Genèse
17 Tongana Abram ayeke na ngu 99, Jéhovah asi na lo, lo tene na lo: “Mbi yeke Nzapa so ngangu ti lo ahon angangu kue. Tambela na gbele mbi nga duti zo so sarango ye ti lo alingbi kue.* 2 Mbi yeke te mbele na mo,+ na mbi yeke sara si mo wu mingi mingi.”+
3 Na mango tënë so, Abram akuku, lo kpo li ti lo na sese na Nzapa ayeke sara tënë na lo, atene: 4 “Âdu ti mbi, mbi te lani mbele na mo,+ na mo yeke ga ande babâ ti amara mingi.+ 5 A yeke iri mo Abram* encore ape, me iri ti mo ayeke ga Abraham,* ndali ti so mbi yeke sara si mo ga babâ ti amara mingi. 6 Mbi yeke sara si mo dü mingi mingi nga mbi yeke sara si amara na agbia asigi na yâ ti mo.+
7 “Mbi yeke sara ye alingbi na mbele ti mbi, mbele ti lakue lakue so mbi te na mo+ nga na ahale* ti mo, na yâ ti angoi nde nde so ayeke ga. Mbi yeke Nzapa ti mo nga na ti ahale* ti mo. 8 Mbi yeke mû na mo nga na ahale ti mo sese so mo sara kodro dä tongana wande+ so, sese ti Canaan kue, si a ga ti ala biani biani; nga mbi yeke ga Nzapa ti ala.”+
9 Nzapa akiri atene na Abraham: “Ti mo, mo bata mbele ti mbi, mo na ahale* ti mo na yâ ti angoi nde nde so ayeke ga. 10 Mbele so ayeke na popo ti mbi na ala, so ala na ahale* ti ala ayeke bata ayeke so: A lingbi akoli kue so ayeke na popo ti ala afâ ganza.+ 11 Ala fâ ganza, na ganza so ala fâ la ayeke ye so afa so mbele ayeke na popo ti mbi na ala.+ 12 Na yâ ti angoi nde nde so ayeke ga, molenge ti ala ti koli kue so awara lango miombe, ala fâ lo na ganza.+ Nga, koli kue so a dü lo na yâ ti da ni na koli kue so a vo lo na nginza na tïtî mbeni wande, si lo yeke hale* ti mo pëpe, ala fâ lo na ganza. 13 Koli oko oko kue so a dü lo na da ti mo nga koli oko oko kue so a vo lo na nginza ti mo, ala fâ lo na ganza;+ ganza so ala fâ la ayeke ye so afa so mbele ti mbi ayeke ngbâ aninga. 14 Tongana mbeni koli so a fâ ganza pëpe ake ti tene a fâ lo na ganza, ala zi* lo* na popo ti azo ni. Lo fâ yâ ti mbele ti mbi awe.”
15 Nzapa atene na Abraham: “Âdu ti wali ti mo Saraï,*+ mo iri lo Saraï pëpe, ngbanga ti so iri ti lo ayeke Sara.* 16 Mbi yeke iri tënë nzoni na ndö ti lo nga mbi yeke mû molenge ti koli na mo na lege ti lo.+ Mbi yeke iri tënë nzoni na ndö ti lo, nga amara na agbia ti azo ti amara ayeke sigi na yâ ti lo.” 17 Na mango tënë so, Abraham akuku, lo kpo li ti lo na sese, lo he ngia nga lo tene na yâ ti bê ti lo:+ “Koli so ayeke na ngu 100 ayeke wara molenge? nga Sara, wali so ayeke na ngu 90 ayeke dü?”+
18 Tongaso, Abraham atene na tâ Nzapa: “Zia Ismaël angbâ na fini na gbele mo!”+ 19 Nzapa atene: “Wali ti mo Sara ayeke dü ande na mo molenge ti koli, na mo yeke zia ande iri ti lo Isaac.*+ Mbi yeke te ande mbele na lo, mbele so ayeke ti lakue lakue ndali ti ahale* ti lo+ na peko ti lo. 20 Ti tënë ti Ismaël, mbi mä mo awe. Mbi yeke iri tënë nzoni na ndö ti lo, mbi yeke sara si lo dü nga mbi yeke sara si lo wu mingi mingi. Lo yeke dü ande amokonzi 12, na mbi yeke sara si lo ga kota mara.+ 21 Ye oko, mbi yeke te mbele ande na popo ti mbi na Isaac,+ so Sara ayeke dü lo ande na mo na ngu ti peko na oko ngoi so.”+
22 Tongana Nzapa ahunzi ti sara tënë na Abraham, lo zia Abraham lo kiri na nduzu. 23 Abraham amû molenge ti lo Ismaël, akoli kue so a dü ala na yâ ti da ti lo nga na akoli oko oko kue so lo vo ala na nginza, akoli kue na popo ti azo ti da ti lo, na lo fâ ala na ganza na lango ni so, gï tongana ti so Nzapa atene na lo.+ 24 Abraham ayeke na ngu 99 na ngoi so a fâ lo na ganza.+ 25 Molenge ti lo Ismaël ayeke na ngu 13 na ngoi so a fâ lo na ganza.+ 26 Na lango ni so, a fâ Abraham nga na molenge ti lo Ismaël na ganza. 27 Akoli kue ti da ti lo, akoli kue so a dü ala na yâ ti da ni nga na akoli kue so a vo ala na nginza na tïtî mbeni wande, a fâ nga ala na ganza legeoko na Abraham.