Sɛ Ɛsuro Nyameɛ A, Ɛhẽne Bɔ Wɔnwo Waen

1-2. Nzuati yeɛ ɔyɛ se kyɛ yɛkɔbɔ bra pá tekyɛ Lɔto ɔ?

KYƐBƆ mmenia abrabɔ asɛkye wɔ ewiase he anu ɛnnɛ ne, ɔmaa yɛ wora bɔ paa. Sɔ ala yeɛ né teneneeniɛ Lɔto te ngã ɔ. Né ɔse kyɛ Nyameɛ kyi abrabɔ tɛ́ bɔ né ɔkɔso wɔ ye aberɛ so ne. Ɛhẽne ati, mmenia nemɔ ‘mmeraatolɛ yɔleɛ ne, ɔmaa Lɔto lili yalɛ daa biala.’ (2 Pet. 2:7, 8) Né Lɔto dɔ Yehowa. Ɛhẽne ati yeɛ nningyein tɛ́ bɔ né ɔkɔso ne, ɔmaa ye wora bɔle ne. Ɛnnɛ koso, yɛne mmenia bɔ benzuro Yehowa, ná bɛmva ye mmraa ne bɛnnyɛ hwee yeɛ yɛte ɔ. Nakoso, sɛ yesuro Nyameɛ ná yɛdɔ ye a, yɛkɔhora yɛkɔbɔ bra bɔ ɔte pá ɔ.—Any. 14:2.

² Yehowa dɔ yɛ, na ɔpena kyɛ yɛbɔ bra pá. Ɛhẽne ati, wama yɛ afutuo pẽe wɔ Anyandera nwomaa nanu. Afutuo bɔ ɔwɔ Anyandera nwomaa nanu ne, ɔkɔhora kɔboka Kristofoɛ mmrienzua, mmrasua, ngwalaa, ɔne mbanyi mukoraati. Yede, ɛmɔma yɛto yɛboase yesusu sɔ afutuo nemɔ nu bie nwo.

SƐ YESURO NYAMEƐ A, ƆBƆ YƐNWO WAEN

3. Kyɛbɔ Anyandera 17:3 kã ne, nzuati yeɛ odikyɛ yɛbɔ y’ahõne nwo waen ɔ? (Nea foto ne koso.)

³ Yehowa se yɛ tra kyɛbɔ yɛse yɛnwo ɔ, na subaen bie bɔ ɔwɔ yɛnu bɔ ebiala nnwui ne pó, Yehowa de onwui. Ɛhẽne ati yeɛ odikyɛ yɛdwenedwene nningyein pá nwo ne. (Kenga Anyandera 17:3.) Sɛ yɛdwenedwene afutuo bɔ Yehowa fama yɛ nanwo, ná yɛfa yɛbɔ yɛ bra a, ɔmaa Yehowa nye gye, na ɛhẽne kɔhora kɔboka yɛ maa yekonya daa ngõa. (Yoh. 4:14) Afei, nzɔhwɛ biala bɔ Satan nate mmenia bɔ bɛwɔ ewiase nanu naso kɔfa kɔwa yɛ so ne, yɛkɔhora yekogyina yenoa. (1 Yoh. 5:18, 19) Sɛ yɛkɔ so yepingyé Yehowa a, ɔkɔmaa yekonya ɔdɔ yɛkɔma ye, na yekobu ye paa. Yɛyɛ sɔ a, ɔkɔboka yɛ maa yɛkɔdwenedwene nningyein bɔ ɔte pá nwo. Yeti, sɛ yeyia nzɔhwɛ bie a, odikyɛ yebisa yɛnwo kyɛ, ‘Kyɛbɔ Nyameɛ si kuro me dwirɛ ne, sɛ meyɛ nikyeebie bɔ onguro a, ɔkɔte ngã sɛ́?’—1 Yoh. 4:9, 10.

4. Ɔnate kyɛ né Marta suro Yehowa nati, sɛɛ yeɛ ɔbokale ye ɔ?

