1 Samuel
27 Me David atene na yâ ti bê ti lo: “Mbeni lâ, Saül ayeke fâ mbi. Gï ye so mbi lingbi ti sara ayeke ti kpe+ ti gue na kodro ti aPhilistin. Tongaso, Saül ayeke zia ti gi peko ti mbi na yâ ti kodro ti Israël kue,+ na mbi yeke sigi na yâ ti maboko ti lo.” 2 Tongaso, David na akoli 600+ alondo ague na ndo ti Akish,+ gbia ti Gath so ayeke molenge ti Maok. 3 David na azo ti lo angbâ na ndo ti Akish, zo oko oko na azo ti da ti lo. Ti David, lo na awali ti lo use: Ahinoam,+ wali ti kodro ti Jizréel, nga na Abigaïl,+ wali ti kodro ti Carmel, wali ti wakuâ Nabal. 4 Tongana Saül amä so David akpe ague na kodro ti Gath, lo zia ti gi peko ti lo.+
5 Na pekoni, David atene na Akish: “Tongana mbi nzere na lê ti mo, mo mû na mbi mbeni ndo na yâ ti mbeni oko ti akete kodro si mbi duti dä. Ndani nyen ti tene mbi wakua ti mo mbi duti ndo oko na mo na yâ ti gbata ti gbia?” 6 Tongaso, gï na lango ni so, Akish amû na lo Ziclag.+ Ndani la Ziclag aga gbata ti agbia ti Juda juska laso.
7 Ngoi kue* so David asara na yâ ti kete kodro ti aPhilistin ayeke ngu oko na nze osio.+ 8 David na azo ti lo ayeke sara ka bira na azo ti Guéshur,+ ti Guirzi nga na azo ti mara ti Amalec.+ Kodro ti ala alondo na Télam juska na Shur,+ a si même juska na sese ti Égypte. 9 Tongana David ayeke sara ka bira na azo ni, lo yeke fâ akoli na awali kue,+ me lo yeke mû ataba na angasa, abagara, akororo, achameau nga na abongo. Na pekoni, lo kiri na mbage ti Akish. 10 Akish ayeke hunda ka lo, atene: “Laso mo sara bira na ndo wa?” David ayeke tene: “Na mbage ti sud ti Juda,”+ wala: “Na mbage ti sud* ti kodro ti azo ti Jérahméel,”+ wala: “Na mbage ti sud ti kodro ti azo ti mara ti Kéni.”+ 11 David ayeke bata mbeni koli wala mbeni wali na fini pëpe ti ga na ala na gbata ti Gath, ndali ti so lo tene: “Ngbanga ti tene ala kä e si ala tene pëpe, ‘Bâ ye so David asara la.’” (Na yâ ti ngoi kue so David asara na kete kodro ti aPhilistin, ye so lo yeke sara ka la.) 12 Akish azia bê ti lo kue na ndö ti David, lo tene na yâ ti bê ti lo, lo tene: ‘David afun sen na hôn ti azo ti mara ti lo Israël awe. Tongaso, lo yeke ga zo ti kua ti mbi biani biani.’