Nhwehwɛmuɛ Ma Abrabɔ Ne Asɛnga Adesua Nwomaa
MAY 1-7
NYAMEƐ DWIRƐ NANU ASUADEƐ | 2 ABERƐSO DWIRƐ 17-19
“Suesũa Kyɛbɔ Yehowa Nea Subaen Pá Bɔ Ɔwɔ Afoforɛ Nwo Ne”
w17.03 24 ¶7
Fa Yehowa Afutue Yɛ Adwuma Daa.
Né Yehosafate le subaen pá. Ɔfale yenwo tole Yehowa so, yeti ɔyɛle nningyein pá. Nakoso, nziɛen osili gyinaeɛ bie bɔ né ɔttemayé koraa. Ɔne Ɔhene Ahabo bɔ né ye tianu yɛse ne yɛle agyaa apam, kyire kyɛ ɔmaa ɔwa gyale ɔwa. Ɔfale yenwo bɔle Ahabo maa bɛne Siriafoɛ bɛɛhõne. Ɔwonu kyɛ né diyifoɛ Mikaya abɔ ye kɔkɔ de, nakoso wanndie. Wɔ kõɛ nanu ne, ɔhale sɔaa ahãa behũni ye, yeti osá hɔle Yerusalɛm. (2 Abe. 18:1-32) Odwuli berɛ ne, diyifoɛ Yehu bisale ye kyɛ: “Aso odikyɛ ɛboka amumuyɛniɛ, na bɛbɔ bekyi AWURADE ne, yeɛ odikyɛ ɛne bɛ tu agyina anaa?”—Kenga 2 Aberɛso Dwirɛ 19:1-3.
w15 8/15 11-12 ¶8-9
Dwenedwene Ɔdɔ Bɔ Yehowa Le Ma Ye Mmenia Nanwo
Yehowa pena kyɛ yɛte yebo kyɛ ɔdɔ yɛ, na ɔmva ye adwene nzie mvomsoɛ bɔ ɔwɔ yɛnwo naso. Na mmom ɔfa ye adwene sie nningyein pá bɔ ɔwɔ yɛnwo naso. (2 Abe. 16:9) Kyɛbɔ ɔne Yuda hene Yehosafate lili ne maa yenwui sɔ. Mmerɛ bie, Yehosafate fale yenwo bɔle Ɔhene Ahabo, na bɛyɛle kyɛ bɛne Siriafoɛ nemɔ kwaahõ kyɛbɔ ɔkɔyɛ a, bekole aseɛ bɔ ɔwɔ Ramote-gileade ne kofi bɛ sa nu ɔ. Gyinaeɛ bɔ osili ne, né nworɛ biala nne nu. Ngondombo adiyifoɛ 400 biemɔ hyɛle Ahabo bɔ kyɛ, sɛ ɔkɔ kõɛ ne a okoli ngunim. Nakoso Yehowa diyifoɛ Mikaya hãhyirele ye kyɛ okoli nguguo. Behũni Ahabo, na Yehosafate koso, ɔhale kãa bie ahãa behũni ye. Mmerɛ bɔ ɔwale Yerusalɛm ne, bɛhãne ye nyunu kyɛ ɔfale yenwo ɔɔbɔle Ahabo ɔ. Nakoso, Hanani awa Yehu hãhyirele ye kyɛ: “banwu pá kãa wɔ wɔ́ nu.”—2 Abe. 18:4, 5, 18-22, 33, 34; 19:1-3.
Mmerɛ bɔ Yehosafate ɔɔyɛle ɔhene ne, ɔhyɛle ye mbanyi, Lewifoɛ, ɔne asɔfo nemɔ kyɛ, bɛhɔ Yuda maen nanu mukoraati, na bɛfa Yehowa mmraa ne behyirehyire mmenia nemɔ. Bɔ ɔyɛle nati, Yehowa nwo suroen tɔle maen ahoroɛ bɔ né bapɛ Yuda maen nanwo bayia naso. (2 Abe. 17:3-10) Ɔwonu kyɛ nziɛen Yehosafate lili ngwaseasɛm de, nakoso Yehowa fale ye adwene siele nningyein pá bɔ ɔyɛle naso. Yehosafate dwirɛ ne maa yenwui kyɛ, ɔmva yenwo kyɛ bɔne wɔ yɛnwo ne, sɛ yefi y’ahõne mukoraati nu yɛsõ Yehowa a, ye wora ngofi nningyein pá bɔ yayɛ ne llé.
Bible Nu Dwirɛ Titire
w17.03 20 ¶10-11
Fi W’ahõne Mukoraati Nu Sõ Yehowa.
Yehosafate “yɛle bɔ ye baba Asa yɛle ne bie.” (2 Abe. 20:31, 32) Nzu yeɛ ɔyɛle ɔ? Ɔhyɛle mmenia nemɔ ngunaen kyɛ bɛsõ Yehowa kyɛbɔ ye baba Asa yɛle ne. Ɔyɛle nhyehyɛeɛ maa bɛfale Yehowa “mmraa nwomaa” ne behyirehyirele mmenia bɔ né bɛ wɔ maen nanu mukoraati. (2 Abe. 17:7-10) Ɔhɔle sorɔdɔ ahennie nanu mukoraati fi Beɛ-Hyeba kodwu Efraim mmokaa naso, na ɔhwẽne mmenia nemɔ “adwene siele Yehowa so.” (2 Abe. 19:4) Ɔhene Yehosafate “yele ye kunu sõne AWURADE.”—2 Abe. 22:9.
Yɛkoso, ngyerɛkyerɛ adwuma bɔ Yehowa mmenia yɛ wɔ ewiase mukoraati ne, yɛkɔhora yɛkɔyɛ bie. Aso, ɛbɔ mmɔden kyɛ ɛkɔyɛ asɛnga adwuma ne bosome biala, kyɛbɔ ɔkɔyɛ a ɛkɔboka mmenia maa bɛkɔsõ Yehowa anaa? Sɛ ɛyere wɔnwo yɛ sɔ a, Nyameɛ kɔboka wɔ maa ekonya ebie ne ye kosũa Bible ne. Ɛyɛ a, ɛbɔ ɛhe anwo mbaeɛ anaa? Mmerɛ bɔ ɛfa dé wɔ nwomeɛ ne, aso ɛkɔhora kɔfa sɔ mmerɛ ne bie ne mmenia kosũa Bible ne anaa? Kyɛbɔ Yehosafate hɔle Efraim nguro nemɔ anu, na ɔbokale mmenia nemɔ maa besá bɛsõne Yehowa ne. Yɛkoso odikyɛ yɛboka bɛbɔ bayakyi asafo nhyiamu ne asɛnga hɔlɛ ne. Afei koso, bɛbɔ batu bɛ bafi asafo nanu ne, asafo nu mbanyi ne kɔ bɛ berɛ na baanea kyɛ, aso bɛyɛ nzakrayɛɛ a, ná bɛhyɛ bɛ ngunaen.
