Awofoɛ—Ɛmɔboka Ɛmɔ Mmaamɔ Má Bɛ Gyidie Yɛ Se

1-2. Sɛ akwalaa bie bisa ye awofoɛ edwirɛ bie fa gyidie bɔ yele nanwo a, nzu yeɛ odikyɛ bɛyɛ ɔ?

YƐNU pee nala de to nu kyɛ sɛ ɛtete baa a, ɔtte adwuma ba. Yeti sɛ ɛ́bɔ mmɔden kyɛ ɛkɔtete ɛwa kaamba maa ye gyidie kɔyɛ se a, yede ayɛ nikyee paa. (Deut. 6:​6, 7) Nakoso mmerɛ bɔ akwalaa ne nyi ne, ebiaa okobisa edwirɛ pee kɔfa gyidie bɔ yele ye, ɔne bɔ yeti yeɛ odikyɛ yɛfa Bible nu dwirɛ yɛbɔ yɛ bra nanwo.

² Ebiaa ahyɛaseɛ ne de, edwirɛ bɔ akwalaa ne kobisa ne, ɔkɔmaa w’adwene nu kɔyɛ wɔ naa, na annea a ekonya adwene po kyɛ ye gyidie ahɔ ase. Nakoso bɔ ɔte yeɛ ole kyɛ, odikyɛ ngwalaa kɔso bisa edwirɛ mmerɛ bɔ benyi ne, kyɛbɔ ɔkɔyɛ a bɛkɔte bɔ yeti yeɛ bede nikyeebie bedi nabo. (1 Kor. 13:11) Yeti sɛ ɛwa ne bisa wɔ dwirɛ bie a, nnɛmaa wɔ kunu tete wɔ. Na mmom nwu ye kyɛ ɔte yenwo atee bɔ ɛkɔfa kɔboka ye maa okosusu nningyein nwo kɔhɔ siɛ, na wamaa ye gyidie ayɛ se.

3. Nzu yeɛ yekosusu yenwo wɔ adesua he anu ɔ?

³ Adesua he anu ne, yɛkɔnea kyɛbɔ awofoɛ kɔboka bɛ mmaamɔ maa (1) bɛ gyidie kɔyɛ se, (2) bekonwu mvasoɛ bɔ ɔwɔ so kyɛ bɛkɔfa Bible nu dwirɛ bɛkɔbɔ bɛ bra, na (3) banwu kyɛbɔ bekohyirehyire bɛ gyidie nu ɔ. Yekosa yɛkɔnea bɔ yeti yeɛ ɔte pa kyɛ ngwalaa kobisa edwirɛ ɔ. Ná yanea nningyein biemɔ bɔ awofoɛ ne bɛ mmaamɔ yɛ a, ɔkɔmaa bɛne bɛ kɔbɔ nningyein bɔ yedé yedi nanwo ngɔmmɔ.

BOKA WƆ ƐWA MÁ YE GYIDIE YƐ SE

4. Edwirɛ benimɔ yeɛ ebiaa akwalaa bie kobisa ɔ, na nzuati ɔ?

⁴ Awofoɛ bɔ bɛte Kristofoɛ ne, bɛse kyɛ sɛ bele gyidie wɔ Nyameɛ nu a, ɛhene ngyire kyɛ bɛ mmaa nemɔ koso konya bie. Wɔ sɔa, gyidie bɔ ele ye wɔ Yehowa nu ne, bamva banwo wɔ, na sɔ ala yeɛ ɛwa ne koso bamva banwo ye ɔ. Ɛhene ati okodwu nekaa bie ne, ebiaa okobisa edwirɛ biemɔ te kyɛ: ‘Nzu yeɛ okyire kyɛ Nyameɛ bie wɔ berɛ ɔ? Edwirɛ bɔ ɔwɔ Bible nanu ne, aso ɔte nahorɛ?’ Bible ne po maa yenwu ye kyɛ, odikyɛ ‘yesusu nningyein nwo,’ na ‘yeso nningyein amukoraa yɛnea.’ (Rom. 12:1; 1 Tɛs. 5:21) Yede ɛkɔyɛ sɛɛ né aboka ɛwa ne maa ye gyidie ayɛ se?

