Kɔso Fa “Atẽe Krongron” Naso

1-2. Yudafoɛ bɔ né bɛwɔ Babilɔn ne, gyinayɛɛ beni yeɛ né odikyɛ besi ɔ? (Ɛsra 1:2-4)

PƐSIA hene fale edwirɛ bie tole dwaa. Ɔhãhyirele Yudafoɛ bɔ né baayɛ ngoaa afoɛ 70 wɔ Babilɔn ne mukoraati kyɛ bɛkɔhora bɛkɔhɔ bekuro. (Kenga Ɛsra 1:2-4.) Sɛ nná Yehowa yeɛ ɔmane ɛhe nwo atẽe a, ahãa ɔngɔhora ngosi llé, ofikyɛ sɛ né Babilɔnfoɛ fa ebie yɛ akoaa a, né bɛnnyakyi ye mma ɔngɔ ye kuro kõ. (Yes. 14:4, 17) Nakoso ɔbaadwu sɔ mmerɛ ne, né Babilɔn ahennie ne awa ayieleɛ. Ɛhẽne ati yeɛ Pɛsia hene ne, ɔmane Yudafoɛ nemɔ atẽe kyɛ, bɛkɔhora bɛkɔhɔ bekuro ne. Mmerɛ bɔ ɔhene ne hãne sɔ dwirɛ ne, né odikyɛ Yudaniɛ biala si gyinayɛɛ kyɛ, okofi kuro nanu kɔhɔ anaakyɛ ɔkɔhɔso kɔtena berɛ. Nakoso, né ɔlla ase kyɛ bekosi sɔ gyinayɛɛ ne. Nzuati ɔ?

² Né atẽe ne wale paa, yeti bɛbɔ né bayɛ mbanyi ne, né ɔkɔyɛ se kyɛ bɛkɔhora bɛkɔpɛ sɔ atẽe ne ɔ. Afei koso, Yudafoɛ nemɔ bie wɔ berɛ a, Babilɔn yeɛ bɛwole bɛ ɔ. Ɛhẽne ati, né bɛ adwene yɛ bɛ kyɛ, Israel te bɛ nanamɔ kuro, yeti sɛ bɛkɔ dɔ a, bɛkɔɔyɛ ɛwɔfoɛ. Ebiemɔ koso, né babukyé adwuma wɔ Babilɔn berɛ, na né ɛhe amaa banya esikaa basi awuromɔ. Yeti né ɔkɔyɛ se kɔma bɛ kyɛ, bɛkɔyakyi bɛ agyapadeɛ hemɔ berɛ bɛkɔhɔ kuro bie bɔ bɛnze so ɔ.

3. Sɛ né Yudafoɛ nemɔ sa kɔ bekuro a, sɛɛ yeɛ né ɔkɔboka bɛ ɔ?

³ Yudafoɛ bɔ né Yehowa sõen nwo hia bɛ ne, né bɛse kyɛ sɛ bemia bɛnye besa bɛkɔ bekuro a, ɔkɔboka bɛ paa, ofikyɛ né ɔkɔmaa bɛkɔsõ Yehowa kyɛbɔ okuro ɔ. Né bosõen sua kɔbo aburuannu yeɛ ɔwɔ Babilɔn ɔ, nakoso né asɔre awuro biala nne berɛ bɔ Yudafoɛ nemɔ kɔhora kɔso Yehowa wɔ nu ɔ. Kyɛbɔ Mose mmraa ne kyire ne, né odikyɛ Yudafoɛ nemɔ bɔ afɔleɛ ma Yehowa wɔ afɔleɛ bokyea so. Nakoso, né ebie nne Babilɔn berɛ. Afei koso né belle sɔfo biala bɔ okoli bɛ nyunu maa bɛkɔbɔ afɔleɛ wɔ Babilɔn berɛ ɔ. Sɛ ɛhẽne la ahãmeɛ a, mmenia bɔ né bɛsõ bosõen ne, né bɛsõne bɛtra Yudafoɛ nemɔ, yeti né mmeni pẽe mva Yehowa mmraa nnyɛ hwee wɔ kuro nanu. Ɛhẽne ati yeɛ né Yudafoɛ bɔ bɛdɔ Yehowa ne, né bɛpena kyɛ besa bɛkɔ bekuro kyɛbɔ ɔkɔyɛ a, bɛkɔhora bɛkɔsõ Yehowa nahorɛ nu ɔ.

