ADESŨA BƆ ƆTƆ SO 46
Yehowa Ama Yɛ Adanzeɛ Bɔ Okyire Kyɛ Ɔkɔmaa Aseɛ Ne Kɔyɛ Paradise Ɔ
“Ebiala bɔ ɔkɔhã saleɛ dwirɛ kɔma ye nwo wɔ aseɛ ne aso ne, ɔkɔfa nahorɛlilɛ Nyameɛ ne yeɛ okoyira ye nwo ɔ.”—YES. 65:16.
DWEIN 3 Yɛn Ahoɔden, Yɛn Anidaso ne Yɛn Ahotoso
BƆ YƐBAASŨA Ɔa
1. Edwirɛ beni yeɛ né diyifoɛ Yesaya pena kyɛ oliemaamɔ Yisraelfoɛ nemɔ te yebo ɔ?
DIYIFOƐ YESAYA hãne Yehowa nwo dwirɛ kyɛ ɔte “nahorɛlilɛ Nyameɛ.” Edwirɛ “nahorɛlilɛ” bɔ bɛfa bɛyɛle adwuma wɔ sɔ tworɔnzɛm he anu ne, bɔ okyire yeɛ ole “amen.” (Yes. 65:16) Sɛ bɛkã “amen” a, okyire kyɛ “ɔyɛ berɛ,” anaa “ɔbra nu.” Sɛ Bible ne kã Yehowa anaa Yesu nwo dwirɛ na ɔfa “amen” bata yenwo a, okyire kyɛ edwirɛ bɔ ɔka fa bɛnwo ne te nahorɛ na ɔkɔwa nu pɛpɛɛpɛ. Yeti bɔ né Yesaya pena kyɛ oliemaamɔ Yisraelfoɛ nemɔ te yebo yeɛ ole kyɛ, edwirɛ biala bɔ Yehowa kɔhã ne, ɔkɔwa nu pɛpɛɛpɛ. Ɛbɔ ahoroɛ bɔ Yehowa ahyɛ bɔ wamaa wawa nu ne, ɔte adanzeɛ bɔ okyire kyɛ sɔ dwirɛ bɔ Yesaya hãne ne te nahorɛ.
2. Nningyein bɔ Yehowa ahyɛ bɔ kyɛ ɔkɔyɛ kɔma yɛ kyẽabie ne, nzu yeɛ ɔmaa yenwu kyɛ ɔkɔwa nu ɔ, na edwirɛ benimɔ yeɛ yekonya yenwo mmuayɛɛ wɔ adesũa he anu ɔ?
2 Nningyein bɔ Yehowa ahyɛ bɔ kyɛ ɔkɔyɛ kɔma yɛ kyẽabie ne, aso yele gyidie kyɛ ɔkɔwa nu pɛpɛɛpɛ anaa? Yesaya hworɔle ye nwomaa ne kɔyɛ afoɛ 800 sĩ ne, somafoɛ Pɔɔlo maa yenwuni bɔ yeti yeɛ yele gyidie kyɛ Nyameɛ bɔhyɛ mukoraati kɔwa nu ɔ. Pɔɔlo hãne kyɛ: “Nyameɛ ngɔhora ngɔpɛ ngondombo.” (Heb. 6:18) Kyɛbɔ asue ti kõmapɛ ngɔhora ngopu nzue bɔ ɔyɛ fɛ, ɔne nzue bɔ ɔyɛ wee ne, sɔ ala yeɛ Yehowa bɔ ɔte nahorɛ Nyameɛ ne, ɔngɔhora ngɔpɛ ngondombo llé ɔ. Ɔnate ɛhe ati, nningyein bɔ Yehowa ahyɛ bɔ kyɛ ɔkɔyɛ kɔma yɛ kyẽabie ne, yele gyidie kyɛ yemukoraati kɔwa nu. Yede, yebisa kyɛ, nzu yeɛ Yehowa ahyɛ bɔ kyɛ ɔkɔyɛ kɔma yɛ kyẽabie ɔ? Afei nningyein bɔ Yehowa ahyɛ bɔ kyɛ ɔkɔyɛ kɔma yɛ ne, nzu yeɛ ɔmaa yenwu kyɛ okoli so ɔ? Adesũa he kɔboka yɛ maa yekonya edwirɛ hemɔ nwo mmuayɛɛ.
NZU YEƐ YEHOWA AHYƐ YENWO BƆ Ɔ?
