ÉZÉCHIEL

1 Na lango oku ti nze osio ti ngu 30 ni, na ngoi so mbi yeke na popo ti azo so a gue na ala na ngbâa,+ na terê ti Ngu ti Kébar,+ lê ti nduzu azi, na mbi to nda ti bâ avision so alondo na Nzapa. 2 Na lango oku ti nze ni, so ti tene ngu oku ni na peko ti so a gue na Gbia Jéhoïakin+ na ngbâa, 3 Jéhovah asara tënë na Ézéchiel,* molenge ti prêtre Buzi, na terê ti Ngu ti Kébar na sese ti azo ti Chaldée.+ A yeke na ndo so la si maboko ti Jéhovah aga na ndö ti lo.+

4 Na ndembe so mbi yeke bâ ndo, mbi bâ mbeni kota pupu+ so alondo na mbage ti nord aga, mbi bâ nga mbeni gbâ ti mbinda na mbeni wâ* so aza ngangu,+ mbeni lumière so aza zango angoro terê ni kue; mbeni ye so akpa électrum*+ ayeke na yâ ti wâ ni. 5 Na yâ ni, mbi bâ aye so akpa acréature osio so ayeke na fini;+ na bango ala, ala oko oko kue akpa zo. 6 Ala oko oko kue ayeke na aface osio nga na akpangbi* osio.+ 7 Gere ti ala aluti droit, gbe ti gere ti ala ayeke tongana ti molenge ti bagara, zango ni ayeke tongana zango ti cuivre so akpaka terê ni si aza.+ 8 Ala yeke na amaboko tongana ti zo na gbe ti akpangbi ti ala oko oko kue na ambage osio kue, ala osio kue ayeke na aface osio nga na akpangbi* osio. 9 Li ti akpangbi ti ala andu terê. Na ngoi so ala yeke hon ala yeke tourné terê ti ala pëpe. Ala oko oko kue ayeke gue gï droit na devant ti ala.+

10 Aface ti ala ayeke tongaso: Ala oko oko kue ayeke na face ti zo, face ti bamara+ na mbage ti koli, face ti koli-bagara+ na mbage ti wali, na ala osio kue ayeke nga na face+ ti aigle.+ 11 Aface ti ala ni ayeke tongana ti so a fa so. Ala zi yâ ti akpangbi ti ala na nduzu na li ti ala. Ala oko oko ayeke na akpangbi use so ayanga ni andu terê, nga use akanga terê ti ala kue.+

12 Ala oko oko kue ayeke gue gï droit na devant ti ala, ala yeke gue na ndo kue so yingo apusu ala ti gue dä.+ Na ngoi so ala yeke hon, ala yeke tourné terê ti ala pëpe. 13 Na bango acréature ni so ayeke na fini so, terê ti ala ayeke tongana alê ti wâ, mbeni ye so akpa keke ti wâ so wâ aza na yanga ni ague na devant akiri na peko na popo ti acréature ni so ayeke na fini so nga wâ ti bekpa ayeke sigi na yâ ti wâ ni.+ 14 Na ngoi so acréature ni so ayeke na fini ayeke gue na ala yeke kiri, tambela ti ala ayeke tongana sungo ti awâ ti bekpa.

15 Na ngoi so mbi yeke bâ acréature so ayeke na fini so, mbi bâ mbeni roue na sese na terê ti acréature ni oko oko so ayeke na aface osio so.+ 16 Aroue ni na lege so a leke na ni aza tongana chrysolithe, na osio kue akpa terê. Na bango aroue ni nga na lege so a leke na ni, a yeke mo bâ mo tene a mû roue oko a yôro na yâ ti mbeni.* 17 Na ndembe so ala yeke gue, ala lingbi ti hon na acoin osio sân ti tourné. 18 Ajante ti ala ayo na nduzu mingi a sara si bê ti zo adö, alê amû terê ti ajante ni osio kue.+ 19 Tongana acréature ni ayeke hon, aroue ni ayeke hon legeoko na ala, tongana acréature ni alondo na ndö ti sese ti gue na nduzu, aroue ni nga kue ayeke londo na nduzu.+ 20 Ala yeke gue na ndo so yingo ni ayeke pusu ala ti gue dä, na ndo kue so yingo ni ague dä. Aroue ni ayeke londo legeoko na ala, ndali ti so yingo so ayeke sara kua na ndö ti acréature ni ayeke nga na yâ ti aroue ni. 21 Tongana ala yeke hon, aroue ni ayeke hon. Tongana ala luti, aroue ni nga aluti. Nga, na ngoi so ala yeke londo na nduzu, aroue ni nga ayeke londo legeoko na ala, ndali ti so yingo so ayeke sara kua na ndö ti acréature ni ayeke nga na yâ ti aroue ni.

22 Na nduzu, na li ti acréature ni so ayeke na fini so, a yeke wara mbeni ye so ayeke tongana lê ti nduzu so aza tongana kota glace so asara si bê ti zo adö, a gbara ni na nduzu na ndö ti li ti ala.+ 23 Na gbe ti ye ni so ayeke tongana lê ti nduzu so, akpangbi ti ala ayeke droit,* na terê ti terê. Ala oko oko kue ayeke na kpangbi use so akanga mbeni mbage ti terê ti ala oko, na ambeni use so akanga mbeni mbage ti terê ti ala ni. 24 Na ngoi so mbi mä totongo ti akpangbi ti ala, a kpa totongo ti ngu so ayeke sua, tongana bruit ti Lo so ngangu ti lo ahon angangu kue.+ Tongana ala yeke hon, bruit ni ayeke tongana ti aturugu. Na ngoi so ala luti, ala kanga akpangbi ti ala.

25 Na ndö ti ye so ayeke tongana lê ti nduzu si ayeke na ndö ti li ti ala so, a yeke mä mbeni go. (Na ngoi so ala luti, ala kanga akpangbi ti ala ni.) 26 Na ndö ti ye so ayeke tongana lê ti nduzu si ayeke na ndö ti li ti ala so, mbeni ye so akpa tênë ti saphir+ ayeke dä, na a kpa trône.+ Na ndö ti trône ni na nduzu, mbeni ye ayeke dä so akpa zo.+ 27 Mbi bâ mbeni ye so aza tongana électrum,+ so ayeke tongana wâ so alondo na terê ti ye so akpa hanche ti lo ti gue na mbage ti nduzu; ti londo na hanche ti lo ni ti kiri na mbage ti gbe ni, mbi bâ mbeni ye so akpa wâ.+ Mbeni zango ye angoro terê ti lo kue 28 na akpa arc-en-ciel+ so ayeke na yâ ti mbinda na ngoi so ngu apika mingi. Zango ye ni so angoro lo so ayeke tongana ti so a fa so. A za tongana gloire ti Jéhovah.+ Na ngoi so mbi bâ ni, mbi kuku, mbi kpo li ti mbi na sese na mbi komanse ti mä go ti mbeni zo so asara tënë.

2 Na pekoni, lo tene na mbi: “Molenge ti zo,* londo mo luti na nduzu mbi sara tënë na mo.”+ 2 So lo sara tënë na mbi awe, yingo alï na yâ ti mbi na asara si mbi luti na nduzu+ ti tene mbi mä lo so ayeke sara tënë na mbi so.

3 Lo tene na mbi: “Molenge ti zo, mbi yeke tokua mo na mbage ti azo ti Israël,+ na mbage ti amara ti kpengba-li so asara kpengba-li na mbi.+ Ala na akotara ti ala ake ndia ti mbi juska na lango so.+ 4 Mbi yeke tokua mo na mbage ti azo so aye ti mä zo pëpe nga so li ti ala akpengba so,+ mo yeke tene na ala, mo tene: ‘Bâ tënë so Jéhovah, Seigneur ti dunia kue, atene la.’ 5 Atâa ala mä mo wala ala mä mo pëpe, so ala yeke azo ti kpengba-li so,+ ala yeke hinga biani so mbeni prophète ayeke lani na popo ti ala.+

6 “Me ti mo, molenge ti zo, mo sara mbeto ti ala pëpe,+ nga mo sara mbeto ti tënë ti ala pëpe, atâa so akeke ti sisi nga na akî la angoro mo kue,*+ na mo duti na popo ti akpalakongo so. Mo sara mbeto ti tënë ti ala pëpe+ na mo sara mbeto ti lê ti ala pëpe+ ngbanga ti so ala yeke azo ti kpengba-li. 7 A lingbi mo fa atënë ti mbi na ala, atâa ala mä mo wala ala mä mo pëpe, ngbanga ti so ala yeke azo ti kpengba-li.+

8 “Me ti mo, molenge ti zo, mo mä tënë so mbi yeke tene na mo so. Mo sara kpengba-li pëpe tongana azo ti kpengba-li so. Zi yanga ti mo, mo te ye so mbi yeke mû na mo so.”+

9 Tongana mbi bâ ndo, mbi bâ mbeni maboko so a yôro ni na mbage ti mbi,+ maboko ni so agbu mbeni rouleau so a sû mbeti na lê ni.*+ 10 Tongana lo zi yâ ti rouleau ni na devant ti mbi, a sû mbeti na lê ni nga na peko ni kue.+ A sû na lê ni abia ti vundu,* atënë ti toto nga na atënë ti demango terê.+

3 Na pekoni, lo tene na mbi: “Molenge ti zo, mo te ye so ayeke na gbele mo so. Mo te rouleau so, na mo gue mo sara tënë na azo ti Israël.”+

2 Tongaso, mbi zi yanga ti mbi na lo sara si mbi te rouleau ni so. 3 Lo kiri lo tene na mbi: “Molenge ti zo, mo te rouleau so mbi yeke mû na mo so na zia si asi yâ ti mo.” Tongaso, mbi komanse ti te ni, na a nzere na yanga ti mbi tongana mafuta ti otoro.+

4 Lo tene na mbi: “Molenge ti zo, mo gue na popo ti azo ti Israël na mo fa peko ti atënë ti mbi na ala. 5 Ndali ti so mbi tokua mo pëpe na mbage ti mbeni mara so ayeke tene yanga ti kodro so zo amä yâ ni pëpe wala yanga ti kodro so zo ahinga ni pëpe, me mbi tokua mo na mbage ti azo ti Israël. 6 Amara so ayeke tene yanga ti kodro so zo ayeke mä yâ ni pëpe so, wala yanga ti kodro so zo ahinga ni pëpe so, ala la mbi tokua mo na mbage ti ala pëpe, ala so mo lingbi ti gbu nda ti atënë ti ala pëpe. Tongana fade mbi tokua mo na mbage ti ala, ka ala yeke mä mo.+ 7 Me azo ti Israël ayeke mä mo ande pëpe, ngbanga ti so ala ye ti mä mbi pëpe.+ Azo ti Israël kue ayeke azo ti kpengba-li nga bê ti ala akpengba mingi.+ 8 Bâ, mbi sara si face ti mo akpengba tongana face ti ala, nga ndö ti lê ti mo akpengba tongana ti ndö ti lê ti ala.+ 9 Mbi sara si ndö ti lê ti mo aga tongana diamant, nga a kpengba a hon tênë ti silex.+ Mo sara mbeto ti ala pëpe wala zia si lê ti ala amû mbeto na mo pëpe,+ ala yeke azo ti kpengba-li.”

10 Na pekoni, lo tene na mbi: “Molenge ti zo, atënë kue so mbi tene na mo so, mo mä ni nga mo bata ni na bê ti mo. 11 Mo gue na popo ti azo ti mara ti mo* so a gue na ala na ngbâa so,+ na mo sara tënë na ala. Mo tene tënë na ala, atâa ala mä mo wala ala mä mo pëpe,+ mo tene: ‘Bâ, tënë so Jéhovah, Seigneur ti dunia kue, atene la.’”

12 Mbeni yingo amû mbi ahon na ni,+ na mbi mä mbeni go so atoto ngangu na peko ti mbi atene: “Zia a sepela gloire ti Jéhovah na ndo ti lo.” 13 Mbi mä toto ti akpangbi* ti acréature so ayeke na fini na ngoi so a yeke ndu terê,+ mbi mä toto ti aroue so ayeke na terê ti ala+ nga na toto ti mbeni ye so ayengi ngangu. 14 Yingo ni agbu mbi na lo hon na mbi. So mbi yeke gue, terê ti mbi anzere pëpe nga ngonzo agbu mbi, na maboko ti Jéhovah ayeke ngangu na ndö ti mbi. 15 Tongaso, mbi gue na Tel-Abib na mbage ti azo ti mara ti mbi so a gue na ala na ngbâa, ala so asara kodro na yanga ti ngu ti Kébar,+ mbi duti kâ na ndo so ala sara kodro dä so. Li ti mbi aga kirikiri+ tongana mbi duti kâ lango mbasambala na popo ti ala.

16 Na hunzingo ti lango mbasambala ni, Jéhovah asara tënë na mbi, lo tene:

17 “Molenge ti zo, mbi zia mo tongana sinziri ti azo ti Israël.+ Tongana mo mä mbeni tënë na yanga ti mbi, a lingbi mo gboto mê ti ala na mbi.+ 18 Tongana mbi tene na zo ti sioni, mbi tene: ‘Ti tâ tënë ni mo yeke kui,’ me mo gboto mê ti lo pëpe, so ti tene mo fa peko ti tënë ni na lo pëpe nga mo gboto mê ti lo pëpe ti tene lo dö lege ti sioni ti lo ni lo zia si lo ngbâ na fini,+ lo yeke kui ndali ti faute so lo sara ngbanga ti so lo yeke zo ti sioni,+ me mbi yeke hunda mênë ti lo na tïtî mo.+ 19 Me tongana mo gboto mê ti zo ti sioni ni, si lo ke sioni ti lo ni pëpe nga lo zia sioni lege ti lo pëpe, lo yeke kui ndali ti faute ti lo, me ti mo, mo yeke sö ande fini* ti mo.+ 20 Me tongana zo ti mbilimbili adö lege ti mbilimbili ti lo lo zia, na lo sara ye ti sioni,* mbi yeke zia mbeni ye ti pikango gere na gbele lo na lo yeke kui.+ Tongana mo gboto mê ti lo pëpe, lo yeke kui ndali ti siokpari ti lo nga mbi yeke dabe ti mbi encore ape na aye ti mbilimbili so lo sara, me mbi yeke hunda mênë ti lo na maboko ti mo.*+ 21 Me tongana mo gboto mê ti zo ti mbilimbili ti tene lo sara siokpari pëpe, si lo sara siokpari pëpe, lo yeke ngbâ na fini ngbanga ti so mo gboto mê ti lo+ na mo yeke sö fini* ti mo.”

22 Maboko ti Jéhovah aga na ndö ti mbi na ndo so, lo tene na mbi: “Mo londo mo gue na popo-hoto so, na mbi yeke sara tënë na mo kâ.” 23 Mbi londo mbi gue na popo-hoto ni, na bâ, gloire ti Jéhovah ayeke kâ+ tongana gloire so mbi bâ lani na yanga ti ngu ti Kébar so,+ tongaso mbi kuku, mbi kpo li ti mbi na sese. 24 Na pekoni, yingo alï na yâ ti mbi na asara si mbi luti na nduzu,+ lo sara tënë na mbi, lo tene:

“Mo gue na yâ ti da ti mo, mo kanga yanga-da na ndö ti mo. 25 Âdu ti mo, molenge ti zo, ala yeke ga na kamba na ndö ti mo na ala yeke kanga mo ande na ni ti tene mo sigi na popo ti ala pëpe. 26 Me mbi yeke sara si langue ti mo acollé na yâ ti yanga ti mo, mo yeke ga buburu na mo lingbi ande ti suku na ala pëpe ngbanga ti so ala yeke azo ti kpengba-li. 27 Me tongana mbi yeke sara tënë na mo, mbi yeke zi yanga ti mo si mo tene na ala:+ ‘Bâ tënë so Jéhovah, Seigneur ti dunia kue, atene la.’ Zo so aye ti mä lo mä,+ zo so aye ti ke lo ke, ngbanga ti so ala yeke azo ti kpengba-li.+

4 “Mo, molenge ti zo, mo mû mbeni brique na mo zia ni na devant ti mo. Mo kpaka dessin ti mbeni gbata na terê ni, gbata ti Jérusalem. 2 Mo sara ye mo bâ mo tene mo leke terê ti mo ti sara bira na gbata ni la.+ Mo leke mbeni gbagba angoro ni kue,+ mo monté sese aga koto angoro gbagba ti gbata ni,+ mo sara camp angoro ni nga mo zia amasini ti kungbingo na agbagba ti bira angoro ni kue.+ 3 Na pekoni, mo mû gbarabuba ti wen, mo zia ni tongana mur ti wen na popo ti mo na gbata ni. Zia lê ti mo abâ gbata ni, a yeke sara camp angoro ni ti sara bira na ni. Mo sara camp na terê ti gbata ni ti sara bira na ni. Ye so ayeke ga tongana mbeni tapande ndali ti azo ti Israël.+

4 “Na pekoni, mo lango na mbage ti maboko ti mo ti wali, na mo yeke yô siokpari ti azo ti Israël na ndö ti mo.+ Mo yô siokpari ti ala alingbi na wungo ti alango so mo lango na mbage oko. 5 Mbi yeke mû yanga na mo ti sara tongaso na yâ ti alango 390 alingbi na wungo ti angu ti siokpari so ala sara,+ mo yeke yô siokpari ti azo ti Israël. 6 Mo yeke lango tongaso juska alango ni ahunzi.

“Na pekoni, mo yeke lango ti use ni na mbage ti maboko ti mo ti koli, na mo yeke yô siokpari ti azo ti Juda+ ndali ti lango 40. Lango oko ndali ti ngu oko, lango oko ndali ti ngu oko, ye so mbi fa na mo la. 7 Mo yeke tourné lê ti mo ti bâ ndo na mbage ti Jérusalem so a sara camp angoro ni ti sara bira na ni so,+ bongo ayeke na terê ti maboko ti mo pëpe, na mo fa tënë ti prophétie ti ngbanga na ndö ti gbata so.

8 “Bâ, mbi yeke kanga mo na kamba tongaso si mo wara lege ti tourné terê ti mo mbage na mbage pëpe juska alango so mo sara camp angoro gbata ni so ahunzi si.

9 “Âdu ti mo, mo yeke mû ande blé, orge, haricot, lentille, hâriyâ, épeautre,* mo zia ni kue na yâ ti mbeni kungba oko na mo sara ni na mapa ti mo. Mo yeke te ni na yâ ti alango so mo yeke lango mbage oko so, so ti tene alango 390.+ 10 Mo yeke pesé kobe ti mo si na yâ ti lango oko mo te kobe so nengo ni ayeke sicle* 20. Mo yeke te ni na angoi ni.

11 “Mo yeke haka ngu hakango si mo nyon ni, mo haka ni alingbi ndambo ti hîn.* Mo yeke nyon ni na angoi ni.

12 “Mo yeke te ni ande tongana ti so mo yeke te na mapa ti orge so ayeke ronde ronde. Mo yeke zö ni na lê ti ala, mo mû puru ti azo si aga tongana charbon ti zongo na ni.” 13 Jéhovah atene: “A yeke tongaso si azo ti Israël ayeke te ande asioni kobe na popo ti amara so mbi yeke kangbi yâ ti ala na popo ti ala.”+

14 Tongaso, mbi tene: “Ên-ën Jéhovah, Seigneur ti dunia kue! Ngbene ye so mbi de maseka juska fadeso, mbi sara si terê ti mbi aga* sioni pëpe na lege ti tengo mbeni nyama so akui awe wala mbeni nyama so mbeni nyama si asuru yâ ti lo,+ nga mbeni sioni* kasa ti nyama ade ti lï yanga ti mbi pëpe.”+

15 Ni la, lo tene na mbi: “Nzoni, mbi yeke zia lege na mo ti mû puru ti nyama na place ti puru ti zo, si mo zö mapa ti mo ni na ndö ni.” 16 Lo kiri lo tene na mbi: “Molenge ti zo, bâ mbi yeke futi gogoro ti kobe* na yâ ti Jérusalem,+ a yeke na gingo bê si ala yeke te ande mapa ti ala so a pesé ni pesengo si a mû na ala,+ nga a yeke na kota vundu si ala yeke nyon ngu so a haka ni hakango si a mû na ala.+ 17 Ye so ayeke si ande, tongaso si li ti ala aga kirikiri ngbanga ti so mapa na ngu ayeke dä pëpe na ngoi so ala yeke bâ lê ti mba nga ala nge ngengo ndali ti sioni ti ala.

