ADESŨA BƆ ƆTƆ SO 26
Siesie Wɔnwo Ma Yehowa Kyẽa Ne
“Awurade kyẽa ne kɔwa kyɛbɔ awueniɛ ba kɔngɔen ne.” —1 TƐS. 5:2.
DWEIN 143 Kɔ So Yɛ Adwuma no, Wɛn, na Twɛn
BƆ YƐBAASŨA Ɔa
1. Sɛ yekonya ngõa wɔ Yehowa kyẽa bɔ ɔba nanu a, nzu yeɛ odikyɛ yɛyɛ ɔ?
SƐ BIBLE ne kã “Yehowa kyẽa” a, ɔte mmerɛ bɔ ɔkɔsɛkye ye pɔfoɛmɔ, ná walé ye mmenia ngõa ɔ. Nná ɛhe yeɛ ole mmerɛ bɔ olimoa bɔ Yehowa asɛkye ye pɔfoɛmɔ ɔ, na mmom wayɛ bie lé. (Yes. 13:1, 6; Hes. 13:5; Sef. 1:8) Yɛ mmerɛ he anu koso, sɔ ala yeɛ Yehowa kɔsɛkye ye pɔfoɛmɔ ɔ. Yeti “Yehowa kyẽa” ne kɔhyɛ yebo mmerɛ bɔ basɛkye Babilɔn Pirikua ne, na ɔkɔwa ayieleɛ wɔ Amagedon kõɛ nanu. Yesu hãne kyɛ, sɛ yekonya ngõa wɔ “anwohiahia pirikua” nanu a, odikyɛ “yesiesie yɛnwo,” ná yɛmaa “yɛnye da berɛ.” Ɛhe maa yenwu kyɛ, sɛ yekonya ngõa a, sɔ mmerɛ he yeɛ odikyɛ yesiesie yɛnwo ɔ.—Mat. 24:21; Luka 12:40.
2. Sɛ yesusu edwirɛ bɔ ɔwɔ Tɛsalonikafoɛ Nwomaa Bɔ Olimoa nanwo a, sɛɛ yeɛ ɔkɔboka yɛ ɔ?
2 Wɔ Tɛsalonikafoɛ Nwomaa Bɔ Olimoa nanu ne, Pɔɔlo fale Yehowa kyẽa ne totole nningyein pẽe nwo. Sɔ bɔ ɔyɛle ne, né ɔkɔboka aliemaamɔ maa bekosiesie bɛnwo bɛkɔma Yehowa kyẽa ne. Mmerɛ bɔ né Pɔɔlo tworɔ ye krataa ne, né ɔse paa kyɛ Yehowa kyẽa ne ngɔwa sɔ mmerɛ ne, nakoso ɔhyɛle aliemaamɔ ngunaen kyɛ bɛma bɛnye la berɛ. (2 Tɛs. 2:1-3) Yɛ koso, yɛkɔhora yekosũa nikyee yekofi afutuo bɔ ɔfamane bɛ nanu. Afei ɛmɔma yesusu bɔ Pɔɔlo hã fale nningyein nzã bɔ olili so he anwo yɛnea: (1) kyɛbɔ Yehowa kyẽa ne kɔwa ɔ, (2) bɛbɔ bengonya ngõa ɔ, ɔne (3) sɛ yekonya ngõa a, bɔ odikyɛ yɛyɛ ɔ.
KYƐBƆ YEHOWA KYẼA NE KƆWA Ɔ
Pɔɔlo krataa bɔ ɔhworɔ mane Tɛsalonikafoɛ asafo ne, ɔfale Yehowa kyẽa ne totole nningyein biemɔ nwo kyɛbɔ ɔkɔyɛ yɛ a, yɛkɔte yebo ɔ (Nea ngyekyemuɛ 3)
