ɔtenane ase amba a, ahãa mvasoɛ biala ngɔwa Kristo agyedeɛ afɔleɛ naso.
Bible Nu Dwirɛ Titire
it-1 911 ¶3-4
Aworɛndoɔtoasoɛ
Mmrasua Dumaa. Sɛ né yenwo kohia kyɛ bɛbobɔ mmrasua dumaa wɔ aworɛndoɔtoasoɛ bie nu wɔ abakɔsɛm nu a, né bɛyɛ ye sɔ. Wɔ Gyenɛsis 11:29, 30 ne, bɛbɔle Sarai (Sara) dumaa, na bɔ yeti yeɛ bɛbɔle ye dumaa yeɛ ole kyɛ, Sara nu yeɛ ne Abraham Bosoniɛ bɔ bahyɛ yenwo bɔ ne kofi kɔwa ɔ, na mmom né ɔtte Abraham aye foforɛ biala. Ɔkɔyɛ kyɛ bɔ yeti yeɛ bɛbɔle Milka dumaa wɔ sɔ tworɔnzɛm kõmaapɛ nanu yeɛ ole kyɛ né y’anomaa yeɛ ole Rebeka bɔ ɔte Aizek aye ne. Ɛhe kyire kyɛ né Rebeka fi Abraham abusua nu, ofikyɛ né Aizek llé yenwo atẽe kyɛ ogya ebie bɔ ofi maen foforɛ nu. (Gye 22:20-23; 24:2-4) Gyenɛsis 25:1 ne maa yenwu kyɛ, nziɛen Abraham gyale brasua foforɛ bɔ né ye dumaa li Ketura. Ɛhe kyire kyɛ mmerɛ bɔ Sara wuli ne, Abraham sa gyale biekũ, ofikyɛ anwoserɛ bɔ né Yehowa nate nzɛngyerɛneɛ so afa ma ye afoɛ 40 bɔ wapɛ nu né té wɔ berɛ, yeti ne ɔkɔhora kosa kɔwo. (Rom 4:19; Gye 24:67; 25) Osa maa yenwu abusũabɔ bɔ né ɔla Israelfoɛ, Midianfoɛ ɔne Arabiafoɛ mmusũa biemɔ afĩa ɔ.
Afei, Tworɔnzɛm ne sa bɔle Lea, Rahel, Gyékɔb somaamɔ, ɔne mmaa mmrienzua bɔ bɛwole bɛ nemɔ dumaa. (Gye 35:21-26) Ɛhe boka yɛ maa yɛte kyɛbɔ nziɛen Yehowa ne sɔ mmaa mmrienzua hemɔ lili nabo. Sɔ ndeaseɛ nati yeɛ bɛbobɔle mmrasua hemɔ dumaa wɔ sɔ aworɛndoɔtoasoɛ nanu ne. Sɛ ɔkɔba kyɛ ɔnate mmrasua biemɔ so maa abusua bie nya agyapadeɛ a, bɛbobɔ sɔ mmrasua nemɔ dumaa. (Nu 26:33) Nahorɛ nu ne, Tamar, Rahab ɔne Rut bɛnwo dwirɛ ne de, né ɔte sorongõ koraa. Bɔ ɔmaa sɔ mmrasua hemɔ nu biala dumaa oofitéle Mezaya bɔ yeɛ ole Yesu Kristo aworɛndoɔtoasoɛ nanu ne, ɔyɛ nwanwa paa. (Gye 38; Ru 1:3-5; 4:13-15; Mat 1:1-5) Nekaa foforɛ bɔ Tworɔnzɛm ne bobɔ mmrasua dumaa boka aworɛndoɔtoasoɛ so yeɛ ole 1 Beresosɛm 2:35, 48, 49; 3:1-3, 5.
JANUARY 23-29
NYAMEƐPIRI DWIRƐ NANU ASUADEƐ | 1 BERESOSƐM 4-6
“Nzu Yeɛ Me Mbaeɛ Kã Fa Menwo Ɔ?”
w10 10/1 23 ¶3-7
“Mbaebɔ Tielɛfoɛ”
Né Yabez te ebie bɔ ɔtaa bɔ mbaeɛ ɔ. Ye mbaeɛ ne ahyɛaseɛ pɛɛ ne, ɔsrɛle Nyameɛpiri nhyiraa. Ɛhẽne sĩ ne, ɔsrɛle nningyein nzã bie fili Yehowa berɛ, na ɛhe maa yenwui kyɛ né ole gyidie paa.
