Ngrataa Nyɔ Bɔ Petro Hworɔle Ne, Bɔ Yɛkɔhora Yekosũa Yekofi Nu Ɔ

1. Waha kãa maa Petro wu ne, nzu yeɛ Yehowa fale ye honhom ne hãne ye maa ɔyɛle ɔ?

SOMAFOƐ PETRO sõne Yehowa wɔ nahorɛ nu afoɛ pẽe. Onyane yenwo atẽe ne Yesu bɔle nu yɛle asɛnga adwuma ne, na ɔhãne nzɛmba ne hyirele bɛbɔ bɛtte Yudafoɛ ne. Afei koso, ɔɔbokale akwangyerɛ kue bɔ né bɛwɔ berɛ sɔ mmerɛ naso. Mmerɛ bɔ né waha kãa maa somafoɛ Petro wu ne koso, Yehowa sa fale adwuma biemɔ wurale yesa. Ebie yeɛ ole kyɛ, kɔyɛ afoɛ 62-64 Y.B. nu ne, Yehowa fale ye honhom hãne ye maa ɔhworɔle ngrataa nyɔ bɔ yeɛ ole 1 Petro ɔne 2 Petro ne. Ne odé di kyɛ sɔ ngrataa nyɔ bɔ wahworɔ ne, enu dwirɛ ne kɔboka bɛbɔ bɛte Kristofoɛ ne maa bɛkɔhɔso bɛkɔsõ Yehowa.—2 Pet. 1:​12-15.

2. Ngrataa bɔ Petro hworɔle ne, nzuati yeɛ né yenwo hia paa sɔ mmerɛ ne ɔ?

² Mmerɛ bɔ Yehowa fale ye honhom hãne Petro maa ɔhworɔle ye ngrataa nyɔ ne, né oliemaamɔ Kristofoɛ fa “nzɔhwɛ ahoroɔ” nu. (1 Pet. 1:6) Afei koso sɔ mmerɛ ne, né mmenia biemɔ pena kyɛ bɛfa ngondombo ngyerɛkyerɛ, ɔne ahohwibra bɛbawura asafo nanu. (2 Pet. 2:​1, 2, 14) Ebiekũ koso, né “nningyein amukoraa ayieleɛ apingye” ama Yudafoɛ nemɔ, ofikyɛ né waha kãa maa Roman asogyafoɛ nemɔ sɛkye Yerusalem, ɔne asɔre awuro ne. Yeti né ɔte mmerɛ bɔ enu yɛ se paa ma Kristofoɛ bɔ né bɛwɔ berɛ sɔ mmerɛ ne. (1 Pet. 4:7) Ɛhẽne ati, ngrataa bɔ Petro hworɔle ne, né ɔkɔboka Kristofoɛ bɔ né bɛwɔ berɛ ne maa bɛkɔhɔso bekoli nahorɛ, ɔmva yenwo ne ɔhaw biala bɔ bɛfa nu ne. Afei koso, né ɔkɔboka bɛ maa bɛkɔboa bɛnwo bɛkɔma nzɔhwɛ bɔ né ɔla bɛ nyunu ne.b

