Asafo Nu Mbanyi—Ɛmɔ Kɔyɛ Sɛɛ Ná Ɛmɔ Asuesũa Gideon?

1. Kyɛbɔ 1 Petro 5:2 kã ne, adwuma bɔ yenwo hia beni yeɛ Yehowa afa awura asafo nu mbanyi nemɔ sa ɔ?

YEHOWA afa ye mmenia bɔ bɛla y’ahõne so ne, wawura asafo nu mbanyi nemɔ sa kyɛ bɛnea bɛ so. Asafo nu mbanyi nemɔ koso, bɛnye gye yenwo paa kyɛ bɛkɔyɛ adwuma serɛ bɛkɔfa bɛkɔsõ aliemaamɔ, na banea bɛso. (Yer. 23:4; kenga 1 Petro 5:2.) Yɛda Yehowa ase paa kyɛ wafa asafo nu mbanyi nemɔ wama yɛ ɔ!

2. Ɔhaw ahoroɛ beni yeɛ asafo nu mbanyi nemɔ yia ɔ?

² Adwuma bɔ asafo nu mbanyi nemɔ yɛ bɛfa bɛnea aliemaamɔ so ne, ɔlla ase koraa, ofikyɛ ɛyɛ a beyia ɔhaw. Tony te asafo nu panyi wɔ United States. Onwuni kyɛ, odikyɛ ɔbrɛ yenwo ase ná odé tonu kyɛ, nná adwuma biala bɔ bɛkɔfa bɛkɔma ye wɔ asafo nanu ne yeɛ odikyɛ odé to yenwo so ɔ. Ɔhãne kyɛ: “Mmerɛ bɔ COVID-19 anwonyerɛ ne hyɛle yebo ne, nnéle adwuma pẽe nguale menwo so wɔ asafo nanu. Sɔ adwuma ne bie yeɛ ole kyɛ, atẽe foforɛ bɔ né yɛfa so yɛyɛ asafo nhyiamu ne asɛnga adwuma ne, né odikyɛ meyɛ yenwo nhyehyɛɛ. Mmɔle mmɔden kyɛ ngɔyɛ adwuma bɔ né malé mato menwo so namukoraati, nakoso nwuni kyɛ adwuma pẽe té wɔ berɛ bɔ odikyɛ meyɛ ɔ. Ɛhẽne ati, né menngora mengenga Bible, mennzũa nikye, na né mengora memmɔ mbaeɛ, kyɛbɔ né meyɛ ye dáa ne.” Ilir te asafo nu panyi wɔ Kosovo. Ɔhaw bɔ oyiale yeɛ ole kyɛ, mmerɛ bɔ kõɛ sili wɔ nekaa bɔ ɔwɔ ne, né ɔyɛ se ma ye paa kyɛ ɔkɔfa asafo akwangyerɛ kɔyɛ adwuma. Ɔhãne kyɛ: “Mmerɛ bɔ Bɛtɛl hãhyirele me kyɛ ngɔmmoka aliemaamɔ bɔ bɛwɔ nekaa bɔ kõɛ ne gyi nu paa ne, esuroen hãne me, na ngãne kyɛ ndeaseɛ nne akwangyerɛ bɔ bafa bama me nanu.” Tim koso te nzɛmbatrɛlɛniɛ wɔ Asia. Né adwuma bɔ ogua yeso wɔ asafo nanu ne, obu ye kɔme anu. Ɔhãne kyɛ: “Ɔnate adwuma pẽe bɔ né ogua meso nati, ɛyɛ a ná mafɛ.” Sɛ ɛte asafo nu panyi ná eyia sɔ haw ne a, nzu yeɛ ɔkɔhora kɔboka wɔ ɔ?