Bɔ olimoa ne, ɔsrɛle Nyameɛpiri kyɛ: “Ɔma onya aseɛ pirikua.” (Nea ngyekyɛmuɛ 10) Né bĩaa bɔ ole animnyam he, ɔtte ebie bɔ yenye boro aseɛ anaa yenye boro obiɛngõ nikye ɔ. Nikyee bɔ né yenwo hia ye paa yeɛ ole mmenia yiedie na mmom né ɔtte aseɛ. Ɔkɔyɛ kyɛ, né ɔsrɛ kyɛ Yehowa ma ye aseɛ pirikua, kyɛbɔ ɔkɔyɛ a Nyameɛpiri asomvoɛ konya nekaa kosõ ye ɔ.
Bɔ ɔtɔ so nyɔ, Yabez srɛle Nyameɛpiri kyɛ ɔma “Yesa” bra ye so. Nyameɛpiri nzɛngyerɛneɛ atẽe so asaa ne, ɔte ye tumi bɔ ɔfa boka ye asomvoɛ ɔ. (1 Beresosɛm 29:12) Bɔ ɔkɔyɛ na Yabez sa ahã bɔ ɔla y’ahõne so ne, ɔfale ye abisadeɛ tole Nyameɛpiri bɔ yesa ɔtte tikaa ne nyunu kyɛ, ɔboka bɛbɔ bele ye nu gyidie ne.—Aizaya 59:1.
Bɔ ɔtɔ so nzã ne, Yabez bɔle mbaeɛ kyɛ: “Nnɛmaa bɔne biala ba me so baha me.” Yabez dwirɛ bɔ ɔhãne kyɛ nnɛmaa bɔne “baha me” ne, ongyire kyɛ né ɔmbena kyɛ oyia ɔhaw, mmom ne, ɔsrɛle kyɛ nnɛmaa ɔhaw bɔ ɔkɔwa ye so ne maa ye wora bɔ sõma, anaa y’abanu bu.
Yabez mbaeɛ ne maa yenwui kyɛ, né nahorɛ sõen nwo hia ye paa, na né ole mbaebɔ Tielɛfoɛ nanu gyidie ne anwotɔsoɛ. Sɛɛ yeɛ Yehowa buale ye mbaeɛ ne ɔ? Bible ne fa Yabez dwirɛ ne ba ayieleɛ kyɛ: “Nyameɛpiri yɛle ye abisadeɛ ne mane ye.”
Bible Nu Dwirɛ Titire
w05 10/1 9 ¶7
Beresosɛm Nwomaa Bɔ Olimoa Nanu Dwirɛ Titire
5:10, 18-22. Mmerɛ bɔ né Ɔhene Saul di bia ne, Israel mmusũa bɔ né bɛwɔ Yɔɔdan afitéleɛ ne hõ lili Hagritfoɛ so ngunim, ɔmva yenwo kyɛ né Hagritfoɛ nemɔ sõne tra bɛ koraa ne. Bɔ ɔmaa bɛlili ngunim yeɛ ole kyɛ, bɛfale bɛnwo bɛtole Yehowa so bɛpenane ye mmokalɛ, ɔmva yenwo kyɛ né bɛnwo yɛ se ne. Ɛmɔma yɛfa yɛnwo yɛto Yehowa so mmerɛ bɔ yɛkõ yetia ɔhaw ahoroɛ bɔ ɔbo y’anwoserɛ so ne.—Ɛfesofoɛ 6:10-17.
JANUARY 30–FEBRUARY 5
NYAMEƐPIRI DWIRƐ NANU ASUADEƐ | 1 BERESOSƐM 7-9
“Yehowa Kɔhora Kɔboka Wɔ Maa Ɛkɔyɛ Dwumadié Bie Bɔ Ɔyɛ Se Ɔ”
w05 10/1 9 ¶8
Beresosɛm Nwomaa Bɔ Olimoa Nanu Dwirɛ Titire
9:26, 27. Adwuma bɔ bɛfa bewurale Levifoɛ bɔ né begyigyi Yehowa awuro anoa ne noa ne, okyire kyɛ né bele benu anwotɔsoɛ. Bɛfale asɔre awuro ne krongronbea berɛ nzafoaa bɛmane bɛ. Bɛlale y’ali kyɛ bedi nahorɛ, ofikyɛ né bebukye anoa ne kyẽabiala. Ɔnate kyɛ Yehowa le yɛnu anwotɔsoɛ ti, wafa wawura yɛsa kyɛ yɛboka mmenia bɔ bɛwɔ y’aseɛsĩĩ nanu ne, ma bɛɛsõ ye. Odikyɛ yɛmaa Yehowa nya yɛnu anwotɔsoɛ tekyɛ Levifoɛ bɔ né begyigyi asɔre awuro ne anoa ne noa ne.
w11 9/15 32 ¶7
Sɛ Eyia Ɔhaw A, Ɛkɔyɛ Sɛɛ Né Asuesũa Finehas?