3. Nzuati yeɛ Bible ne kã kyɛ Yehowa kyẽa ne kɔwa kyɛbɔ awueniɛ ba kɔngɔen ɔ? (Nea foto ne koso.)
3 “Ɔkɔwa kyɛbɔ awueniɛ ba kɔngɔen ɔ.” (1 Tɛs. 5:2) Nningyein nzã bɔ ɔmaa yenwu kyɛbɔ Yehowa kyẽa ne kɔwa ne, sɔ dwirɛ he yeɛ olimoa ɔ. Kyɛbɔ yɛse ne, mmerɛ pẽe ne, awuefoɛ ba kɔngɔen na bɛba koso a, bɛmmɔ amaneɛ. Sɔ ala yeɛ Yehowa kyẽa ne kɔyɛ ɔ, na ɔkɔyɛ mmeni pẽe nwanwa. Yɛbɔ yɛsõ Yehowa ne pó, ebia kyɛbɔ Yehowa kyẽa ne kɔwa ne kɔyɛ yɛ nwanwa paa. Nakoso yɛlé gyidie paa kyɛ yekonya ngõa.
4. Nzuati yeɛ Bible ne fa Yehowa kyẽa ne toto brasua bɔ aworɛ ahã ye nwo ɔ?
4 “Ɔkɔwa tekyɛ ɛyalɛ bɔ brasua fa nu, mmerɛ bɔ aworɛ ahã ye ɔ.” (1 Tɛs. 5:3) Sɛ brasua nwonzɛ a, ɔnze mmerɛ pɔtẽe bɔ ɔkɔwo ɔ, na ɛyalɛ bɔ ɔkɔfa nu ne koso, nna yemukoraati yeɛ ɔse ɔ. Nakoso ɔse paa kyɛ, kyɛbɔ ɔte biala ɔkɔwo. Sɔ ala yeɛ Yehowa kyẽa ne koso, yɛnze mmerɛ anaa kyẽa deinn bɔ ɔkɔwa ɔ. Nakoso yedé yedi paa kyɛ, kyɛbɔ ɔte biala ɔkɔwa, na abɔnefoɛ nemɔ koso ɔkɔsɛkye bɛ.
5. Nzuati yeɛ Bible ne fa Yehowa kyẽa ne toto mmerɛ bɔ aleɛ ahẽ nwo ɔ?
5 Ɔkɔwa tekyɛ mmerɛ bɔ aleɛ ahẽ ɔ. Pɔɔlo sá hãne kyɛ, Yehowa kyẽa ne kɔwa kyɛbɔ aleɛ baahẽ a, ɔkora fũ awueniɛ nu ne. (1 Tɛs. 5:4) Sɛ awuefoɛ bewia nikye, ná bɛfa b’adwene besie nningyein pẽe bɔ bekowia naso a, bɛnye kɔwa bɛnwo so ne, né aleɛ ahẽ maa bahye bɛ. Sɔ ala yeɛ anwohiahia pirikua ne kɔyɛ ɔ. Bɛbɔ bɛkɔso bɛyɛ nningyein bɔ ɔttemayé ne, Nyameɛ kyẽa ne kofũ bɛnu, na ɔkɔsɛkye bɛ. Yeti sɛ yenguro kyɛ anwohiahia pirikua ne kofũ yɛnu a, yede odikyɛ “yɛfa bra pá, ne tenenee, ɔne nahorɛ amukoraa” yɛsõ Yehowa. (Ɛfe. 5:8-12) Afei bɛbɔ bengonya ngõa wɔ anwohiahia pirikua nanu ne, Pɔɔlo fale bɛ totole nningyein nyɔ bie nwo.
NWAMƆ YEƐ BENGONYA NGÕA WƆ YEHOWA KYẼA NANU Ɔ?
6. Sɛ Bible kã kyɛ mmeni pẽe balafe a, okyire sɛɛ? (1 Tɛsalonikafoɛ 5:6, 7)
6 “Bɛbɔ balafe ne.” (Kenga 1 Tɛsalonikafoɛ 5:6, 7.) Pɔɔlo hãne kyɛ bɛbɔ bengonya ngõa wɔ Yehowa kyẽa nanu ne, bɛte kyɛ mmenia bɔ balafe ɔ. Ɛnnɛ, mmeni pẽe bɔ bɛwɔ ewiase nanu ne, bɛte kyɛ mmenia bɔ bala ɔ. (Rom. 11:8) Ɔnate ɛhe ati, nningyein bɔ osisi wɔ ewiase bɔ okyire kyɛ yɛwɔ “ayieleɛ mmerɛ nanu,” na ɔngɔhyɛ anwohiahia pirikua ne kɔwa ne, bennwu ye. Ɔtɔ mmerɛ bie a, edwirɛ bie kora si, na ɛhẽne maa mmeni pẽe nya adwene kyɛ Nyameɛ kyẽa ne ɔba. Yeti ɔba sɔ a, betie Ahennie nanwo nzɛmba bɔ yɛkã ne. Nakoso nzieɛn ekonwui ne, né anigye bɔ bɛfa betie ne, wahɔ ase koraa. Ebiemɔ wɔ berɛ a, bedé bedi kyɛ Yehowa kyẽa ne kɔwa, nakoso b’adwene yɛ bɛ kyɛ ɔkɔhyɛ kora ná wawa. (2 Pet. 3:3, 4) Nakoso yɛbɔ yɛsõ Yehowa ne de, odikyɛ yɛkae kyɛ Yehowa kyẽa ne apingyé paa.