3. Nzu yeɛ yesũa yefi bɔ Temuafoɛ Gideon yɛle nanu ɔ?

³ Temuafoɛ Gideon yɛle nikyee bie bɔ asafo nu mbanyi kɔhora kosuesũa ɔ. (Heb. 6:12; 11:32) Gideon lɛle Nyameɛ mmenia fili bɛ pɔfoɛmɔ sa nu, na ɔneane bɛ so. (Mae. 2:16; 1 Abe. 17:6) Sɔ ala yeɛ ɛnnɛ koso, Nyameɛ afa awura asafo nu mbanyi nemɔ sa kyɛ, bɛnea ye mmenia so wɔ mmerɛ bɔ enu yɛ se he anu ɔ. (Aso. 20:28; 2 Tim. 3:1) Mmerɛ bɔ né Gideon yɛ adwuma bɔ Yehowa afa awura ye sa ne, oyiale ɔhaw pẽe. Nakoso ɔnate kyɛ né ɔbrɛ yenwo ase, na ɔyɛle bɔ Yehowa ahã ahyire ye namukoraati nati, ɔhora yɛle adwuma ne. Sɛ yɛtte asafo nu panyi pó a, yɛkɔhora yekosũa nikyee yekofi bɔ Gideon yɛle nanu. Odikyɛ yɛmaa mbanyi nemɔ adwuma ne yɛ mmerɛ ma bɛ. Yɛyɛ sɔ a, okyire kyɛ yɛnye sɔ adwuma serɛ bɔ bɛyɛ ne.—Heb. 13:17.

MMERƐ BƆ ƆYƐ SE MA WƆ KYƐ ƐKƆBRƐ WƆNWO ASE Ɔ

4. Nzu yeɛ Gideon yɛle bɔ ɔmaa yenwu kyɛ né ɔbrɛ yenwo ase ɔ?

⁴ Né Gideon te ebie bɔ ɔbrɛ yenwo ase paa.b Ɛhẽne ati, mmerɛ bɔ Yehowa abɔfo ne hãhyirele ye kyɛ ye yeɛ okole Yisraelfoɛ nemɔ kofi Midianfoɛ nemɔ sanu ne, ɔhãne kyɛ: “Manase abusũa kure nu, m’abusũa yeɛ yɛte awiɛmvoɛ koraa ɔ, na m’abusũa nu koso, me yeɛ nde kãa paa ɔ.” (Mae. 6:15) Né Gideon adwene yɛ ye kyɛ ɔngɔhora ngɔyɛ adwuma bɔ Yehowa afa awura yesa ne, nakoso né Yehowa se kyɛ ɔkɔhora kɔyɛ. Yeti Yehowa bokale ye maa ɔyɛle adwuma ne kama.

5. Nzu yeɛ ɔkɔmaa ɔkɔyɛ se kɔma asafo nu panyi bie kyɛ ɔkɔbrɛ yenwo ase ɔ?

⁵ Asafo nu mbanyi bɔ bɛnwo mmɔden kyɛ, bɛkɔbrɛ bɛnwo ase mmerɛ mukoraati. (Mik. 6:8; Aso. 20:18, 19) Yeti bɔ bɛkora bɛyɛ ye wɔ asafo nanu ne, bɛmva benndu bɛnwo. Afei koso, ɔnate kyɛ bɛte mmenia nati, sɛ bedi mvomsoɛ a, bɛmma b’abanu mmu. Nakoso ɔtɔ mmerɛ bie a, ɔkora yɛ se kyɛ asafo nu panyi bie kɔbrɛ yenwo ase. Ɛhe anwo nneasoɛ yeɛ ole kyɛ, asafo nu panyi bie kɔhora kole adwuma pẽe kogua yenwo so wɔ asafo nanu. Yeti okoyie yebo ne, né wayɛ se wama ye kyɛ ɔkɔyɛ yemukoraati. Afei koso, ebia panyi bie kɔyɛ dwumadié bie wɔ asafo nanu, na ɛhẽne kɔmaa aliemaamɔ kɔkamvo ye. Ɔtɔ mmerɛ bie koso a, ebia ebiemɔ kɔkekã edwirɛ bie bɔ okyire kyɛ bɛnye nzɔ adwuma serɛ bɔ ɔyɛ ne, na ɛhẽne kɔmaa ɔkɔfɛ yaa. Ɛhe mukoraati kɔhora kɔmaa ɔkɔyɛ se kyɛ ɔkɔbrɛ yenwo ase ɔ. Yeti sɛ edwirɛ bɔ ɔte sɔ to asafo nu panyi bie a, ɔkɔyɛ sɛɛ né wasuesũa bɔ Gideon yɛle ne?