⁴ Marta te aliemaa brasua bɔ ofi Croatia. Mmerɛ bie, oyiale adwamamɔ nwo nzɔhwɛ, na ɔhãne kyɛ: “Né mennwu bɔ nyɛ ɔ, na né ɔyɛ se ma me kyɛ ngɔhwẽ menwo ngofi sɔ nzɔhwɛ nanwo ɔ. Nakoso bɔ ɔbokale me yeɛ ole kyɛ né mesuro Yehowa.”b Yede, sɛɛ yeɛ ɛhẽne bokale ye ɔ? Marta hãne kyɛ, ɔhaw bɔ né okofi bɔne bɔ ɔkɔyɛ nanu kɔwa ne yeɛ né ɔdwenedwene yenwo ɔ, na ɛhẽne yeɛ ɔbokale ye paa ɔ. Yɛ koso, sɛ yeyia adwamamɔ nwo nzɔhwɛ a, odikyɛ yɛdwenedwene ɔhaw bɔ okofi nu kɔwa, ɔne kyɛbɔ ɔkɔmaa Yehowa wora kɔbɔ nanwo. Yɛyɛ sɔ a, ɔkɔboka yɛ paa.—Gye. 6:5, 6.

5. Bɔ ɔtole Leo ne, nzu yeɛ yɛkɔhora yekosũa yekofi nu ɔ?

⁵ Sɛ yɛdɔ Yehowa a, yɛkɔbɔ yɛnwo mmɔden kyɛ, yɛngɔfa mmenia bɔ bɛ subaen ttemayé ne adamvoa, ofikyɛ bɛkɔmaa yɛkɔyɛ bɔ Yehowa nguro ɔ. Sɔ pɛpɛɛpɛ yeɛ ɔtole Leo bɔ ofi Congo ne ɔ. Mmerɛ bɔ ɔbɔle asu ne, ye afoɛ 4 sĩ ne, ɔfale yenwo ɔɔbɔle mmenia bɔ bɛ subaen ttemayé ɔ. Né ye adwene yɛ ye kyɛ, sɛ ɔfa nnamvoa bɔ bɛte sɔ, ná waanyɛ bɔ bɛyɛ ne bie a, ɔtte bɔne. Nakoso sɔ adwene bɔ onyane ne, né ɔlakalaka yenwo, ofikyɛ wangyɛ biala ye damvo nemɔ maa ɔɔyɛle kɔnomnzaniɛ, na ɔbɔle adwaman koso. Ɔwale sɔ ne, ɔhyɛle yebo kyɛ ɔdwene Bible nu dwirɛ bɔ ye awofoɛ fahyirehyirele ye, ɔne kyɛbɔ né yenye gye, mmerɛ bɔ né ɔsõ Yehowa nanwo. Bɔ ɔyɛle ne, nzu yeɛ ofili nu wale ɔ? Yeɛ ole kyɛ, yenye sa wale yenwo so, yeti ɔmaa mbanyi nemɔ bokale ye, na osa ɔɔsõne Yehowa. Kesaalae, ɔsõ kyɛ asafo nu panyi, ne atẽepakyelɛniɛ titire, na yenye gye paa.

6. Mmrasua nyɔ beni yeɛ Anyandera nwomaa ne kã bɛnwo dwirɛ ne?

⁶ Afei, ɛmɔma yesusu Anyandera yeti 9 nanwo. Ɛberɛ ne, Bible ne fale mmrasua nyɔ bie gyinane berɛ mane bɛbɔ bɛte ngwaseafoɛ, ɔne bɛbɔ bɛse nworɛ ɔ. (Fatoto Rom. 5:14; Gal. 4:24 nwo.) Mmerɛ bɔ yesusu sɔ tworɔnzɛm nanwo ne, má ɔtena w’adwene nu kyɛ, adwamamɔ, ɔne ponografi ayi Satan wiase he anu bo. (Ɛfe. 4:19) Nakoso, sɛ yesuro Nyameɛ a, ɔkɔboka yɛ maa yɛkɔhwẽ yɛnwo yekofi bɔne nwo. (Any. 16:6) Yeti, edwirɛ bɔ ɔwɔ Anyandera yeti 9 ne, ɔkɔhora kɔboka yemukoraati. Sɔ mmrasua nyɔ bɔ Anyandera nwomaa ne kã bɛnwo dwirɛ ne, bɛto bɛsa bɛfrɛ bɛbɔ bɛnze nworɛ ne. Benu biala kã kyɛ, ‘Ɛmɔbra beeli m’aleɛ ne bie.’ (Any. 9:1, 5, 6, 13, 16, 17) Nakoso, benu biala bɔ ekotie ye ne, ole nekaa bɔ ɔkɔfa wɔ kɔhɔ ɔ.

