Edwirɛ Bɔ Ebiemɔ Bisa Ɔ
Asuafoɛ 70 bɔ Yesu limoa somane bɛ maa bɛɛhane nzɛmba ne, né bɛwɔ nisua mmerɛ bɔ ɔfale Awurade Nɔsoa Aleɛ ne siele berɛ ne? Aso né bayakyi ye sĩ lilɛ anaa?
Ɔnzɛkyɛ yenya adwene kyɛ ɔnate kyɛ asuafoɛ 70 ne, né bɛnne Awurade Nɔsoa Aleɛ nabo nati, okyire kyɛ né Yesu nné bɛ ndonu anaakyɛ né bayakyi ye sĩ lilɛ. Bɔ ɔwɔ nu ala yeɛ ole kyɛ, né Yesu pena kyɛ ɔne ye asomafoɛ nemɔ, yeɛ bɛyɛ sɔ dwumadie ne ɔ.
Mmenia 12, ɔne mmenia 70 ne mukoraati, né Yesu dé bɛ tonu kyɛ bɛte ye asuafoɛ. Yesu asuafoɛ ne, olimoa yele benu 12 na ɔfrɛle bɛ asomafoɛ. (Luka 6:12-16) Mmerɛ bɔ né Yesu wɔ Galilea ne yeɛ ‘ɔfrɛle asuafoɛ buru ne nyɔ ne’ ɔ, na “ɔsomane bɛ kyɛ bɛɛbɔ Nyameɛ ahennie ne nwo dawure, ná bɛsa anwonyerɛ.” (Luka 9:1-6) Nziɛen bɔ né Yesu wɔ Yudea ne, ‘ɔyele mmenia aburasoo bieku, na ɔsomane bɛ nyɔ nyɔ’ kyɛ bɛɛhã nzɛmba ne. (Luka 9:51; 10:1) Yeti né Yesu le asuafoɛ wɔ nekaa ahoroɛ pee bɔ né bedi yenwo adanzeɛ ɔ.
Yudafoɛ bɔ né baayɛ Yesu asuafoɛ ne, ɔkɔyɛ kyɛ sɛ odwu afoɛ biala a, né bɛne b’abusua bɔnu di Abɔtra aluolue ne. (Ɛks. 12:6-11, 17-20) Mmerɛ bɔ né waha kãa ma Yesu wu ne, ɔne ye asomafoɛ nemɔ hɔle Yerusalem. Nakoso, wamvrɛ ye asuafoɛ bɔ né ebiemɔ wɔ Yudea, Galilea, ne Perea ne kyɛ bemu beeyia nu ma ɔne bɛ li Abɔtra aluolue ne. Ɛhe maa yenwu ye kyɛ, né Yesu pena kyɛ ɔne ye asomafoɛ nemɔ ngome yeɛ bɛyɛ sɔ dwumadie ne ɔ. Yesu hahyirele bɛ kyɛ: “Mayɛ m’adwene paa kyɛ me ne ɛmɔ yɛkoli Abɔtra aleɛ he koraka né manwu amaneɛ.”—Luka 22:15.
Ndeaseɛ wɔ nu kyɛ Yesu yɛle sɔ ɔ, ofikyɛ né ɔngɔhyɛ, bekohũ ye kyɛ “Nyameɛ Boaen Ba ne, bɔ ɔye wiase bɔne fi berɛ ne.” (Yoh. 1:29) Né ɛhe kosi wɔ Yerusalem, ofikyɛ ofi tete mukoraati ɛberɛ yeɛ né bɛbɔ afɔleɛ bɛma Nyameɛ ɔ. Afoɛ biala, sɛ né Yisraelfoɛ nemɔ kũ Abɔtra boaen ne a, né ɔkae bɛ kyɛ Yehowa lɛle bɛ fili Egypt. Nakoso Yesu wue ne de, né ɔtra sɔ koraa. Ofikyɛ ɛhene yeɛ né okole mmenia mukoraa kofi bɔne ne ewue nu ɔ. (1 Kor. 5:7, 8) Afei ɔnate Yesu wue nati, né asomafoɛ nemɔ konya yenwo atee bɛkɔɔyɛ fapem bɛkɔma Kristofoɛ asafo ne. (Ɛfe. 2:20-22) Bɔ ɔyɛ anigye yeɛ ole kyɛ, Yerusalem bɔ ɔte kuro krongron ne koso, ogyi “fapem buru ne nyɔ so, bɔ Boaen Ba n’asomafoɛ buru ne nyɔ nemɔ dumaa” guagua so ɔ. (Nye. 21:10-14) Ɛhe ma yenwu ye kyɛ, né asomafo bɔ bedi nahorɛ ne koli dwumaa titire bie maa bɔ Nyameɛ abɔ yetianu kyɛ ɔkɔyɛ ne kɔwa nu. Yeti sɛ né Yesu pena kyɛ bɛboka ye so maa bedi Abɔtra bɔ ɔpɛ yebo, ɔne afei Awurade Nɔsoa Aleɛ bɔ né ɔne bekoli ye ɛhene sĩ ne a, né ndeaseɛ wɔ nu.
Ɔwɔ nu kyɛ, asuafoɛ 70 ne, ɔne asuafoɛ foforɛ bɔ baha ne, ne bɛnne sɔ dwumadie nabo de, nakoso bɛbɔ né bekoli nahorɛ ne mukoraati ne, né bekonya Awurade Nɔsoa Aleɛ naso mvasoɛ. Sɔ asuafoɛ nanu mmenia bɔ nziɛen né bɛkɔfa honhom bɛkɔpopa bɛ ne koso, ahennie apam bɔ Yesu hane yenwo dwirɛ hyirele asomafoɛ nemɔ sɔ kɔngɔen ne, né bɛkɔɔboka so.—Luka 22:29, 30.