6. Sɛɛ yeɛ asafo nu mbanyi kɔhora kosuesũa Gideon anwobrɛaseɛ ne ɔ? (Nea foto ne.)

⁶ Má afoforɛ boka wɔ. Sona bɔ ɔbrɛ yenwo ase ne, odé tonu kyɛ nna nikyee biala yeɛ ɔkɔhora kɔyɛ ɔ. Ɔnate kyɛ né Gideon brɛ yenwo ase nati, ɔmaa afoforɛ bokale ye maa ɔyɛle adwuma bɔ Yehowa fa wurale ye sa ne. (Mae. 6:27, 35; 7:24) Sɔ ala yeɛ asafo nu mbanyi bɔ bɛbrɛ bɛnwo ase ne yɛ ɔ. Tony bɔ yalimoa yahã yenwo dwirɛ ne hãne kyɛ: “Kyɛbɔ bɛtetele me nati, menwu ye kyɛ ngɔhora ngɔyɛ adwuma biala. Ɛhẽne ati, menye gye yenwo kyɛ ngole adwuma pẽe ngogua menwo so. Yeti nyɛle kyɛ me ne m’abusũa kosũa anwobrɛaseɛ nwo nikye, mmerɛ bɔ yɛyɛ abusũa sõen ne. Afei mmisale meye kyɛ, onwu kyɛ mebrɛ menwo ase, anaa daa medé adwuma pẽe megua menwo so? Afei koso, nneane vidio bie wɔ jw.org so, bɔ ye dwirɛti yeɛ ole, Montete Afoforo, Monnya Ahotoso wɔ Wɔn Mu, na Momma Wɔn Asɛyɛde Sɛnea Yesu Yɛe No.” (Ekonwu sɔ vidio he wɔ Twi nu.) Tony maa afoforɛ bokale ye maa ɔyɛle adwuma bɔ owura ye sa ne. Ɔyɛle sɔ ne, nzu yeɛ ofili nu wale ɔ? Tony toale ye dwirɛ naso kyɛ: “Kesaalae, menné adwuma pẽe menngua menwo so wɔ asafo nanu, yeti menya mmerɛ mefa mesũa nikye.”

7. Sɛ ɛte asafo nu panyi, na sɛ aliemaa bie kã edwirɛ maa ɔyɛ wɔ yea a, nzu yeɛ ɛkɔhora kosũa kofi bɔ Gideon yɛle nanu ɔ? (Yakobo 3:13)

⁷ Sɛ aliemaa bie kã edwirɛ maa ɔyɛ wɔ yea a, nya aboterɛ. Ɔhaw foforɛ bɔ asafo nu mbanyi kɔhora koyia yeɛ ole kyɛ, aliemaa bie kɔhora kɔhã edwirɛ bie maa ɔkɔyɛ bɛ yea. Sɛ ɔba sɔ a, bɔ Gideon yɛle ne kɔboka bɛ. Mmerɛ bɔ Efraimfoɛ nemɔ hãne edwirɛ bie maa ɔyɛle ye yea ne, wamvɛ bɛ so yaa, na mmom ɔtole yebo ase ne bɛ dwudwole. Bɔ ɔmaa Gideon yɛle sɔ yeɛ ole kyɛ, né ɔse kyɛ ɔte sona bɔ ɔkora di mvomsoɛ ɔ. (Mae. 8:1-3) Ɔnate kyɛ né Gideon brɛ yenwo ase nati, ɔyɛle konn tiele bɔ Efraimfoɛ nemɔ hãne ne. Ɛhẽne ati, ɔhora hãne edwirɛ bie maa b’ahõne tɔle bɛ kunu. Sɔ ala yeɛ mbanyi nemɔ koso, bɛbɔ mmɔden kyɛ bekonya aboterɛ ɔ. Sɛ aliemaa bie kã edwirɛ bie maa ɔyɛ bɛ yea pó a, odikyɛ bɛyɛ konn betie ye, ná bɛto bɛboase bɛne ye dwudwo. (Kenga Yakobo 3:13.) Sɛ bɛyɛ sɔ a, ɔmaa asomdwee tena asafo nanu.