MAY 8-14
NYAMEƐ DWIRƐ NANU ASUADEƐ | 2 ABERƐSO DWIRƐ 20-21
“Nya Gyidie Wɔ Yehowa Wɔ Nyameɛ Nu”
w14 12/15 23 ¶8
Sɛ Yɛyɛ Kõ A, Yɛkɔhora Yekogyina Ɔhaw Bɔ Yekoyia Ye Kyẽabie Ne Noa
Mmerɛ bɔ né Yehosafate di hene ne, sogyafoɛ lɔen bie wale Nyameɛ mmenia so. (2 Abe. 20:1, 2) Nakoso mmenia nemɔ yɛle nikyee paa. Bɛfale bɛnwo bɛtole Yehowa so. (Kenga 2 Aberɛso Dwirɛ 20:3, 4.) Benu biala ammɔ mmɔden kyɛ ye ngome okoli ɔhaw nanwo dwumaa, na mmom bɛyɛle kõ. Bible ne kã kyɛ: “Yuda amukoraa begyinane AWURADE nyunu; bɛ ne bɛ ngwalaa, bɛ yemɔ, ɔne bɛ mmaamɔ.” (2 Abe. 20:13) Mbanyi ne ngwalaa nemɔ mukoraati hãne bɛnwo bɛbɔle nu. Na ɔnate kyɛ bɛfale Yehowa akwangyerɛ bɛyɛle adwuma nati, ɔbokale bɛ maa belili bɛ pɔfoɛ nemɔ so ngunim. (2 Abe. 20:20-27) Ɛmɔma yɛbɔ mmɔden yesuesũa bɔ bɛyɛle ne.
w21.11 16 ¶7
Yehowa nate Lewiniɛ bie bɔ bɛfrɛ ye Yahasiɛl so dwudwo hyirɛle Yehosafate. Ɔhãne kyɛ: “Ɛmɔte begyina, ɛmɔyɛ konn, ná ɛmɔnea ngunim bɔ AWURADE koli kɔma ɛmɔ ɔ.” (2 Abe. 20:13-17) Sɛ ɛne ebie kwaahõ, na ekogyina berɛ konn a, ɛkɔyɛ sɛɛ na ahora ali ngunim? Nakoso sɔ akwangyerɛ ne, nná sona biala yeɛ ɔfa mane bɛ ɔ, na mmom Yehowa bɔbɔ. Yehosafate nyane Yehowa nu gyidie, na ɔyɛle bɔ ɔhãhyirele ye ne pɛpɛɛpɛ. Mmerɛ bɔ bɛkwaayia bɛ pɔfoɛ nemɔ ne, kyɛ ahãa Yehosafate kɔfa y’asogyafoɛ bɔ né bɛse kõɛ ne koli anyunu ne, wannyɛ sɔ. Na mmom bɛbɔ né bɛto dwein bɔ né bettira akõdeɛ biala ne, yeɛ ɔmaa belili anyunu ɔ. Yehowa amma Yehosafate sa anzi ase, ɔbokale ye maa olili ye pɔfoɛ nemɔ so ngunim.—2 Abe. 20:18-23.
Bible Nu Dwirɛ Titire
it-1 1271 ¶1-2
Yehoram
Yehoram mane ɔye Atalia subaen tɛ́ɛ ne nyane yeso ngɛndɛnsoɛ. Yeti wanni Yehowa nahorɛ tekyɛ ye baba Yehosafate. (2Ah 8:18) Né Yehoram te wudiniɛ. Ohũhũni oliemamɔ mmrienzua nzia, ɔne Yisrael mbanyi nemɔ bie. Afei koso, ɔmaa Yehowa mmenia sõne bosõen. (2Abe 21:1-6, 11-14) Bɔ ɔyɛle nati, oyiale ɔhaw pẽe wɔ y’ahennie nanu. Edomfoɛ ne Libinafoɛ tele atua tiale Yuda. (2Ah 8:20-22) Elia hworɔle krataa fa bɔle Yehoram kɔkɔ kyɛ: “Tie! AWURADE kɔmaa ɔhaw kadinga kɔwa wɔ maen, wɔ mmamɔ, ɛyemɔ, ɔne w’agyapadeɛ amukoraa so. Na wɔ bɔbɔ deinn koso, anwonyerɛ kandinga kɔtɔ wɔ so, kodwu kyɛ anwonyerɛ ne kɔma wɔ nyáa kɔhɔ so koturu daa biala ɔ.”—2Abe 21:12-15.
Sɔ pɛpɛɛpɛ yeɛ osili ɔ. Yehowa mane yenwo atẽe maa Arabofoɛ ne Filistifoɛ lili Yehoram so ngunim, na bɛfale ɔyemɔ, ne ye mma mmrienzua bɛhɔle ngoasom nu. Ɔnate ahennie apam bɔ né Yehowa ne Dawide ayɛ nati, ɔmaa bɛbɔle Yehoram awa Yehoahase bɔ besá bɛfrɛe Ahasia nanwo waen. ‘Yehowa maa anwonyerɛ bɔ ollé ayire bɔle Yehoram.’ Na afoɛ nyɔ sĩ ne, ‘ye nyáa turu guale so,’ na nziɛen owuli, kyɛbɔ ɔhãne ne pɛpɛɛpɛ. Yeti Yehoram bɔ né yetianu yɛ se ne wuli, “na ye wue ne, wannyɛ ebiala yea.” Besiele ye wɔ Dawide kuro, “nakoso banzie ye wɔ ahemvo asieleɛ so.” Yeti ɔwa Ahasia oolili ye bia.—2Abe 21:7, 16-20; 22:1; 1Abe 3:10, 11.
MAY 15-21
NYAMEƐ DWIRƐ NANU ASUADEƐ | 2 ABERƐSO DWIRƐ 22-24
“Yehowa Ma Bɛbɔ Bɛda Akokoduro Ali Ne Akatuaa Pá”
w09 4/1 24 ¶1-2
Yerusalɛm yeɛ né Yehowa asɔre awuro ne gyi ɔ. Nakoso nningyein bɔ né ɔkɔso wɔ berɛ ne, né ɔttemayé koraa. Ofikyɛ, né bahũ Ɔhene Ahasia. Ahasia maame Atalia koso, ɔyɛle nikyee bie bɔ sɛ ɛte yenwo dwirɛ a, wɔ kunu kɔte wɔ. Ɔmaa behũhũni Ahasia mmaamɔ, bɔ né bɛte ye bɔbɔ ye nnõmaamɔ ne. Nzu yeɛ ɔmaa ɔyɛle sɔ ɔ?— Né ɔpena kyɛ ye ngome odi Yuda maen namukoraati so, ɛhẽne ati yeɛ ɔmaa behũhũni bɛ ne.
