Ɛkɔhora Kodwu Bɔ Afa Asie Wɔnye So Wɔ Yehowa Sõen Nu Nanwo

1. Nzu yeɛ ɔyɛ se ma yenu biemɔ kyɛ yɛkɔyɛ ɔ?

ASO afa nikyeebie asie wɔnye so wɔ Yehowa sõen nu, nakoso ɔyɛ se ma wɔ kyɛ ekodwu yenwo anaa?b Sɛ sɔ yeɛ ɔte a, nwu ye kyɛ nná wɔ ngome yeɛ eyia ɔhaw bɔ ɔte sɔ ɔ. Aliemaa biemɔ wɔ berɛ bɔ edwirɛ he bie ato bɛ ɔ. Yenwo nneasoɛ yeɛ ole kyɛ, né Phillip penakyɛ ofi ye ahõne nu bɔ mbaeɛ daa. Nakoso né ɔyɛ se ma ye kyɛ okonya mmerɛ bɔ ɔkɔfa kɔyɛ sɔ ɔ. Erika koso, né ɔpena kyɛ odwu nekaa bɔ bɛyɛ asɛnga nhyiamu ne ndɛ, nakoso daa né ɔka sĩɛ. Né Tomáš koso penakyɛ ɔkenga Bible ne daa, nakoso né ɔyɛ se ma ye. Ɔhãne kyɛ: “Mmɔle mmɔden pɛen nzã kyɛ ngɔkenga Bible namu, nakoso sɛ mekenga medwu Lewitikɔso a, mengora mendoaso kõ.”

2. Sɛ yɛfa nikyeebie yesie yɛnye so wɔ Yehowa sõen nu ná ɔyɛ se kyɛ yekodwu yenwo a, nzuati yeɛ ɔnzɛkyɛ yɛmaa y’aba nu bu ɔ?

² Sɛ afa nikyeebie asie wɔnye so wɔ Yehowa sõen nu, nakoso ɔyɛ se ma wɔ kyɛ ekodwu yenwo a, nnɛmaa w’aba nu bu, ofikyɛ nná mmerɛ mukoraati yeɛ sɛ ɛfa nikyeebie sie wɔnye so a, ɛkɔhora kodwu yenwo ndɛ ɔ. Nakoso kae kyɛ, mmɔden bɔ ɛbɔ kyɛ ɛkɔfa nikyeebie kosie wɔnye so wɔ Yehowa sõen nu ne, ɛhẽne ngome pó kyire kyɛ ɛdɔ Yehowa, na ɛpena kyɛ epingyé ye. Yehowa nwu mmɔden bɔ ɛbɔ ne mukoraati, na ɔmbena kyɛ ɛkɔyɛ nikyee bɔ ɔbo w’anwoserɛ so ɔ. (Edw. 103:14; Mik. 6:8) Yeti sɛ ɛpena kyɛ ɛfa nikyeebie sie wɔnye so a, odikyɛ ɛnea bɔ ɛkɔhora kodwu yenwo ɔ. Yede, sɛ ɛfa nikyeebie sie wɔnye so a, ɛkɔyɛ sɛɛ né ahora adwu yenwo? Ɛmɔma yɛnea nningyein biemɔ bɔ ɔkɔhora kɔboka yɛ ɔ.