5 “Âdu ti mo, molenge ti zo, mo mû mbeni épée so yanga ni aza na mo sara kua na ni tongana mbeni rasoir ti zo ti fango kuä ti li. Mo kio kuä ti li ti mo na kuä ti yanga ti mo, na pekoni mo mû kilo mo pesé na ni na mo kangbi yâ ni na ambage ota. 2 Tongana lango ti sarango camp na terê ti gbata ni ahunzi awe, mo mû mbage oko na popo ti ambage ota ni so, mo zö na yâ ti gbata ni.+ Na pekoni, mo mû use mbage ni mo fâ yâ ni na épée mo ngoro na gbata ni kue.+ Mo mû tanga ti mbage ni so, mo tuku ni si pupu akangbi yâ ni na mbi yeke gboto épée ti mbi ti tomba peko ni.+

3 “Nga, mo mû mbeni kuä ni so kete mo kanga na yanga ti bongo ti mo. 4 Mo kiri mo mû mbeni kuä ni akono kete, mo tuku na lê ti wâ mo gbi ni. Wâ ayeke londo ande na yâ ni ti tï na terê ti azo ti Israël kue.+

5 “Bâ tënë so Jéhovah, Seigneur ti dunia kue, atene la: ‘So Jérusalem la. Mbi zia lo na popo ti amara, na akodro angoro lo kue. 6 Me lo sara kpengba-li ti ke ambela ti mbi nga na andia ti mbi, na lo sara ye ti sioni mingi ahon amara ni so nga na akodro so angoro lo.+ Ala ke ambela ti mbi, na ala tambela alingbi na andia ti mbi pëpe.’

7 “Ni la, bâ tënë so Jéhovah, Seigneur ti dunia kue, atene la: ‘Ngbanga ti so mo sara sioni ahon amara so angoro mo, na mo tambela alingbi na andia ti mbi pëpe nga mo bata ambela ti mbi pëpe, me mo bata gï ambela ti amara so angoro mo,+ 8 bâ tënë so Jéhovah, Seigneur ti dunia kue, atene la: “Bâ mbi yeke ge ti ke mo, mo gbata so,+ mbi wani mbi yeke fâ ngbanga na li ti azo ni na yâ ti mo na lê ti amara.+ 9 Mbi yeke sara na mo ye so mbi de mbi sara lâ oko pëpe, nga mara ti ye ni so mbi yeke kiri ti sara ni ande pëpe ngbanga ti aye kue so mo sara so ayeke tâ sioni mingi.+

10 “‘“Tongaso, ababâ so ayeke na yâ ti mo ayeke te ande amolenge ti ala+ na amolenge ayeke te ababâ ti ala, mbi yeke fâ ngbanga na li ti ala, na tanga ti ala so angbâ, mbi yeke kangbi yâ ti ala kirikiri.”’*+

11 “Ni la, Jéhovah, Seigneur ti dunia kue, atene: ‘Mbi so mbi yeke na fini, mbi deba yanga, mbi tene, so mo sara si da ti mbi so ayeke nzoni-kue aga sioni na lege ti afungo yanda ti mo nga na aye ti sioni kue so mo sara so,+ mbi kue mbi yeke ke ande mo;* lê ti mbi ayeke duti ande na vundu pëpe nga mbi yeke bâ mawa ti mo oko pëpe.+ 12 Mbi yeke kangbi yâ ti azo ti mo na ambage ota si mbage oko ayeke kui na asioni kobela so amû ndo wala na kota nzara. Mbeni mbage ni oko ayeke kui kuâ ti épée.+ Mbi yeke kangbi yâ ti tanga ti mbage ni kirikiri* na mbi yeke mû épée ti tomba peko ti ala.+ 13 Na pekoni, bê ti mbi so ason so ayeke kaï, na ngonzo ti mbi so alondo na terê ti ala so ayeke hunzi ande, na bê ti mbi ayeke dë.+ Na ngoi so mbi yeke hunzi ti tuku ngonzo ti mbi kue na ndö ti ala, ala yeke hinga ande so mbi Jéhovah la mbi sara tënë so na ala mbi tene mbi ye zo amû terê ti lo kue gï na mbi oko.+

14 “‘Mbi yeke sara si mo ga mbeni ndo so abuba kue awe nga mbeni ye ti hengo ni na lê ti amara so angoro mo nga na lê ti azo kue so ayeke hon na lege.+ 15 Na ngoi so na lê ti ngonzo ti mbi, mbi yeke fâ ngbanga na ndö ti mo nga mbi yeke punir mo ngangu, mo yeke ga ye ti hengo ni nga ye so azo ayeke zere ni,+ mo yeke ga mbeni tapande so zo amanda ye na lege ni nga mbeni ye so amara so angoro mo ake ni. Mbi Jéhovah la mbi sara tënë so.

16 “‘Mbi yeke tokua kota nzara so ayeke tongana alê ti kokora na ndö ti ala si ayeke fâ ala. Alê ti kokora so mbi yeke tokua ande na ndö ti ala ayeke futi ala.+ Mbi yeke sara si kota nzara ni akiri aga ngangu mingi ndali ti so mbi yeke futi gogoro ti kobe ti ala.*+ 17 Mbi yeke tokua kota nzara nga na asioni nyama ti ngonda+ na ndö ti ala, a yeke fâ ande amolenge ti mo. Sioni kobela so ayeke mû ndo nga tukungo mênë ayeke hon ande ndö ti mo na mbi yeke ga ande na épée na ndö ti mo.+ Mbi Jéhovah la mbi sara tënë so.’”

6 Jéhovah akiri asara tënë na mbi, lo tene: 2 “Molenge ti zo, mo tourné lê ti mo na mbage ti ahoto ti Israël na mo fa tënë ti prophétie ti ngbanga na ndö ti ala. 3 Mo tene: ‘Ala ahoto ti Israël, ala mä tënë ti Jéhovah, Seigneur ti dunia kue: Bâ tënë so Jéhovah, Seigneur ti dunia kue, atene na ahoto, akete hoto, angu so asua nga na apopo-hoto la: “Bâ, mbi yeke ga ande na épée na terê ti ala, na mbi yeke futi ando ti ala so ayeke na nduzu. 4 A yeke futi ande agbalaka ti ala, a yeke kungbi ando ti zongo dukane ti ala,+ na azo ti ala so a fâ ala awe mbi yeke bi kuâ ti ala na sese na devant ti afungo yanda* ti ala.+ 5 Mbi yeke bi kuâ ti azo ti Israël na sese na devant ti afungo yanda ti ala, mbi yeke tuku abio ti ala kirikiri angoro terê ti agbalaka ti ala kue.+ 6 Na ando kue so ala sara kodro dä, a yeke futi ande agbata ni+ na a yeke futi ando so ayeke na nduzu, a yeke buba ni biani biani.+ A yeke kinda agbalaka ti ala na sese nga a yeke futi ni, afungo yanda ti ala ayeke buba, a yeke kungbi na sese ando ti zongo dukane ti ala, na akusala ti maboko ti ala ayeke ngbâ pëpe. 7 Ala so a fâ ala awe, akuâ ti ala ayeke tï na popo ti ala,+ ala yeke hinga so mbi Jéhovah la.+

8 “‘“Mbi yeke zia mbeni tanga ti ala angbâ, ambeni na popo ti ala ayeke sö kuâ na lê ti épée na popo ti amara na ngoi ni so yâ ti ala akangbi kirikiri na yâ ti akodro nde nde.+ 9 Na ala so ayeke sö kuâ ande na popo ti ala ayeke dabe ti ala na mbi kâ na popo ti amara, ndo so a gue na ala na ngbâa dä so.+ Ala yeke bâ so vundu asara mbi lani ndali ti bê ti ala so ake mbi na so ahon yongoro na mbi+ nga ndali ti lê ti ala so aza* ti mû gï peko ti afungo yanda ti ala.+ Kamene ayeke sara ala nga bê ti ala ayeke son ndali ti asioni kue nga na afungo ye kue so ala sara.+ 10 Ala yeke hinga ande so mbi yeke Jéhovah, na tënë so mbi tene ti ga na ye ti sioni na ndö ti ala ayeke senge tënë pëpe.”’+

11 “Bâ tënë so Jéhovah, Seigneur ti dunia kue, atene la: ‘Ala pika maboko ti ala, ala pika nga gere ti ala na sese, na ala dema terê ti ala ndali ti aye ti sioni kue nga na afungo ye kue so azo ti Israël asara, ngbanga ti so ala yeke kui ande kuâ ti épée, kuâ ti kota nzara nga kuâ ti sioni kobela so amû ndo.+ 12 Zo so ayeke na yongoro ndo ayeke kui kuâ ti sioni kobela so amû ndo, zo so ayeke nduru ge ayeke kui kuâ ti épée na zo so ayeke sö kuâ na yâ ti aye so, kota nzara ayeke fâ lo, na mbi yeke tuku ngonzo ti mbi kue na ndö ti ala.+ 13 Ala yeke hinga so mbi yeke Jéhovah,+ tongana akuâ ti azo ti ala so a fâ ala awe ayeke lango na sese na popo ti afungo yanda ti ala, na terê ti agbalaka ti ala,+ na ndö ti ayongoro hoto kue, nga na li ti ahoto kue, na gbe ti akeke so kugbe ni adü mingi, na gbe ti amaboko ti akota keke nga na ando so ala yeke yâa asandaga* so afun pendere dä ti dë bê ti afungo yanda ti ala ni so.+ 14 Mbi yeke yôro maboko ti mbi ti sara sioni na ala nga ti sara si kodro ni abuba biani biani nga ando kue so ala yeke sara kodro dä ayeke buba ande biani biani ahon benyama so ayeke nduru na Diblah. Ala yeke hinga ande so mbi yeke Jéhovah.’”

7 Jéhovah akiri asara tënë na mbi, lo tene: 2 “Mo, molenge ti zo, bâ tënë so Jéhovah, Seigneur ti dunia kue, atene na azo ti kodro ti Israël la: ‘Nda ni asi awe, nda ni asi awe na ndö ti acoin osio ti kodro ni. 3 Nda ni asi fadeso awe na ndö ti mo, mbi yeke tuku ngonzo ti mbi na ndö ti mo, mbi yeke fâ ngbanga na ndö ti mo alingbi na asarango ye ti mo, na mbi yeke sara si asioni ye kue so mo sara akiri na ndö ti mo. 4 Lê ti mbi ayeke duti ande na vundu ndali ti mo pëpe nga mbi yeke bâ mawa ti mo pëpe,+ mbi yeke sara si aye so mo sara so akiri na ndö ti mo nga mo yeke bâ pasi ndali ti aye ti sioni so mo sara.+ Mo yeke hinga so mbi yeke Jéhovah.’+

5 “Bâ tënë so Jéhovah, Seigneur ti dunia kue, atene la: ‘Bâ, mbeni kota ye ti sioni so mara ni ayeke use pëpe ayeke si.+ 6 Nda ni asi awe; nda ni ayeke ga, a yeke londo ti ga na terê ti mo. Bâ, a si awe! 7 Tour ti mo asi awe, mo so mo sara kodro na sese ni. Ngoi ni asi awe, lango ni ayeke pusu nduru nduru.+ Li ti azo aga kirikiri na ngia ayeke na li ti ahoto pëpe.

8 “‘Na yâ ti kete ngoi, mbi yeke sara ande si ngonzo ti mbi aga na ndö ti mo,+ mbi yeke tuku ngonzo ti mbi kue na ndö ti mo,+ mbi yeke fâ ngbanga na ndö ti mo alingbi na asarango ye ti mo, na mbi yeke sara si asioni ye kue so mo sara akiri na ndö ti mo. 9 Lê ti mbi ayeke duti ande na vundu ndali ti mo pëpe nga mbi yeke bâ mawa ti mo pëpe.+ Mbi yeke sara si aye so mo sara so akiri na ndö ti mo nga mo yeke bâ pasi ndali ti aye ti sioni so mo sara. Mo yeke hinga ande so mbi Jéhovah la mbi yeke pika mo so.+

10 “‘Bâ, lango ni la! Bâ, a yeke si.+ Tour ti mo asi awe. Keke ni asara fleur na fandara asigi awe. 11 Sarango ye ti ngangu na zo akono aga keke ti ye ti sioni.+ Ala wala amosoro ti ala wala gbâ ti azo ti ala nga na kota ndo ti ala ayeke ngbâ ande pëpe. 12 Ngoi ni ayeke ga, lango ni ayeke si ande. Zia zo ti vongo ye aduti na ngia pëpe, zia zo ti kango ye asara vundu pëpe ndali ti so kota ngonzo ayeke ga na ndö ti azo ti ala kue.*+ 13 Zo ti kango ye ayeke kiri pëpe na terê ti aye so lo kä, même tongana lo sö kuâ, vision ni so ayeke ga tâ tënë na ndö ti gbâ ti azo ni kue. Zo oko ayeke kiri ande pëpe. Ndali ti sioni ti lo,* zo oko ayeke bata fini ti lo pëpe.

14 “‘A hûru trompette,+ azo kue aleke terê ti ala, me zo oko ayeke gue na bira pëpe ngbanga ti so ngonzo ti mbi ayeke na ndö ti gbâ ti azo ni kue.+ 15 Épée ayeke na gigi,+ sioni kobela so amû ndo nga na kota nzara ayeke na yâ ni. Azo kue so ayeke na yaka ayeke kui kuâ ti épée, na kota nzara nga na sioni kobela so amû ndo ayeke hunzi ande ala kue so ayeke na yâ ti gbata ni.+ 16 Azo so asö kuâ na yâ ti aye so ayeke kpe ti gue na li ti ahoto, nga legeoko tongana akolokoto ti popo-hoto, zo oko oko ayeke dema terê ti lo na ndö ti faute ti lo.+ 17 Maboko ti ala kue ayeke woko nga ngu ayeke yuru na terê ti genou ti ala.*+ 18 Ala yü bongo ti vundu,+ kota mbeto ahon ndö ti ala. Kamene ayeke sara ande ala kue nga li ti ala kue ayeke mboko.*+

19 “‘Ala yeke tuku argent ti ala na ndö ti alege nga ala yeke ke lor ti ala na bê oko. Na lango ti kota ngonzo ti Jéhovah,+ argent ti ala wala lor ti ala alingbi ande ti sö ala pëpe. A yeke lingbi ala* pëpe, yâ ti ala ayeke si pëpe ndali ti so amosoro ni* aga ye so ayeke pusu ala ti sara sioni. 20 Ala pika kate ti ala ndali ti aye ti pendere so ala yeke na ni na ala mû ni* aleke na a-statue nga na afungo yanda ti ala+ so bê ti mbi ake ni. Ndani la mbi yeke sara ande si a ga ye so ala ke ni na bê oko. 21 Mbi yeke zia ande ni* si awande amû ni na ngangu na a ga kungba so azo ti sioni ti sese agbu ni na peko ti bira na ala yeke bi nengo ti amosoro ni so na sese.

22 “‘Mbi yeke honde lê ti mbi na ala,+ ala yeke bi ande nengo ti ndo* ti mbi so mbi ye ni mingi so na sese nga azo ti nzi ayeke lï na yâ ni na ala yeke bi nengo ni na sese.+

23 “‘Mo leke chaîne,*+ ndali ti so fango ngbanga ti kuâ na li ti azo ayeke mingi+ nga sarango ye ti ngangu na zo ayeke mingi na yâ ti gbata ni.+ 24 Mbi yeke ga na ambeni mara so ayeke sioni mingi+ so ayeke mû ada ti ala,+ na mbi yeke kaï pikango kate ti awangangu nga a yeke bi nengo ti ando ti vorongo nzapa ti ala na sese.+ 25 Na ngoi so ala yeke na yâ ti vundu, ala yeke gi ande peko ti siriri me ala yeke wara ni pëpe.+ 26 Aye ti ngangu ayeke ga ande na peko ti terê, ala yeke mä gï asango na peko ti terê, azo ni ayeke gi mbeni prophète+ ti fa na ala mbeni vision, me ndia* ayeke hunzi na yanga ti prêtre nga wango ahunzi na yanga ti a-ancien.+ 27 Gbia ayeke sara ande vundu,+ mokonzi ayeke yü bongo na vundu nga maboko ti azo ti kodro ni ayeke dö na mbeto. Mbi yeke sara ande ye na ala alingbi na asarango ye ti ala, mbi yeke fâ ngbanga na ndö ti ala tongana ti so ala fâ lani ngbanga na ndö ti ambeni zo. Ala yeke hinga ande so mbi yeke Jéhovah.’”+

8 Na yâ ti ngu omene ni, na omene nze ni, na oku lango ti nze ni, tongana mbi yeke duti na yanga-da ti mbi si a-ancien ti Juda aduti na gbele mbi, maboko ti Jéhovah, Seigneur ti dunia kue, aga na ndö ti mbi na ndo ni so. 2 Na ngoi so mbi yeke bâ ndo, mbi bâ mbeni zo so terê ti lo ayeke tongana wâ. Wâ ayeke na gbe ti ye so akpa hanche ti lo.+ Ti londo na hanche ti lo ti gue na mbage ti nduzu, terê ti lo aza zango tongana zango ti électrum.*+ 3 Na pekoni, lo yôro mbeni ye so akpa maboko na lo gbu mbi na kuä ti li ti mbi, mo ye ti bâ, mbeni yingo amû mbi na popo ti sese na yayu ague na mbi na Jérusalem na lege ti avision so alondo na Nzapa. A gue na mbi na yanga ti gbagba ni so ayeke na mbage ti yâ ni+ na so abâ ndo na mbage ti nord, na ndo ni so a yeke wara astatue so ason bê ti Nzapa.+ 4 Bâ, gloire ti Nzapa ti Israël ayeke na ndo ni so,+ a kpa ye so mbi bâ ni lani na yâ ti popo-hoto so.+

5 Na pekoni, lo tene na mbi: “Molenge ti zo, tongana mo ye, mo yô lê ti mo, mo bâ ndo na mbage ti nord.” Tongaso, mbi yô lê ti mbi na mbage ti nord. Kâ, na mbage ti nord ti yanga ti gbagba ti gbalaka ni, mbi bâ statue so ason bê ti Nzapa ayeke na yanga ti gbagba ni. 6 Lo tene na mbi: “Molenge ti zo, mo bâ aye so ayeke tâ sioni mingi so, aye so bê ti mbi ake ni si azo ti Israël ayeke sara ni na ndo so so?+ Aye so asara si mbi hon yongoro na ndo ti mbi so ayeke nzoni-kue.+ Me mo yeke bâ ande aye so bê ti mbi ake ni, so ayeke tâ sioni mingi ahon ti so.”

