ADESUA 28
Kyire Bɔ Yehowa Ne Yesu Ayɛ Ama Wɔ Nanwo Anisɔ
Sɛ wɔ damvo bie kyɛ wɔ nikyebie bɔ ɔyɛ nyemene a, sɛɛ yeɛ ɛkɔte ngã ɔ? Nahorɛ nu ne, ɔkɔmaa wɔnye kɔgye paa, na ɛkɔyɛ nikyee bie kɔfa kohyire kyɛ wɔnye sɔ akyɛdeɛ ne. Yehowa ne Yesu ama yɛ akyɛdeɛ pirikua bie bɔ ɔtra akyɛdeɛ biala ɔ. Nzu yeɛ ole sɔ akyɛdeɛ ne? Na yɛkɔyɛ sɛɛ na yahyire kyɛ yɛnye sɔ?
1. Atẽe kõ beni yeɛ yɛkɔhora yɛkɔfa so yekohyire kyɛ, yɛnye sɔ bɔ Nyameɛpiri ne Kristo ayɛ ama yɛ ne ɔ?
Bible ne hyɛ bɔ kyɛ “ebiala bɔ okonya [Yesu] nu gyidie ne” ɔkɔtena ase daa. (Yohane 3:16) Sɛ bɛkã kyɛ ehyire nikyeebie nu gyidie a, okyire sɛɛ? Ongyire kyɛ yekole Yesu yekoli mbaen. Na mmom odikyɛ yɛfa gyinaeɛ bɔ yesisi ɔne nningyein bɔ yɛyɛ so yekyire kyɛ yele gyidie. (Yakobo 2:17) Sɛ yɛfa bɔ yɛyɛ ɔne bɔ yɛkã so yekyire kyɛ yele gyidie a, ɔkɔhyɛ abusuabɔ bɔ ɔla yɛne Yesu ne ye Baba Yehowa afĩa nanu serɛ.—Kenga Yohane 14:21.
2. Dwumadié titire beni yeɛ ɔboka yɛ maa yekyire bɔ Yehowa ne Yesu ayɛ ama yɛ nanwo anisɔ ɔ?
Nnɔsoa kora bɔ Yesu baawu ne, ɔhãne atẽe foforɛ bɔ ye sĩlilɛfoɛ ne kɔhora kɔfaso, kohyire ye agyedeɛ afɔleɛ nanwo anisɔ nwo dwirɛ. Ɔfale afahyɛ titire bie bɔ Bible ne frɛ ye “Awurade Nnɔsoa Aleɛ,” bɔ besa bɛfrɛ ye Kristo Wue Ngaeɛlilɛ ne siele berɛ. (1 Korintofoɛ 11: 20) Yesu fa siele berɛ kyɛbɔ ɔkɔyɛ a, ye asomafoɛ ne—ɔne nahorɛ Kristofoɛ bɔ bekoli bɛ sĩ bɛkɔwa ne mukoraati—kɔkae kyɛ ɔfale ye ngõa bɔle afɔleɛ mane yɛ. Yesu hãne sɔ ngaeɛlilɛ ne nwo dwirɛ kyɛ: “Ɛmɔhɔso bɛyɛ ɛhe bɛfa bɛkae me.” (Luka 22:19) Sɛ ɛkɔ ngaeɛlilɛ ne bie a, ɛmaa ɔda di kyɛ wɔ nye sɔ ɔdɔ pirikua bɔ Yehowa ne Yesu ala ye ali ahyire yɛ ne.
SUA PẼE BOKASO
Nea atẽe foforɛ bɔ ɛkɔhora kɔfa so kohyirɛ kyɛ, wɔnye sɔ ɔdɔ pirikua bɔ Yehowa ne Yesu ala ye ali ahyirɛ wɔ ne. Na susu kyɛbɔ Yesu wue Ngaeɛlilɛ ne nwo hia nanwo.
3. Nzu yeɛ yɛkɔhora yɛkɔyɛ kɔfa kohyire anisɔ ɔ?
Fa ye kyɛ nzue fa wɔ kɔ, yeɛ ebie lɛle wɔ ɔ. Aso ɛkɔmaa wɔwora kofi bɔ sona ne ayɛ ama wɔ ne? Anaakyɛ ɛkɔyɛ nikyeebie kɔfa kohyire kyɛ wɔnye sɔ bɔ wayɛ wama wɔ ne?
Yemukoraati ngõa wura Yehowa sa. Kenga 1 Yohane 4:8-10, na susu nzɛmmisa hemɔ anwo:
Nzuati yeɛ Yesu afɔleɛ ne te akyɛdeɛ sorongo ɔ?
