Atẽepakyelɛ

Sɛ yɛyɛ pẽe wɔ Yehowa sõen nu a, okyire kyɛ yɛfa anwoserɛ bɔ yele ye ne yedi dwumaa nyanza nu. (1Ko 9:26) Sɛ yɛfa botaeɛ ahoroɛ biemɔ yesie yɛnye so a, ɔkɔboka yɛ maa yɛkɔfa yɛ mmerɛ yekoli dwumaa yé kora né ayieleɛ ne awa. (Ɛfe 5:15, 16) Sɛ ɛmɔyɛ abusũa sõen a, ɛmɔkɔhora bekosusu botaeɛ ahoroɛ bɔ ɛmɔ kɔfa kosie bɛnye so wɔ sõen afoɛ bɔ ɔba nanu nanwo. Edwirɛ pẽe wɔ adesũa nwomaa he anu bɔ ɔkɔboka ɛmɔ maa ɛmɔkonwu botaeɛ ahoroɛ biemɔ bɔ ɛmɔkɔhora bɛkɔfa mbaeɛ bekosusu yenwo ɔ.—Yak 1:5.

Kyɛ nneasoɛ ne, aso abusũa nanuniɛ biala kɔhora kɔboka enu sona kõ maa ɔkɔsõ kyɛ, atẽepakyelɛfoɛ anaa? Sɛ ebia esusu kyɛ ɛngɔhora ngonya nnɔnhwere bɔ bɛpena befi wɔ berɛ ne a, yede, ɛne atẽepakyelɛfoɛ bɔ bɛ tebea tekyɛ wɔ deɛ ne bedwudwo. (An 15:22) Na sɛ ɔkɔyɛ yé a, ɛkɔhora kobisabisa atẽepakyelɛniɛ bie dwirɛ wɔ w’abusũa sõen bo. Afei tworɔ nhyehyɛeɛ bɔ ayɛ ne to berɛ. Sɛ asõ kyɛ atẽepakyelɛfoɛ le a, yede susu yenwo nea kyɛ, wɔ tebea kɔma w’atẽe maa ekosa kɔsõ anaa.

Aso w’abusũa nanuniɛ bie kɔhora kɔsõ kyɛ atẽepakyelɛ bokafoɛ wɔ bosome kõ anaa bɔ ɔbosɔ nu hɔ? Sɛ ellé anwoserɛ pẽe a, ɛkɔhora kɔsõ kyɛ atẽepakyelɛ bokafoɛ, na afa mmerɛ kãa bie ayɛ asɛnga adwuma ne kyẽa biala. Sɛ ɛfa mmerɛ pẽe yɛ adwuma anaa ɛkɔ skuu, maa yeti enya atẽe mva wɔnwo nwura dapɛen afĩa asɛnga adwuma nanu a, yede ɛkɔhora kɔyɛ sɔ wɔ mmerɛ bɔ skuufoɛ ama atẽe, anaa wɔ bosome bɔ dapɛen nnu yeɛ ɔwɔ nu nanu. Tworɔ mmerɛ bɔ ɛpenakyɛ ɛyɛ atẽepakyelɛ bokafoɛ adwuma ne bie ne wɔ kalanda so, na yɛ yenwo nhyehyɛeɛ to berɛ.—An 21:5.

NEA VIDIO BƆ YEƐ OLE, NYA AKOKODURO . . . KYƐ ƐTE ATẼEPAKYELƐFOƐ, NA YE NZƐMMISA BƆ OLILISO HEMƆ NOA:

• Nzu yeɛ aliemaa brasua Aamand suahu ne maa yenwui yɛfa, kyɛbɔ Yehowa te ngã wɔ bɛbɔ bɛfa bɛ mmerɛ bɛbɔ afɔleɛ bɛyɛ atẽepakyelɛ adwuma nanwo ɔ?