Josué

23 Angu mingi na peko ti so Jéhovah asara si awato ti ala kue so angoro ala azia ala kpô,+ na ngoi ni so Josué aga mbakoro nga ngu ti lo ahon mingi,+ 2 Josué airi azo ti Israël kue,+ a-ancien ni, amokonzi ni, ajuge nga na akota zo ti kodro ni,+ lo tene na ala, lo tene: “Mbi ga mbakoro awe nga ngu ti mbi ahon mingi. 3 Ala wani ala bâ aye kue so Jéhovah Nzapa ti ala asara na amara so kue ndali ti ala, ngbanga ti so Jéhovah Nzapa ti ala la ayeke tiri lani ndali ti ala.+ 4 Mbi tomba lani amara so asara kodro alondo na Ngu ti Jourdain juska ti si na Kota Ngu-ingo ti Méditerranée so ayeke na mbage ti ouest,* na mbi bi mbeni ye so amû lege na mbi ti fa sese so a lingbi mbi mû na ala. Atâa so ambeni mara angbâ na ndö ti sese ni so aga ti ala awe.+ 5 Jéhovah Nzapa ti ala ayeke lo so atomba amara so na devant ti ala,+ lo tomba amara so ndali ti ala, na ala mû akodro ti amara so tongana ti so Jéhovah Nzapa ti ala amû zendo ni lani na ala.+

6 “Ti fadeso, ala doit ti sara ye tâ tongana koli, ti sara ye alingbi na atënë kue so a sû na yâ ti mbeti ti Ndia+ ti Moïse, na ala hon nde na Ndia ni pëpe, wala ala gue na mbage ti koli wala na mbage ti wali pëpe,+ 7 ala bungbi terê ti ala pëpe na azo ti amara ni+ so angbâ na popo ti ala so. Ala doit ti di iri ti anzapa ti azo ni so na yanga ti ala kete tongaso pëpe wala ti deba na iri ti anzapa ni pëpe.+ Ala doit ti sara kua na anzapa so pëpe wala ala kuku na gbe ti ala nga pëpe.+ 8 Me ala doit ti ngbâ gï na terê ti Jéhovah Nzapa ti ala,+ tongana ti so ala sara ni juska laso so. 9 Jéhovah ayeke tomba ande na devant ti ala amara so ayeke ngangu mingi,+ teti mbeni zo ti gbu lê ni na devant ti ala juska laso ayeke dä pëpe.+ 10 Zo oko ayeke tomba azo saki oko,+ ngbanga ti so Jéhovah Nzapa ti ala la ayeke tiri ndali ti ala,+ gï tongana ti so lo mû zendo ni lani.+ 11 Tongaso, ala sara hange lakue*+ si ala ngbâ ti ndoye Jéhovah Nzapa ti ala.+

12 “Me tongana ala ke lo na ala ngbâ gï na terê ti tanga ti azo ti amara so,+ na ala sara mariage na popo ti ala na ala,+ nga ala sara beoko na ala na amara ni asara beoko na ala, 13 a lingbi ala hinga biani so fade Jéhovah Nzapa ti ala ayeke ngbâ ti tomba amara ni so na devant ti ala encore ape.+ Amara so ayeke ga ande mbeni kûkû, mbeni gbanda, mbeni zaza so ayeke pika terê ti kate ti ala+ nga akî na yâ ti lê ti ala, juska ala hunzi kue na ndö ti pendere sese so Jéhovah Nzapa ti ala amû na ala.

14 “Ala bâ fadeso mbi yeke nduru ti kui awe,* na ala hinga nzoni mingi na bê ti ala kue nga na âme* ti ala kue so mbeni tënë oko ti apendere zendo kue so Jéhovah Nzapa ti ala atene atï na ngu pëpe. Tënë ni kue aga tâ tënë tongana ti so lo tene ndali ti ala. Mbeni tënë ni oko atï na ngu pëpe.+ 15 Gï tongana ti so Jéhovah Nzapa ti ala asara ye alingbi na apendere zendo kue so lo mû na ala,+ legeoko nga Jéhovah ayeke sara si aye ti vundu kue so lo mû zendo* ni ayeke ga na ndö ti ala nga lo yeke hunzi ala biani biani na ndö ti pendere sese so Jéhovah Nzapa ti ala amû na ala.+ 16 Tongana ala buba yâ ti mbele so Jéhovah Nzapa ti ala ahunda na ala ti bata ni, ala gue ala voro ambeni nzapa nde nga ala kuku na gbe ti anzapa ni so, fade kota ngonzo ti Jéhovah ayeke ga na ndö ti ala tongana wâ+ na a yeke futi ala hio na ndö ti pendere sese so lo mû ni na ala.”+