Né Finehas le asɛyɛdeɛ bɔ enu yɛnõ wɔ tete Israel, nakoso ɔnate kyɛ ne ole akokoduro, ɔne nhunumu, na ɔfale yenwo tole Yehowa so nati, ɔhora gyinane ɔhaw ahoroɛ noa. Mmɔden bɔ Finehas bɔle faneane Nyameɛpiri mmenia so ne, Yehowa nye sɔle. Kɔyɛ afoɛ 1,000 sĩ ne, honhom hãne Ɛzra maa ɔhworɔle kyɛ: “Dáa ne, né Eliaza awá Finehas yeɛ ne ɔla bɛnoa ɔ. Na Yehowa gyinane ye sĩ.” (1 Bere. 9:20) Ɔbra kyɛ, bɛbɔ beli Nyameɛpiri mmenia nyunu ɛnnɛ, ɔne bɛbɔ bedi nahorɛ bɛma ye ne mukoraati kɔyɛ sɔ.
Bible Nu Dwirɛ Titire
w10 12/15 21 ¶6
To Dwein Ma Yehowa!
Yehowa nate y’adiyifoɛ so hyɛle kyɛ, ye asomvoɛ fa dweintolɛ bɛkamvo ye. Dweintolɛfoɛ bɔ né befi asɔfo abusuakue nanu ne, né ɔnzɛkyɛ bɛyɛ adwuma bɔ Levifoɛ bɔ baha nemɔ yɛ ne bie, kyɛbɔ ɔkɔyɛ a, bekonya mmerɛ bekosũa dwein yé na bato ɔ.—1 Bere. 9:33.
FEBRUARY 6-12
NYAMEƐPIRI DWIRƐ NANU ASUADEƐ | 1 BERESOSƐM 10-12
“Hyɛ Ɔpɛ Bɔ Ele Ye Kyɛ, Ɛkɔyɛ Nyameɛpiri Apɛdeɛ Nanu Serɛ”
w12 11/15 6 ¶12-13
“Kyirekyire Me Ma Nyɛ Bɔ Ekuro Ɔ”
Odikyɛ yesuesũa anisɔ bɔ né David le ma nnyinasoɛdwirɛ bɔ ne ɔwɔ Mmraa nanu ne, ɔne ɔpɛ bɔ né ole ye kyɛ okoli so ne. Wɔde susu bɔ osili, mmerɛ bɔ David hãne kyɛ ye komvi awa “abura nu nzue bɔ ɔwɔ Betlɛhɛm kuro nanu” naso nanwo nea. Ɔwɔ nu kyɛ ne Filistifoɛ nemɔ ale kuro nabɔ so de—nakoso David mmrienzua nanu nzã fale bɛ ngõa tole bɛsa nu bɔwurale kuro nanu bɛsale nzue bɛbrɛle ye. Nakoso, “David annõ nzue ne, na mmom ohwie guale aseɛ nwo mane Yehowa.” Nzuati ɔ? David hãne kyɛ: “Nyameɛpiri pa gua kyɛ ngɔnõ nzue he ɔ! Mmrienzua hemɔ ngõa bɔ bɛfa bɛtole asane nu ne mogya yeɛ odikyɛ me nõ anaa? Sɛ me nõ a, mmenia bɔ bɛfale bɛ ngõa bɛtole asane nu ne mogya yeɛ manõ ɔ.”—1 Bere. 11:15-19.
Né David se kyɛ bahworɔ ye wɔ Mmraa nanu kyɛ ɔnzɛkyɛ bedi mogya, na mmom odikyɛ behwie begua aseɛ nwo bɛma Yehowa. Na né ɔte bɔ yeti yeɛ odikyɛ ɔyɛ sɔ nabo. Né David se kyɛ “anwoɔnaen biala ngõa wɔ ye mogya nu.” Nakoso nzue yeɛ bɛɛsale ɔ, na né ɔtte mogya. Yede, nzuati yeɛ David annõ ɔ? Ofikyɛ né ɔse nnyinasoɛdwirɛ bɔ né ɔwɔ sɔ Mmraa nanu ne. David nwuni ye kyɛ, né nzue ne sombo tekyɛ mmrienzua nzã ne mogya. Yeti, ndeaseɛ wɔnu paa kyɛ wannõ nzue ne ɔ. Yeti, kyɛ ahãa ɔkɔnõ ne, ohwie guale aseɛ nwo.—Lev. 17:11; Deut. 12:23, 24.