5. Sɛ ɛte awofoɛ a, ɛkɔyɛ sɛɛ né aboka ɛwa maa wale wali kyɛ Bible nanu dwirɛ te nahorɛ? (Romanfoɛ 12:2)

⁵ Boka ɛwa ma onwu ye kyɛ edwirɛ bɔ ɔwɔ Bible nanu ne te nahorɛ. (Kenga Romanfoɛ 12:2.) Sɛ ɛwa ne bisa edwirɛ bie a, fa sɔ mmerɛ ne boka ye má onwu kyɛbɔ ɔkɔfa nwomaa bɔ yɛfa yɛyɛ nhwehwɛmuɛ ne kɔpena yenwo mmuayɛɛ ɔ. Sɔ nwomaa ne bie yeɛ ole Watch Tower Publications Index, ɔne Nhoma a Yehowa Adansefo De Yɛ Nhwehwɛmu ne. Nhoma a Yehowa Adansefo De Yɛ Nhwehwɛmu ne sɔa, sɛ ɔkɔ edwirɛti “Bible,” na ɔnea edwirɛ “Efi Onyankopɔn Honhom Mu” a, ɔkɔmaa okonwu ye kyɛ Bible ne, ɔtte sona deɛ na mmom “ɔte Nyameɛ dwirɛ.” (1 Tɛs. 2:13) Nikyee foforɛ bɔ ɔkɔhora kɔyɛ yenwo nhwehwɛmuɛ yeɛ ole tete Asiria kuro Niniwe. Mmerɛ bie, né ebiemɔ nwa kuro biala nne berɛ bɔ né bɛfrɛ ye Niniwe ɔ. Nakoso kɔyɛ afoɛ 1850 nu ne, bɛbɔ betutu aseɛnwo ne nwuni Niniwe kuro ne boso, na ɛhene maa ɔlale ali kyɛ bɔ né Bible ne ahã ne te nahorɛ. (Sef. 2:​13-15) Niniwe kuro bɔ bɛsɛkyele ye ne, sɛ ɔpena kyɛ onwu kyɛbɔ ɔmaa Bible ngɔmhyɛ wale nu a, ɔkɔhora kɔkenga Ɔwɛn-Aban bɔ ɔwale November 2021, edwirɛ bɔ yeɛ ole “So Wunim?” Bɔ akwalaa ne kosua ye wɔ yɛ nwomaa ahoroɛ nu ne, sɛ ɔfa toto edwirɛ bɔ nwomaa ahoroɛ bɔ mmenia de tonu te kyɛ encyclopedia kã nanwo a, ɔkɔmaa gyidie bɔ ole ye wɔ Bible nanu ne kɔyɛ se.