8. Sɛ ɛte asafo nu panyi, ná aliemaamɔ kamvo wɔ a, nzu yeɛ odikyɛ ɛyɛ ɔ? Ma yenwo nneasoɛ.

⁸ Sɛ bɛkamvo wɔ a, fa animnyam ne ma Yehowa. Mmerɛ bɔ Gideon lili Midianfoɛ nemɔ so ngunim ne, Yisraelfoɛ nemɔ yɛle kyɛ bɛhyɛ ye animnyam, nakoso wanné sɔ animnyam ne wamma yenwo, na mmom ɔfale animnyam namukoraati mane Yehowa. (Mae. 8:22, 23) Sɛ ɛte asafo nu panyi na ɛkora yɛ nikyee bie maa aliemaamɔ kamvo wɔ a, suesũa bɔ Gideon yɛle ne, ná fa animnyam namukoraati ma Yehowa. (1 Kor. 4:6, 7) Sɛ ɛkora ma dwudwolɛ maa ɔkã aliemaamɔ ahõne ná bɛkamvo wɔ a, nzu yeɛ odikyɛ ɛyɛ ɔ? Kyɛ ahãa ekole animnyam ne kɔma wɔnwo ne, maa benwu kyɛ ɔte Bible ne, ɔne ndeteɛ bɔ yenya yefi Yehowa ahyehyɛdeɛ ne berɛ ne, yeɛ waboka wɔ ɔ. Yeti, sɛ ɛte asafo nu panyi a, ɔwɔ nu alaa a, ɛkɔhora kobisa wɔnwo kyɛ: “Aso kyɛbɔ meyɛ me nikyee ne, okyire kyɛ medé animnyam mema menwo anaa?” Sɔ dwirɛ bɔ yɛkã ye, ebie tole Timothy. Timothy te asafo nu panyi, na ɔtaa ma badwanu dwudwolɛ paa. Ɔhãne kyɛ: “Mmerɛ bie bɔ wapɛ nu ne, sɛ mema badwanu dwudwolɛ a, né mefa mvandonho tendenn yeɛ mehyɛ yebo ɔ. Ɔnate sɔ mvandonho tendenn nati, né aliemaamɔ kamvo me, yeti né bɛmva b’adwene bɛngɔ Bible naso, na né bɛnnhyɛ Yehowa animnyam kyɛ wasiesie sɔ dwudwolɛ ne wama bɛ ɔ.” Yeti, Timothy nwuni kyɛ, atẽe bɔ ɔfa so ma dwudwolɛ ne, odikyɛ ɔsesã nu. Ɔyɛle sɔ kyɛbɔ ɔkɔyɛ a, aliemaamɔ ngɔfa b’adwene ngɔhɔ ye so sõma, anaa bɛngɔhyɛ ye animnyam ɔ. (Any. 27:21) Timothy yɛle sɔ ne, sɛɛ yeɛ ɔbokale ye ɔ? Ɔtoale ye dwirɛ naso kyɛ: “Kesaalae sɛ mema dwudwolɛ meyie a, aliemaamɔ kã kyire me kyɛ, me dwudwolɛ ne aboka bɛ maa bahora bagyina bɛ haw noa, na bɛne Yehowa adamvoa nanu ayɛ se. Sɛ mete sɔ dwirɛ ne a, ɔmaa menye gye paa, ofikyɛ manwui kyɛ kesaalae aliemaamɔ mva b’adwene benzie me so, na mmom Yehowa yeɛ bɛfa b’adwene bɛkɔ ye so ɔ.”

