Kyɛbɔ Ngondombo Sõen Sɛkye Nyameɛpiri Dumaa Ɔ

Sɛ Nyameɛpiri te ɔdɔ a, yede nzuati yeɛ sõen ahoroɛ pẽe bɔ bekyire kyɛ bɛsõ ye ne ali bɔne pẽe wɔ ye dumaa nu sɔ ɔ? Sɛ yɛkɔpɛ ye tikaapẽ a, sõen ahoroɛ he ngã nahorɛ; na basɛkye Nyameɛpiri dumaa. Sɛɛ yeɛ basɛkye ye dumaa ne ɔ? Sɛɛ yeɛ ɔte ngã wɔ yenwo ɔ? Na nzu yeɛ ɔkɔyɛ kɔfa yenwo ɔ?

1. Sɛɛ yeɛ ngondombo sõen nate bɛ ngyerɛkyerɛ so sɛkye Nyameɛpiri dumaa ɔ?

Ngondombo sõen “asesã nahorɛ bɔ ɔfa Nyameɛpiri nwo ne maa waayɛ ngondombo.” (Romanfoɛ 1:​25) Kyɛ nneasoɛ ne, sõen ahoroɛ pẽe nala nhyɛ bɛ mmenia ngunaen mma bɛmmɔ Nyameɛpiri dumaa ne. Nakoso, Bible ne kã kyɛ odikyɛ yɛfa Nyameɛpiri dumaa ne yedi dwumaa. (Romanfoɛ 10:​13, 14) Sõen pẽe nala nu akyerɛkyerɛfoɛ kã kyɛ, sɛ nikyee tɛɛ bie si a, ɔte Nyameɛpiri yeɛ wamaa wasi ɔ. Nakoso ɔtte nahorɛ. Nná Nyameɛpiri yeɛ ɔfa bɔne ba ɔ. (Kenga Yakobo 1:13.) Aworabɔlɛ dwirɛ yeɛ ole kyɛ, sɔ ngondombo dwirɛ he ahwẽ mmenia afi Nyameɛpiri nwo.

2. Sɛɛ yeɛ ngondombo sõen nate bɛ nneyɛe so sɛkye Nyameɛpiri dumaa ɔ?

Ngondombo sõen ne mmenia nni yé, kyɛbɔ Yehowa ne yɛ di ne. Bible ne kã kyɛ ngondombo sõen “bɔne atoɔtoaso waadwu anwuro.” (Nyekyire 18:5) Afoɛ pẽe bɔ wapɛ nu ne, sõen ahoroɛ ne afa bɛnwo awura amanyɔnzɛm ɔne kõɛ nu, na ɔnate bɛso amaa mmeni pẽe nala awuwu. Sõen ahoroɛ bie mɔ nu mbanyi kuro kyɛ bekonya bɛnwo, yesɔ ti bɛdidé esikaa bɛfi b’asɔre mmaa nemɔ berɛ. Sɔ nneyɛe he da yali kyɛ bɛnze Nyameɛpiri, na bɛ mvata kyɛ bɛkã yenwo dwirɛ.​—Kenga 1 Yohane 4:8.

3. Sɛɛ yeɛ Nyameɛpiri te ngã wɔ ngondombo sõen nwo ɔ?

Sɛ ngondombo sõen nneyɛe ma ɛfɛ yaa a, yede sɛɛ yeɛ esusu kyɛ Yehowa koso kɔte ngã ɔ? Ɔwɔ nu kyɛ okuro mmenia dwirɛ, nakoso wafɛ nyamesom mbanyi bɔ bɛsɛkye ye dumaa, ná bɛteetee b’asɔre mma naso yaa paa. Wahyɛ bɔ kyɛ ɔkɔsɛkye ngondombo sõen, na “yengonwui kõ.” (Nyekyire 18:​21) Ɔngɔhyɛ, Nyameɛpiri kɔsɛkye ngondombo sõen mukoraati.​—Nyekyire 18:8.

SUA PẼE BOKASO

4. Nná sõen mukoraati yeɛ Nyameɛpiri dé to nu ɔ

Mmeni pẽe dé di kyɛ, sõen ahoroɛ ne tekyɛ atẽe pẽe bɔ bɛnate so bɛkɔ Nyameɛpiri berɛ ɔ. Nakoso ɛnea a, ɔte nahorɛ? Kenga Mateo 7:​13, 14, na susu nzɛmmisa he anwo:

• Sɛɛ yeɛ Bible ne kã atẽe bɔ ɔkɔ ngõa nu nanwo dwirɛ ɔ?

Bɔ VIDIO ne, na susu nzɛmmisa bɔ oli so he anwo

VIDIO: Aso Nyameɛpiri Dé Sõen Ahoroɛ Mukoraati To Nu?​—Ye Bue Bie (3:22)

• Aso Bible ne kã kyɛ sõen ahoroɛ pẽe wɔ berɛ bɔ ɔsɔ Nyameɛpiri nye anaa?