BƆ ƆKƆBOKA WƆ MAA EKODWU BƆ AFA ASIE WƆNYE SO NANWO Ɔ

3. Sɛ ɛfa nikyeebie sie wɔnye so a, nzuati yeɛ odikyɛ enya gyidie kyɛ ɛkɔhora kodwu yenwo ɔ?

³ Sɛ ɛfa nikyeebie sie wɔnye so wɔ Yehowa soẽn nu a, nya gyidie kyɛ ɛkɔhora kodwu yenwo. Sɛ ebie fa nikyeebie sie yenye so, ná ole gyidie kyɛ ɔkɔhora kodwu yenwo a, ɛhẽne boka ye maa ɔyere yenwo. Sɔ gyidie bɔ yɛkã yenwo dwirɛ ne, ɔte kyɛ mvrama bɔ ɔbɔ ɛlɛen bie fa ye kɔ nekaa bɔ ɔpena kyɛ ɔkɔ ɔ. Sɛ mvrama ne kɔso bɔ a, ɔboka bɔ ɔkã ɛlɛen ne maa ɔkora kodwu nekaa bɔ ɔkɔ ne ndɛ. Sɔ ala yeɛ sɛ yele gyidie a, yɛkɔhora yekodwu bɔ yafa yasie yɛnye so nanwo ɔ. Aliemaa bie bɔ bɛfrɛ ye David bɔ ɔwɔ El-Salvador ne hãne kyɛ: “Sɛ ele gyidie kyɛ ɛkɔhora kɔyɛ bɔ afa asie wɔnye so ne a, ɔmaa ɛyere wɔnwo kyɛ ɛkɔyɛ, na ɛmma nikyefee nzi wɔ atẽe wɔ bɔ afa asie wɔnye so nanwo.” Yede, nzu yeɛ ɔkɔboka wɔ maa ekonya sɔ gyidie ne ɔ?

4. Nzu yeɛ yɛkɔhora yɛkɔbɔ yenwo mbaeɛ ɔ? (Filipifoɛ 2:13) (Nea foto ne koso.)

⁴ Bɔ afa asie wɔnye so ne, bɔ yenwo mbaeɛ. Sɛ ɛbɔ mbaeɛ a, Yehowa kɔfa ye honhom ne kɔboka wɔ maa ekonya gyidie kyɛ bɔ afa asie wɔnye so ne, ɛkɔhora kodwu yenwo. (Kenga Filipifoɛ 2:13.) Mmerɛ bie wɔ berɛ a, yɛfa nikyeebie yesie yɛnye so wɔ Yehowa sõen nu. Nakoso ɔnate kyɛ yelle gyidie nati, ebia ɔkɔhora kɔyɛ se kɔma yɛ kyɛ yekodwu yenwo ɔ. Sɔ yeɛ ɔtole aliemaa brasua bie bɔ bɛfrɛ ye Norina bɔ ɔwɔ Uganda ne ɔ. Né wafa wasie yenye so kyɛ ɔpena kyɛ ɔyɛ Bible adesũa, nakoso né olle gyidie kyɛ ɔkɔhora kɔyɛ, ofikyɛ né obu yenwo kyɛ, ɔngɔhora ngohyirehyire edwirɛ ahoroɛ nu maa ɔngɔhã mmenia ahõne. Ɔhãne kyɛ: “Mmɔle mbaeɛ, na nzrɛle Yehowa kyɛ ɔboka me ma ngora nyɛ Bible adesũa. Ɛhẽne sĩ ne, mmɔle mmɔden kyɛ ngosũa nikye, kyɛbɔ ɔkɔyɛ a, ngɔhora ngohyirehyire mmenia maa ɔkɔhã b’ahõne ɔ. Mmɔle mbaeɛ ne sĩ ne, nwuni kyɛ ngɔhora ngɔyɛ Bible adesũa, na sɔ afoɛ nala, mene mmenia nyɔ hyɛle yebo sũane Bible ne.”