3. (a) Bible nu bɔhyɛ beni yeɛ yɛnye gye yenwo paa ɔ? (Nyekyire 21:3, 4) (b) Sɛ yɛkã sɔ bɔhyɛ nanwo dwirɛ yekyire mmenia a, nzu yeɛ ebiemɔ kã ɔ?
3 Nningyein ahoroɛ bɔ Nyameɛ ahyɛ bɔ kyɛ ɔkɔyɛ kɔma yɛ kyẽabie ne, ɔte nikyee bɔ Yehowa Adanzefoɛ bɔ yɛwɔ ewiase mukoraati ne yɛnye gye yenwo paa ɔ. (Kenga Nyekyire 21:3, 4.) Yehowa ahyɛ yɛ bɔ kyɛ mmerɛ bie kɔwa bɔ ‘okokyikyi yɛ nye abo moen amukoraa, na ewue nne berɛ ko, aworabɔlɛ ne esuɛ ne yealɛ biala nne berɛ ko.’ Sɔ asetena pá bɔ Bible ne kã kyɛ yekonya ye wɔ Paradise kyẽabie ne, yenu pẽe nye gye yenwo kyɛ yɛkɔhã yenwo dwirɛ yɛkɔfa yɛkɔkyekye mmenia wora wɔ asɛnga nu. Nakoso sɔ Bible nu dwirɛ bɔ ɔkã ahõne he, sɛ yɛkã yenwo dwirɛ yekyire mmenia wɔ asɛnga nu a, nzu yeɛ ebiemɔ kã ɔ? Ebiemɔ wɔ berɛ a, edwirɛ bɔ bɛkã yeɛ ole kyɛ, “Sɔ Bible nu dwirɛ he de, menné menni kyɛ ɔkɔhora kɔwa nu.”
4. (a) Mmerɛ bɔ Yehowa hyɛle Paradise asetena nwo bɔ ne, nzu yeɛ né ɔse kyɛ okosi kyẽabie ɔ? (b) Sɛ nningyein bɔ Yehowa ahyɛ yenwo bɔ ne la ahãmeɛ a, nzu biekũ yeɛ wayɛ ɔ?
4 Nahorɛ dwirɛ yeɛ ole kyɛ, mmerɛ bɔ Yehowa fale ye honhom hãne somafoɛ Yohane maa ɔhworɔle asetena bɔ yekonya ye wɔ Paradise nwo dwirɛ ne, né Yehowa se kyɛ yɛkɔhã yenwo dwirɛ yekohyire mmenia wɔ asɛnga nu ɛnnɛ. Afei koso né Yehowa se kyɛ mmenia bɔ yɛkɔhã sɔ “nningyein foforɛ” bɔ ɔbaayɛ nanwo dwirɛ yekohyire bɛ ne, benu biemɔ ngole ngoli. (Yes. 42:9; 60:2; 2 Kor. 4:3, 4) Yede, yɛkɔyɛ sɛɛ né yaboka mmenia maa banya gyidie kyɛ nhyiraa bɔ Nyekyire 21:3, 4 kã yenwo dwirɛ ne, ɔkɔwa nu amba ɔ? Na yɛ koso, nzu yeɛ ɔkɔboka yɛ maa yɛkɔhɔ so yekonya gyidie kyɛ nningyein ahoroɛ bɔ Yehowa ahyɛ bɔ kyɛ ɔkɔyɛ ne mukoraati kɔwa nu ɔ? Bɔ ɔte yeɛ ole kyɛ, edwirɛ bɔ Yehowa afa ahyɛ yɛ bɔ ne, wangã ye mbaen, na mmom wama yɛ adanzeɛ bɔ ɔkɔboka yɛ maa yekonya gyidie kyɛ bɔ wahã ne te nahorɛ, na ɔkɔwa nu. Yede sɔ adanzeɛ ne, ebie yeɛ ole beni?
YEHOWA AMA YƐ ADANZEƐ BƆ OKYIRE KYƐ ƐBƆ BƆ WAHYƐ NE KƆWA NU
5. Adanzeɛ bɔ ɔmaa yenwu kyɛ nningyein bɔ Yehowa ahyɛ bɔ kyɛ ɔkɔyɛ kɔma yɛ wɔ Paradise ne kɔwa nu ne, nisua yeɛ yenwu bie ɔ?