3. Ngrataa nyɔ bɔ Yehowa fale ye honhom hãne Petro maa ɔhworɔle ne, nzuati yeɛ odikyɛ yɛkenga enu dwirɛ ne ɔ?

³ Ɔwɔ nu, Kristofoɛ bɔ né bɛwɔ Petro aberɛ so ne yeɛ ɔhworɔle ngrataa nyɔ ne ɔɔmane bɛ ɔ. Nakoso Yehowa maa bɛfale sɔ ngrataa ne bɛbokale ye Dwirɛ Bible naso. Yeti yɛ koso, enu dwirɛ ne kɔhora kɔboka yɛ ɛnnɛ. (Rom. 15:4) Ɔnate ahohwibra bɔ ɔkɔso wɔ ewiase bɔ yɛte nu nati, ɔmaa odwu mmerɛ bie a, ɔyɛ se ma yɛ paa kyɛ yekoli nahorɛ yɛkɔma Yehowa na yayɛ bɔ okuro ɔ. Afei koso ɔngɔhyɛ, yɛkɔhɔ amaneɛnwunɛ piri bie nu. Sɔ amaneɛnwunɛ ne, ɔkɔtra bɔ Yudafoɛ nemɔ hɔle nu mmerɛ bɔ né Roman asogyafoɛ nemɔ sɛkye Yerusalem, ɔne asɔre awuro ne koraa. Nakoso, ngrataa nyɔ bɔ Petro hworɔle ne, enu dwirɛ ne kɔhora kɔboka yɛ. Yeti sɛ yɛkenga enu dwirɛ ne, na yɛfa yɛbɔ yɛ bra a, ɔkɔboka yɛ maa yɛkɔboa yɛnwo, mmerɛ bɔ yɛnwondɛ kyɛ Yehowa kɔsɛkye ewiase he ne. Afei koso, ɔkɔboka yɛ maa yengosuro bɔ mmenia kɔfa kɔyɛ yɛ, anaa bɔ bɛkɔhã bɛkɔfa yɛnwo biala. Okosa kɔboka yɛ maa yekohuro aliemaamɔ dwirɛ paa. Ebiekũ koso, edwirɛ bɔ ɔwɔ sɔ ngrataa nanu ne, ɔkɔhora kɔboka asafo nanu mbanyi maa bekonwu kyɛbɔ bɛkɔboka aliemaamɔ maa bɛ gyidie kɔyɛ se ɔ.

KƆSO NWONDƐ

4. Kyɛbɔ 2 Petro 3:​3, 4 kã ne, edwirɛ benimɔ yeɛ sɛ ebiemɔ kã a, ɔkɔhora kobu y’abanu ɔ?

⁴ Mmenia bɔ yɛne bɛ wɔ ewiase he anu ne, benu pẽe nala nné ni kyɛ bɔ Bible ne ahã kyɛ okosisi kyẽabie ne kɔwa nu. Afei koso bɛbɔ benguro yɛ dwirɛ ne, ɛyɛ a bɛtaa bɛgoro yɛnwo kyɛ, ofi tete yeɛ yahã kyɛ ewiase he kɔsɛkye ɔ. Nakoso ɔbaadwu ɛnnɛ ne, nikyefee silli. Ebiemɔ po de, bɛkã kyɛ ewiase he ngɔsɛkye llé. (Kenga 2 Petro 3:​3, 4.) Sɛ yɛte sɔ dwirɛ ne bie wɔ asɛnga nu, adwuma nu, anaa yɛ busũaniɛ bie kã sɔ dwirɛ ne kyire yɛ a, ɔkɔhora kɔmaa y’abanu kobu. Sɛ ɔba sɔ a, edwirɛ bɔ ɔwɔ ngrataa bɔ Petro hworɔle nanu ne kɔboka yɛ paa.

5. Mmerɛ bɔ yɛnwondɛ kyɛ ewiase he kɔhɔ ayieleɛ ne, nzu yeɛ ɔkɔboka yɛ maa yɛkɔhɔso yekonya aboterɛ ɔ? (2 Petro 3:​8, 9)

⁵ Ebia ebiemɔ konya adwene kyɛ, kyẽa bɔ Yehowa kɔfa kɔsɛkye ewiase he ne, wahyɛ sõma. Nakoso edwirɛ bɔ Petro hworɔle ne kɔhora kɔboka yɛ, kyɛbɔ ɔkɔyɛ a, yekonya aboterɛ yɛkɔnwondɛ ɔ. Ofikyɛ adwene bɔ sona le ye wɔ mmerɛ nwo ne, nna sɔ yeɛ ɔte wɔ Yehowa nye so ɔ. (Kenga 2 Petro 3:​8, 9.) Yehowa de, afoɛ apee te ɛlɛhõ wɔ yenye so. Bɔ ɔte yeɛ ole kyɛ, Yehowa le aboterɛ, na ɔmbena kyɛ ɔkɔsɛkye ebiala. Nakoso, sɛ mmerɛ bɔ wahyɛ ne sõ a, ɔkɔsɛkye sɔ ewiase he. Yeti mmerɛ bɔ yɛnwondɛ kyɛ ewiase he kɔhɔ ayieleɛ ne, odikyɛ yɛfa yenwo atẽe ne yɛkã nzɛmba ne yekyire mmenia bɔ bɛwɔ ewiase mukoraati ne yɛfa yedi bɛ adanzeɛ.

