Lévitique

18 Jéhovah angbâ ti sara tënë na Moïse, atene: 2 “Tene na azo ti Israël, mo tene: ‘Mbi yeke Jéhovah Nzapa ti ala.+ 3 Ala sara ye pëpe tongana ti azo ti kodro ti Égypte, so ala sara lani kodro dä; ala sara ye pëpe tongana ti azo ti sese ti Canaan, so mbi yeke gue na ala dä;+ ala mû peko ti andia ti ala pëpe. 4 Ala sara ye alingbi na ambela ti mbi; nga andia ti mbi, ala bata ni na ala mû peko ni.+ Mbi yeke Jéhovah Nzapa ti ala. 5 Ala bata andia ti mbi na ambela ti mbi; tongana zo asara ye alingbi na ni, lo yeke ngbâ ande na fini ndali ni.+ Mbi yeke Jéhovah Nzapa ti ala.

6 “‘A lingbi mbeni zo na popo ti ala aga nduru pëpe na mbeni tâ fami ti lo ti bungbi na lo.*+ Mbi yeke Jéhovah Nzapa ti ala. 7 Mo bungbi pëpe na babâ ti mo wala mama ti mo. So mama ti mo la. Mo bungbi na lo pëpe.

8 “‘Mo bungbi pëpe na wali ti babâ ti mo.+ So ayeke bingo nengo ti babâ ti mo na sese la.*

9 “‘Mo bungbi pëpe na ita ti mo ti wali, atâa babâ ti mo na lo la ayeke oko wala mama ti mo na lo la ayeke oko, wala a dü mo na lo na yâ ti da oko wala a dü lo na gigi.+

10 “‘Molenge ti wali so molenge ti mo ti koli adü wala so molenge ti mo ti wali adü, mo bungbi na lo pëpe. So ayeke bingo nengo ti mo wani na sese la.

11 “‘Molenge ti wali so wali ti babâ ti mo adü na babâ ti mo, lo yeke ita ti mo ti wali; mo bungbi na lo pëpe.

12 “‘Mo bungbi pëpe na ita ti babâ ti mo ti wali. So fami ti babâ ti mo la.+

13 “‘Mo bungbi pëpe na ita ti mama ti mo ti wali. So fami ti mama ti mo la.

14 “‘Mo bungbi pëpe na wali ti ita ti babâ ti mo; so bingo nengo ti ita ti babâ ti mo ni na sese la.* So mama ti mo la.+

15 “‘Mo bungbi pëpe na wali ti molenge ti mo.+ So wali ti molenge ti mo la. Mo bungbi na lo pëpe.

16 “‘Mo bungbi pëpe na wali ti ita ti mo.+ So bingo nengo ti ita ti mo ni na sese la.*

17 “‘Mo bungbi pëpe na mbeni wali nga na molenge ti lo ti wali.+ Molenge-wali so molenge ti lo ti koli adü wala so molenge ti lo ti wali adü, mo mû lo ti bungbi na lo pëpe. Ala yeke atâ fami ti wali ni; so ayeke mbeni ye so ayeke sioni mingi.*

18 “‘Tongana wali ti mo angbâ na fini, mo mû ita ti lo ti wali ti ga sambâ ti lo pëpe.+

19 “‘Mo bungbi pëpe na mbeni wali na ngoi so lo yeke sioni ndali ti so lo yeke bâ yâ ti lo.+

20 “‘Mo bungbi pëpe na wali ti mba ti mo,* na tongaso mo ga sioni pëpe.+

21 “‘Zia a mû mbeni molenge ti mo ndali ti vorongo Molek pëpe.*+ Mo bi nengo ti iri ti Nzapa ti mo na sese tongaso pëpe.+ Mbi yeke Jéhovah Nzapa ti mo.

22 “‘Mo lango na mba ti mo koli pëpe tongana ti so mo yeke lango na wali.+ So ayeke ye ti sioni mingi.

23 “‘Mo lango na nyama pëpe si mo ga sioni pëpe; a lingbi wali aga nduru na nyama ti lango na lo pëpe.+ So ayeke sarango ye nde na ti so Nzapa aleke la.

24 “‘Mo sara mbeni oko ti aye so pëpe ti sara si mo ga sioni, ndali ti so amara so mbi yeke tomba ala na lê ti ala asara aye so kue, na ala ga sioni ndali ni.+ 25 Ni la sese ni aga sioni; mbi yeke fâ ngbanga na ndö ti azo ni nga a yeke tomba ala na ndö ti sese ni.+ 26 Âdu ti ala, ala bata ambela nga na andia ti mbi;+ ala sara oko ti aye ti sioni so pëpe, atâa a yeke zo ti Israël wala wande so asara kodro na popo ti ala.+ 27 Ndali ti so azo so asara kodro na sese ni kozoni na ala asara aye ti sioni so kue,+ na a sara si sese ni aga sioni. 28 Tongana ala sara si sese ni aga sioni pëpe, a yeke tomba ala na ndö ni pëpe, tongana ti so a yeke tomba ande amara so ayeke fadeso na ndö ni. 29 Zo* kue so asara mbeni oko ti aye ti sioni so, ala fâ lo. 30 Ala sara ye so mbi hunda na ala na lege so ala bata pëpe asioni ngobo ti sarango ye so azo so ayeke na ndö ti sese ni kozoni na ala abata,+ si ala ga sioni pëpe ndali ni. Mbi yeke Jéhovah Nzapa ti ala.’”