7. Nzuati yeɛ Bible ne kã kyɛ bɛbɔ Yehowa kɔsɛkye bɛ ne, bɛte kyɛ mmenia bɔ banõ nzãa babo ɔ?
7 “Bɛbɔ banõ nzãa babo ɔ.” Somafoɛ Pɔɔlo hãne kyɛ bɛbɔ Yehowa kɔsɛkye bɛ ne, bɛte kyɛ mmenia bɔ banõ nzãa babo ɔ. Sɛ ebie nõ nzãa bo ná asane bie ba a, ɔngora ndwẽ yenwo. Yeti, yenye kɔwa yenwo so ne, ná edwirɛ ato ye. Sɔ ala yeɛ abɔnefoɛ koso te ɔ. Ɔnate kyɛ bendie Nyameɛ dwirɛ nati, Yehowa kyẽa ne dwu a, ɔkɔsɛkye bɛ. Nakoso yɛbɔ yɛte Kristofoɛ ne de, Bible ne tu yɛ foɛ kyɛ, odikyɛ yɛmaa yɛnye da berɛ. (1 Tɛs. 5:6) Ebie bɔ wasũa Bible nanwo dwirɛ wahɔ sĩɛ hãne kyɛ: “Sɛ bɛkã kyɛ ebie nye la berɛ a, okyire kyɛ sona ne adwene nu la berɛ, na ɛhẽne maa ɔkora si gyinayɛɛ bɔ ɔte pá.” Bɔ yeti yeɛ odikyɛ yɛmaa yɛnye da berɛ yeɛ ole kyɛ, mmerɛ bɔ ewiase he kɔ y’ayieleɛ ne, mmenia kɔhɔso kɔhyɛ yɛ kyɛ yɛfa yɛnwo yewura amanyɔnzɛm nu. Afei nningyein bɔ ɔttemayé bɔ ɔkɔso wɔ ewiase nanu ne koso, bɛkɔhyɛ yɛ kyɛ yɛyɛ bie. Nakoso sɛ edwirɛ bɔ ɔte sɔ to yɛ a, ɔnzɛkyɛ yesuro. Nzuati ɔ? Ofikyɛ sɛ yɛfa yɛnwo yɛto Nyameɛ so a, ɔkɔboka yɛ maa yekosi gyinayɛɛ pá.—Luka 12:11, 12.
YƐKƆYƐ SƐƐ NÁ YASIESIE YƐNWO YAMA YEHOWA KYẼA NE?
Kyɛbɔ sogyaniɛ wura buralɛ fa bɔ yenwo waen ne, sɔ ala yeɛ yɛ koso sɛ yenya gyidie, ɔdɔ, na yɛfa y’adwene yesie anyelasoɛ bɔ yɛlé ye naso a, ɔkɔboka yɛ maa yɛnye kɔla berɛ, ná yasiesie yɛnwo yama Yehowa kyẽa ne (Nea ngyekyemuɛ 8, ɔne 12)
8. Kyɛbɔ 1 Tɛsalonikafoɛ 5:8 kã ne, subaen benimɔ yeɛ ɔkɔboka yɛ maa yekosiesie yɛnwo yɛkɔma Yehowa kyẽa ne ɔ? (Nea foto ne koso.)
