Watchtower INTANƐT SO NWOMAA AKORAEƐ
Ɛwɛnenɛ Waen
INTANƐT SO NWOMAA AKORAEƐ
Sehwi
@
  • á
  • ã
  • ɔ́
  • é
  • ɛ̃
  • ɛ́
  • ɛ
  • ɔ
  • BIBLE
  • NWOMAA NE VIDIO AHOROƐ
  • ASAFO NHYIAMU AHOROƐ
  • mwbr23 November krb. 1-11
  • Nhwehwɛmuɛ Ma “Abrabɔ Ne Asɛnga Adesũa Nwomaa”

Vidio biala nne bɔ ɛyele nanu.

Yɛsrɛ wɔ, vidio ne wangora bukye.

  • Nhwehwɛmuɛ Ma “Abrabɔ Ne Asɛnga Adesũa Nwomaa”
  • Nhwehwɛmuɛ Ma Abrabɔ Ne Asɛnga Adesua Nwomaa—2023
  • Edwirɛti Mmaamaa
  • NOVEMBER 6-12
  • NOVEMBER 13-19
  • NOVEMBER 20-26
  • NOVEMBER 27–DECEMBER 3
  • DECEMBER 4-10
  • DECEMBER 11-17
  • DECEMBER 18-24
  • DECEMBER 25-31
Nhwehwɛmuɛ Ma Abrabɔ Ne Asɛnga Adesua Nwomaa—2023
mwbr23 November krb. 1-11

Nhwehwɛmuɛ Ma Abrabɔ Ne Asɛnga Adesũa Nwomaa

© 2023 Watch Tower Bible and Tract Society of Pennsylvania

NOVEMBER 6-12

NYAMEƐ DWIRƐ NANU ASUADEƐ | YOB 13-14

“Sɛ Dasaniɛ Wu A, Ɔkɔtena Ngõa Nu Biekũ Anaa?”

w99 10/15 3 ¶1-3

Kyɛbɔ Sona Abɔ Mmɔden Kyɛ Ɔkɔtena Ngõa Nu Kɔhyɛ Ɔ

Yob hãne kyɛ sona ngõa te tikaapẽ. Ɔhãne sɔ dwirɛ ne ahyɛ, kɔyɛ afoɛ apee nzã, ɔne ɛyaa nnu ɛhe (3,500). Nakoso mmeni pẽe dé tonu kyɛ edwirɛ bɔ ɔhãne ne, ɔte nahorɛ. Ebiemɔ kã kyɛ, sɛ ɛte abrandeɛ anaa taluwa a, odikyɛ ɛgye wɔnye. Nakoso ɔngyɛ né sona abɔ aworowaa, ná wawu. Yeti bennwu mvasoɛ bɔ ɔwɔ so kyɛ sona kɔtena ngõa nu ɔ. Ɛhe ati, afoɛ pẽe ɛhe, mmenia abɔ mmɔden kyɛ bɛkɔyɛ nningyein biemɔ bɔ ɔkɔmaa bɛkɔtena ngõa nu bɛkɔhyɛ ɔ. Maa yɛnea bɔ bayɛ ne bie.

Wɔ Yob aberɛ so ne, né Egyptfoɛ fa ngaka ndɔma bɛyɛ aleɛ bedi. Né bɛse kyɛ sɛ ebie yɛ sɔ a, ɔngɔbɔ aworowaa llé. Mmenia biemɔ koso tenane ase tete, na né bɛ bɔ mmɔden kyɛ bɛkɔfa buralɛ bɛkɔyɛ esikaa kɔkorɛ. Né besusu kyɛ, sɛ bɛfa esikaa kɔkorɛ bɛyɛ kyɛnzẽe a, ebiala bɔ okodidi sɔ kyɛnzẽe nanu ne, okonyi kɔhyɛ. Bɔ né ogyi sɔ mmenia nemɔ nye so paa yeɛ ole kyɛ, bɛkɔyɛ ayire bie bɔ sɛ sona nõ a, ɔkɔtena ngõa nu kɔhyɛ ɔ. Afei koso, né sõen bie wɔ China maen nanu bɔ bɛfrɛ ye Tao. Bɛ koso, né besusu kyɛ bɛkɔhora bɛkɔsesã nningyein bɔ ɔkɔso wɔ yɛ nnipadua, ɔne aleɛ bɔ yedi nanu, kyɛbɔ ɔkɔyɛ a yɛkɔtena ase daa ɔ.

Né bĩaa bie fi Spain bɔ ɔyɛ nhwehwɛmuɛ ɔ, na né bɛfrɛ ye Juan Ponce de León. Né ɔpena kyɛ onwu nikyee bɔ ebie yɛ a, ɔngɔbɔ aworowaa llé ɔ. Dɔkota bie koso tenane ase kɔyɛ afoɛ ɛyaa nzã ɛhe (300), na ɔhworɔle nwomaa bie bɔ ye dumaa yeɛ ole, Hermippus Redivivus. Ɔhworɔle edwirɛ bie wɔ sɔ nwomaa nanu kyɛ, sɛ odwu mmerɛ bɔ nzue tɔ a, bɛfa mmabunu begua sua kãamba bie nu. Afei mmerɛ bɔ begua sua nanu ne, bɛma bɛhõme begua toa nu, na bɛfa bɛyɛ ayire. Ɔhãne kyɛ, né besusu kyɛ sɛ ebie nõ sɔ ayire ne a, okonyi kɔhyɛ paa. Nakoso mmenia bɔ yahã bɛnwo dwirɛ ne, bɔ bɛyɛle ne, wangɔ anzi huu, kyire kyɛ yemu yɛle mbaen

w15 4/15 32 ¶1-2

Sɛ Bɛpɛ Bakaa So A, Aso Okosá Kɔfefɛ?

Sɛ ɛfa olive bakaa toto sida bakaa bɔ ɔwɔ Lebanon nanwo a, ebia ɛkɔhã kyɛ olive bakaa nyɛ nyemene. Bɔ ɔmaa yɛkã sɔ yeɛ ole kyɛ, sɛ olive bakaa nyi a, ɔkõndõkõndõ, na ɛyɛ a né yenwo abobɔ aporɛporɛ basaa bie. Nakoso nikyee kõ yeɛ ole kyɛ, sɛ wawa pẽ oo, mvrama tu oo, olive bakaa gyĩ ye gya so. Afei koso, olive bakaa kora di afoɛ kɔyɛ apee kõ (1,000). Ɔnate kyɛ olive bakaa ndĩn sõne, na ɔkɔ dédé wɔ aseɛ nanu nati, sɛ bɛpɛ so po a, ɔkora fefɛ biekũ.

Yob bɔ ɔtenane ase tete ne, né ole gyidie paa kyɛ sɛ owu a, ɔkɔwa ngõa nu biekũ. (Yob 14:​13-15) Gyidie bɔ né ole ye kyɛ sɛ owu a Yehowa kotingyé ye ne, ɔfale bakaa yɛle yenwo mvandoho. Yob hãne kyɛ: “Bakaa po, anyelasoɛ wɔ berɛ ma ye, kyɛ bɛpɛ ye bɛto a, okosá kɔfefɛ.” Sɛ wawa pẽ na enwu olive bakaa a, ebia ɛkɔhã kyɛ wawu. Nakoso sɛ nzue hyɛ yebo kyɛ ɔtɔ a, ye ndĩn ne sá fefɛ biekũ, na “ɔyeye mmaen kyɛ bakaa bɔ batu batɛ ɔ.”—Yob 14:​7-9.

w11 3/1 22 ¶5

“Wɔ Wora Kɔlɔ Wɔ Sa Noa Adwuma”

Yob dwirɛ ne maa yenwu kyɛ, mmenia bɔ bɛma bɛnwo atẽe maa Yehowa nwõ bɛ, kyire kyɛ bɛbrɛ bɛnwo ase, na bɛfa Yehowa akwangyerɛ bɛbɔ bɛ bra tekyɛ Yob ne, Yehowa kuro bɛ dwirɛ paa. (Yesaya 64:8) Amba, bɛbɔ bedi nahorɛ bɛma Yehowa ne, onni bɛnwo angorɛ koraa. Yeti benu biemɔ bɔ bawuwu ne, “ye wora adɔ bɛ.” Sɔ dwirɛ bɔ Yob hãne ne, ebie bɔ wasũa nwomaa wahɔ sĩɛ hyirehyirele nu. Ɔhãne kyɛ, “Hebri dwirɛ bɔ behyirele yebo “ye wora adɔ bɛ ne,” sɛ ebie komvi ba nikyeebie so serɛserɛ, anaa ye wora dɔ ebie paa a, sɔ dwirɛ ne yeɛ ne bɛfa bekyirekyire nu ɔ.” Ɛhe maa yenwu kyɛ, bɛbɔ né bɛsõ Yehowa bɔ bawuwu ne, nna kyɛ Yehowa kae bɛ mbaen, na mmom ye wora adɔ bɛ, yeti okotingyé bɛ.