w18.06 17 ¶5-6
Fa Nyameɛpiri Mmraa Ne Ye Nnyinasoɛdwirɛ Tete Wɔ Tiboa
Sɛ yekonya Nyameɛpiri Mmraa naso mvasoɛ a, ɔnzɛkyɛ yɛkenga ye mbaen, na mmom odikyɛ yesũa ye yé. Odikyɛ yenya ɔdɔ ne obuo yɛma ye Mmraa ne. Nyameɛpiri dwirɛ ne kã kyɛ: “Ɛmɔhyi bɔne na ɛmɔlɔ bɔ ɔte pá ɔ.” (Amos 5:15) Nakoso atẽe beni aso yeɛ yɛfa so yɛyɛ sɔ ɔ? Yeɛ ole kyɛ yekonwu nningyein kyɛbɔ Yehowa nwu ye ne. Sɛ yɛkɔyɛ nneasoɛ a, yɛfa ye kyɛ odwu kɔngɔen a ɛngora da. Yeti, wɔ dɔkta hãhyirele wɔ kyɛ odikyɛ edidi yé, ɛtengyɛ w’aporɛ nu, na ɛyɛ nzakraeɛ ahoroɛ wɔ w’asetena nu. Mmerɛ bɔ ɛyɛle sɔ ne, enwuni kyɛ waboka wɔ paa! Wɔnye kɔgye paa kyɛ wɔ dɔkta ne aboka wɔ maa w’asetena atu mbɔn ɔ.
k Sɔ ala yeɛ yɛ Bɔfoɛ ne ma yɛ mmraa ahoroɛ bɔ ɔkora bɔ yɛnwo waen fi ɔhaw bɔ bɔne fa ba nanwo, na ɔmaa y’asetena tu mbɔn ɔ. Susu mvasoɛ bɔ yenya ye, mmerɛ bɔ yɛfa Bible mmraa bɔ ɔfa ngondombo, nnakannaka, awue, adwammamɔ, basabasayɛlɛ, ɔne ahonhomzɛmlilɛ nwo yɛyɛ adwuma nanwo nea. (Kenga Anyandera 6:16-19; Nye. 21:8) Sɛ yenwu mvasoɛ bɔ yenya ye, mmerɛ bɔ yɛfa Yehowa mmraa yedi dwumaa ne a, ɔmaa ɔdɔ ne anisɔ bɔ yɛle yɛma Yehowa, ɔne ye mmraa ne yɛ piri.
Bible Nu Dwirɛ Titire
it-1 1058 ¶5-6
Ahõne
“Fa W’ahõne Mukoraati Sõ Yehowa.” Sɛ y’ahõne kɔhora kɔyɛ adwuma yé a, odikyɛ odi mũ, nakoso yɛ nzɛngyerɛneɛ atẽe so ahõne nanu kɔhora kɔhyɛ nyɔ. David bɔle mbaeɛ kyɛ: “Ma mva mahõne mukoraati nzuro wɔ dumaa,” ɛhe kyire kyɛ sɛ ebie nye gye nikyeebie nwo sõma, anaakyɛ osuro ye a, ɔkora maa yahõne nu kyɛ. (Ed 86:11) Ɔba sɔ a, sɔ sona ne ngɔfa “y’ahõne mukoraati” ngɔsõ Yehowa—na mmom ɔkɔsõ ye kyɛbɔ okuro biala. (Ed 119:113; Nye 3:16) Yeti ebie “ahõne nu kɔhora kɔhyɛ nyɔ” (kyire kyɛ ebie ahõne kɔhora kɔyɛ ndaa), ɛhe maa sɔ sona ne kora sõ meneɛmɔ nyɔ, na ɔkora yɛ anoanu, anaakyɛ ɔfa yenoa fa mmenia nwo. (1Be 12:33; Ed 12:2, ybd) Yesu dwudwo tiale sɔ subaen ne, ɔhãne kyɛ ɔte nyaatwom.—Mat 15:7, 8.