6. Awofoɛ kɔyɛ sɛɛ ne baboka bɛwa maa wasusu nningyein nwo? Kã bie nwo dwirɛ. (Nea foto ne koso.)

⁶ Boka ɛwa ma osusu nningyein nwo. Sɛ awofoɛ ne bɛwa bɔnu yɛ nningyein biemɔ a, ɛhene koso maa bɛkora bɛne ye susu Bible ne, anaa gyidie bɔ ole ye wɔ Nyameɛ nu nanwo. Ebie yeɛ ole mmerɛ bɔ bɛkwaanea Bɛtɛl, nekaa bɔ bɛfa tete nningyein besie (museum), nekaa ahoroɛ bɔ ɛberɛ yɛ nyemene, bɛkenga nwomaa, anaa bɛnea vidio bɔ ɔfa tetefoɛ nningyein nwo ne. Ɛhene kɔmaa gyidie bɔ ole ye kyɛ Bible nanu dwirɛ te nahorɛ ne, ɔkɔyɛ se. Bɛfrɛ nyɔboɛ bie Moabite Stone, na wali afoɛ 3,000. Sɔ nyɔboɛ ne wɔ museum bie bɔ ɔwɔ Paris bɔ ɔwɔ France, na bahworɔ Nyameɛ dumaa ne bagua yenwo. Aso ɛwa ne se sɔ dwirɛ ne anaa? Sɛ ɛkɔ museum bɔ ɔwɔ Yehowa Adanzefoɛ Ewiase Mukoraati Adwumayɛbeati bɔ ɔwɔ Warwick, New York ne a, ekonwu kyɛ bayɛ sɔ nyɔboɛ ne bie basie berɛ. Edwirɛ bɔ ogua yenwo ne maa yenwu kyɛ, Moabo hene Mesa tele Yisrael so atua. Sɔ pɛpɛɛpɛ yeɛ Bible ne koso kã ɔ. (2 Ahe. 3:​4, 5) Sɛ ɛwa ne fa yenye nwu adanzeɛ bɔ okyire kyɛ Bible nanu dwirɛ te nahorɛ a, ɔkɔmaa ye gyidie kɔyɛ se.—Fatoto 2 Aberɛso Dwirɛ 9:6 nanwo.

7-8. (a) Nningyein nyemenenyemene bɔ Yehowa abɔ ne, nzu yeɛ yesua yefi nu ɔ? Kã bie nwo dwirɛ. (Nea foto ne koso.) (b) Edwirɛ beni yeɛ sɛ ebisa ɛwa ne a, ɔkɔmaa gyidie bɔ ole ye kyɛ ebie yeɛ ɔbɔle nningyein ne, nu kɔyɛ se ɔ?

⁷ Boka ɛwa má osusu nningyein bɔ Yehowa abɔ nanwo. Sɛ ɛne ɛwa kɔ nekaa bɔ balua flawɛs, anaa ɛmɔkɔ fiɛso a, nningyein bɔ wapɛ yenwo wayia ne, boka ye ma ɔfa ye adwene hɔ so. Ma onwu ye kyɛ, kyɛbɔ sɔ nningyein nemɔ te ne, okyire kyɛ ebie bɔ ɔse nworɛ yeɛ ɔbɔle ye mukoraati ɔ. Sɛ ɛnea nningyein biemɔ tekyɛ ebuhye kongroma, flawɛs ne nyaa biemɔ, ɔne nzramaa kue biemɔ a, enwu ye kyɛ bahyehyɛ wɔ atee pɔtee bie aso. Saensfoɛ asua ɛhe anwo nikyee afoɛ pee.a

⁸ Mmerɛ bɔ ɛwa ne sua saens wɔ sukuu nu ne, okonwu kyɛ nningyein bɔ Yehowa abɔ nanu pee wɔ berɛ a, kyɛbɔ bahyehyɛ bɛnwo ne, mmraa pɔtee bie yeɛ ɔmaa bɛyɛ sɔ ɔ. Sɛ yɛnea mmakaa sɔa a, bele atee pɔtee bɔ bɛfa so benyi ɔ. Sɛ bakaa ne nyi a, ɔpakye nya yesa mmaa. Nna mmakaa ngome yeɛ bahyehyɛ bɛnwo wɔ sɔ atee naso ɔ, na mmom yenwu bie wɔ nningyein foforɛ koso nu. Yede kyɛbɔ sɔ nningyein nemɔ ahyehyɛ bɛnwo kamakama ne, nwa yeɛ ɔtole ye boase yɛle yemukoraati ɔ? Sɛ ɛwa ne susu sɔ dwirɛ nanwo a, okole koli paa kyɛ Nyameɛ yeɛ ɔbɔle nningyein mukoraati ɔ. (Heb. 3:4) Sɛ ɛwa ne nyi kãa a, ɛkɔhora kobisa ye kyɛ: “Sɛ Nyameɛ yeɛ ɔbɔle sona a, yede enne nni kyɛ ɔkɔhora kohyire yɛ bɔ yɛyɛ a, ɔkɔmaa yɛnye kɔgye anaa?” Afei ma onwu ye kyɛ, bɔ Nyameɛ pena kyɛ yɛyɛ na yɛnye agye ne, ɔwɔ Bible nanu.