5 Adanzeɛ bɔ ɔmaa yenwu kyɛ nningyein bɔ Yehowa ahyɛ bɔ kyɛ ɔkɔyɛ kɔma yɛ wɔ Paradise ne kɔwa nu ne, Nyekyire nwomaa ne kã ebie nwo dwirɛ. Ɔkã kyɛ: “Na bɔ ɔte ahennie bia ne aso ne hane kyɛ, ‘Tie! Meyɔ nningyein mukoraa foforɛ.’ Na osa sele me kyɛ, ‘Kyerɛ ɛhe, ofikyɛ edwirɛ hemɔ te turoloo ne nahorɛ.’ Na osele me kyɛ, ‘Wayie! Me ole Alfa ne Omega, Ahyɛaseɛ ne Ayieleɛ.’”—Nye. 21:5, 6a.
6. Nzuati yeɛ edwirɛ bɔ ɔwɔ Nyekyire 21:5, 6 ne maa yenya gyidie kyɛ nningyein bɔ Nyameɛ ahyɛ yenwo bɔ ne kɔwa nu ɔ?
6 Nningyein bɔ Nyameɛ ahyɛ yenwo bɔ, bɔ yenwo dwirɛ wɔ Nyekyire nwomaa nanu ne, nzuati yeɛ ɔmaa yɛ gyidie yɛ se ɔ? Atẽe bɔ Yehowa fale so hãne edwirɛ bɔ ɔwɔ sɔ tworɔnzɛm nanu ne, ɔte kyɛbɔ ebie fa yesa timu krataa bie so maa odi mu ne. Sɔ nningyein bɔ Yehowa ahyɛ yenwo bɔ ne, yenwu yenwo dwirɛ wɔ Nyekyire 21:3, 4. Nakoso wɔ ngyekyɛmuɛ 5 ne 6 nanu ne, yenwu edwirɛ bɔ Yehowa hãne bɔ okyire kyɛ, wafa yesa watimu bɔ wahã naso ɔ. Ɛhẽne maa yenwu kyɛ bɔ Yehowa ahyɛ bɔ kyɛ ɔkɔyɛ kɔma yɛ ne, ɔkɔwa nu pɛpɛɛpɛ. Yede ɛmɔma yɛnea bɔ Yehowa ayɛ bɔ ɔmaa yedé yedi kyɛ nningyein bɔ wahyɛ yenwo bɔ ne, ɔkɔwa nu ɔ.
7. Nwa yeɛ ɔhãne edwirɛ bɔ ɔwɔ Nyekyire 21:5 ne, na nzuati yeɛ yɛkɔhora yekole yekoli ɔ?
7 Adanzeɛ bɔ ɔmaa yenwu kyɛ nningyein bɔ Nyameɛ ahyɛ yenwo bɔ ne kɔwa nu ne, Nyekyire nwomaa ne hãne yenwo dwirɛ kyɛ: “Bɔ ɔte ahennie bia ne aso ne hane kyɛ.” (Nye. 21:5a) Sɔ dwirɛ bɔ Yehowa bɔbɔ hãne ne, ofité pɛen nzã wɔ Nyekyire nwomaa nanu, na ɛhe te enu kõ. Bɔ ɔte yeɛ ole kyɛ, nna abɔfo bie yeɛ ɔhãne sɔ dwirɛ ne ɔ, yeɛ ɔtte Yesu koso yeɛ ɔhãne ɔ. Na mmom Yehowa bɔbɔ deinn yeɛ ɔhãne ɔ. Ɔnate ɛhe ati, edwirɛ bɔ Yehowa hã toale so wɔ sɔ tworɔnzɛm nanu ne, yɛkɔhora yekole yekoli. Nzuati ɔ? Ofikyɛ Yehowa de, “ɔmbɛ ngondombo.” (Tito 1:2) Ɛhe maa yenwu kyɛ, edwirɛ bɔ ɔwɔ Nyekyire 21:5, 6 ne kɔwa nu atẽe biala so.