5. Sɛ yɛpena kyɛ yedwu bɔ yafa yasie yɛnye so nanwo a, nzu yeɛ odikyɛ yɛdwenedwene yenwo ɔ?

⁵ Dwenedwene nningyein bɔ Yehowa ayɛ ama wɔ nanwo. (Edw. 143:5) Né somafoɛ Paul dwenedwene nningyein bɔ Yehowa ayɛ ama ye nanwo, na ɛhẽne bokale ye maa ɔhora sõne Yehowa yé. (1 Kor. 15:9, 10; 1 Tim. 1:12-14) Sɔ ala yeɛ sɛ ɛdwenedwene bɔ Yehowa ayɛ ama wɔ nanwo a, ɔkɔboka wɔ maa ekodwu bɔ afa asie wɔnye so nanwo ɔ. (Edw. 116:12) Ɛmɔma yɛnea aliemaa brasua bie bɔ ɔwɔ Honduras. Né wafa wasie yenye so kyɛ ɔkɔyɛ atẽepakyelɛniɛ. Nzu yeɛ ɔbokale ye maa ɔhora yɛle ɔ? Ɔhãne kyɛ: “Né medwenedwene nningyein bɔ Yehowa ayɛ ama me nanwo. Ebie yeɛ ole kyɛ, waboka me maa mawa asafo nanu. Afei koso daa Yehowa nea me, na ɔbɔ menwo waen. Sɔ nningyein nemɔ bɔ né medwenedwene yenwo ne, ɔmaa me ne Yehowa adamvoa nanu yɛle se, na ɛhẽne yeɛ ɔhyɛle me ngunaen maa nyɛle atẽepakyelɛ adwuma ne bie ɔ.”

6. Sɛ yɛpena kyɛ yedwu bɔ yafa yasie yɛnye so nanwo a, nikyee foforɛ beni yeɛ ɔkɔhora kɔboka yɛ ɔ?

⁶ Fa w’adwene sie bɔ okofi nu kɔwa naso. Erika bɔ yalimoa yahã yenwo dwirɛ ne, ɛmɔma yɛnea bɔ ɔbokale ye maa ɔhora dwuli bɔ né wafa wasie yenye so nanwo ɔ. Erika hãne kyɛ: “Nwuni kyɛ sɛ mekora medwu asɛnga nhyiamu bo ndɛ a, ɔkɔboka me maa mene aliemaamɔ kɔbɔ ngɔmmɔ. Afei koso, edwirɛ bɔ yekosusu yenwo wɔ asɛnga nhyiamu nabo ne, né ɔkɔboka me maa ngonwu kyɛbɔ ngɔhora ngohyirehyire mmenia maa ɔkɔhã bɛ ahõne wɔ asɛnga nu ɔ. Yeti nwuni kyɛ, sɛ mekora medwu bɔ mafa masie menye so nanwo a, me bɔbɔ yeɛ ɔkɔboka me ɔ.” Bɔ né okofi bɔ Erika afa asie yenye so nanu kɔwa ne, ɔfale ye adwene siele so, na ɛhẽne yeɛ ɔbokale ye maa ɔhora dwuli yenwo ne. Yɛkoso yɛkɔhora yɛkɔyɛ sɔ ala. Yenwo nneasoɛ yeɛ ole kyɛ, sɛ ɛpena kyɛ ɛkenga Bible anaa ɛbɔ mbaeɛ daa a, dwenedwene kyɛbɔ ɔkɔboka wɔ maa ekopingyé Yehowa nanwo. (Edw. 145:18, 19) Afei koso, sɛ ɛpena kyɛ enya subaen pá bie a, fa w’adwene sie kyɛbɔ ɔkɔboka wɔ maa ɛne mmenia kɔtena asomdwee nu naso. (Kol. 3:14) Nningyein bɔ okofi bɔ afa asie wɔnye so nanu kɔwa ne, twerɛ to berɛ, na ɛyɛ a, taa nea nu. Tomáš bɔ yalimoa yahã yenwo dwirɛ ne hãne kyɛ: “Sɛ menwu bɔ okofi bɔ mafa masie menye so nanu kɔwa a, ɔboka me maa meyere menwo medwu yenwo.”

