Ɔyɛle Sɛɛ Yeɛ Bɔne Ne Amaneɛnwunɛ Wale Ɔ?

“Nzuati ɔ?” ɔte edwirɛ bɔ yɛ taa yebisa mmerɛ bɔ bɔne ato ebie ɔ. Ɔyɛ yɛ anigye paa kyɛ, Bible ne afa sɔ nzɛmmisa nanwo mmuaeɛ bɔ ɔtɔ asoɛ nu ama ɔ!

1. Atẽe beni yeɛ Satan fale so maa bɔne wale ewiase ɔ?

Satan Abɔnzam tele Nyameɛpiri so atũa. Né Satan pena kyɛ odi afoforɛ so, yeti ɔlakalakale mmenia bɔ belimoa Adam ne Hawa, maa bɛɛbokale yeso wɔ ye atũa telɛ nanu. Satan nate ngondombo bɔ ɔpɛ hyirɛle Hawa naso yeɛ ɔyɛle sɔ ɔ. (Gyenɛsis 3:​1-5) Satan mane Hawa nyane adwene kyɛ Yehowa afa nikyee pá bie afea ye. Ɔhãne kyɛ sɛ sona annyɛ setie aama Nyameɛpiri pó a, yenya kɔhora kɔgye. Satan pɛle anoanu bɔ olimoa, na ɔhã hyirɛle Hawa kyɛ ongowu. ɛhene ati yeɛ Bible ne frɛ Satan kyɛ, “ngondomboniɛ ɔne ngondombo baba” ne.​—Yohane 8:44.

2. Nzu yeɛ Adam ne Hawa sili gyinaeɛ kyɛ bɛkɔyɛ ɔ?

Yehowa lale ayemye ali hyirɛle Adam ne Hawa paa. Ɔhã hyirɛle bɛ kyɛ, bɛkɔhora bekoli mmakaa bɔ ɔwɔ Eden turo nanu mukoraati so aba, sana komaapɛ. (Gyenɛsis 2:​15-​17) Nakoso besili gyinaeɛ kyɛ bekoli sɔ aduaba bɔ ɔhãne kyɛ nnɛmaa bedi ne. Hawa “tele aduaba ne bie lili.” Yesĩ ne, Adam “koso lili bie.” (Gyenɛsis 3:6) Bɛmu nyɔ yɛle Nyameɛpiri so aso serɛ. Ɔnate kyɛ ne Adam ne Hawa te pɛ nati, ne ɔnyɛ se koraa kyɛ bɛkɔyɛ bɔ ɔtengyɛ ɔ. Nakoso bɛhyɛle da bɛyɛle Nyameɛpiri so aso serɛ, bɛyɛle bɔne na bɛpole ye tumidie koso. Sɔ gyinaeɛ bɔ besile ne maa benwuni amaneɛ paa.​—Gyenɛsis 3:​16-​19.

3. Sɛɛ yeɛ Adam ne Hawa gyinaeɛsi ne ahã yɛ ɔ?

Mmerɛ bɔ Adam ne Hawa yɛle bɔne ne. Bɛtɔle sĩ, yeti bɛfale sintɔ bɛwole bɛ bosofoɛ mukoraati. Bible ne kã fa Adam nwo kyɛ: “Ɔnate sona kõ so yeɛ bɔne wale ewiase ɔ, na ewue nate bɔne so wale, yeti ewue trɛ hãne mmenia mukoraati.”​—Romanfoɛ 5:12.

Ɔnate nningyein pẽe so ti yeɛ yenwu amaneɛ. Ɔtɔ mmerɛ bie a gyinaeɛ tɛɛ bɔ yesi ne maa yenwu amaneɛ. Ɔtɔ mmerɛ bie koso a, gyinaeɛ tɛɛ bɔ afoforɛ si ne maa yenwu amaneɛ. Na ɔtɔ mmerɛ bie a, asane kora maa yenwu amaneɛ.​—Kenga Ɔsɛngafoɛ 9:​11.

SUA PẼE BOKASO

4. Bɔ wamaa yenwu amaneɛ ɔ

Mmeni pẽe dédi kyɛ Nyameɛpiri yeɛ odi ewiase mukoraati so. Nakoso ɛnea ɔte nahorɛ? Bɔ VIDIO ne.