7 Na pekoni, lo gue na mbi na yanga ti lingo na yâ ti lacour ni, mbi bâ ndo, mbi bâ mbeni dû na terê ti mur ni. 8 Lo tene na mbi: “Molenge ti zo, tongana mo ye, mo kôro dû na terê ti mur ni.” Tongaso, mbi kôro dû na terê ti mur ni na mbi bâ mbeni yanga-da ti lingo na yâ ni kâ. 9 Lo tene na mbi: “Mo lï kâ mo bâ aye ti sioni so bê ti mbi ake ni si ala yeke sara ni na ndo so.” 10 Tongaso mbi lï na mbi bâ mara ti astatue nde nde ti anyama so ayeke hara harango nga na anyama so a nzere ti tene zo abâ ni pëpe+ nga na afungo yanda* ti azo ti Israël,+ so a kpaka adessin ni na terê ti mur ti da ni kue. 11 A-ancien 70 ti azo ti Israël ayeke luti na devant ti astatue ni, Jaazaniah molenge ti Shaphan+ ayeke na popo ti ala. Zo oko oko agbu kete ta ti zongo na dukane nga guru ti dukane ni so afun pendere ayeke monté na nduzu.+ 12 Tongaso, lo tene na mbi: “Molenge ti zo, mo bâ ye so a-ancien ti azo ti Israël ayeke sara na yâ ti vukongo ndo so? Zo oko oko na yâ ti kubu so ayanda ti lo ayeke dä. Ala yeke tene: ‘Jéhovah ayeke bâ e pëpe. Jéhovah azia kodro ni awe.’”+

13 Lo kiri lo tene na mbi: “Mo yeke bâ ande aye so bê ti mbi ake ni so ayeke tâ sioni mingi ahon ti so ala yeke sara so.” 14 Tongaso, lo gue na mbi na yanga ti da ti Jéhovah so ayeke na mbage ti nord. Kâ mbi bâ awali so ayeke duti na ayeke toto nzapa so a iri lo Tammuz.

15 Lo kiri lo tene na mbi: “Molenge ti zo, mo bâ ye so? Mo yeke bâ ande aye so bê ti mbi ake ni si ayeke tâ sioni mingi ahon asioni ye so ala yeke sara so.”+ 16 Tongaso, lo gue na mbi na yâ ti lacour ti da ti Jéhovah so ayeke na mbage ti yâ ni.+ Kâ, na yanga ti temple ti Jéhovah, na popo ti véranda na gbalaka ni, mbi bâ akoli 25 so atourné peko ti ala na temple ti Jéhovah, ala zia lê ti ala na mbage ti est, ala yeke kuku na gbe ti lâ na mbage ti est.+

17 Lo tene na mbi: “Molenge ti zo, mo bâ ye so? A yeke kete ye na lê ti azo ti Juda ti sara aye ti sioni tongaso? ala sara si kodro ni asi singo na sarango ye ti ngangu na zo,+ na ala ngbâ ti son bê ti mbi. Bâ ala yeke yôro maboko ti keke* na lê* ti mbi. 18 Ni la, mbi yeke sara ande ye na ala na ngonzo. Lê ti mbi ayeke duti ande na vundu pëpe nga mbi yeke bâ mawa ti ala pëpe.+ Atâa ala dekongo ngangu na mê ti mbi, mbi yeke mä ala pëpe.”+

9 Na pekoni, mbi mä lo dekongo na kota go, lo tene: “Iri ala so ayeke punir ande azo ti gbata ni, zo oko oko ayeke na ye ti bira ti lo na maboko ti lo ti futi ye na ni.”

2 Mbi bâ akoli omene alondo na mbage ti porte so ayeke na mbage ti nduzu+ so abâ ndo na mbage ti nord, zo oko oko ayeke na ye ti bira ti lo na maboko ti lo ti futi ye na ni. Mbeni koli ayeke na popo ti ala, lo yü bongo ti lin, lo yeke na kete ye ti ziango encre ti wakuasu na yâ ni na terê ti yâ ti lo, na ala lï ala luti na terê ti gbalaka ti cuivre.+

3 Na pekoni, gloire ti Nzapa ti Israël+ so aduti na ndö ti achérubin alondo ague aluti na ndö ti cadre ti yanga ti temple ni;+ Nzapa airi koli so ayü bongo ti lin si lo yeke na kete ye ti ziango encre ti wakuasu na yâ ni na terê ti yâ ti lo so. 4 Tongaso, Jéhovah atene na lo: “Mo hon na yâ ti gbata ni, na yâ ti Jérusalem, mo sara marque na ndö ti lê ti azo so ayeke toto nga ayeke dema+ ndali ti aye ti sioni kue so a yeke sara na yâ ti gbata ni.”+

5 Mbi mä lo sara tënë na atanga ni, lo tene: “Ala hon na yâ ti gbata ni na peko ti lo na ala fâ azo. Zia lê ti ala aduti na vundu pëpe nga ala bâ mawa ti zo oko pëpe.+ 6 Ala fâ mbakoro-koli, maseka-koli, maseka-wali so ade ti hinga koli pëpe, kete molenge nga na awali kue.+ Me, zo so marque ayeke na terê ti lo, ala ga nduru na lo pëpe.+ Ala komanse na ndo ti mbi so ayeke nzoni-kue.”+ Tongaso ala komanse na terê ti a-ancien so ayeke na devant ti da ni.+ 7 Na pekoni, lo tene na ala: “Ala sara si da ni aga sioni nga ala fâ azo gbani na yâ ti alacour ni.+ Ala gue!” Tongaso ala gue na ala fâ azo ti gbata ni.

8 Na ndembe so ala yeke fâ azo ni, a ngbâ gï mbi oko, na mbi kuku, mbi kpo li ti mbi na sese mbi dekongo: “Aï, Jéhovah, Seigneur ti dunia kue! Na ngoi so mo yeke tuku ngonzo ti mo na ndö ti Jérusalem, tanga ti azo ti Israël so angbâ mo yeke fâ ala kue?”+

9 Tongaso lo tene na mbi: “Sioni ti azo ti Israël nga na ti Juda ayeke tâ kota mingi.+ Tukungo mênë ahon ndö ti kodro ni awe+ nga sarango ye ti sioni asi singo na yâ ti gbata ni.+ Na ala tene: ‘Jéhovah azia kodro ni awe, Jéhovah ayeke bâ ndo pëpe.’+ 10 Me ti mbi, lê ti mbi ayeke duti ande na vundu pëpe nga mbi yeke bâ mawa ti ala pëpe.+ Mbi yeke sara ande si ye so ala sara akiri na ndö ti ala.”

11 Na pekoni, mbi bâ koli so ayü bongo ti lin nga na ye ti ziango encre na terê ti yâ ti lo so, lo ga lo fa peko ti ye so lo sara, lo tene: “Mbi sara gï tongana ti so mo hunda fade na mbi ti sara.”

10 So mbi ngbâ ti bâ ndo, mbi bâ na ndö ti ye so ayeke tongana lê ti nduzu si ayeke na ndö ti li ti achérubin ni so, mbeni ye so akpa tênë ti saphir, na bango ni akpa trône.+ 2 Tongaso Nzapa atene na koli so ayü bongo ti lin:+ “Mo lï na popo ti aroue ni so ayeke tourné so,+ na gbe ti achérubin ni, na mo fû lê ti wâ+ so ayeke na popo ti achérubin ni so asi yâ ti maboko ti mo use kue na mo tuku ni na ndö ti gbata ni.”+ Tongaso mbi bâ lo na lingo ni.

3 Na ngoi so koli ni alï na yâ ti dä ni, achérubin ni ayeke luti na terê ti temple ni na mbage ti koli, mbeni mbinda amû lê ti lacour so ayeke na mbage ti yâ ni. 4 Tongaso gloire ti Jéhovah+ alondo na ndö ti achérubin ni ague aluti na ndö ti cadre ti porte ti temple ni. Yeke na yeke mbinda ni+ asi yâ ti temple ni na zango ti gloire ti Jéhovah asi yâ ti lacour ni kue. 5 Na yâ ti lacour so ayeke na gigi, zo alingbi ti mä go ti totongo ti akpangbi* ti achérubin ni so atoto tongana go ti Nzapa so ngangu ti lo ahon angangu kue, na ngoi so lo yeke sara tënë.+

6 Na pekoni, Nzapa atene na koli so ayü bongo ti lin so: “Mo mû wâ so ayeke na popo ti aroue ni si ayeke nga na popo ti achérubin ni so.” Na lo lï lo luti na terê ti mbeni roue ni. 7 Tongaso mbeni chérubin ni ayôro maboko ti lo na mbage ti wâ ni so ayeke na popo ti achérubin ni so.+ Lo mû mbeni wâ ni lo zia na yâ ti maboko ti koli ni so use kue, koli so ayü bongo ti lin so.+ Koli ni amû ni na lo sigi. 8 Na gbe ti akpangbi* ti achérubin ni mbeni ye ayeke dä so akpa maboko ti zo.+

9 So mbi ngbâ ti bâ ndo, mbi bâ aroue osio na terê ti achérubin ni, chérubin oko oko ayeke na roue oko na terê ti lo. Na bango ni, aroue ni aza tongana tênë ti chrysolithe.+ 10 Aroue ni osio kue akpa terê. Na bango ni, mo bâ mo tene a mû roue oko a yôro na yâ ti mbeni. 11 Na ndembe so aroue ni ayeke hon, ala lingbi ti hon na acoin osio kue sân ti tourné, ndali ti so ala yeke mû gï peko ti ndo so face ti achérubin ni ayeke bâ ndo dä, aroue ni ayeke na bezoin ti tourné pëpe. 12 Terê ti achérubin ni kue, peko ti ala, maboko ti ala, akpangbi* ti ala, alê ayeke na terê ni kue. Ala osio kue ayeke na aroue na alê ayeke na terê ni kue.+ 13 Âdu ti aroue ni, mbi mä mbeni go so adi iri ti aroue ni atene: “Roue so atourné!”

14 Chérubin oko oko ayeke na aface osio. Kozo face ni ayeke face ti chérubin, use ni ayeke face ti zo, ota ni ayeke face ti bamara na osio ni ayeke face ti aigle.+

15 Achérubin ni alondo (a yeke a-oko créature so ayeke na fini so mbi bâ ala lani na yanga ti ngu ti Kébar).+ 16 Tongana achérubin ni ayeke hon, aroue ni ayeke hon legeoko na ala. Tongana ala yô akpangbi* ti ala ti londo na lê ti nduzu na ndö ti sese, aroue ni ayeke tourné pëpe nga ahon nde pëpe.+ 17 Na ngoi so ala luti, aroue ni nga aluti. Na ngoi so ala londo, aroue ni alondo legeoko na ala, ndali ti so yingo so ayeke sara kua na ndö ti acréature ni ayeke nga na yâ ti aroue ni.

18 Na pekoni, gloire ti Jéhovah+ alondo na ndö ti cadre ti porte ti temple ni ague aluti na ndö ti achérubin ni.+ 19 Mbi bâ achérubin ni ayô akpangbi* ti ala na ala londo na ndö ti sese. Na ngoi so ala yeke hon, aroue ni ayeke nga na terê ti ala. Ala luti na yanga ti porte ti mbage ti est ti da ti Jéhovah, na gloire ti Nzapa ti Israël ayeke na ndö ti ala.+

20 A yeke acréature so ayeke na fini so mbi bâ ala lani na gbe ti Nzapa ti Israël na yanga ti ngu ti Kébar+ so la, ge la mbi ga ti hinga so ayeke achérubin la. 21 Ala osio kue ayeke na aface osio, akpangbi* osio nga mbeni ye so akpa amaboko ti zo ayeke na gbe ti akpangbi ti ala.+ 22 Na bango aface ti ala, a kpa aface so mbi bâ lani na yanga ti ngu ti Kébar so.+ Ala oko oko kue ague gï droit na devant ti ala.+

11 Yingo amû mbi ague na mbi na yanga ti porte ti da ti Jéhovah so ayeke na mbage ti est.+ Kâ, na yanga ti porte ni, mbi bâ akoli 25 so na popo ti ala a yeke wara Jaazaniah, molenge ti Azzur nga na Pélatiah molenge ti Bénaïah. Ala yeke amokonzi na ndö ti azo ni.+ 2 Tongaso Nzapa atene na mbi: “Molenge ti zo, akoli so ayeke azo so ayeke gbu li na ndö ti asioni ye nga so ayeke mû asioni wango na yâ ti* gbata so. 3 Ala yeke tene: ‘So ngoi ti lekengo ada la ape?+ Gbata ni* ayeke tawa ti tongo kobe,*+ na e yeke nyama ni.’

4 “Tongaso, tene prophétie ti ngbanga na ndö ti azo ni. Molenge ti zo,+ mo tene prophétie.”

5 Na pekoni, yingo ti Jéhovah aga na ndö ti mbi,+ na Nzapa atene na mbi: “Tene na ala mo tene, ‘Bâ tënë so Jéhovah atene la: “Ala, azo ti Israël, tënë so ala tene so ayeke tâ tënë, na mbi hinga ye so ala yeke gbu li ti ala na ndö ni so.* 6 Ala sara si azo mingi akui na yâ ti gbata ni nga ndö ti alege ni asi singo na akuâ.”’”+ 7 “Ni la, bâ tënë so Jéhovah, Seigneur ti dunia kue, atene la: ‘Akuâ so ala tuku angoro gbata ni ayeke nyama ni, gbata ni ayeke tawa ti tongo kobe ni.+ Me ti ala, a yeke zi ala na yâ ti gbata ni ti hon na ni.’”

8 “Jéhovah, Seigneur ti dunia kue, atene: ‘Ala sara mbeto ti épée,+ mbi yeke sara si épée aga na terê ti ala. 9 Mbi yeke zi ala na yâ ti gbata ni ti gue ti zia ala na maboko ti awande na mbi yeke fâ ngbanga na ndö ti ala.+ 10 Ala yeke kui kuâ ti épée.+ Mbi yeke fâ ngbanga na ndö ti ala na katikati ti Israël+ nga ala yeke hinga so mbi yeke Jéhovah.+ 11 Gbata ni ayeke duti ande tawa ti tongo kobe ndali ti ala pëpe, na ala yeke duti ande nyama so ayeke na yâ ni so pëpe. Mbi yeke fâ ande ngbanga ti ala na katikati ti Israël, 12 ala yeke hinga ande so mbi yeke Jéhovah. Ala tambela alingbi na andia ti mbi pëpe nga ala bata ambela ti mbi pëpe,+ me ala sara ye alingbi gï na ambela ti amara so angoro ala.’”+

13 Gï so mbi fa tënë ti prophétie ni, Pélatiah molenge ti Bénaïah akui. Tongaso mbi kuku, mbi kpo li ti mbi na sese na mbi dekongo na kota go, mbi tene: “Aï Jéhovah, Seigneur ti dunia kue, tanga ti azo ti Israël so angbâ so mo yeke futi ala kue?”+

14 Jéhovah akiri asara tënë na mbi, atene: 15 “Molenge ti zo, azo ti Jérusalem atene na afami ti mo, ala so ayeke na droit ti vo sese na place ti mo, nga na azo ti Israël kue, ala tene: ‘Ala duti yongoro na Jéhovah. Kodro ni ayeke ti e. A mû ni na e awe.’ 16 Tongaso mo tene na ala: ‘Bâ tënë so Jéhovah, Seigneur ti dunia kue, atene la: “Atâa so mbi zi ala na popo ti amara mbi zia ala yongoro nga mbi kangbi ala kirikiri na yâ ti akodro ni so,+ me na yâ ti kete ngoi mbi yeke ga ande mbeni ndo so ayeke nzoni-kue ndali ti ala na yâ ti akodro so ala gue dä so.”’+

17 “Tongaso mo tene na ala: ‘Bâ tënë so Jéhovah, Seigneur ti dunia kue, atene la: “Mbi yeke gue ti mû ande ala na tïtî amara nga na yâ ti akodro so a kangbi ala kirikiri na yâ ni, mbi yeke bungbi ala ndo oko ti mû na ala kodro ti Israël.+ 18 Ala yeke kiri ande na yâ ti kodro ni na ala yeke zi na yâ ni aye ti saleté kue nga na asarango ye kue so mbi ke.+ 19 Mbi yeke sara ande si bê ti ala aga oko+ nga mbi yeke zia mbeni fini yingo na yâ ti ala.+ Mbi yeke zi bê ti ala so akpengba tongana tênë so,+ na mbi yeke mû na ala bê so awoko,*+ 20 si ala lingbi ti tambela alingbi na andia ti mbi na ala bata ambela ti mbi na ala sara ye alingbi na ni. Na pekoni, ala yeke ga azo ti mbi na mbi yeke ga Nzapa ti ala.”’

21 “‘Jéhovah, Seigneur ti dunia kue, atene: “Me ti ala so bê ti ala angbâ ti tomba peko ti aye ti saleté ti ala nga na aye so mbi ke, mbi yeke sara ande si ye so ala sara akiri na ndö ti ala.”’”

22 Achérubin ni ayô kpangbi* ti ala na nduzu, aroue ni ayeke tâ nduru na terê ti ala+ nga gloire ti Nzapa ti Israël ayeke na ndö ti ala.+ 23 Na pekoni, gloire ti Jéhovah+ alondo na yâ ti gbata ni ague aluti na ndö ti hoto, na mbage ti est ti gbata ni.+ 24 Na pekoni, yingo amû mbi (na yâ ti mbeni vision so alondo na yingo ti Nzapa) ague na mbi na popo ti azo so ayeke na ngbâa na Chaldée so. Na pekoni, vision so mbi bâ ni so ahunzi. 25 Mbi komanse ti fa peko ti aye so Jéhovah afa na mbi so na azo so ayeke na ngbâa so.

12 Jéhovah akiri asara tënë na mbi, atene: 2 “Molenge ti zo, mo yeke sara kodro na popo ti azo so li ti ala akpengba. Ala yeke na lê me ala yeke bâ ndo pëpe, ala yeke na mê me ala mä ndo na ni pëpe,+ biani ala yeke azo ti kpengba-li.+ 3 Âdu ti mo, molenge ti zo, mo kanga kungba ti mo mo bâ mo tene a forcé mo ti gue na mbeni kodro nde. Na pekoni, na kota lâ, na lê ti azo ni mo gue na mbeni ndo nde. Na lê ti ala, mo zia da ti mo, mo gue na mbeni ndo nde. Peut-être ala yeke gbu nda ti ye so mo yeke sara so, atâa so ala yeke azo ti kpengba-li. 4 Na kota lâ na lê ti ala, mo sigi na kungba ti mo ni so mo kanga ni fade mo bâ mo tene a forcé mo ti gue na mbeni kodro nde so. Na lakui, na lê ti ala mo hon tongana mbeni zo so a forcé lo ti gue na mbeni kodro nde.+

5 “Na ngoi so ala yeke bâ mo, mo kôro mbeni dû na yâ ti mur na mo yôro akungba ti mo na lê ni asigi.+ 6 So ala yeke bâ mo so, mo yô kungba ti mo na ndö ti go ti mo mo sigi na yâ ti vukongo ndo mo hon. Mo bi mbeni ye na li ti mo si mo bâ sese ni pëpe, mbi yeke sara si mo ga tongana mbeni tapande ndali ti azo ti Israël.”+

7 Tongaso, mbi sara gï tongana ti so a tene na mbi. Na kota lâ, mbi mû akungba ti mbi mo bâ mo tene a forcé mbi ti gue na mbeni kodro nde. A si na lakui, mbi kôro mbeni dû na yâ ti mur na maboko ti mbi. Tongana ndo avuko, mbi sigi na akungba ti mbi na lê ti dû ni na mbi yô ni na ndö ti go ti mbi na lê ti ala.

8 Na ndapre, Jéhovah akiri asara tënë na mbi, atene: 9 “Molenge ti zo, azo ti Israël, azo ti kpengba-li so, ahunda mo fade pëpe, atene, ‘Nyen la mo yeke sara so?’ 10 Mo tene na ala: ‘Bâ tënë so Jéhovah, Seigneur ti dunia kue, atene la: “Tënë so abâ mokonzi+ so ayeke na Jérusalem nga azo ti Israël kue so ayeke na yâ ti gbata ni.”’