7. Nzu yeɛ ɔbokale Julio ne ɔye maa bedwuli bɔ bafa basie bɛnye so nanwo ɔ?

⁷ Bɛbɔ bɛkɔhyɛ wɔ ngunaen maa ekodwu bɔ afa asie wɔnye so nanwo ne, fa wɔnwo bɔ bɛ. (Any. 13:20) Né Julio ne ɔye afa asie bɛnye so kyɛ bɛkɔyere bɛnwo bɛkɔyɛ asɛnga adwuma ne. Ɛmɔma yɛnea bɔ ɔbokale bɛ maa bɛhora bedwuli yenwo ɔ. Julio hãne kyɛ: “Mmenia bɔ yenwuni kyɛ bɛkɔhyɛ yɛ ngunaen maa yekodwu bɔ yafa yasie yɛnye so nanwo ne, yɛfale yɛnwo yɛbɔle bɛ, na yɛne bɛ bɔle yenwo ngɔmmɔ. Né benu biemɔ asi sɔ gyinayɛɛ ne bie maa bahora badwu yenwo, yeti bɛbokale yɛ paa. Bɛhyɛle yɛ ngunaen maa yenwuni kyɛ, bɔ yafa yasie yɛnye so ne, sɛ yɛyere yenwo a yɛkɔhora yekodwu yenwo.”

MMERƐ BƆ ƆYƐ SE MA YƐ KYƐ YEKODWU BƆ YAFA YASIE YƐNYE SO NANWO Ɔ

8. Mmerɛ bɔ yɛpena kyɛ yedwu bɔ yafa yasie yɛnye so nanwo ne, nzu yeɛ ɔkɔhora kosi ɔ? (Nea foto ne koso.)

⁸ Ɔnate kyɛ yɛte sona nati, y’abanu kɔhora kobu. Nakoso ɛhẽne ngyire kyɛ yɛngɔhora ngodwu bɔ yafa yasie yɛnye so nanwo. Nzuati ɔ? Ɛmɔma yesa yɛnea ɛlɛen ne mvrama nwo dwirɛ bɔ yɛhãne ne. Sɛ mvrama bɔ a, ɔkora boka bɔ ɔkã ɛlɛen ne ma okodwu nekaa bɔ ɔkɔ ɔ. Nakoso nná mmerɛ biala yeɛ mvrama bɔ ɔ. Aso ɛhẽne kyire kyɛ bɔ ɔkã ɛlɛen ne ngɔhora ngodwu nekaa bɔ ɔkɔ ne anaa? Daabi, ofikyɛ sona ne kɔhora kɔfa tabɔnga kɔhã ɛlɛen ne koodwu nekaa bɔ ɔkɔ ɔ. Sɔ ala yeɛ gyidie bɔ yele ye kyɛ yɛkɔhora yɛkɔyɛ bɔ yafa yasie yɛnye so ne te ɔ. Odwu mmerɛ bie a, yɛkɔhora yekonya adwene kyɛ yɛngɔhora ngodwu bɔ yafa yasie yɛnye so nanwo. Yeti ɛmɔma yɛkae kyɛ sɛ yɛfa nikyeebie yesie yɛnye so a, edwirɛ bie kɔhora kɔto yɛ bɔ ɔkɔmaa ɔkɔyɛ se kyɛ yekodwu yenwo ɔ. Nakoso kyɛbɔ ebie bɔ ɔkã ɛlɛen kora fa tabɔnga kã ɛlɛen ne kodwu nekaa bɔ ɔkɔ ne, sɔ ala yeɛ yɛkoso sɛ yemia yɛnye a, yɛkɔhora yekodwu bɔ yafa yasie yɛnye so nanwo ɔ. Nahorɛ dwirɛ yeɛ ole kyɛ, ɔlla se kyɛ yɛkɔyɛ sɔ, nakoso sɛ yɛyere yɛnwo a, yɛkɔhora yekodwu bɔ yafa yasie yɛnye so nanwo, na ɛhẽne kɔmaa yɛnye kɔgye paa. Yede, ɛmɔma yɛnea nikyee foforɛ tibɔ odikyɛ yɛyere yɛnwo kyɛ yɛkɔyɛ sɔ ɔ.

9. Sɛ ɔyɛ se ma yɛ kyɛ yekodwu bɔ yafa yasie yɛnye so nanwo a, nzuati yeɛ odikyɛ yɛbɔ mmɔden kyɛ yekodwu yenwo ɔ? Kyirekyire nu.

