Bible ne dwirɛti titire ne fa Nyameɛpiri Ahennie nanwo. Atirimbɔ bɔ né Yehowa le ma aseɛ ne, ɔnate sɔ Ahennie naso kɔmaa ɔkɔ wa nu. Nzu yeɛ ole sɔ Ahennie ne? Nzu yeɛ ɔmaa yenwu kyɛ odi tumi kesaalae ɔ? Nzu yeɛ Ahennie ne ahora ayɛ ɔ? Na nzu yeɛ ɔkɔyɛ ye kyẽa bie ɔ? Adesua he, ɔne adesua nyɔ bɔ oli berɛ ne kɔma sɔ nzɛmmisa nanwo mmuaeɛ.

1. Nzu yeɛ ole Nyameɛpiri Ahennie ne, na nwa yeɛ ɔte so Hene ɔ?

Ahennie ne te awaen bɔ Yehowa Nyameɛpiri bɔbɔ ahyehyɛ ɔ. Yesu Kristo yeɛ ɔte ɛso hene, na ofi anwuro yeɛ odi tumi ɔ. (Mateo 4:​17; Yohane 18:36) Bible ne kã Yesu nwo dwirɛ kyɛ: “Okoli Hene . . . afebɔɔ.” (Luka 1:​32, 33) Kyɛ Nyameɛpiri Ahennie naso hene ne, Yesu koli ebiala so hene wɔ aseɛ mukoraati so.

2. Nwamɔ yeɛ bɛne Yesu koli tumi ɔ?

Nná Yesu ngome yeɛ okoli tumi ɔ. Mmom ne, mmenia bɔ befi “mmusua, ne dwudwolɛ ne mmeni kue ne maen biala nu . . . yeɛ bɛkɔyɛ ahemvo wɔ aseɛ naso” ɔ. (Nyekyire 5:​9, 10) Mmenia nyɛɛ yeɛ bɛne Kristo koli nikye ɔ? Ofi mmerɛ bɔ Yesu wale aseɛ he aso ne, mmenia million pẽe yeɛ bali ye sĩ kyɛ Kristofoɛ ɔ. Na enu 144,000 pɛ, yeɛ bɛkɔhɔ anwuro ne Yesu kooli nikye ɔ. (Kenga Nyekyire 14:​1-4.) Kristofoɛ bɔ baha bɔ bɛwɔ aseɛ so ne mukoraati kɔyɛ Ahennie ne mmaamɔ.​—Edwein 37:29.

3. Atẽe beni aso yeɛ Nyameɛpiri Ahennie ne te pá koraa tra sona awaen ɔ?

Sɛ sona awaen bɔ mmɔden kyɛ bɛkɔyɛ nikyee pá po a, belle tumi bɔ bɛkɔfa kɔyɛ bɔ bɛpena kyɛ bɛyɛ biala ɔ. Na sɛ bɛfi so na mmeni foforɛ basi bɛgya nu a, ɛyɛ a besisi gyinaeɛ bɔ ɔmmoka bɛ manvoɛ nemɔ ɔ. Nakoso, Yesu bɔ ɔte Nyameɛpiri Ahennie naso hene ne de, bɛngɔfa sona biala ngosie ye gya nu. Nyameɛpiri “ahyehyɛ Ahennie bie bɔ bɛngɔ sɛkye ye lé ɔ.” (Daniel 2:​44) Yesu koli aseɛ mukoraati so, na ɔngɔyɛ nyeyemuɛ biala. Ɔnate kyɛ ole ɔdɔ, anwuvoinnwunɛ, ɔne atɛntrenee nati, ɔkohyirehyire mmenia maa bekonya ​—ɔdɔ, anwuvoinnwunɛ, ɔne atɛntrenee kɔma bɛ nwo.​—Kenga Aizaya 11:9.

4. Awaen bie bɔ ole tumi koli aseɛ mukoraati so

Yesu Kristo le tumi tra awaen biala bɔ wali tumi wɔ sõna abakɔsɛm nu ɔ. Kenga Mateo 28:18, na susu nzɛmmisa he anwo:

• Atẽe beni aso yeɛ Yesu le tumi tra sõna awaen biala ɔ?