11 “Mo tene na ala: ‘Mbi yeke ga tongana mbeni tapande ndali ti ala.+ Mara ti ye so mbi sara so, ni la ayeke ga ande na ndö ti ala. A yeke gbu ala ande ti gue na ala na ngbâa na kodro-wande.+ 12 Mokonzi so ayeke na popo ti ala, lo yeke yô ande kungba ti lo na ndö ti go ti lo na lo yeke hon na yâ ti vukongo ndo. Lo yeke kôro ande dû na yâ ti mur si lo yôro akungba ti lo ti tene asigi na lê ti dû ni.+ Lo yeke bi ye na li ti lo si lo bâ sese ni pëpe.’ 13 Mbi yeke bi gbanda ti mbi na ndö ti lo na a yeke gbu lo.+ Na pekoni mbi yeke gue na lo na Babylone, na kodro ti azo ti Chaldée, me lo yeke bâ kodro ni pëpe. Lo yeke kui kâ.+ 14 Azo kue so angoro lo, azo so amû maboko na lo nga na aturugu ti lo, mbi yeke kangbi ala kirikiri.+ Mbi yeke gboto ande épée ti tomba peko ti ala.+ 15 Na ngoi so mbi yeke kangbi ala kirikiri na popo ti amara nga na yâ ti akodro ni, ala yeke hinga ande so mbi yeke Jéhovah. 16 Me mbi yeke zia ande si mbeni kete mbage ti ala angbâ, ala yeke kui pëpe kuâ ti épée, ti kota nzara nga na ti sioni kobela so amû ndo, tongaso si ala fa na amba ti ala peko ti aye ti sioni so asi na ala na popo ti amara so a gue na ala na popo ti ala; na ala yeke hinga ande so mbi yeke Jéhovah.”

17 Jéhovah akiri asara tënë na mbi, lo tene: 18 “Molenge ti zo, mo yeke dö na mbeto na ngoi so mo te kobe ti mo, mo yeke duti kpô pëpe nga mo yeke gi bê ti mo na ngoi so mo yeke nyon ngu ti mo.+ 19 Mo tene na azo ti kodro ni: ‘Bâ tënë so Jéhovah, Seigneur ti dunia kue, atene na azo ti Jérusalem na sese ti Israël la: “Ala yeke gi bê ti ala na ngoi so ala yeke te kobe ti ala, nga a yeke na yâ ti kota mbeto si ala yeke nyon ngu ti ala, ngbanga ti so sese ti ala ayeke buba ande kue+ ndali ti aye ti ngangu so azo so alango na yâ ti kodro ni ayeke sara na amba ti ala.+ 20 Agbata so azo alango na yâ ni so a yeke futi ni ande kue,+ na sese ni ayeke ngbâ senge. Ala yeke hinga so mbi yeke Jéhovah.”’”+

21 Jéhovah akiri asara tënë na mbi, atene: 22 “Molenge ti zo, azo ayeke tene mato so na Israël, ala tene: ‘Alango ayeke hon, me avision kue ayeke ga tâ tënë pëpe.’ So mato ti nyen la?+ 23 Tongaso, mo tene na ala: ‘Bâ tënë so Jéhovah, Seigneur ti dunia kue, atene la: “Mbi yeke sara ande si tënë ti mato ni so akaï na yanga ti ala, na zo ayeke tene mato so na Israël mbeni pëpe.”’ Mo tene na ala: ‘Alango ni ayeke pusu nduru+ so avision kue ayeke ga tâ tënë.’ 24 Vision ti mvene nga na mbadi so a sara ni gï ti nzere* na azo ayeke duti ande na popo ti azo ti Israël mbeni pëpe.+ 25 “Jéhovah, Seigneur ti dunia kue, atene: ‘Mbi, Jéhovah, mbi yeke sara tënë ande. Tënë kue so mbi tene, ye ni ayeke si, a yeke ku kungo pëpe.+ Ala azo ti kpengba-li so, a yeke na ngoi ti ala+ la si mbi yeke sara mbeni tënë, na mbi yeke sara ye alingbi na ni.’”

26 Jéhovah akiri asara tënë na mbi, atene: 27 “Molenge ti zo, azo* ti Israël ayeke tene: ‘Vision so lo bâ so ayeke si fafadeso pëpe. Lo yeke fa tënë ti mbeni prophétie so angbâ ayo mingi.’+ 28 Tongaso mo tene na ala: ‘Bâ tënë so Jéhovah, Seigneur ti dunia kue, atene la: “Tënë kue so mbi tene, ye ni ayeke si, a yeke ku kungo pëpe. Tënë ti yanga ti mbi kue ayeke ga tâ tënë.” So tënë ti yanga ti Jéhovah, Seigneur ti dunia kue, la.’”

13 Jéhovah akiri asara tënë na mbi, atene: 2 “Molenge ti zo, tene prophétie ti ngbanga na ndö ti aprophète ti Israël.+ Sara tënë na ala so asigi na aprophétie ti li ti ala wani,*+ mo tene: ‘Ala mä tënë so Jéhovah atene. 3 Bâ tënë so Jéhovah, Seigneur ti dunia kue, atene la: “Mawa na aprophète ti buba so amû peko ti tënë ti bê ti ala, andâ ala bâ ye oko pëpe.+ 4 Mo Israël, aprophète ti mo aga tongana ambo ti ngonda* na popo ti afango da. 5 Ala yeke gue ande pëpe na terê ti adû ti amur ti tênë ti kiri ti leke ni ndali ti azo ti Israël,+ tongaso si Israël angbâ ti gbu lê ni na bira na lâ ti Jéhovah.”+ 6 “Ala bâ avision ti mvene na ala yeke fa tënë ti mvene na ndö ti ye so ayeke si kekereke, ala tene: ‘Jéhovah atene,’ andâ Jéhovah atokua ala pëpe, na ala yeke ku ti tene tënë ti ala ni aga tâ tënë.+ 7 So vision ti mvene la ala bâ so ape? Na a yeke mvene la ala tene tongana ala sara tënë ti ye so ayeke si ande kekereke ala tene: ‘Jéhovah atene,’ andâ mbi sara ti mbi mbeni tënë oko pëpe.”’

8 “‘Tongaso, bâ tënë so Jéhovah, Seigneur ti dunia kue, atene la: “‘So ala yeke tene tënë ti mvene nga avision so ala yeke bâ ayeke avision ti mvene, ni la mbi ke ala.’ Tënë ti yanga ti Jéhovah, Seigneur ti dunia kue, la.”+ 9 Maboko ti mbi ayeke londo ande ti sara sioni na aprophète so ayeke bâ avision ti mvene nga so ayeke tene mvene na ndö ti ye so ayeke si kekereke.+ Ala yeke ngbâ ande pëpe na popo ti azo ti mbi so mbi ye ala mingi, nga a yeke sû iri ti ala ande pëpe na yâ ti mbeti so a yeke sû ka iri ti azo ti Israël dä so. Ala yeke kiri ande na kodro ti Israël pëpe na ala yeke hinga so mbi yeke Jéhovah, Seigneur ti dunia kue.+ 10 Aye so kue ayeke si na ala ndali ti so ala sara si azo ti mbi ahon yongoro, na lege so ala yeke tene na azo ni atene: “Siriri ayeke dä!” andâ siriri ayeke dä pëpe.+ Na ngoi so a sara mbeni mur so akpengba pëpe ti kangbi yâ ti ndo ni, ala sara ti ala mbamba* na terê ti mur ni.’+

11 “Tene na ala so ayeke sara mbamba na terê ti mur ni so, mo tene, mur ni ayeke tuku ande. Mbeni kota ngu-nzapa ayeke ga ande, aglason* ayeke tuku nga kota pupu ayeke kungbi mur ni na sese.+ 12 Na ngoi so mur ni ayeke tuku, ala yeke hunda ndo ande, atene: ‘Ye so ala sara na terê ti mur ni so ayeke na ndo wa?’+

13 “Tongaso, bâ tënë so Jéhovah, Seigneur ti dunia kue, atene la: ‘Na yâ ti ngonzo ti mbi, mbi yeke sara si kota pupu aga, na kota ngu apika, nga na yâ ti kota ngonzo ti mbi aglason ayeke futi ala. 14 Mbi kungbi mur so ala sara mbamba na terê ni so, mbi yeke kinda ni na sese, na fondation ni ayeke ngbâ ande senge. Na ngoi so gbata ni ayeke tuku, ala yeke kui na yâ ni. Ala yeke hinga so mbi yeke Jéhovah.’

15 “‘Na ngoi so mbi yeke tuku ngonzo ti mbi kue na ndö ti mur ni nga na ndö ti ala so asara mbamba na terê ni so, mbi yeke tene ande na ala, mbi tene: “Mur ni ayeke dä mbeni pëpe nga ala so asara mbamba na terê ni so ayeke dä mbeni pëpe.+ 16 Aprophète ti Israël, ala so atene prophétie na ndö ti Jérusalem na so abâ avision so atene siriri ayeke na yâ ti kodro ni andâ siriri ayeke dä pëpe so, ala yeke dä mbeni pëpe.”’+ So tënë ti yanga ti Jéhovah, Seigneur ti dunia kue, la.

17 “Âdu ti mo, molenge ti zo, mo bâ ndo na mbage ti amolenge-wali ti mara ti mo so asigi na aprophétie ti li ti ala wani so na mo tene prophétie ti ngbanga na ndö ti ala. 18 Mo tene na ala: ‘Bâ tënë so Jéhovah, Seigneur ti dunia kue, atene la: “Mawa na ala, ala awali so ayeke fü ayanga ti bongo ti tene zo ayü na maboko ti lo so,* na ala yeke fü asiriki ndali ti mara ti konongo ti li ti azo nde nde ti tene ala gbu na fini* ti azo tongana ti so a gbu na anyama so. Ala yeke gi ti gbu fini* ti azo ti mbi tongana ti so azo ayeke gbu na anyama? Na ala yeke gi ti bata gï fini* ti ala wani? 19 Ala yeke bi nengo ti mbi na sese na popo ti azo ti mbi ndali ti orge so zo afû asi yâ ti maboko ti lo nga ndali ti nduru mapa?+ Nga ala yeke fâ ala* so alingbi fade ti kui pëpe na ala yeke bata na fini ala* so alingbi fade ti ngbâ na fini pëpe. Ala sara tongaso na lege ti amvene so ala yeke tene na azo ti mbi so ayeke mä amvene ti ala ni so.”’+

20 “Tongaso, bâ tënë so Jéhovah, Seigneur ti dunia kue, atene la: ‘Ala, awali, mbi ke tënë ti ayanga ti bongo so ala yeke mû ni ti gi ti gbu na azo* so, mo bâ mo tene azo ni ayeke andeke nga mbi yeke ayanga ti bongo ni so na terê ti amaboko ti ala na mbi yeke zi azo so ala yeke gi ti gbu ala tongana andeke. 21 Mbi yeke gboto asiriki ti ala ni na mbi yeke zi azo ti mbi na maboko ti ala. Azo ti mbi ayeke duti encore ape tongana anyama so ala gbu. Ala yeke hinga so mbi yeke Jéhovah.+ 22 Na lege ti mvene ti ala, ala sara si bê ti zo ti mbilimbili anze,+ andâ mbi la mbi sara si vundu asara lo pëpe, na ala sara si zo ti sioni awara ngangu,+ tongaso si lo zia sioni lege ti lo pëpe na lo ngbâ na fini.+ 23 Ni la, ala awali ni, ala yeke bâ ande avision ti mvene ni so mbeni pëpe nga ala yeke ngbâ ti sara mbadi+ mbeni pëpe. Mbi yeke zi ande azo ti mbi na maboko ti ala, na ala yeke hinga so mbi yeke Jéhovah.’”

14 Ambeni ancien ti Israël aga aduti na gbele mbi.+ 2 Na pekoni, Jéhovah atene na mbi: 3 “Molenge ti zo, akoli so aleke na bê ti ala awe ti mû gï peko ti afungo yanda* ti ala, nga ala zia mbeni ye na gbele azo ni ti pusu ala ti sara siokpari. Mbi yeke zia lege na ala ti hunda tënë na mbi tongana nyen?+ 4 Tongaso tene na ala mo tene: ‘Bâ tënë so Jéhovah, Seigneur ti dunia kue, atene la: “Tongana mbeni zo ti Israël aleke na bê ti lo awe ti mû peko ti afungo yanda ti lo na lo zia mbeni ye na gbele azo ni ti pusu ala ti sara siokpari, si na pekoni lo ga ti hunda tënë na mbeni prophète, mbi Jéhovah mbi yeke kiri tënë ande na lo na mbeni lege so alingbi na gbâ ti afungo yanda ti lo ni. 5 Mbi yeke zia ande kota mbeto na yâ ti bê ti azo ti Israël, ndali ti so ala kue azi terê ti ala na mbi na ala gue na peko ti afungo yanda ti ala.”’+

6 “Tongaso mo tene na azo ti Israël, mo tene: ‘Bâ tënë so Jéhovah, Seigneur ti dunia kue, atene la: “Ala kiri na mbi, ala dö lege ti afungo yanda ti ala ala zia nga ala tourné lê ti ala yongoro na aye ti sioni kue so ala sara.+ 7 Tongana mbeni zo ti Israël wala mbeni wande so asara kodro na popo ti ala adö mbi azia na lo leke na bê ti lo ti mû peko ti afungo yanda ti lo nga lo zia na gbele azo ni mbeni ye ti pusu ala ti sara siokpari si na pekoni lo ga ti hunda tënë na prophète ti mbi,+ mbi Jéhovah wani la mbi yeke kiri tënë ande na lo. 8 Mbi yeke zia lê ti mbi na ndö ti zo so ti fâ ngbanga na li ti lo, mbi yeke sara si lo ga tongana mbeni tapande ndali ti amba ti lo nga lo yeke ga tongana mbeni tënë ti mato, mbi yeke futi lo.+ Ala yeke hinga so mbi yeke Jéhovah.”’

9 “‘Me tongana a handa prophète ni si lo kiri tënë, andâ mbi Jéhovah la mbi handa prophète so.+ Na pekoni, mbi yeke yôro maboko ti mbi na terê ti prophète so ti sara sioni na lo nga ti zi lo na popo ti azo ti mbi, azo ti Israël. 10 Ala yeke yô siokpari ti ala na ndö ti ala. Siokpari ti zo so ayeke gue ande ti hunda tënë na prophète ni ayeke duti legeoko na siokpari ti prophète ni, 11 tongaso si azo ti Israël azia ti hon yongoro na mbi nga ala zia ti sara si terê ti ala aga sioni ndali ti akengo ndia kue so ala ke. Ala yeke ga azo ti mbi na mbi yeke ga Nzapa ti ala.’+ Tënë ti yanga ti Jéhovah, Seigneur ti dunia kue, la.”

12 Jéhovah akiri asara tënë na mbi, lo tene: 13 “Molenge ti zo, tongana mbeni kodro asara siokpari na terê ti mbi na lege so lo duti be-ta-zo na mbi pëpe, mbi yeke yôro maboko ti mbi na terê ti kodro ni ti fâ ngbanga na ndö ni, nga mbi yeke futi ande gogoro ti kobe ti lo,*+ na mbi yeke tokua kota nzara na ndö ti kodro ni+ si afuti azo nga na anyama na yâ ti kodro ni.”+ 14 “‘Même tongana akoli ota so, Noé,+ Daniel+ na Job+ ayeke fade na yâ ti kodro ni, ala yeke wara lege ti sö ande gï fini ti ala* wani ndali ti mbilimbili so ala sara.’+ Tënë ti yanga ti Jéhovah, Seigneur ti dunia kue, la.”

15 “‘Na tapande, tongana mbi sara si ambeni sioni nyama ti ngonda ahon na yâ ti kodro ni afâ azo ti yâ ti kodro ni kue* na ala sara si kodro ni abuba biani biani, na zo alingbi ti hon na yâ ni pëpe ndali ti anyama ni so,+ 16 mbi so mbi yeke na fini, mbi deba yanga, mbi tene, même tongana akoli ota so ayeke fade na yâ ti kodro ni, ala yeke sö fini ti amolenge ti ala ti koli pëpe wala ti wali pëpe. Ala yeke sö gï fini ti ala wani, na kodro ni ayeke buba biani biani.’ Tënë ti yanga ti Jéhovah, Seigneur ti dunia kue, la.”

17 “‘Na tapande, tongana mbi ga na épée na ndö ti kodro ni+ si mbi tene: “Zia épée ahon na yâ ti kodro ni kue,” na a fâ azo na anyama kue,+ 18 même tongana akoli ota so ayeke fade na yâ ti kodro ni, mbi so mbi yeke na fini, mbi deba yanga, mbi tene, ala yeke sö fini ti amolenge ti ala ti koli wala ti wali pëpe. Ala yeke sö gï fini ti ala wani.’ Tënë ti yanga ti Jéhovah, Seigneur ti dunia kue, la.”

19 “‘Na tapande, tongana mbi tokua na yâ ti kodro ni sioni kobela so amû ndo nga mbi tuku ngonzo ti mbi na ndö ti kodro ni+ ti futi azo nga na anyama kue na yâ ti kodro ni na sarango si mênë atuku, 20 mbi so mbi yeke na fini, mbi deba yanga, mbi tene, même tongana Noé,+ Daniel+ na Job+ ayeke fade na yâ ti kodro ni, ala yeke sö fini ti amolenge ti ala ti koli wala ti wali pëpe. Ala yeke sö gï fini ti ala* wani ndali ti mbilimbili so ala sara.’ Tënë ti yanga ti Jéhovah, Seigneur ti dunia kue, la.”+

21 “Bâ tënë so Jéhovah, Seigneur ti dunia kue, atene la: ‘Ye ni ayeke si ande tongaso na ngoi so mbi yeke tokua asioni ye osio*+ so na ndö ti Jérusalem: épée, kota nzara, asioni nyama ti ngonda na sioni kobela so amû ndo,+ ti futi azo nga na anyama na yâ ti gbata ni.+ 22 Me tanga ti azo so ayeke ngbâ na yâ ti gbata ni ayeke sö kuâ ande, na a yeke hon na ala,+ amolenge ti koli na ti wali. Azo ni so ayeke ga na mbage ti ala, na tongana ala bâ duti ti azo ni nga na sarango ye ti terê ti ala, bê ti ala ayeke dë ndali ti aye ti sioni so mbi ga na ni na ndö ti Jérusalem nga na ndö ti aye kue so mbi sara na Jérusalem.’”

23 “‘Tongana ala bâ duti ti azo ni nga na sarango ye ti terê ti ala, bê ti ala ayeke dë nga ala yeke hinga so a yeke senge senge pëpe la si mbi sara ye tongaso na Jérusalem.’+ Tënë ti yanga ti Jéhovah, Seigneur ti dunia kue, la.”

15 Jéhovah akiri asara tënë na mbi, lo tene: 2 “Molenge ti zo, keke ti vigne alingbi ti haka terê ti lo na mbeni keke wala ti haka terê ti lo na mbeni maboko ti keke ti gbako tongana nyen? 3 A lingbi ti mû maboko ti keke ti vigne ti sara na mbeni kua? Wala azo ayeke mû mbeni keke ni ti leke na piquet ti croché na akungba na nduzu? 4 Bâ, a yeke bi ni na lê ti wâ, wâ ayeke te ali ti keke ni use kue na agbi milieu ni nga. A lingbi ti mû ni ti sara na mbeni kua nde? 5 So lani keke ni angbâ na ngbongboro ni kue zo a lingbi ti sara mbeni kua oko na ni pëpe so, si fadeso wâ ate ni na agbi awe so, a yeke sara kua na ni tongana nyen?”