Ebie bɔ ɔpena kyɛ ye sõen sɔ Nyameɛpiri nye ne, ɔnzɛkyɛ y’ahõne nu kyɛ nyɔ, anaa ɔyɛ ndaa, na mmom odikyɛ ɔfa y’ahõne mukoraati sõ ye. (1Be 28:9) Ɛhe dé mmɔdenmɔ paa, ofikyɛ ahõne te ahometrɛ na ɔte nnakannaka. (Yer 17:9, 10; Gye 8:21) Bɔ ɔkɔyɛ na yanya ahõne bɔ odimũ ne: odikyɛ yefi y’ahõne nu yɛbɔ mbaeɛ (Ed 119:145; Kw 3:41), yesũa Nyameɛpiri dwirɛ ne daa (Ɛzr 7:10; An 15:28), yɛyere yɛnwo yɛyɛ asɛnga adwuma ne (fa toto Yer 20:9), ná yɛfá mmenia bɔ befi bahõne mukoraati nu bɛsõ Yehowa ne nnamvoa—Fa toto 2Ah 10:15, 16.
FEBRUARY 13-19
NYAMEƐPIRI DWIRƐ NANU ASUADEƐ | 1 BERESOSƐM 13-16
“Sɛ Ɛfa Akwangyerɛ Yɛ Adwuma A, Okosi Wɔ Yé”
w03 5/1 10-11
Aso Ɛyɛ A Ebisa Kyɛ, “Yehowa Wɔ Niswa?”
Mmerɛ bɔ bɛfale apam alaka ne sa wale Israel, na bɛfa beesiele Kiriat-yearim afoɛ pẽe sĩ ne, né Ɔhene David pena kyɛ osa fa ba Yerusalɛm. Ɔne mbanyi nemɔ susuli yenwo kyɛ, ‘sɛ bɛkuro na Yehowa pene so a,’ yede ɔkɔfa apam Alaka ne kɔhɔ Yerusalɛm. Nakoso wammisa Yehowa adwene wɔ edwirɛ nanwo. Sɛ ɔyɛle sɔ a, ahãa ɔngɔfa apam Alaka ne ngɔsie teaseɛnam so llé. Ahãa Kohat bosofoɛ bɔ bɛte Levifoɛ ne yeɛ bɛkɔsoa alaka ne wɔ bɛbati so, kyɛbɔ né Nyameɛpiri ama bɛ akwangyerɛ bɔ enu la berɛ ne. Ɔwɔ nu, né David taa bisa Yehowa adwene wɔ nningyein ahoroɛ nwo, nakoso sɔ mmerɛ he de, wannyɛ sɔ wɔ atẽe pá so. Bɔ ofili nu wale ne te aworabolɛ paa. Nzieɛn David hãne kyɛ: “Yehowa yɛ Nyameɛpiri fɛle yɛso yaa ofikyɛ yanni y’akwangyerɛ naso.”—1 Beresosɛm 13:1-3; 15:11-13; Numeri 4:4-6, 15; 7:1-9.
w03 5/1 11 ¶13
Aso Ɛyɛ A Ebisa Kyɛ, “Yehowa Wɔ Niswa?”
Ayieleɛ koraa ne, mmerɛ bɔ Levifoɛ ne fale alaka ne fili Obed-edom awuro fa hɔle Yerusalɛm ne, bɛtole dwein bɔ ne David ahyehyɛ ne. Né edwirɛ bɔ ɔkã ahõne he wonu: “Ɛmɔpena Yehowa ne ye anwoserɛ, ɛmɔpena ye sĩ atẽe kyẽa biala. Ɛmɔ kae anwanwadeɛ ahoroɛ bɔ wayɛ ne, ye nzɛngyerɛneɛ ne ye ndɛen bɔ wabua ne.”—1 Beresosɛm 16:11, 12.
Bible Nu Dwirɛ Titire
w14 1/15 10 ¶14
Sõ Yehowa, Ɔhene Bɔ Ɔwɔ Berɛ Daa Ne
David fale apam alaka bɔ né ɔte krongron ne wale Yerusalɛm. Wɔ sɔ mmerɛ bɔ ɔyɛ anigye he anu ne, Levifoɛ ne tole dwein bie bɔ enu dwirɛ kã ahõne, na bayɛ yenwo tworɔtohɔ wɔ 1 Beresosɛm 16:31: “Ɛmɔhã ye wɔ maenmaen nanu kyɛ: ‘Yehowa aayɛ Ɔhene!’” Ebia ebie kobisa kyɛ, ‘Ná Yehowa te Ɔhene bɔ ɔwɔ berɛ daa, yede, nzuati yeɛ Bible ne kã kyɛ ɔɔyɛle Ɔhene sɔ mmerɛ ne ɔ?’ Sɛ Yehowa fa ye tumi di dwumaa anaakyɛ ɔmaa ebie si ye gyanu maa odi tebea bie nwo dwumaa wɔ mmerɛ pɔtẽe bie nu a, yɛkɔhora kɔhã kyɛ waayɛ Ɔhene wɔ sɔ mmerɛ nanu. Sɔ atẽe he bɔ Yehowa fa so di hene ne, yenwo hia paa. Kora bɔ David baawu ne, Yehowa hyɛle ye bɔ kyɛ y’ahennie kɔtena berɛ daa: “Ngɔma wɔ bosoniɛ bie so, bɔ ɔte wɔ kunu ba ɔ, na ngɔmaa y’ahennie bo kotimũ afebɔɔ.” (2 Sam. 7:12, 13) Ayieleɛ koraa ne, wɔ afoɛ 1,000 sĩ ne, sɔ “David bosoniɛ” ne yele ye ti.