“TIE! MEYƆ NNINGYEIN MUKORAA FOFORƐ”
8. Nzu yeɛ Yehowa hã fasili ye pi kyɛ bɔ wahyɛ yenwo bɔ ne mukoraati kɔwa nu ɔ? (Yesaya 46:10)
8 Ɛmɔma yɛnea edwirɛ bie bɔ Yehowa hã fahyɛle ye dwirɛ nabo ɔ. Ɔhãne kyɛ: “Tie!” (Nye. 21:5) Edwirɛ bɔ yeɛ ole “tie!” bɔ behyirele yebo befili Greek dwudwolɛ nu ne, ofité pẽe wɔ Nyekyire nwomaa nanu. Nwomaa bie hyirele nu kyɛ: “Sɛ ebie baahã edwirɛ bie, na odimoa kã “tie!” a, né ɔpena kyire kyɛ odikyɛ ɛyɛ asoɛ tie edwirɛ bɔ oli so bɔ ɔbaahã ne yé.” Mmerɛ bɔ Nyameɛ hãne edwirɛ bɔ yeɛ ole “tie!” ne yiele ne, ɔhã toale so kyɛ: “Meyɔ nningyein mukoraa foforɛ.” Yehowa kɔyɛ sɔ nningyein nemɔ kyẽabie, nakoso ɔnate kyɛ ɔse kyɛ okoli ye bɔhyɛ so nati, ɔhãne edwirɛ ne kyɛbɔ wayɛ ye dada ne.—Kenga Yesaya 46:10.
9. (a) Edwirɛ bɔ Yehowa hãne bɔ yeɛ ole kyɛ: “Meyɔ nningyein mukoraa foforɛ” ne, okyire sɛɛ? (b) Nzu yeɛ ɔkɔto “nyameɛso” ne “aseɛ” bɔ ɔwɔ berɛ kesaalae ne ɔ?
9 Edwirɛ bɔ Yehowa hãne wɔ Nyekyire 21:5 bɔ yeɛ ole kyɛ, “Meyɔ nningyein mukoraa foforɛ” ne, nzu yeɛ okyire ɔ? Sɔ dwirɛ ne maa yenwu nningyein nyɔ bie bɔ Yehowa kɔyɛ ɔ. Kõ yeɛ ole kyɛ, Yehowa kɔye nningyein bɔ ɔttemaye bɔ ɔwɔ ewiase he anu ne kofi berɛ. Bɔ ɔtɔ so nyɔ, ɔkɔfa nningyein pá koosie ye gya nu. Yede, ɛmɔma yɛnea nningyein biemɔ bɔ Yehowa kɔye kofi berɛ ɔ. Nyekyire 21:1 kã kyɛ: “Nyameɛso bɔ oli moa ne ne aseɛ bɔ oli moa ne bapɛ nu bahɔ.” “Nyameɛso,” anaa anwuro “bɔ oli moa” ne, ogyi berɛ ma awaen ahoroɛ bɔ Satan ne ye sunzummɔne nemɔ di bɛ so wɔ ewiase he anu ne. (Mat. 4:8, 9; 1 Yoh. 5:19) Odwu mmerɛ bie a, Bible ne kora fa “aseɛ” gyina berɛ ma mmenia bɔ bɛte so ne. (Gye. 11:1; Edw. 96:1) Yeti, “aseɛ bɔ oli moa” ne gyi berɛ ma mmenia bɔ bendie Yehowa dwirɛ bɔ bɛyɛ nningyein bɔ ɔttemayé ne. Sɔ dwirɛ ne maa yenwu kyɛ Yehowa kɔye awaen ahoroɛ, ɔne mmenia bɔ bendie ye dwirɛ ne kofi berɛ koraa. Ɛhẽne sĩ ne, Yehowa kɔfa “nyameɛso foforɛ ne aseɛ foforɛ” kosi bɔ né ɔwɔ berɛ dáa ne gya nu. Bɔ ɛhe kyire yeɛ ole kyɛ, ɔkɔmaa awaen foforɛ koli mmenia bɔ betie ye dwirɛ naso wɔ aseɛ he aso.
10. Nningyein benimɔ yeɛ Yehowa kɔyɛ ye foforɛ ɔ?
10 Wɔ Nyekyire 21:5 ne, Yehowa hãne kyɛ: “Meyɔ nningyein mukoraa foforɛ.” Yede sɔ dwirɛ bɔ Yehowa hãne ne, okyire sɛɛ? Bɔ okyire yeɛ ole kyɛ, Yehowa kosiesie aseɛ ne mukoraati maa ɔkɔyɛ kama, na mmenia bɔ bɛkɔtena so ne koso, bɛkɔyɛ bɛbɔ bɔne biala nne bɛnwo ɔ. Yehowa nate Yesaya so hãne kyɛ ɔkɔmaa aseɛ ne mukoraati so kɔyɛ nyemene te kyɛ Eden turo. Nna ɛhẽne ngome yeɛ Yehowa kɔyɛ ɔ, na mmom mmenia bɔ bɛkɔtena aseɛ naso koso, ɔkɔsa bɛ anwonyerɛ maa ebiala nwo kɔtɔ ye. Mmenia bɔ Yehowa kɔsa bɛ anwonyerɛ ne, ebie yeɛ ole bɛbɔ bɛnye asĩ, bɛbɔ bɛso atĩ, ɔne bɛbɔ bɛte abafaen. Afei koso, Yehowa kotingye bɛbɔ bawu ne maa bekosa bɛkɔwa ngõa nu.—Yes. 25:8; 35:1-7.