⁹ Yehowa de ɔnhyɛ yɛ, na mmom, ɔpena kyɛ yefi yɛ ahõne nu yɛsõ ye. (Edw. 100:2; 2 Kor. 9:7) Yede, sɛ ɔyɛ se ma yɛ kyɛ yekodwu bɔ yafa yasie yɛnye so nanwo a, nzuati yeɛ odikyɛ yɛyere yɛnwo ɔ? Sɔ dwirɛ he bie tole somafoɛ Paul. Ɛmɔma yɛnea bɔ ɔyɛle ɔ. Ɔhãne kyɛ: “Mehyɛ me nipadua ne anyeborolɛ maa odi yalɛ.” (1 Kor. 9:25-27) Ɛhe kyire kyɛ, sɛ né ɔyɛ se ma somafoɛ Paul kyɛ ɔkɔyɛ bɔ Yehowa kuro po a, né omia yenye yɛ. Aso Yehowa nye gyele bɔ Paul yɛle nanwo anaa? Yóo yenye gyele yenwo, ofikyɛ ɔmane Paul akatuaa pá wɔ bɔ ɔyɛle nanwo.—2 Tim. 4:7, 8.

10. Sɛ yemia yɛnye yɛyɛ bɔ yafa yasie yɛnye so ne a, sɛɛ yeɛ ɔkɔboka yɛ ɔ?

¹⁰ Yɛ koso sɛ yɛfa nikyeebie yesie yɛnye so na yemia yɛnye kyɛ yekodwu yenwo a, Yehowa nwu mmɔden bɔ yɛbɔ ne, na ɛhẽne maa yenye gye. Bɔ ɔmaa Yehowa nye gye yeɛ ole kyɛ, onwu ye kyɛ ɔlla ase mma yɛ kyɛ yɛkɔyɛ bɔ yafa yasie yɛnye so ne, nakoso ɔnate ɔdɔ bɔ yele yɛma ye nati yemia yɛnye yɛyɛ. Yeti kyɛbɔ Yehowa mane Paul akatuaa wɔ bɔ ɔyɛle nanwo ne, yɛ koso ɔkɔma yɛ akatuaa. (Edw. 126:5) Sɛ ɔba sɔ a, ɔkɔhyɛ yɛ ngunaen maa yɛkɔyere yɛnwo yekodwu bɔ yafa yasie yɛnye so nanwo. Aliemaa brasua bie bɔ bɛfrɛ ye Lucyna bɔ ɔfi Poland ne hãne kyɛ: “Sɛ odwu mmerɛ bie a, ɔyɛ se ma me kyɛ ngɔhɔ asɛnga, ofikyɛ ɛyɛ a né mafɛ. Nakoso sɛ memia menye mekɔ na mebadwu awuro a, na menwo atɔ me.” Yede sɛ ɔyɛ se ma yɛ kyɛ yekodwu bɔ yafa yasie yɛnye so nanwo a, nzu yeɛ yɛkɔhora yɛkɔyɛ ɔ?

11. Sɛ yɛpena kyɛ yɛhyɛ yɛnwo so a, nzu yeɛ odikyɛ yɛyɛ ɔ?

¹¹ Bɔ mbaeɛ srɛ Yehowa kyɛ ɔboka wɔ ma ɛhyɛ wɔnwo so. Sɛ bɛkã kyɛ ebie kora hyɛ yenwo so a, okyire kyɛ ɔtwẽ yenwo fi bɔne nwo. Afei koso sɛ ɔyɛ se ma ye kyɛ ɔkɔyɛ nikyeebie bɔ wafa wasie yenye so a, omia yenye kyɛ ɔkɔyɛ. Subaen bɔ Yehowa honhom boka yɛ maa yɛkora yenya ne bie yeɛ ole anwohyɛsoɛ, yeti bɔ mbaeɛ srɛ Yehowa kyɛ ɔboka wɔ ma enya bie. (Luka 11:13; Gal. 5:22, 23) David bɔ yalimoa yahã yenwo dwirɛ ne, né ɔpena kyɛ osũa nikyee daa, nakoso né ɔyɛ se ma ye kyɛ ɔkɔyɛ sɔ, yeti ɔbɔle mbaeɛ. Sɛɛ yeɛ mbaeɛ bɔ ɔbɔle ne bokale yɛ ɔ? David hãne kyɛ: “Bɔ ɔkɔyɛ na mahora mahyɛ menwo so ne, mmɔle Yehowa mbaeɛ kyɛ ɔboka me. Yehowa koso tiele me mbaeɛ ne, yeti kesaalae mekora mesũa nikyee daa.”

