Apocalypse

8 Tongana lo+ zi mbasambala nzoroko ni,+ ndo adë ngii na yayu nduru na ndambo ti ngbonga oko. 2 Na pekoni, mbi bâ a-ange mbasambala+ so aluti na gbele Nzapa, na a mû na ala atrompette mbasambala.

3 Mbeni ange ni nde aga, lo luti na terê ti gbalaka ni,+ lo yeke na mbeni ta ti lor ti zongo na dukane,+ a mû na lo gbâ ti dukane ti yâa ni legeoko na asambela ti azo ti be-vulu kue na ndö ti gbalaka ti lor+ so ayeke na devant ti trône ni. 4 Guru ti dukane ni alondo na maboko ti ange ni amonté na gbele Nzapa legeoko na asambela+ ti azo ti be-vulu. 5 Me hio ange ni amû ta ti zongo na dukane ni, lo fû mbeni wâ ti gbalaka ni na yâ ni asi, lo bi ni na ndö ti sese. Na pekoni bekpa asungba, ago asara tënë, awâ ti bekpa aza+ nga sese ayengi. 6 Na a-ange mbasambala so ayeke na atrompette mbasambala+ aleke terê ti ala ti hûru ni.

7 Kozo ange ni ahûru trompette ti lo. Mbi bâ angbongboro glason na wâ so abungbi na mênë, na a bi ni na ndö ti sese;+ na mbage oko ti sese na popo ti ambage ota agbi, mbage oko na popo ti ambage ota ti akeke kue agbi, nga afini pere kue agbi.+

8 Use ange ni ahûru trompette ti lo. A bi mbeni ye tongana kota hoto so wâ ayeke za na terê ni si atï na yâ ti ngu-ingo.+ Na mbage oko ti ngu-ingo ni na popo ti ambage ota aga mênë;+ 9 na popo ti anyama kue ti ngu-ingo so ayeke na fini,* tongana a mû ota, oko akui;+ na popo ti abateau kue, tongana a mû ota, oko atuku na ngu.

10 Ota ange ni ahûru trompette ti lo. Mbeni kota tongoro so ayeke za tongana lampe alondo na yayu atï, a tï na ndö ti mbage oko ti akota ngu na popo ti ambage ota nga a tï na ndö ti mbage oko ti ali ti ngu na popo ti ambage ota.+ 11 Iri ti tongoro ni so ayeke Absinthe. Na mbage oko ti angu na popo ti ambage ota aga absinthe, nga azo mingi akui ndali ti angu so, ngbanga ti so a sara si angu ni ase sengo.+

12 Osio ange ni ahûru trompette ti lo. Na a pika mbeni mbage oko na popo ti ambage ota ti lâ,+ ti nze na ti atongoro, si ambage ni so aga bingo,+ na kota lâ agirisa mbage oko ti ngbonga ti lumière ti lo na popo ti ambage ota, na ti bï nga ayeke tongaso.

13 Mbi bâ ndo, na mbi mä mbeni aigle so ayeke huru na lê ti nduzu asara tënë na kota go, atene: “Mawa, mawa, mawa+ na ala so ayeke sara kodro na ndö ti sese ngbanga ti tanga ti totongo ti atrompette ota ti a-ange so aleke terê ti ala ti hûru ni!”+