Bɛkora bɛsesã sõna awaen, na aseɛ ne bue kãamba bie yeɛ benu biala di so tumi ɔ. Aso sɔ yeɛ Nyameɛpiri Ahennie ne koso te anaa? Kenga Daniel 7:​14, na susu nzɛmmisa bɔ olili so hemɔ anwo:

• Nzuati yeɛ ɔte pá kyɛ “bɛngɔsɛkye” Nyameɛpiri Ahennie ne ɔ?

• Nzuati yeɛ ɔte pá kyɛ okoli aseɛ mukoraati so ɔ?

5. Odikyɛ sona awaen fi berɛ

Nzuati yeɛ odikyɛ Nyameɛpiri Ahennie sie sona awaen ahoroɛ gya nu ɔ? Bɔ VIDIO ne, na susu nzɛmmisa bɔ olili so he anwo.

VIDIO: Nzu Yeɛ Ole Nyameɛpiri Ahennie? ​—Ye Bue Bie (1:​41)

• Nzu yeɛ wafi sona tumidie nu wawa ɔ?

Kenga Ɔsɛngafoɛ 8:9, ná susu nzɛmmisa he anwo:

• Aso ɛnea a, odikyɛ Nyameɛpiri Ahennie basie sona awaen ahoroɛ ne gya nu anaa? Nzuati ɔ?

6. Nyameɛpiri Ahennie le atumvoɛ bɔ bɛte yɛbo ɔ

Ɔnate kyɛ yɛ Hene, Yesu tenane ase kyɛ sona nati, ɔkora “te yɛ mmerɛyɛlɛ bo.” (Hebrifoɛ 4:​15) Yehowa aye mmienzua ne mmrasua nahorɛfoɛ 144,000 afi “abusua, ne dwudwolɛ ne mmeni kue ne maen biala nu” bɔ bɛne Yesu kobonu koli nikye ɔ.​—Nyekyire 5:9.

• Kyɛbɔ Yesu ne kuro sona bɔ bɛte kyɛ yɛ ala kobonu koli nikye ne aso wɔhyɛ wɔ ngunaen anaa? Nzuati ɔ?

7. Nyameɛpiri Ahennie le mmraa bɔ ɔte pá tra sona awaen biala

Awaen biala hyehyɛ mmraa bɔ ɔkɔboka ye mamvoɛ, ná wabɔ bɛnwo waen ɔ. Nyameɛpiri Ahennie ne koso le mmraa bɔ odikyɛ ye mamvoɛ di so ɔ. Kenga 1 Korintofoɛ 6:​9-​11, na susu nzɛmmisa bɔ olili so he anwo:

• Sɛ mmenia mukoraati fa Nyameɛpiri mmraa yɛ adwuma a, ɛnea sɛɛ yeɛ ahã wiase kɔyɛ ɔ?a

• Aso ɔte pá kyɛ Yehowa kɔhyehyɛ mmraa kɔma Ahennie ne mamvoɛ kyɛ beli so anaa? Nzuati ɔ?

• Nzu yeɛ okyire kyɛ mmenia bɔ bɛmva sɔ mmraa ne bɛnyɛ adwuma ne kɔhora kɔsesã ɔ?​—Nea ngyekyemuɛ 11.

YEMUABƆLƐ

Nyameɛpiri Ahennie ne te awaen bɔ ɔwɔ anwuro, bɔ ɔkoli aseɛ mukoraati so ɔ.

Ndimu

• Nwamɔ yeɛ bɛkoli Nyameɛpiri Ahennie na so ɔ?

• Atee beni aso yeɛ Nyameɛpiri Ahennie ne te pá tra sona awaen biala ɔ?

• Nningyein benimɔ yeɛ Yehowa pena fi Ahennie ne manvoɛ berɛ ɔ?

NEA ƐHE KOSO

Nea edwirɛ bɔ Yesu hãfale nekaa bɔ Ahennie ne wɔ nanwo ɔ.