Bible Nu Dwirɛ Titire

it-2 905 ¶2

Wawoɛ

Sɛ eyia fité ngyerɛmɔ na ɛnate nu a, enwu kyɛ wɔ wawoɛ ne te piri kãa, nakoso odwu eyia a, na wayɛ kãamba bie. Afei sɛ odwu nɔsoa na eyia ne kwaatɔ a, ná wasa wayɛ piri, nakoso ɔngyɛ na watu wamini. Sɔ ala yeɛ sona ngõa te hɔ ɛne. Sɛ bɛwo ebie a, ɔngyɛ ná wanyi, nakoso ɔnate kyɛ yɛ ngõa te tikaa nati, ɔngyɛ ná wawu.—Yob 14:​1, 2.

NOVEMBER 13-19

NYAMEƐ DWIRƐ NANU ASUADEƐ | YOB 15-17

“Sɛ Ɛkyekye Ebie Wora A, Nnésuesũa Elifase”

w05 9/15 26 ¶4-5

Nnɛmaa Ebiala Sɛkye W’adwene

Elifase nyane yenwo atẽe ne Yob dwudwole pɛen nzã. Enu biala nu ne, ɔhãne edwirɛ bie bɔ okyire kyɛ, Yehowa te ebie bɔ ye dwirɛ yɛ se, na bɛbɔ bɛsõ ye ne po, bɔ bɛkɔyɛ biala nzɔ yenye. Maa yɛnea edwirɛ bɔ ɔhãne ne bie. Ɔhãhyirele Yob kyɛ: ‘Nyameɛ somvoɛ mɔ po, ɔmva yenwo ndo bɛ so, na ye abɔfo mɔ koso, onwu mvomsoɛ wɔ bɛnwo.’ (Yob 4:18) Afei, ɔhãne Nyameɛ nwo dwirɛ kyɛ: “Ye krongronfoɛ po, ɔmva yenwo ndo bɛ so, yeɛ anwuro po yenwo nde wɔ yenye so.” (Yob 15:15) Yeɛ osá bisale Yob kyɛ: “Sɛ ɛtengyɛ a, ɔfa Nyameɛ nwo nzu?” (Yob 22:3) Edwirɛ bɔ Elifase hãne ne, né Bildade koso ne ye yɛ adwene. Yeti nea bɔ ɔhãne ɔ: ‘Ɛsraen po, ɔnda hyireinn wɔ yenye so, yeɛ nzramaa mɔ po bɛnwo nde wɔ Nyameɛ nyunu.’—Yob 25:5.

Odikyɛ yɛnea yé, na yannya sɔ adwene bɔ benyane ne bie. Ofikyɛ, sɛ yenya sɔ adwene ne bie a, ɔkɔmaa yekosusu kyɛ bɔ yɛkɔyɛ biala nzɔ Nyameɛ nye. Ɛhe kɔhora kɔsɛkye adamvoa bɔ yɛne Yehowa le ye ne. Sɛ ebie nya sɔ adwene ne bie a, aso edé di kyɛ ɔkɔfa Yehowa afutue kɔyɛ adwuma, mmerɛ bɔ wayɛ nikyeebie bɔ ɔttemayé ne? Yemia ɔse kyɛ bɔ ɔkɔyɛ biala nzɔ Yehowa yenye, yeti ongotie ye afutue, na ebia ‘ɔkɔfɛ yeso yaa’ po. (Anyandera 19:3) Sɛ ebie yɛ sɔ a, okyire kyɛ ollé anwobrɛaseɛ, na ɛhẽne kɔhora kɔsɛkye adamvoa bɔ ɔne Yehowa le ye ne.

w15 2/15 9 ¶16

Suesũa Kyɛbɔ Né Yesu Brɛ Yenwo Ase, Na Ɔdwene Mmenia Nwo Ne

Kã edwirɛ bɔ ɔyɛ fɛ kyire bɛbɔ b’abanu abu ne. Sɛ yɛdwene mmenia nwo a, ɔkɔboka yɛ maa ‘yɛkɔkyekye bɛbɔ b’abanu abu nemɔ wora.’ (1 Tɛs. 5:14) Yede, sɛ yɛpena kyɛ yɛkyekye bɛ wora a, edwirɛ beni yeɛ yɛkɔhora yɛkɔhã ɔ? Sɛ yɛkã edwirɛ bie bɔ okyire kyɛ yɛdwene bɛnwo a, ɔkɔmaa b’ahõne kɔtɔ bɛ kunu. Afei sɛ yenwu subaen pá bie wɔ bɛnwo, anaa bɛkora bɛyɛ nikyeebie a, odikyɛ yɛkamvo bɛ, na yɛmaa benwu kyɛ bɛso le mvasoɛ ma Yehowa. Má benwu kyɛ Yehowa dɔ bɛ, na ɛhẽne ati yeɛ wahwẽ bɛ wawa ye asafo nanu ne. (Yoh. 6:44) Biekũ koso, yɛkɔhora yɛkɔboka bɛ maa bekonya gyidie kyɛ, “bɛbɔ bɛ wora abɔ,” ɔne “bɛbɔ bɛ kra aboto” ne, Yehowa dwene bɛnwo paa. (Edw. 34:18) Bɛbɔ b’abanu abu ne, sɛ yɛkã edwirɛ bɔ ɔyɛ fɛ sɔ yekyire bɛ a, ɔkɔmaa b’ahõne kɔtɔ bɛ kunu.—Any. 16:24.

Bible Nu Dwirɛ Titire

w06 3/15 14 ¶11

Yob Nwomaa Nanu Dwirɛ Titire

7:​9, 10; 10:21; 16:22—Sɛ ɛnea edwirɛ bɔ Yob hãne ne a, aso né onné nni kyɛ Yehowa kotingyé bɛbɔ bawuwu ne anaa? Sɔ dwirɛ bɔ Yob hãne ne, né ɔfa bɔ ɔkɔto ye kyẽabie nanwo. Yede, nzu deinn yeɛ né ɔpena kyire ɔ? Ebia né ɔpena kyire kyɛ sɛ owu a, ye nnamvo nemɔ ngonwu ye kõ. Ofikyɛ né osusu kyɛ, sɛ owu a ongosa ngɔwa y’awuro berɛ, na ebiala ngɔbɔ ye dumaa kõ, kodwu kyɛ Yehowa mmerɛ bɔ wahyɛ ne kɔsõ ɔ. Afei koso, ebia bɔ né Yob pena kyire yeɛ ole kyɛ, sɛ ebie kɔ ewue kumaa nu a, ɔngɔhora ngɔdwɔso kõ. Sana Nyameɛ ala, ná wahora watingyé sona ne. Yeti sɛ yɛnea edwirɛ bɔ ɔhãne ye wɔ Yob 14:​13-15 ne a, ɔmaa yenwu kyɛ né ole gyidie paa kyɛ Yehowa kotingyé bɛbɔ bawuwu ne.

NOVEMBER 20-26

NYAMEƐ DWIRƐ NANU ASUADEƐ | YOB 18-19

“Sɛ Eliema Kristoniɛ Bie Kɔ Ɔhaw Nu A, Nnɛye Yenu”

w22.01 16 ¶9

Nzu Yeɛ Yesũa Yefi Aworabɔlɛ Bɔ Yesu Lili Nanu Ɔ?