NNETIE BRASUA KWASEAA NE

7. Kyɛbɔ Anyandera 9:13-18 kã ne, bɛbɔ betiele brasua kwaseaa ne, nzu yeɛ ɔtole bɛ ɔ? (Nea foto ne koso.)

⁷ Ɛmɔma yetie bɔ “brasua kwaseaa” ne hãne ɔ. (Kenga Anyandera 9:13-18.) Ɔhãhyirele bɛbɔ bɛnze nworɛ ne kyɛ, “Ɛmɔbra ma yedidi, na yɛnõ nzãa.” Nakoso, nzu yeɛ ɔtole bɛbɔ bɛhɔle berɛ ne ɔ? ‘Ɔfale bɛ mukoraati hɔle ewue nu.’ Mvandoho foforɛ bie wɔ Anyandera nwomaa nanu, na ɛhẽne koso, ɔbɔ yɛ kɔkɔ wɔ brasua bie bɔ ɔte sanzaniɛ, na osa te tutuuniɛ nanwo. Ɔkã kyɛ: ‘Ye awuro fa sona kɔ ewue nu.’ (Any. 2:11-19) Afei koso, sɛ ɛnea Anyandera 5:3-10 ne a, ɔkã “brasua sanzaniɛ” bie nwo dwirɛ, na ɔmaa yenwu kyɛ ‘ye agyirɛtulɛ fa sona kɔ ewue nu.’

8. Gyinayɛɛ beni yeɛ odikyɛ yesi ɔ?

⁸ Bɛbɔ “brasua kwaseaa” ne to yesa frɛ bɛ ne, odikyɛ besi gyinayɛɛ bie. Yeɛ ole kyɛ: Aso bekotie ye, anaa bengotie ye? Yɛ koso, odikyɛ yesi sɔ gyinayɛɛ ne bie. Yeti sɛ ebie pena kyɛ yɛbɔ adwaman a, nzu yeɛ odikyɛ yɛyɛ ɔ? Anaa sɛ yenwu ponografi wɔ yɛ fon so anaa nekaa foforɛ biala a, yɛkɔyɛ ye sɛ́?

9-10. Nzuati yeɛ odikyɛ yɛtwẽ yɛnwo yefi adwamamɔ nwo ɔ?

⁹ Bible ne maa yenwu bɔ yeti yeɛ ɔte pá kyɛ yɛtwẽ yɛnwo yefi adwamamɔ nwo ɔ. “Brasua kwaseaa” ne kã kyire bɛbɔ ɔto ye sa frɛ bɛ ne kyɛ: ‘Nzue bɔ bewia bɛnõ ne, ɔyɛ fɛ́.’ Yede, nzu yeɛ ole ‘nzue bɔ bewia bɛnõ ne’? Yeɛ ole adwamamɔ. Sɛ brienzua bie ne ɔye bɛda a, ɔmaa bɛnye gye paa, yeti Bible ne kã kyɛ, ɔte kyɛ nzue bɔ ebie nõ maa yenwo yɛ ye fɔnwoo. (Any. 5:15-18) Nakoso, ‘nzue bɔ bewia bɛnõ’, anaa adwamamɔ de, ɔtte sɔ. Ofikyɛ bɛbɔ bɛfa bɛnwo bewura nu ne, bɛyɛ ye wɔ mvealeɛ nu tekyɛ awueniɛ. Bɛbɔ bɛfa bɛnwo bewura adwamamɔ nu ne, ɛyɛ a b’adwene yɛ bɛ kyɛ, ɔnate kyɛ ebiala nnwu bɔ bɛyɛ nati, bafa bɛnwo bali, yeti ɛyɛ a né ɔyɛ bɛ fɛ́. Nakoso, ɔtte nahorɛ, ofikyɛ Yehowa de, onwu nikyeebiala. Afei, bɔ ɔyɛ aworabɔ yeɛ ole kyɛ, sɛ ebie fa yenwo wura adwamamɔ nu a, ɔsɛkye ɔne Yehowa afĩa. Yeti, sɛ ebie yɛ sɔ a, ɔngɔfa yenwo ngoli. (1 Kor. 6:9, 10) Nná ɛhẽne angome yeɛ ɔkɔto ye ɔ, na mmom ɔkɔhora koyia ɔhaw foforɛ.

