Zo-ti-fa-tene

11 Bi* mapa ti mo na lê ti ngu,+ teti na peko ti alango mingi, mo yeke kiri ti wara ni.+ 2 Mû mbeni mbage ti aye ti mo na azo mbasambala, même na azo miombe,+ teti mo hinga pëpe ye ti ngangu wa si ayeke si ande na ndö ti sese.

3 Tongana ambinda ane na ngu, kota ngu-nzapa ayeke pika; na tongana mbeni keke atï na mbage ti sud wala na mbage ti nord, ndo so keke ni atï dä la lo yeke ngbâ gï dä.

4 Zo so ayeke bâ pupu, lo yeke lu ande angongoa ti kobe pëpe; na zo so ayeke bâ ambinda, lo yeke ko ande lê ti kobe pëpe.+

5 Legeoko tongana ti so mo hinga pëpe lege so yingo ayeke sara kua na yâ ti abio ti bébé so ayeke na yâ ti* mama ti ngo,+ tongaso nga mo hinga pëpe kusala ti tâ Nzapa so ayeke sara ye kue.+

6 Lu angongoa ti kobe ti mo na ndapre, na juska lakui zia si maboko ti mo aduti senge pëpe,+ ndali ti so mo hinga pëpe lo so wa la ayeke maï ande, wala so ge wala so kâ, wala ni use kue ayeke maï nzoni.

7 Lumière anzere, na a yeke nzoni ti tene lê ti zo abâ lâ. 8 Tongana zo angbâ na fini ngu mingi, zia lo duti na ngia na yâ ti angu ni so kue.+ Me a yeke nzoni lo girisa pëpe so alango ti bingo alingbi ti duti mingi; ye kue so ayeke si ande ayeke senge senge.+

9 Maseka-koli, sara ngia na ngoi so mo ngbâ maseka, na zia bê ti mo aduti na ngia na lâ ti maseka ti mo. Tambela na alege so bê ti mo afa na mo nga gue na ndo so lê ti mo afa na mo. Me hinga so tâ Nzapa ayeke iri mo na gbele ngbanga* ndali ti aye so kue.+ 10 Tongaso, zi na yâ ti bê ti mo ye kue so alingbi ti ga na mo kpale, nga pusu yamba na terê* ti mo ye kue so alingbi ti sara sioni na mo, ndali ti so lâ ti maseka nga na ngoi so zo ayeke na ngangu mingi ayeke senge senge.+