Nakoso, y’annõmaa kõ bɔ ne bɛfrɛe Yohoase ne de, wannya ye wanngu ye. Ɛse bɔ yeti ɔ? Ye sewaa bie bɔ bɛfrɛe Yehosabeate fale Yohoase ɔɔfeale Yehowa asɔre awuro berɛ. Bɔ ɔmaa Yehosabeate hora yɛle sɔ yeɛ ole kyɛ, né ohũ yeɛ ole Sɔfo Panyi Yehoada. Yeti, bɛhora bɛbɔle Yohoase nwo waen.
w09 4/1 24 ¶3-5
Bɛfale Yohoase bɛfeale asɔre awuro berɛ afoɛ nzia. Na bɛfale Yehowa mmraa ne behyirehyirele ye. Mmerɛ bɔ Yohoase lili afoɛ nzoo ne, Yehoada yɛle bɔ ɔkɔhora biala maa Yohoase ɔɔyɛle Ɔhene. Atẽe beni yeɛ ɔfale so yɛle sɔ ɔ? Na nzu yeɛ ɔtole Ɔhemaa Atalia bɔ ne ye tianu yɛ se ne? Aso ɛpena kyɛ enwui anaa?—
Yehoada frɛle awɛmvoɛ nemɔ, na ɔhãne kyɛbɔ ɔne ɔye fale Yohoase feale nanwo dwirɛ hyirele bɛ. Nakoso wamma ebiala annde edwirɛ bɔ ɔhãhyirele bɛ ne. Yehoada fale Yohoase hyirele bɛ, na benwuni kyɛ, ye yeɛ ɔfata kyɛ odi hene ɔ.
Yeti Yehoada fale ahennie abotire bɔle ye. Ɛberɛ ala yeɛ “mmenia nemɔ bɔle bɛ sa nu ɔ, na bɛtẽane nu kyɛ: ‘Nana wɔ ngõa so oo!’” Awɛmvoɛ nemɔ bɔle Yohoase nwo waen. Né Atalia mbẽne bɔ ɔkɔ so naso. Yeti mmerɛ bɔ ɔtele ne, otuli amirika hɔle berɛ. Nakoso, Yehoada maa awɛmvoɛ nemɔ hũni Atalia.—2 Ahemvo 11:1-16.
it-1 379 ¶5
Asieleɛ
Sɔfo Panyi Yehoada yɛle nikyee paa. Yeti mmerɛ bɔ owuli ne, ‘besiele ye wɔ ahemvo nemɔ asieleɛ wɔ Dawide kuro nu.’ Ɔwonu kyɛ né ɔtte ɔhene de, nakoso besiele bɛbokale ahemvo nemɔ so. Né ɛhe bie silli llé.—2Abe 24:15, 16.
Bible Nu Dwirɛ Titire
it-2 1223 ¶13
Sakaria
Né Sɔfo Panyi Yehoada awa yeɛ ole Sakaria. Mmerɛ bɔ Yehoada wuli ne, Yohoase hwẽne yenwo fili nahorɛ sõen nwo. Waandie afutue bɔ Yehowa diyifoɛ nemɔ famane ye ne, na mmom otiele afutue bɔ né ɔttemayé ɔ. Sakaria bɔle mmenia nemɔ kɔkɔ wɔ bɔ né bɛyɛ nanwo, nakoso baandie. Na mmom besili ye nyɔboɛ behũni ye wɔ AWURADE awuro ne aluo berɛ. (2Abe 22:11) Mmerɛ bɔ bekũ Sakaria ne, ɔtẽane nu kyɛ, “AWURADE ɔnea bɔ ɛmɔyɛ ne, ná otua ɛmɔ so kerɛ!” Edwirɛ bɔ diyifoɛ Sakaria hãne ne wale nu. Siriafoɛ hũhũni mmenia bɔ né bɛwɔ Yuda ne. Na Yohoase koso, “ɔnate sɔfo Yehoada awa ne mogya bɔ ɔhã guale nati,” ye bɔbɔ y’asomvoɛ hũni ye.—2Abe 24:17-22, 25.
MAY 22-28
NYAMEƐ DWIRƐ NANU ASUADEƐ | 2 ABERƐSO DWIRƐ 25-27
“Yehowa Kɔhora Kɔma Wɔ Bɔ Ɔbo Sɔ Ɔ”
it-1 1266 ¶6
Yohoase
Né Yuda hene ne Edomfoɛ kwaahõ, na Yohoase fale y’asogyafoɛ nemɔ nu apee kõ mane ye. Ɔmva yenwo kyɛ ne batua sogyafoɛ nemɔ kerɛ ɛdwetɛ talɛnde ɛyaa kõ (bɔ ɔte ɛnnɛ sikaa 660,600 dɔlɛs) ne, Nyameɛ sona bie hãhyirele Yuda hene kyɛ, ɔma asogyafoɛ nemɔ hɔ bawuro. Nakoso, sogyafoɛ nemɔ fɛle yaa, ɔnate kyɛ ne bɛnea atẽe kyɛ, sɛ bɛkɔ kõɛ ne a, bekonya nningyein pẽe. Mmerɛ bɔ sogyafoɛ nemɔ nate atẽe so bɔ bɛkɔ ne, bɛfale kõɛ bɛɛtetale mmenia bɔ bɛwɔ Samaria kodwu Bete Horon ne, na bɛsesale nningyein pẽe bɛhɔle.—2Abe 25:6-10, 13.
w21.08 30 ¶16
Fa nningyein bɔ afɔleɛ ma Yehowa. Ɔwonu kyɛ yɛpena kyɛ yɛsɔ Yehowa nye de, nakoso ɛhẽne ngyire kyɛ nikyee biala bɔ yɛnye gye yenwo ne, odikyɛ yɛyakyi. (Nwo. 5:19, 20) Nakoso, sɛ nningyein bɔ yɛnye gye yenwo nati yɛngora yɛnyɛ pẽe wɔ Nyameɛ sõen nu a, yede yɛkɔhora yekoli mvomsoɛ tekyɛ brienzua bɔ yenwo dwirɛ wɔ Yesu mvandoho nanu ne. Né sɔ abrandeɛ ne pena kyɛ onya asetena pá, yeti wambena Yehowa si atẽe. (Kenga Luka 12:16-21.) Aliemaa bie bɔ ofi France bɔ bɛfrɛe Christian hãne kyɛ; “né mennya mmerɛ pẽe memma Yehowa ne m’abusũa.” Ɔne ɔye sili gyinaeɛ kyɛ bɛkɔyɛ atẽepakyelɛ adwuma ne bie. Nakoso sɛ né bɛkɔhora bɛkɔyɛ sɔ a, né odikyɛ bɛyakyi adwuma bɔ bɛyɛ ne. Bɔ ɔkɔyɛ na bahora banea bɛnwo ne, né besiesie mmenia awuro ne b’adwuma nu. Na kãa biala bɔ bekonyae ne, né bɛmaa bɛnye sɔ. Nningyein bɔ bɛfa bɛbɔle afɔleɛ ne, nhyiraa beni yeɛ benyane ɔ? Christian kã kyɛ, “Kesaalae, asɛnga adwuma ne kɔ yé paa. Na sɛ yenwu kyɛ yɛ Bible asuafoɛ nemɔ sũa Yehowa nwo nikyee a, ɔmaa y’ahõne tɔ yɛ kunu.”
Bible Nu Dwirɛ Titire
w07 12/15 10 ¶1-2
Nwa Yeɛ Esuesũa Ye Wɔ Yehowa Sõen Nu Ɔ?