NASA, ESA, and the Hubble Heritage (STScl/AURA)-ESA/Hubble Collaboration

BOKA ƐWA MA ONWU MVASOƐ BƆ ƆWƆ SO KYƐ ƆKƆFA BIBLE NU DWIRƐ KƆBƆ YE BRA Ɔ

9. Abrabɔ nwo mmraa bɔ ɔwɔ Bible nanu ne, nzu yeɛ ebiaa ɔkɔmaa akwalaa bie kobisa yenwo dwirɛ ɔ?

⁹ Sɛ ɛwa ne bisa edwirɛ biemɔ bɔ okyire kyɛ onnwu mvasoɛ bɔ ɔwɔ so kyɛ ɔkɔfa Bible nu dwirɛ kɔbɔ ye bra a, bɔ mmɔden kyɛ ekonwu bɔ wamaa obisa sɔ ɔ. Aso abrabɔ nwo mmraa bɔ ɔwɔ Bible nanu ne yeɛ onne ndo nu hɔ ɔ? Anaa ɔyɛ se ma ye kyɛ okohyirehyire gyidie bɔ ole ye nanu kohyire mmenia? Kyɛbɔ edwirɛ ne te biala ne, sɛ ɛne ye sua Nya Asetena Nu Anigye Daa! nwomaa ne a, ɔkɔboka ye maa okonwu mvasoɛ bɔ ɔwɔ so kyɛ ɔkɔfa Bible nu dwirɛ kɔbɔ ye bra ɔ.b

10. Ɛkɔyɛ sɛɛ né aboka ɛwa maa yenye agye yenwo kyɛ ɔne Yehowa kɔfa adamvoa?

¹⁰ Boka ɛwa ma onwu mvasoɛ bɔ ɔwɔ so kyɛ ɔne Yehowa kɔfa adamvoa ɔ. Sɛ ɛne ɛwa ne sua nikyee a, nzɛmmisa ne mvandoho bɔ ɔwɔ Nya Asetena Nu Anigye Daa! nwomaa nanu ne, ɛyɛ a fa yɛ adwuma. Ɛhene kɔmaa ekonwu bɔ ɔwɔ ye tianu ɔ. (Any. 20:5) Sɛ yɛnea adesua 8 ne sɔa a, ɔfa Yehowa toto adamvoa bie bɔ okuro yɛ dwirɛ maa yeti ɔma yɛ akwangyerɛ bɔ ɔkɔhora kɔbɔ yɛnwo waen nanwo. Sɛ ɛmɔsusu 1 Yohane 5:3 nanwo beyie a, ɛkɔhora kobisa ye kyɛ: “Sɛ Yehowa te adamvoa pá a, yede bɔ ɔkã kyire yɛ kyɛ yɛyɛ ne, odikyɛ yenwu ye sɛ?” Ebiaa w’adwene kɔyɛ wɔ kyɛ sɔ dwirɛ he de, ɔnyɛ se kyɛ ɔkɔma yenwo mmuayɛɛ ɔ. Nakoso ɛhene kɔmaa akwalaa ne konwu kyɛ Nyameɛ kuro yɛ dwirɛ nati, yeɛ wama yɛ mmraa ahoroɛ ɔ.—Yes. 48:​17, 18.

11. Ɛkɔyɛ sɛɛ né aboka ɛwa maa wanwu mvasoɛ bɔ ɔwɔ so kyɛ ɔkɔfa Bible nu dwirɛ kɔbɔ ye bra ɔ?