8 “Ɛmɔma yɛfa kõɛ buralɛ yɛkata yɛ hue so . . . na yɛfa . . . kõɛ buralɛ kyerɛ yewura.” Pɔɔlo hãne kyɛ yɛbɔ yɛte Kristofoɛ ne, yɛte kyɛ sogyafoɛ bɔ basiesie bɛnwo bama kõɛ ɔ. (Kenga 1 Tɛsalonikafoɛ 5:8.) Sɛ ebie te sogyaniɛ a, odikyɛ mmerɛ biala osiesie yenwo to berɛ, kyɛbɔ ɔkɔyɛ a, kõɛ ba a, ongofũ ye nu ɔ. Sɔ ala yeɛ odikyɛ yɛ koso yɛyɛ ɔ. Odikyɛ yɛfa gyidie ne ɔdɔ yɛyɛ kõɛ buralɛ yɛkata yɛ hue so, na yɛfa anyelasoɛ bɔ yɛlé ye ne yɛyɛ buralɛ kyerɛ yewura. Sɛ yɛyɛ sɔ a, ɔkɔboka yɛ maa yekosiesie yɛnwo yɛkɔma Yehowa kyẽa ne.
9. Sɛ yɛlé gyidie a, sɛɛ yeɛ ɔkɔboka yɛ ɔ?
9 Sɛ yɛlé gyidie ne ɔdɔ a, ɔboka yɛ maa yesuesũa Yesu, na osa boka yɛ maa yefi y’ahõne mukoraati nu yedi nahorɛ yɛma Yehowa. Sɛ yɛyɛ sɔ a, yɛkɔhora yekonya awerɛhyɛmuɛ kyɛ Yehowa koyira yɛ. (Heb. 11:6) Yeliemamɔ pẽe yeɛ beyia ɛpɔen, anaa asetena nu ayɛ se ama bɛ ɔ, nakoso daa bedi nahorɛ bɛma Yehowa. Sɛ yesuesũa bɔ bɛyɛ ne a, ɔmva yenwo ne bɔ ɔkɔto yɛ biala ne, yekonya Yehowa nu gyidie. Ebiemɔ koso wɔ berɛ a, adwuma bɔ ɔkɔmaa bekonya esikaa pẽe ne, bayakyi kyɛbɔ ɔkɔyɛ a, bɛkɔfa mmerɛ pẽe bɛkɔyɛ sõen adwuma ne ɔ. Sɛ yesuesũa bɛ a, ɔkɔboka yɛ maa yɛngɔfa yɛ mmerɛ mukoraati yɛngɔpena esikaa.b
10. Ɔdɔ bɔ yɛlé yɛma Nyameɛ ɔne mmenia ne, sɛɛ yeɛ ɔboka yɛ maa yɛyɛ asɛnga adwuma ne ɔ?
10 Sɛ yɛlé ɔdɔ a, ɔboka yɛ maa yɛnye da berɛ mmerɛ bɔ yɛnwondɛ Yehowa kyẽa ne. (Mat. 22:37-39) Ɔdɔ bɔ yɛlé yɛma Nyameɛ nati, yɛyere yɛnwo yɛyɛ asɛnga adwuma ne, ɔmva yenwo ne bɔ ɔkɔto yɛ biala ne. (2 Tim. 1:7, 8) Ɔnate ɔdɔ bɔ yɛlé yɛma mmenia nati, yɛfa fon so yedi bɛ adanzeɛ, na yɛtworɔ ngrataa yɛma ebiemɔ koso. Sɛ mmenia anndie edwirɛ bɔ yɛkã ne pó a, yɛmma yɛ abanu mmu, ofikyɛ yedé yedi kyɛ kyẽabie bɛkɔhora bɛkɔsesã, ná baasõ Yehowa.—Hes. 18:27, 28.