4. Yudafoɛ bɔ né besa bɛkɔ bekuro ne, ɛbɔ beni yeɛ Yehowa hyɛle bɛ ɔ?

⁴ Atẽe bɔ né Yudafoɛ nemɔ kɔpɛ kofi Babilɔn bɛkɔhɔ bekuro ne, né ɔwale paa. Né bɛkɔhora bekoli kɔyɛ bosome nna wɔ atẽe so. Nakoso, Yehowa hyɛle Yudafoɛ nemɔ bɔ kyɛ ɔkɔbɔ bɛnwo waen, kyɛbɔ ɔkɔyɛ a ɔhaw biala ngɔto bɛ ɔ. Ɛhe ati, ɔnate Yesaya so hãne kyɛ: “Ɛ́mɔbɔ AWURADE atee bɛ́to berɛ, ɛ́mɔpakye atimbire bɔ ɔtengyɛ wɔ aseɛ pralaa so bɛ́ma yɛ Nyameɛ. . . . Ɛ́mɔtengyɛ atẽe kõndonõwaa ne ma ɔtengyɛ, ná ɛ́mɔtuatua mmɔnga mmɔnga nemɔ ma ɔla so.” (Yes. 40:3, 4) Wɔde fa ye kyɛ etu atẽe, na atẽe ne bɔ ɛnate so ne, bagua so kootaa kãma. Ɔba sɔ a ɔmaa wɔnye gye ofikyɛ ɛmvɛ, na afei edwu nekaa bɔ ɛkɔ ne ndɛ koso. Sɔ ala yeɛ né Yehowa kɔbɔ Israelfoɛ nemɔ nwo waen mmerɛ bɔ né befi Babilɔn bɛkɔ bekuro ne. Yeti né bɛngɔfɛ na mmom bɛnye kɔgye.

5. Atẽe bɔ né Israelfoɛ nemɔ kɔpɛ kɔhɔ bekuro ne, dumaa beni yeɛ né ɔla so ɔ?

⁵ Ɛnnɛ atẽe pẽe wɔ berɛ a, bele dumaa bɔ bafa bato so ɔ, na ɛhẽne boka mmenia bɔ bɛfa sɔ atẽe naso ne, kyɛbɔ ɔkɔyɛ a bengomini ɔ. Sɔ ala yeɛ atẽe bɔ Yesaya hãne yenwo dwirɛ ne koso, ole dumaa ɔ. Yesaya hãne yenwo dwirɛ kyɛ: “Atimbire kɔɔla berɛ, na bɛkɔto ye dumaa Atẽe Krongron. Sona bɔ yenwo nde ne, ɔngɔfa so bie.” (Yes. 35:8) Yede sɛɛ yeɛ Israelfoɛ nemɔ tele sɔ dwirɛ nabo ɔ, na yɛ koso ɔfa yɛnwo sɛ́?

BƆ NÉ “ATẼE KRONGRON” NE KYIRE WƆ YUDAFOƐ NEMƆ ABERƐ SO, ƆNE ƐNNƐ Ɔ

6. Nzuati yeɛ né bɛfrɛ sɔ atẽe ne kyɛ “Atẽe Krongron” ɔ?

⁶ Dumaa bɔ né ɔla atẽe naso ne, né ɔyɛ fɛ paa. Yede, nzuati yeɛ né bɛfrɛ ye “Atẽe Krongron” ɔ? Ofikyɛ né Yudaniɛ biala bɔ yenwo nde ne, ɔngɔtena Israel maen nanu bie. Ɛhẽne kyire kyɛ, Yudaniɛ biala bɔ né ɔbɔ adwaman, ɔso bosõen, anaa ɔyɛ nikyee biala bɔ Yehowa nguro ne, ɔngɔhora ngɔtena maen nanu. Né Yudafoɛ bɔ bekosa bɛkɔhɔ bekuro ne kɔyɛ mmenia krongron kɔma bɛ Nyameɛ. (Deut. 7:6) Nakoso, né odikyɛ benu biala yere yenwo kyɛ ɔkɔhɔso kɔyɛ bɔ Yehowa kuro ɔ.