6 “Bâ tënë so Jéhovah, Seigneur ti dunia kue, atene la: ‘Tongana ti so mbi mû keke ti vigne na popo ti akeke ti gbako ti tene a sara na wâ, mbi yeke sara ande nga tongaso na azo ti Jérusalem.+ 7 Mbi yeke zia lê ti mbi na ndö ti azo ni ti fâ ngbanga na ndö ti ala. Ala sigi na yâ ti wâ ni me wâ ayeke gbi ala ande. Na ngoi so mbi yeke zia lê ti mbi na ndö ti ala ti fâ ngbanga na li ti ala, ala yeke hinga ande so mbi yeke Jéhovah.’”+

8 “‘Mbi yeke sara ande si kodro ni aga mbeni ndo so abuba kue awe+ ndali ti so ala duti be-ta-zo na mbi pëpe.’+ Tënë ti yanga ti Jéhovah, Seigneur ti dunia kue, la.”

16 Jéhovah akiri asara tënë na mbi, atene: 2 “Molenge ti zo, mo fa na Jérusalem tënë ti aye ti sioni so lo sara.+ 3 Mo tene: ‘Bâ tënë so Jéhovah, Seigneur ti dunia kue, atene na Jérusalem la: “Ndo so mo londo dä nga na ndo so a dü mo dä ayeke na kodro ti azo ti Canaan. Babâ ti mo ayeke lani zo ti mara ti Amori+ na mama ti mo ayeke zo ti mara ti Heth.+ 4 Na lango so a dü mo, a fâ kamba ti turungu ti mo pëpe. A sukula mo na ngu ti zi saleté na terê ti mo pëpe. A kpaka ingo na terê ti mo pëpe nga a roulé mo na bongo pëpe. 5 Zo ti bâ vundu ti mo ti sara na mo aye so ayeke dä pëpe. Zo oko abâ mawa ti mo pëpe. Me a bi mo na yâ ti benyama ndali ti so na lango so a dü mo a ke mo* awe.

6 “‘“Na ngoi so mbi yeke hon, mbi bâ mo yeke lango na yâ ti mênë ti mo na mo yeke kpaka terê ti mo na yâ ni. Tongaso mbi tene na mo: ‘Zia mo ngbâ na fini!’ Ti tâ tënë ni, na ngoi so mo ngbâ ti lango na yâ ti mênë ti mo, mbi tene na mo: ‘Zia mo ngbâ na fini!’ 7 Mbi sara si mo ga gbani, legeoko tongana apere so angbâ ti sigi na benyama, tongaso mo kono, mo maï na mo yü aye ti pendere na terê ti mo. Me ti mo aluti nzoni na kuä ti li ti mo asigi pendere, me terê ti mo ayeke senge na gigi.”’

8 “‘Na ngoi so mbi yeke hon, mbi bâ mo na mbi bâ so mo ga wali awe ti tene koli aye mo. Tongaso mbi bi bongo* ti mbi na ndö ti mo+ na mbi kanga terê ti mo so ayeke senge so, mbi deba yanga nga mbi te mbele na mo si mo ga ti mbi.’ Tënë ti yanga ti Jéhovah, Seigneur ti dunia kue, la. 9 Tongaso mbi sukula mo na ngu, mbi zi mênë so ayeke na terê ti mo nga mbi sara mafuta na terê ti mo.+ 10 Na pekoni, mbi yü na mo bongo so a kpo apendere dessin na terê ni na mbi mû na mo poro so a leke ni na pendere poro ti terê ti nyama.* Mbi roulé mo na pendere bongo ti lin na mbi yü na mo bongo ti nginza. 11 Mbi yü na mo aye ti baba, mbi yü na mo ye ti maboko nga na ye ti go. 12 Na pekoni, mbi zia bague na hôn ti mo, mbi yü na mo ye ti mê nga mbi zia pendere couronne na li ti mo. 13 Mo yeke sara pendere na terê ti mo na ye ti lor nga na argent. Mo yü nga pendere bongo ti lin, bongo ti nginza so a kpo pendere dessin na terê ni. Kobe ti mo ayeke pendere farine, mafuta ti otoro nga na mafuta. Mo kono juska mo ga tâ pendere mingi+ na mo kpa zo so alingbi ti ga mbeni gbia-wali.’”*

14 “‘Ndali ti pendere ti mo, iri ti mo akomanse ti wu na popo ti amara.+ Mo yeke lani pendere mingi ngbanga ti so gloire ti mbi ayeke na ndö ti mo.’+ Tënë ti yanga ti Jéhovah, Seigneur ti dunia kue, la.”

15 “‘Me mo komanse ti zia bê ti mo gï na ndö ti pendere ti mo+ na mo ga wali-ndumba ndali ti iri ti mo so awu.+ A nzere na mo mingi ti sara ndumba na azo kue so ayeke hon na lege,+ na pendere ti mo aga ti ala. 16 Mo mû ambeni bongo ti mo mo leke na mbeni pendere ndo na nduzu so mo yeke sara ndumba na yâ ni.+ Mara ti ye tongaso adoit fade ti duti dä pëpe nga a lingbi a si fade pëpe. 17 Mo mû nga apendere bijou* ti mo so a sara ni na lor nga na argent so mbi mû lani na mo so, mo leke na astatue ti akoli* na mo sara ndumba na ala.+ 18 Mo mû nga abongo ti mo so a kpo dessin na terê ni so, mo roulé na ala.* Mo mû mafuta ti mbi nga na dukane ti mbi mo mû na sandaga na ala.+ 19 Mo mû mapa so mbi mû na mo, mapa so a sara ni na pendere farine, senge mafuta, mafuta ti otoro so mbi mû ni na mo ti tene mo te, mo mû na sandaga na ala ti tene fion ni anzere na ala.*+ A yeke tâ ye so asi lani la.’ Tënë ti yanga ti Jéhovah, Seigneur ti dunia kue, la.”

20 “‘Mo yeke mû amolenge ti mo ti koli na ti wali so mo dü na mbi so,+ mo mû ala na sandaga na ayanda so ti tene ala te ala.+ Sarango ndumba ti mo ni ahon tâ ndö ni awe la ape? 21 Mo fâ amolenge ti mbi ti koli, mo gbi ala na wâ ti yâa ala na sandaga.+ 22 Na ngoi so mo yeke bi terê ti mo na yâ ti asioni ye kue so mo sara nga na sarango ndumba ti mo, mo dabe ti mo na ngoi so mo de lani maseka so pëpe, so lani terê ti mo ayeke senge na gigi si mo yeke kpaka terê ti mo na yâ ti mênë ti mo wani so. 23 Na peko ti asioni kue so mo sara so, mawa na mo, mawa na mo.’+ Tënë ti yanga ti Jéhovah, Seigneur ti dunia kue, la. 24 ‘Mo leke mbeni koto nga mbeni ndo ti mo so ayeke na nduzu na ando kue so azo ayeke gue ka dä mingi. 25 Na ando so iri ni awu mingi na so ayeke na terê ti alege kue so azo ayeke gue dä mingi, mo leke ando ti mo so ayeke na nduzu na mo sara si pendere ti mo aga mbeni ye ti sioni na lege so mo zia terê* ti mo na azo kue so ayeke hon na lege,+ na mo kiri mo sara ndumba ni ahon ndö ni.+ 26 Mo sara ndumba na azo ti Égypte,+ avoizin ti mo so nzara ti terê ti ala ahon ndö ni, na mo son bê ti mbi na asarango ndumba ti mo so a lingbi ti diko wungo ni pëpe so. 27 Fadeso mbi yeke yôro maboko ti mbi na terê ti mo ti fâ ngbanga na ndö ti mo na mbi yeke zi mbeni mbage ti kobe ti mo ti tengo ni.+ Mbi yeke zia mo na maboko ti awali so ake mo si ala sara ye ti bê ti ala na mo,+ amolenge-wali ti mara ti Philistie so mo zia kamene na lê ti ala ndali ti lango-sioni ti mo so.+

28 “‘So nzara ti sarango ndumba ni angbâ na yâ ti mo so, mo kiri mo sara ndumba na amolenge ti Assyrie,+ me na peko ti so mo sara ndumba na ala awe, kue so ade alingbi mo pëpe. 29 Tongaso, mo kiri mo sara ndumba ti mo ni ahon ndö ni, mo gue na ni na mbage ti azo ti dengo buze,* na mbage ti azo ti Chaldée,+ me so kue nzara ti ndumba ni angbâ na yâ ti mo.’ 30 Jéhovah, Seigneur ti dunia kue, atene: ‘Bê ti mo ayeke lani na kobela* na ngoi so mo sara aye so kue, mo yeke sara ye tongana wali-ndumba so sarango ndumba ti lo aza wâ.+ 31 Me na ngoi so mo leke koto ti mo na ando so iri ni awu na so ayeke na terê ti alege kue, nga mo leke ando ti mo so ayeke na nduzu na ando kue so azo ayeke gue ka dä mingi, mo yeke lani tongana wali-ndumba pëpe ndali ti so mo ke ti tene a futa mo ngbanga ni. 32 Mo yeke wali so ayeke be-ta-zo na koli ti lo pëpe, so ayeke gi akoli wande ahon ti ngbâ gï na koli ti lo.+ 33 Azo ayeke mû ka na awali-ndumba kue mbeni matabisi,+ me ti mo, mo yeke wali so ayeke mû amatabisi na akoli so nzara ti terê ti ala asara ala na terê ti mo,+ na mo pete goro na ala ti tene ala londo na ando kue ti ga ti sara ndumba na mo.+ 34 Mo yeke ti mo nde na awali so abi terê ti ala na yâ ti sarango ndumba. Mbeni wali ti sara ndumba tongana ti mo ayeke dä pëpe! Mo yeke futa akoli me ala yeke futa mo pëpe. Sarango ye ti mo ayeke nde mingi na ti so awali-ndumba ayeke sara ka.’

35 “Ni la, mo wali-ndumba so,+ mo mä tënë so Jéhovah atene. 36 Bâ tënë so Jéhovah, Seigneur ti dunia kue, atene la: ‘So nzara ti terê ti mo ahon ndö ni nga terê ti mo aduti senge na gigi na ngoi so mo yeke sara ndumba na andeko ti mo ni so, nga na afungo yanda*+ ti mo kue so ayeke sioni mingi so, ala so mo mû mênë ti amolenge ti mo na sandaga na ala,+ 37 tongaso mbi yeke bungbi andeko ti mo ni kue so mo zia terê ti mo na ala so, ala kue so mo ye ala nga ala kue so mo ke ala. Mbi yeke bungbi ala kue ti ke mo, ala yeke londo na ndo kue. Mbi yeke fa terê ti mo senge na gigi na lê ti ala si ala yeke bâ tâ mo tongaso.+

38 “‘Mbi yeke punir mo na lege so mbi yeke fâ ngbanga na ndö ti mo,+ ngbanga so a yeke fâ ka na ndö ti awali so agi koli nga na awali so atuku mênë so.+ Na yâ ti ngonzo nga na yâ ti mbanda, azo so ayeke tuku ande mênë ti mo na sese.+ 39 Mbi yeke zia mo na maboko ti ala na ala yeke kungbi akoto ti mo ni na sese+ nga ando ti mo ni so mo leke na nduzu so, ala yeke kinda ni. Ala yeke mû abongo ti mo kue+ nga na apendere bijou* ti mo+ na ala yeke zia mo terê ti mo senge na gigi. 40 Ala yeke mû gbâ ti azo+ ti ga na ni na terê ti mo. Ala yeke bo mo na tênë+ nga ala yeke fâ mo na épée ti ala.+ 41 Ala yeke gbi ada ti mo+ na ala yeke fâ ngbanga na ndö ti mo na lê ti gbâ ti awali. Mbi yeke sara si ndumba ti mo ahunzi+ na mo yeke zia lege ti futango nginza na akoli ni. 42 Mbi yeke fa ande ngonzo ti mbi kue na ndö ti mo+ nga mbi yeke zia ti sara mbanda na terê ti mo.+ Mbi yeke duti kpô na bê ti mbi ayeke son mbeni pëpe.’

43 “Jéhovah, Seigneur ti dunia kue, atene: ‘So mo dabe ti mo na mbi pëpe na ngoi so mo de maseka+ nga mo zia ngonzo na bê ti mbi na sarango aye so kue so, mbi yeke sara si asioni ye kue so mo sara akiri na ndö ti mo’ na mo yeke ngbâ mbeni pëpe ti sara aye ti buba ti mo ni nga na aye ti sioni kue so mo yeke na yâ ni so.

44 “‘Bâ, azo kue so ayeke tene amato ayeke tene ande mato so na ndö ti mo, atene: “Ye so mama asara, molenge ti lo ti wali asara!”+ 45 Mo yeke tâ molenge ti mama ti mo so azia kamene na lê ti koli ti lo na amolenge ti lo. Mo yeke gï tongana aita ti mo ti wali so ake akoli ti ala nga na amolenge ti ala na bê oko so. Mama ti mo ayeke lani zo ti mara ti Heth na babâ ti mo ayeke zo ti mara ti Amori.’”+

46 “‘Yaya ti mo ti wali ayeke Samarie,+ lo sara kodro na mbage ti nord* ti ndo so mo yeke lango dä legeoko na amolenge ti lo ti wali.*+ Ngambe ti mo ti wali so asara kodro na mbage ti sud* ti ndo so mo lango dä legeoko na amolenge ti lo ti wali ayeke Sodome.+ 47 Mo mû gï pëpe lege ti ye so ala sara nga na asioni ye so ala sara, me ti mo na yâ ti kete ngoi mo buba terê ti mo mingi ahon ti ala na yâ ti sarango ye ti mo kue.’+ 48 Jéhovah, Seigneur ti dunia kue, atene: ‘Mbi so mbi yeke na fini, mbi deba yanga, mbi tene, ita ti mo ti wali Sodome nga na amolenge ti lo asara ye so mo na amolenge ti mo ti wali asara so pëpe. 49 Bâ, sioni ti ita ti mo ti wali Sodome ayeke so: Lo na amolenge ti lo+ ayeke azo ti fandara,+ ala yeke lani na gbâ ti kobe,+ ala duti kpô na ala gi bê ti ala oko pëpe,+ nga ala mû maboko na azo so ayeke na yâ ti pasi nga na awayere pëpe.+ 50 Ala ngbâ gï ti duti na fandara+ na ala ngbâ ti sara ye ti sioni kue na lê ti mbi,+ ni la mbi bâ gbä, mbi futi ala.+

51 “‘Samarie+ asara même ndambo ti gbâ ti asiokpari so mo sara so pëpe. Mo ngbâ ti sara si asioni sarango ye ti mo awu ahon ti so ala sara. Ye so asara si tongana a bâ aye ti sioni kue so mo ngbâ ti sara, aita ti mo ti wali ayeke mbilimbili ahon mo.+ 52 Kamene ti mo ayeke ngbâ na lê ti mo ndali ti so mo mû araison ti fa so asarango ye ti aita ti mo ti wali ayeke sioni pëpe. So siokpari so mo sara ahon ti so ala sara so, ala yeke mbilimbili ahon mo. Ni la, kamene angbâ na lê ti mo na mo yô kamene ni ndali ti so mo sara si a bâ aita ti mo ti wali tongana azo so ayeke mbilimbili.’

53 “‘Mbi yeke bungbi azo ti ala so a mû ala na ngbâa, azo ti Sodome so a mû ala na ngbâa nga na amolenge ti lo ti wali, azo ti Samarie so a mû ala na ngbâa nga na amolenge ti lo ti wali. Mbi yeke bungbi legeoko na ala azo ti mo so a gbu ala na ngbâa,+ 54 tongaso si mo yô kamene ti mo na lê ti mo. Mo yeke bâ so mo yeke ye oko pëpe ndali ti ye so mo sara na lege so mo dë bê ti ala. 55 Aita ti mo ti wali, Sodome na amolenge ti lo ti wali, ayeke kiri ande na ngbene duti ti ala. Samarie na amolenge ti lo ti wali ayeke kiri nga na ngbene duti ti ala. Mo na amolenge ti mo ti wali ayeke kiri na ngbene duti ti ala.+ 56 Ita ti mo ti wali Sodome akpa oko pëpe ti tene mo di iri ti lo na ngoi ti fandara ti mo, 57 kozoni si a fa nda ti sioni ti mo na gigi.+ Fadeso amolenge ti Syrie ti wali nga na avoizin ti ala azia kamene na lê ti mo, nga amaseka-wali ti azo ti Philistie,+ ala kue so angoro mo, abâ mo tongana mbumbuse zo. 58 Asarango ye ti buba so mo sara so nga na asioni ye so mo ngbâ ti sara ayeke kiri ande na ndö ti mo.’ Tënë ti yanga ti Jéhovah la.”

59 “Bâ tënë so Jéhovah, Seigneur ti dunia kue, atene la: ‘Mbi yeke sara ande ye na mo gï tongana ti so mo sara,+ ndali ti so mo bâ tënë ti bä ni na nene ni pëpe na lege so mo fâ yâ ti mbele ti mbi.+ 60 Me mbi yeke dabe ti mbi na mbele so mbi te na mo na ngoi so mo de lani maseka, na mbi yeke te na mo mbeni mbele so angbâ lakue.+ 61 Mo yeke dabe ti mo ande na sarango ye ti mo nga mo yeke bâ so mo yeke ye oko pëpe+ na ngoi so mo yeke yamba aita ti mo ti wali, ayaya ti mo nga na angambe ti mo, na mbi yeke mû ala na mo ti ga amolenge ti mo ti wali, me a yeke pëpe ndali ti mbele so mo te.’

62 “‘Mbi yeke te mbele ande na mo na mo yeke hinga so mbi yeke Jéhovah. 63 Na pekoni, mo yeke dabe ti mo ande na aye so mo sara so, nga kamene ayeke sara mo ti zi yanga ti sara tënë, ndali ti so a kiri na nengo ti mo na gbe ni,+ na ngoi so mbi yeke zi siokpari ti mo atâa aye ti sioni kue so mo sara.’+ Tënë ti yanga ti Jéhovah, Seigneur ti dunia kue, la.”

17 Jéhovah akiri asara tënë na mbi, atene: 2 “Molenge ti zo, mo tene mbeni parabole nga mo tene mbeni mato na ndö ti azo ti da ti Israël.+ 3 Mo tene na ala, mo tene: ‘Bâ tënë so Jéhovah, Seigneur ti dunia kue, atene la: “Mbeni kota aigle+ so kpangbi* ti lo akono nga ali ni ayo, so kuä ti terê ti lo ayeke mingi nga ayeke na anzoroko nde nde, lo londo lo ga na Liban+ na lo mû li ti keke ti cèdre ni lo hon na ni.+ 4 Lo fâ mbeni li ti keke ni lo gue na ni na kodro ti azo ti dengo buze.* Lo zia ni na yâ ti mbeni gbata ti azo ti dengo buze.+ 5 Na pekoni, lo mû mbeni lê ti ngongoa ti kobe ti kodro ni,+ lo lu ni na yâ ti mbeni yaka so kobe ayeke lë dä mingi. Lo lu ni tongana mbeni keke ti saule so a lu ni na terê ti kota ngu. 6 Tongaso, ngongoa ni amaï na aga mbeni vigne so alë mingi na so ayo na sese pëpe.+ Akugbe ni adü mingi na aba na mbage ti yâ ni nga gunda ti keke ni amaï na gbe ni. Tongaso lo ga mbeni keke ti vigne so akete kugbe ni ayeke sigi dä nga so amaboko ni asigi ayo.+

7 “‘“Mbeni kota aigle+ nde so akpangbi* ti lo akono na ayo mingi aga.+ Hio, keke ti vigne ni so ayôro agunda ti lo na mbage ti aigle ni, yongoro na sese so a lu vigne ni dä. Lo yôro akugbe ti lo na mbage ti aigle ni tongaso si aigle ni atuku ngu na ndö ni.+ 8 A lu vigne so lani na yâ ti mbeni pendere yaka na terê ti kota ngu ti tene amaboko ni asigi, a lë lengo nga a ga vigne so ayeke pendere mingi.”’+

9 “Mo tene na ala: ‘Bâ tënë so Jéhovah, Seigneur ti dunia kue, atene la: “Vigne so ayeke maï ande? Mbeni zo ayeke gboto ande agunda ni ape?+ Mbeni zo ayeke sara si lê ti keke ni afun ande ape? Mbeni zo ayeke sara si amaboko ni so asigi so ahule ande ape?+ A yeke hule ande ngangu, ye so ayeke sara si a yeke duti pëpe na bezoin ti mbeni ngangu maboko wala azo mingi ti gboto ni na gunda ni kue. 10 So a mû lo na mbeni ndo nde si a ga a lu lo so, lo yeke maï ande la? Na ngoi so pupu ti est ayeke ya na ndö ti lo, lo yeke hule ande biaku biaku ape? Lo yeke hule biani na ndö ti sese so lo sigi dä so.”’”