¹⁰ Sɛ ebie fa yenwo wura adwamamɔ nu a, ɔmaa ye nyunu gua ase, na ye tiboa bua ye fɔ. Afei koso, sɛ ebie bɔ adwaman a, ɔkora maa ye agyaa gu. Na sɛ sona ne gyalle koso a, ɔkora maa ɔnwonzɛ. Bɔ ɔboka so yeɛ ole kyɛ, sɛ ebie fa yenwo wura adwamamɔ nu a, ɔsɛkye ɔne Yehowa afĩa, ɔmaa ɔbɔ anwonyerɛ, na ɔkora wu po. Yeti, sɛ yɛse nworɛ a, yengoli sɔ brasua ne sĩ. (Any. 7:23, 26) Anyandera 9:18 kã kyɛ: ‘Mmienzua bɔ bɛkɔ ye nekaa ne, ɔfa bɛ kɔ ewue nu.’ Yede, nzu yeɛ ɔmaa mmeni pẽe bɔ adwaman, ɔmva yenwo ne ɔhaw ahoroɛ bɔ yahã yenwo dwirɛ ne?—Any. 9:13-18.

11. Sɛ ebie nea ponografi a, nzuati yeɛ ɔyɛ suro ɔ?

¹¹ Nikyee kõ bɔ ɔmaa mmeni pẽe bɔ adwaman yeɛ ole kyɛ bɛnea ponografi. Ebiemɔ adwene yɛ bɛ kyɛ, sɛ ɛnea ponografi a, ɔtte bɔne. Nakoso, ɔtte sɔ. Sɛ ebie nea ponografi a, ɔyɛ suro paa ofikyɛ ɔkora ka ye berɛ. Afei koso, ɔmaa ɔyɛ se ma sona ne kyɛ, ɔkɔye kofi ye tianu ɔ. Bɔ ɔboka so yeɛ ole kyɛ, sɛ ebie nea ponografi a, ɔmaa ɔyɛ se ma ye paa kyɛ ɔkɔye ye adwene kofi adwamamɔ so ɔ. (Kol. 3:5; Yak. 1:14, 15) Ɛhẽne ati yeɛ bɛbɔ bɛnea ponografi ne, benu pẽe bɔ adwaman ne.

12. Sɛ yɛnye kɔbɔ foto bie bɔ ɔtte ponografi, nakoso ɔkɔmaa y’adwene kɔhɔ adwamamɔ so a, nzu yeɛ odikyɛ yɛyɛ ɔ?

¹² Sɛ yɛnye bɔ ponografi so wɔ yɛ fon so a, nzu yeɛ odikyɛ yɛyɛ ɔ? Odikyɛ yɛye yɛnye yefi so ndɛ. Sɛ yenwui kyɛ ponografi kɔhora kɔsɛkye yɛne Yehowa afĩa a, ɔkɔboka yɛ maa yɛkɔye yɛnye yekofi so ndɛ. Foto ahoroɛ biemɔ wɔ berɛ a, ɔtte ponografi, nakoso, ɔkora maa ebie fa ye adwene kɔ adwamamɔ so. Yede, nzuati yeɛ ɔnzɛkyɛ yɛnea foto bɔ ɔte sɔ ɔ? Ofikyɛ ɔkɔhora kɔmaa yɛkɔbɔ adwaman. (Mat. 5:28, 29) Asafo nu panyi bie bɔ bɛfrɛ ye David bɔ ɔwɔ Thailand ne hãne kyɛ: “Sɛ menye kɔbɔ foto bie bɔ ɔtte ponografi, nakoso ɔkɔmaa m’adwene kɔhɔ adwamamɔ so a, ɛyɛ a mebisa menwo kyɛ: ‘Sɛ mekɔ so menea foto bɔ ɔte sɔ a, adwene beni yeɛ Yehowa konyae wɔ menwo ɔ?’ Sɔ dwirɛ ne bɔ mebisa menwo ne, ɔboka me maa meye menye mefi so ndɛ.”