“EDWIRƐ HEMƆ TE TUROLOO NE NAHORƐ. . . . WAYIE!”
11. Nzu yeɛ Yehowa hãhyirele Yohane kyɛ ɔyɛ ɔ, na nzuati ɔ?
11 Edwirɛ foforɛ beni yeɛ Nyameɛ hãne bɔ ɔmaa yenwu kyɛ, nningyein bɔ wahyɛ yenwo bɔ ne kɔwa nu ɔ? Yehowa hãhyirele Yohane kyɛ: “Kyerɛ ɛhe, ofikyɛ edwirɛ hemɔ te turoloo ne nahorɛ.” (Nye. 21:5) Yehowa maa Yohane nwuni bɔ yeti yeɛ né ɔpena kyɛ ɔtworɔ sɔ dwirɛ ne ɔ. Ɔhãne kyɛ: “Edwirɛ hemɔ te turoloo ne nahorɛ.” Bɔ ɛhe kyire yeɛ ole kyɛ edwirɛ biala bɔ Nyameɛ kɔhã ne, ɔba nu pɛpɛɛpɛ. Ahyɛdeɛ bɔ Yehowa famane Yohane kyɛ “kyerɛ ɛhe” ne, Yohane tiele, na ɔyɛ yɛ fɛ paa kyɛ ɔyɛle sɔ ɔ. Ɔnate kyɛ Yohane hworɔle sɔ dwirɛ ne ati, ɔmaa yɛkora yɛdwenedwene nhyiraa bɔ yekonya ye wɔ Paradise nanwo mmerɛ bɔ yɛkenga yenwo dwirɛ wɔ Bible nanu ne.
12. Mmerɛ bɔ Yehowa hãne kyɛ: “Wayie!” ne, nzu yeɛ né ɔpena kyɛ okyire ɔ?
12 Edwirɛ beni biekũ yeɛ Nyameɛ hãne ɔ? Ɔhãne kyɛ: “Wayie!” (Nye. 21:6) Bɔ ɔmaa Yehowa hãne sɔ yeɛ ole kyɛ, wɔ yenye so ne, onwu ye kyɛ nningyein bɔ wahyɛ bɔ kyɛ ɔkɔyɛ ye wɔ Paradise ne, wawa nu dada. Sɛ Yehowa kã sɔ a ɔte nahorɛ ofikyɛ sɛ ɔhyɛ bɔ a, nikyefee nne berɛ bɔ ɔkɔhora kosi ye atẽe kyɛ ɔngɔma ɔngɔwa nu ɔ. Ɛhẽne sĩ ne, Yehowa sa hãne edwirɛ foforɛ bie bɔ ɔmaa yenwu kyɛ nningyein bɔ wahyɛ yenwo bɔ ne mukoraati kɔwa nu ɔ. Nzu yeɛ ɔhãne ɔ?
“ME OLE ALFA NE OMEGA”
13. Nzuati yeɛ Yehowa hãne kyɛ: “Me ole Alfa ne Omega” ne?
13 Yehowa bɔbɔ dwudwole pɛen nzã wɔ nyekyire bɔ Yohane nyane nanu. (Nye. 1:8; 21:5, 6; 22:13) Wɔ enu biala nu ne, Yehowa hãne kyɛ: “Me ole Alfa ne Omega.” Wɔ Greek dwudwolɛ nu ne, alfa yeɛ olimoa wɔ bɛ ndworɔyɛɛ nu ɔ, na omega yeɛ ɔpɛ yebo ɔ. Yeti mmerɛ bɔ Yehowa hãne kyɛ “Me ole Alfa ne Omega” ne, bɔ né ɔpena kyɛ okyire yeɛ ole kyɛ nikyeebiala bɔ ɔkɔhyɛ yebo kyɛ ɔyɛ ne, okoyie bɔ nikyefee ngɔhora ngosi ye atẽe ɔ.