11 Jéhovah akiri asara tënë na mbi, atene: 12 “Pardon, mo sara tënë na azo ti Israël so li ti ala akpengba so, mo tene: ‘Ala hinga nda ti aye so ape?’ Mo tene na ala, mo tene: ‘Bâ, gbia ti Babylone aga lani na Jérusalem na lo mû gbia ni nga na amokonzi ni lo gue na ala na Babylone.+ 13 Nga, lo mû mbeni hale* ti gbia ni+ lo te mbele na lo nga lo hunda lo ti deba yanga na lo.+ Na pekoni, lo mû azo ti kodro ni so iri ti ala awu lo hon na ala,+ 14 tongaso si royaume ni akiri na peko nga a wara lege ti maï pëpe. Ni la, ti tene royaume ni angbâ, a yeke nzoni ala ngbâ ti bata mbele ti lo.+ 15 Me na nda ni, gbia ni so asara kpengba-li na gbia ti Babylone+ na lege so lo tokua azo ti lo na Égypte ti tene a tokua na lo ambarata+ nga na gbâ ti aturugu.+ Ye so lo sara so ayeke ga nzoni la? Zo so asara aye so, a yeke punir lo ape? Lo lingbi ti buba yâ ti mbele ni, na so kue a punir lo ape?’+

16 “‘“Jéhovah, Seigneur ti dunia kue, atene: “Mbi so mbi yeke na fini, mbi deba yanga, mbi tene, lo yeke kui na Babylone, na ndo so gbia* so asara si lo* ga gbia alondo dä, gbia so lo ke deba ti yanga ti lo nga lo buba yâ ti mbele ti lo.+ 17 Gbâ ti aturugu ti Pharaon nga na azo mingi mingi so amû peko ti lo ayeke gbu lê ni ande na yâ ti bira ni pëpe,+ na ngoi so a yeke monté sese aga koto angoro terê ti gbata ni, nga a sara mur angoro gbata ni ti tene a futi gbâ ti azo.* 18 Lo ke dengo bä ti yanga ti lo na lo buba yâ ti mbeni mbele. Atâa so lo mû zendo, lo sara aye so kue. Lo yeke kpe ande ngbanga pëpe.”’

19 “‘Tongaso, bâ tënë so Jéhovah, Seigneur ti dunia kue, atene la: “Mbi so mbi yeke na fini, mbi deba yanga, mbi tene, mbi yeke sara ande si aye ti peko ti dengo bä ti yanga ti mbi so lo ke+ nga na mbele ti mbi so lo buba yâ ni so akiri na ndö ti lo. 20 Mbi yeke bi gbanda ti mbi na ndö ti lo na ayeke gbu lo.+ Mbi yeke gue na lo na Babylone na mbi yeke fâ ngbanga ti lo kâ ndali ti so lo yeke be-ta-zo na mbi pëpe.+ 21 Aturugu ti lo so ayeke kpe gï na nduzu ayeke kui kuâ ti épée, na atanga ni so angbâ, ala yeke kangbi kirikiri na ndo kue.*+ Na pekoni, mo yeke hinga ande so mbi Jéhovah la mbi sara tënë so.”’+

22 “‘Bâ tënë so Jéhovah, Seigneur ti dunia kue, atene la: “Mbi yeke mû ande mbeni kete keke so angbâ ti sigi na li ti keke ti cèdre+ so ayo na nduzu mingi so, na mbi lu ni. Mbi yeke ko mbeni kete maboko ti keke ni na li ti keke ni kâ,+ mbi wani la mbi yeke lu ni na li ti mbeni hoto so ayo na nduzu mingi.+ 23 Mbi yeke lu ni ande na ndö ti mbeni yongoro hoto ti Israël, amaboko ni ayeke maï, a yeke lë lengo na a yeke ga mbeni keke ti cèdre so a yeke pendere mingi. Mara ti andeke nde nde kue ayeke ga ti duti na gbe ni na ala yeke sara kodro na yâ ti akugbe ni so adü mingi so. 24 Akeke kue ti benyama ayeke hinga ande so mbi Jéhovah la mbi sara si keke so ayo lani na nduzu mingi so akiri na gbe ni nga mbi la mbi sara si keke so ayeke lani na gbe ni so ayo na nduzu mingi.+ Mbi yeke sara ande si keke so ayeke fini keke so ahule na mbi sara si keke so ayeke hulengo keke so, afini kugbe ni asigi dä.+ Mbi Jéhovah la mbi sara tënë so na mbi sara ye alingbi na ni.”’”

18 Jéhovah akiri asara tënë na mbi, atene: 2 “Ngbanga ti nyen a yeke tene mato so na yâ ti kodro ti Israël, atene: ‘Ababâ asu akpikpii lê ti vigne, me pembe ti amolenge la ayeke kui’?+

3 “Jéhovah, Seigneur ti dunia kue, atene: ‘Mbi so mbi yeke na fini, mbi deba yanga, mbi tene, ala yeke ngbâ ande ti tene mato so na Israël mbeni pëpe. 4 Bâ! A-âme* kue ayeke ti mbi. Âme ti babâ ni nga âme ti molenge ni ayeke ti mbi. Âme* so asara siokpari, a yeke lo la lo yeke kui.

5 “‘Na tapande, tongana mbeni zo ayeke mbilimbili na lo sara ye so ayeke na lege ni nga mbilimbili. 6 Lo yeke te pëpe asandaga so a mû na ayanda na ndö ti ahoto,+ lo bâ ndo na mbage ti afungo yanda ti Israël pëpe. Lo sara lango-sioni na wali ti zo pëpe+ nga lo lango pëpe na mbeni wali na ngoi so wali ni abâ yâ ti lo.+ 7 Lo sara pasi na zo pëpe,+ me kungba so zo azia na lo na place ti bon ti lo, lo kiri na ni na wani.+ Lo nzi ye ti zo pëpe+ me lo mû kobe ti lo na zo so nzara asara lo+ nga lo mû bongo na zo so terê ti lo ayeke senge.+ 8 Lo hunda intérêt na ndö ti bon pëpe nga lo wara go pëpe na ndö ti azo so lo sara bon na ala,+ lo sara ye kirikiri pëpe,+ lo fâ ngbanga na lege ti mbilimbili na popo ti azo use,+ 9 nga lo yeke tambela alingbi na andia ti mbi na lo yeke sara ye alingbi na ambela ti mbi tongaso si lo duti be-ta-zo. Zo tongaso ayeke zo ti mbilimbili, lo yeke ngbâ na fini biani.’+ Tënë ti yanga ti Jéhovah, Seigneur ti dunia kue, la.

10 “‘Me na tapande, tongana lo dü mbeni molenge so aga zo ti nzi,+ zo ti fango zo*+ wala molenge ni ayeke sara mara ti aye ni so, 11 (me babâ ni asara ti lo aye ni so oko pëpe), molenge ni ayeke te asandaga so a mû na ayanda na ndö ti ahoto, lo yeke sara lango-sioni na wali ti mba ti lo. 12 Molenge ni so ayeke sara pasi na zo so ayeke na ye pëpe wala wayere,+ lo nzi ye ti azo, ye so zo azia na lo na place ti bon lo kiri na ni na wani pëpe, lo bâ ndo na mbage ti afungo yanda,+ lo ngbâ ti sara aye ti sioni,+ 13 lo yeke wara go na ndö ti azo so lo sara bon na ala nga lo yeke hunda intérêt na ndö ti bon,+ molenge tongaso a yeke zia lo ngbâ na fini ande pëpe. Ngbanga ti aye ti sioni kue so lo sara so, ti tâ tënë ni a yeke fâ lo. Mênë ti lo ayeke na li ti lo wani.

14 “‘Me na tapande, mbeni babâ ayeke na molenge, na molenge ni abâ asioni kue so babâ ti lo asara. Ye oko, lo bâ aye ti sioni so me lo sara ni pëpe. 15 Molenge ni ake ti te asandaga so a mû na ayanda na li ti ahoto, lo bâ ndo pëpe na mbage ti afungo yanda ti azo ti Israël, lo sara lango-sioni pëpe na wali ti mba ti lo, 16 lo sara pasi na zo oko pëpe, ye so zo azia na lo na place ti bon lo kiri na ni na wani, lo nzi ye ti zo pëpe, lo mû kobe ti lo na zo so nzara asara lo nga lo mû bongo na zo so terê ti lo ayeke senge. 17 Lo ke ti sara pasi na wayere, lo wara go pëpe na ndö ti azo so lo sara bon na ala nga lo yeke hunda intérêt na ndö ti bon pëpe. Lo tambela alingbi na ambela ti mbi nga lo sara ye alingbi na andia ti mbi. Mara ti zo tongaso, lo yeke kui ande ndali ti faute ti babâ ti lo pëpe. Lo yeke ngbâ ande na fini biani. 18 Me ngbanga ti so babâ ti lo angbâ ti sara ye ti likisi, ti nzi ita ti lo na ti sara ye so ayeke sioni na popo ti azo ti mara ti lo, lo yeke kui ande ndali ti faute ti lo.

19 “‘Me ala yeke hunda terê ti ala, ala tene: “Ngbanga ti nyen la si molenge ni ayeke yô siokpari ti babâ ti lo ape?” So molenge ni asara ye so ayeke na lege ni nga mbilimbili so, lo bata andia ti mbi kue na lo sara ye alingbi na ni, lo yeke ngbâ ande na fini biani.+ 20 Âme so asara siokpari, a yeke lo la lo yeke kui.+ Molenge ayeke yô ande siokpari ti babâ ti lo pëpe, na babâ ayeke yô siokpari ti molenge ti lo pëpe. Mbilimbili ti zo ti mbilimbili ayeke na li ti lo wani, na sioni ti zo ti sioni ayeke na li ti lo wani.+

21 “‘Me tongana zo ti sioni adö lege ti asiokpari ti lo kue lo zia na lo bata andia ti mbi nga lo sara ye so ayeke na lege ni nga lo sara ye ti mbilimbili, lo yeke ngbâ ande na fini biani. Lo yeke kui pëpe.+ 22 Mbeni kengo ndia ti lo oko tongaso ayeke kiri ande na ndö ti lo pëpe.*+ Lo yeke ngbâ na fini ndali ti so lo sara ye so ayeke mbilimbili.’+

23 “Jéhovah, Seigneur ti dunia kue, atene: ‘Eskê mbi yeke na ngia tongana mbeni zo ti sioni akui?+ Mbi ye ti tene zo ti sioni azia lege ti sioni ti lo si lo ngbâ na fini, ni la ape?’+

24 “‘Me tongana zo ti mbilimbili adö lege ti mbilimbili ti lo lo zia, na lo sara ye ti sioni, lo sara aye ti sioni kue so zo ti sioni ayeke sara, lo yeke ngbâ ande na fini? Mbi yeke dabe ti mbi encore ape na aye ti mbilimbili kue so lo sara.+ So lo yeke be-ta-zo pëpe nga lo sara siokpari so, lo yeke kui.+

25 “‘Me ala yeke tene ande, atene: “Lege ti Jéhovah ayeke mbilimbili pëpe.”+ Ala, azo ti Israël, ala mä mbi si. Lege ti mbi la si ayeke mbilimbili ape?+ Lege ti ala la ayeke mbilimbili pëpe, ni la ape?+

26 “‘Tongana zo ti mbilimbili adö lege ti mbilimbili ti lo lo zia, na lo sara ye ti sioni lo yeke kui ndali ti ye so lo sara. Biani, lo yeke kui ndali ti siokpari ti lo wani.

27 “‘Tongana zo ti sioni adö lege ti sioni ti lo lo zia na lo to nda ti sara ye so ayeke na lege ni nga lo sara ye ti mbilimbili, lo yeke sö ande fini* ti lo wani.+ 28 Tongana lo dabe ti lo na ye ti sioni kue so lo sara na lo dö lege ni lo zia, lo yeke ngbâ na fini biani. Lo yeke kui pëpe.

29 “‘Me azo ti Israël ayeke tene ande, atene: “Lege ti Jéhovah ayeke mbilimbili pëpe.” Ala, azo ti Israël, a yeke biani lege ti mbi la si ayeke mbilimbili ape?+ Lege ti ala la ayeke mbilimbili pëpe, ni la ape?’

30 “Jéhovah, Seigneur ti dunia kue, atene: ‘Ndani la, ala, azo ti Israël, mbi yeke fâ ngbanga ande na ndö ti zo oko oko alingbi na aye so lo sara.+ Biani, zia ala tourné peko ti ala na akengo ndia kue so ala ke, ala tourné peko ti ala na ni biani biani, tongaso si ala ga pëpe mbeni ye so zo apika gere ti lo na ni si sioni aga na ndö ti ala pëpe. 31 Ala zi terê ti ala na akengo ndia kue so ala ke,+ na zia ala wara mbeni fini bê nga mbeni fini bibe.+ Ala, azo ti Israël, ala ye ti kui ngbanga ti nyen?’+

32 “Jéhovah, Seigneur ti dunia kue, atene: ‘A nzere na mbi pëpe ti tene mbeni zo ti sioni akui.+ Ni la, ala dö lege ti sioni ala zia, na ala ngbâ na fini.’”+

19 “Mo he mbeni bia ti vundu* na iri ti amokonzi ti Israël, 2 mo tene:

‘Mama ti mo lani ayeke zo wa? A yeke mbeni wali-bamara na popo ti abamara.

Lo lango na popo ti angangu bamara so akono awe* na lo bata amolenge ti lo.

 3 Lo bata mbeni molenge ti lo ni oko juska lo kono lo ga ngangu bamara.+

 5 Wali-bamara so aku na lo bâ so beku ayeke mbeni pëpe ti tene molenge ti lo so akiri.

Tongaso lo mû mbeni molenge ni nde lo tokua lo tongana mbeni ngangu bamara so akono awe.

 6 Molenge ni so nga ayeke fono na popo ti amba ti lo bamara na lo ga mbeni ngangu bamara so akono awe.

Lo manda ti suru yâ ti anyama na lo te même azo.+

 9 Ala gbu lo na acrochet ala zia lo na yâ ti mbeni cage, na ala gue na lo na gbia ti Babylone.

Kâ, ala zia lo na kanga tongaso si a mä toto ti lo na yâ ti ahoto ti Israël mbeni pëpe.

10 Mama ti mo ayeke tongana keke ti vigne*+ so a lu na terê ti ngu.

A lë na amaboko ti keke ni aga mingi ngbanga ti so a lu ni na terê ti kota ngu.

11 Amaboko ti keke ni akpengba na alingbi ti tene a sara na akeke ti komandema ti agbia.

A fâ angangu maboko ti keke ni na pekoni ahule+ na wâ agbi ni.+

“‘So bia ti vundu la, na a yeke he ni tongana bia ti vundu.’”

20 Na yâ ti ngu mbasambala ni, na oku nze ni, na lango bale-oko ti nze ni, ambeni ancien ti Israël aga aduti na gbele mbi ti hunda tënë na Jéhovah. 2 Tongaso Jéhovah atene na mbi, atene: 3 “Molenge ti zo, mo sara tënë na a-ancien ti Israël, mo tene: ‘Bâ tënë so Jéhovah, Seigneur ti dunia kue, atene la: “Ala ga ti hunda tënë na mbi? Jéhovah, Seigneur ti dunia kue, atene: ‘Mbi so mbi yeke na fini, mbi deba yanga, mbi tene, mbi yeke kiri tënë ande na ala pëpe.”’+

4 “Mo yeke nduru ti fâ ngbanga na ndö ti ala? Molenge ti zo, mo yeke nduru ti fâ ngbanga na ndö ti ala awe? Mo fa na ala tënë ti aye ti sioni so akotara ti ala asara lani.+ 5 Mo tene na ala: ‘Bâ tënë so Jéhovah, Seigneur ti dunia kue, atene la: “Na tango so mbi soro Israël lani,+ mbi deba yanga ti mbi na ahale* ti Jacob, mbi sara si ala hinga mbi na kodro ti Égypte.+ Mbi deba yanga ti mbi lani na ala mbi tene: ‘Mbi Jéhovah Nzapa ti ala la.’ 6 Na tango ni so, mbi deba yanga ti mbi so mbi yeke sigi ande na ala na kodro ti Égypte ti gue na ala na mbeni kodro so mbi bâ ni kozo awe ndali ti ala, mbeni kodro so lait na mafuta ti otoro asi singo dä.+ A yeke kodro so ayeke pendere ahon tanga ti akodro kue. 7 Na pekoni mbi tene na ala: ‘A lingbi zo oko oko kue abi asioni yanda so agboto lê ti lo. Ala sara si terê ti ala aga sioni na afungo yanda* ti Égypte pëpe.+ Mbi yeke Jéhovah Nzapa ti ala.’+

8 “‘“Me ala sara kpengba-li na mbi nga ala yeke nduru ti mä yanga ti mbi pëpe. Ala ke ti bi asioni yanda so ayeke na gbele ala, na ala zia lege ti asioni yanda ti Égypte pëpe.+ Ni la, mbi mû yanga ti sara si ngonzo ti mbi aga na ndö ti ala nga ti tuku ngonzo ti mbi kue na ndö ti ala na kodro ti Égypte. 9 Me mbi sara lani ye so ndali ti iri ti mbi tongaso si a bi nengo ni na sese pëpe na lê ti amara so ala sara kodro na popo ti ala.+ Na lê ti amara so mbi sara si azo ti Israël ahinga mbi na ngoi so mbi sigi na ala na kodro ti Égypte.+ 10 Ni la, mbi sigi na ala lani na kodro ti Égypte na mbi gue na ala na benyama.+

11 “‘“Na pekoni, mbi mû na ala andia ti mbi nga mbi fa ambela ti mbi na ala+ ti tene zo so asara ye alingbi na ni angbâ na fini ndali ni.+ 12 Mbi mû nga na ala asabbat ti mbi+ so aga mbeni fä na popo ti mbi na ala+ tongaso si ala hinga so mbi Jéhovah, mbi zia ala nde ndali ti mbi.