“Aso Nyameɛpiri Ahennie Ne Wɔ W’Ahõne Nu?” (Edwirɛ bɔ ɔwɔ intanɛt so)

Nzuati yeɛ Yehowa Adanzefoɛ kuro kyɛ bɛkoli Nyameɛpiri Ahennie ne nahorɛ tra sona awaen ɔ?

Bafa Bɛnwo Bama Nyameɛpiri Ahennie Ne (1:​43)

Nea bɔ Bible ne ahã afa mmenia 144,000 bɔ Yehowa aye bɛ kyɛ bɛne Yesu beeli tumi nanwo ɔ.

“Nwamɔ Yeɛ Bɛkɔ Anwuro Ɔ?” (Edwirɛ bɔ ɔwɔ intanɛt so)

Nzu yeɛ ɔmaa maame bie bɔ ɔla prison le lili kyɛ Nyameɛpiri ngome yeɛ ɔkɔhora kɔfa wiase bɔ atɛntrenee wɔ nu kɔwa ɔ?

“Kyɛbɔ Nnyane Ndɛengyea Nwo Mmuaeɛ Ɔ” (Awake!, November 2011)

Nyameɛ Ahennie hyɛle yebo lili tumi wɔ anwuro wɔ afoɛ 1914 nu. Na sɔ mmerɛ ne yeɛ ewiase he ayieleɛ ne hyɛle yebo ɔ. Ɔyɛle sɛɛ yeɛ yenwuni ye ɔ? Ofi 1914 bɔ ɔba ne, Bible nu ngɔmhyɛ pẽe awa nu. Afei koso, nningyein pẽe asisi wɔ ewiase nanu, na mmenia subaen koso asesã. Yekosua ɛhe anwo dwirɛ pẽe wɔ adesua he anu.

1. Nzu yeɛ Bible ngɔmhyɛ ma yenwui ɔ?

Bible nu nwomaa bɔ bɛfrɛ ye Daniel ne ma yenwu kyɛ, Nyameɛ Ahennie kɔhyɛ yebo koli tumi mmerɛ bɔ “mmerɛ nzoo” ne awa ye ayieleɛ ne. (Daniel 4:​16, 17) Afoɛ pẽe sĩ ne, Yesu hãne sɔ mmerɛ nanwo dwirɛ kyɛ ɔte “mmerɛ bɔ bafa bama maenmaen” ne, na osa hãne kyɛ onya walle ayieleɛ. (Luka 21:24) Yekonwu kyɛ, mmerɛ nzoo ne wale ayieleɛ wɔ afoɛ 1914 nu.

2. Ofi 1914 bɔ ɔba ne, nningyein beni yeɛ wasisi ɔ, na sɛɛ yeɛ mmenia subaen asesã ɔ?

Yesu asuafoɛ nemɔ bisale ye kyɛ: “Nzu yeɛ ɔkɔyɛ wɔ walɛ, ɔne mmerɛ bɔ ɔwɔ berɛ he ayieleɛ nwo nzɛngyerɛneɛ ɔ?” (Mateo 24:3) Yesu hãne kyɛ sɛ ɔhyɛ yebo kyɛ odi tumi wɔ anwuro a, nningyein pẽe kosisi. Sɔ nningyein ne bie yeɛ ole, kõɛ, ɛhɔen, ɔne aseɛwosolɛ. (Kenga Mateo 24:7.) Bible ne sa hãne kyɛ, subaen ahoroɛ bɔ mmenia kɔla y’ali wɔ “ayieleɛ mmerɛ nanu” ne, ɔkɔmaa “mmerɛ bɔ enu yɛse kɔwa.” (2 Timoteo 3:​1-5) Ɔwɔ nu, né sɔ nningyein nemɔ wɔ berɛ dada, nakoso ofi 1914 bɔ ɔba ne, nningyein ale asaa nu koraa.

3. Nzuati yeɛ tebea ne asɛkye koraa fi mmerɛ bɔ Nyameɛpiri Ahennie ne hyɛle yebo kyɛ odi tumi ne, nzuati yeɛ nningyein ayɛ basaa sɔ ne ɔ?