11. Sɛ yɛdɔ yeliemamɔ Kristofoɛ a, sɛɛ yeɛ ɔkɔboka yɛ ɔ? (1 Tɛsalonikafoɛ 5:11)
11 Yeliemamɔ Kristofoɛ koso, odikyɛ yɛdɔ bɛ. Atẽe kõ bɔ yɛfa so yɛyɛ sɔ yeɛ ole kyɛ, ‘yɛhyɛ yɛnwo ngunaen na yɛbokaboka yɛnwo.’ (Kenga 1 Tɛsalonikafoɛ 5:11.) Sɛ sogyafoɛ kɔ kõɛ a, bɛbokaboka bɛnwo. Nakoso ɔtɔ mmerɛ bie a, sogyaniɛ bie kora pira obiɛngõ sogyaniɛ mmerɛ bɔ wanhyɛ da ɔ. Sɔ ala yeɛ ɔtɔ mmerɛ bie a, yeliema bie kora yɛ nikyee maa ɔha yɛ ɔ. Nakoso sɛ ɔba sɔ a, ɔnzɛkyɛ yɛyɛ bie yetua ye kerɛ. (1 Tɛs. 5:13, 15) Afei koso odikyɛ yebu asafo nu mbanyi. Sɛ yɛyɛ sɔ a, okyire kyɛ yɛdɔ bɛ. (1 Tɛs. 5:12) Mmerɛ bɔ Pɔɔlo hworɔle krataa ɔɔmane Tɛsalonikafoɛ asafo ne, né bɛtele sɔ asafo ne hyɛlle. Yeti asafo nu mbanyi bɔ né bɛwɔ berɛ ne, né bellé suanwu pẽe, na ebia né bedi mvomsoɛ ahoroɛ. Nakoso né odikyɛ aliemaamɔ fa anidie bɛma bɛ. Yɛ koso odikyɛ yetie asafo nu mbanyi nemɔ. Afei akwangyerɛ biala bɔ bɛkɔfa bɛkɔma yɛ ne, odikyɛ yɛfa yɛyɛ adwuma. Sɛ yɛyɛ sɔ a, ɔkɔboka yɛ paa mmerɛ bɔ anwohiahia pirikua ne awa ne. Ofikyɛ ebia sɔ mmerɛ ne, yengonya akwangyerɛ biala yengofi Bɛtɛl. Yeti akwangyerɛ bɔ asafo nu mbanyi nemɔ kɔfa kɔma yɛ ne, yeɛ okolé yɛ ngõa ɔ. Ɔwɔ nu kyɛ, mvomsoɛ wɔ asafo nu mbanyi nemɔ nwo de, nakoso ɛmɔma yɛbɔ mmɔden kyɛ yɛngɔfa y’adwene yengosie ɛhẽne aso. Ɛmɔma yɛkae kyɛ, Yehowa nate Yesu so yeɛ ɔma mbanyi nemɔ akwangyerɛ ɔ.
12. Anyelasoɛ bɔ yɛlé ye ne, sɛɛ yeɛ ɔboka yɛ ɔ?
12 Sɛ sogyaniɛ wura buralɛ kyerɛ a, ɔbɔ yeti nwo waen. Sɔ ala yeɛ yɛkoso, anyelasoɛ bɔ yɛlé ye ne bɔ y’ahõne nwo waen ɔ. Ɔnate anyelasoɛ bɔ yɛlé ye nati, ɔmaa yebu nningyein bɔ ɔwɔ ewiase nanu ne kyɛ mvasoɛ biala nne so. (Flp. 3:8) Afei koso anyelasoɛ bɔ yɛlé ye ne, ɔmaa yɛ gyidie yɛ se, na ɔboka yɛ maa yegyina ɔhaw biala bɔ ɔkɔto yɛ ne noa. Ɛmɔma yɛnea bɔ ɔtole Wallace ne ɔye Laurinda, bɔ bɛyɛ sõen adwuma ne wɔ Africa ne. Mmerɛ bɔ COVID-19 anwonyerɛ ne wale ne, Wallace maame wuli, na Laurinda koso, ye baba wuli. Sɔ dwirɛ he amukoraati sili wɔ dapɛen nzã pɛ nu. Ɔnate kyɛ sɔ mmerɛ ne, né COVID-19 anwonyerɛ nanu ayɛ se paa nati, bangora sɛen ne bie kɔ. Yede, nzu yeɛ ɔbokale bɛ maa bɛhora begyinane bɔ ɔtole bɛ ne noa ɔ? Wallace hãne kyɛ: “Ɛyɛ a medwenedwene kyɛbɔ Yehowa kotingyé mmenia kɔwa ewiase foforɛ nanu nanwo. Sɔ mmerɛ ne, yekosa yekonwu bɛ biekũ, na ɛberɛ de, bekonya anwoserɛ.” Ɔtoale so kyɛ: “Ɔtɔ mmerɛ bie a, né me wora abɔ paa, nakoso sɛ medwenedwene anyelasoɛ bɔ nné ye nanwo a, ɔmaa m’ahõne tɔ me kunu.”