VIDIO: Nwa Yeɛ Odi Ewiase He Aso Ɔ? (1:24)

Kenga Yakobo 1:​13 ɔne 1 Yohane 5:​19, na susu nzɛmmisa he anwo:

• Aso Nyameɛpiri yeɛ ɔmaa bɔne ne amaneɛnwunɛ kɔ so anaa?

5. Nea bɔ wafi Satan tumidie nu wawa ɔ

VIDIO: Nzuati Yeɛ Nyameɛpiri Ma Atẽe Maa Amaneɛnwunɛ Kɔ So Ɔ?​—Ye Bue Bie (3:07)

Kenga Gyenɛsis 3:​1-6, na susu nzɛmmisa hemɔ anwo:

• Ngondombo dwirɛ beni yeɛ Satan hãne ɔ? ​—Nea ngyekyɛmuɛ 4 ne 5.

• Atẽe beni yeɛ Satan fale so hyirɛle kyɛ, Yehowa afa nikyee  pá bie afea mmenia ɔ?

• Ɛnea bɔ Satan hãne ne a, aso sona hia Yehowa tumidie kora na yɛnye agye anaa?

Kenga Ɔsɛngafoɛ 8:​9, na susu nzɛmmisa he anwo:

• Ɔnate kyɛ nna Yehowa yeɛ odi ewiase he aso nati, ɛnea sɛɛ yeɛ ewiase he ayɛ ɔ?

1. Ne Adam ne Hawa te pɛ, na né bɛte Paradise. Nakoso betiele Satan na bɛtele Yehowa so atũa

2. Wɔ bɛ atũa telɛ ne sĩ ne, bɔne, amaneɛnwunɛ, ɔne ewue yili ewiase tɛkyɛ

3. Yehowa kɔye bɔne, amaneɛnwunɛ, ɔne ewue kofi berɛ. Afei sona kosa kɔyɛ pɛ́ na watena Paradise

6. Yehowa dwene amaneɛ bɔ yenwui nanwo

Aso Nyameɛpiri ndwene amaneɛ bɔ yenwui nanwo anaa? Nea bɔ Ɔhene David ne bɔ somafoɛ Petro hworɔle ɔ. Kenga Edwein 31:7 ɔne 1 Petro 5:​7, na susu nzɛmmisa he anwo:

• Kyɛbɔ Yehowa nwu amaneɛ bɔ yɛfa nu, na ɔdwene yenwo ne, sɛɛ yeɛ ɔmaa ɛte ngã ɔ?

YEMUABƆLƐ

Satan Abɔnzam ne mmenia nyɔ bɔ belimoa ne yeɛ bɛmane amaneɛnwunɛ wale ewiase ɔ. Yehowa dwene amaneɛ bɔ yenwui nanwo paa, na ɔngɔhyɛ ɔkɔye kofi berɛ.

Ndimu

• Ngondombo dwirɛ beni yeɛ Satan Abɔnzam hã hyirɛle Hawa ɔ?

• Atẽe beni aso yeɛ Adam ne Hawa atũa telɛ ne ahã yemukoraati ɔ?

• Yɛyɛ sɛɛ yeɛ yenwu kyɛ Yehowa dwene amaneɛ bɔ yɛfa nu nanwo ɔ?

NEA ƐHE KOSO

Nea ngyerekyiremuɛ bɔ Bible ne fa ma wɔ bɔne nwo ɔ.

“Nzu Yeɛ Ole Bɔne?” (Edwirɛ bɔ ɔwɔ intanɛt so)

Kenga bɔ Satan Abɔnzam maa ɔwale wɔ Eden turo nanu nanwo nikye pẽe.

“Nzuati Yeɛ Nyameɛpiri Ma Amaneɛnwunɛ Kɔ So Ɔ?” (The Watchtower, January 1, 2014)

Nea nzɛmmisa bɔ ɔyɛ se nanwo mmuaeɛ bɔ awerɛkyekye wɔ nu ɔ.

“Nzuati Yeɛ Kõɛ Bɔ Mmenia Pẽe Wuwuli Ne Hɔle So Ɔ? Nzuati Yeɛ Nyameɛpiri Anzi Ye Atẽe Ɔ?” (Edwirɛ bɔ ɔwɔ intanɛt so)

Nea bɔ bĩaa bie sua fili Amaneɛnwunɛ bɔ ne wapɛ yenwo wayie nanu ɔ.

Mandena Ase Mamma Menwo Kõ 5:​09