Mmerɛ bɔ Yesu yɛle Nyameɛpiri Ahennie naso Hene ne, wangyɛ koraa yeɛ ɔne Satan ne sunzummɔne nemɔ hõne wɔ anwuro ɔ. Satan lili nguguo wɔ sɔ kõɛ nanu. Bible ne kã kyɛ “begyili ye bɛtole aseɛ so, na bɛtole y’abɔfo nemɔ koso bɛbokale ye so.” (Nyekyire 12:​9, 10, 12) Satan afɛ yaa paa, ofikyɛ ɔse kyɛ bɛkɔsɛkye ye. Ɛhene ati yeɛ wamaa mmenia nwu amaneɛ wɔ aseɛ he aso ne. Nakoso Nyameɛ Ahennie ne kɔye sɔ haw ne mukoraati kofi berɛ.

SUA PẼE BOKASO

4. Bible nu mmerɛbulɛ basi 1914 so

VIDIO: Nyameɛpiri Ahennie Hyɛle Yebo Lili Tumi Wɔ Afoɛ 1914 (5:​02)

Nyameɛ mane tete Babilɔn Hene Nebukadnezza hyele nnaleɛ bie bɔ ne ɔte ngɔmhyɛ ɔ. Sɔ nnaleɛ ne, ɔne ngyerekyiremuɛ bɔ Daniel famane ne, né ɔfa Nebukadnezza tumidie ɔne Nyameɛpiri Ahennie nanwo.​—Kenga Daniel 4:​17.a

Kenga Daniel 4:​20-​26, na fa mvoni ne ye nzɛmmisa bɔ olili so ne noa:

• (A) Nzu yeɛ Nebukadnezza nwuni ye wɔ ye nnaleɛ nanu ɔ?​—Nea ngyekyɛmuɛ 20 ɔne 21.

• (B) Nzu yeɛ ne ɔkɔto bakaa ne ɔ? ​—Nea ngyekyɛmue 23.

• (D) Sɛ “mmerɛ nzoo” ne ba ayieleɛ a, nzu yeɛ ne okosi ɔ?​—Nea ngyekyɛmuɛ 26.

Kyɛbɔ Nnaleɛ Ne Fa Nyameɛpiri Ahennie Nwo Ɔ

NGƆMHYƐ NE (Daniel 4:​20-​36)

Tumidie

(A) Bakaa pirikua ne

Bɛpɛle tumidie naso

(B) “Ɛmɔpɛ Bakaa Ne,” na ɛmɔma “mmerɛ nzoo ɔpɛ nu”

Tumidie ne sa siele ye gya nu

(D) “W’ahennie kosa kooli wɔ sanu biekũ”

Ngɔmhyɛ ne lili mmoa wale nu . . .

• (E) Né bakaa ne gyi berɛ ma nwa? ​—Nea ngyekyɛmuɛ 22.

• (Ɛ) Atẽe beni aso yeɛ bɛpɛle ye ahennie naso ɔ? ​—Kenga Daniel 4:​29-​33.

• (F) “Mmerɛ nzoo” ne wale ayieleɛ ne, nzu yeɛ ɔtole Nebukadnezza ɔ? ​—Kenga Daniel 4:​34-​36.

YE MMAAMUƐ BƆ OLIMOA

Tumidie

(E) Babilɔn Hene, Nebukadnezza

Bɛpɛle tumidie naso

(Ɛ) Afoɛ 606 K.Y.B. nu sĩ ne, Nebukadnezza adwene sɛkyele na wangora wanni tumi afoɛ nzoo

Tumidie ne sa siele ye gya nu

(F) Nebukadnezza adwene yɛle yé, na osa oolili tumi

Ngɔmhyɛ ne mmaamuɛ bɔ ɔtɔ so nyɔ nu ne . . .

• (G) Né bakaa ne gyi berɛ ma nwa? ​—Kenga 1 Beresosɛm 29:23.

• (H) Sɛɛ yeɛ bɛpɛle bɛ tumidie naso ɔ? Yɛyɛ sɛɛ yeɛ yenwu kyɛ, mmerɛ bɔ né Yesu wɔ aseɛ he aso po ne, né benni tumi ɔ? ​—Kenga Luka 21:24.

• (I) Niswa, ɔne mmerɛ beni yeɛ bɛsa bɛfale tumidie ne besieli ye gya nu ɔ?