Bɛbɔ bɛ wora abɔ ne, ɛkɔhora kɔkyekye bɛ wora. Mmerɛ bɔ Yesu nwuni kyɛ Maria ne Maata besũ ne, osũni bie. Nakoso nna ɛhẽne angome yeɛ ɔyɛle ɔ. Mmerɛ bɔ né bedwudwo ne, ɔtole ye boase tiele bɛ, na ɔhãne edwirɛ bie fa kyekyele bɛ wora. Yɛ koso, yɛkɔhora yekosuesũa bɔ Yesu yɛle ne. Dan te asafo nu panyi bɔ ofi Australia, ɔhãne kyɛ: “Mmerɛ bɔ me ye wuli ne, aliemaamɔ bokale me paa. Daa biala né bɛba m’awuro, na medwudwo a né bɛyɛ asoɛ betie. Sɛ me wora bɔ na mesu a, né benzi me atẽe, na né benngua me nyunu ase. Afei koso, sɛ né ɔyɛ se ma me kyɛ ngonwuzi me kar, ngoli dwaa, anaakyɛ ngɔtõ aleɛ a, né bɛboka me. Biekũ koso, né bɛtaa ne me bonu bɔ mbaeɛ. Bɛmaa nwuni kyɛ, bɛte nnamvoa bɔ bekuro me dwirɛ, na ‘m’amaneɛnwunɛ nu ti yeɛ bɛwole bɛ ɔ.’”—Any. 17:17.

w21.09 30 ¶16

Mmerɛ Bɔ Batu Ebie Bɔ Ekuro Ye Dwirɛ Bafi Asafo Nanu Ɔ

Sɛ betu ebie befi asafo nanu a, sɔ mmerɛ ne paa yeɛ odikyɛ ɛyere wɔnwo boka ye abusũafoɛ bɔ bɛwɔ asafo nanu ne, na ɛhyɛ bɛ ngunaen ɔ. (Heb. 10:​24, 25) Sɛ betu ebie befi asafo nanu a, ɔtɔ mmerɛ bie a, y’abusũafoɛ bɔ baha ne kora nya adwene kyɛ ebiala aye bɛ ama. Yeti nnɛyɛ nikyee biala bɔ ɔkɔmaa bekonya sɔ adwene ne llé! Bɛbɔ odikyɛ yɛyere yɛnwo yɛboka bɛ paa yeɛ ole, ngwalaa bɔ batu b’awofoɛ bafi asafo nanu ne. Betuli Maria ahũ fili asafo nanu, na mmerɛ bɔ betuli ye ne, ɔyakyili abusũa ne berɛ hɔle. Maria hãne kyɛ: “Aliemaa biemɔ wale yɛ awuro, bɛtõne aleɛ bɛmane yɛ, na bɛ ne yɛ bɔle nu yɛle abusũa sõen. Mmerɛ bɔ né mesu ne, ná bɛ koso besu bie. Afei koso, mmerɛ bɔ ebiemɔ hãne menwo dwirɛ bie bɔ ɔtte nahorɛ ne, aliemaamɔ hãne bie mane me. Bɔ bɛyɛle ne bokale me maa ngora ngyinane ɔhaw ne noa.”—Rom. 12:​13, 15.

w90 9/1 22 ¶20

Sɛ bɛkã kyɛ ebie tte asafo nu panyi, anaa asafo nu somvoɛ kõ a, ɔkora maa y’abanu bu. Sɛ ebia ye bɔbɔ yeɛ ɔhãne kyɛ ɔngɔyɛ kõ po a, ɛhẽne koso y’abanu kɔhora kobu. Sɛ ebie tte asafo nu panyi, anaa asafo nu somvoɛ kõ a, ongyire kyɛ batu ye bafi asafo nanu. Yeti sɛ mbanyi nemɔ nwu kyɛ y’abanu abu a, odikyɛ bɛfa Bible ne bɛboka ye. Sɛ bɛyɛ sɔ a, okyire kyɛ bɛdɔ ye. (1 Tɛsalonikafoɛ 5:14) Afei koso, odikyɛ bɛmaa onwu kyɛ yenwo hia paa wɔ asafo nanu. Ebia sona ne yɛle nikyeebie bɔ ɔttemayé maa bɛfale afutue bɛmane. Sɛ sɔ yeɛ edwirɛ ne te po a, odikyɛ ɔbrɛ yenwo ase, ná ɔfa afutue ne yɛ adwuma. Sɛ ɔyɛ sɔ a, ebia ɔngɔhyɛ bɛkɔhora bɛkɔfa asɛdeɛ bekowura ye sa wɔ asafo nanu biekũ.

Bible Nu Dwirɛ Titire

w94 10/1 32

Nnɛkã Edwirɛ Biala Bɔ Okobu Ebie Abanu Ɔ

Né Yob hia ebie bɔ ɔkɔkyekye ye wora ɔ. Nakoso edwirɛ bɔ Elifase ne ye nnamvo nemɔ hãne ne, obuli y’abanu. Bɛhãne kyɛ Yob ayɛ bɔne bie wafea, na ɛhẽne ati yeɛ onwu amaneɛ ne. (Yob 4:8) Bible ngyerɛaseɛ bie hãne kyɛ: “Bɔ né ohia Yob paa yeɛ ole kyɛ, ebie kɔhã edwirɛ bie kɔfa kɔkyekye ye wora ɔ. Nakoso edwirɛ pembẽ bɔ ye nnamvo nemɔ hãne ne, wannya mvasoɛ biala wamvi so.” Edwirɛ bɔ Elifase ne ye nnamvo nemɔ hãne ne, ɔmaa Yob abanu buli alaa maa ɔfale aworabɔlɛ hãne kyɛ: “Kyinzu koraa yeɛ ɛmɔkɔyakyi me halɛ ɔ? Kyinzu koraa yeɛ ɛmɔkɔyakyi edwirɛ bɔ ɛmɔkã bɛteetee me ye ɔ?”—Yob 19:2.

Bɛbɔ yɛne bɛsõ Nyameɛ ne, odikyɛ yɛnea yé na yannga edwirɛ biala bɔ okobu bɛ abanu ɔ. (Fatoto Deuteronomi 24:15 nanwo.) Anyandera bie bɔ ɔwɔ Bible nanu kã kyɛ: ‘Sona noa dwirɛ kora maa ebie wu, anaa onya ngõa, na bɔ okuro edwudwolɛ ne, onya yenwo amaneɛ.’—Anyandera 18:21.

NOVEMBER 27–DECEMBER 3

NYAMEƐ DWIRƐ NANU ASUADEƐ | YOB 20-21

“Nna Esikaa Bɔ Ebie Le Ye Ne, Yeɛ Okyire Kyɛ Ɔte Teneneeniɛ Ɔ”

w07 8/1 29 ¶12

Aso “Ele Anwonyadeɛ Wɔ Nyameɛ Nu?”

Yesu maa yenwu kyɛ, sɛ ebie le anwonyadeɛ wɔ nyameɛ nu a, ongyire kyɛ ole esikaa pẽe. Yeti nna anwonyadeɛ bɔ yekonya ye wɔ asetena nu, anaa nningyein bɔ yɛkɔfa yɛkɔgyegye yɛnye ne, yeɛ odikyɛ yɛmaa yenwo hia yɛ ɔ. Na mmom, nningyein bɔ yɛle ye wɔ asetena nu ne, odikyɛ yɛfa yɛyɛ nikyee bɔ ɔkɔmaa yɛne Yehowa adamvoa nanu kɔyɛ se ɔ. Sɛ yɛyɛ sɔ a, yeɛ Nyameɛ nwu yɛ kyɛ yele anwonyadeɛ pẽe ɔ. Nzuati yeɛ yɛkã sɔ ɔ? Ofikyɛ sɛ yɛyɛ sɔ a, ɔmaa yenya nhyiraa pẽe yefi Nyameɛ berɛ. Yemia Bible ne po kã kyɛ: “AWURADE nhyiraa yeɛ ɔma sona nya yenwo ɔ, na ɔmva aworabɔlɛ biala mmoka so.”—Anyandera 10:22.

Bible Nu Dwirɛ Titire

w95 1/1 9 ¶19

Ɛmɔsi Abɔnzam Atẽe!