Sɛ Yehowa hyɛ yebo kyɛ ɔyɛ nikyeebie a, okoyie bɔ nikyefee ngɔhora ngosi ye atẽe ɔ (Nea ngyekyɛmuɛ 14 ne 17)
14. (a) Mmerɛ beni yeɛ Yehowa hãne kyɛ ɔte “Alfa” ɔ, na mmerɛ beni yeɛ ɔkɔhã kyɛ ɔte “Omega” ɔ?(b) Edwirɛ beni yeɛ Yehowa hãne wɔ Gyenesise 2:1-3 ne ɔ?
14 Mmerɛ bɔ Yehowa bɔle Adam ne Hawa ne, ɔmaa benwuni bɔ yeti yeɛ ɔbɔle sona ne aseɛ ɔ. Bible ne kã kyɛ: “Nyameɛ yirale bɛ, na osele bɛ kyɛ, ‘Ɛ́mɔwo ná ɛmɔta, ɛ́mɔyi aseɛ so tɛkyɛ ná ɛmɔli so.’” (Gye. 1:28) Mmerɛ bɔ Yehowa hãne sɔ dwirɛ ne, né ɔte kyɛbɔ ɔkã kyɛ, “Me ole Alfa ne.” Ɛhẽne maa yenwu bɔ wabɔ ye tianu kyɛ ɔkɔyɛ ɔ. Ye ole kyɛ, mmerɛ bie kɔwa bɔ ɔkɔmaa Adam ne Hawa bosofoɛ bɔ bɔne biala nne bɛnwo, ná bɛso yɛ mmerɛ ne kɔtena ase daa wɔ Paradise aseɛ so. Sɛ sɔ dwirɛ ne ba nu a, ɔkɔyɛ kyɛbɔ Yehowa kã kyɛ: “Me ole Omega ne.” Mmerɛ bɔ Yehowa “bɔle anwuro ne aseɛ ne bɛ nu nningyein mukoraa yiele” ne, ɔhãne edwirɛ bie bɔ ɔmaa yenwu kyɛ nikyee bɔ wabɔ ye tianu kyɛ ɔkɔyɛ ne kɔwa nu ɔ. Sɔ dwirɛ ne wɔ Gyenesise 2:1-3. (Kenga.) Yehowa hãne kyɛ kyẽa bɔ ɔtɔ so nzoo ne te krongron. Sɔ dwirɛ ne kyire sɛɛ? Bɔ okyire yeɛ ole kyɛ, bɔ yeti yeɛ Yehowa bɔle sona ne aseɛ ne, yemukoraati kɔwa nu wɔ kyẽa bɔ ɔtɔ so nzoo ne ayieleɛ.
15. Nzuati yeɛ ebia Satan nyane adwene kyɛ wahora wasi Yehowa atẽe wɔ bɔ wabɔ ye tianu kyɛ ɔkɔyɛ nanwo ɔ?
15 Mmerɛ bɔ Adam ne Hawa yɛle Yehowa so asoserɛ ne, bɛɛyɛle abɔnefoɛ. Yeti bɛfale bɔne bɛwole bɛ bosofoɛ, na ɔnate ɛhe aso maa ewue trɛ hãne mmenia mukoraati. (Rom. 5:12) Ɔwale sɔ ne, né waayɛ kyɛ bɔ yeti yeɛ Yehowa bɔle sona kyɛ ɔtena aseɛ he aso daa ne, Satan amaa wangora wamma nu ne. Ebia Satan nyane adwene kyɛ ɔnate bɔ wayɛ nati, ɔkɔyɛ se kɔma Yehowa kyɛ ɔkɔmaa bɔ wabɔ ye tianu kyɛ ɔkɔyɛ ne kɔwa nu ɔ. Anaa ebia né Satan adwene yɛ ye kyɛ sɛ Yehowa kɔhora kɔmaa bɔ wabɔ ye tianu kyɛ ɔkɔyɛ ne kɔwa nu a, sana okũ Adam ne Hawa, na ɔbɔ mmenia foforɛ bɔ bɔne biala nne bɛnwo gua aseɛ he aso. Nakoso sɛ Nyameɛ yɛle sɔ a, ahãa Abɔnzam kɔhã kyɛ wapɛ ngondombo. Nzuati ɔ? Ofikyɛ né Yehowa ahã ye wɔ Gyenesise 1:28 kyɛ, Adam ne Hawa bosofoɛ koyi aseɛ naso tɛkyɛ.