YE MMAAMUƐ BƆ ƆTƆ SO NYƆ

Tumidie

(G) Israel ahemvo bɔ ne begyi berɛ bɛma Nyameɛpiri tumidie ne

Bɛpɛle tumidie naso

(H) Bɛsɛkyele Yerusalem ne, bɛpɛle Israel Ahemvo ahennie so afoɛ 2,520

Tumidie ne sa siele ye gya nu

(I) Yesu hyɛle yebo lili tumi kyɛ Nyameɛpiri Ahennie naso Hene

5. Ewiase ne asesã fi afoɛ 1914

Bɔ VIDIO ne.

VIDIO: Ewiase Ne Asesã Fi Afoɛ 1914 (1:​10)

Yesu hãne kyɛbɔ ewiase ne tebea kɔyɛ mmerɛ bɔ wayɛ Ɔhene ne. Kenga Luka 21:​9-​11, na susu nzɛmmisa he anwo:

• Tebea hemɔ nu beni yeɛ anwui, anaa ate yenwo dwirɛ ɔ?

Somafoɛ Paul hãne kyɛbɔ mmenia subaen kɔyɛ, mmerɛ bɔ waha kãa ma sona tumidie awa ye ayieleɛ ne. Kenga 2 Timoteo 3:​1-5, na susu nzɛmmisa he anwo:

• Subaen hemɔ nu beni yeɛ anwui kyɛ mmenia da ye ali ɛnnɛ ɔ?

6. Odikyɛ yɛmaa tumi bɔ Nyameɛpiri Ahennie ne di ne hyɛ yɛ ngunaen

Kenga Mateo 24:​3, 14, na susu nzɛmmisa hemɔ anwo:

• Adwuma titire beni yeɛ okyire kyɛ Nyameɛpiri Ahennie ne di tumi kesaalae ɔ?

• Ɛkɔyɛ sɛɛ na ahora ayɛ adwuma he bie?

Nyameɛpiri Ahennie di tumi, na ɔngɔhyɛ okoli aseɛ mukoraati so. Kenga Hebrifoɛ 10:24, 25, na susu nzɛmmisa he anwo:

• Nzu yeɛ odi kyɛ yenu biala yɛ ɔ “mmerɛ bɔ yanwu kyɛ kyẽa ne pingye ne”?

YEMUABƆLƐ

Bible nu ngɔmhyɛ, mmerɛbulɛ, ɔne ewiase tebea ahoroɛ ne kyire kyɛ Nyameɛpiri Ahennie ne di tumi. Ɔnate kyɛ yedé ɛhe yedi ti, yɛkã yenwo dwirɛ yekyire afoforɛ na yɛkɔ asafo nhyiamu ahoroɛ.

Ndimu

• Mmerɛ bɔ mmerɛ nzoo bɔ Daniel nwomaa ne hãne yenwo dwirɛ ne wale ayieleɛ ne, nzu yeɛ osili ɔ?

• Nzu yeɛ ɔmaa edédi kyɛ Nyameɛ Ahennie hyɛle yebo lili tumi afoɛ 1914 ɔ?

• Nzu yeɛ ɛkɔyɛ kɔfa kohyire kyɛ Ahennie ne di tumi kesaalae ɔ?

NEA ƐHE KOSO

Nea bɔ abakɔsɛm atworɔfoɛ ne afoforɛ kã fa nzakraeɛ bɔ wawa ewiase fi afoɛ 1914 nanwo ɔ.

“Mmerɛ Bɔ Sona Subaen Sɛkyele Koraa Ɔ” (Awake!, April 2007)

Kenga kyɛbɔ ngɔmhyɛ bɔ ɔwɔ Mateo 24:14 ne sesãne bĩaa bie asetena ɔ.

“Né Menye Gye Baseball Nwo Tra Nikyee Biala!” (The Watchtower No. 3 2017)

Yɛyɛ sɛɛ yeɛ yenwu kyɛ ngɔmhyɛ bɔ ɔwɔ Daniel yeti 4 ne fa Nyameɛpiri Ahennie nanwo ɔ?