13 “‘“Me azo ti Israël asara kpengba-li na mbi na yâ ti benyama.+ Ala sara ye alingbi na andia ti mbi pëpe nga ala ke ambela ti mbi, aye so tongana zo asara ye alingbi na ni, lo yeke ngbâ na fini ndali ni. Ala bi nengo ti asabbat ti mbi na sese biaku biaku. Ni la, mbi mû yanga ti sara si ngonzo ti mbi aga na ndö ti ala ti hunzi ala kue na yâ ti benyama.+ 14 Me mbi sara lani ye so ndali ti iri ti mbi tongaso si a bi nengo ni na sese pëpe na lê ti amara so mbi sigi na ala na Égypte na lê ti ala.+ 15 Nga mbi deba yanga ti mbi na ala na benyama mbi tene mbi yeke gue na ala pëpe na kodro so mbi mû ni na ala so+ (kodro so lait na mafuta ti otoro asi singo dä,+ kodro so ayeke pendere ahon tanga ti akodro kue) 16 ngbanga ti so ala ke ambela ti mbi, ala sara ye alingbi na andia ti mbi pëpe, ala bi nengo ti asabbat ti mbi na sese nga bê ti ala angbâ gï na peko ti afungo yanda ti ala.+

17 “‘“Me mbi bâ mawa ti ala, mbi futi ala pëpe. Mbi hunzi ala kue na yâ ti benyama pëpe. 18 Mbi tene na amolenge ti ala na yâ ti benyama+ mbi tene: ‘Ala tambela na peko ti andia so akotara ti ala+ alu so pëpe, ala bata ambela ti ala pëpe nga ala sara si terê ti ala aga sioni na lege ti afungo yanda ti akotara ti ala ni so pëpe. 19 Mbi Jéhovah Nzapa ti ala la. Ala tambela alingbi na andia ti mbi, ala bata ambela ti mbi na ala sara ye alingbi na ni.+ 20 Ala bata lango ti sabbat ti mbi+ nde na ayeke ga ande mbeni fä na popo ti mbi na ala, si ala hinga so mbi yeke Jéhovah Nzapa ti ala.’+

21 “‘“Me amolenge ni ato nda ti sara kpengba-li na mbi.+ Ala sara ye alingbi na andia ti mbi pëpe, ala bata ambela ti mbi pëpe na ala sara ye alingbi na ni pëpe; aye so tongana zo asara ye alingbi na ni, lo yeke ngbâ na fini ndali ni. Ala bi nengo ti asabbat ti mbi na sese. Ni la, mbi mû yanga ti sara si ngonzo ti mbi aga na ndö ti ala nga ti tuku ngonzo ti mbi kue na ndö ti ala na yâ ti benyama.+ 22 Me mbi gbanzi terê ti mbi+ ti sara ni ndali ti iri ti mbi,+ si a bi nengo ti iri ti mbi na sese pëpe na popo ti amara so na lê ti ala mbi sigi na ala na kodro ti Égypte. 23 Nga, mbi deba yanga na ala na yâ ti benyama mbi tene mbi yeke kangbi ala ande kirikiri na popo ti amara, mbi yeke kangbi ala na yâ ti akodro nde nde,+ 24 ngbanga ti so ala bata ambela ti mbi pëpe na ala ke andia ti mbi,+ nga ala bi nengo ti asabbat ti mbi na sese, na ala mû peko ti* afungo yanda ti akotara ti ala.+ 25 Tongaso, mbi zia nga lege na ala ti mû peko ti andia so ayeke nzoni pëpe nga ti mû peko ti ambela so ala lingbi ti wara fini ndali ni pëpe.+ 26 Mbi zia si ala ga sioni na lege ti asandaga ti ala wani (na ngoi so ala yeke gbi akozo molenge ti ala na wâ)+ tongaso si mbi futi ala, si ala hinga so mbi yeke Jéhovah.”’

27 “Ni la, mo molenge ti zo, mo sara tënë na azo ti Israël mo tene: ‘Bâ tënë so Jéhovah, Seigneur ti dunia kue, atene la: “A yeke tongaso nga si akotara ti ala azonga mbi na lege so ala duti be-ta-zo na mbi pëpe. 28 Mbi gue na ala lani na kodro so mbi deba yanga ti mbi lani ti mû na ala.+ Tongana ala bâ ayongoro hoto kue nga na akeke kue so kugbe ni adü mingi,+ ala komanse ti yâa asandaga nga ti mû amatabisi so ason bê ti mbi. Ala yâa asandaga ti ala, so fion ni afun nzoni,* na ala tuku asandaga ti sämba ti ala kâ. 29 Tongaso mbi hunda ala mbi tene: ‘Nda ti ando so ayeke na nduzu so ayeke nyen? ando so ala yeke gue dä so (a ngbâ ti iri ni Ndo so ayeke na nduzu juska laso).’”’+

30 “Ni la mo tene na azo ti Israël, mo tene: ‘Bâ tënë so Jéhovah, Seigneur ti dunia kue, atene la: “Ala sara si terê ti ala aga sioni legeoko tongana akotara ti ala asara ândö na lege so ala mû peko ti afungo yanda ti ala na ala sara lango-sioni na ayanda ni na lege ti yingo?+ 31 Ala ngbâ ti sara si terê ti ala aga sioni juska laso na lege so ala yeke mû asandaga na afungo yanda ti ala kue, na gbingo amolenge ti ala na wâ?+ Azo ti da ti Israël, na oko ngoi ni, mbi doit ti kiri tënë na atënë so ala hunda?”’+

“Jéhovah, Seigneur ti dunia kue atene: ‘Mbi so mbi yeke na fini, mbi deba yanga, mbi tene, mbi yeke kiri tënë na atënë so ala hunda so pëpe.+ 32 Na ye so ala pensé na yâ ti li ti ala, ala tene so a yeke si lâ oko pëpe tongana ala tene: “Zia e ga tongana amara, tongana asewa ti ambeni kodro nde, so ayeke voro keke na tênë.”’”+

33 “Jéhovah, Seigneur ti dunia kue, atene: ‘Mbi so mbi yeke na fini, mbi deba yanga, mbi tene, na ngangu maboko ti mbi, na maboko ti mbi so mbi yôro na ndö ti ala, na lege ti ngonzo ti mbi so mbi yeke fa na ndö ti ala, mbi yeke komande ande na ndö ti ala.+ 34 Mbi yeke sara ande si ala sigi na popo ti amara na mbi yeke bungbi ala na yâ ti kodro so a kangbi ala kirikiri dä na lege ti ngangu maboko, na lege ti maboko ti mbi so mbi yôro na ndö ti ala nga na lege ti ngonzo ti mbi so mbi fa na ndö ti ala.+ 35 Mbi yeke gue ande na ala na yâ ti benyama ti azo ti amara, na mbi yeke fâ ngbanga na ndö ti ala kâ, lê na lê.+

36 “Jéhovah, Seigneur ti dunia kue, atene: ‘Gï tongana ti so mbi fâ ngbanga na ndö ti akotara ti ala na yâ ti benyama ti Égypte, mbi yeke fâ ande ngbanga na ndö ti ala nga. 37 Mbi yeke sara ande si ala hon na gbe ti saworo ti berger ni+ na mbi yeke ga na ala na gbe ti mbele. 38 Me mbi yeke zi ande na popo ti ala azo ti kpengba-li nga na azo so asara siokpari na terê ti mbi.+ Mbi yeke sigi na ala na yâ ti kodro so ala duti dä tongana awande, me ala yeke lï ande na yâ ti kodro ti Israël pëpe.+ Ala yeke hinga so mbi yeke Jéhovah.’

39 “Âdu ti ala, azo ti Israël, bâ tënë so Jéhovah, Seigneur ti dunia kue, atene la: ‘Zia zo oko oko ague avoro afungo yanda ti lo.+ Me na pekoni, tongana ala mä mbi pëpe, ala yeke ngbâ ande mbeni pëpe ti sara si iri ti mbi aga sioni na lege ti asandaga ti ala nga na afungo yanda ti ala.’+

40 “Jéhovah, Seigneur ti dunia kue, atene: ‘A yeke na ndö ti hoto ti mbi so ayeke nzoni-kue, ndö ti mbeni yongoro hoto ti Israël,+ si azo ti Israël kue ayeke voro mbi na yâ ti kodro ni.+ Mbi yeke duti na ngia na popo ti ala kâ, mbi yeke hunda amatabisi na maboko ti ala nga na akozo lengo ti aye so ala mû na sandaga, aye kue ti nzoni-kue so ala yeke na ni.+ 41 Ndali ti asandaga ti ala so afun pendere so, mbi yeke wara ngia na popo ti ala, na ngoi so mbi yeke sigi na ala na popo ti amara na mbi yeke mû ala na yâ ti akodro so ala kangbi dä kirikiri+ so ti bungbi ala ndo oko; na mbi yeke ga nzoni-kue na popo ti ala na lê ti amara.’+

42 “‘Na ngoi so mbi yeke ga na ala ande na yâ ti kodro ti Israël,+ kodro so mbi deba yanga ti mbi lani ti mû na akotara ti ala, ala yeke hinga so mbi yeke Jéhovah.+ 43 Kâ, ala yeke dabe ti ala ande na atambela ti ala nga na asarango ye ti ala kue so na lege ni ala sara si terê ti ala aga sioni,+ na ala yeke bâ ande terê ti ala so ala kpa oko pëpe ndali ti aye ti sioni kue so ala sara lani.+ 44 Na pekoni, ala, azo ti Israël, ala yeke hinga ande so mbi Jéhovah la, na ngoi so mbi yeke sara aye so na ala ndali ti iri ti mbi,+ mbi sara ni pëpe ndali ti sioni sarango ye ti ala wala ndali ti aye ti sioni so ala sara. Tënë ti yanga ti Jéhovah, Seigneur ti dunia kue, la.”

45 Jéhovah akiri asara tënë na mbi, atene: 46 “Molenge ti zo, mo tourné lê ti mo na mbage ti sud na mo sara tënë na mbage ti sud, mo sara tënë ti prophétie na terê ti gbako so ayeke na benyama ti sud. 47 Mo tene na gbako ti mbage ti sud, mo tene: ‘Mä tënë ti yanga ti Jéhovah. Bâ tënë so Jéhovah, Seigneur ti dunia kue, atene la: “Mbi yeke bi wâ na terê ti mo,+ na wâ ni ayeke gbi afini keke kue nga na ahulengo keke kue so ayeke na yâ ti mo. Wâ ni ayeke mingo pëpe+ nga a yeke gbi lê ti azo oko oko kue, ti londo na sud ti si na nord. 48 Amara kue ayeke bâ ande so mbi Jéhovah mbi tingo mbeni wâ so ayeke mingo ande pëpe.”’”+

49 Tongaso mbi tene: “Aï Jéhovah, Seigneur ti dunia kue, ala yeke sara tënë na terê ti mbi ala tene: ‘Lo yeke sara tënë gï na lege ti parabole la ape?’”

21 Jéhovah akiri asara tënë na mbi, atene: 2 “Molenge ti zo, mo tourné lê ti mo na mbage ti Jérusalem na mo fa tënë ti ngbanga na ndö ti ando so ayeke nzoni-kue, nga mo fa prophétie ti ngbanga na ndö ti kodro ti Israël. 3 Mo tene na kodro ti Israël, mo tene: ‘Bâ tënë so Jéhovah atene la: “Bâ mbi ke mo awe, mbi yeke gboto ande épée ti mbi na yâ ti poro ni+ ti fâ azo ti mbilimbili nga na azo ti sioni so ayeke na yâ ti mo. 4 Ngbanga ti so mbi yeke fâ ande azo ti mbilimbili na azo ti sioni na yâ ti mo, mbi yeke gboto ande épée ti mbi na yâ ti poro ni ti ga na terê ti azo kue, ti londo na sud ti si na nord. 5 Azo kue ayeke hinga ande so mbi Jéhovah mbi gboto épée ti mbi na yâ ti poro ni awe. A yeke kiri na yâ ti poro ni mbeni pëpe.”’+

6 “Ti mo, molenge ti zo, mo dema na ngoi so terê* ti mo adö, biani, mo dema ngangu na devant ti ala.+ 7 Na tongana ala hunda mo, atene: ‘Mo yeke dema ngbanga ti nyen?’ mo tene na ala: ‘A yeke ndali ti mbeni sango so mbi mä.’ Ye ni ayeke si, bê ti azo ni ayeke fun kue na mbeto, maboko ti ala kue ayeke woko na ala kue ayeke duti na ngia pëpe, nga ala kue, inon ti mbeto ayeke yuru na terê ti gere ti ala.+ ‘Bâ, ye so ayeke si, a yeke si ande biani.’ Tënë ti yanga ti Jéhovah, Seigneur ti dunia kue, la.”

8 Jéhovah akiri asara tënë na mbi, lo tene: 9 “Molenge ti zo, tene prophétie mo tene: ‘Bâ tënë so Jéhovah atene la: “Mo tene: ‘Bâ, mbeni épée! A leke yanga ti mbeni épée+ na a kpaka lê ni si aza pendere. 10 A leke yanga ni ti tene a fâ azo mingi, a kpaka lê ni ti tene aza tongana zango ti wâ ti bekpa.’”’”

“E yeke sara ngia ande?”

“‘Eskê épée* ni ayeke ke ande keke ti komandema ti molenge ti mbi+ tongana ti so asara na akeke kue?

11 “‘A mû épée ni ti tene a kpaka lê ni si aza nga ti tene maboko ti zo asara na kua. A leke yanga ti épée so nga a kpaka lê ni aza ti tene a zia ni na maboko ti zo ti fango azo.+

12 “‘Molenge ti zo, mo dekongo, mo toto,+ ye ni asi na ndö ti azo ti mbi awe. Ye ni aga na ndö ti amokonzi ti Israël kue.+ A yeke ala si épée ni afâ ala legeoko na azo ti mbi. Tongaso mo pika cuisse ti mo ti fa vundu ti mo. 13 A tara épée ni awe,+ nyen la ayeke si ande nyen tongana épée ni ake keke ti komandema ni? Keke ti komandema ni ayeke duti ande encore ape.’+ Tënë ti yanga ti Jéhovah, Seigneur ti dunia kue, la.

14 “Molenge ti zo, mo tene prophétie, mo pika maboko ti mo si mo tene fani ota mo tene: ‘Mbeni épée!’ Épée so afâ azo, épée so afâ azo mingi, épée so angoro ala.+ 15 Bê ti ala ayeke woko na mbeto+ na azo mingi ayeke tï na yanga ti gbagba ti gbata ti ala. Mbi yeke fâ azo na épée. Biani, épée ni aza tongana zango ti wâ ti bekpa na a kpaka lê ni ti tene a fâ na azo! 16 Fâ ye ni nzoni na mbage ti maboko ti koli! Gue na mbage ti maboko ti wali! Gue na ndo kue so yanga ti mo ague dä! 17 Nga, mbi yeke pika maboko ti mbi na ngonzo ti mbi ayeke dë.+ Mbi Jéhovah mbi sara tënë awe.”

18 Jéhovah akiri asara tënë na mbi, atene: 19 “Ti mo, molenge ti zo, mo suru alege use so épée ti gbia ti Babylone ayeke hon dä. Alege ni use kue ayeke londo na yâ ti kodro oko. Mo zia mbeni ye ti fa lege na ndo so yâ ti alege ni akangbi dä ti gue na yâ ti agbata use so. 20 Mo fa mbeni lege ni oko ti tene épée ni ahon dä ti gue na terê ti Rabbah+ ti azo ti Ammon, nga mbeni lege ni ti gue na terê ti ngangu gbata ti Jérusalem+ so ayeke na Juda. 21 Gbia ti Babylone aga aluti na ndo so alege ni atingbi terê dä, na ndo so alege ni azi yâ ti terê dä, lo luti ti bâ mbadi. Lo yengi akokora ti lo. Lo hunda tënë na ayanda ti lo, lo gi ye na yâ ti foie. 22 Ye ti bango mbadi so ayeke na yâ ti maboko ti lo ti koli abâ ndo na mbage ti Jérusalem, ti zia amasini ti kungbingo na ye na terê ti gbata ni, ti mû yanga ti tene a fâ azo, ti iri azo na bira, ti zia amasini ti kungbingo na ye na yanga ti agbagba ni, ti monté sese aga koto angoro ni nga ti sara gbagba angoro gbata ni kue.+ 23 Me ti azo ti Jérusalem so a deba yanga lege mingi na ala awe so, ala yeke tene na bê ti ala ande atene mbadi ni so ayeke mbadi ti mvene.+ Ye oko, lo dabe ti lo na afaute ti ala na lo yeke gbu ala.+

24 “Tongaso, bâ tënë so Jéhovah, Seigneur ti dunia kue, atene la: ‘Ala sara si a dabe na faute ti ala na lege so ala sara si akengo ndia ti ala nga na asiokpari ti ala asigi polele na yâ ti asarango ye ti ala. Fadeso, so a dabe na afaute ti ala awe so, a yeke gbu ala ande na ngangu.’

25 “Me lâ ti mo asi awe, mo so mo wara kä so ayeke gue na mo na kuâ so, mo sioni mokonzi ti Israël+ so ngoi ti ndangba punition ti mo asi awe so. 26 Bâ tënë so Jéhovah, Seigneur ti dunia kue, atene la: ‘Mo zi turban ni, na mo zi couronne ni.+ Ye ni ayeke ngbâ tongaso mbeni pëpe.+ Mo yâa na nduzu lo so ayeke na gbe ni+ nga lo so ayeke kota mo kiri na lo na gbe ni.+ 27 Mbi yeke sara si couronne ni abuba kue, abuba kue, abuba kue. A yeke duti ti mbeni zo pëpe juska lo so ndia afa so ye ni ayeke ti lo aga si,+ na mbi yeke mû ni ande na lo.’+

28 “Molenge ti zo, mo tene prophétie mo tene: ‘Bâ tënë so Jéhovah, Seigneur ti dunia kue, atene na ndö ti azo ti Ammon nga na ndö ti azonga so ala zonga la.’ Mo tene: ‘Épée! A gboto épée ti fâ na azo, a kpaka lê ni aza ti hunzi azo na ti tene a za tongana zango ti wâ ti bekpa. 29 Atâa avision nga na ambadi ti mvene so abâ ndali ti mo, a yeke zia mo ande na ndö ti akuâ so a bungbi ni na ndö ti terê, azo ti sioni so lâ ti ala asi awe, so ngoi ti ndangba punition ti ala la. 30 Kiri na épée ni na yâ ti poro ni. Mbi yeke fâ ande ngbanga na ndö ti mo na ndo so a créé mo dä, na kodro so a dü mo dä. 31 Mbi yeke tuku ande ngonzo ti mbi na ndö ti mo. Mbi yeke hûru pupu ti wâ ti kota ngonzo ti mbi na ndö ti mo, mbi yeke zia mo na maboko ti azo so asara ye ti ngangu na amba ti ala, azo so kua ti ala ayeke gï ti futi ye.+ 32 Mo yeke ga ye ti tingongo na wâ,+ mênë ti mo ayeke tuku ande na yâ ti kodro ni na a yeke dabe na mo encore ape, mbi Jéhovah, mbi sara tënë awe.’”

