Bɔ Ɔkɔboka Wɔ Maa Ekosua Nikyee Daa Ɔ
ASO ɔyɛ se ma wɔ kyɛ ekosua nikyee daa, ná wɔnye agye bɔ esua nanwo anaa? Sɛ odwu mmerɛ bie a, ɔkora to yemu. Nakoso, má yesusu nningyein bɔ yɛyɛ ye daa biala tekyɛ ebialɛ nwo yɛnea. Odikyɛ enya alagye kora né ahora abia maa wɔnwo afi, nakoso sɛ ɛkora yɛ sɔ a, né wɔnwo ayɛ wɔ fɔnwoo. Sɛ yesua Bible ne a, ɔtekyɛ bɔ bafa ‘edwirɛ ne bayɛ nzue babia yɛ bate yɛnwo’ ne. (Ɛfe. 5:26) Edwirɛ bɔ oliliso hemɔ kɔhora kɔboka wɔ maa ekosua nikye:
Yɛ yenwo nhyehyɛɛ. “Nningyein bɔ ɔte paa” bɔ ɔnzɛkyɛ Kristoniɛ bu yenye gua so ne, ebie yeɛ ole Bible bɔ ye bɔbɔ okosua ne. (Flp. 1:10) Bɔ ɔkɔyɛ né wɔ wora amvi mmerɛ bɔ ɛfa sua nikyee ne, ɛkɔhora kɔhworɔ kogua krataa so, né afa ata nekaa bɔ ekonwu ye ndɛ ɔ. Ɛkɔhora koso kɔfa alaam kɔto wɔ fon naso, na sɛ mmerɛ sõ kyɛ esua nikyee a, wakae wɔ.
Nwu mmerɛ dodoɔ bɔ ɛkɔhora kɔfa kosua nikye ɔ. Aso ɛte ebie bɔ ɔkora fa mmerɛ tendenn sua nikye, anaa mmerɛ kãa bie yeɛ ɛkora fa yɛ sɔ ɔ? Ɛhene de, wɔ bɔbɔ yeɛ ɛse ɔ. Yeti, yɛ nhyehyɛɛ bɔ ɔkɔboka wɔ ɔ. Sɛ mmerɛ bɔ ɛfa sua nikyee ne sõ, nakoso enwu ye kyɛ wɔ komvi nne so a, aso ɛkɔhora kɔfa minit buru pɛ kosua anaa? Sɛ ɛkora fa minit buru pɛ sua nikyee a, ɔte pá tra kyɛ engosua ye koraa ɔ. Sɛ ɛkora yɛ sɔ a, ebiaa bɔ esua ne kɔyɛ wɔ fɛ alaa ma ɛkɔfa mmerɛ ne bie po kɔboka so.—Flp. 2:13.
Dimoa pena edwirɛ bɔ ekosua ne to berɛ. Sɛ ɛnwondɛ maa odwu mmerɛ bɔ ɛfa sua nikyee ne kora né asusu bɔ ekosua nanwo a, yede annea a, ɛngɔhora ‘ngɔnea wɔ mmerɛ so yé.’ (Ɛfe. 5:16) Yeti ɔkɔyɛ pá kyɛ ɛkɔhworɔ nningyein bɔ ɛpena kyɛ esua ne kɔto berɛ. Sɛ ésua nikye, na enwu edwirɛ bie bɔ ɛnde yebo a, tworɔ to berɛ. Mmerɛ biala bɔ ekosua nikyee koyie ne, edwirɛ biemɔ bɔ ande yebo ne, tworɔ boka nningyein bɔ ekuro kyɛ esua ye mmerɛ foforɛ naso.
Sɛ odikyɛ ɛsesã nhyehyɛɛ bɔ ayɛ nanu a, yɛ ye sɔ. Sɛ ɛ́yɛ nhyehyɛɛ bɔ ɛkɔfa kosua nikyee a, ɛyɛ a ma ɔtena w’adwene nu kyɛ sɛ nzakrayɛɛ bie ba a, ɛkɔsesã nu. Ebie kɔhora kɔyɛ mmerɛ bɔ ɛfa sua nikye, ɔne nningyein pɔtee bɔ ɛpena kyɛ esua ne. Kae kyɛ nna mmerɛ dodoɔ bɔ ɛkɔfa kosua nikye, anaa nikyee pɔtee bɔ ekosua ne, yeɛ yenwo hia ɔ. Na mmom bɔ ohia yeɛ ole kyɛ, ɛkɔyɛ sɔ daa ɔ.
Sɛ yɛyere yɛnwo yesua nikyee daa a, mvasoɛ pee yeɛ ɔwɔ so ɔ. Ebie yeɛ ole kyɛ ɔmaa yepingye Yehowa, yesisi gyinayɛɛ pá, na yɛ gyidie koso yɛ se.—Yos. 1:8.