Yɛkɔyɛ Sɛɛ Na Yamaa Yɛnwo Ate Wɔ Nyameɛpiri Nyunu?

Pɛ yenwo mvoni nea maame bie bɔ ole ɔdɔ, bɔ osiesie ɔwa kaamba nwo fa ye kɔ sukuu ɔ. Ɔnea kyɛ ɔwa ne abia na ye ndaadeɛ nye koso te kama. Ɛhe maa onya akwanwosaen pá, na ɔmaa afoforɛ nwu kyɛ ye awofoɛ nea ye yé.  Sɔ ala yeɛ y’anwuro Baba, Yehowa pena kyɛ yɛnwo te wɔ​—anwoɔnaen nu ne abrabɔ nu ɔ. Sɛ yɛmaa yɛnwo te a, yenya so mvasoɛ, na yɛhyɛ ye animnyam.

1. Yɛkɔyɛ sɛɛ na yamaa yɛnwo ate wɔ anwoɔnaen nu?

Yehowa kã kyire yɛ kyɛ: “Ɛmɔyɛ krongron.” (1 Petro 1:​16) Krongronyɛlɛ ne anwoɔnaen, ɔne abrabɔ nu anwoteɛ le abusuabɔ. Sɛ yebia, yɛpo yɛ nningyein, na yɛmaa y’awuro, yɛ kaa, ɔne ngaen foforɛ biala bɔ yele nwo te daa a, ne yɛdi yɛnwo ni wɔ anwoɔnaen nu. Yɛkɔhora koso kɔboka maa yekosiesie yɛ Ahennie Asa so. Sɛ yɛkɔso maa yɛnwo te wɔ anwoɔnaen nu a, ɔhyɛ Yehowa animnyam.​—2 Korintofoɛ 6:​3, 4.

2. Sɛ yɛnwo kɔte a, subaen beni yeɛ odikyɛ yɛtwẽ yɛnwo yefi yenwo ɔ?

Bible ne hyɛ yɛ ngunaen kyɛ “yɛhwẽ yɛnwo yefi anwoɔnaen ɔne honhom nu fĩɛ biala nwo.” (2 Korintofoɛ 7:1) Yeti yɛbɔ mmɔden yɛtwẽ yɛnwo yefi nikyee biala bɔ ɔkɔhora kɔsɛkye yɛ nipadua ne y’adwene nwo. Odikyɛ yɛma yɛ nzusueɛ sɔ Yehowa nye, yeti yɛbɔ mmɔden yɛpo nzusueɛ tɛɛ biala. (Edwein 104:​34) Yɛbɔ mmɔden koso kyɛ yɛkɔhã dwudwolɛ bɔ yenwo te ɔ.​—Kenga Kolosefoɛ 3:8.

Nzu biekũ yeɛ ɔkɔhora kɔmaa yɛnwo kogua fĩɛ wɔ anwoɔnaen ne abrabɔ nu ɔ? Nningyein biemɔ wɔ berɛ a, ɔkora sɛkye yɛ nipadua. Yeti odikyɛ yɛtwẽ yɛnwo yefi nningyein biemɔ tekyɛ, sigaret, bondo, wii, ɔne ayire bɔ bɛfa bedi dwumaa wɔ atẽe bɔ ɔttemayé so nwo. Sɛ yɛtwẽ yɛnwo yefi ɛhemɔ nwo a, yekonya akwanwosaen pá, na yekokyire kyɛ yebu akyɛdeɛ bɔ yeɛ ole ngõa ne. Yesa koso yɛma yɛnwo te wɔ abrabɔ nu, na yɛbɔ mmɔden yɛtwẽ yɛnwo yefi bra bɔ yenwo nde tekyɛ ebie brenzua bɔ ɔtwetwẽ ɔne ebie sa bɔ ɔfa wurawura ye brasua nu, ɔne ponografi nwo. (Edwein 119:​37; Ɛfesofoɛ 5:5) Ɔkɔhora kɔyɛ se kyɛ yɛkɔhwẽ yɛnwo yekofi sɔ abrabɔ tɛɛ nanwo, nakoso Yehowa kɔhora kɔboka yɛ maa yɛkɔyɛ sɔ.​—Kenga Aizaya 41:​13.