7. Nzuati yeɛ né odikyɛ Yudafoɛ nanu biemɔ sesã bɛ subaen ɔ? Ma yenwo nneasoɛ.

⁷ Ɔnate kyɛ bɛwole Yudafoɛ nanu pẽe wɔ Babilɔn nati, né benu biemɔ asuesũa Babilɔnfoɛ ne subaen. Yenwo nneasoɛ yeɛ ole kyɛ, Yudafoɛ nemɔ sa hɔle bekuro afoɛ bie sĩ ne, Ɛsra hãne kyɛ né benu biemɔ agya mmrasua bɔ bɛnzõ Yehowa ɔ. (Ɛks. 34: 15, 16; Ɛsra 9:1, 2) Ɛhẽne sĩ ne, Amrado Nehemia nwuni kyɛ, ɔnate sɔ mmrasua nemɔ bɔ Yudafoɛ biemɔ gyale bɛ nati, né bɛ mmaa nemɔ ngora ngã Yudafoɛ dwudwolɛ bɔ yeɛ ole Hebri dwudwolɛ ne po. (Deut. 6:6, 7; Neh. 13:23, 24) Né bahwerɛ Nyameɛ Dwirɛ ne wɔ Hebri dwudwolɛ nu, yeti né ɔkɔyɛ se kɔma ngwalaa nemɔ bɔ bɛnnde sɔ dwudwolɛ ne kyɛ bɛkɔhora bekosũa Twerɛnzɛm ne, ná basõ Yehowa ɔ. (Ɛsra 10:3, 44) Ɛhe mukoraati maa yenwu kyɛ, né odikyɛ Yudafoɛ nemɔ sesã bɛ subaen kyɛbɔ ɔkɔyɛ a, bɛkɔhora bɛkɔsõ Yehowa kyɛbɔ okuro ɔ. Nakoso sɛ bɛkɔhora bɛkɔyɛ sɔ a, né odikyɛ bɛkɔ bekuro.—Neh. 8:8, 9.

8. “Atẽe Krongron” bɔ bɛhãne yenwo dwirɛ ne, ɔfa yɛnwo sɛ́? (Nea foto bɔ ɔwɔ Ɛwɛnelɛ Waen ne nyunu ne.)

⁸ Ebia ebie konya adwene kyɛ, ‘Na sɔ tete dwirɛ he de, ɔfa yɛnwo sɛ́?’ Nahorɛ dwirɛ yeɛ ole kyɛ, sɔ dwirɛ ne fa yɛnwo, ofikyɛ atẽe bɔ yɛfa so yɛsõ Yehowa ɛnnɛ ne, waayɛ kyɛbɔ yɛnate “Atẽe Krongron” naso ne. Sɔ “Atẽe Krongron” ne boka yɛ maa yɛkora yɛsõ Yehowa yé ɛnnɛ. Afei ɔmaa yenya anyelasoɛ kyɛ yekonya daa ngõa kyẽabie. Yeti, sɛ yɛkɔhɔ anwuro oo, yɛkɔtena aseɛ he aso oo, odikyɛ yɛkɔso yɛfa sɔ atẽe he aso.b (Yoh. 10:16) Ofi afoɛ 1919 bɔ ɔba ne, mmeni pẽe ahwẽ bɛnwo bafi Babilɔn Pirikua bɔ ɔte ewiase mukoraati ngondombo sõen ahyehyɛdeɛ nanwo, na bɛ́fa sɔ “Atẽe Krongron” naso. Ebia wɔ koso, ɛboka sɔ mmenia hemɔ aso. Ɔwɔ nu kyɛ afoɛ 1919 yeɛ mmeni pẽe hyɛle yebo fili Babilɔn Pirikua nanu ɔ, nakoso ebiemɔ lilimoa yɛle sɔ kora yeɛ sɔ afoɛ ne ba ɔ.