FEBRUARY 20-26
NYAMEƐPIRI DWIRƐ NANU ASUADEƐ | 1 BERESOSƐM 17-19
“Sɛ Bedi Wɔ Hwãmɔ Po A, Kɔso Má Wɔnye Gye”
w06 7/15 19 ¶1
Fa W’adwene Sie Nningyein Pá Bɔ Ɔwɔ Yehowa Ahyehyɛdeɛ Nanu Naso
DAVID bɔ ɔtenane ase tete ne, ɔte mmenia bɔ Hebri Tworɔnzɛm ne kã bɛnwo dwirɛ paa nanu kõ. Sɔ boaeneafoɛ, dweintolɛniɛ, diyifoɛ, ɔne ɔhene he fale yenwo tole Yehowa Nyameɛpiri so paa. Ɔnate abusũabɔ pá bɔ né ɔla David ne Yehowa afĩa nati, onyane ɔpɛ kyɛ okosi sua kɔma Nyameɛpiri. Né sɔ sua ne, anaa asɔre awuro ne kɔɔyɛ nekaa bɔ Israelfoɛ mukoraati kɔsõ Yehowa wɔ nahorɛ nu ɔ. Né David se kyɛ nhyehyɛeɛ bɔ ɔkɔyɛ kɔfa kosi asɔre awuro ne kɔmaa Yehowa mmenia konya anigye ne nhyiraa. Yeti David tole dwein kyɛ: “Anigye yeɛ ole sona bɔ ɛtwẽ ye bata wɔnwo, na ɛmaa ɔtena w’awuro abrannaa so ɔ. W’awuro bɔ yeɛ ole w’asɔresua krongron ne, enu nningyein pá ne, ɔmaa yɛnwo tɔ yɛ.”—Edwein 65:4.
w21.08 22-23 ¶11
Ma Wɔnye Gye Yenwo Atẽe Ahoroɛ Bɔ Ele Ye Nanwo
Sɛ yɛyere yɛnwo yɛyɛ adwuma biala bɔ bafa bawura yɛsa wɔ Yehowa sõen nu ne a, yɛnye kɔgye paa. Yere wɔnwo yɛ asɛnga adwuma ne, afei koso adwuma biala bɔ yɛyɛe wɔ asafo nanu ne, “fa wɔnwo wura” nu bie. (Aso. 18:5; Heb. 10:24, 25) Dimoa sũa nningyein bɔ yekosusu yenwo wɔ asafo nhyiamu bo ne, na ahora ama mmuaeɛ bɔ ɔhyɛ ngunaen. Sɛ bɛma wɔ dwumadié bie wɔ asafo nhyiamu bɔ yɛyɛe dapɛen afĩa nanu a, dé mmerɛ siesie wɔnwo yé. Sɛ bɛkã kyɛ ɛboka ma bɛyɛ adwuma bie wɔ asafo nanu a, ɛyɛ a dwu berɛ ndɛ, na nnédi bɛ hwãmɔ. Nnébu adwuma biala bɔ bɛkɔfa bekowura wɔ sa ne kyɛ ɔmvata wɔ, anaakyɛ yenwo nhia. Bɔ mmɔden kyɛ ekotu mbɔn wɔ yenwo atẽe biala bɔ ekonya ye nanu. (Any. 22:29) Sɛ ɛyere wɔnwo yɛ adwuma biala bɔ owura wɔsa ne yé a, ekonya ngɔsoɛ ndɛ, na wɔnye kɔgye paa. (Gal. 6:4) Afei koso, sɛ ɔkɔba kyɛ afoforɛ sa kã asɛyɛdeɛ bie bɔ ahãa wɔnye gye nwo kyɛ wɔ sa kɔhã ye a, ɔngɔyɛ se ngɔma wɔ kyɛ ɛne bemukoraati kɔbɔ nu koli ahurusie ɔ.—Rom. 12:15; Gal. 5:26.