Yusia ɔɔyɛle ɔhene ne, né wali afoɛ 16 pɛ, na olili bia afoɛ Aburannu (50). “Na ɔyɛle bɔ ɔtengyɛ wɔ AWURADE nyunu.” Nzu yeɛ ɔbokale ye maa ɔyɛle nningyein pá ɔ? Bible ne kã kyɛ: “Mmerɛ bɔ Sakaria te ngõa nu ne, Yusia sõne Nyameɛ. Sakaria hyirehyirele ye kyɛ, odikyɛ ɔfa Nyameɛ surolɛ ɔbɔ ye bra. Na mmerɛ bɔ ɔsõne AWURADE ne amukoraa, Nyameɛ maa oyiele ye yé.”—2 Aberɛso Dwirɛ 26:1, 4, 5.
Sɛ nná Bible nu dwirɛ he a, ahãa Sakaria bɔ né otu ɔhene ne fo ne, yɛnnze yenwo dwirɛ pẽe. Ɔnate kyɛ Sakaria hyirehyirele Yusia maa osurole Yehowa nati, ɔhora nyane yeso ngɛngɛnsoɛ pá. Yeti ɔmva yenwo kyɛ né Yusia te akwalaa ne, ɔhora yɛle bɔ ɔte pá ɔ. Nwomaa bie kã kyɛ, ɔkɔyɛ kyɛ né Sakaria te ebie bɔ ɔse tworɔzɛm nanu paa, ole suanwu, ná ɔse ngyerɛkyerɛ koso ɔ.” Bible nwo Nimdefoɛ bie kã Sakaria nwo dwirɛ kyɛ, né wasũa ngɔmhyɛ nwo dwirɛ paa. Afei koso, né ɔte ebie bɔ ole nimdeɛ, anwofama, na né ɔte sona pá. Ɔkɔyɛ kyɛ ɛhẽne ati yeɛ ɔhora nyane Yusia so ngɛndɛnsoɛ pá ne.”
MAY 29–JUNE 4
NYAMEƐ DWIRƐ NANU ASUADEƐ | 2 ABERƐSO DWIRƐ 28-29
“Sɛ Wɔ Baba Ne Wɔ Maame Anni Yehowa Nahorɛ Pó A, Ɛkɔhora Koli Ye Nahorɛ”
w16.02 14 ¶8
Bɛwole Hesekia wɔ Yisrael maen bɔ né bahyɛ bɔ kyɛ bɛkɔyɛ Yehowa apɛdeɛ nanu. Nakoso, Yisraelfoɛ biemɔ anni Yehowa nahorɛ. Yisraelfoɛ bɔ banni nahorɛ ne, benu kõ yeɛ ole Hesekia baba Ɔhene Ahase. Né Ahase tianu yɛ se, na ɔmaa Yuda maen ne sõne bosõen. Afei koso, oguale Yehowa asɔre awuro nanwo fĩɛ. Mmerɛ bɔ né Hesekia te akwalaa ne, bɛfale oliema biemɔ bɔle afɔleɛ wɔ sẽe nu mane bosõen, mmerɛ bɔ ne bɛnye tá so ɔ. Yeti nea kyɛbɔ né Hesekia kɔte ngã ɔ.—2 Ah. 16:2-4, 10-17; 2 Abe. 28:1-3.
w16.02 14 ¶9-11
Suesũa Bɛbɔ Bedi Yehowa Nahorɛ Ne
Ndeteyɛɛ bɔ Hesekia nyane nati, né ahãa ɔkɔhora kɔte ngã kyɛ bɛne ye anni ye yé, anaakyɛ ɔkɔyɛ Yehowa so asoserɛ. Ebiemɔ susu kyɛ, bannya ndeteyɛɛ pá wɔ bɛ ngwalaa nu, yeti yeɛ ɔmaa b’abrabɔ ayɛ basaa ne. Yeti, ɔtɔ mmerɛ bie a, nningyein tɛ́ɛ bɔ b’awofoɛ yɛle ne, ɛhẽne ala yeɛ bɛkoso bɛyɛ ɔ. (Hes. 18:2, 3) Mmenia biemɔ wɔ berɛ a, bayia ɔhaw bɔ enu yɛ se paa wɔ b’asetena nu. Yeti, ɛyɛ a bɛte ngã kyɛ sɛ ‘bɛfɛ Yehowa so yaa,’ anaa bedwɔso betia ye ahyehyɛdeɛ ne a, ndeaseɛ wonu. (Any. 19:3) Aso, ɔte pá kyɛ ebie konya sɔ adwene ne anaa?
Bɔ ɔhɔle so wɔ Hesekia asetena nu ne maa yenwu kyɛ, sɔ dwirɛ ne tte nahorɛ koraa. Nná Yehowa yeɛ ɔmaa mmenia yia ɔhaw wɔ ewiase tɛ́ɛ he anu ɔ. Yeti sɛ yeyia ɔhaw a, nworɛ biala nne nu kyɛ yɛkɔfɛ Yehowa so yaa ɔ. (Yob 34:10) Nahorɛ dwirɛ yeɛ ole kyɛ, sɛ baba anaa maame bie yɛ bɔ ɔte pá, anaakyɛ bɔ ɔttamayé a, bɛ mmaamɔ kɔhora kosuesũa. (Any. 22:6; Kol. 3:21) Nakoso, nná abusũa bɔ ebie fi nu ne, yeɛ okyire kyɛbɔ y’abrabɔ kɔyɛ ɔ. Yehowa ama yɛnu biala akyɛdeɛ bie bɔ ɔsom bo paa ɔ. Ebiala le yenwo atẽe kyɛ, osi bɔ ɔpena kyɛ ɔyɛ ye wɔ y’abrabɔ nu nanwo gyinaeɛ. (Deut. 30:19) Sɛɛ yeɛ Hesekia fale sɔ yenwo atẽe ne lili dwumaa ɔ?
Né Hesekia baba te Yuda ahemvo bɔ betianu yɛ se paa nanu kõ. Nakoso Yuda ahemvo bɔ belili nahorɛ paa ne, né Hesekia boka so (Kenga 2 Ahemvo 18:5, 6.) Ɔwonu kyɛ ye baba yɛle nningyein bɔ ɔttemayé de, nakoso mmenia biemɔ lili nahorɛ, na né ɔkɔhora kosuesũa bɛ. Sɔ mmerɛ ne, né Yesaya, Mika, ne Hosea te adiyifoɛ. Yehowa mmraa bɔ né sɔ adiyifoɛ nemɔ kyirekyire ne, Ɔhene Hesekia fa yɛle adwuma. Ɔnate Yehowa afutue bɔ ɔfa yɛle adwuma nati, ɔhora yɛle nningyein pá. Yeti, Hesekia siesiele nningyein tɛ́ɛ bɔ ye baba yɛle ne. Ɔyɛle adwuma serɛ fa tele asɔre awuro nanwo, na ɔsrɛle Yehowa kyɛ, ɔfa mmenia nemɔ bɔne hyɛ bɛ. Afei koso, ɔsɛkyele ahoni bɔ né mmenia nemɔ sõ bɛ ne. (2 Abe. 29:1-11, 18-24; 31:1) Mmerɛ bɔ Senakeribo yɛle y’adwene kyɛ ɔkɔto kɔwura Yerusalɛm kuro naso ne, Hesekia nyane akokoduro ne gyidie. Afei koso, ɔfale yenwo tole Yehowa so, na ɔhyɛle mmenia nemɔ ngunaen. (2 Abe. 32:7, 8) Nziɛen, Hesekia mane yenwo so. Nakoso mmerɛ bɔ bɛmane ye afutue ne, onuni yenwo, ɔbrɛle yenwo ase, na ɔyɛle nzakrayɛɛ. (2 Abe. 32:24-26) Ɔwonu kyɛ Hesekia baba yɛle nningyein bɔ ɔttemayé de, nakoso Hesekia hora lili Yehowa nahorɛ fa hyirele kyɛ ɔte ye damvo. Ɛhe te nikyee bɔ yɛkɔhora yekosuesũa ɔ.