MMERƐ BƆ ƆYƐ SE MA WƆ KYƐ EKONYA AKOKODURO, NÁ AYƐ SOTIE Ɔ

9. Nzuati yeɛ né odikyɛ Gideon yɛ sotie ná onya akokoduro ɔ? (Nea foto bɔ ɔwɔ Ɛwɛnelɛ Waen ne nyunu ne.)

⁹ Mmerɛ bɔ Yehowa yele Gideon kyɛ ɔnea Yisraelfoɛ nemɔ aso ne, né yenwo hia paa kyɛ ɔyɛ sotie, ná onya akokoduro koso. Bɔ yeti yeɛ ɔte sɔ yeɛ ole kyɛ, Yehowa hãhyirele Gideon kyɛ afɔleɛ bokyea bɔ ye baba bɔ afɔleɛ wɔ so ma Baal ne, obubu ye. (Mae. 6:25, 26) Afei Yehowa hãhyirele ye kyɛ sogyafoɛ bɔ ná ɔfa bɛ kɔ kõɛ ne, ɔte bɛ so ma bɛha kãa bie. (Mae. 7:2-7) Ɛhẽne sĩ ne, Yehowa sá hãhyirele ye kyɛ ɔne Midianfoɛ nemɔ bɛɛhõ kɔngɔen.—Mae. 7:9-11.

10. Mmerɛ beni yeɛ ɔkɔhora kɔyɛ se kɔma asafo nu panyi bie kyɛ ɔkɔyɛ sotie ɔ?

¹⁰ Odikyɛ asafo nu mbanyi yere bɛnwo kyɛ bɛkɔyɛ sotie. (Yak. 3:17) Asafo nu panyi bɔ ɔyɛ sotie ne, ɔbɔ mmɔden kyɛ ɔkɔfa Bible nu akwangyerɛ kɔyɛ adwuma. Afei, sɛ Yehowa ahyehyɛdeɛ ne fa akwangyerɛ ma ye a otie, na ɔfa yɛ adwuma. Sɛ ɔyɛ sɔ a, ɔmaa aliemaamɔ koso sũa kyɛ bɛkɔyɛ sotie. Nakoso ɔtɔ mmerɛ bie a, ɔkɔhora kɔyɛ se kɔma ye kyɛ ɔkɔyɛ sotie. Yenwo nneasoɛ yeɛ ole kyɛ, sɛ asafo ne fa akwangyerɛ bie ba a, ebia asafo nu panyi bie konya adwene kyɛ sɔ akwangyerɛ ne de, sɛ ɔfa yɛ adwuma a ɔngɔyɛ yé. Afei koso, ebia ná awaen ne abra Yehowa Adanzefoɛ sõen wɔ maen bie so. Sɛ ɔba sɔ na sɛ asafo ne fa akwangyerɛ bie ma panyi bie, na ɛhẽne kɔmaa polisifoɛ kɔhye ye a, ɔkɔhora kɔyɛ se kɔma ye kyɛ ɔkɔfa sɔ akwangyerɛ ne kɔyɛ adwuma. Yede, nzu yeɛ asafo nu mbanyi kɔhora kosũa kofi sotie bɔ Gideon yɛle nanu ɔ?

11. Nzu yeɛ sɛ asafo nu mbanyi yɛ a, okyire kyɛ bɛyɛ sotie ɔ?

¹¹ Sɛ asafo ne fa akwangyerɛ bie ba a, bɔ mmɔden kyɛ ɛkɔfa kɔyɛ adwuma. Adwuma bɔ Nyameɛ fa wurale Gideon sa ne, ɔfale yenwo akwangyerɛ mane ye. Ebie yeɛ ole kyɛ, ohyirele ye atẽe bɔ ɔfa so sɛkye ye baba afɔleɛ bokyea ne, nekaa bɔ okosi afɔleɛ bokyea kɔma Yehowa, ɔne kaka bɔ ɔfa bɔ afɔleɛ ɔ. Gideon yɛle bɔ Yehowa hãhyirele ye ne pɛpɛɛpɛ. Ɛnnɛ, Yehowa ahyehyɛdeɛ ne ma asafo nu mbanyi ngaebɔ ne akwangyerɛ ahoroɛ, na ɛhe boka bɛ maa bɛkora bɛnea aliemaamɔ so yé. Aliemaamɔ mbanyi, yɛbɔ ɛmɔ aba so paa kyɛ, ɛmɔyere ɛmɔ nwo bɛfa akwangyerɛ biala bɔ ɛmɔ sa kɔhã ye ne bɛyɛ adwuma ɔ. Sɛ ɛmɔ kɔso bɛyɛ sɔ a, ɔkɔmaa asafo ne kɔhɔ ye nyunu.—Edw. 119:112.