6. Yɛkɔyɛ sɛɛ na yapere ‘kyɛ Nyameɛ kyẽa ne bra ndɛ’? (2 Petro 3:​11, 12)

⁶ Petro tuli yɛ foɛ kyɛ: “Ɛmɔpere kyɛ Nyameɛ kyẽa ne kɔwa ndɛ ɔ.” (Kenga 2 Petro 3:​11, 12.) Yede yɛkɔyɛ sɛɛ na yahora yayɛ sɔ? Odikyɛ yɛbɔ mmɔden kyɛ, nhyiraa bɔ yekonya ye wɔ ewiase foforɛ nanu ne, yɛkɔdwenedwene yenwo kyẽa biala. Fa ye kyɛ ɛwɔ Paradise bɔ mvrama pá fa wɔnwo, na edi aleɛ bɔ ɔyɛ fɛ bɔ anwoserɛ wɔ nu ɔ. Afei koso mmenia bɔ batingyé bɛ bafi ewue nu ne, ɛyɛ bɛ akwaaba, na benu biemɔ bɔ bawuwu dadaada bɔ batingyé bɛ ne, ekyirekyire bɛ maa bɛte Bible ngɔmhyɛ bo ɔ. Sɛ ɛdwenedwene ɛhemɔ nwo a, ɔkɔboka wɔ maa ekonya aboterɛ kɔnwondɛ ewiase he ayieleɛ ne, na ɔngɔma wɔ wora ngofi kyɛ yɛte ayieleɛ mmerɛ nanu. Ɔnate kyɛ ‘yɛse ye dada’ kyɛ sɔ nningyein hemɔ kosisi kyẽabie nati, odikyɛ yɛmaa yɛnye da berɛ na ngondombo ngyerɛkyerɛ biala ‘wandwetwe yɛ.’—2 Pet. 3:17.

SƐ ESURO BƆ MMENIA KƆHÃ KƆFA WƆNWO A, ƐKƆYƐ SƐƐ NA ANYA AKOKODURO?

7. Sɛ yesuro mmenia a, nzu yeɛ ɔkɔyɛ se kɔma yɛ kyɛ yɛkɔyɛ ɔ?

⁷ Yɛse kyɛ ɔngɔhyɛ Yehowa kɔsɛkye sɔ ewiase he. Ɛhẽne ati yɛbɔ mmɔden kyɛ yɛkɔhã nzɛmba ne bie yekohyire mmenia. Nakoso odwu mmerɛ bie a, ɛyɛ a né yesuro bɔ mmenia kɔhã kɔfa yɛnwo ɔ. Yeti ɔmaa ɔyɛ se kyɛ yekonya akokoduro yɛkɔfa yɛkɔhã nzɛmba ne bie yekohyire bɛ ɔ. Sɔ dwirɛ he bie tole Petro. Kɔngɔen bɔ bɛhyele Yesu ne, né osuro kyɛ ɔkɔmaa mmenia konwu ye kyɛ ɔboka Yesu asũafoɛ naso. Yeti ɔhãne ye pɛen nzã kyɛ, ɔnze Yesu nekafee. (Mat. 26:​69-75) Nakoso nziɛen, Petro nyane akokoduro, yeti ɛhẽne maa ɔhora hãne kyɛ: “Nnɛmɔma bɛ nwo suronyi tɔ ɛmɔ so, yeɛ nnɛmɔma ɛmɔ kunu tete ɛmɔ.” (1 Pet. 3:14) Sɔ dwirɛ bɔ Petro hãne ne, ɔmaa yenwu kyɛ, sɛ yesuro mmenia po a, yɛkɔhora yekonya akokoduro.