Bible Nu Dwirɛ Titire
w12 2/15 24-25
Natan Tale Nahorɛ Sõen Sĩ
Né Natan di nahorɛ ma Yehowa. Mmerɛ bie, Dawide hãhyirele Natan kyɛ, ɔpena kyɛ osi asɔre awuro ma Yehowa. Nakoso, Natan ammisa Yehowa adwene wɔ edwirɛ nanwo, na mmom ɔhãhyirele Dawide kyɛ, ɔkɔhora kosi. Nakoso sɔ kɔngɔen ne, Yehowa somane Natan maa ɔɔbɔle Dawide amaneɛ kyɛ, nná ye yeɛ okosi asɔre awuro ne ɔ. Na mmom ɔwa yeɛ okosi ɔ. Natan hãhyirele Dawide kyɛ, Yehowa ne ye kɔyɛ apam, na “ye ahennie kotindim afebɔɔ.”—2 Sam. 7:4-16.
Adwene bɔ né Natan le ye wɔ asɔre awuro bɔ Dawide kosi nanwo ne, né ɔne Nyameɛ adwene nyia. Nakoso mmerɛ bɔ Yehowa fale afutue mane ye ne, wamvɛ yaa, na mmom ole tole nu. Yɛkɔhora yekosuesũa bɔ Natan yɛle ne mmerɛ bɔ Yehowa afa afutue ama yɛ ne. Nziɛen, Yehowa fale adwuma wurale Natan sa. Na ɛhẽne maa yenwui kyɛ bɔne bɔ ɔyɛle ne, Yehowa fa hyɛle ye. Yehowa fale ye honhom hãne Natan ne Gad maa bɛfale akwangyerɛ bɛmane Dawide, mmerɛ bɔ né ɔyɛ nhyehyɛeɛ maa mmenia 4,000 to dwein wɔ asɔre awuro berɛ ne.—1 Abe. 23:1-5; 2 Abe. 29:25.
JUNE 5-11
NYAMEƐ DWIRƐ NANU ASUADEƐ | 2 ABERƐSO DWIRƐ 30-31
“Sɛ Yeyia Nu A, Mvasoɛ Beni Yeɛ Yenya Ɔ?”
it-1 1103 ¶2
Hesekia
Né Nahorɛ Sõen La Y’ahõne So. Hesekia ɔɔyɛle ɔhene ne, né wali afoɛ 25. Na sɔ mmerɛ nala, ɔyɛle nikyee bie fahyirele kyɛ, nahorɛ sõen la y’ahõne so. Nikyee bɔ olimoa yɛle yeɛ ole kyɛ, ɔmaa besiesiele asɔre awuro berɛ. Afei ɔboɔboale asɔfo ne Lewifoɛ nemɔ noa, na ɔhãhyirele bɛ kyɛ: “mayɛ m’adwene kyɛ me ne AWURADE Yisrael Nyameɛ ne kɔyɛ apam.” Né Yehowa ne mmenia nemɔ ayɛ apam, nakoso né babu bɛnye bagua so. Yeti Hesekia hwẽne b’adwene siele sɔ apam naso. Ɔyɛle nhyehyɛeɛ maa Lewifoɛ nemɔ yɛle adwuma wɔ asɔre awuro berɛ. Afei koso, ɔmaa benyane nningyein bɔ bɛkɔfa bɛkɔto dwein bɛkɔye Yehowa ayɛ ɔ. Né mmerɛ aso kyɛ bedi Abɔtra aluolue ne wɔ Nisan bosome nanu. Nakoso, né asɔre awuro ne, asɔfo nemɔ, ɔne Lewifoɛ nemɔ nwo agua fĩɛ. Yeti wɔ Nisan kyẽa bɔ ɔtɔ so 16 ne, Hesekia maa bɛtele asɔre awuro ne, ɔne nningyein bɔ né bɛfa bɛyɛ adwuma wɔ berɛ nanwo. Afei koso, né odikyɛ bɛbɔ afɔleɛ bɛma Yisrael maen namukoraati, kyɛbɔ ɔkɔyɛ a Yehowa kɔfa bɛ bɔne kɔhyɛ bɛ ɔ. Yeti, mbanyi nemɔ limoa bɔle afɔleɛ bɛmane maen ne, na bɛbɔle afɔleɛ fa tele asɔre awuro nanwo. Afei koso, mmenia nemɔ bɔle ɛyeralɛ afɔleɛ.—2Abe 29:1-36.
it-1 1103 ¶3
Hesekia
Né mmenia nemɔ nwo agua fĩɛ. Yeti bangora banni Abɔtra aluolue ne wɔ mmerɛ bɔ né odikyɛ bedi nanu. Nakoso Hesekia maa benwuni ye wɔ mmraa nwomaa nanu kyɛ, sɛ ebie nwo agua fĩɛ wɔ mmerɛ bɔ bedi Abɔtra aluolue ne a, ɔkɔhora koli ye bosome kõ sĩ. Nná Yudafoɛ nemɔ ngome yeɛ belili Abɔtra aluolue ne ɔ. Na mmom, Yisraelfoɛ bɔ né bɛwɔ Beɛ-sheba kodwu Dan ne koso, Hesekia somane mmenia maa bɛtole asaa frɛle bɛ. Mmenia bɔ Hesekia somane bɛ ne, Yisraelfoɛ biemɔ gorole bɛnwo. Nakoso Yisraelfoɛ bɔ né befi Manase, Asɛ, Sebulɔn, Efraim ɔne Yisaka mmusuakure nanu ne, benu biemɔ brɛle bɛnwo ase, na bɛhɔle. Afei, mmeni pẽe bɔ né bɛtte Yisraelfoɛ koso hɔle bie. Yisraelfoɛ bɔ né bɛnye gye nahorɛ sõen nwo ne, ɔkɔhora kɔwa kyɛ né ɔyɛ se paa kyɛ bɛkɔhɔ ɔ. Bɔ ɔte yeɛ ole kyɛ, sɔ mmerɛ ne, né Yisraefoɛ nemɔ sõ bosõen. Afei koso, né Asiriafoɛ nemɔ hyɛ bɛ so. Yeti kyɛbɔ ɔte biala, né mmenia kɔgoro bɛnwo.—2Abe 30:1-20; Num 9:10-13.
it-1 1103 ¶4-5
Hesekia
Mmerɛ bɔ belili Abɔtra Aluolue ne beyiele ne, bɛfale ɛlɛsoo belili Pãanoo Kabrɛdi Aluolue ne. Mmenia nemɔ nye gyele alaa maa bɛhãne kyɛ, bɛfa ɛlɛsoo biekũ bɛboka so. Ɔwonu kyɛ né bɛte mmerɛ bɔ enu yɛse paa nu de, nakoso Yehowa yirale ye mmenia maa “anigye kandinga wale Yerusalɛm, ofikyɛ ofi Yisrael hene Dawide awa Solomon aberɛ so, nikyee bɔ ɔte sɔ ne, né ebie silli llé wɔ Yerusalem.”—2Abe 30:21-27.