12. Edwirɛ bɔ ɔwɔ Nworɛ Dwirɛhanɛniɛ 11:4 ne, sɛɛ yeɛ ɔkɔboka yɛ maa yɛkɔyɛ bɔ yafa yasie yɛnye so ne ɔ?

¹² Nnɛnwondɛ kyɛ nningyein kɔyɛ yé kora ná ayɛ bɔ afa asie wɔnye so ne. Ewiase he anu de, nná daa yeɛ nningyein kɔhɔ yé kɔma yɛ ɔ, yeti nnɛmɔmaa yenya adwene kyɛ sɛ nningyein kɔ yé ma yɛ a, yeɛ yɛkɔyɛ bɔ yafa yasie yɛnye so ne ɔ. (Kenga Nworɛ Dwirɛhanɛniɛ 11:4.) Aliemaa bie bɔ bɛfrɛ Dayniel hãne kyɛ: “Sɛ ɛpena kyɛ ɛyɛ nikyeebie ná ɛtena bere nwondɛ kyɛ mmerɛ pá kɔwa kora na ahyɛ yebo a, yede ɛngɔhora ngɔyɛ ye llé. Yeti bɔ afa sie wɔnye so ne, hyɛ yebo yɛ yenwo adwuma.” Aliemaa bie bɔ bɛfrɛ Paul bɔ ɔwɔ Uganda ne koso maa yenwu nikyeehorɛ tibɔ odikyɛ yɛyere yɛnwo yɛyɛ bɔ yafa yasie yɛnye so ne ɔ. Ɔhãne kyɛ: “Sɛ ɔyɛ se ma yɛ kyɛ yɛkɔyɛ bɔ yafa yasie yɛnye so ne, ná yemia yɛnye yɛyɛ a, yɛmaa Yehowa nya bɔ okogyina so kɔboka yɛ ɔ.”—Mal. 3:10.

13. Sɛ ɛfa nikyeebie sie wɔnye so ná ɛhyɛ yebo yɛ ye ngakã a, sɛɛ yeɛ ɔkɔboka wɔ ɔ?

¹³ Hyɛ yebo ngakã. Sɛ yɛfa nikyeebie yesie yɛnye so ná yangora yanndwu yenwo a, ɔkora maa y’aba nu bu. Yeti bɔ afa asie wɔnye so ne, hyɛ yebo ngakã. Ɛhe anwo nneasoɛ yeɛ ole kyɛ, sɛ ɛpena kyɛ enya subaen pá bie wɔ w’asetena nu a, bɔ mmɔden kyɛ ɛkɔla sɔ subaen ne ali kyẽa biala. Afei koso, sɛ Bible ne yeɛ ɛpena kyɛ ɛkenga a, hyɛ yebo kenga ye bue kãa bie kyẽa biala, na ɛhẽne kɔboka wɔ maa ɛkɔhora kɔkenga yemukoraati koyie. Tomáš bɔ yalimoa yahã yenwo dwirɛ ne, né ɔpena kyɛ ɔfa afoɛ kõ kenga Bible ne mukoraati yie, nakoso wangora. Tomáš hãne kyɛ: “Né ɔte kyɛbɔ mapɛ pɔmaa maa watra me tendenn ne. Yeti nwuni sɔ ne, nyɛle m’adwene kyɛ ngɔkenga Bible bue kãa bie, ná madwenedwene yenwo kyẽa biala, na ɛhẽne maa menye gyele Bible ne kengalɛ nwo paa.” Ɔnate sɔ nikyee bɔ Tomáš yɛle nati, ɔhora kengale Bible ne mukoraati yiele, na ɛhẽne maa yenye gyele.c

