Esdras

7 Na peko ti aye so, na ngoi so Artaxerxès+ ayeke gbia ti Perse, Esdras*+ alondo na Babylone akiri. Esdras ayeke molenge ti Séraïah,+ Séraïah ayeke molenge ti Azariah, Azariah ayeke molenge ti Hilkiah,+ 2 Hilkiah ayeke molenge ti Shallum, Shallum ayeke molenge ti Zadoc, Zadoc ayeke molenge ti Ahitub, 3 Ahitub ayeke molenge ti Amariah, Amariah ayeke molenge ti Azariah,+ Azariah ayeke molenge ti Méraïoth, 4 Méraïoth ayeke molenge ti Zérahiah, Zérahiah ayeke molenge ti Uzzi, Uzzi ayeke molenge ti Bukki, 5 Bukki ayeke molenge ti Abishua, Abishua ayeke molenge ti Phinéhas,+ Phinéhas ayeke molenge ti Éléazar,+ Éléazar ayeke molenge ti kota prêtre Aaron.+ 6 Esdras so alondo na Babylone si akiri so, lo yeke wasungo peko ti mbeti* nga lo hinga ye mingi na ndö ti Ndia ti Moïse,*+ Ndia so Jéhovah Nzapa ti Israël amû ni lani. Gbia ni amû na Esdras aye kue so lo hunda, ndali ti so maboko ti Jéhovah Nzapa ti lo ayeke na ndö ti lo.

7 Ambeni zo ti Israël, ambeni prêtre, ambeni zo ti mara ti Lévi,+ ambeni zo ti hengo bia,+ ambeni zo ti batango yanga ti gbagba+ nga na ambeni zo ti kua ti temple,*+ amonté na Jérusalem na yâ ti ngu mbasambala ni ti komandema ti Gbia Artaxerxès. 8 Tongaso, Esdras asi na Jérusalem na nze oku ni ti ngu mbasambala ti komandema ti Gbia Artaxerxès. 9 Na kozo lango ti kozo nze ni, lo londo na Babylone lo si na Jérusalem na kozo lango ti oku nze ni, ndali ti so maboko ti Nzapa ti lo ayeke na ndö ti lo.+ 10 Esdras aleke lani bê ti lo ti gi nda ti Ndia ti Jéhovah na ti sara ye alingbi na ni,+ nga ti fa andia nga na ambela ti Nzapa ni so a lingbi azo asara ye alingbi na ni na Israël.+

11 Bâ mbeni copie ti mbeti so Gbia Artaxerxès amû lani na Esdras so ayeke prêtre nga so lo yeke wasungo peko ti mbeti* la; Esdras ayeke nga mbeni zo so ahinga ye nzoni mingi na ndö ti acommandement ti Jéhovah nga na andia so a mû ndali ti azo ti Israël. Mbeti ni atene:

12 * “Artaxerxès,+ gbia ti agbia, atokua mbeti so na prêtre Esdras, wasungo peko* ti atënë ti Ndia ti Nzapa ti yayu: Zia siriri so ayeke mbilimbili-kue aduti na mo. Ti fadeso 13 mbi mû yanga si azo kue ti Israël so ayeke na yâ ti kodro ti mbi, aprêtre ni nga na azo ti mara ti Lévi, ala so aye ti gue na Jérusalem legeoko na mo, ague.+ 14 Mbi na awamungo wango ti mbi mbasambala la e tokua mo ti gue ti bâ wala azo ti Juda na ti Jérusalem ayeke sara ye alingbi na Ndia ti Nzapa ti mo so ayeke na yâ ti maboko ti mo so. 15 Mo yeke gue nga na argent na lor so mbi na awamungo wango ti mbi, e mû ni na bê ti e wani na Nzapa ti Israël, so da ti lo ayeke na Jérusalem. 16 Fade mo gue na ni legeoko na argent kue nga na lor kue so mo wara ni na yâ ti kodro-komanda ti Babylone kue, nga na matabisi so azo na aprêtre amû ni na bê ti ala wani ndali ti da ti Nzapa ti ala so ayeke na Jérusalem.+ 17 Mo mû nginza ni so hio, mo vo na akoli-bagara,+ akoli-taba,+ akete taba;+ mo vo nga na aye ndali ti asandaga ti lê ti kobe+ nga na asandaga ti sämba+ so a yeke zia na terê ni. Fade mo yâa aye so kue na sandaga na ndö ti gbalaka ti da ti Nzapa ti mo so ayeke na Jérusalem.