16. Nzuati yeɛ ebia Satan nyane adwene kyɛ Yehowa ngɔhora ngoli ye bɔhyɛ so ɔ?
16 Bɔ yahã yenwo dwirɛ ne la ahãmeɛ a, ɔkɔyɛ kyɛ adwene foforɛ beni yeɛ Satan nyane ɔ? Ebia Satan nyane adwene kyɛ Yehowa kɔmaa Adam ne Hawa kɔwo mmaa, nakoso sɔ mmaa bɔ bɛkɔwo bɛ ne, bɛkɔyɛ abɔnefoɛ bɔ bɛngɔhora bɛngɔtena ase daa ɔ. (Nwo. 7:20; Rom. 3:23) Sɛ ɔwale sɔ a, ahãa Satan kɔhã kyɛ Yehowa angora anni ye bɔhyɛ so. Né sɔ bɔhyɛ ne yeɛ ole kyɛ Yehowa kɔmaa Adam ne Hawa bosofoɛ bɔ bɔne biala nne bɛnwo kɔtena aseɛ he aso daa.
17. Sɛɛ yeɛ Yehowa siesiele ɔhaw bɔ Satan, Adam, ne Hawa maa ɔwale ne ɔ, na nzu yeɛ ofili bɔ ɔyɛle nanu wale ɔ? (Nea foto ne koso.)
17 Yehowa fale atẽe foforɛ so siesiele ɔhaw bɔ Satan, Adam, ne Hawa maa ɔwale ne, kyɛbɔ ɔkɔyɛ a bɔ né wabɔ ye tianu kyɛ ɔkɔyɛ ne kɔwa nu ɔ. Sɔ nikyee bɔ Yehowa yɛle ne, ɔkɔyɛ kyɛ ɔyɛle Satan nwanwa paa. (Edw. 92:5) Yeɛ ole kyɛ ɔmaa Adam ne Hawa wole mmaa, kyɛbɔ né wabɔ ye tianu nala. Ɛhe maa Yehowa ɔɔyɛle ebie bɔ ɔkã nahorɛ ɔ. Afei koso bɔ Yehowa yɛle ne maa yenwu kyɛ nikyebiala bɔ ɔkɔbɔ ye tianu kyɛ ɔkɔyɛ ne, nikyefee ngɔhora ngosi ye atẽe llé. Yehowa nate Yesu Kristo bɔ Bible ne kã yenwo dwirɛ kyɛ ɔte ‘bosoniɛ’ naso ne, okole Adam ne Hawa mmaamɔ bɔ bɛyɛ sotie bɛma ye ne kofi ewue nu. Ɛhẽne kɔmaa bɔ Yehowa abɔ ye tianu kyɛ ɔkɔyɛ ne kɔwa nu. (Gye. 3:15; 22:18) Satan annya adwene llé kyɛ né Yehowa kɔyɛ sɔ nhyehyɛɛ he. Nzuati yeɛ yɛkã sɔ ɔ? Ofikyɛ ɔdɔ bɔ Yehowa le ma sona nati yeɛ ɔmaa ɔyɛle sɔ nhyehyɛɛ he mukoraati ɔ. (Mat. 20:28; Yoh. 3:16) Nakoso Satan de, ollé subaen bɔ ɔte sɔ ne bie, ofikyɛ ye tianu yɛ se, na ɔte pɛsɛmangomenya. Yede, ewue bɔ Yesu wuli ne, nzu yeɛ okofi nu kɔwa ɔ? Sɛ afoɛ apee bɔ Yesu kɔfa koli hene wɔ aseɛ he aso ne ba ayieleɛ a, Adam ne Hawa bosofoɛ bɔ bɛyɛ sotie bɛma Yehowa ne, bɛkɔtena ase daa wɔ Paradise. Ɛhẽne yeɛ ahyɛaseɛ ne, né Yehowa abɔ ye tianu kyɛ ɔkɔyɛ ɔ, kyɛbɔ yalimoa yanwu ye ne. Sɛ ɛhe mukoraati ba nu a, Yehowa kɔhora kɔhã kyɛ ɔte “Omega.”
GYIDIE BƆ YELE YE KYƐ YEHOWA BƆHYƐ KƆWA NU NE, BƆ ƆKƆMAA ENU KƆYƐ SE Ɔ
18. Nningyein nzã beni yeɛ yɛkɔhora yɛkɔfa yɛkɔboka mmenia maa bekonwu ye kyɛ, nikyeebiala bɔ Yehowa abɔ ye tianu kyɛ ɔkɔyɛ ne kɔwa nu ɔ? (Kenga edwirɛ bɔ ɔwɔ alaka bɔ yenwa “Nningyein Nzã Bɔ Ɔmaa Yedé Yedi Kyɛ, Ɛbɔ Bɔ Yehowa Ahyɛ Ne Kɔwa Nu Ɔ”.)
