Psaume

Na mokonzi ti azo ti pikango mozoko. Maskil.* Psaume ti David na ngoi so Doëg, zo ti Édom, ague atene na Saül so David asi na ndo ti Ahimélec.+

52 Mo wangangu, ndani nyen si mo yeke pika kate ti mo na ndö ti aye ti sioni so mo sara?+

Tâ ndoye ti Nzapa ayeke ngbâ na yâ ti lango ni kue.+

2 Yanga ti mo, so aza tongana lame,+

aleke ti sara sioni na zo nga asara ye na handa.+

3 Mo ye sioni ahon nzoni,

mo ye tenengo mvene ahon tenengo tâ tënë. (Sélah)

4 Tënë kue so asara sioni na zo, mo ye ni,

mo, yanga so mo yeke tene tënë ti handa!

5 Ndani la Nzapa ayeke kinda mo biani biani;+

lo yeke gbu mo na ngangu na yâ ti tente ti mo, lo sigi na mo,+

lo yeke zi mo na popo ti azo so ayeke na fini.+ (Sélah)

6 Azo ti mbilimbili ayeke bâ ni, na bê ti ala ayeke pika,+

na ala yeke he zo ni,+ ala tene:

7 “Bâ, so ayeke zo so ake ti tene Nzapa aga ndo ti batango terê ti lo,*+

me lo zia bê ti lo na ndö ti gbâ ti mosoro ti lo+

nga na ndö ti* aye ti sioni so lo leke ti sara.”*

8 Me mbi, mbi yeke duti ande tongana keke ti olive so akugbe ni adü pendere na yâ ti da ti Nzapa;

mbi zia bê ti mbi na ndö ti tâ ndoye ti Nzapa+ lakue lakue nga kpu na kpu.

9 Mbi yeke sepela mo lakue lakue ndali ti so mo sara mbeni ye;+

na lê ti azo ti mo so ayeke be-ta-zo,

mbi yeke fa so mbi zia bê ti mbi na ndö ti iri ti mo,+ ndali ti so a yeke nzoni.