Mmenia nemɔ sá sõne Yehowa wɔ nahorɛ nu. Na anigye bɔ benyane ye ne, ɔhãne bɛ maa bɛyɛle nzakrayɛɛ wɔ bɛ sõen nu. Kora bɔ benu biala kɔ b’awuro ne, bebubuli mmosõen bonima anaa pilla nemɔ beguale. Afei koso, bɛsɛkyele asɔneyɛɛ sua ne, ɔne afɔleɛ bokyea bɔ ɔwɔ Yuda, Benyamin, Efraim, ɔne Manase namukoraati. (2Abe 31:1) Hesekia bubuli kɔɔbere ewoo bɔ Mose yɛle ne, ofikyɛ né Yisraelfoɛ nemɔ afa ayɛ bosõen, na ne bɛbɔ afɔleɛ bɛma ye. (2Ah 18:4) Bɔ ɔkɔyɛ na mmenia nemɔ ahɔso asõ Yehowa wɔ nahorɛ nu ne, Hesekia totole adwuma bɔ né ɔkɔso wɔ asɔre awuro berɛ ne yé.—2Abe 31:2-12.
Bible Nu Dwirɛ Titire
w18.09 6 ¶14-15
‘Sɛ Ɛmɔse Ɛhemɔ, Na Ɛmɔ Yɛ A, Ɔte Nhyiraa Ma Ɛmɔ’
Sɛ ebie dwudwo na yɛyɛ dinn yɛtie a, okyire kyɛ yɛbrɛ yɛnwo ase. Yakobo 1:19 kã kyɛ, ‘odikyɛ sona biala yɛ ndɛ tie edwirɛ.’ Yehowa ayɛ ɛhe anwo nneasoɛ kama wama yɛ. (Gye. 18:32; Yos. 10:14) Wɔde, susu ngɔmmɔ bie bɔ Yehowa ne Mose bɔle wɔ Ɛksadɔso 32:11-14 nanwo nea (Kenga). Né Yehowa nhia Mose adwenkyerɛ wɔ sɔ dwirɛ nanwo. Nakoso, ɔmane ye atẽe maa ɔhãne kyɛbɔ ɔte ngã ɔ. Né Yehowa se Mose paa kyɛ ɔte ebie bɔ odi mvomsoɛ. Nakoso, ɔtole ye boase tiele ye, na ɔfale y’adwenkyerɛ ne yɛle adwuma. Sona beni paa yeɛ ɔkɔyɛ sɔ ɔ? Ɛhe kyire kyɛ, bɛbɔ bele Yehowa nu gyidie ne, otie bɛ.
Yehowa le tumi tra ebiala, nakoso ɔbrɛle yenwo ase tiele mmenia biemɔ tekyɛ, Abraham, Rahɛl, Mose, Yosua, Manoa, Elia, ɔne Hesekia. Yede, odikyɛ yenu biala bisa yenwo kyɛ, aso mebrɛ menwo ase metie aliemaamɔ adwenkyerɛ mefa mekyire kyɛ mebu bɛ anaa? Na sɛ bɛkã edwirɛ bie bɔ ɔte pá a, aso mefa meyɛ adwuma anaa? Sɛ menea asafo nanu, ɔne mabusua nu a, aso ebie wɔ berɛ bɔ ohia me mmokalɛ anaa? Sɛ sɔ a, ngɔyɛ sɛɛ na maboka ye?’—Gye. 30:6; Mae. 13:9; 1 Ahe. 17:22; 2 Abe. 30:20.
JUNE 12-18
NYAMEƐ DWIRƐ NANU ASUADEƐ | 2 ABERƐSO DWIRƐ 32-33
“Sɛ Eliemamɔ Nwo Kyere Bɛ A, Boka Bɛ Na Hyɛ Bɛ Ngunaen”
it-1 204 ¶5
Asiria
Senakeribo. Wɔ Hesekia ahennie afoɛ bɔ ɔtɔ so 14 nu ne, Siria hene Senakeribo fale kõɛ ɔɔtetale Yuda maen ne. (2Ah 18:13; Yes 36:1) Hesekia de, wammrɛ yenwo ase wamma Asiriafoɛ nemɔ tekyɛ ye baba Ahas. (2Ah 18:7) Ɛhẽne ati, Senakeribo fale kõɛ ɔɔtetale Yuda maen ne, na olili bɛ nguro 46 so ngunim (fatoto Yes 36:1, 2 nanwo). Afei koso, ɔhyɛle Hesekia kyɛ otua esikaa kɔkorɛ talent 30 (bɔ ɔte ɛnnɛ sikaa 11,560,000 dɔlɛs) ne, ɔne kɔɔbere talent 300 (bɔ ɔte ɛnnɛ sikaa 1,982,000 dɔlɛs ne). (2Ah 18:14-16; 2Abe 32:1; fatoto Yes 8:5-8 nanwo.) Hesekia tuale esikaa ne mane bɛ. Nakoso, Senakeribo somane mmenia maa bɛhã behyirele Hesekia kyɛ, ɔbrɛ yenwo ase ma oli Yerusalɛm kuro naso. (2Ah 18:17–19:34; 2Abe 32:2-20) Nakoso, Yehowa hũhũni Asiria sogyafoɛ 185,000 kɔgɔen kõmaapɛ. Ɛhe ati, Asiriafoɛ bɔ né bedwa bɛnoa nu ne, bɛnwati bɛhɔle Ninewe. (2Ah 19:35, 36) Senakeribo koso, ye mmamɔ nyɔ hũni ye, na ɔwa Esa Hadon lili ye bia. (2Ah 19:37; 2Abe 32:21, 22; Yes 37:36-38.)
w13 11/15 19 ¶12
Mmoaen Nealɛfoɛ Nzoo, Ɔne Atitire Mmɔtwɛ Ne—Ɔfa Yɛnwo Sɛ́?