13. Sɛ yɛpena kyɛ Yehowa fa ye honhom krongron ne boka yɛ a, nzu yeɛ odikyɛ yɛyɛ ɔ?
13 ‘Nnɛmaa ɛmɔnua honhom ne sẽe ne.’ (1 Tɛs. 5:19) Pɔɔlo fale kyɛbɔ Yehowa honhom krongron ne boka yɛ ne totole kyɛbɔ sẽe sɔ nanwo. Sɛ yɛlé Nyameɛ honhom ne a, ɔboka yɛ maa yɛyɛ bɔ okuro ɔ. Afei koso adwuma biala bɔ Yehowa kɔfa kowura yɛ sa ne, yɛyere yɛnwo yɛyɛ. (Rom. 12:11) Yede, sɛ yɛpena kyɛ Yehowa fa ye honhom ne boka yɛ a, nzu yeɛ odikyɛ yɛyɛ ɔ? Odikyɛ yɛbɔ mbaeɛ, yesũa Bible bɔ Nyameɛ maa bɛfale ye honhom bɛhworɔle ne, na yɛne ye ahyehyɛdeɛ bɔ honhom kyire ye atẽe ne yɛbɔ daa. Sɛ yɛyɛ sɔ a, ɔkɔmaa yekonya subaen pá bɔ honhom ne maa yenya ye ne bie.—Gal. 5:22, 23.
Bisa wɔnwo kyɛ, aso meyɛ nningyein bɔ ɔkɔmaa Nyameɛ kɔfa ye honhom ne kɔboka me anaa?’ (Nea ngyekyɛmuɛ 14)
14. Sɛ Yehowa kɔhɔso kɔfa ye honhom ne kɔboka yɛ a, nzu yeɛ ɔnzɛkyɛ yɛyɛ ɔ? (Nea foto ne koso.)
14 Sɛ Yehowa fa ye honhom krongron ne ma yɛ a, odikyɛ yɛyere yɛnwo paa kyɛ “yɛngɔmaa honhom ne sẽe ne ngonua.” Bɛbɔ bɛdwenedwene nningyein bɔ ɔte pá nwo, na bɛmaa bɛ abrabɔ nwo te ne, yeɛ Nyameɛ fa ye honhom ne boka bɛ ɔ. Yeti sɛ yɛkɔso yɛdwenedwene nningyein bɔ ɔttemayé nwo, na yɛbɔ bra bɔ yenwo nde a, Yehowa ngɔfa ye honhom ne ngɔboka yɛ kõ. (1 Tɛs. 4:7, 8) Afei koso, sɛ Nyameɛ kɔhɔso kɔfa ye honhom ne kɔboka yɛ a, “ɔnzɛkyɛ yebu ngɔmhyɛ animtia.” (1 Tɛs. 5:20) “Ngɔmhyɛ” bɔ ɔhãne yenwo dwirɛ wɔ wa ne, yeɛ ole nningyein bɔ Yehowa nate ye honhom naso kyirekyire yɛ ne. Sɔ nningyein ne bie yeɛ ole, Yehowa kyẽa bɔ daa bɛkae yɛ kyɛ ɔngɔhyɛ biala ɔkɔwa ne. Yeti ɔnzɛkyɛ yenya adwene llé kyɛ, Yehowa kyẽa ne nnya walle, anaa ɔngɔwa wɔ yɛ mmerɛ he aso. Mmom ne, “odikyɛ yetira abrabɔ krongron ne nyamesom pá nu.” Sɛ yɛyɛ sɔ a okyire kyɛ, yedé yedi paa kyɛ ɔngɔhyɛ Yehowa kyẽa ne kɔwa.—2 Pet. 3:11, 12.