8. Sɛ yesuro kyɛ yɛkɔhã edwirɛ ne bie yekohyire mmenia a, nzu yeɛ ɔkɔboka yɛ ɔ? (1 Petro 3:15)

⁸ Sɛ yesuro bɔ mmenia kɔhã kɔfa yɛnwo a, nzu yeɛ ɔkɔboka yɛ maa yekonya akokoduro ɔ? Petro tuli yɛ foɛ kyɛ: “Ɛ́mɔma Awurade Kristo ɔyɛ krongron wɔ ɛmɔ ahone nu.” (Kenga 1 Petro 3:15.) Sɔ dwirɛ bɔ Petro hãne ne, bɔ né ɔpena kyɛ okyire yeɛ ole kyɛ, odikyɛ yɛdwenedwene adwuma bɔ Yehowa afa awura Yesu sa nanwo. Yeɛ ole kyɛ, kesaalae ɔte ɔhene bɔ ole tumi paa ɔ. Sɛ enya yenwo atẽe bɔ ɛkɔfa koli ebie adanzeɛ na esuroen kã wɔ a, kae kyɛ yɛ Hene Yesu kɔboka wɔ. Fa ye kyɛ enwu Yesu bɔ ɔte ye ahennie bia nu bɔ abɔfo pẽe bapɛ yenwo bayia ɔ. Afei kae kyɛ “bafa nyameɛso ne aseɛ so tumi amukoraati” bama Yesu. Yeti ɔne wɔ “wɔ berɛ mmerɛ biala kodwu ewiase ayieleɛ.” (Mat. 28:​18-20) Petro sa hyɛle yɛ ngunaen kyɛ ‘mmerɛ biala, yɛboaboa yɛnwo yésie.’ Sɛ yɛyɛ sɔ a, ɔkɔboka yɛ maa yɛkɔhora yɛkɔhã yɛ gyidie nwo dwirɛ yekohyire ebiala. Aso ɛpena kyɛ edi bɛbɔ ɛne bɛ yɛ adwuma, bɛbɔ ɛne bɛ kɔ sukuu, anaa mmeni foforɛ adanzeɛ anaa? Sɛ sɔ a, yede dimoa dwene edwirɛ bɔ ɛkɔhora kɔhã kohyire bɛ nanwo, na nea mmerɛ bɔ ɔte pá bɔ ɛkɔhora kɔfa koli bɛ adanzeɛ ɔ. Bɔ mbaeɛ srɛ Yehowa kyɛ ɔboka wɔ ma enya akokoduro, na nya gyidie kyɛ ɔkɔboka wɔ maa ɛkɔhora kɔhã edwirɛ ne bie kohyire mmenia.—Aso. 4:29.

‘ƐMƆFI ƐMƆ AHONE NU BEHUROHURO ƐMƆ NWO DWIRƐ’

9. Mmerɛ bie, nzu yeɛ Petro yɛle bɔ okyire kyɛ, né ɔyɛ se ma ye kyɛ ɔkɔmaa aliemaa biemɔ konwu kyɛ okuro bɛ dwirɛ ɔ? (Nea foto ne koso.)

⁹ Yesu hãhyirele ye asũafoɛ nemɔ kyɛ: “Ahyɛdeɛ foforɛ yeɛ mefa mema ɛmɔ ɔ, kyɛ ɛmɔhurohuro ɛmɔnwo dwirɛ na kyɛbɔ mahuro ɛmɔ dwirɛ nen, sɔ ala yeɛ ɛmɔ koso ɛmɔhurohuro ɛmɔnwo dwirɛ ɔ!” Sɔ mmerɛ ne, né Petro wɔ berɛ bie. Yeti sɛ bɛkã ɔdɔ nwo dwirɛ a, né ɔtte nikyee foforɛ wɔ Petro nye so. (Yoh. 13:34) Nakoso odwuli mmerɛ bie ne, ɔnate kyɛ né Petro suro bɔ mmenia kɔhã kɔfa yenwo nati, ɔne maenmaensofoɛ bɔ né baayɛ Kristofoɛ ne, bammɔ nu baannidi kõ. Mmerɛ bɔ somafoɛ Pɔɔlo nwuni sɔ “suban tɛɛ” bɔ ɔwɔ Petro nwo ne, ohwili Petro nyunu, na ɔmaa onwuni kyɛ bɔ ɔyɛ ne te nyaatwom. (Gal. 2:​11-14) Petro le tole nu, na ɔyɛle nzakrayɛɛ. Ɛhẽne ati wɔ Petro ngrataa bɔ ɔhworɔle ne mukoraati nu ne, ɔmaa yenwuni kyɛ ɔnzɛkyɛ yɛfa yɛnoa mbaen yɛkã kyɛ yekuro aliemaamɔ dwirɛ. Mmom odikyɛ yɛyɛ nikyeebie yɛfa yekyire kyɛ yekuro aliemaamɔ dwirɛ.