Bible Nu Dwirɛ Titire
w20.02 12, alaka
Yɛdɔ Yɛ Baba Yehowa Paa
Aso Yehowa Se Me?
Aso abisa wɔnwo le kyɛ, ‘Mmenia apepesrala bɔ bɛwɔ ewiase he anu ne, ɔkɔyɛ sɛɛ koraa ne Yehowa anwu me?’ Sɛ sɔ a, yede nna wɔ ngome yeɛ anya sɔ adwene ne ɔ. Ɔhene David hworɔle kyɛ: “O Yehowa, sona yeɛ ole nwa bɔ wɔnye kũ yenwo ɔ, na dasaniɛ yeɛ ole nwa bɔ ɛdwene yenwo ɔ?” (Edw. 144:3) Né David le anwotɔsoɛ kyɛ Yehowa se ye paa. (1 Be. 17:16-18) Ɔnate ye Dwirɛ Bible ne, ɔne y’ahyehyɛdeɛ naso ma wɔ awerɛhyɛmuɛ kyɛ, onwu ɔdɔ bɔ ele ma ye ne. Nea edwirɛ ahoroɛ bie bɔ ɔwɔ Nyameɛpiri dwirɛ nanu, bɔ ɔkɔhora kɔboka wɔ maa ekole koli kyɛ sɔ dwirɛ he te nahorɛ ɔ:
• Kora bɔ bɛwo wɔ po ne, né Yehowa se wɔ.—Edw. 139:16.
• Yehowa se bɔ ɔwɔ w’ahõne nu, ɔne bɔ ɛdwene yenwo ɔ.—1 Bere. 28:9.
• Mbaeɛ biala bɔ ɛbɔ ne, Yehowa bɔbɔ yeɛ otie ɔ.—Edw. 65:2.
• Nikyee bɔ ɛyɛ biala kã Yehowa.—Any. 27:11.
• Yehowa bɔbɔ yeɛ wahwẽ wɔ wapingyé yenwo ɔ.—Yoh. 6:44.
• Sɛ ewu po a, ɔnate kyɛ Yehowa se wɔ paa nati, ɔkɔhora kotingyé wɔ. Ɔkɔmaa wɔ nnipadua ne w’adwene kɔyɛ foforɛ, na nningyein bɔ ne ɛse kora yeɛ ewu, ɔne kyɛbɔ né esi te ne, ɔngɔsesã.—Yoh. 11:21-26, 39-44; Aso. 24:15.
FEBRUARY 27–MARCH 5
NYAMEƐPIRI DWIRƐ NANU ASUADEƐ | 1 BERESOSƐM 20-22
“Boka Mmabunu Má Benya Ngɔsoɛ.”
w17.01 29 ¶8
“Bɔ Ɛte Fili Me Berɛ Ne, Fa Wura Mmenia Bɔ Bedi Nahorɛ Ne Sa”
Kenga 1 Beresosɛm 22:5. Ebia David nyane adwene kyɛ Solomon ngɔhora ngɔnea adwuma bɔ yenwo hia he aso. Ofikyɛ né asɔresua ne kɔyɛ “pirikua paa,” na né Solomon koso te “akwalaa bɔ ollé sũanwu” biala ɔ. Nakoso, né David se kyɛ Yehowa kɔboka Solomon maa ɔkɔhora kɔyɛ adwuma bɔ wafa wawura ye sa ne. Yeti, David fale y’adwene siele bɔ ɔkɔhora kɔyɛ kɔfa kɔboka adwuma naso, na ɔboɔboale sua nanwo nningyein pẽe noa guale berɛ.