BESIESIELE “ATẼE KRONGRON” NE

9. Kyɛbɔ Yesaya 57:14 kã ne, nzu yeɛ né bɛkɔyɛ ye wɔ “Atẽe Krongron” naso ɔ?

⁹ Nningyein bɔ né ɔkɔhora kɔha Yudafoɛ nemɔ wɔ atẽe so mmerɛ bɔ né bɛkɔ bekuro ne, Yehowa hãne kyɛ ɔkɔye yemukoraati kofi berɛ. (Kenga Yesaya 57:14.) Yede, nzu yeɛ Yehowa ayɛ afa “Atẽe Krongron” bɔ ɔwɔ berɛ ɛnnɛ nanwo ɔ? Afoɛ pẽe kora yeɛ afoɛ 1919 ba ne, Yehowa bokale mmenia biemɔ maa benwuni nahorɛ ne, na bɔ bɛyɛle ne, ɔbokale mmeni pẽe maa bɛhora bɛhwẽne bɛnwo befili Babilɔn Prikua nanwo sɔ mmerɛ ne. (Fa toto Yesaya 40:3 nanwo.) Sɔ mmenia hemɔ yɛle adwuma serɛ bɛfa besiesiele “Atẽe Krongron” naso. Né ɛhe kɔboka mmenia bɔ bɛdɔ Yehowa ne maa bɛkɔhwẽ bɛnwo bekofi Babilɔn Pirikua nanwo, na wamaa baasõ Yehowa kyɛbɔ okuro ɔ. Yede, ɛmɔma yɛnea adwuma bɔ bɛyɛle ne bie.

10-11. Nzu yeɛ ɔbokale mmeni pẽe maa benwuni nahorɛ bɔ ɔwɔ Bible nanu ne ɔ? (Nea foto ne koso.)

¹⁰ Bɛprentele Bible pẽe. Né ebiemɔ nea Bible bɔ ɔwɔ berɛ naso bɛfa bɛsa bɛtwerɛ bie kora yeɛ afoɛ 1450 ɔba ɔ, na né ɔte adwuma serɛ paa. Yeti, né ɔyɛ se paa kyɛ ebie konya Bible ne bie ɔ, na sɛ enya bie pó a, né ye nyɔboɛ yɛ se. Nakoso ofi afoɛ 1450 bɔ ɔba ne, benyane ngaen bɔ né bɛfa bɛprente nwomaa ɔ. Yeti, bɛhora bɛprentele Bible ne pẽe maa mmenia nyane bie kengale.

¹¹ Behyirele Bible nabo. Latin dwudwolɛ yeɛ né bahyire Bible nabo bahɔ nu ɔ, yeti né ɔyɛ se ma mmeni pẽe kyɛ bɛkɔhora bɛkɔkenga ɔ. Nakoso mmerɛ bɔ bɛyɛle ngaen bɔ bɛfa bɛprente nwomaa ne, mmenia bɔ bele obuo bɛma Bible ne yerele bɛnwo kyɛ, bekohyire Bible nabo bɛkɔhɔ dwudwolɛ pẽe nu kyɛbɔ ɔkɔyɛ a, mmenia konya bie kɔkenga ɔ. Yeti, ofi sɔ mmerɛ ne bɔ ɔkɔ ne, né mmenia kora fa bɔ bakenga ye wɔ Bible nanu ne bɛtoto bɔ asɔfo nemɔ kyirekyire bɛ nanwo. Né ɛhẽne boka bɛ maa bɛkora benwu nahorɛ ne.

12-13. Kɔyɛ afoɛ 1835 nanu berɛ ne, sɛɛ yeɛ ebiemɔ maa mmenia nwuni nahorɛ bɔ ɔwɔ Bible nanu ne ɔ?

¹² Nwomaa bɔ ɔboka mmenia maa bɛte Bible nabo ɔ. Mmrienzua biemɔ fasiele bɛnye so kyɛ, bɛkɔpena nahorɛ bɔ ɔwɔ Bible nanu ne, yeti bɛbɔle mmɔden besũane enu dwirɛ ne. Nakoso, ɔnate kyɛ né bɛkã nahorɛ bɔ banwu ye wɔ Bible nanu nanwo dwirɛ bekyire mmenia nati, ɔmaa asɔfo nemɔ fɛle yaa. Kɔyɛ afoɛ 1835 nanu berɛ ne, sɔ mmrienzua hemɔ yɛle nwomaa ahoroɛ, na ɔmaa mmenia nwuni kyɛ, bɔ asɔfo nemɔ kyirekyire ne, ɔtte nahorɛ.