10. Nzu yeɛ ɔkɔmaa yɛkɔhora ‘yekohurohuro yɛnwo dwirɛ wɔ nahorɛ nu’ ɔ? Kyirekyire nu. (1 Petro 1:22)

¹⁰ Petro hãne kyɛ, ‘Ɛmɔhurohuro ɛmɔ nwo dwirɛ wɔ nahorɛ nu.’ (Kenga 1 Petro 1:22.) Sɛ yɛkɔhora yɛkɔyɛ sɔ a, sana ‘yɛyɛ asoɛ yɛma nahorɛ ne.’ Sɔ nahorɛ ne, ebie yeɛ ole kyɛ yekole yɛkɔto nu kyɛ, “Nyameɛ nyɛ nyeyemuɛ.” (Aso. 10:​34, 35) Sɛ yɛkɔhora yekoli ahyɛdeɛ bɔ Yesu famane yɛ kyɛ yehurohuro yɛnwo dwirɛ naso a, odikyɛ yɛmaa aliemaamɔ bɔ bɛwɔ asafo nanu ne mukoraati nwu kyɛ yekuro bɛ dwirɛ, na ɔnzɛkyɛ yɛyɛ nyeyemuɛ. Nahorɛ dwirɛ yeɛ ole kyɛ, kyɛbɔ Yesu yɛle ne, yɛ koso aliemaa biemɔ wɔ berɛ a, yɛne bɛ kɔfa adamvoa bɔ enu yɛ se paa yɛkɔtra ebiemɔ. (Yoh. 13:23; 20:2) Nakoso kyɛbɔ Petro hãne ne, odikyɛ ‘yekurokuro yɛnwo dwirɛ, na yɛfa aliemaamɔ mukoraati kyɛ y’abusũafoɛ.—1 Pet. 2:17.

11. Sɛ bɛkã kyɛ ‘yefi y’ahone nu yehurohuro yɛnwo dwirɛ a,’ okyire sɛɛ?

¹¹ Petro tuli yɛ foɛ kyɛ, odikyɛ ‘yefi y’ahone nu yehurohuro yɛnwo dwirɛ.’ Sɔ dwirɛ bɔ Petro hãne kyɛ ‘yefi y’ahone nu yehurohuro yɛnwo dwirɛ ne,’ ɔkɔ sĩɛ tra kyɛ yɛkɔfa yɛnoa mbaen yɛkɔhã kyɛ yekuro aliemaamɔ dwirɛ ɔ. Mmom, odikyɛ yɛyɛ nikyeebie yɛfa yekyire sɔ. Ebie yeɛ ole kyɛ, sɛ aliemaa bie yɛ nikyeebie maa ɔyɛ yɛ yea a, ebia yekonya adwene kyɛ yɛyɛ bie yetua yeso kerɛ. Nakoso, kyɛbɔ Yesu bokale Petro maa onwuni ne, sɛ ebie yɛ nikyee maa ɔyɛ yɛ yea a, Nyameɛ nye ngye yenwo kyɛ yɛkɔyɛ bie yekotua sona naso kerɛ. (Yoh. 18:​10, 11) Petro hãne kyɛ: “Nnɛma ɛmɔfa bɔne betua bɔne so, anaa nzoaapepɛlɛ betua nzoaapepɛlɛ so; na mmom ɛ́mɔyirayira.” (1 Pet. 3:9) Yeti sɛ yekuro aliemaamɔ dwirɛ paa a, mmerɛ bɔ bayɛ nikyeebie maa wayɛ yɛ yea ne, yekonya bɛnwo aboterɛ, na yɛngɔyɛ bie yengotua bɛso kerɛ.

12. (a) Sɛ yekuro yeliemamɔ dwirɛ nahorɛ nu a, nzu yeɛ yɛkɔyɛ ɔ? (b) Mmerɛ bɔ ɛneane vidio bɔ ye dwirɛti yeɛ ole Baakoyɛ a Yɛwɔ No Yɛ Akyɛde a Ɛsom Bo, Enti Bɔ Ho Ban ne, nzu yeɛ wahyɛ wɔ ngunaen kyɛ ɛyɛ ɔ?