12. Sɛ Yehowa ahyehyɛdeɛ ne yɛ nzakrayɛɛ bie a, sɛɛ yeɛ Hebrifoɛ 13:17 kɔboka asafo nu mbanyi maa bekole bɛkɔto nu ɔ?

¹² Sɛ bɛma wɔ akwangyerɛ a, bɔ mmɔden fa yɛ adwuma. Mmerɛ bɔ Gideon kɔ kõɛ ne, Yehowa maa ɔtele y’asogyafoɛ nemɔ so hwi. (Mae. 7:8) Ebia né Gideon kɔhora konya adwene kyɛ: ‘Sɔ akwangyerɛ he de sɛ yɛfa yɛyɛ adwuma a ɔngɔboka koraa.’ Nakoso otiele bɔ Yehowa hãne ne. Ɛnnɛ, sɛ Yehowa ahyehyɛdeɛ ne fa akwangyerɛ bie ba a, asafo nu mbanyi nemɔ dé to nu, na bɛfa bɛyɛ adwuma ndɛ́. (Kenga Hebrifoɛ 13:17.) Ɛhe anwo nneasoɛ yeɛ ole kyɛ, wɔ 2014 nu ne, Akwangyerɛ Kue ne sesãne atẽe bɔ bɛfa so betua Ahennie Asa anaa Nhyiamu Asa bɔ besi nanwo kerɛ nanu. (2 Kor. 8:12-14) Mmerɛ bie bɔ wapɛ nu ne, sɛ besi Ahennie Asa bɛma asafo bie a, né bɛmaa sɔ asafo ne tua yenwo kerɛ. Nakoso kesaalae de, ndoboa bɔ aliemaamɔ ye wɔ ewiase mukoraati ne yeɛ bɛfa besisi Ahennie Asa ɔ. Ɛhe aboka maa asafo ahoroɛ bɔ bɛngora bɛnnye ndoboa pẽe ne pó, bɛkora benya Ahennie Asa. Mmerɛ bɔ José tele sɔ dwirɛ ne, ɔhãne kyɛ: ‘Ɛhe de ɔngɔhora ngɔyɛ yé llé, ofikyɛ sɛ yɛfa sɔ akwangyerɛ ne yɛyɛ adwuma a, yɛngɔhora yenngosi Ahennie Asa kõmaapɛ pó.’ Nzu yeɛ ɔbokale José maa ɔsesãne sɔ adwene bɔ né ole ye ne ɔ? Ɔtoale ye dwirɛ naso kyɛ: “Edwirɛ bɔ ɔwɔ Anyandera 3:5, 6 ne yeɛ ɔbokale me ɔ. Ɔmaa nwuni kyɛ, odikyɛ menya Yehowa nu gyidie mmerɛ bɔ ye ahyehyɛdeɛ ne afa akwangyerɛ bie awa ne. Kesaalae sɔ nzakrayɛɛ bɔ bɛyɛle ne, waboka maa basisi Ahennie Asa pẽe, na asafo ahoroɛ bɔ bɛngora bɛnnye ndoboa pẽe ne pó ne, banya Ahennie Asa.”

13. (a) Gyidie beni yeɛ Gideon nyane ɔ? (b) Nzu yeɛ asafo nu mbanyi kɔhora kosũa kofi bɔ Gideon yɛle nanu ɔ? (Nea foto ne koso.)