¹³ Yenwo nneasoɛ yeɛ ole kyɛ, kɔyɛ afoɛ 1835 nu ne, biãa bie bɔ bɛfrɛ ye Henry Grew hwerɛle nwomaa bie. Né nwomaa ne kã bɔ ɔto kuro sona, mmerɛ bɔ wawu nanwo dwirɛ. Ohyirehyirele nu wɔ nwomaa nanu kyɛ, sunzum biala nne sona nu, bɔ sɛ sona ne wu a, sɔ sunzum ne kɔ so tena ngõa nu ɔ. Yeti ɛhe maa mmeni pẽe nwuni kyɛ bɔ asɔre ahoroɛ ne kyirekyire ne, ɔtte nahorɛ. Wɔ 1837 nu ne, sɔfo bie bɔ bɛfrɛ ye George Storrs nwuni sɔ nwomaa bɔ Henry Grew yɛle ne bie wɔ train nu, mmerɛ bɔ né otu atẽe ne. Mmerɛ bɔ George Storrs kengale nwomaa ne, onwuni kyɛ wanwu nahorɛ bɔ ɔwɔ Bible nanu ne. Yeti, ɔyɛle ye adwene kyɛ, ɔkɔhã yenwo dwirɛ kohyire mmenia. Wɔ 1842 nu ne, George Storrs mane dwudwolɛ bie bɔ ye dwirɛti yeɛ ole, “Aso Abɔnefoɛ Le Sunzum Bie Wura Benu Bɔ Bewu A, Bɛkɔyɛ Ye Ayayadeɛ Wɔ Abɔnzam Sẽe Nu Anaa?” Nwomaa ahoroɛ bɔ George Storrs hwerɛle ne, ɔbokale abrandeɛ bie bɔ bɛfrɛ ye Charles Taze Russell ne paa.

14. Nwomaa ahoroɛ bɔ né ebiemɔ alimoa ayɛ ne, sɛɛ yeɛ ɔbokale Aliemaa Russell ɔne bɛbɔ bɛboka yeso ne ɔ? (Nea foto ne koso.)

¹⁴ Sɔ nwomaa ahoroɛ bɔ né Henry Grew, George Storrs, ɔne ebiemɔ ayɛ ne, ɔbokale Aliemaa Russell ne bɛbɔ bɛboka yeso ne paa. Ɔmaa Bible nanu nhwehwɛmuɛ bɔ né bɛ́yɛ ne, bɛhora bɛyɛle ye yé. Afei koso, nwomaa ahoroɛ bɔ okyirekyire Bible nu dwirɛ nu, ɔne Bible bɔ né bahyire yebo sɔ mmerɛ ne, ɔbokale bɛ paa. Aliemaa Russell ne bɛbɔ bɛboka yeso ne, bɛyɛle adwuma serɛ paa ofikyɛ, bɛfale bɛ sikaa ne bɛ anwoserɛ bɛyɛle nwomaa ahoroɛ bɔ né ɔkɔboka mmenia maa bɛkɔte Bible nabo ɔ.

15. Nzu yeɛ ɔhɔleso wɔ afoɛ 1919 nu ɔ?

¹⁵ Odwuli afoɛ 1919 ne, né mmenia bɔ bɛsõ Yehowa ne ahwẽ bɛnwo koraa bafi Babilɔn Pirikua nanwo. Sɔ afoɛ nanu ne, yenyane “akoaa nahorɛniɛ ne nworɛniɛ ne.” Bɛ yeɛ né bɛkɔboka mmenia bɔ bafi Babilɔn Pirikua nanu ne maa bɛkɔhɔ so bɛkɔfa “Atẽe Krongron” naso ɔ. (Mat. 24:45-47) Bɛbɔ belilimoa bɛfale “Atẽe Krongron” naso ne yɛle adwuma serɛ paa. Sɔ adwuma bɔ bɛyɛle ne yeɛ waboka bɛbɔ bɛ́fa atẽe krongron naso ne. Na ɛhẽne yeɛ wamaa banya Yehowa nwo nimdeɛ bɔ ɔkɔ sĩɛ sɔ ne. (Any. 4:18) Afei koso, sɔ nimdeɛ ne aboka benu pẽe maa basesã bɛ abrabɔ, na bɛ́fa Yehowa Dwirɛ bɛbɔ bɛ bra. Yehowa se kyɛ sɛ yɛkɔhora yɛkɔte Bible nabo, ná yayɛ bɔ okuro a, ɔte ngãkangãka. Yeti afoɛ pẽe ɛhe yeɛ ɔnate y’ahyehyɛdeɛ naso ɔboka ye mmenia maa bɛyɛ sɔ ɔ. (Nea alaka bɔ enu dwirɛ yeɛ ole, “Yehowa Boka Ye Mmenia Maa Bɛte Bible Nabo” ne.) Yeti ɛmɔma yenu biala yere yenwo kyɛ, ɔkɔfa Yehowa Dwirɛ ne kɔbɔ ye bra, na sɛ yɛyɛ sɔ a, ɔkɔmaa yɛnye kɔgye.—Kol. 1:10.

