Genèse

49 Jacob airi amolenge ti lo ti koli, lo tene: “Ala bungbi terê ti ala si mbi tene na ala tënë ti ye so ayeke si ande na ala na yâ ti andangba lango ni. 2 Amolenge ti Jacob, ala bungbi terê ti ala, ala dengi mê; ala dengi mê na babâ ti ala Israël.

3 “Ruben,+ mo yeke kozo molenge ti mbi,+ ngangu ti mbi nga tongo nda ti ngangu ti mbi ti dungo molenge, nengo so a mû na mo ayeke tâ kota mingi na ngangu ti mo ayeke nga kota mingi. 4 So mo yeke tongana ngu so asua na ngangu na mbeni ye akanga lege na ni pëpe, mo yeke ga kota ahon aita ti mo pëpe, ndali ti so mo monté na ndö ti gbogbo ti babâ ti mo.+ Na ngoi ni so, mo sara si gbogbo ti mbi aga sioni.* Lo monté tâ na ndö ni!

5 “Siméon na Lévi ayeke aita.+ Ala mû a-épée ti ala ti sara na ye ti ngangu.+ 6 Âme* ti mbi, mo lï na yâ ti groupe ti ala pëpe. Zia si mbeni ye atingbi nengo* ti mbi na groupe ti ala pëpe, ndali ti so na yâ ti ngonzo ti ala, ala fâ akoli,+ nga ndali ti nzerengo terê ti ala, ala fâ kamba ti gere ti akoli-bagara. 7 Deba aga na ndö ti ngonzo ti ala, ngbanga ti so a yeke sioni mingi, nga na ndö ti kota ngonzo ti ala, ngbanga ti so a pusu ala ti sara ye na ngangu.+ Zia mbi kangbi yâ ti ala na yâ ti sese so a mû na Jacob nga zia mbi kangbi yâ ti ala kirikiri na yâ ti Israël.+

8 “Âdu ti mo Juda,+ aita ti mo ti koli ayeke sepela mo.+ Maboko ti mo ayeke duti ande na peko ti go ti awato ti mo.+ Amolenge ti babâ ti mo ayeke kuku ande na gbe ti mo.+ 9 Juda ayeke kete bamara.+ Molenge ti mbi, mo yeke londo na terê ti nyama so mo gbu. Mo yeke lango, mo yeke gboto yâ ti terê ti mo tongana bamara. So lo yeke tongana bamara so, zo wa la ayeke sara mvene ti zingo lo? 10 Keke ti gbia ayeke gue yongoro na Juda pëpe,+ nga keke ti zo so akomande ague yongoro na popo ti gere ti lo pëpe, juska Shilo* aga,+ na amara ayeke mä ande yanga ti lo.+ 11 Lo yeke kanga kororo ti lo na terê ti keke ti vigne nga molenge ti kororo ti lo na terê ti keke ti vigne so ayeke pendere mingi; lo yeke sukula bongo ti lo na yâ ti vin nga na yâ ti ngu ti alê ti vigne. 12 Lê ti lo abe na vin, na pembe ti lo avuru na lait.

13 “Zabulon+ ayeke sara ande kodro na yanga ti ngu-ingo, na ndo so abateau ayeke luti dä;+ katikati ti sese ti lo so ayo na atanga ni ayeke na mbage ti Sidon.+

14 “Issacar+ ayeke kororo so abio ti lo akpengba, so alango na abozo use ti kungba so a kanga na ndö ti lo. 15 Lo yeke bâ ande so ndo ti wungo terê ni ayeke nzoni nga so sese ni ayeke pendere. Lo yeke yô anengo kungba na ndö ti go ti lo nga lo yeke yeda ti sara kua ti ngangu.

16 “Dan+ so ayeke oko ti amara ti Israël ayeke fâ ngbanga ti azo ti lo.+ 17 Zia Dan aduti tongana ngbo na terê ti lege, ngbo so ayeke na didi, so adë peko ti gere ti mbarata si zo ti kpengo na mbarata ni atï na mbage ti peko.+ 18 Jéhovah, mbi yeke ku salut so alondo na mo.

19 “Âdu ti Gad,+ azo so ayeke gbu ka aye ti azo na ngangu ayeke tuku na ndö ti lo, me lo yeke londo na terê ti ala ti tomba peko ti ala.+

20 “Mapa* ti Aser+ ayeke duti ande mingi,* nga kobe so alingbi na gbia alondo na lo.+

21 “Nephtali+ ayeke wali-lekpa so ayapu. Lo yeke tene apendere tënë.+

22 “Joseph+ ayeke kete keke so asigi na terê ti gere ti keke so alë, mbeni keke so ayeke na terê ti ngu, so amaboko ni ahon na ndö ti gbagba. 23 Me azo ti pikango kokora angbâ ti gi yanga ti lo, ti pika kokora na terê ti lo nga ti bata ngonzo na terê ti lo.+ 24 Ye oko, kokora ti lo angbâ lakue na place ni,+ na maboko ti lo angbâ ngangu nga ayapu.+ Ye so alondo na zo ti Jacob so ayeke ngangu mingi, na berger ni, tênë ti Israël. 25 Lo* londo na Nzapa ti babâ ti mo, na lo yeke mû maboko na mo; lo yeke na terê ti Lo so ngangu ti lo ahon angangu kue. Lo yeke iri tufa na ndö ti mo na lege ti anzoni ye ti yayu nga na anzoni ye ti ngu so alï mingi,+ nga lo yeke mû na mo gbâ ti ahale.* 26 Tufa ti babâ ti mo ayeke duti kota ahon anzoni ye ti ahoto so angbâ kpu na kpu, ahon aye ti akete hoto so zo asara nzara ni, akete hoto so angbâ lakue.+ Ala yeke ngbâ na li ti Joseph, na ndö ti li ti lo so a zia lo nde na popo ti aita ti lo.+

27 “Benjamin+ ayeke ngbâ ti suru yâ ti ye kete kete tongana mbo ti ngonda.+ Na ndapre, lo yeke te nyama so lo gbu; na lakui, lo yeke kangbi yâ ti aye so lo gbu ni.”+

28 Ala so kue la ayeke amara 12 ti Israël, na tënë so la babâ ti ala atene na ala na ngoi so lo yeke iri tufa na ndö ti ala. Lo iri tufa na ndö ti ala kue, zo oko oko na tufa so alingbi na lo.+

29 Na pekoni, lo mû yanga na ala, lo tene: “Mbi yeke wu terê ti mbi tongana ti azo ti mbi.*+ Ala lu mbi na terê ti ababâ ti mbi na yâ ti kota dû ti tênë so ayeke na sese ti Éphron so ayeke zo ti mara ti Heth;+ 30 kota dû ti tênë ni ayeke na sese ti Macpélah, so abâ ndo lê na lê na Mamré na sese ti Canaan, sese so Abraham avo na maboko ti Éphron so ayeke zo ti mara ti Heth, tongana ndo ti lo ti lungo akuâ. 31 Kâ la si a lu Abraham na wali ti lo Sara.+ Kâ la si a lu Isaac+ na wali ti lo Rébecca, nga kâ la si mbi lu Léa. 32 Sese ni nga na kota dû ti tênë so ayeke na yâ ni, a vo ni ândö na maboko ti ahale ti Heth.”+

33 Ge la Jacob ahunzi atënë so lo tene na amolenge ti lo. Na pekoni, lo kiri na gere ti lo na ndö ti gbogbo ni, lo wu tanga ti pupu ti lo na lo wu terê ti lo tongana ti azo ti lo.*+