SƐ ANGORA ANNDWU BƆ AFA ASIE WƆNYE SO NANWO A, NNƐMAA W’ABA NU BU

14. Nningyein benimɔ yeɛ ɔkɔhora kɔmaa ɔkɔyɛ se kyɛ yekodwu bɔ yafa yasie yɛnye so nanwo ɔ?

¹⁴ Ɔmva yenwo kyɛ yɛyere yɛnwo kyɛ yekodwu nikyee bɔ yafa yasie yɛnye so nanwo ne, edwirɛ bie kɔhora kɔto yɛ, na ɔba sɔ a, ɔkɔmaa ɔkɔyɛ se kyɛ yekodwu bɔ yafa yasie yɛnye so nanwo ɔ. (Nwo. 9:11) Afei koso, y’aba nu kɔhora kobu, na sɛ ɔba sɔ a, ɔmaa ɔyɛ se kyɛ yekonya anwoserɛ yɛkɔfa yɛkɔyɛ bɔ yafa yasie yɛnye so ne. (Any. 24:10) Sɛ ɛhe mukoraati la ahãmeɛ a, ɔnate kyɛ yɛte sona nati, ɛyɛ a yɛkora yedi mvomsoɛ, na ɛhẽne maa ɔyɛ se kyɛ yɛkɔhora yekodwu bɔ yafa yasie yenye so nanwo. (Rom. 7:23) Afei koso, yɛyɛ adwuma kyẽa biala, yeti ɛyɛ a né yafɛ. (Mat. 26:43) Yede nningyein bɔ yahã yenwo dwirɛ ne, sɛ ebie to yɛ a, nzu yeɛ yɛkɔhora yɛkɔyɛ ɔ?

15. Sɛ yangora yanndwu bɔ yafa yasie yɛnye so nanwo a, odikyɛ yɛmaa y’aba nu anaa? Kyirekyire nu. (Edwein 145:14)

¹⁵ Sɛ nikyeebie si, ná angora anndwu bɔ afa asie wɔnye so nanwo a, nnɛmaa w’aba nu bu. Bible ne maa yenwu kyɛ, ɔhaw kɔhora kɔto yɛ, nakoso osa hyɛ yɛ ngunaen kyɛ, sɛ yɛfa yɛnwo yɛto Yehowa so a, ɔkɔboka yɛ maa yekodwu bɔ yafa yasie yɛnye so nanwo. (Kenga Edwein 145:14.) Aliemaa Philip bɔ yalimoa yahã yenwo dwirɛ ne hãne kyɛ: “Sɛ mefa nikyeebie mesie menye so, ná ɔnate ɔhaw bie ti mangora manndwu yenwo a, memma m’aba nu mmu, na mmom mebɔ menwo mmɔden kyɛ ngɔhyɛ yebo biekũ, kyɛbɔ ɔkɔyɛ a ngodwu yenwo ɔ.” David bɔ yalimoa yahã yenwo dwirɛ ne koso hãne kyɛ: “Sɛ ɔhaw bie ti mangora manndwu bɔ mafa masie menye so nanwo a, memma m’aba nu mmu, na mmom meyere menwo meyɛ, kyɛbɔ ɔkɔyɛ a, Yehowa konwu kyɛ medɔ ye ɔ.” Yeti sɛ ɔhaw bɔ yɛfa nu ne mukoraati sĩ ne, yɛyere yɛnwo kyɛ yekodwu bɔ yafa yasie yɛnye so nanwo a, yɛmaa Yehowa nwu ye kyɛ yɛpena kyɛ yɛyɛ bɔ okuro ɔ. Sɛ Yehowa nwu kyɛ yɛyɛ sɔ a, ɔmaa yenye gye paa.