Yehowa nea atẽe kyɛ yɛkɔyɛ bɔ y’anwoserɛ kɔhora ɔ. Nakoso, sɛ yeyia ɔhaw bie bɔ ɔbo y’anwoserɛ so a, ɔboka yɛ maa yegyina yenoa. Hesekia “ne ye mbanyi mɔ ne ye kõɛhõnɛfoɛ dwenene yenwo kyɛ, asue ba bɔ ɔtengyɛ fa aseɛ ne aso ne, bekotua ye . . . Hesekia hyɛle ye bo yɛle adwuma serɛ, na fasue bɔ né wabu wagua ase ne, besili ye mukoraati, na osisili abandenden siesiele so . . . na ɔyɛle akodeɛ ne akokyɛm pẽe.” (2 Abe. 32:3-5) Yehowa nate mmrienzua bɔ né bele akokoduro tekyɛ, Hesekia, mbanyi nemɔ, ɔne adiyifoɛ bɔ né bedi nahorɛ naso bɔle ye mmenia nwo waen, na ɔneane bɛ so.
w13 11/15 19 ¶13
Mmoaen Nealɛfoɛ Nzoo, Ɔne Atitire Mmɔtwɛ Ne—Ɔfa Yɛnwo Sɛ́?
Hesekia tuetuale asue nemɔ, na osili fasue. Nakoso, ɔyɛle nikyee bie bɔ yenwo hia tra sɔ koraa. Ɔnate kyɛ né Hesekia dwene mmenia nemɔ nwo nati, ɔboɔboale bɛnoa, na ɔhyɛle bɛ ngunaen kyɛ: “Nnɛma ɛmɔsuro, yeɛ nnɛmaa ɛmɔ kũnu tete ɛmɔ wɔ Asiria hene nwo . . . , ofikyɛ bɔ ogyi yɛ sĩ ne, ɔte piri tra bɔ ogyi ye sĩ ɔ.” Ye de, kuro sona yeɛ ogyi ye sĩ ɔ. Nakoso yɛ de, AWURADE yɛ Nyameɛ yeɛ ogyi yɛ sĩ ɔ, bɔ ɔkɔboka yɛ maa yɛkɔhõ yɛ kõɛ mɔ ɔ.” Sɔ dwirɛ ne maa yenwu kyɛ, Yehowa kɔhõ kɔma ye mmenia. Nea kyɛbɔ ɛhe hyɛ yɛ gyidie serɛ ɔ! Hyɛ ye nzorɛ kyɛ, “edwirɛ bɔ Yuda hene Hesekia hãne ne, ɔhyɛle maen ne ngunaen,” na ɔmaa b’ahõne tɔle bɛ kũnu. Afei Mbanyi nemɔ, mmrienzua bɔ né bele akokoduro, diyifoɛ Mika ɔne Yesaya hyɛle mmenia nemɔ ngunaen. Yeti, edwirɛ bɔ Yehowa nate diyifoɛ Mika so hãne ne wale nu.—2 Abe. 32:7, 8; kenga Mika 5:5, 6.
Bible Nu Dwirɛ Titire
w21.10 4-5 ¶11-12
Nzu Yeɛ Okyire Kyɛ Ebie Anu Yenwo Ɔ?
Ɔnate kyɛ Manase nune yenwo, na ɔyɛle nzakrayɛɛ nati, mmerɛ bɔ ɔbɔle mbaeɛ ne Yehowa tiele. Yeti Yehowa maa osá lili hene. Manase yɛle nningyein pẽe fa hyirele kyɛ wanu yenwo amba. Ɔsesãne ye subaen, otuli ngondombo sõen bo, na ɔmaa mmenia nemɔ sõne Yehowa nahorɛ nu. Nakoso Ɔhene Ahabo de, waanyɛ sɔ. (Kenga 2 Aberɛso Dwirɛ 33:15, 16.) Nningyein tɛ́ɛ bɔ Manase yɛle ne, onyane y’abusũafoɛ, ye mbanyi nemɔ, ɔne ye mmenia nemɔ aso ngɛndɛensoɛ afoɛ pẽe. Yeti, né ohia akokoduro ne gyidie kora, né wahora wayɛ nzakrayɛɛ. Manase yɛle nzakrayɛɛ pẽe kora yeɛ owu ɔ. Nningyein pá bɔ ɔyɛle ne, y’anõmaa Yosia suesũane. Yeti mmerɛ bɔ ɔɔyɛle ɔhene ne, ye koso ɔyɛle nningyein pá.—2 Ahe. 22:1, 2.
Nzu yeɛ yesũa yefi Manase dwirɛ nanu ɔ? Ɔyɛle nningyein pẽe fahyirele kyɛ wanu yenwo. Ɔbrɛle yenwo ase, na ɔbɔle Yehowa mbaeɛ kyɛ ɔfa ye bɔne hyɛ ye. Afei koso, ɔsesãne ye subaen. Na ɔhaw bɔ ofi ye bɔne nanu wale ne, ɔbɔle mmɔden siesiele. Afei koso ɔsõne Yehowa, na ɔbokale mmenia nemɔ maa bɛkoso bɛyɛle sɔ. Manase dwirɛ ne maa yenwu kyɛ, sɛ yayɛ bɔne bɔ enu yɛ nõ pó a, anyelasoɛ wɔ berɛ ma yɛ. Ɛhe maa yenya adanzeɛ bɔ okyire kyɛ, Yehowa ‘te pá, na ɔfa bɔne kyɛ.’ (Edw. 86:5) Sɛ ebie yɛ bɔne, na sɛ ɔbɔ mmɔden kyɛ ɔngɔyɛ kõ a, Yehowa fa kyɛ ye koraa.
JUNE 19-25
NYAMEƐ DWIRƐ NANU ASUADEƐ | 2 ABERƐSO DWIRƐ 34-36
“Bible Bɔ Mesũa Ne, Aso Mefa Meyɛ Adwuma?”
it-1 1157 ¶4
Hulda
Mmerɛ bɔ né besiesie asɔre awuro berɛ ne, sɔfo panyi Hilkia nwuni “mmraa nwomaa” ne. Na mmerɛ bɔ Yosia tele enu dwirɛ ne, ɔmaa bebisale Yehowa adwene wɔ bɔ ɔtele nanwo. Yeti bɛhɔle Hulda berɛ. Na ɔhãhyirele bɛ kyɛ, ɔnate kyɛ mmenia nemɔ ahwẽ bɛnwo bafi Yehowa nwo nati, ɔhaw bɔ “mmraa nwomaa” ne kã yenwo dwirɛ namukoraati kɔwa bɛso. Ɔnate kyɛ né Yosia brɛ yenwo ase nati, Hulda hãne kyɛ ɔhaw bɔ né ɔkɔwa maen naso ne, né ɔngɔfa yenye ngɔnwu bie. Na mmom, né okowu maa bekosie ye wɔ asomdwee nu kora ne ɔhaw ne awa mmenia nemɔ so.—2Ah 22:8-20; 2Abe 34:14-28.
w09 6/15 10 ¶20
Yere Wɔnwo Di Yehowa Nahorɛ!