18 “Ye kue so mo bâ ayeke nzoni na lê ti mo nga na lê ti aita ti mo ti sara na tanga ti argent na lor ni, ala sara na ni alingbi na ye so bê ti Nzapa ti ala aye. 19 Ti akungba nde nde kue so a mû na mo ndali ti kua ti da ti Nzapa ti mo, mo gue na ni mo zia na gbele Nzapa na Jérusalem.+ 20 Ti tanga ti aye so a bezoin ni ndali ti da ti Nzapa ti mo, na so a hunda na mo ti mû ni, mo yeke mû ande nginza na yâ ti da ti batango mosoro ti gbia ti vo na ni.+

21 “Mbi, Gbia Artaxerxès, mbi mû yanga na azo ti batango nginza kue so ayeke na ando so ayeke na Mbage ti ngu* ni, mbi tene, ye kue so prêtre Esdras,+ wasungo peko ti mbeti* ti Ndia ti Nzapa ti yayu, ayeke hunda ni ande na ala, ala mû ni na lo hio. 22 Ala mû na lo juska na talent* 100 ti argent, kor* 100 ti blé, bath* 100 ti vin,+ bath* 100 ti mafuta,+ me ti ingo+ ala diko wungo ni dikongo pëpe. 23 Zia aye kue so Nzapa ti yayu amû yanga ti tene a sara ni, ala sara ni na ngangu ti terê ti ala kue ndali ti da ti Nzapa ti yayu,+ si ngonzo ti lo atï na ndö ti azo ti kodro ti gbia pëpe nga na amolenge ti gbia pëpe.+ 24 Nga, zia mo hinga so a lingbi a hunda na aprêtre, azo ti mara ti Lévi, azo ti pikango mozoko,+ azo ti batango yanga ti gbagba, azo ti kua ti temple*+ nga na azo ti kua ti da ti Nzapa so, ti futa impôt, impôt so a doit ti futa+ wala impôt ti lege pëpe.

25 “Âdu ti mo, Esdras, a lingbi na ndara so Nzapa ti mo amû na mo,* mo soro amokonzi ti da-ngbanga, azo ti fango ngbanga ti tene ala fâ ngbanga ti azo kue so ayeke na ando so ayeke na Mbage ti ngu ni, ala kue so ahinga andia ti Nzapa ti mo nzoni. Ti ala so ahinga andia ni pëpe, a lingbi mo fa ni na ala.+ 26 Zo kue so ake ti sara ye alingbi na Ndia ti Nzapa ti mo nga so lo ke ti sara ye alingbi na ndia ti gbia, a yeke dë ande ngbanga na li ti lo hio, atâa a yeke ngbanga ti kuâ, wala a tomba lo na yâ ti kodro ni, wala a hunda na lo ti futa amende wala a kanga lo.”

27 Zia a gonda Jéhovah Nzapa ti akotara ti e, lo so azia na yâ ti bê ti gbia ti sara si da ti Jéhovah so ayeke na Jérusalem aga pendere.+ 28 Lo fa tâ ndoye na mbage ti mbi na lege so lo sara si gbia ni,+ awamungo wango ti lo+ nga na angangu mokonzi ti gbia kue asara nzoni bê na mbi. Tongaso mbi wara ngangu ndali ti so maboko ti Jéhovah Nzapa ti mbi ayeke na ndö ti mbi, na mbi bungbi akota zo ti Israël kue si e hon.