13. Nzu yeɛ yɛyɛ a, okyire kyɛ yɛse nworɛ ɔ?

¹³ Sɛ yesuro Yehowa a, yɛngɔyɛ nningyein bɔ onguro ɔ, na ɛhẽne kohyire kyɛ yɛse nworɛ. Bible ne maa yenwu kyɛ, sɛ yekonwu nworɛ a, odikyɛ yedimoa yesuro Nyameɛ. (Any. 9:10) Nikyee foforɛ bɔ ɔkɔboka yɛ maa yɛkɔyɛ mmenia bɔ yɛse nworɛ ne yeɛ ɔwɔ Anyandera yeti 9 ngyekyɛmuɛ 1 bɔ ɔkɔ ne. Wɔ sɔ tworɔnzɛm nanu ne, ɔfa nworɛ toto brasua bie nwo.

TIE BRASUA BƆ ƆSE NWORƐ NE

14. Asaatolɛ foforɛ beni yeɛ ɔwɔ Anyandera 9:1-6 ne ɔ?

¹⁴ Kenga Anyandera 9:1-6. Yehowa yeɛ nworɛ mukoraati fi ye berɛ ɔ. Yeti, ɔto yesa frɛ yɛ kyɛ yɛbra ye berɛ, na yekonwu nworɛ. (Any. 2:6; Rom. 16:27) Tworɔnzɛm ne sa hãne awuro bie nwo dwirɛ, na né awuro ne le bonima anaa pila nzoo. Ɛhe maa yenwu kyɛ, awuro ne te piri paa, na ɔmaa yɛkae kyɛ Yehowa kuro yɛ dwirɛ, na ɔpena kyɛ yenwu nworɛ. Yeti sɛ yetie ye a, ɔkɔboka yɛ.

15. Nzu yeɛ Nyameɛ pena kyɛ yɛyɛ ɔ?

¹⁵ Kyɛbɔ brasua bɔ tworɔnzɛm ne kã yenwo dwirɛ ne abukye ye sa nu ne, sɔ ala yeɛ Yehowa koso, ɔnate kyɛ okuro yɛ dwirɛ nati, ɔboka yɛ maa yenya nningyein bɔ yehia ɔ. Edwirɛ bɔ ɔwɔ Anyandera yeti 9 ne, ɔkã kyɛ brasua ne asiesie ye naen ne ye nzãa wɔ ye awuro, na wato yesa wafrɛ mmenia kyɛ beeli bie. (Any. 9:2.) Wɔ ngyekyɛmuɛ 4 ne 5 nanu ne, sɔ brasua bɔ ogyi berɛ ma nworɛ ne, ɔkã kyire bɛbɔ bɛnze nworɛ ne kyɛ: “Ɛmɔbra beeli m’aleɛ ne bie.” Nzuati yeɛ odikyɛ yɛkɔ sɔ brasua bɔ ɔse nworɛ ne awuro, ná yedi ye aleɛ ne bie ɔ? Yɛbɔ yɛsõ Yehowa ne, okuro yɛ dwirɛ paa, na ɔpena kyɛ osi yɛ yé. Yeti, ɔmbena kyɛ yekosi gyinayɛɛ bie bɔ ɔkɔmaa yekonwu amaneɛ kora né yasũa nworɛ. Ɛhẽne ati yeɛ Yehowa fa “nworɛ bɔ enu pi osie ma teneneefoɛ” ne. (Any. 2:7) Sɛ yesuro Yehowa a, yekotie ye afutuo na yafa yayɛ adwuma, na ɛhẽne kɔmaa yɛkɔyɛ bɔ okuro ɔ.—Yak. 1:25.

16. Ɔnate kyɛ Alain suro Nyameɛ nati, gyinayɛɛ pá beni yeɛ osili ɔ, na nzu yeɛ ofili nu wale ɔ?

¹⁶ Alain te asafo nu panyi, na osa te tikyaniɛ. Ɔnate kyɛ osuro Yehowa nati, osili gyinayɛɛ pá bie. Ɛmɔma yetie bɔ ɔtole ye ɔ. Ɔhãne kyɛ: “Né me damvo tikyafoɛ nemɔ nu pẽe kã kyɛ, sɛ ebie nea ponografi a, ɔboka ye maa ɔkora sũa brienzua ne brasua nnaa nwo nikyee.” Nakoso, Alain ne bɛ annyɛ adwene. Ɔtoale ye dwirɛ naso kyɛ: “Ɔnate kyɛ mesuro Nyameɛ nati, nzili me hue kyɛ mengɔnea vidio ahoroɛ bɔ ɔte sɔ ne. Yeti, mmaa me damvo nemɔ nwuni bɔ yeti yeɛ mennea vidio bɔ ɔte sɔ ne.” Bɔ Alain yɛle ne kyire kyɛ ɔse nworɛ, na ɔfá “ndeaseɛ atẽe” naso. (Any. 9:6) Ɔnate sɔ gyinayɛɛ bɔ Alain sili nati, ye damvo tikyafoɛ nanu biemɔ apene so kyɛ ɔne bɛ sũa Bible ne, na bɛkɔ asafo nhyiamu.