Mmerɛ bɔ Yosia tele mmraa nanu dwirɛ ne, nzu yeɛ ɔyɛle ɔ? Ye wora bɔle, na osunzuale y’ataadeɛ nu. Na ɔmaa bebisale Yehowa adwene wɔ yenwo. (Kenga 2 Aberɛso Dwirɛ 34:14-18.) Ngondombo sõen bɔ né mmenia nemɔ afa bɛnwo bawura nu ne, Yehowa nate diyifoɛ brasua Hulda so dwudwo tiale. Yehowa nye sɔle mmɔden bɔ Yosia bɔle kyɛ okotu ngondombo sõen bo ne. Yehowa hãne kyɛ ɔkɔfa ɔhaw kɔwa maen naso, nakoso Yosia de onyane ye nyunu adom. (2 Abe. 34:19-28) Nzu yeɛ yesũa yefi nu ɔ? Yɛ koso, yɛnye gye yenwo kyɛ yɛkɔyɛ Yehowa apɛdeɛ tekyɛ Yosia. Sɛ Yehowa fa akwangyerɛ ma yɛ a, odikyɛ yɛfa yɛyɛ adwuma ndɛ. Sɛ yɛyɛ sɔ a, ɔkɔmaa yekoli Yehowa nahorɛ daa, na yɛngɔhwẽ yɛnwo yɛngofi yenwo llé. Yehowa nye sɔle mmɔden bɔ Yosia bɔle kyɛ ɔkɔsõ ye nahorɛ nu ne. Yɛkoso yɛkɔhora yekonya anwotɔsoɛ kyɛ, sɛ yɛsõ Yehowa nahorɛ nu a, yenye sɔ.
Bible Nu Dwirɛ Titire
w17.03 27 ¶15-17
Sɛ Esi Gyinaeɛ A, Aso Ɛfa Bible Akwangyerɛ Yɛ Adwuma?
Né Ɔhene Yosia te ebie bɔ odi nahorɛ. Nakoso bɔ ɔtole ye ne, nzu yeɛ yesũa yefi nu ɔ? Ɔyɛle sɛɛ yeɛ owuli ɔ? Má yesusu yenwo. (Read 2 Aberɛso Dwirɛ 35:20-22.) Né Egypt Hene Neko ahãhyire Yosia kyɛ, ɔne ye bellé dwirɛ biala. Nakoso, ‘Yosia fale kõɛ ɔɔtoale ye’. Bible ne kã kyɛ, edwirɛ bɔ Neko hãne ne, né “ofi Nyameɛ berɛ.” Yede, nzuati yeɛ Yosia hɔle kyɛ ɔne ye kwaahõ ɔ? Ɛhẽne de, Bible ne ngã.
Yede, né Yosia kɔyɛ sɛɛ ne wanwu kyɛ edwirɛ bɔ Neko hãne ne, ofi Yehowa berɛ? Né ahãa ɔkɔhora kobisa diyifoɛ Yeremia bɔ né odi nahorɛ ne. (2 Abe. 35:23, 25) Nakoso, tworɔnzɛm biala nné berɛ bɔ ɔkã kyɛ Yosia yɛle sɔ ɔ. Afei koso, nná Yerusalɛmfoɛ yeɛ né Neko ne bɛ kwaahõ ɔ. Na mmom, né wafa ye nye wahyire “kuro foforɛ,” bɔ ɔwɔ Kakemise ne. Afei koso, né Neko dwudwo tialle Yehowa anaa ye mmenia. Yeti né nworɛ biala nne nu kyɛ Yosia ne Neko kɔhõ ɔ. Afei de, anwu bɔ yɛkɔhora yekosũa yekofi Yosia dwirɛ nanu anaa? Sɛ yeyia ɔhaw, anaakyɛ yesi gyinaeɛ bie a, odikyɛ yebisa Yehowa adwene wɔ yenwo.
Sɛ yeyia ɔhaw a, odikyɛ yɛto yɛboase yesusu Bible nu dwirɛ bɔ ɔfa gyinaeɛ bɔ yɛpena kyɛ yesi nanwo yé. Sɛ yɛyɛ sɔ a, ɔkɔboka yɛ maa yekonwu kyɛbɔ yɛkɔfa yɛkɔyɛ adwuma ɔ. Ɔtɔ mmerɛ bie a, yɛkɔhora ne mbanyi nemɔ kosusu edwirɛ nanwo, na yayɛ nhwehwɛmuɛ wɔ asafo nwomaa ahoroɛ nu koso. Nakoso, ebia né Bible nu dwirɛ foforɛ bie wɔ berɛ bɔ odikyɛ yesusu yenwo ɔ. Ɛhẽne ati yeɛ yenwo hia kyɛ yɛkɔ asafo nu mbanyi nemɔ berɛ yɛkɔpena mmokalɛ ne.
JUNE 26–JULY 2
NYAMEƐ DWIRƐ NANU ASUADEƐ | ƐSRA 1-3
“Brɛ Wɔnwo Ase Má Yehowa Fa Adwuma Wura Wɔ Sa”
w22.03 14 ¶1
Aso Enwu Bɔ Sakaria Nwuni Ye Ne Anaa?
Né edwirɛ fɛ́ɛ bie nate atẽe so ba. Né Yisraelfoɛ nemɔ atena Babilɔn afoɛ pẽe. Nakoso, Yehowa Nyameɛ “kenyane Pɛsia Hene Karose” maa ɔyakyili bɛ. Ɔhene ne bɔle dawure kyɛ, Yudafoɛ nemɔ sá bɛhɔ bekuro, “ná beesi AWURADE Yisrael Nyameɛ awuro ne biekũ.” (Ɛsra 1:1, 3) Wɔde, nea kyɛbɔ né bɛnye kɔgye ɔ! Né ɛhe kyire kyɛ, bɛkosá bɛɛkɔsõ Yehowa nahorɛ nu wɔ aseɛ bɔ wafa wama bɛ naso.
w17.10 26 ¶2
Mmrienzua ne mmrasua bɔ né besá bɛkɔ Yerusalɛm ne, né Sakaria se kyɛ, bɛ gyidie yɛ se paa. Ofikyɛ, né bɛte mmenia bɔ “Nyameɛ honhom akenyan” bɛ maa bayakyi b’awuro ne b’adwuma wɔ Pɛsia ɔ. (Ɛsra 1:2, 3, 5) Afei koso, ɔwonu kyɛ né batena Pɛsia bahyɛ de, nakoso befili berɛ, na bɛhɔle nekaa bɔ ne benu pẽe nala nze berɛ ɔ. Né Yehowa asɔre awuro bɔ bekosá bekosi nanwo hia bɛ. Ɛhẽne ati yeɛ ɔmaa bɛpɛle kwanzin kɔyɛ 1,000 hɔle Yerusalɛm, ɔmva yenwo kyɛ ne atẽe naso yɛ suro ne.
Bible Nu Dwirɛ Titire
w06 1/15 19 ¶1
Ɛsra Nwomaa Nanu Dwirɛ Titire
1:3-6. Yisraelfoɛ bɔ né bɛwɔ Babilɔn ne, nná bɛmukoraati yeɛ benyane yenwo atẽe beesili asɔre awuro ne bie ɔ. Ɛnnɛ koso, nná yemukoraati yeɛ yɛkɔhora yɛkɔyɛ mmerɛ mukoraati sõen adwuma ne bie, anaakyɛ yekotu yɛkɔhɔ nekaa bɔ mmokalɛ nwo hia ɔ. Nakoso, bɛbɔ bɛyɛ mmerɛ mukoraati sõen adwuma ne bie ne, yɛhyɛ bɛ ngunaen, na yefi yɛpɛnu yɛye ndoboa yɛfa yɛboka asɛnga adwuma ne.