¹¹ Ma onwu mvasoɛ bɔ ɔwɔ so kyɛ yɛkɔfa Bible nu dwirɛ yɛkɔbɔ yɛ bra ɔ. Sɛ ɛmɔkenga Bible, anaa ɛmɔyɛ daa asɛm a, ɛne ye besusu kyɛbɔ Bible nanu dwirɛ aboka ɛmɔ abusua nanwo. Aso ɛwa ne se kyɛ sɛ ebie yere yenwo yɛ adwuma, na odi nahorɛ a, mvasoɛ wɔ so anaa? (Heb. 13:18) Afei ma onwu ye kyɛ sɛ yɛfa Bible nu dwirɛ yɛbɔ yɛ bra a, yenya anwoserɛ, na yɛnye gye. (Any. 14:​29, 30) Sɛ ɛne akwalaa ne susu edwirɛ nwo wɔ sɔ atee naso a, ebiaa ɔkɔmaa yenye kɔgye yenwo paa kyɛ ɔkɔfa Bible akwangyerɛ kɔbɔ ye bra.—Kenga Anyandera 2:​10, 11.

12. Sɛɛ yeɛ baba bie bokale ɔwa maa onwuni mvasoɛ bɔ ɔwɔ so kyɛ ɔkɔfa Yehowa akwangyerɛ kɔbɔ ye bra ɔ?

¹² Steve wɔ France, ɔhane kyɛbɔ ɔne ɔye boka bɛwa Ethan bɔ wali afoɛ 16 ne, maa onwu kyɛ Yehowa kuro yɛ dwirɛ nati yeɛ ɔhyehyɛ mmraa ma yɛ ɔ. Ɔhane kyɛ: “Ɛyɛ a yebisa ye dwirɛ biemɔ tekyɛ: ‘Nzuati yeɛ Yehowa pena kyɛ yɛfa sɔ dwirɛ he yɛbɔ yɛ bra ɔ? Sɛɛ yeɛ ɛhe maa yenwu ye kyɛ okuro yɛ dwirɛ ɔ? Sɛ amva sɔ akwangyerɛ ne anyɛ adwuma a, nzu yeɛ ɔkɔto wɔ ɔ?’” Sɔ ngɔmmɔ bɔ bɛne Ethan bɔ ne aboka ye maa wanwu kyɛ, sɛ ɔfa Yehowa mmraa bɔ ye bra a, ɔkɔboka ye. Steve toale ye dwirɛ naso kyɛ: “Yɛpena kyɛ yɛboka Ethan maa onwu ye kyɛ, afutue bɔ ɔwɔ Bible nanu ne, nworɛ wɔ nu tra bɔ sona biala kɔfa kohyirehyire ye ɔ.”

13. Sɛ ɛte awofoɛ a, ɛkɔyɛ sɛɛ né aboka ɛwa maa wafa Bible akwangyerɛ wabɔ ye bra? Ma yenwo nneasoɛ.

¹³ Boka ɛwa ma ɔfa Bible akwangyerɛ bɔ ye bra. Ɔkɔhora kɔwa kyɛ, bɛnwa ɛwa ne kenga nwomaa bie wɔ sukuu nu. Ɛkɔnea ne, né sɔ nwomaa hyɛ mmenia ngunaen kyɛ besuesua bɛbɔ b’abrabɔ asɛkye anaa bɛfa yaa ndɛndɛ ne. Ofikyɛ bɛnwa ɔtte bɔne kyɛ ebie konya sɔ subaen ne bie ɔ. Sɛ ɔba sɔ a, boka ɛwa ne ma ɔfa bɔ Bible ne kã ne toto bɔ bɛkã nanwo. (Any. 22:​24, 25; 1 Kor. 15:33; Flp. 4:8) Ɛhene kɔmaa sɛ besusu nwomaa nanu dwirɛ nwo wɔ sukuu nu a, ɔkɔhora koli ye tikyaniɛ ne ye mmango sukuufoɛ nemɔ adanzeɛ.