ƐNNƐ, MMENIA TÉ FA “ATẼE KRONGRON” NASO

16. Ofi afoɛ 1919 bɔ ɔba ne, adwuma beni yeɛ bayɛ ye wɔ “Atẽe Krongron” naso ɔ? (Yesaya 48:17; 60:17)

¹⁶ Sɛ bɛyɛ kaa atẽe foforɛ bie a, odikyɛ bɛkɔso besiesie so, wanyɛ sɔ a, ɔkɔsɛkye. Sɔ ala yeɛ ofi afoɛ 1919 bɔ ɔba ne, bahɔso bayɛ “Atẽe Krongron” naso adwuma kyɛbɔ ɔkɔyɛ a, ɔkɔboka mmeni pẽe maa bɛkɔhwẽ bɛnwo bekofi Babilɔn Pirikua nanwo ɔ. Akoaa nahorɛniɛ ne nworɛniɛ ne hyɛle yebo yɛle adwuma serɛ, yeti wɔ afoɛ 1921 nu ne, bɛyɛle nwomaa bɔ né ɔkɔboka mmenia maa bɛkɔte Bible nabo ɔ. Né bɛfrɛ sɔ nwomaa ne, The Harp Of God. Bɛprentele kɔyɛ miliɔn 6 wɔ dwudwolɛ 36 nu, na ɔbokale mmeni pẽe maa benwuni Bible nanu nahorɛ ne sɔ mmerɛ ne. Ɛlɛsã ye ala koso, yanya nwomaa foforɛ bɔ yɛne mmenia fa sũa Bible ne ɔ, na ye ole, Nya Asetena Nu Anigye Daa! nwomaa ne. Ayieleɛ mmerɛ he anu ne, Yehowa nate y’ahyehyɛdeɛ naso waboka yɛ maa yanya nwomaa pẽe bɔ yɛfa yesũa Bible ne, kyɛbɔ ɔkɔyɛ a yɛkɔhɔso yɛkɔfa “Atẽe Krongron” naso ɔ.—Kenga Yesaya 48:17; 60:17.

17-18. Ni yeɛ “Atẽe Krongron” ne kɔfa yɛ kɔhɔ ɔ?

¹⁷ Sɛ ebie pene so kyɛ yɛne ye sũa Bible ne a, okyire kyɛ watu ye gya wasie “Atẽe Krongron” naso. Bɔ ɔyɛ aworabɔ ne, ebiemɔ wɔ berɛ a, sɛ bɛhyɛ yebo kyɛ bɛ́fa sɔ atẽe naso ná beyia ɔhaw bie a, né bayakyi so falɛ. Nakoso, ebiemɔ de, bamia bɛnye kyɛ bɛkɔhɔso bɛkɔfa sɔ atẽe naso bekoodwu nekaa bɔ bɛkɔ ɔ. Yede, ni yeɛ bɛkɔ ɔ?

¹⁸ Bɛbɔ bele anyelasoɛ kyɛ bɛkɔhɔ anwuro kyẽabie ne, “Atẽe Krongron” ne kɔfa bɛ kɔhɔ “Nyameɛ Paradise” bɔ ɔwɔ anwuro nanu. (Nye. 2:7) Bɛbɔ bele anyelasoɛ kyɛ bɛkɔtena aseɛ so kyẽabie ne koso, “Atẽe Krongron” ne kɔfa bɛ kɔhɔ paradise. Sɔ mmerɛ ne, Yehowa kɔye bɔne bɔ ɔwɔ sona nwo ne mukoraati kofi berɛ wɔ afoɛ 1,000 ne ayieleɛ. Yeti, sɛ “Atẽe Krongron” ne bɔ ɛfa so nati, nningyein biemɔ afi wɔsa a, nnɛmaa w’abanu bu, na mmom kɔso fa sɔ atẽe he aso kodwu kyɛ ɛkɔhɔ ewiase foforɛ nanu ɔ. Yedé yedi paa kyɛ, Yehowa kɔhɔso kɔboka wɔ maa ekoodwu asomdwee nu.