5. Ngondombo sõen nná Nyameɛpiri dɔ ali

Sõen ahoroɛ ne asɛkye Nyameɛpiri dumaa wɔ atẽe pẽe so. Nikyee kõ bɔ ɔttemayé koraa yeɛ ole kõɛ bɔ bɛfa bɛnwo bewurowura nu ne. Sɛ ɛpena yenwo nneasoɛ a, bɔ VIDIO ne. Na susu nzɛmmisa bɔ olili so hemɔ nwo.

VIDIO: Bɔ Asɔre Ahoroɛ Ne Yɛle Wɔ Ewiase Kõɛ II Nanu (2:22)

• Nzu yeɛ asɔre ahoroɛ ne yɛle wɔ Ewiase Kõɛ II nanu ɔ?

• Sɛɛ yeɛ ɛte ngã wɔ bɔ bɛyɛle nanwo ɔ?

Kenga Yohane 13:​34, 35 ɔne 17:​16. Na susu nzɛmmisa hemɔ nwo:

• Sɛ sõen ahoroɛ ne fa bɛnwo bewura kõɛ nu a, sɛɛ yeɛ ɛnea Yehowa te ngã ɔ?

• Ngondombo sõen ayɛ nningyein tɛɛ pẽe. Atẽe benimɔ aso yeɛ anwui kyɛ, sõen ahoroɛ ne nzuesua Nyameɛpiri dɔ ɔ?

6. Nyameɛpiri pena kyɛ odé mmenia fi ngondombo sõen nu

Kenga Nyekyire 18:​4,a na susu nzɛmmisa he anwo:

• Mmenia bɔ ngondombo sõen amaa bamini bɔ Nyameɛpiri pena kyɛ odé bɛ ne, sɛɛ yeɛ ɔmaa ɛte ngã ɔ?

7. Kɔso sua nahorɛ Nyameɛpiri nanwo nikye

Aso odikyɛ ngondombo sõen maa adwene bɔ ele ye wɔ Nyameɛpiri nwo ne sesã anaa? Fa ye kyɛ abrandeɛ bie ndie afutue páa bɔ ye baba fama ye ne. Ofili awuro ɔɔbɔle bra tɛɛ. Né baba ne mbene bra bɔ ɔwa ne bɔ naso. Nzuati yeɛ ɔttemayé kyɛ ɛkɔbɔ baba ne somoɛ wɔ abrabɔ bɔ ɔwa ne wonu nanwo ɔ?

• Sɛ ɛnea a, ɔte pá kyɛ ɛkɔbɔ Yehowa somoɛ na ayakyi yenwo nikye bɔ esua ne, ɔnate ngondombo sõen nneyɛe tɛɛ nati anaa?

YEMUABƆLƐ

Ngondombo sõen asɛkye Nyameɛpiri dumaa nate ngondombo ngyerɛkyerɛ ɔne ye nneyɛe tɛɛ so. Nyameɛpiri kɔsɛkye ngondombo sõen.

Ndimu

• Sɛɛ yeɛ ɛte ngã wɔ ngondombo sõen ngyerɛkyerɛ ɔne ye nneyɛe nwo ɔ?

• Sɛɛ yeɛ Yehowa te ngã wɔ ngondombo sõen nwo ɔ?

• Nzu yeɛ Nyameɛpiri kɔfa kɔyɛ ngondombo sõen ɔ?

NEA ƐHE KOSO

Sua atẽe nyɔ bɔ ɔmaa sõen pẽe nnzɔ Nyameɛpiri nye nanwo nikye.

“Aso Sõen Mukoraati Te Pɛ Anaa? Aso Bemu Bekyire Atẽe Bɛkɔ Nyameɛpiri Dɔ Anaa?” (Edwirɛ bɔ ɔwɔ intanɛt so)

Nzuati yeɛ Yehowa pena kyɛ yɛne afoforɛ bonu sõ ye ɔ?

“Aso Yenwo Hia Kyɛ Ɛfa Wɔnwo Wura Sõen Bie Nu Anaa?” (Edwirɛ bɔ ɔwɔ intanɛt so)

Né sɔfo bie nde nningyein biemɔ bo wɔ sõen bɔ ɔwɔ nu nanu. Nakoso, ɛhe amma waanyakyi nahorɛ bɔ ɔfa Nyameɛpiri nwo bɔ osua ne.

“Bɔ Ɔmaa Sɔfo Bie Yakyili Y’asɔre Ɔ” (Awake!, February 2015)

Afoɛ pẽe ɛhe yeɛ sõen ahoroɛ apɛ ngondombo kyɛ Nyameɛpiri wɔ dédé na yetianu koso yɛ se. Sua nahorɛ dwirɛ bɔ ɔfa sɔ ngondombo nanu nza nwo nikye.

“Ngondombo Ahoroɛ Bɔ Okyire Kyɛ Nyameɛpiri Tianu Yɛ Se Ɔ” (The Watchtower, November 1, 2013)