“Mmerɛ Beni Yeɛ Nyameɛpiri Ahennie Hyɛle Yebo Lili Tumi Ɔ? (Bue 1)” (The Watchtower, October 1, 2014)

Nzu yeɛ okyire kyɛ “mmerɛ nzoo” bɔ bahã yenwo dwirɛ wɔ Daniel yeti 4 ne wale ayieleɛ wɔ afoɛ 1914 nu ɔ?

“Mmerɛ Beni Yeɛ Nyameɛpiri Ahennie Hyɛle Yebo Lili Tumi Ɔ? (Bue 2)” (The Watchtower, November 1, 2014)

Nyameɛpiri Ahennie ne di tumi dada. Ɔngɔhyɛ ɔkɔyɛ nzakraeɛ mbiri mbiri wɔ aseɛ so. Ma yesusu nningyein pá bɔ ɛkɔhora kɔnea ye atẽe wɔ Ahennie nanu ne bie nwo.

1. Atẽe beni aso yeɛ Nyameɛpiri Ahennie ne kɔfa asomdwee ne atɛntenenee kɔwa aseɛ so biekũ ɔ?

Yesu bɔ ɔte Nyameɛpiri Ahennie naso Hene ne kɔsɛkye mmenia tɛɛ ne awaen ahoroɛ mukoraati wɔ Amagedɔn kõɛ nanu. (Nyekyire 16:14, 16) Sɔ mmerɛ ne, Bible nu ngɔmhyɛ he kɔwa nu: “Waha kãa bie, ná adebɔneyɛfoɛ nne berɛ kõ.” (Edwein 37:10) Yesu nate Ahennie naso kɔmaa asomdwee ne atɛntenenee koyi aseɛ naso.—Kenga Aizaya 11:4.

2. Sɛ Nyameɛpiri apɛdeɛ yɛ berɛ wɔ aseɛ so a, sɛɛ yeɛ asetena kɔyɛ ɔ?

Wɔ Nyameɛpiri Ahennie nabo ne, “teneneefoɛ konya aseɛ ne koli, na bɛkɔtena so daa.” (Edwein 37:29) Pɛ yenwo mvoni nea kyɛ, ɛte ewiase bɔ ebiala yɛ bɔ ɔtengyɛ ná bɛ dɔ Yehowa ne bɛ biengo ɔ! Ebiala ngɔfokyɛ, na ebiala kɔtena ase daa.

3. Sɛ bɛsɛkye abɔneɛfoɛ a, nzu yeɛ Nyameɛpiri Ahennie ne kɔyɛ ɔ?

Sɛ bɛsɛkye abɔneɛfoɛ a, Yesu koli Hene afoɛ 1,000. Sɔ mmerɛ ne, ɔne bɛbɔ ɔne bɛ koli bia, bɔ bɛ dodoɔ te 144,000 ne kɔboka mmenia wɔ aseɛ so maa bɛkɔyɛ pɛ. Oodwu sɔ mmerɛ ne ayieleɛ ne, ná aseɛ ne akakyi paradise bɔ ɔyɛ nyemene, bɔ mmenia bɔ betie Yehowa dwirɛ ngome koyi so ɔ. Afei, Yesu kɔfa Ahennie ne kowura ye Baba Yehowa sa. Na bɔ ebie sille llé ne, Yehowa “dumaa [nwo] kɔte.” (Mateo 6:9, 10) Ɛhe kɔmaa yekonwu kyɛ, Yehowa yeɛ ɔte Sodifoɛ pá bɔ ɔdwene ye mamvoɛ nwo ɔ. Afei Yehowa kɔsɛkye Satan, adaemoni nemɔ, ɔne ebiala bɔ ɔdwɔso tia Ye tumidie ne. (Nyekyire 20:7-10) Kyɛbɔ asetena kɔyɛ anigye wɔ Nyameɛpiri Ahennie nabo ne kɔtena berɛ afebɔɔ.

SUA PẼE BOKASO

4. Nyameɛpiri Ahennie ne kɔsɛkye sona awaen ahoroɛ

“Sona di sona so maa oyie ye bɔne.” (Ɔsɛngafoɛ 8:9) Yehowa nate ye Ahennie naso, kɔye sɔ ndɛngyea he mukoraati kofi berɛ.