BOKA ƐWA MA ONWU KYƐBƆ OKOHYIREHYIRE YE GYIDIE NU Ɔ

14. Edwirɛ beni yeɛ ebiaa ɔkɔmaa abrandeɛ anaa taluwa bie kunu kɔtete ye ɔ, na nzuati ɔ?

¹⁴ Mmrandeɛ ne ndaluwa bɔ bɛwɔ asafo nanu ne, ɔtɔ mmerɛ bie a, ɔkora yɛ se ma bɛ kyɛ bekohyirehyire bɛ gyidie nu. Adwene bɔ ebiemɔ le ye kyɛ nningyein kakyikakyili yeɛ ɔwale ne, sɛ besua yenwo nikyee wɔ sukuu nu a, ɛyɛ a ne bekunu tete bɛ. Nzuati ɔ? Ofikyɛ ebiaa bɛ tikyafoɛ nemɔ kɔma bɛ adanzeɛ bɔ okyire kyɛ sɔ dwirɛ ne te nahorɛ ɔ. Yede, ɛkɔyɛ sɛɛ na aboka ɛwa maa wale wali kyɛ bɔ Bible ne kã ne, yeɛ ɔte nahorɛ ɔ?

15. Nzu yeɛ ɔkɔboka abrandeɛ anaa taluwa bie maa okole koli kyɛ, bɔ Bible ne kã ne yeɛ ɔte nahorɛ ɔ?

¹⁵ Boka ɛwa ma onya gyidie kyɛ bɔ wasua ye wɔ Bible nanu ne te nahorɛ. Gyidie bɔ ɛwa ne le ye kyɛ ebie yeɛ ɔbɔle nningyein ne, ɔnzɛkyɛ ɔfɛle yenwo. (2 Tim. 1:8) Nzuati ɔ? Ofikyɛ bɛbɔ basua saens ne, benu pee de di kyɛ nningyein bɔ ɔwɔ berɛ ne, nna yebɔbɔ yeɛ ɔwale ɔ, na mmom ebie bɔ ɔse nworɛ yeɛ ɔbɔle ɔ. Ɛhene ati, nikyee bɔ bekyire ye wɔ sukuu nu wɔ ewiase mukoraati kyɛ nningyein bɔbɔ kakyikakyili yeɛ ɔwale ne, benne bɛndo nu. Bɔ ɔmaa aliemaa biemɔ nyane gyidie kyɛ ebie yeɛ ɔbɔle nningyein ne, boka ɛwa ne ma osusu yenwo. Ɛhene kɔmaa okole koli kyɛ, bɔ Bible ne kã ne yeɛ ɔte nahorɛ ɔ.c

16. Bɔ ɔmaa akwalaa bie de di kyɛ ebie yeɛ ɔbɔle nningyein ne, awofoɛ nemɔ kɔyɛ sɛɛ ne baboka ye maa wahora wahyirehyire nu?

¹⁶ Bɔ ɔmaa ɛwa de di kyɛ ebie yeɛ ɔbɔle nningyein ne, boka ye ma ɔhora hyirehyire nu. (Kenga 1 Petro 3:15.) Edwirɛ bɔ ɔba toatoa so bɔ ɔwɔ jw.org so bɔ yeɛ ole, “Young People Ask—Creation or Evolution?” ne, ɛne ye bɛkenga. Sɛ ɛmɔyie a, edwirɛ bɔ onwu ye kyɛ sɛ ɔfa boka mmenia a, bɛkɔte yebo ndɛ kyɛ ebie yeɛ ɔbɔle nningyein ne, ɛne ye besusu yenwo. Ma onwu ye kyɛ, ɔnzɛkyɛ ɔne ye sukuufoɛ nemɔ su aporowaa, na mmom bɛbɔ bɛnye gye yenwo kyɛ bekotie ye ne, ohyire nu tikaape hyire bɛ, na ɔma nu la berɛ. Yɛfa ye kyɛ ye sukuufoɛ nanu bie nwa: “Bɔ mefa menye menwu ye ne ngome yeɛ medé medi ɔ, nakoso Nyameɛ de, nwunni ye lle.” Ɛwa ne kɔhora kobisa ye kyɛ: “Fa ye kyɛ ɛnate ɛhɔaeɛ bie anu, yeɛ eenwuni ye kyɛ batu abura bie ɔ. Ahaa nzu yeɛ ɔkɔwa wɔ tianu ɔ? Sɛ ede to nu kyɛ ebie yeɛ otuli a, yede nningyein pee bɔ wapɛ yɛnwo wayia ne koso, ebie bɔ ɔse nworɛ yeɛ ɔbɔle ɔ.”