w17.01 29 ¶7
“Bɔ Ɛte Fili Me Berɛ Ne, Fa Wura Mmenia Bɔ Bedi Nahorɛ Ne Sa”
Ɔwɔ nu kyɛ né David se kyɛ, nná ye dumaa yeɛ ɔkɔla asɔre awuro naso de, nakoso ɔyɛle bɔ ɔkɔhora biala fa bokale. Na nahorɛ nu ne, sɔ ala yeɛ ɔwale ɔ, Solomon dumaa yeɛ ɔɔlale asɔre awuro naso ɔ, na ɔtte David. Ebia David abanu buli kyɛ wannya yenwo atẽe waanyɛ adwuma bɔ né ɔla y’ahõne so ne de, nakoso ɔfale y’anwoserɛ mukoraati bokale. Ofili ye pɛnu boɔboale adwumayɛfoɛ noa, na ɔpenane buralɛ, kɔɔbere, ɛdwetɛ, esikaa kɔkorɛ, ɔne sida mmakaa pẽe guale berɛ. Osa hyɛle Solomon ngunaen kyɛ: “Yeti mma, Yehowa gyina wɔ sĩ, na ɔnate so maa ahora asi Yehowa wɔ Nyameɛpiri sua ne, kyɛbɔ wahã wafa wɔnwo nala.”—1 Bere. 22:11, 14-16.
w18.03 11-12 ¶14-15
Awofoɛ, Aso Ɛmɔ Boka Ɛmɔ Mmaamɔ Maa Benya Ngɔsoɛ Bɛbɔ Asu Anaa?
Kyɛ honhom nu mmoaenealɛfoɛ ne, asafo nu mbanyi kɔhora kɔboka awofoɛ nate honhom nu botaeɛ ahoroɛ bɔ bɛkɔhã yenwo dwirɛ pá bekohyire bɛ naso. Aliemaa brasua bie bɔ wafa afoɛ kɔbo 70 wasõ kyɛ atẽepakyelɛfoɛ hãne kyɛ, ngɔmmɔ bɔ ɔne Aliemaa Charles T. Russell bɔle mmerɛ bɔ né wali afoɛ nzia ne nyane ye so ngɛndɛensoɛ pá paa. Ɔtoale so kyɛ, “Ɔfale minit 15 ne me susuli honhom nu botaeɛ ahoroɛ bɔ mafa masie menye so nanwo.” Nahorɛ nu, sɛ yɛkã edwirɛ bɔ ɔhyɛ ngunaen yekyire ebie a, ɔkora nya yeso ngɛndɛensoɛ afebɔɔ. (Any. 25:11) Asafo nu mbanyi kɔhora kɔmaa awofoɛ ne bɛ mmaamɔ kɔyɛ nnyumaa ahoroɛ bɔ bɛyɛ ye wɔ Ahennie Asa so ne bie. Mbanyi nemɔ kɔnea afoɛ bɔ ngwalaa nali, ɔne bɔ bɛkɔkora bɛkɔyɛ naso bɛkɔma b’adwuma.
Asafo nanufoɛ koso kɔhora kɔhyɛ ngwalaa nemɔ ngunaen nate bɛnwo anigye bɔ bekohyire naso. Bɔ ɔboka ɛhe aso yeɛ ole kyɛ bɛkɔfa bɛnye bɛkɔto ase bɛkɔnea ngɔsoɛ bɔ ngwalaa nemɔ benya ɔ. Aso ɛse akwalaa bie bɔ ofi y’ahõne nu ma mmuaeɛ kama, anaakyɛ ɔyɛle dwumadié wɔ dapɛen afĩa nhyiamu nabo anaa? Anaa ɛse benu bie bɔ wahora wagyina nzɔhwɛ bie bɔ oyiale ne noa, anaakyɛ ɔkora fa yenwo atẽe biala bɔ okonya ye ne di adanzeɛ wɔ sukuu nu anaa? Sɛ enwu nikyee bie bɔ ɔte sɔ a, fi w’ahõne nu kãmvo bɛ ndɛ. Ɛkɔhora kɔfa kɔyɛ wɔ botaeɛ kyɛ—kora bɔ bɛkɔhyɛ asafo nhyiamu bo, ɔne mmerɛ bɔ bapɔnõ ne—ɛne ngwalaa nemɔ kɔbɔ ngɔmmɔ na ahyire bɛnwo anigye. Sɛ yɛkora yɛyɛ ɛhemɔ mukoraati a, ɔkɔmaa ngwalaa nemɔ kɔte ngã kyɛ bɛkoso bɛla “asafo pirikua” bie nu.—Edw. 35:18.
Bible Nu Dwirɛ Titire
w05 10/1 11 ¶6
Beresosɛm Nwomaa Bɔ Olimoa Nanu Dwirɛ Titire
21:13-15. Ɔnate kyɛ ɔhaw bɔ né Nyameɛpiri mmenia yia nanwo dwirɛ ha ye nati, Yehowa hyɛle abɔfo ne kyɛ, ɔpɛ ye mmenia bɔ né okũkũ bɛ naso. Ɛhe maa yenwui kyɛ, Yehowa “anwumvoinwunɛ te piri paa.”