18 Yede ɔbaadwu wa ne, kyɛbɔ yanwu ye wɔ adesũa he anu ne, mmenia bɔ benné benni kyɛ nningyein bɔ Nyameɛ ahyɛ bɔ kyɛ ɔkɔyɛ kɔma yɛ wɔ Paradise ne kɔwa nu ne, yɛkɔyɛ sɛɛ né yaboka bɛ? Bɔ olimoa, yɛkɔhora yɛkɔboka bɛ maa bekonwu kyɛ, Yehowa bɔbɔ yeɛ wahyɛ sɔ bɔ ne ɔ. Nyekyire nwomaa ne hãne kyɛ: “Na bɔ ɔte ahennie bia ne aso ne hane kyɛ, ‘Tie! Meyɔ nningyein mukoraa foforɛ.’” Yehowa se nworɛ, ole tumi, na ɔpena kyɛ ɔyɛ bɔ wahyɛ yɛ bɔ kyɛ ɔkɔyɛ kɔma yɛ ne. Bɔ ɔtɔ so nyɔ, Yehowa se kyɛ nikyeebiala bɔ wabɔ ye tianu kyɛ ɔkɔyɛ ne, ɔkɔwa nu pɛpɛɛpɛ. Yehowa bɔbɔ hãne kyɛ: “Edwirɛ hemɔ te turoloo ne nahorɛ,” na osa hãne kyɛ: “Wayie!” Bɔ ɔtɔ so nzã, yɛkɔhora yɛkɔboka bɛ maa bekonwu kyɛ, nikyeebiala bɔ Yehowa kɔhyɛ yebo kyɛ ɔyɛ ne, okoyie bɔ nikyefee ngɔhora ngosi ye atẽe ɔ. Ɛhẽne ati yeɛ yenwa: “Me ole Alfa ne Omega” ne. Yehowa kɔmaa bɔ wabɔ ye tianu kyɛ ɔkɔyɛ ne kɔwa nu, na ɛhe kɔmaa ebiala konwu kyɛ Satan te ngondomboniɛ.
19. Sɛ ebie kã kyɛ nningyein bɔ Yehowa ahyɛ yenwo bɔ kyɛ ɔkɔyɛ kɔma yɛ wɔ Paradise ne, onné nni kyɛ ɔkɔwa nu a, nzu yeɛ ɛkɔhora kɔyɛ ɔ?
19 Kae kyɛ, mmerɛ biala bɔ ɛkɔboka mmenia wɔ asɛnga nu maa bekonwu kyɛ Yehowa bɔhyɛ kɔwa nu ne, ɔkɔmaa gyidie bɔ ele ye kyɛ Nyameɛ bɔhyɛ ahoroɛ kɔwa nu ne, enu kɔyɛ se. Yeti sɛ ɛkenga edwirɛ bɔ ɔwɔ Nyekyire 21:4 ne kyire ebie wɔ asɛnga nu, na sɛ sona ne kã kyɛ “Menné menni kyɛ ɔkɔwa nu” a, ɛkɔhora kɔkenga ngyekyɛmuɛ 5 ne 6 ne koso, ná ahyirehyire nu ahyire ye. Afei boka sona ne maa onwu kyɛ sɔ dwirɛ ne kɔwa nu, ofikyɛ kyɛbɔ Yehowa hãne dwirɛ ne, ɔte kyɛbɔ ye bɔbɔ wafa yesa watimu so ne.—Yes. 65:16.
DWEIN 145 Onyankopɔn Ahyɛ Paradise Ho Bɔ
a Adesũa he kɔboka yɛ maa yekonwu bɔ yeti yeɛ yedé yedi kyɛ, ɛbɔ bɔ Yehowa ahyɛ kyɛ ɔkɔmaa aseɛ ne kɔkakyi Paradise ne kɔwa nu ɔ. Mmerɛ biala bɔ yɛkɔhã sɔ bɔhyɛ nanwo dwirɛ wɔ asɛnga nu ne, ɔmaa gyidie bɔ yele ye kyɛ ɛbɔ ahoroɛ bɔ Yehowa ahyɛ ne kɔwa nu ne, enu yɛ se.