Bɔ Yehowa ne Yesu ayɛ ama wɔ ne, sɛɛ yeɛ ɛte ngã wɔ yenwo ɔ?
Nzu yeɛ yɛkɔhora yɛkɔyɛ kɔfa kohyire kyɛ, yɛnye sɔ bɔ Yehowa ne Yesu ayɛ ama yɛ ne ɔ? Kenga 2 Korintofoɛ 5:15 ɔne 1 Yohane 4:11; 5:3. Sɛ ɛkenga twerɔnzɛm nanu biala yie a, susu nzɛmmisa he anwo:
Sɛ ɛnea sɔ twerɔnzɛm ne a, nzu yeɛ yɛkɔhora yɛkɔyɛ kɔfa kohyire anisɔ ɔ?
4. Suasua Yesu
Atẽe foforɛ bɔ yɛkɔhora yɛkɔfa so kohyire anisɔ yeɛ ole kyɛ yekosuesua Yesu. Kenga 1 Petro 2:21, na susu nzɛmmisa he anwo:
Atẽe foforɛ beni yeɛ ɛkɔhora kɔfa so koli Yesu anammɔn sĩ pɛɛ ɔ?
Nea nikyehorɛ tibɔ mmenia kãabie yeɛ bedi paanõo na bɛnõ nzãa ne bie wɔ Ngaeɛlilɛ nabo ɔ
5. Kɔ Kristo wue Ngaeɛlilɛ ne bie
Sɛ ɛpena kyɛ enwu bɔ ɔhɔle so wɔ Awurade Nnɔsoa Aleɛ bɔ olimoa nabo a, Kenga Luka 22:14, 19, 20. Na susu nzɛmmisa hemɔ anwo:
Nzu yeɛ ɔkɔ so wɔ Awurade Nnɔsoa Aleɛ nabo ɔ?
Nzu yeɛ paanõo ne nzãa ne gyi berɛ ma ɔ? —Nea ngyekyemuɛ 19 ɔne 20.
Yesu hã hyirɛle y’asomafoɛ ne kyɛ, beli Awurade Nnɔsoɛ Aleɛ afahyɛ ne bɛfa bɛkae ye wue ne afoɛ biala. Yeti, Yehowa Adanzefoɛ yia nu afoɛ biala bɛkae Kristo wue ne kyɛbɔ ɔhãne ne.Sɛ ɛpena kyɛ esua pẽe fa sɔ nhyiamu bɔ yenwo hia he anwo a, bɔ VIDIO ne. Na susu nzɛmmisa bɔ oliliso hemɔ anwo.
Nzu yeɛ ɔkɔso wɔ Ngaeɛlilɛ nabo ɔ?
Paanõo ne nzãa ne gyi berɛ ma nikyee bie. Paanõo ne gyi berɛ ma Yesu nipadua bɔ ɔte pɛ, bɔ ɔfa bɔle afɔleɛ mane yɛ ne. Nzãa ne gyi berɛ ma ye mogya
EBIEMƆ KÃ KYƐ: “Bɔ odikyɛ ɛyɛ na anya ngõa alaa yeɛ ole kyɛ, ekole Yesu koli.”
Sɛɛ yeɛ ɛkɔfa Yohane 3:16 ɔne Yakobo 2:17 kohyirɛ kyɛ, pẽe wɔ berɛ bɔ odikyɛ ebie yɛ ɔ?
YEMUABƆLƐ
Bɔ ɔkɔyɛ na yahyire kyɛ yɛnye sɔ bɔ Yesu ayɛ ama yɛ ne, odikyɛ, yekyire yenu gyidie, na yɛkɔ ye wue ngaeɛlilɛ nabo bie.
Ndimu
Sɛ bɛkã kyɛ ehyire Yesu nu gyidie a, okyire sɛɛ?
Nzu yeɛ ɛpena kyɛ ɛyɛ fa kyire kyɛ, wɔnye sɔ bɔ Yehowa ne Yesu ayɛ ama wɔ ne ɔ?
Nzuati yeɛ yenwo hia kyɛ ɛkɔ Kristo wue Ngaeɛlilɛ nabo bie ɔ?
NEA ƐHE KOSO
Nzu yeɛ Kristo wue ne hyɛ yɛ ngunaen maa yɛyɛ ɔ?
Sua gyidie, ɔne atẽe bɔ yɛkɔfa so yɛkɔla ye ali nwo dwirɛ pẽe.
“Kyire Yehowa Bɔhyɛ Ahoroɛ Nanu Gyidie” (The Watchtower, October 2016)
Mmerɛ bɔ maame bie nwuni mvasoɛ bɔ ɔwɔ Yesu wue naso ne, nea ngɛndɛensoɛ bɔ onyane wɔ ye asetena so ɔ.