¹² Wɔ Petro krataa bɔ olimoa hworɔle nanu ne, ɔfale edwirɛ “ɛmɔhurohuro ɛmɔ nwo dwirɛ nahorɛ nu” yeɛ ɔyɛle adwuma ɔ. Sɛ yekuro yeliemamɔ dwirɛ a, ɔkora “kata bɔne pẽe” bɔ bɛyɛ yɛ naso. (1 Pet. 4:8) Mmerɛ bɔ Petro hãne sɔ dwirɛ ne, ebia bɔnefakyɛ nwo dwirɛ bɔ Yesu hãhyirele ye afoɛ bie bɔ wapɛ nu ne, yeɛ né ɔwɔ ye tianu ɔ. Sɔ mmerɛ bɔ Yesu hãne sɔ dwirɛ ne hyirele Petro ne, né Petro adwene yɛ ye kyɛ, sɛ ebie yɛ ye bɔne, na ɔfa kyɛ ye pɛen nzoo a, okyire kyɛ wayɛ nikyee paa. Nakoso, Yesu maa Petro nwuni kyɛ, sɛ oliema yɛ ye bɔne a, odikyɛ ɔfa kyɛ ye pɛen “aburasoo sɔ alaa nzoo,” kyire kyɛ odikyɛ ɔfa kyɛ ye koraa. Sɔ ala yeɛ odikyɛ yɛ koso yɛyɛ ɔ. (Mat. 18:​21, 22) Sɛ ɔyɛ se ma wɔ kyɛ ɛkɔfa sɔ dwirɛ ne kɔyɛ adwuma a, nnɛmaa w’abanu bu. Ofikyɛ bɛbɔ bɛsõ Yehowa ne koso mvomsoɛ wɔ bɛnwo, yeti sɛ odwu mmerɛ bie a, ɔyɛ se ma bɛ kyɛ sɛ ebie yɛ bɛ bɔne a, bɛkɔfa sona ne bɔne bɛkɔhyɛ ye ɔ. Nakoso bɔ Yehowa pena kyɛ ɛyɛ yeɛ ole kyɛ, sɛ eliema yɛ wɔ bɔne bie a, ɛkɔbɔ wɔnwo mmɔden kɔfa kɔhyɛ ye, na ɛne ye atena asomdwee nu.c

ASAFO NU MBANYI, ƐMƆNEA MMOAEN KURE NASO

13. Nzuati yeɛ odwu mmerɛ bie a, ɔkɔhora kɔyɛ se kɔma asafo nu mbanyi kyɛ bekonya mmerɛ bɛkɔma aliemaamɔ ɔ?

¹³ Mmerɛ bɔ betingyéle Yesu ne, ɔhane edwirɛ bie hyirele Petro bɔ né Petro wora ngofi ye le ɔ. Ɔhãne kyɛ: “Nea me mmoaen nemɔ so.” (Yoh. 21:16) Sɛ ɛte asafo nu panyi a, wɔ koso sɔ dwirɛ ne fa wɔnwo, ofikyɛ sɔ adwuma ne bie ala yeɛ owura wɔ sa ɔ. Nakoso, odwu mmerɛ bie a, ɔkɔhora kɔyɛ se kɔma wɔ kyɛ ɛkɔnea aliemaamɔ so ɔ. Odikyɛ asafo nu mbanyi nea bɛ mmusũa maa bɛsa kã bɔ behia ye wɔ asetena nu ɔ. Afei koso, odikyɛ bɛmaa benwu kyɛ bɛdwene bɛnwo, na bɛboka bɛ maa bɛkora bɛsõ Yehowa yé. Ebiekũ koso, asafo nu mbanyi yere bɛnwo yɛ asɛnga adwuma ne, kyɛbɔ ɔkɔyɛ a, aliɛmaamɔ kosũesua bɛ ɔ. Afei koso, dwumadie ahoroɛ bɔ benya ye wɔ asafo nhyiamu, manzin nhyiamu, ɔne mandam nhyiamu bo ne, bɛbɔ mmɔden besiesie ye yé, kyɛbɔ ɔkɔyɛ a, aliemaamɔ konya so mvasoɛ ɔ. Mbanyi ne biemɔ koso wɔ berɛ a, bɛboka Dɔktafoɛ Ne Ayarefoɛ Afĩa Ngitanwodié Boayikue (HLC) naso. Ebiemɔ koso wɔ berɛ a, Bɛboka Bɛbɔ Besisi Asafo Sua Ahoroɛ (LDC) naso. Nahorɛ dwirɛ yeɛ ole kyɛ, asafo nu mbanyi te mmenia bɔ b’adwuma sõne paa!