¹³ Nya akokoduro ná yɛ bɔ Yehowa kuro ɔ. Adwuma bɔ Yehowa famane Gideon ne, né ɔyɛ suro paa, nakoso ɔyɛle. (Mae. 9:17) Ɔnate kyɛ Yehowa hyɛle Gideon ngunaen nati, ɔmaa onyane gyidie kyɛ ɔkɔboka ye maa ɔkɔnea ye mmenia nemɔ so. Asafo nu mbanyi bɔ bɛwɔ nekaa bɔ bafa bɛsa bato yɛ sõen adwuma naso ne, besuesũa bɔ Gideon yɛle ne. Bele akokoduro paa, ofikyɛ bɛboka aliemaamɔ maa bɛkɔ asafo nhyiamu ne asɛnga. Ebia ɔnate bɔ bɛyɛ nati, bɛkɔhye bɛ bekogua prisã, b’adwuma kofi bɛsa, anaa bɛkɔyɛ bɛ ayayadeɛ. Nakoso ɛhe amukoraati sĩ ne benzuro.c Sɛ anwohiahia pirikua ne ba a, ebia akwangyerɛ bɔ bɛkɔfa bɛkɔma asafo nu mbanyi ne, ɔkɔyɛ se kɔma bɛ paa kyɛ bɛkɔfa bɛkɔyɛ adwuma ɔ. Akwangyerɛ bɔ bɛkɔfa bɛkɔma bɛ ne, ebie yeɛ ole kyɛbɔ yɛkɔhã atemmuo dwirɛ yekohyire mmenia, ɔne bɔ odikyɛ yɛyɛ kora ná yanya ngõa ɔ. Sɛ Gɔgo bɔ ofi Magɔgo to wura Yehowa mmenia so a, odikyɛ asafo nu mbanyi nemɔ nya akokoduro kora, ná bafa sɔ akwangyerɛ nemɔ bayɛ adwuma.—Hes. 38:18; Nye. 16:21.

YEHOWA KƆBOKA WƆ MAA ƐKƆYƐ ADWUMA BIALA BƆ OWURA WƆ SA NE

14. Nzuati yeɛ né ɔyɛ se kyɛ Gideon kɔyɛ adwuma bɔ Yehowa famane ye ne ɔ?

¹⁴ Adwuma bɔ Yehowa famane Gideon ne, né ɔlla ase koraa, yeti sɛ né ɔkɔhora kɔyɛ a, né odikyɛ ɔbɔ yenwo mmɔden. Yenwo nneasoɛ yeɛ ole kyɛ, mmerɛ bɔ né Gideon ne Midianfoɛ nemɔ bɛkõ ne, né ɔte kɔngɔen, na ɔnate kyɛ né odi bɛso ngunim nati, bɛnwatili. Ɔwale sɔ ne, Gideon pole bɛ fili Yesreel bɔnza nanu oodwuli Yɔɔdan asue bɔ né ɛberɛ te ɛhɔayeɛ nanwo. (Mae. 7:22) Ɔwɔ nu kyɛ né Gideon ne ye mmrienzua ɛyaa nzã ne afɛ paa de, nakoso bɛhɔleso bɛfõane bɛ. Ayieleɛ koraa ne, bɛhyele Midianfoɛ nemɔ, na behũhũni bɛ mukoraati.—Mae. 8:4-12.

15. Nzuati yeɛ ɔtɔ mmerɛ bie a, ɔyɛ se ma asafo nu mbanyi nemɔ kyɛ bɛkɔyɛ adwuma bɔ owura bɛsa ne ɔ?

¹⁵ Asafo nu mbanyi nemɔ yɛ adwuma serɛ wɔ asafo nanu, na besá bɛnea b’abusũa. Ɛhẽne ati, ɔtɔ mmerɛ bie a ɔmaa bɛfɛ́ paa. Sɛ ɛte asafo nu panyi a, sɛɛ yeɛ bɔ Gideon yɛle ne kɔhora kɔboka wɔ ɔ?

16-17. Nzu yeɛ ɔbokale Gideon maa ɔyɛle y’adwuma ne ɔ, na gyidie beni yeɛ asafo nu mbanyi kɔhora konya ɔ? (Yesaya 40:28-31) (Nea foto ne.)