16. Sɛ ɔhaw bie ti angora anndwu bɔ afa asie wɔnye so nanwo a, nzu yeɛ odikyɛ ɛyɛ ɔ?

¹⁶ Sũa nikyeebie fi bɔ wato wɔ nanu. Sɛ ɔhaw bie ti angora anndwu bɔ afa asie wɔnye so nanwo a, bisa wɔnwo kyɛ: ‘Nzu yeɛ ngɔhora ngɔyɛ, ná mmerɛ foforɛ sɔ ɔhaw ne ando me kõ ɔ?’ (Any. 27:12) Afei koso, sɛ ɔnate nikyeebie ti angora anndwu bɔ afa asie wɔnye so nanwo a, ɛkɔhora kɔdwene yenwo biekũ, kyɛbɔ ɔkɔyɛ a ɛkɔsesã bɔ afa asie wɔnye so ne. Bɔ yeti yeɛ ɔte sɔ yeɛ ole kyɛ, ebia né ɔkɔyɛ se kɔma wɔ kyɛ ɛkɔhora kodwu yenwo sɔ mmerɛ ne ɔ.d Yeti, sɛ angora anndwu bɔ afa asie wɔnye so nanwo a, nnɛmaa w’adwene yɛ wɔ kyɛ ɛhẽne ati Yehowa kobu wɔ kyɛ mvasoɛ nne wɔ so kõ.—2 Kor. 8:12.

17. Nningyein bɔ yahora yayɛ wɔ Yehowa sõen nu ne, nzuati yeɛ odikyɛ yɛkae ɔ?

¹⁷ Nnɛmaa wɔ wora fi nningyen bɔ ahora adwu yenwo ne. Bible ne kã kyɛ, “Nyameɛ de, ɔtte asisie bɔ okobu yenye kogua ɛmɔ mmɔdenbɔ so ɔ.” (Heb. 6:10) Ebia wɔ koso abɔ mmɔden apingyé Yehowa, ɛyere wɔnwo yɛ asɛnga adwuma ne, anaa abɔ asu po. Sɔ nningyein hemɔ bɔ ahora ayɛ ye wɔ Yehowa soen nu ne, nnɛmaa wɔ wora fi. Yeti, sɛ ahora adwu sɔ nningyein hemɔ nwo a, yede kae kyɛ sɛ ɛyere wɔnwo a, ɛkɔhora kodwu bɔ afa asie wɔnye so nanwo.—Flp. 3:16.

18. Sɛ yɛyere yɛnwo yedwu bɔ yafa yasie yɛnye so nanwo a, sɛɛ yeɛ ɔkɔboka yɛ ɔ? (Nea foto ne koso.)

¹⁸ Kyɛbɔ ebie bɔ ɔkã ɛlɛen kora kodwu nekaa bɔ ɔkɔ ne asomdwee nu ne, sɔ ala yeɛ sɛ ɛfa wɔnwo to Yehowa so a, ɔkɔboka wɔ maa ɛkɔhora kodwu bɔ afa asie wɔnye so nanwo ɔ. Sɛ ebie bɔ ɔkã ɛlɛen kora kodwu nekaa bɔ ɔkɔ ne a, ɔmaa yenye gye ɔmva yenwo ne ɔhaw biala bɔ ɔtole ye ne. Sɔ ala yeɛ wɔ koso, sɛ ɛfa nikyeebie sie wɔnye so, ná ɛyere wɔnwo kyɛ ekodwu yenwo a, Yehowa kɔboka wɔ, na wɔnye kɔgye paa. (2 Kor. 4:7) Yeti nikyee biala bɔ afa asie wɔnye so wɔ Yehowa sõen nu ne, yere wɔnwo kyɛ ekodwu yenwo, na nnɛmaa w’aba nu bu.—Gal. 6:9.