Kenga Daniel 2:44 ɔne 2 Tɛsalonikafoɛ 1:6-8, na susu nzɛmmisa hemɔ anwo:

• Sɛɛ yeɛ Yehowa ne Ɔwa Yesu, ne sona awaen ahoroɛ ɔne bɛbɔ beli besĩ ne koli ɔ?

• Sɛɛ yeɛ bɔ asua afa Yehowa ne Yesu nwo ne amaa anya awerɛhyemuɛ kyɛ bekobu atɛntenenee ɔ?

5. Yesu te Ɔhene sorongo

Kyɛ Nyameɛpiri Ahennie naso Hene ne, Yesu kɔyɛ nningyein pá pẽe kɔma ye mamvoɛ. Bɔ VIDIO ne ná nea kyɛbɔ Yesu ahyire kyɛ ole ɔpɛ, ɔne Nyameɛpiri tumi bɔ ɔkɔfa kɔboka mmenia ɔ.

VIDIO: Yesu Hyirɛle Bɔ Ahennie Ne Kɔyɛ Ɔ (1:13)

Mmerɛ bɔ né Yesu wɔ Aseɛ so ne, ɔyɛle nningyein bie fa hyirɛle bɔ Nyameɛpiri Ahennie ne kɔyɛ ɔ. Nhyiraa ahoroɛ bɔ ɔwɔ wa nanu beni yeɛ ɛpena kyɛ enwui ɔ? Kenga twerɔnzɛm ahoroɛ bɔ ɔfa sɔ nhyiraa ahoroɛ nanwo ɔ.

6. Nyameɛpiri Ahennie kɔfa nhyiraa sorongo kɔwa kyẽa bie

VIDIO: Kyɛbɔ Ewiase Ne Kɔyɛ Kyẽabie Ɔ (4:38)

Kenga Edwein 145:16, na susu nzɛmmisa he anwo:

• Sɛ Yehowa kã kyɛ “ateasefoɛ mukoraati konya bɔ bekuro biala” a, ɔmaa ɛte ngã sɛ́?

YEMUABƆLƐ

Nyameɛpiri Ahennie ne koli ye atirimbɔ nwo dwumaa. Ɔkɔkakyi aseɛ ne mukoraati kɔyɛ ye paradise, na mmenia bɔ bɛkɔsõ Yehowa daa koye so tɛkyɛ.

Ndimu

• Atẽe beni aso yeɛ Nyameɛpiri Ahennie ne kɔte Yehowa dumaa nwo ɔ?

• Nzuati yeɛ yɛkɔhora yekole yekoli kyɛ, Nyameɛpiri Ahennie ne kɔmaa Bible ngɔmhyɛ mukoraati kɔwa nu ɔ?

• Nningyein bɔ Ahennie ne kɔyɛ nanu beni yeɛ ɛnea ye atẽe ɔ?

NEA ƐHE KOSO

Pena bɔ Amagedɔn kyire ɔ.

“Amagedɔn Kõɛ Ne Te Nzu?” (Edwirɛ bɔ ɔwɔ intanɛt so)

Yesu hane kyɛ “amaneɛnwunɛ piri“ bie kɔwa. (Mateo 24:21) Sɛ sɔ mmerɛ ne dwu a, nzu yeɛ okosisi ɔ? Kenga sɔ dwirɛ he, na ekonwu ye.

“Dɛn Ne Ahohiahia Kɛse No?” (Edwirɛ bɔ ɔwɔ intanɛt so ɔ)

Nea kyɛbɔ mmusua kɔhora kobonu kosusu nhyiraa ahoroɛ bɔ Ahennie ne kɔfa kɔwa nanwo ɔ.

Fa Ye Kyɛ Ɛwɔ Paradise (1:50)

“Né Nzɛmmisa Pẽe kye M’adwene,” sua kyɛbɔ amanyɔnzɛm nu atũateniɛ bie nyane bɔ ne ɔpena nanwo mmuaeɛ ɔ.

“Bible Ne Kora Sesã Asetena” (The Watchtower, January 1, 2012)