¹⁶ Nya gyidie kyɛ Yehowa kɔboka wɔ. Né Gideon le gyidie paa kyɛ Yehowa kɔboka ye, na Yehowa koso amma yesa anzi ase. (Mae. 6:14, 34) Bɔ ɔmaa yenwu sɔ yeɛ ole kyɛ, mmerɛ bɔ Gideon ne mmrienzua bɔ bɛboka yeso ne bɛ́po Midian ahemvo nyɔ ne, né ahemvo nemɔ tete afũpɔngɔ so, yeɛ bɛkoso bɛnate ase ɔ. Nakoso Yehowa mane bɛ anwoserɛ maa bɛhora bɛtole bɛ, na belili bɛso ngunim. (Mae. 8:12, 21) Yehowa de ‘ɔmvɛ, na ye anwoserɛ so nde.’ Yeti sɛ asafo nu mbanyi fa bɛnwo bɛto ye so a, ɔkɔboka bɛ maa bɛkɔyɛ adwuma biala bɔ owura bɛ sa ne.—Kenga Yesaya 40:28-31.

¹⁷ Matthew boka Hospital Liaison Committee naso. Nzu yeɛ ɔboka ye maa ɔyɛ y’adwuma ne ɔ? Matthew hãne kyɛ: “Edwirɛ bɔ ɔwɔ Filipifoɛ 4:13 ne, waboka me paa. Ɔtɔ mmerɛ bie a, mefɛ́ paa, na mete ngã kyɛ mengɔhora ngɔtoa adwuma naso. Sɛ ɔba sɔ a mebɔ Yehowa mbaeɛ, na mesrɛ ye kyɛ ɔma me anwoserɛ kyɛbɔ ɔkɔyɛ a, ngɔhora ngɔboka aliemaamɔ ɔ. Mmerɛ biala bɔ ngɔyɛ sɔ ne, menwu ye kyɛ, manya anwoserɛ bɔ ngɔfa ngɔyɛ adwuma ne ɔ.” Kyɛbɔ Gideon yɛle ne, ɔtɔ mmerɛ bie a, ɔkora yɛ se ma asafo nu mbanyi biemɔ kyɛ bɛkɔnea aliemaamɔ so, nakoso bemia bɛnye bɛyɛ. Nakoso odikyɛ asafo nu mbanyi kae kyɛ, bɛte sona, yeti nná nikyee biala yeɛ bɛkɔhora bɛkɔyɛ ɔ. Sɛ ɛte asafo nu panyi a, nya gyidie kyɛ sɛ ɛfa wɔnwo to Yehowa so a, ɔkɔma wɔ anwoserɛ bɔ ɛkɔfa kɔyɛ adwuma bɔ owura wɔ sa ne.—Edw. 116:1; Flp. 2:13.

18. Sɛ ɛnea bɔ yasusu yenwo ne a, asafo nu mbanyi kɔyɛ sɛɛ ná basuesũa Gideon?

¹⁸ Asafo nu mbanyi kɔhora kosũa nningyein pẽe kofi bɔ Gideon yɛle nanu. Odikyɛ asafo nu mbanyi brɛ bɛnwo ase, ná benwu kyɛ nná adwuma biala yeɛ bɛkɔhora bɛkɔyɛ ɔ. Sɛ aliemaamɔ kã edwirɛ bie maa ɔha bɛ pó a, bɛkɔbɔ mmɔden kyɛ bɛne bɛ kodwudwo asomdwee nu. Afei koso sɛ aliemaamɔ kamvo bɛ a, odikyɛ bɛbrɛ bɛnwo ase, na bɛfa yenwo animnyam bɛma Yehowa. Mmerɛ bɔ waha kãa maa ewiase he kɔ ayieleɛ ne, odikyɛ asafo nu mbanyi tie akwangyerɛ ná benya akokoduro. Afei koso odikyɛ benya gyidie paa kyɛ, ɔmva yenwo ne ɔhaw biala bɔ bekoyia ne, Yehowa kɔboka bɛ. Yɛnye sɔ adwuma serɛ bɔ asafo nu mbanyi yɛ ne paa, na ‘yɛfa anidie yɛma bɛ.’—Flp. 2:29.