Ebie Sũahu

Nwu Mmenia Mukoraa Anwumvoin

Ɛlɛhõ bie, aliemaa brasua bie bɔ ɔwɔ New Zealand neane video bie wɔ jw.org so. Né sɔ vidio ne kã kyɛ, Yehowa te ebie bɔ onwu mmenia anwumvoin. Nakoso nna ɛhẽne ngome yeɛ Yehowa yɛ ɔ, na mmom ɔyɛ nningyein pɔtẽe bie fa boka sɔ mmenia nemɔ. (Yes. 63:​7-9) Bɔ aliemaa brasua ne sũa fili sɔ vidio nanu ne, né ɔpena kyɛ ɔfa yɛ adwuma. Yeti ɔyɛle ye adwene kyɛ ɔkɔboka mmenia bɔ bɛnwo ahyere bɛ ne. Sɔ kyẽa ne ala, aliemaa brasua ne hɔle kuro nu kyɛ ɔkwaali dwaa. Mmerɛ bɔ ɔhɔle ne, onwuni maame bie bɔ ɔnate anwokyere ti ɔla dwaaso ɔ. Yeti aliemaa brasua ne hãhyirele maame ne kyɛ ɔpena kyɛ ɔtɔ aleɛ ma ye maa odi, na maame ne koso penene so. Mmerɛ bɔ aliemaa brasua ne fale aleɛ ne brɛle maame ne, ɔfale trakt bie mane ye. Né ye dwirɛti ye ole, Amaneɛ Bɔ Yenwu Ye Ne, Aso Okofi Berɛ Anaa?

Mmerɛ bɔ maame ne tele sɔ dwirɛ ne, ɔhyɛle yebo kyɛ osũ. Ɔhãhyirele aliemaa brasua ne kyɛ, bɛtetele ye wɔ asafo nanu, nakoso afoɛ pẽe ɛhe yeɛ wayakyi adesũa hɔlɛ ɔ. Osa hãhyirele aliemaa brasua ne kyɛ ɛlɛsaen ala yeɛ wabɔ Yehowa mbaeɛ kyɛ ɔboka ye ma osa bra asafo nanu ɔ. Aliemaa brasua ne mane maame ne Bible, na maame ne koso pene so kyɛ okosũa Bible ne.a

Kyɛbɔ aliemaa brasua ne yɛle ne, yɛ koso yɛkɔhora yekosuesũa Yehowa, na yanwu mmenia anwumvoin. Ebie yeɛ ole kyɛ, yɛkɔboka y’abusũafoɛ ne aliemaamɔ bɔ bɛnwo ahyere bɛ ne. Afei koso yenwo atẽe biala bɔ yekonya ye ne, odikyɛ yɛfa yedi mmenia adanzeɛ yɛfa yekyire kyɛ yɛdwene bɛnwo.