Satan nate Elifase ne Sofa so hãne edwirɛ bie hyirele Yob. Sɔ dwirɛ bɔ bɛhãne ne, né ‘ɔha ye paa,’ nakoso né odikyɛ omia yenye gyina yenoa. (Yob 4:​13-18; 20:​2, 3) Edwirɛ bɔ bɛhãne nati, ɔmaa Yob lili ‘aworabɔlɛ,’ otutuli “edwirɛ fumfum,” na “ahunundetelɛ” tɔle ye so. (Yob 6:​2-4; 30:​15, 16) Elihu de, ɔyɛle asoɛ tiele Yob. Afei koso, ɔtole ye boase bokale Yob maa ɔtele yebo kyɛ, ɔhaw bɔ ɔfa nu ne, nna Yehowa yeɛ wafa wawa ye so ɔ. Sɔ ala yeɛ ɛnnɛ koso, asafo nu mbanyi bɔ bele aliemaamɔ nwo aboterɛ ne yɛ ɔ. Sɛ ebie nwu amaneɛ a, bɛmva mako bengua ye kena nu, kyire kyɛ bɛnga edwirɛ bɔ ɔkɔyɛ sona ne yea ɔ. Na mmom besuesũa Elihu, bɛto bɛ boase betie sona ne, na bɛfa Bible ne bɛboka ye. Sɛ bɛyɛ sɔ a, ná waayɛ tekyɛ bɔ bɛfa ngoo begua sona ne kena nu ne, na ɛhẽne maa y’ahõne tɔ ye kunu. (Yob 33:​1-3, 7; Yakobo 5:​13-15) Mmerɛ bɔ Yob hãne kyɛ: Bɛnate “laleɛ,” ɔne “nyekyire” so amaa esuroen ahã ye ne, Elihu bokale ye maa onyane awerɛkyekyerɛ. Sɔ ala yeɛ ɛnnɛ koso, bɛbɔ adwenedwene ahyɛ bɛso wɔ asafo nanu ne, yɛkɔhora yɛkɔfa Bible ne yɛkɔkyekye bɛ wora ɔ.—Yob 7:14; Yakobo 4:7.

DECEMBER 4-10

NYAMEƐ DWIRƐ NANU ASUADEƐ | YOB 22-24

“Aso Sona So Le Mvasoɛ Ma Nyameɛ?”

w05 9/15 27 ¶1-3

Nnɛmaa Ebiala Sɛkye W’adwene

Ebiemɔ kã kyɛ Nyameɛ dwirɛ yɛ se, na ɔmva sona nyɛ huu. Sɔ ala yeɛ Elifase dwirɛ bɔ ɔtɔ so nza nanu ne, ɔhãne ne ɔ. Obisale kyɛ: “Aso dasaniɛ nwo kɔhora konya mvasoɛ kɔma Nyameɛ anaa? Nworɛniɛ po, aso yenwo le mvasoɛ ma ye anaa?” (Yob 22:2) Elifase dwirɛ bɔ ɔhãne ne, né ɔpena kyire kyɛ Nyameɛ mva sona nyɛ huu. Bildade koso hãne edwirɛ bie bɔ ɔtekyɛ Elifase deɛ nala ɔ. Obisale kyɛ: “Ɔkɔyɛ sɛɛ né dasaniɛ watengyɛ wɔ Nyameɛ nyunu? Sona bɔ brasua awo ye ne, ɔkɔyɛ sɛɛ né yenwo ate?” (Yob 25:4) Sɔ dwirɛ bɔ bebisale ne, bɔ né bɛpena bekyire yeɛ ole kyɛ, Yob mia bɔne wɔ yenwo, yeti ɔkɔyɛ sɛɛ na wahora wabɔ bra maa wasɔ Nyameɛ nye?

Ɛnnɛ koso, ebiemɔ susu kyɛ mvasoɛ biala nne bɛso. Nzu yeɛ ɔmaa benya sɔ adwene ne ɔ? Ebia atẽe bɔ bɛfale so bɛtetele bɛ, ɔne ɔhaw bɔ bafa nu wɔ b’asetena nu nati, yeɛ wamaa banya sɔ adwene ne ɔ. Ebiemɔ koso wɔ berɛ a, ɔnate nekaa bɔ befi nati, ɔmaa mmenia mva bɛ nyɛ hwee. Satan ne ye sunzummɔne nemɔ koso, bɛkora maa ebie nya sɔ adwene ne. Yemia bɔ bekuro hɔ ala ɛne. Ɛyɛ a, bɛmaa sona nya adwene kyɛ bɔ ɔkɔyɛ biala nzɔ Nyameɛ nye. Ɔba sɔ a, ɔmaa sona ne abanu bu, na ɔyɛ basaa. Yeti sɛ wannea yé a, ngakãngakã okofi asafo nanu, anaa ɔkɔhwẽ yenwo kofi Nyameɛ teasefoɛ nanwo.—Hebrifoɛ 2:1; 3:12.

Ebia mmerɛ bie bɔ wapɛ nu ne, né ɛte abrandeɛ, na né wɔnwo yɛ se. Nakoso ebia kesaalae abɔ aworowaa, anaa anwonyerɛ teetee wɔ, yeti nna nikyee biala yeɛ ɛkora yɛ ɔ. Ɔba sɔ a, bɔ ɛkora yɛ wɔ asafo nanu ɛnnɛ ne, sɛ ɛfatoto dáa deɛ nanwo a, ɛkɔhã kyɛ ɔte kãa bie. Mmerɛ biala bɔ ekonya sɔ adwene ne, kae kyɛ, Abɔnzam ne ye sunzummɔne ne, bɔ bekuro hɔ ala ɛne. Bɛpena kyɛ enya adwene kyɛ bɔ ɛkɔyɛ biala, Nyameɛ nye nzɔ. Ɛyɛ a nnénya sɔ adwene ne llé.

w95 2/15 27 ¶6

Edwirɛ bɔ Yob nnamvo nza nemɔ hãne ne, ɔmaa ye wora bɔle paa, na nna Nyameɛ yeɛ ɔmaa bɛhãne sɔ dwirɛ ne ɔ. Wɔde, tie bɔ Elifase hãne ɔ: “Nyameɛ somvoɛ mɔ po, ɔmva yenwo ndo bɛ so.” (Yob 4:18; 22:​2, 3) Bɔ ɔhãne ne kyire kyɛ, sɛ Yob yɛ bɔ ɔte pá oo, ɔyɛ bɔ ɔttemayé oo, ɔmva Yehowa nu. Sɔ dwirɛ ne, né nahorɛ kõmaapɛ po nne nu. Yeti ɔwale sɔ ne, ɔmaa Yob abanu buli. Yenné yenni kyɛ, edwirɛ foforɛ bie kɔhora kobu ebie abanu kɔtra sɔ. Ofikyɛ edwirɛ bɔ bɛhãne ne, né ɔte musue. Yeti, ɔnyɛ nwanwa kyɛ Yehowa hwili Elifase ne ye nnamvo nyɔ nemɔ nyunu ɔ. Yehowa hãne kyɛ: “Mafɛ wɔ ne wɔ damvo nyɔ nemɔ so yaa piri paa, ofikyɛ edwirɛ bɔ ɛmɔhã bɛfale menwo ne, né ɔtte nahorɛ.” (Yob 42:7)

w03 4/15 14-15 ¶10-12

Má Yehowa Nye Gye

Satan hãne kyɛ, nna ɔdɔ bɔ Yob le ma Yehowa nati yeɛ ɔsõ ye ɔ. Sɔ dwirɛ bɔ Satan hãne ne, ɔfa yemu yɛnwo. Bɔ ɔmaa yɛkã sɔ yeɛ ole kyɛ, Satan hãhyirele Yehowa kyɛ: “Bɔ sona le ye amukoraa, okuro kyɛ ɔkɔmaa ɔkɔhwere ye, ná wanya ngõa.” (Yob 2:4) Satan ammɔ Yob dumaa wɔ tworɔnzɛm nanu, na mmom ɔnwa sona. Ɛhe kyire kyɛ sɔ dwirɛ ne mva Yob ngome nwo, na mmom ɔfa yenu biala nwo. Yede, edwirɛ bɔ Satan hãne ne, nzu yeɛ odikyɛ ɛyɛ wɔ yenwo ɔ? Bɔ odikyɛ ɛyɛ ne, yeɛ Yehowa ahã yenwo dwirɛ wɔ Anyandera 27:11 ne. Yehowa nwa sɛ ɛyɛ sɔ nikyee ne a, ɛkɔmaa okonya mmuayɛɛ kɔma Satan bɔ odwudwo tia ye ne. Wɔde susu ɛhe anwo nea o, Yehowa le tumi tra ebiala, nakoso wama w’atẽe kyɛ ɛyɛ nikyeebie fahyire kyɛ bɔ Satan hãne ne, ɔtte nahorɛ. Amba, Yehowa se paa kyɛ ɛkɔhora koli nahorɛ kɔma ye! Nakoso, edé di kyɛ bɔ Yehowa hãne ne, ɛkɔhora kɔyɛ? Yóo ɛkɔhora, ofikyɛ Yob hora yɛle. (Yob 2:​9, 10) Nna Yob ngome yeɛ ɔhora yɛle ɔ, na mmom Yesu koso hora yɛle sɔ. Mmeni pẽe koso ahora ayɛ bɔ Yob yɛle ne bie, na benu biemɔ po te mmrandeɛ ne ndaluwa. (Filipifoɛ 2:8; Nyekyire 6:9) Yeti wɔ koso, ɛkɔhora kɔyɛ bɔ Yehowa hãne ne. Yede, sɔ dwirɛ bɔ wadwɔso ne, nwa yeɛ ɛtá yesi ɔ? Yehowa, anaa Satan? Ɛngɔhora ngɔhã kyɛ egyi afĩa. W’abrabɔ, ɔne bɔ ɛkɔyɛ ye wɔ w’asetena nu ne, yeɛ okohyire kyɛ ɛtá Yehowa sĩ, anaakyɛ ɛtá Satan sĩ ɔ. Yebisa kyɛ, benu nwa yeɛ ekuro ɔ?