SUA PẼE BOKASO

3. Sɛ edi wɔnwo ni a, ɔhyɛ Yehowa animnyam

Sɛ yesusu mmraa bɔ Yehowa fa mane tete Israel nanwo a, ɔmaa yenwu y’adwene wɔ anwoteɛ nwo. Kenga Ɛzadɔs 19:​10 ɔne 30:​17-​19, na susu nzɛmmisa hemɔ anwo:

• Sɛɛ yeɛ sɔ ngyekyɛmuɛ he maa yenwu kyɛbɔ Yehowa bu anwonaen nu anwoteɛ ɔ?

• Subaen beni yeɛ ɔkɔboka wɔ maa wɔnwo kɔte wɔ anwoɔnaen nu ɔ?

Odé mmerɛ ne mmɔdenbɔ kora na yɛnwo ahora te wɔ anwoɔnaen nu. Nakoso ɔmva yenwo ne nekaa bɔ yɛte, anaa kyɛbɔ yɛ sikanzɛm si te ne, yɛkɔhora yɛkɔyɛ sɔ. Bɔ VIDIO ne, na susu nzɛmmisa hemɔ anwo.

VIDIO: Nyameɛpiri Dɔ Bɛbɔ Bɛnwo Te (4:10)

• Sɛ yɛma yɛ nningyein nwo te a, sɛɛ yeɛ ɔkã asɛnga adwuma ne ɔ?

4. Di subaen tɛɛ so

Sɛ ɛnõ wii, sigaret anaa ɛfa ayire bɔ bɛfa bedi dwumaa wɔ atẽe tɛɛ so yɛ adwuma a, wɔ bɔbɔ ɛse kyɛbɔ sɔ subaen tɛɛ naso lilɛ yɛ se ɔ. Nzu yeɛ ɔkɔhora kɔboka ɔ? Susu kyɛbɔ sɔ subaen nasi apira wɔ nanwo. Kenga Mateo 22:​37-​39, na nea kyɛbɔ sigaret nõnɛ anaa ayire tɛɛ bɔ bɛfa bedi dwumaa ne kɔhora kɔhã . . .

• ebie ne Yehowa afĩa abusuabɔ ɔ.

• ebie abusua ne mmenia bɔ bepingye ye ɔ.

Yɛ nhyehyɛeɛ bɔ ɛkɔhora kɔfa koli subaen tɛɛ so ɔ.a Bɔ VIDIO ne.

VIDIO: Nya Anwosodi (2:47)

Kenga Filipifoɛ 4:​13, na susu nzɛmmisa he anwo:

• Sɛɛ yeɛ mbaeɛ, Bible adesua, ɔne asafo nhyiamu bɔ ebie kɔhɔ ye daa ne kɔboka ye maa, okonya anwoserɛ kɔfa koli subaen tɛɛ so ɔ?

5. Kõ tia nzusueɛ ɔne nneyɛe bɔ ɔttemayé ɔ

Kenga Kolosefoɛ 3:​5, na susu nzɛmmisa hemɔ anwo:

• Nzu yeɛ ɔmaa yenwu kyɛ ponografi, adwamanzɛm nwo dwirɛ bɔ bɛfa bɛma ebie, ɔne ebie brenzua bɔ ɔtwetwẽ, anaa ebie sa bɔ ɔfa wurowura ye brasua nu nwo nnde wɔ Yehowa nye so ɔ?

• Kyɛbɔ Yehowa nea atẽe kyɛ yɛnwo kɔte wɔ abrabɔ nu ne, esusu kyɛ ndeaseɛ wɔ nu anaa? Nzuati ɔ?

Nea kyɛbɔ ɛkɔhora kɔhõ kotia nzusueɛ bɔ ɔttemayé ɔ. Bɔ VIDIO ne.

