Ésaïe
31 Mawa na azo so adescend na Égypte ti tene azo ni amû maboko na ala,+
azo so azia bê ti ala na ndö ti ambarata,+
azo so azia bê ti ala na ndö ti ambarata ndali ti so ala yeke mingi
nga na azo so azia bê ti ala na ndö ti ambarata ti bira* ndali ti so ala yeke ngangu mingi.
Me ala bâ ndo pëpe na mbage ti Nzapa ti Israël so ayeke nzoni-kue,
nga ala gi Jéhovah pëpe.
2 Me lo nga kue lo yeke na ndara, na lo yeke ga na ye ti ngangu,
nga lo yeke changé yanga ti lo pëpe.
Lo yeke londo na terê ti bungbi ti azo ti sioni
nga na terê ti azo so ayeke mû maboko na ala.+
3 Azo ti Égypte ayeke gï asenge zo, ala yeke Nzapa pëpe.
Ambarata ti ala ayeke gï ye ti sese, ala yeke ayingo pëpe.+
Na ngoi so Jéhovah ayôro maboko ti lo na terê ti ala,
zo kue so aye ti mû maboko na ala ayeke pika gere ti lo;
nga zo kue so zo amû maboko na lo ayeke tï.
Ala kue ayeke kui legeoko.
4 Jéhovah atene na mbi:
“Mbeni bamara, ngangu bamara so akono awe,* ayeke suku ndali ti nyama so lo gbu lo.
Tongana gbâ ti aberger aga ti tomba lo,
dekongo ti ala ayeke zia mbeto na yâ ti lo pëpe
nga bruit ti ala ayeke sara ye oko na lo pëpe.
Jéhovah ti aturugu ayeke sara ye tongana bamara na ngoi so lo ga ti sara bira
na ndö ti Hoto ti Sion, na li ti hoto ni.
5 Legeoko tongana andeke so ayeke huru ti bata amolenge ti ala, Jéhovah ti aturugu ayeke gbu koko ti Jérusalem.+
Lo yeke gbu koko ti lo nga lo sö lo.
Lo yeke sara si ye ti sioni asi na Jérusalem pëpe nga lo yeke zi lo.”
6 “Ala azo ti Israël, ala kiri na mbage ti Lo so ala ke yanga ti lo na mbana so,+ 7 ndali ti so mbeni ngoi ayeke ga so zo oko oko ayeke ke anzapa ti lo ti argent nga na ti lor so ayeke asenge senge ye, so ala wani asara siokpari na sarango ni na maboko ti ala.
8 Zo ti Assyrie ayeke tï na lege ti épée, me na lege ti épée ti zo pëpe;
épée so ayeke ti zo pëpe la ayeke fâ ande lo.+
Épée la ayeke sara si lo kpe,
nga a yeke gbu awakua ti lo so ade maseka ti sara akua ti ngangu.