Yehowa Dwene Wɔnwo

Sɛ Yehowa nwu kyɛ ɛtá yesĩ a, ɔmaa yenye gye anaa? Kae kyɛ, Satan hãne kyɛ nna ɔdɔ bɔ yele yɛma Yehowa nati yeɛ yɛsõ ye ɔ. Nakoso mmeni pẽe yeɛ bahora bali nahorɛ bama Yehowa ɔ. Ɛhe maa yenwu kyɛ, edwirɛ bɔ Satan hãne ne, Yehowa anya yenwo mmuayɛɛ wama ye dada. Yeti nna ɛnnɛ yeɛ yɛbaanwu kyɛ edwirɛ bɔ Satan hãne ne, ɔtte nahorɛ ɔ. Nakoso, Yehowa pena kyɛ wɔ koso ɛyɛ nikyeebie, kyɛbɔ ɔkɔyɛ a, okonwu kyɛ ɛtá ye sĩ ɔ. Yesu po hãne kyɛ: “Ɛmɔ Baba bɔ ɔwɔ nyameɛso ne, onguro kyɛ ngwalaa hemɔ nu kõ po komini ɔ.”—Mateo 18:14.

Bɔ ɛkɔyɛ ye wɔ sɔ dwirɛ nanwo ne, yenwo hia Yehowa paa. Bible ne po maa yenwu kyɛ, sɛ yɛyɛ nikyee bɔ ɔte pá a, ɔmaa Yehowa nye gye, na sɛ yɛyɛ bɔ ɔttemayé koso a, ɔmaa ye wora bɔ. Bɔ ɔmaa yenwu sɔ yeɛ ole kyɛ, mmerɛ bɔ Yisraelfoɛ nemɔ hɔleso yɛle Yehowa so asoserɛ ne, ye “wora bɔle.” (Edwein 78:​40, 41) Afei koso, kora bɔ Yehowa fa nzue sɛkye mmenia bɔ né bɛwɔ Nowa aberɛ so ne, Yehowa nwuni kyɛ, “kuro sona amumuyɛɛ asõne pẽe wɔ aseɛ ye aso,” yeti “ɔyɛle ye yea soma.” (Gyenesise 6:​5, 6) Wɔde, susu ɛhe anwo nea. Yehowa bɔ ɔbɔle yɛ ne, sɛ ɛyɛ nikyee bɔ ɔttemayé a, ɔmaa ye wora bɔ paa. Ɛhe ngyire kyɛ Yehowa ngora nhyɛ yenwo so. Na mmom, Yehowa dwene wɔnwo, na ɔpena kyɛ osi wɔ yé. Ɛhẽne ati yeɛ sɛ ɛyɛ nikyee bɔ ɔttemayé a, ná ye wora abɔ ne. Nakoso kae kyɛ, sɛ ɛyɛ nikyee bɔ ɔte pá de a, ɔmaa Yehowa nye gye. Nikyee tibɔ yenye gye yeɛ ole kyɛ, ɛmaa onya mmuayɛɛ ma Satan. Nakoso, nna ɛhẽne ngome ti ɔ, na mmom ɛmaa onya nikyee bɔ okogyina so koyira wɔ ɔ. Yemia Yehowa de, bɔ okuro ala yeɛ ole kyɛ okoyira bɛbɔ bɛpena ye boso ne. (Hebrifoɛ 11:6) Ɛhe kyire kyɛ Yehowa dɔ yɛ paa!

Bible Nu Dwirɛ Titire

w04 7/15 21-22

Sɛ Yɛfa Botayɛɛ Bie Yesie Yɛnye So Wɔ Yehowa Sõen Nu A, Ɔhyɛ Ye Animnyam

Wɔde susu kyɛbɔ Yehowa bɔle nningyein nanwo nea. Yehowa fa siele yenye so kyɛ ɔkɔmaa aseɛ ne kɔyɛ nyemene, kyɛbɔ ɔkɔyɛ a, sona kɔhora kɔtena so ɔ. Yede, nzu yeɛ ɔbokale ye maa ɔhora dwuli bɔ né wafa wasie yenye so nanwo ɔ? Mmerɛ bɔ né Yehowa bɔ nningyein ne, né Bible ne taa kã kyɛ, “Aleɛ sane, na aleɛ hyene.” Sɔ dwirɛ ne maa yenwu kyɛ, né wahyehyɛ nikyee biala pɛpɛɛpɛ. (Gyenesise 1:​5, 8, 13, 19, 23, 31) Na kora bɔ kyẽa ne kɔhyɛ yebo ne, né Yehowa se nikyee pɔtẽe bɔ ɔkɔbɔ ye wɔ sɔ kyẽa nanu ɔ. Ɔnate kyɛ né wayɛ nikyee biala nwo nhyehyɛɛ nati, ɔhora bɔle nningyein, kyɛbɔ né wafa wasie yenye so ne. (Nyekyire 4:11) Ɛhe maa Yob bɔ ɔtenane ase tete ne hãne Yehowa nwo dwirɛ kyɛ, “bɔ okuro kyɛ ɔyɛ biala, ɔyɛ.” (Yob 23:13) Mmerɛ bɔ Yehowa “nwuni kyɛ nningyein bɔ wayɛ ne amukoraa te pá paa” ne, yenye gyele!—Gyenesise 1:31.

Yɛkoso, sɛ yɛfa nikyeebie yesie yɛnye so, na yenya adwene kyɛ, kyɛbɔ ɔte biala odikyɛ yedwu yenwo a, ɔboka paa. Yede, bɔ Yehowa yɛle ne, sɛɛ yeɛ ɔkɔboka yɛ maa yɛkɔyɛ sɔ ɔ? Kora bɔ Yehowa bɔ aseɛ ne, né ɛso te sesakaa. Nakoso Yehowa fasiele yenye so kyɛ ɔkɔmaa ɔkɔyɛ nyemene, na wahyɛ ye animnyam. Na sɔ pɛpɛɛpɛ yeɛ ɔyɛle ɔ. Sɔ ala yeɛ yɛkoso, sɛ yɛfa nikyeebie yesie yɛnye so a, odikyɛ yɛdwenedwene mvasoɛ bɔ yekonya yekofi nu nanwo. Sɛ yɛyɛ sɔ a, ɔkɔmaa yɛkɔyere yɛnwo kyɛ yekodwu yenwo. Bɔ yɛkã ye, Tony bɔ né wali afoɛ buru ne ngõna (19) ne yɛle bie. Mmerɛ bie, ɔhɔle Bɛtɛl bie bɔ ɔwɔ Europe, na ɔɔneaneane berɛ. Na kyɛbɔ né ɛberɛ si yɛ nyemene ne, ɔhãne kyɛ né ye wora ngɔfi ye llé. Mmerɛ bɔ ɔwale awuro ne, ɔhãne ye wɔ ye tianu kyɛ, ‘Kyɛbɔ ɛbrɛ si yɛ nyemene ne de, sɛ ebie yɛ adwuma wɔ brɛ a yenye kɔgye paa.’ Daa né ɔdwenedwene sɔ dwirɛ nanwo. Yeti Tony fasiele yenye so kyɛ, ɔkɔɔyɛ adwuma wɔ berɛ. Afei koso, nikyee bɔ ɔkɔboka ye maa ɔkɔɔyɛ adwuma wɔ berɛ ne, daa né ɔdwenedwene yenwo. Afoɛ pẽe sĩ ne, bɛtole asaa bɛfrɛle ye kyɛ ɔɔyɛ adwuma wɔ Bɛtɛl, na ɛhẽne maa yenye gyele paa.