14. Nzu yeɛ ɔkɔboka asafo nu mbanyi maa bɛkɔnea mmoaen kure naso ɔ? (1 Petro 5:​1-4)

¹⁴ Petro tuli asafo nu mbanyi foɛ kyɛ, “Ɛ́mɔnea Nyameɛ mmoaen kure ne aso.” (Kenga 1 Petro 5:​1-4.) Sɛ ɛte asafo nu panyi a, yɛse kyɛ ekuro aliemaamɔ dwirɛ, yeti ɛpena kyɛ ɛfa sɔ dwirɛ he yɛ adwuma na ɛboka bɛ. Nakoso odwu mmerɛ bie a, ɔnate kyɛ adwuma pẽe gua wɔso nati, ɛyɛ a né afɛ. Yeti, ɛhẽne maa enya adwene kyɛ ɛngɔhora ngɔyɛ adwuma bɔ Yehowa afa ama wɔ kyɛ ɛnea aliemaamɔ so ne. Sɛ ɔba sɔ a, nzu yeɛ ɛkɔhora kɔyɛ ɔ? Fi w’ahone nu kã bɔ ɛfa nu nanwo dwirɛ kyire Yehowa wɔ mbaeɛ nu. Petro hworɔle kyɛ: “Sɛ ebie ɔyɔ ɛsolɛ adwuma a, ma ɔfa anwoserɛ bɔ Nyameɛ afa ama ye ne ɔso.” (1 Pet. 4:11) Nahorɛ dwirɛ yeɛ ole kyɛ, ɔhaw bɔ aliemaamɔ fa nu ne, odikyɛ enwu kyɛ ewiase foforɛ nanu ngome yeɛ okofi berɛ ɔ. Nakoso kae kyɛ, Yesu bɔ ɔte “Mmoaenneafoɛ panyi ne,” ɔkɔhora kɔboka aliemaamɔ maa bekogyina ɔhaw bɔ bɛfa nu ɛnnɛ ne noa. Sɛ yɛkɔ ewiase foforɛ nanu koso a, ɔkɔye ɔhaw bɔ bɛfa nu ne kofi berɛ. Bɔ Nyameɛ pena kyɛ asafo nu mbanyi yɛ yeɛ ole kyɛ, bɛkɔmaa aliemaamɔ konwu kyɛ bekuro bɛ dwirɛ, bekonya bɛnwo alagye bɛkɔboka bɛ, na bayɛ ‘nhwɛsoɛ bama mmoen kure ne ɔ.’

15. Nzu yeɛ asafo nu panyi bie yɛle fahyirele kyɛ ɔnea mmoaen kure naso ɔ? (Nea foto ne koso.)

¹⁵ William ɔɔyɛle asafo nu panyi ne, afoɛ pẽe ɛhe, na wanwu kyɛ yenwo hia paa kyɛ asafo nu mbanyi nya aliemaamɔ nwo alagye na bɛboka bɛ. Mmerɛ bɔ COVID-19 anwonyerɛ ne hyɛle yebo ne, William ne asafo nu mbanyi bɔ baha ne fasiele bɛnye so kyɛ, aliemaamɔ bɔ bɛwɔ asɛnga kue ahoroɛ nu wɔ bɛ asafo nanu ne, bɛkɔnea ebiala boso dapɛen biala. Bɔ yeti yeɛ mbanyi nemɔ sili sɔ gyinayɛɛ ne, William hyirehyirele nu. Ɔhãne kyɛ: “Ɔnate anwonyerɛ nati, né aliemaamɔ pẽe nala ngora mvite, yeti benu biemɔ wɔ berɛ a, né waha bɛ ngome wɔ awuro. Ɔnate ɛhẽne ati, né adwenedwene kɔhora kɔhyɛ bɛso maa b’aba nu kobu.” Sɛ aliemaa bie kã ɔhaw bɔ ɔfa nu nwo dwirɛ kyire William a, né onya aboterɛ tie ye yé, na afei ɔnea bɔ ɔkɔhora kɔyɛ kɔfa kɔboka aliemaa ne ɔ. Ɛhẽne sĩ ne, video ne nwomaa ahoroɛ bɔ ɔwɔ jw.org so ne, ɔbɔ mmɔden kyɛ ɔkɔfa enu dwirɛ ne bie kɔhyɛ aliemaa bɔ ɔte sɔ ne ngunaen. William hãne kyɛ: “Sɔ mmerɛ he paa yeɛ odikyɛ asafo nu mbanyi bɔ mmɔden kyɛ bekonya aliemaamɔ nwo alagyé na baboka bɛ ɔ. Kyɛbɔ yɛfa mmerɛ pẽe yɛkɔ asɛnga yɛfa yekyirekyire mmenia maa benwu Bible nanu dwirɛ ne, sɔ ala yeɛ odikyɛ yɛbɔ mmɔden kyɛ yekonya aliemaamɔ nwo alagyé, na yaboka bɛ maa basõ Yehowa bɔ nikyefee ngobu bɛ aba nu maa bengofi asafo nanu ɔ.”

