Edwirɛ Bɔ Ebiemɔ Bisa Ɔ

2 Tɛsalonikafoɛ 3:14 maa yenwu kyɛ odikyɛ bɛhyɛ mmenia biemɔ nzorɛ. Aso aliemaamɔ yeɛ odikyɛ bɛyɛ sɔ ɔ, anaa asafo nu mbanyi nemɔ?

Somafoɛ Pɔɔlo hworɔle sɔ dwirɛ he ɔɔmane Kristofoɛ bɔ ne bɛwɔ Tɛsalonika ne. Ɔhane kyɛ: “Na sɛ ebie ngotie bɔ yahã ye wɔ krataa ye anu a, ɛmɔhyɛ sɔ sona ne nzorɛ.” (2 Tɛs. 3:14) Mmerɛ bie bɔ wapɛ nu ne, yɛhane kyɛ ɔfale sɔ akwangyerɛ ne mane asafo nu mbanyi nemɔ. Yeti sɛ né aliemaa bie mva Bible nu akwangyerɛ bie mmɔ ye bra, ná betu ye foɛ alaa koso ondie a, né mbanyi nemɔ kora ma dwudwolɛ bie bɛfa bɛbɔ asafo ne kɔkɔ. Ɛhene si ne, sɛ aliemaamɔ yia nu kyɛ bɛgye bɛnye a, bɛngɔfrɛ ye, nakoso bɛne ye kɔhora kɔbɔ nu kɔyɛ asafo dwumadie ahoroɛ.

Sɔ ndeaseɛ he bɔ yele ne, yayɛ nu nzakrayɛɛ. Kesaalae de, yate yebo kyɛ, sɔ dwirɛ bɔ Pɔɔlo hane ne, odikyɛ Kristoniɛ biala si ye bɔbɔ ye gyinayɛɛ wɔ yenwo. Yeti yenwo nhia kyɛ mbanyi nemɔ kɔma dwudwolɛ biala kɔbɔ asafo ne kɔkɔ ɔ. Nzuati ɔ? Ɛmɔma yɛnea bɔ yeti yeɛ Pɔɔlo hane sɔ dwirɛ ne ɔ.

Pɔɔlo hyɛle ye nzorɛ kyɛ, aliemaa biemɔ bɔ né bɛwɔ sɔ asafo nanu ne, né “bɛnatenate basabasa.” Akwangyerɛ bɔ né Pɔɔlo afa ama bɛ ne, bamva banyɛ húu. Né walimoa waha wahyire asafo ne kyɛ: “Sona biala bɔ onguro kyɛ ɔyɔ adwuma ne, onni kyɛ odidi.” Nakoso né ebiemɔ ahyɛda kyɛ bɛngɔyɛ adwuma bɛngɔnea bɛnwo, ɔmva yenwo kyɛ né bɛkɔhora bɛkɔyɛ sɔ ne. Afei koso, né bɛfa bɛnoa bɛtoto mmenia dwirɛ nu. Yede, sɛɛ yeɛ né odikyɛ aliemaamɔ ne sɔ mmenia nemɔ tena ɔ?—2 Tɛs. 3:​6, 10-12.

Pɔɔlo hane kyɛ: “Ɛmɔhyɛ sɔ sona ne nzorɛ.” Sɔ Greek dwirɛ ne kyire kyɛ, ɛkɔnea wɔnwo yé wɔ sɔ sona nanwo. Né Pɔɔlo fa sɔ akwangyerɛ ne ma asafo namu, na mmom ɔtte mbanyi nemɔ ngome. (2 Tɛs. 1:1; 3:6) Yeti sɛ né Kristoniɛ bie hyɛda kyɛ ɔngɔfa Bible akwangyerɛ bie ngɔbɔ ye bra a, né aliemaa bie kɔhora kosi gyinayɛɛ kyɛ ‘ɔne sɔ sona ne ngɔbɔ afɛ.’

Aso sɔ dwirɛ ne kyire kyɛ sɔ sona ne, odikyɛ yɛne ye di ye tekyɛ ebie bɔ baye ye bafi asafo nanu anaa? Daabi, ofikyɛ Pɔɔlo toale ye dwirɛ naso kyɛ: “Ɛ́mɔbɔ ye kɔkɔ kyɛ aliɛmaa.” Yeti aliemaamɔ ne sɔ aliemaa bɔ bahyɛ ye nzorɛ ne kɔbɔ nu kɔhɔ asɛnga. Sɛ bɛkɔ adesua koso a, bɛne ye kɔbɔ. Nakoso sɛ aliemaamɔ bɔnu kyɛ begye bɛnye a, bɛkɔhora bekosi gyinayɛɛ kyɛ bɛngɔfrɛ sɔ sona ne. Nzuati ɔ? Pɔɔlo sa hane kyɛ: “Ɛ́mɔma ɔfɛre.” Sɛ aliemaamɔ yɛ sɔ a, ebia ɔkɔmaa sɔ Kristoniɛ bɔ ɔnate basabasa ne, yenye kɔwa yenwo so, ná wasesã.—2 Tɛs. 3:​14, 15.

Sɛɛ yeɛ Kristofoɛ kɔhora kɔfa sɔ dwirɛ he kɔyɛ adwuma ɛnnɛ ɔ? Koraka yɛkɔhã kyɛ ebie ‘nate basabasa’ kyɛbɔ Pɔɔlo hane ne, odikyɛ yenwu ye kyɛ, subaen bɔ ɔda ye ali ne kyire sɔ amba. Ebiemɔ kora gyina bɛ tiboa so si gyinayɛɛ bie, koso ebia yɛ de ahaa yɛngɔyɛ ye sɔ, anaa yɛnye ngye yenwo sɔ. Yeɛ ebia né ebiemɔ ayɛ nikyeebie maa wayɛ yɛ yea. Nna sɔ mmenia nemɔ nwo dwirɛ yeɛ né Pɔɔlo kã ɔ. Na mmom, né ɔkã bɛbɔ bahyɛ da kyɛ bekobu Bible akwangyerɛ bie bɔ nu la berɛ naso ne.

Ɛnnɛ, sɛ yenwu ye kyɛ Kristoniɛ bie ahyɛ da kyɛ ɔngɔfa Bible akwangyerɛ bie ngɔyɛ adwuma a,a yenu biala kosi ye bɔbɔ ye gyinayɛɛ kyɛ sɛ aliemaamɔ bɔ nu kyɛ bɛgye bɛnye na sɔ sona ne ba bie a, ɔne ye ngɔbɔ. Ɔnate kyɛ ebiala yeɛ okosi yebɔbɔ gyinayɛɛ wɔ edwirɛ he anwo nati, ɔnzɛkyɛ kyɛ yɛkã yenwo dwirɛ yekyire ebiala sana yɛ abusuafoɛ bɔ yɛne bɛ te ne. Nakoso yɛne sɔ aliemaa ne kɔbɔ mmerɛ bɔ yahɔ adesua anaa asɛnga ne. Sɛ ɔwɔ nu alaa ná ɔsesã ye subaen a, yede yɛne ye kɔbɔ nu kɔyɛ nikyeebiala.