DECEMBER 11-17

NYAMEƐ DWIRƐ NANU ASUADEƐ | YOB 25-27

“Ɔnzɛkyɛ Yɛyɛ Krongron Tekyɛ Abɔfo Kora Na Yahora Yali Nahorɛ”

it-1 1210 ¶4

Nahorɛlilɛ

Yob tenane ase wɔ Mose aberɛ so, na sɔ mmerɛ ne, né Yosef awu. Bible ne kã Yob nwo dwirɛ kyɛ: “Né ye bra te sannwuu, na né ɔtengyɛ. Ɔte sona bɔ né osuro Nyameɛ ɔ, ná ɔhwẽne yenwo fili bɔne nwo.” (Yob 1:1; nea JOB.) Mmerɛ bie Yehowa ne ye abɔfo nemɔ yiale nu, na Satan koso hɔle berɛ bie. Ɔwale sɔ ne, Yehowa bisale Satan edwirɛ bie, na né ɔfa nahorɛ bɔ Yob di ma ye nanwo. Satan yele ye noa kyɛ, nna adwene pá yeɛ Yob fa sõ Yehowa ɔ. Bɔ né ɔpena kyire yeɛ ole kyɛ, nna ɔdɔ bɔ Yob le ma Yehowa nati yeɛ ɔsõ ye ɔ, na mmom nningyein bɔ Yehowa afa ama ye nati ɔ. Bɔ né Satan kã ala yeɛ ole kyɛ, nahorɛ bɔ Yob di ma Yehowa ne, offi y’ahõne nu. Yeti Yehowa mane atẽe maa Satan sole Yob neane. Satan maa Yob agyapadeɛ mukoraati fili yesa, na ohũhũni ye mma nemɔ koso. Nakoso Yob hɔle so lili nahorɛ mane Yehowa, na né oté gyĩ ye gya so. (Yob 1:6–2:3) Afei de, Satan hã ma yetie a, ɔnwa anwonyerɛ bɔlle Yob, ɛhẽne ati yeɛ oté gyi ye gya so ne. (Yob 2:​4, 5) Yeti Satan maa anwonyerɛ bie bɔ ɔyɛ yea paa bɔle Yob. Ɔye koso hãhyirele ye kyɛ, ɔhã musue dwirɛ tia Nyameɛ. Afei, ye nnamvo nemɔ koso dwudwo tiale ye. Bɛhãne kyɛ wayɛ bɔne watia Nyameɛ, na ɛhẽne ati yeɛ onwu amaneɛ sɔ ne. (Yob 2:​6-13; 22:​1, 5-11) Nakoso, ɔmva yenwo ne bɔ Abɔnzam fa wale Yob so ne, osili ye hue kyɛ ɔkɔhɔ so koli nahorɛ kɔma Yehowa. Yob hãne kyɛ: ‘Na me nahorɛlilɛ de, mengɔyakyi nu kodwu kyɛ ngowu ɔ! Ngotira me tenenee nu pindinn bɔ mengɔyakyi nu ɔ, na me ngõa nu bɔ nde ye, me tiboa mmua me fɔ.’ (Yob 27:​5, 6) Nahorɛ bɔ Yob li mane Yehowa ne maa yenwu kyɛ Satan te ngondombo.

w19.02 3 ¶3-5

Má W’abrabɔ Yɛ Sannwuu!

Bɛbɔ bɛsõ Yehowa ne, sɛ bɛkã kyɛ bɛ abrabɔ te sannwuu a, nzu yeɛ okyire ɔ? Bɔ okyire yeɛ ole kyɛ, befi b’ahõne mukoraati nu dɔ Yehowa, na bɛyɛ bɔ okuro daa biala. Edwirɛ sannwuu ne, maa yɛnea kyɛbɔ Bible ne kyirekyire nu ɔ. Wɔ Bible nanu ne, sɛ bɛkã kyɛ nikyeebie te “sannwuu” a, okyire kyɛ nikyee ne te apɔ, odimũ, anaa ɔte mumua. Wɔde maa yɛnea nikyeebie bɔ ɔhɔle so wɔ Yisrael maen nanu ɔ. Né bɛfa ngaka bɛbɔ afɔleɛ bɛma Yehowa. Na mmraa ne hãne kyɛ, bɛfa kaka bɔ ɔte apɔ yeɛ bɛbɔ afɔleɛ ɔ. (Lew. 22:​21, 22) Yeti, sɛ né kaka bie gya nu abu, ye so kõ nne berɛ, ye nye kõ asĩ, anaa ɔnde apɔ a, né ɔnzɛkyɛ Yisraelniɛ fa bɔ afɔleɛ. Bɔ né yenwo hia Yehowa paa yeɛ ole kyɛ, bɛkɔfa kaka bɔ ɔte apɔ, na nnɛen biala nne yenwo bɛkɔbɔ afɔleɛ ɔ. (Mal. 1:​6-9) Wɔde, maa yɛnea nikyee tibɔ yɛkã kyɛ sɛ nikyeebie dimũ, anaa ɔte apɔ a, yenwo hia Yehowa paa ne. Yɛbɔ yɛte sona ne po, sɛ ebia yɛkwaatɔ nikyeebie tekyɛ buuk, aduaba, ɔne ngaen a, ɛyɛ a yenguro bɔ yenwo atutu ɔ, na mmom yekuro bɔ ɔte kama paa. Sɔ ala yeɛ Yehowa koso te hɔ ɛne. Ɔpena kyɛ y’abrabɔ yɛ sannwuu, bɔ edwirɛ biala nne yenwo ɔ.

Aso ɛhe kyire kyɛ, odikyɛ yɛyɛ tekyɛ abɔfo kora, na yahora yali nahorɛ yama Yehowa anaa? Ebia yekonya adwene kyɛ bɔne wɔ yɛnwo, yeti ɔkɔyɛ sɛɛ na yahora yali nahorɛ? Wɔde maa yɛnea nningyein nyɔ bie tibɔ ɔnzɛkyɛ yenya sɔ adwene ne ɔ. Bɔ olimoa, Yehowa mva ye adwene nzie bɔne bɔ ɔwɔ yɛnwo naso. Ye dwirɛ Bible ne po kã kyɛ: “Sɛ ɛsesẽ amumuyɛɛ a, ao Yɛ Mene, ahãa nwa yeɛ ɔkɔhora kogyina ɔ?” (Edw. 130:3) Yehowa se kyɛ bɔne wɔ yɛnwo, yeti ɛyɛ a yedi mvomsoɛ. Nakoso onwu yɛ anwumvo, na ɔfa yɛ bɔne kyɛ yɛ. (Edw. 86:5) Bɔ ɔtɔ so nyɔ, Yehowa se bɔ yɛkɔhora yɛkɔyɛ, ɔne bɔ yɛngɔhora yɛngɔyɛ ɔ. Yeti onguro kyɛ yɛyɛ nikyee biala bɔ y’anwoserɛ ngɔhora ɔ. (Kenga Edwein 103:​12-14.) Yede, yɛkɔyɛ sɛɛ na Yehowa anwu yɛ kyɛ mmenia bɔ edwirɛ biala nne yɛnwo, anaa y’abrabɔ te sannwuu ɔ?

Sɛ y’abrabɔ kɔhora kɔyɛ sannwuu a, odikyɛ yenya ɔdɔ yɛma Yehowa. Odikyɛ ɔdɔ bɔ yele yɛma yɛ anwuro Baba ne, odimũ daa biala. Yeti sɛ yeyia nzɔhwɛ, na yɛkɔso yenya ɔdɔ yɛma Yehowa a, ɛhẽne yeɛ okyire kyɛ y’abrabɔ te sannwuu ɔ. (1 Abe. 28:9; Mat. 22:37)

Bible Nu Dwirɛ Titire

w16.11 9 ¶3

Yehowa Ahyehyɛ Nikyee Biala Pɛpɛɛpɛ

Sɛ yɛnea nningyein bɔ Yehowa abɔ ne a, ɔmaa yenwu kyɛ wahyehyɛ nikyee biala kama. Yeti sɛ ɛfa ebiala toto yenwo a, ɔnyɛ yé. Bible ne kã kyɛ: “AWURADE nate nworɛ so yeɛ ɔbɔle aseɛ ɔ, ɔnate ndeaseɛ so yeɛ ɔfale ewienu sɛle berɛ ɔ.” (Any. 3:19) Nningyein bɔ Yehowa abɔ ne, enu ‘kãa bie’ yeɛ yɛse ɔ, na enu “kãamba bie yeɛ yate” yenwo dwirɛ ɔ. (Yob 26:14) Nakoso, edwirɛ kãa bɔ yɛse yɛfa nzramaa, nzramaa kue, ɔne aseɛ nanwo ne, ɔmaa yenwu kyɛ amba Yehowa ahyehyɛ nikyee biala kama. (Edw. 8:​3, 4) Sɛ yɛfa nzramaa kue kõ biala a, nzramaa miliɔn pẽe yeɛ ɔwɔ nu ɔ, nakoso benu biala nate ye atẽe so pɛpɛɛpɛ. Afei ɛmɔma yɛnea aseɛ ne, ɔne nningyein biemɔ bɔ ɔtekyɛ aseɛ nakoso sona tena so a, ɔnyɛ yé ne (planets). Sɔ nningyein nemɔ koso, bɛpɛ eyia nanwo beyia, na benu biala nate ye atẽe so pɛpɛɛpɛ. Amba, sɛ yɛnea kyɛbɔ Yehowa ahyehyɛ nikyee biala kama wɔ anwuro, ɔne aseɛ he aso ne a, ɔyɛ nwanwa paa. Ɛhe maa yenwu kyɛ, Yehowa bɔ ‘ɔfale nworɛ bɔle anwuro’ ne, odikyɛ yɛsõ ye, yɛkamvo ye, na yedi nahorɛ yɛma ye.—Edw. 136:​1, 5-9.