17-18. Bɛbɔ betie afutuo bɔ ɔwɔ Bible nanu ne, nhyiraa beni yeɛ bekonya ye ɛnnɛ ɔ, na nhyiraa foforɛ beni yeɛ bekonya ye kyẽabie ɔ? (Nea foto ne koso.)

¹⁷ Yehowa nate mmrasua bɔ bafa bɛ bayɛ mvandoho wɔ Anyandera nwomaa nanu naso amaa yanwu bɔ yɛyɛ a, okosi yɛ yé ɔ. Bɛbɔ betie “brasua kwaseaa” ne, bɛfa bɛnwo bewura adwamamɔ nu, na besusu kyɛ ɛhẽne yeɛ ɔkɔmaa bɛnye kɔgye ɔ. Nakoso ɔtte nahorɛ, ofikyɛ bɛbɔ bɛfa bɛnwo bewura abrabɔ bɔ ɔte sɔ nu ne, onzi bɛ yé, na mmom ‘ɔfa bɛ kɔ ewue nu.’—Any. 9:13, 17, 18.

¹⁸ Bɛbɔ betie brasua bɔ ɔse nworɛ ne de, osi bɛ yé, ofikyɛ Yehowa boka bɛ maa bɛsa kã afutuo bɔ ɔwɔ Ye Dwirɛ Bible nanu ne. Ɔnate kyɛ ye dwirɛ ne boka bɛ maa bɛpingyé ye nati, ɔmaa bɛnye gye paa. (Yes. 65:13) Yehowa nate diyifoɛ Yesaya so hãne kyɛ: “Ɛ́mɔtie me yé, ná ɛ́mɔli bɔ ɔte paa ɔ, ná ɛ́mɔma ɛmɔ kra nye gye aleɛ sɔkyee nwo.” (Yes. 55:1, 2) Odikyɛ yɛbɔ yɛnwo mmɔden kyɛ, yɛkɔmaa yɛnye kɔgye nningyein bɔ Yehowa nye gye yenwo nanwo, na yɛtwẽ yɛnwo yefi nningyein bɔ onguro nanwo. (Edw. 97:10) Afei koso, ɔnate kyɛ yɛfa Bible ne yɛboka mmenia maa benwu nworɛ nati, ɔmaa yɛnye gye paa. Asɛnga adwuma bɔ yɛyɛ ne, waayɛ kyɛ yegyi bokaa bie aso bɔ yɛtẽanu kyɛ: ‘Wɔ bɔ w’adwene te kãa ne, makye fa wa!’ Bɛbɔ betie nzɛmba bɔ yɛkã ne, yɛne bɛ mukoraati nye kɔgye, ofikyɛ yɛse kyɛ, sɛ yɛkɔ so yɛfa “ndeaseɛ atẽe” naso a, yekonya daa ngõa.—Any. 9:3, 4, 6.

19. Kyɛbɔ Nworɛ Dwirɛhanɛniɛ 12:13, 14 kã ne, nzu yeɛ odikyɛ yenu biala yere yenwo kyɛ ɔkɔyɛ ɔ? (Nea alaka bɔ yenwa “Sɛ Yesuro Nyameɛ A, Sɛɛ Yeɛ Ɔboka Yɛ Ɔ?”)

¹⁹ Kenga Nworɛ Dwirɛhanɛniɛ 12:13, 14. Ɛmɔma yɛhɔso yesuro Nyameɛ. Sɛ yɛyɛ sɔ a, ɔkɔboka yɛ maa yengosuesũa kyɛbɔ mmenia abrabɔ asɛkye wɔ ewiase he anu ne bie, na mmom yɛkɔyere yɛnwo kyɛ yɛkɔyɛ bɔ Nyameɛ kuro ɔ. Afei koso, ɔkɔmaa yɛkɔhã Bible nu dwirɛ yekohyire mmenia, kyɛbɔ ɔkɔyɛ a, bɛkoso bekonwu nworɛ ɔ.