MA YEHOWA SIESIE WƆ MA ELI MŨ

16. Edwirɛ bɔ ɔwɔ ngrataa nyɔ bɔ Petro hworɔle nanu ne, yɛkɔyɛ sɛɛ né yahora yafa yayɛ adwuma?

¹⁶ Edwirɛ bɔ ɔwɔ ngrataa nyɔ bɔ Yehowa maa Petro hworɔle nanu ne, yasusu enu kãa bie nwo wɔ adesũa he anu. Ebia bɔ yasusu yenwo wɔ adesũa he anu ne aboka wɔ maa anwu nningyein biemɔ bɔ odikyɛ ɛyere wɔnwo kyɛ ɛkɔyɛ ɔ. Ebie yeɛ ole kyɛ, nhyiraa bɔ ekonya ye wɔ ewiase foforɛ bɔ ɔba nanu ne, ɛkɔhora kɔhɔso kɔdwenedwene yenwo. Afei koso, ɛkɔhora kɔfa kosie wɔnye so kyɛ ekoli mmenia adanzeɛ wɔ adwuma nu, sukuu nu, ɔne nekaa foforɛ biala. Ebiekũ koso, ɛkɔhora kɔyɛ nningyein biemɔ kɔma aliemaamɔ kɔfa kohyire kyɛ ekuro bɛ dwirɛ paa. Sɛ ɛte asafo nu panyi koso a, ɛkɔhora kɔyere wɔnwo kyɛ ekofi w’ahõne mukoraati nu kɔnea Yehowa mmoaen kure naso yé. Sɛ enwu ye kyɛ ɔyɛ se ma wɔ kyɛ ɛkɔyɛ nningyein bɔ yabobɔ so ne bie a, nnɛmaa w’abanu bu. Ofikyɛ Bible ne amaa yanwu kyɛ “Awurade te paa,” yeti ɔkɔboka wɔ. (1 Pet. 2:3) Petro hyɛle yɛ ngunaen kyɛ: “Nyameɛ . . . kosiesie ɛmɔ maa ɛmɔkoli mu, ɔkɔmaa ɛmɔ kogyina pindinn, ɔkɔma ɛmɔ anwoserɛ, ná wama ɛmɔagyina pirim.”—1 Pet. 5:10.

17. Sɛ ɛmaa Yehowa boka wɔ na ɛkɔso sõ ye a, akatuaa beni yeɛ ekonya ɔ?

¹⁷ Né Petro bu yenwo kyɛ ɔmvata kyɛ Nyameɛ Awa Yesu kɔwa yenwo ɔ. (Luka 5:8) Nakoso, ɔnate kyɛ né Yehowa ne Yesu kuro Petro dwirɛ nati, bɛbokale ye maa ɔhɔle so lili Yesu sĩ. Ɔnate ɛhẽne ati, Petro nyane yenwo atẽe kyɛ ɔkɔhɔ “y’Awurade ne yɛ Ngoadefoɛ Yesu Kristo ahennie afebɔɔ ne anu.” (2 Pet. 1:11) Ɛhe te yenwo atẽe pirikua paa bɔ Petro nyane ye ɔ. Wɔ koso, sɛ ɛmaa Yehowa boka wɔ, na ɛkɔso yere wɔnwo kyɛ ɛkɔsõ ye, kyɛbɔ Petro yɛle ne a, ekonya daa ngõa. Ɛhe yeɛ ole wɔ ‘gyidie ne nwo akatuaa, bɔ ɔte ngoalelɛ ma wɔ kra ɔ.’—1 Pet. 1:9.