DECEMBER 18-24

NYAMEƐ DWIRƐ NANU ASUADEƐ | YOB 28-29

“Aso Mmenia Bɔ Wɔ Dumaa Pá Tekyɛ Yob?”

w02 5/15 22 ¶19

Sɛ Ebie Nwo Kyere Ye A, Boka Ye

Bible ne maa yenwu kyɛ bɛbɔ behia mmokalɛ ne, odikyɛ yɛboka bɛ. Maa yɛnea nikyee tibɔ yɛkã sɔ ne. Sɛ né Abraham abusũa nanu kɔtrɛ a, né odikyɛ Betuel boka ye. Yakob koso, né onguro kyɛ bekosie ye wɔ Misraim anaa Egypt. Yeti ɔhãhyirele ye mma nemɔ kyɛ owu a, beesie ye wɔ Kanaan aseɛ so. Sɛ ɛhe kɔhora kɔyɛ yé a, né okohia Yosef mmokalɛ. Afei koso, sɛ né Naomi konya ebie maa ɔkɔnea y’agyapadeɛ naso kɔma ye a, né odikyɛ Rutu boka ye. Yeti mmenia nza bɔ yahã bɛnwo dwirɛ ne, né bemu behia afoforɛ mmokalɛ. Sɔ ala yeɛ ɛnnɛ koso, odikyɛ yɛboka afoforɛ ɔ. Na bɛbɔ bɛnwo yɛ anwumvo ne, bɛ paa yeɛ odikyɛ yɛyere yɛnwo yɛboka bɛ ɔ. (Anyandera 19:17) Sɛ yɛkɔhora yɛkɔyɛ sɔ a, odikyɛ yesuesũa Yob bɔ ɔtenane ase tete ne. Ofikyɛ, Yob bokale “mmenia bɔ bɛyɛ anwumvo bɔ besu bɛpena mmokalɛ, awisiafoɛ bɔ bellé bokafoɛ, ɔne mmenia bɔ né bɛwɔ anwokyere piri paa nu ne.” Afei koso, Yob ‘kyekyele akunafoɛ mmrasua wora,’ na ɔbokale ‘anyesiniwaafoɛ, ɔne mmubuafoɛ.’—Yob 29:​12-15.

it-1 655 ¶10

Ataadeɛ

Wɔ Bible nanu ne, ɔtɔ mmerɛ bie a, bɛfa ataadeɛ begyina berɛ bɛma nningyein pẽe. Ɔtɔ mmerɛ bie a, ataadeɛ bɔ ebie kowura ne, ɔmaa yenwu kue bɔ ɔwɔ nu ɔ. Yesu yɛle mvandoho bie, na ɔmaa yenwu kyɛ sɔ mmerɛ ne, sɛ né bɛkɔ atɔmvorɛ anaa wedding a, né bele ataadeɛ pɔtẽe bɔ bewura ɔ. Yeti sɛ ebie anwura sɔ ataadeɛ ne bie a, né benwu ye kyɛ ɔbokka bɛbɔ bato asaa bafrɛ bɛ naso. (Mat 22:​11, 12; nea HEADDRESS; SANDAL.) Ɛhe ati yeɛ Yesu tuli yɛ foɛ wɔ Nyekyire 16:​14, 15 kyɛ, nningyein bɔ yɛyɛ a ɔmaa mmenia nwu yɛ kyɛ yɛte nahorɛ Kristofoɛ ne, ɔnzɛkyɛ yɛyakyi ne. Sɛ yɛyakyi sɔ nningyein nemɔ yɛlɛ a, na waayɛ tekyɛ bɔ yaye y’ataadeɛ bɔ ɔmaa mmenia nwu yɛ kyɛ yɛte nahorɛ Kristofoɛ ne yagua berɛ ne. Waha kãa bie maa “Tuminiɛ Nyameɛ ye kyẽa piri ne” ba, yeti sɛ yɛyɛ sɔ a, yengonya ngõa.

w09 2/1 15 ¶3-4

Sɛ Mmenia Te Wɔ Dumaa A, Nzu Yeɛ Ɔba Bɛ Tianu Ɔ?

Sɛ bɛwo ebie a, nna ye yeɛ okyire dumaa bɔ bɛfa bɛfrɛ ye ɔ. Nakoso, sɛ mmenia kɔbɔ sona ne dumaa pá a, ogyĩ ye bɔbɔ ye so. (Anyandera 20:11) Yede bisa wɔnwo kyɛ: ‘Sɛ Yesu, anaa y’asomafoɛ nemɔ wɔ wa a, aso ahãa bɛkɔbɔ me dumaa pá anaa? Sɛ bɛte me dumaa a, ahãa nzu yeɛ ɔkɔwa bɛ tianu ɔ?’

Odikyɛ yɛto yɛ boase yesusu sɔ nzɛmmisa nemɔ nwo paa. Nzuati yeɛ yɛkã sɔ ɔ? Ofikyɛ, Ɔhene Solomon bɔ né ɔse nworɛ ne hãne kyɛ, “Dumaa pá te pá tra anwonya pẽe.” (Anyandera 22:1) Nahorɛ dwirɛ yeɛ ole kyɛ, sɛ yele dumaa pá wɔ nekaa bɔ yɛte ne a, ɔmaa mmenia bu yɛ paa. Nakoso, bɔ yenwo hia paa yeɛ ole kyɛ, yekonya dumaa pá wɔ Nyameɛ nyunu ɔ. Nzuati yeɛ ɛhẽne nwo hia paa ɔ? Ofikyɛ Nyameɛ ahyɛ bɔ kyɛ, bɛbɔ besuro ye ne, ɔkɔhworɔ bɛ dumaa wɔ ye “ngayeɛ nwomaa” nanu, na bɛkɔtena ase daa.—Malaki 3:16; Nyekyire 3:5; 20:​12-15.

Bible Nu Dwirɛ Titire

g00 7/8 11 ¶3

Ɛserelɛ Te Ayire!

Ɛnea a, yenwo hia kyɛ sona kɔsere anaa? Aso ebie asere ahyire wɔ maa wahõne atɔ wɔ kunu le? Anaa ɛkae mmerɛ bie bɔ ɛyɛle basaa, ɔnate kyɛ ebiala anzere angyire wɔ nati? Sɛ ɛsere kyire ebie a, ɔmaa wɔnye gye, na sona ne koso, yenye gye. Ɛhe maa yenwu kyɛ ɛserelɛ nwo hia paa. Ɛhẽne ati yeɛ Yob hãne ye nnamvo nemɔ nwo dwirɛ kyɛ: “Sɛ b’anyelasoɛ yie a, né mesere mekyire bɛ, na me nyunu sereserelɛ ne hyɛle bɛ nguraen.” (Yob 29:24) Yob dwirɛ bɔ ɔhãne ne maa yenwu kyɛ, né ɔsere kyire ye nnamvo nemɔ.

DECEMBER 25-31

NYAMEƐ DWIRƐ NANU ASUADEƐ | YOB 30-31

“Né Yob Abrabɔ Te Sannwuu”

w10 4/15 21 ¶8

Nnɛnea Nikyee Biala Bɔ Ɔttemayé Ɔ!