VIDIO: Bɔ Mmɔden Kyɛ Ɛkɔmaa Wɔnwo Kɔhɔso Kɔte (1:51)

Yesu fale mvandonwo hyirehyirele kyɛbɔ odikyɛ yɛmaa yɛnwo te wɔ abrabɔ nu ɔ. Kenga Mateo 5:​29, na susu nzɛmmisa he anwo:

• Ɔwɔ nu kyɛ Yesu angã kyɛ yɛyɛ yɛ nipadua bɔne, bɔ ne okyire yeɛ ole kyɛ odikyɛ yɛyere yɛnwo. Agyirɛ beni yeɛ odikyɛ ebie tu kora na wahora wapo nzusueɛ tɛɛ ɔ?b

Sɛ ɛbɔ mmɔden kyɛ ekoli nzusueɛ bɔ ɔttemayé so a, Yehowa nye sɔ wɔ mmɔdenbɔ ne. Kenga Edwein 103:​13, 14, na susu nzɛmmisa he anwo:

• Sɛ ɛbɔ mmɔden kyɛ ekoli subaen tɛɛ bie so a, sɛɛ yeɛ sɔ twerɔnzɛm he kɔhora kɔhyɛ wɔ ngunaen maa ɛkɔyere wɔnwo ɔ?

Nnɛmaa w’aba nu bu

Ebia ɛkɔhora konya adwene ndɛ kyɛ, ‘sɔ sɔbaen he de, mengɔhora ngɔli so lle’. Nakoso wɔde susu ɛhe anwo nea: Sɛ ebie bɔ otu mmirika fĩ ase a, ongyere kyɛ odikyɛ osa kɔhyɛ yebo biekũ, anaakyɛ ɔyakyi mmirika ne tulɛ koraa. Sɔ ala koso yeɛ sɛ esa kɔyɛ abrabɔ tɛɛ bɔ ɛkõ tia ne a, ɛhene ngyere kyɛ ali ngoguo. Anaakyɛ wasɛkye ngɔanim bɔ alimoa anya ne. Sɛ esa kɔyɛ nikyee bɔ ɛkõ tia ne biekũ a​—ɔnzɛkyɛ ɛmaa ɔha wɔ bo so. Nnɛmaa w’aba nu bu! Yehowa kɔhora kɔboka wɔ maa ekoli sɔ subaen tɛɛ naso.

YEMUABƆLƐ

Sɛ yɛkɔhora yɛkɔsɔ Yehowa nye a, odikyɛ yɛmaa yɛ nipadua, y’adwene, ɔne y’abrabɔ nwo te.

Ndimu

• Nzuati yeɛ yenwo hia paa kyɛ yɛmaa yɛnwo te ɔ?

• Ɛkɔyɛ sɛɛ na amaa wɔnwo ate wɔ anwoɔnaen nu?

• Ɛkɔyɛ sɛɛ na amaa wɔ nzusueɛ ne w’abrabɔ nwo ate?

NEA ƐHE KOSO

Sɛ ɛte hianiɛ po a, nningyein bɔ ye yɛlɛ nyɛ se beni yeɛ ɔkɔboka wɔ maa wɔnwo kɔte wɔ anwoɔnaen nu ɔ?

Akwanwosaen Páa Ne Anwonidie ​—Asaa Nwuzinɛ (3:​01)

Nea agyirɛ ahoroɛ bɔ ɛkɔhora kotu na ahora ayakyi sigaret nõnɛ ɔ.

“Kyɛbɔ Ɛkɔhora Kɔyakyi Sigaret Nõnɛ Ɔ” (Awake!, May 2010)

Nea nzunzuasoɛ bɔ ponografi fa ba ɔ.

“Ponografi ​—Aso Ɔhaw Biala Nne Nwo, Anaa Odi Awu?” (The Watchtower, August 1, 2013)

Nea kyɛbɔ bĩaa bie hora lili ponografi neanɛ so ɔ.

“Nnili Nguguo Mmerɛ Pẽe Kora Yeɛ Mekora Medi So Ɔ” (The Watchtower No. 4 2016)