“ƐMƆSÓ NNINGYEIN AMUKORAA BƐNEA”
15. Edwirɛ bɔ Satan nate Nyameɛ pɔfoɛ nemɔ so kɔfa kɔto dwaa ne, yɛkɔyɛ sɛɛ na yamma wanlakalaka yɛ? (1 Tɛsalonikafoɛ 5:21)
15 Ɔngɔhyɛ biala, Nyameɛ pɔfoɛ nemɔ kɔfa kɔto dwaa kyɛ: “Yɛlé asomdwee ne anwotɔ!” (1 Tɛs. 5:3) Sɔ edwirɛ bɔ ɔtte nahorɛ bɔ bɛkɔfa bɛkɔto dwaa wɔ ewiase mukoraati ne, ɔkɔlakalaka mmeni pẽe. (Nye. 16:13, 14) Yede, sɛ yɛmbena kyɛ bɛlakalaka yɛ a, nzu yeɛ odikyɛ yɛyɛ ɔ? “Odikyɛ yesó nningyein amukoraa yɛnea.” (Kenga 1 Tɛsalonikafoɛ 5:21.) Greek dwirɛ bɔ behyirele yebo “ɛmɔsó bɛnea ne,” okyire kyɛbɔ bɛfa esikaa kɔkorɛ bɛto sẽe nu bɛnea kyɛ ɔte pá, anaakyɛ ɔttemayé ne. Yeti edwirɛ biala bɔ yɛkɔte ne, odikyɛ yɛto yɛboase yɛneanea nu yɛnea kyɛ ɔte nahorɛ, anaakyɛ ɔtte nahorɛ. Sɔ yeɛ né odikyɛ Tɛsalonikafoɛ nemɔ yɛ ɔ. Yɛkoso mmerɛ bɔ waha kãa maa anwohiahia pirikua ne ba ne, sɔ ala yeɛ odikyɛ yɛyɛ ɔ. Yeti sɛ yɛte edwirɛ bie a, odikyɛ yɛfa yɛtoto bɔ Bible ne, ɔne bɔ Yehowa ahyehyɛdeɛ ne kã nanwo. Sɛ yɛyɛ sɔ a, okyire kyɛ yɛse nworɛ. Afei koso ɔngɔmaa edwirɛ bɔ Nyameɛ pɔfoɛ nemɔ kɔfa kɔto dwaa ne, ɔngɔlakalaka yɛ.—Any. 14:15; 1 Tim. 4:1.
16. Anyelasoɛ beni yeɛ yɛlé ye ɔ, na nzu yeɛ odikyɛ yɛbɔ mmɔden yɛyɛ ɔ?
16 Yenu biala nze bɔ okosi ɛhema ɔ. (Yak. 4:14) Nakoso yɛlé gyidie paa kyɛ Yehowa kɔbɔ ye mmenia nwo waen wɔ anwohiahia pirikua nanu. Sɛ ebia yewu kora na anwohiahia pirikua ne awa po a, yɛse kyɛ Yehowa kotingyé yɛ. Ebiemɔ konya daa ngõa wɔ anwuro, na ebiemɔ koso kɔtena aseɛ he aso daa wɔ Paradise. Yeti, ɛmɔma yɛnye la berɛ, na yesiesie yɛnwo yɛma Yehowa kyẽa bɔ ɔba ne.
DWEIN 150 Hwehwɛ Nyankopɔn na Nya Nkwa
a Wɔ Tɛsalonikafoɛ Nwomaa Bɔ Olimoa yeti 5 ne, Pɔɔlo fale Yehowa kyẽa ne totole nningyein pẽe nwo, na ɛhẽne maa yenwu kyɛbɔ Yehowa kyẽa ne kɔyɛ ɔ. Yede, sɛ bɛkã Yehowa “kyẽa” a, yeɛ ole nzu? Na mmerɛ beni yeɛ ɔkɔwa ɔ? Sɛ ɔba a, nwamɔ yeɛ bekonya ngõa ɔ, na nwamɔ yeɛ bengonya ngõa ɔ? Yɛkɔyɛ sɛɛ né yasiesie yɛnwo yama sɔ kyẽa ne? Somafoɛ Pɔɔlo dwirɛ bɔ ɔhãne bɔ yɛbaasusu yenwo ne, ɔkɔboka yɛ maa yekonya sɔ nzɛmmisa nanwo mmuayɛɛ.
b Nea edwirɛ bɔ yeɛ ole “Wotuu Wɔn Ho Mae Koraa” bɔ ɔwɔ Twi nu ne koso.