Nahorɛ Kristofoɛ koso, sɛ yɛnea nikyee bɔ ɔttemayé a, yɛkɔhora yekonya yenwo akɔnnɔ. Ɛhẽne ati yeɛ Nyameɛ dwirɛ ne tu yɛ foɛ kyɛ yɛhyɛ yɛnwo so ne. Sɛ yɛyɛ sɔ a, yɛngɔnea nikyee bɔ ɔttemayé po, na yanya yenwo akɔnnɔ. (1 Kor. 9:​25, 27; kenga 1 Yohane 2:​15-17.) Teneneeniɛ Yob maa yenwu kyɛ, sɛ ebie kɔso nea nikyeebie a, ɔmaa onya yenwo akɔnnɔ. Ɔhãne kyɛ: “Me ne me nye yayɛ apam, nzuati yeɛ brasua bɔ onnwuni bĩaa llé ne, odikyɛ menea ye wɔ ehurolɛ atẽe so ɔ?” (Yob 31:1) Yob bɔle mmɔden kyɛ ɔngɔsosɔ brasua biala nu. Nakoso, nna ɛhẽne angome yeɛ ɔyɛle ɔ, na mmom ɔbɔle mmɔden kyɛ ɔngɔmaa sɔ adwene ne ngɔwa ye tianu. Yesu koso maa yenwu kyɛ, nikyee biala bɔ ɔkɔmaa yɛkɔbɔ adwaman ne, ɔnzɛkyɛ yɛdwenedwene yenwo. Ɔhãne kyɛ: “Ebiala bɔ ɔkɔnea brasua ná yenwo kɔyɛ ye akɔnnɔ ne, né wafa ye dada wɔ y’ahõne nu.”—Mat. 5:28.

w08 9/1 11 ¶4

Susu “Bɔ Okofi Nu Kɔwa Nanwo”

Sɛ ebia ɔba wɔ tianu kyɛ ɛyɛ nikyeebie bɔ ɔttemayé a, nzu yeɛ odikyɛ ɛyɛ ɔ? Sɛ ɔba sɔ a, to wɔ boase susu “bɔ okofi nu kɔwa” nanwo. Sɛ ɛyɛ sɔ a, ɔkɔboka wɔ maa ɛkɔhwẽ wɔnwo kofi sɔ nikyee nanwo. Wɔde, yɛfa ye kyɛ ebie abɔ adwaman, ɛnea a nzu yeɛ ɔkɔhora kofi nu kɔwa ɔ? Má yɛnea bie. Ebie yeɛ ole nnaa nu anwonyerɛ tekyɛ AIDS, sona ne agyaa kɔhora kɔsɛkye, na ye tiboa kɔhora kɔteetee ye. Ebie koso yeɛ ole kyɛ, sona ne kɔhora kɔwonzɛ mmerɛ bɔ ɔyɛlle y’adwene kyɛ ɔpena kyɛ ɔwo ɔ, na ebia ɔkɔye kogua po. Afei koso, somafoɛ Pɔɔlo maa yenwu kyɛ ayieleɛ koraa ne, sona ne “ngɔhɔ Nyameɛ ahennie ne anu.”—1 Korintofoɛ 6:​9, 10.

w10 11/15 5-6 ¶15-16

Fa Nyameɛ Dwirɛ Ne Bɔ Wɔ Bra

Ɛnea a, mmerɛ beni paa yeɛ ɔkɔhora kɔyɛ se kɔma wɔ kyɛ ekoli nahorɛ kɔma Yehowa ɔ? Aso ɔte mmerɛ bɔ ɛwɔ mmenia nu, anaa mmerɛ bɔ wɔ ngome ewura nekaa bie ɔ? Sɛ ɛwɔ sukuu nu, anaa adwuma nu a, ɛse ye dada kyɛ bɛkɔhora bɛkosó wɔ bɛkɔnea. Ɔba sɔ a, ɔmaa ɛda wɔnwo so. Nakoso sɛ wɔ ngome ewura nekaa bie edé wɔ nwomeɛ a, sɔ mmerɛ ne de, ɛnze nikyee bɔ ɔkɔhora kosó wɔ kɔnea ɔ. Yeti sɛ annea yé a, ɛkɔhora kɔyɛ nikyeebie bɔ ɔttemayé ɔ.

Sɛ ebia wɔ ngome ewura nekaa bie a, ɛnea a nzuati yeɛ yenwo hia kyɛ edi nahorɛ ma Yehowa ɔ? Kae sɔ dwirɛ he: Sɛ ɛyɛ nikyeebie bɔ ɔttemayé a, ɔmaa Yehowa wora bɔ, na sɛ ɛyɛ bɔ ɔte pá koso a, ɔmaa yenye gye. (Gye. 6:​5, 6; Any. 27:11) Yede, nzuati yeɛ ɛyɛ nikyee bɔ ɔttemayé a, ɔmaa Yehowa wora bɔ ɔ? Ofikyɛ ‘ɔdwene wɔnwo’ ti ɔ. (1 Pet. 5:7) Yehowa pena kyɛ etie ye dwirɛ kyɛbɔ ɔkɔyɛ a, okosi wɔ yé ɔ. (Yes. 48:​17, 18) Bɔ ɔmaa yenwu sɔ yeɛ ole kyɛ, mmerɛ bɔ Yisraelfoɛ nemɔ nu bie andie Yehowa dwirɛ ne, ɔmaa ye wora bɔle. (Edw. 78:​40, 41) Nakoso Daniel de, Nyameɛ bɔfo bie hãhyirele kyɛ, ɔte ebie “bɔ Nyameɛ kuro ye dwirɛ paa ɔ.” (Dan. 10:11) Nzuati yeɛ né Nyameɛ kuro Daniel dwirɛ sɔ ne? Ofikyɛ, sɛ né Daniel wɔ mmenia nu oo, ye ngome owura sua nu oo, né odi nahorɛ ma Yehowa.—Kenga Daniel 6:10.

Bible Nu Dwirɛ Titire

w05 11/15 11 ¶3

Sɛ Ebie Dwudwo Na Sɛ Ɛyɛ Asoɛ Tie A, Okyire Kyɛ Ɛdɔ Ye

Mmerɛ bɔ né Yob ne ye nnamvo nemɔ bɔ ngɔmmɔ ne, Yob dwudwole mmerɛ pẽe. Na edwirɛ bɔ ɔhãne ne koso, ye nnamvo nemɔ tele yemu. Nakoso, Yob hãne kyɛ: “O, sɛ ahãa nyane ebie bɔ okotie me dwirɛ he bie kɔma me a!” (Yob 31:35) Nzuati yeɛ Yob hãne sɔ ɔ? Ofikyɛ, edwirɛ bɔ Yob hãne ne, ye nnamvo nemɔ tiele ye mbaen. Banga edwirɛ biala bɔ okyire kyɛ bɛdwene yenwo, anaakyɛ bɛpena kyɛ bɛboka ye po. Afei baanwu ye anwumvoin koso. Nakoso, somafoɛ Petro tu yɛ foɛ kyɛ: “Ɛmɔ amukoraa ɛ́mɔnya adwene kõ, ɛ́mɔnwunwu ɛmɔ nwo anwumvoin, ɛmɔhurohuro ɛmɔ nwo dwirɛ kyɛ aliemaa mɔ, ɛ́mɔnya tema bɛ́ma ɛmɔ nwo, na ɛ́mɔdwene anwobrɛaseɛ adwene.” (1 Petro 3:8) Yɛkɔyɛ sɛɛ na yahyire kyɛ yele tema yɛma ebie? Ebie yeɛ ole kyɛ, yɛkɔyɛ nikyeebie maa sona ne konwu kyɛ yɛdwene yenwo, ná yabɔ mmɔden kyɛ ɔhaw bɔ ɔfa nu ne, yɛkɔte yebo. Ɔwɔ nu, sɛ ebie dwudwo a, odikyɛ yɛto yɛ boase yetie edwirɛ bɔ ɔkã ne, nakoso nna ɛhẽne angome yeɛ ohia ɔ. Mmom ne, ɔhaw bɔ ɔfa nu ne, odikyɛ yɛbɔ mmɔden kyɛ yɛkɔte yebo yé.

    Sehwi Nningyein Ahoroɛ (2015-2026)
    Fité
    Kɔ Nu
    • Sehwi
    • Fa Kɔma Ebie
    • Hyehyɛ Ye Kyɛbɔ Ekuro Ɔ
    • Copyright © 2025 Watch Tower Bible and Tract Society of Pennsylvania
    • Yenwo Mmraa
    • Wɔnwo Dwirɛ Nwo Mmraa
    • Kyɛbɔ Ɛpenakyɛ Yɛfa Wɔnwo Dwirɛ Yɛdi Dwumaa Ɔ
    • JW.ORG
    • Kɔ Nu
    Fa Kɔma Ebie