17. Awofoɛ kɔyɛ sɛɛ na baboka bɛwa maa wapena atee bɔ ɔkɔfa so koli mmenia adanzeɛ ɔ?

¹⁷ Boka ɛwa ma ɔpena atee bɔ ɔkɔfa so koli mmenia adanzeɛ ɔ. (Rom. 10:10) Mmɔden bɔ ɛwa ne bɔ kyɛ okohyirehyire ye gyidie nu ne, ɔte kyɛ akwalaa bɔ osua natelɛ ne. Okolimoa kodwɔso kogyina, na afei watutu ye gya ngakã. Sɔ ala yeɛ sɛ akwalaa bie pena kyɛ ɔkã ye gyidie nwo dwirɛ a ɔte ɔ. Ɔkɔhora kɔpena edwirɛ bie bɔ ɔnyɛ se kyɛ ɔne mmenia kɔbɔ yenwo ngɔmmɔ, ná wafa wahyɛ yebo. Ebie yeɛ ole kyɛ, ɔkɔhora kobisa ye sukuuniɛ bie kyɛ: “Nningyein bɔ saensfoɛ ayɛ ne, ɛse kyɛ ɛyɛ a bɛtaa bɛnea nningyein bɔ babɔ naso yeɛ bɛyɛ bie ɔ? Wɔde ma nye yenwo vidio kama bie ngyire wɔ.” Vidio bɔ ɔba toatoaso bɔ yeɛ ole Aso Bɛbɔle? ne, sɛ ɔye bie kyire ye yie a, ɔkɔhora kobisa kyɛ: “Sɛ saensfoɛ nea nningyein bɔ babɔ naso yɛ nikyeebie a, mmenia hoahoa bɛ. Yede bɔ ɔyɛle sɔ nikyee bɔ bɛneane so bɛyɛle bie ne, ɔnzɛkyɛ bɛhyɛ ye animnyam anaa?” Sɔ dwirɛ tikaape ne, ɔkɔhora kɔhã ye sukuuniɛ ne ahone, na wamaa yenye agye yenwo kyɛ okosua pee kɔboka so.

KƆSO BOKA ƐWA MA YE GYIDIE YƐ SE

18. Sɛ ɛte awofoɛ a, ɛkɔyɛ sɛɛ né aboka ɛwa maa wahɔ so wanya gyidie bɔ nu yɛ se wɔ Nyameɛ nu?

¹⁸ Sɛ yɛnea ewiase bɔ yɛte nu ne a, mmeni pee yeɛ belle Yehowa nu gyidie ɔ. (2 Pet. 3:3) Yeti awofoɛ, sɛ ɛmɔ ne ɛmɔ mmamɔ sua nikyee a, edwirɛ ahoroɛ bɔ ɔkɔboka bɛ maa bekole bekoli kyɛ Bible nanu dwirɛ te nahorɛ, na mvasoɛ wɔ so kyɛ bɛkɔfa bɛkɔbɔ bɛ bra ne, ɛmɔhyɛ bɛ ngunaen ma besusu yenwo. Nningyein bɔ ɔyɛ nwanwa bɔ Yehowa abɔ ne, boka ɛwa ne ma ɔdwenedwene yenwo. Bible ngɔmhyɛ ahoroɛ bɔ wawa nu ne, boka ye ma onwu ye. Bɔ yenwo hia paa ne, ɛne ɛwa ne bɔnu bɔ mbaeɛ, na ɛyɛ a wɔ koso bɔ bie ma ye. Sɛ ɛyɛ sɔ a, mmɔden bɔ ɛbɔ kyɛ ɛkɔmaa akwalaa ne gyidie kɔyɛ se ne, Yehowa koyira so.—2 Abe. 15:7.