22 Jéhovah akiri asara tënë na mbi, atene: 2 “Ti mo, molenge ti zo, mo leke terê ti mo ti fa tënë ti ngbanga* na ndö ti gbata so a tuku mênë dä+ mingi so awe? Mo leke terê ti mo ti fa tënë ti aye ti sioni kue so a sara na yâ ti gbata ni awe?+ 3 Mo tene: ‘Bâ tënë so Jéhovah, Seigneur ti dunia kue, atene la: “Mo gbata so a tuku mênë mingi+ na yâ ti mo so, mo gbata so ngoi ti mo asi awe so,+ mo gbata so mo leke afungo yanda* ti sara si terê ti mo aga sioni so,+ 4 mênë so mo tuku asara si tënë ayeke na li ti mo,+ nga afungo yanda so mo leke asara si mo ga sioni.+ Mo sara si alango ti mo ahunzi hio, mo si na nda ti ngu ti mo awe. Ndani la, mbi yeke sara si mo ga ye ti zonga na lê ti amara nga ye ti he na lê ti azo ti akodro ni kue.+ 5 Akodro so ayeke nduru na mo nga na ala so ayeke yongoro na mo ayeke he mo ande,+ mo so iri ti mo abuba awe so nga so wusuwusu ahon ndö ni na yâ ti mo so. 6 Bâ, amokonzi oko oko ti Israël so ayeke na yâ ti mo asara kusala na komandema ti ala ti tuku mênë.+ 7 Na yâ ti mo, azo asara ye na babâ na mama ti ala mo bâ mo tene ambumbuse zo.+ Ala nzi awande so asara kodro na popo ti ala nga ala yeke sara pasi na amolenge so babâ ti ala ayeke dä pëpe* nga na awali-mua.”’”+

8 “‘Ala buba nengo ti ando ti mbi so ayeke nzoni-kue na ala bi nengo ti lango ti sabbat ti mbi na sese.+ 9 A yeke wara na yâ ti mo azo ti pango zo so aleke na bê ti ala ti tuku mênë.+ Na yâ ti mo, ala te asandaga na ndö ti ahoto na ala yeke bi terê ti ala na yâ ti asarango ye ti buba.+ 10 Na yâ ti mo, ala sara si gbogbo ti babâ ti ala aga sioni,*+ nga ala lango na wali so aga sioni na ndembe so lo yeke bâ yâ ti lo.+ 11 Na yâ ti mo, koli asara ye ti sioni na wali ti mba ti lo,+ mbeni koli asara si wali ti molenge ti lo aga sioni na sarango ye ti buba na terê ti lo,+ na mbeni zo ni nde alango na ita ti lo ti wali, molenge ti babâ ti lo.+ 12 Na yâ ti mo, ala yeda na goro ti tuku mênë.+ Ala yeke sara bon ala zia intérêt na ndö ni,+ wala ala wara go na ndö ti azo so ala sara bon na ala nga ala yeke mû nginza ti mba ti ala na likisi.+ Ti tâ tënë ni, ala girisa mbi biani biani awe.’ Tënë ti yanga ti Jéhovah, Seigneur ti dunia kue, la.

13 “‘Bâ, mbi yeke pika maboko ti mbi ti fa so mbi ke aye ti likisi so mo sara, nga na tukungo mênë so a yeke tuku na yâ ti mo. 14 Na lango so mbi yeke fâ ngbanga na ndö ti mo, mo yeke gbu ngangu ande la? Maboko ti mo ayeke ngbâ na ngangu ande la?+ Mbi, Jéhovah, mbi sara tënë awe na mbi yeke sara ye alingbi na ni ande. 15 Mbi yeke kangbi mo na popo ti amara na mbi yeke sara si mo gue kirikiri na yâ ti akodro,+ mbi yeke sara ande si asioni ye so mo sara ahunzi.+ 16 Mo yeke ga ande ye ti kamene na devant ti amara, na mo yeke hinga ande so mbi yeke Jéhovah.’”+

17 Jéhovah akiri asara tënë na mbi, atene: 18 “Molenge ti zo, azo ti Israël aga tongana asaleté ti ye na lê ti mbi. Ala kue ayeke cuivre, étain, wen na plomb so ayeke na yâ ti four. Ala ga asaleté ti argent.+

19 “Ni la, bâ tënë so Jéhovah, Seigneur ti dunia kue, atene la: ‘Ndali ti so ala kue ala ga tongana asaleté ti ye,+ mbi yeke bungbi ala na yâ ti Jérusalem. 20 Gï tongana ti so a yeke bungbi cuivre, wen, plomb nga na étain legeoko na yâ ti four ti tene a hûru wâ na gbe ni si aga ngu, mbi yeke bungbi ala ande na yâ ti ngonzo nga na kota ngonzo, si mbi yeke hûru ande wâ na gbe ti ala si ala ga ngu.+ 21 Mbi yeke ga na ala kue, na mbi yeke hûru wâ ti kota ngonzo ti mbi na gbe ti ala,+ na mbi yeke sara si ala ga tongana ngu na yâ ti gbata ni.+ 22 Gï tongana ti so argent ayeke ga ngu na yâ ti four, ala yeke ga ngu na yâ ti gbata ni. Ala yeke hinga ande so mbi, Jéhovah, mbi fa kota ngonzo ti mbi na ndö ti ala.’”

23 Jéhovah akiri asara tënë na mbi, atene: 24 “Molenge ti zo, mo tene na Jérusalem: ‘Mo yeke mbeni kodro so a yeke sukula ande mo pëpe nga na lâ ti ngonzo ngu-nzapa ayeke pika ande na ndö ti mo pëpe. 25 Aprophète so ayeke na yâ ti mo amä terê ti sara ye ti sioni+ tongana mbeni bamara so atoto si ayeke suru yâ ti mbeni nyama so lo gbu.+ Ala yeke te azo.* Ala yeke gbu amosoro nga na aye ti nginza. Ala sara si awali-mua ayeke mingi na yâ ti mo. 26 Aprêtre ni ake ndia ti mbi,+ ala ngbâ ti buba nengo ti ando ti mbi so ayeke nzoni-kue.+ Ala sara kangbi pëpe na popo ti ye so ayeke nzoni-kue nga na asenge ye,+ ala fa pëpe na azo ti mbi ti hinga ye so ayeke sioni na ye so ayeke nzoni.+ Ala ke ti bata lango ti sabbat ti mbi na ala bi nengo ti iri ti mbi na sese na popo ti ala. 27 Amokonzi so ayeke na yâ ti gbata ni ayeke tongana ambo ti ngonda so ayeke suru yâ ti nyama so ala gbu. Ala tuku mênë nga ala fâ azo* ti wara na nginza ti likisi.+ 28 Me aprophète ti gbata ni asara mbamba na terê ti aye so ala sara. Ala bâ avision nga na ambadi ti mvene,+ na ala tene: “Bâ tënë so Jéhovah, Seigneur ti dunia kue, atene la,” andâ Jéhovah asara ti lo tënë pëpe. 29 Azo ti kodro ni ayeke sara ye ti likisi, ala yeke nzi,+ ala yeke sara pasi na azo so ye amanke ala nga na awayere, ala yeke mû ye ti wande na likisi na ala fâ ngbanga ti lo na lege ni pëpe.’

30 “‘Mbi gi ti wara mbeni zo na popo ti ala, lo so ayeke leke peko ti mur ti tênë ti kodro ni wala zo so ayeke luti na gbele mbi na popo ti dû so a kôro na yâ ti mur ni ti bata kodro ni si a futi ni pëpe,+ me mbi wara zo oko pëpe. 31 Ni la, mbi yeke fa ande ngonzo ti mbi na ndö ti ala na mbi yeke hunzi ala na yâ ti kota ngonzo ti mbi. Mbi yeke sara si aye so ala sara akiri na ndö ti ala wani.’ Tënë ti yanga ti Jéhovah, Seigneur ti dunia kue, la.”

23 Jéhovah akiri asara tënë na mbi, atene: 2 “Molenge ti zo, ambeni wali use ayeke dä, ala yeke amolenge ti mama oko.+ 3 Ala ga lani awali-ndumba na Égypte.+ Ala yeke sara ndumba ni ngbene ye so ala de maseka. Kâ, akoli apete me ti ala na agbu me ti ala na ngoi so ala de ala hinga koli pëpe. 4 Iri ti yaya ni ayeke Oholah,* ti ngambe ti lo ti wali ayeke Oholibah.* Ala ga lani ti mbi na ala dü lani amolenge ti koli na amolenge ti wali. Oholah ayeke Samarie,+ Oholibah ayeke Jérusalem.

5 “Oholah akomanse ti sara ndumba+ na ngoi so lo ngbâ ti mbi. Nzara ti terê ti lo ahon ndö ni na terê ti andeko ti lo,+ azo ti Assyrie so ayeke avoizin ti lo.+ 6 Ala yeke agouverneur so ayü bongo ti bleu nga akete gouverneur. Ala kue ayeke amaseka-koli so azo aye ala mingi, ala yeke kpe na ambarata. 7 Lo ngbâ ti sara ndumba ti lo na amolenge-koli ti Assyrie so ayeke nzoni ahon atanga ni kue. Lo buba terê ti lo+ na lege ti afungo yanda* ti ala so nzara ti terê ti lo agbu lo ngangu na terê ti ala. 8 Me lo zia lege ti ndumba so lo yeke sara lani na Égypte so pëpe, ndali ti so na ngoi so lo de maseka, ala lango na lo awe nga ala gbu me ti lo na ngoi so lo de ti hinga koli pëpe, nzara ti terê ti ala kue ayeke gï na ndö ti lo.*+ 9 Tongaso, mbi zia lo na maboko ti andeko ti lo ni, amolenge-koli ti Assyrie,+ ala so nzara ti terê ti lo agbu lo lani ngangu na terê ti ala. 10 Ala zia terê ti lo na gigi,+ ala gbu amolenge ti lo ti koli na amolenge ti lo ti wali+ na ala fâ lo na épée. Lo ga mbeni wali so iri ti lo abuba awe na popo ti awali nga ala fâ ngbanga na ndö ti lo.

11 “Tongana ita ti lo ti wali Oholibah abâ ye so lani, nzara ti terê ti lo akiri ahon ndö ni nga lo sara ndumba ti lo ni ahon ti ita ti lo ti wali.+ 12 Nzara ti terê ti lo asara lo ngangu na terê ti avoizin ti lo amolenge ti Assyrie,+ agouverneur na akete gouverneur so ayü apendere bongo nga so akpe na ambarata, amaseka-koli so azo aye ala mingi. 13 Na ngoi so lo buba lani terê ti lo, mbi bâ so ala use kue asara gï oko ye.+ 14 Me lo ngbâ ti sara ndumba ti lo ahon ti kozo. Lo bâ dessin ti akoli so a kpaka ni na terê ti mur, astatue ti azo ti Chaldée so a leke ni si a sara bengba peinture na terê ni, 15 ala kanga ceinture na gbe ti yâ ti ala, ala kanga aturban na li ti ala yanga ni atï na devant ti lê ti ala, ala kpa aturugu, ala kue akpa azo ti Babylone so a dü ala na kodro ti azo ti Chaldée. 16 Gï so lo bâ ala, nzara ti terê ti lo akomanse ti londo ngangu na terê ti ala, na lo tokua azo na ala na Chaldée.+ 17 Tongaso, amolenge-koli ti Babylone angbâ ti ga na ndö ti gbogbo so akoli ayeke lango na lo na ndö ni so, ala sara si lo buba terê ti lo na lege so ala sara lango-sioni na lo. Na peko ti so lo buba terê ti lo na ala awe, lo tourné peko ti lo na ala na bango ala na sioni lê.

18 “Na ngoi so sarango ndumba ti lo ni aza wâ lani nga terê ti lo ayeke na gigi,+ mbi tourné peko ti mbi na lo na mbi bâ lo na sioni lê, gï tongana ti so mbi tourné peko ti mbi lani na ita ti lo ti wali na mbi bâ lo nga na sioni lê so.+ 19 Lo ngbâ ti sara si ndumba ti lo ni ahon ndö ni,+ na lo dabe ti lo na alango so lo de lani maseka tongana lo yeke sara ndumba na kodro ti Égypte.+ 20 Nzara ti terê ti lo alondo lani ngangu na terê ti andeko ti lo ni so terê ti ala ti koli ayeke tongana ti kororo wala tongana ti mbarata so. 21 Mo yeke sara gï nzara ti aye ti saleté so mo sara lani na Égypte+ na ngoi so mo de maseka, tongana ala gbu me ti mo, me ti mo ti maseka.+

22 “Tongaso, Oholibah, bâ tënë so Jéhovah, Seigneur ti dunia kue, atene la: ‘Mbi yeke pusu andeko ti mo na terê ti mo,+ ala so mo tourné peko ti mo na ala lani na mo bâ ala na sioni lê so, mbi yeke mû ande ala na ando nde nde kue ti ga na ala na terê ti mo,+ 23 amolenge-koli ti Babylone+ na azo ti Chaldée+ kue, akoli ti Pécod,+ Shoa na Cao, legeoko na amolenge-koli ti Assyrie. Ala kue ayeke amaseka-koli so azo aye ala mingi, agouverneur na akete gouverneur, aturugu nga na azo so a soro ala nzoni,* ala kue ayeke kpe na mbarata. 24 Ala yeke ga ande na terê ti mo ti sara bira na mo na apuse ti mbarata so asara bruit mingi nga na aroue, na gbâ ti aturugu, na akota vala, akete vala* nga na acasque. Ala yeke ngoro mo ande kue na mbi yeke mû ande yanga na ala ti fâ ngbanga na ndö ti mo na ala yeke fâ ngbanga ti mo alingbi na ti so bê ti ala aye.+ 25 Mbi yeke fa ande ngonzo ti mbi na terê ti mo, na ala yeke sara ye na mo na yâ ti kota ngonzo ti ala. Ala yeke fâ ande hôn ti mo na mê ti mo, na azo ti mo so ayeke ngbâ ande ayeke kui kuâ ti épée. Ala yeke mû ande amolenge ti mo ti koli na amolenge ti mo ti wali ti hon na ala, na ala so ayeke ngbâ ande, a yeke gbi ala na wâ ande.+ 26 Ala yeke zi ande abongo ti mo+ nga ala yeke gbu apendere bijou ti mo.+ 27 Mbi yeke sara ande si sarango ye ti buba ti mo+ nga na ndumba ti mo so ato nda ni lani na Égypte+ so ahunzi. Mo yeke zia ande ti bâ ndo na peko ti ala nga mo yeke dabe ti mo na Égypte mbeni pëpe.’

28 “Bâ tënë so Jéhovah, Seigneur ti dunia kue, atene la: ‘Bâ, mbi yeke yôro maboko ti mbi na mbage ti ala so ake mo, ala so mo tourné peko ti mo na ala lani na mo bâ ala na sioni lê so.+ 29 Ala yeke sara ye ande na mbage ti mo na sioni bê, ala yeke mû aye kue so mo bâ pasi ti wara ni so ti hon na ni,+ na ala yeke zia mo terê senge na gigi. Terê ti mo so ayeke senge si mo yeke sara na lango-sioni so ayeke ye ti kamene, sarango ye ti buba ti mo nga na ndumba ti mo ayeke duti ande na gigi dandara.+ 30 A yeke sara ande aye so na mo ndali ti so mo kpe na peko ti amara tongana wali-ndumba,+ ndali ti so mo buba terê ti mo awe na afungo yanda ti ala.+ 31 Mo mû gï oko lege so ita ti mo ti wali amû lani,+ tongaso mbi yeke zia ande kopo ti lo na yâ ti maboko ti mo.’+

32 “Bâ tënë so Jéhovah, Seigneur ti dunia kue, atene la:

Jéhovah, Seigneur ti dunia kue, atene: “Mbi sara tënë awe.”’

35 “Tongaso, bâ tënë so Jéhovah, Seigneur ti dunia kue, atene la: ‘Ndali ti so mo girisa mbi awe na mo sara sanka ti mbi biani biani,*+ aye ti buba so mo sara nga na ndumba so mo sara ayeke kiri ande na ndö ti mo.’”

36 Na pekoni, Jéhovah atene na mbi: “Molenge ti zo, mo yeke fa ande tënë ti ngbanga na terê ti Oholah nga na Oholibah+ na mo yeke zia ala ti luti na gbele aye ti saleté so ala sara? 37 Ala yeke gi akoli nde*+ nga mênë ayeke na ndö ti maboko ti ala. Ala sara gï lango-sioni na afungo yanda ti ala pëpe, me amolenge so ala dü ala na mbi, ala gbi ala na wâ tongana kobe ndali ti ayanda ti ala.+ 38 Nga, bâ ye so ala sara na mbi: Ala sara si ndo ti mbi so ayeke nzoni-kue aga sioni na lango ni so na ala buba nengo ti lango ti sabbat ti mbi. 39 Na peko ti so ala fâ amolenge ti ala ala mû na sandaga na afungo yanda ti ala,+ ala lï na yâ ti ndo ti mbi so ayeke nzoni-kue na ala sara si aga sioni+ na lango ni so. Bâ ye so ala sara lani na yâ ti da ti mbi la. 40 Ala tokua même azo ti iri akoli ti londo na yongoro ndo ti ga.+ Tongana ala si awe, mo sukula terê ti mo, mo sara fard na lê ti mo na mo yü aye ti baba na terê ti mo.+ 41 Mo duti na ndö ti mbeni pendere kete gbogbo+ so a zia table na devant ni,+ nga a zia dukane+ ti mbi nga na mafuta ti mbi na ndö ni.+ 42 A yeke mä go ti gbâ ti akoli so ayeke na ngia, so na popo ti ala a yeke wara akota ngbâa ti sämba so a mû ala na benyama si a ga na ala. Ala zia aye ti maboko na maboko ti awali ni nga ala zia apendere couronne na li ti ala.

43 “Tongaso, mbi tene na ndö ti lo so gingo koli awoko lo kue awe so, mbi tene: ‘Ti fadeso kue, lo yeke ngbâ ande ti sara ndumba ti lo ni?’ 44 Tongaso, ala lango na lo tongana ti so mbeni koli ayeke lango na mbeni wali-ndumba. A yeke tongaso si ala lango na Oholah nga na Oholibah, awali so ayeke sara aye ti buba. 45 Me akoli so ayeke mbilimbili, ala yeke fâ ande ngbanga ti lo alingbi na ni ndali ti so lo gi koli nde+ nga ndali ti so lo tuku mênë.+ Ala yeke awali so agi koli nde nga mênë ayeke na ndö ti maboko ti ala.+

46 “Bâ tënë so Jéhovah, Seigneur ti dunia kue, atene la: ‘A yeke tokua aturugu na terê ti ala, ala yeke sara si ala ga mbeni ye so amû kota mbeto na zo nga ala yeke ga ye so azo amû ahon na ni.+ 47 Aturugu ni ayeke bo ande ala na tênë+ nga ayeke fâ ala na épée. Ala yeke fâ amolenge ti ala ti koli na amolenge ti ala ti wali+ nga ala yeke gbi ada ti ala.+ 48 Mbi yeke sara ande si sarango ye ti buba ahunzi na yâ ti kodro ni nga awali kue so ayeke mä ande tënë ni ayeke mû peko ti sarango ye ti buba ti ala so pëpe.+ 49 Ala yeke sara ande si aye ti buba so ala sara nga na asiokpari so ala sara na afungo yanda ti ala ni akiri na ndö ti ala. Ala yeke hinga so mbi yeke Jéhovah, Seigneur ti dunia kue.’”+

24 Na yâ ti ngu gumbaya ni, na nze bale-oko ni, na lango bale-oko ti nze ni, Jéhovah akiri asara tënë na mbi, atene: 2 “Molenge ti zo, mo sû kota lango* so na mbeti. A yeke na lango ni so si gbia ti Babylone akomanse ti ga na bira na Jérusalem.+ 3 Mo tene mbeni parabole so andu azo ti kpengba-li, mo tene:

“‘Bâ tënë so Jéhovah, Seigneur ti dunia kue, atene la:

“Mo zia tawa* na ndö ti wâ na mo tuku ngu na yâ ni.+

 5 Mo soro nzoni taba na popo ti ataba+ na mo zia keke na gbe ti tawa ni.

Mo kporo amorceau ti nyama ni nga abio so ayeke na yâ ti tawa ni.”’

 6 “Tongaso, bâ tënë so Jéhovah, Seigneur ti dunia kue, atene la:

‘Mawa na gbata so atuku mênë,+ tawa so rouille amû terê ni kue, so a zi rouille ni na terê ni pëpe so.

Mo zi amorceau ti nyama ni oko na oko;+ mo soro amorceau ni sorongo pëpe.

 7 Ndali ti so mênë ti lo angbâ na yâ ti lo.+ Lo tuku ni na ndö ti kota tênë so ndö ni ayeke senge.

Lo tuku ni pëpe na ndö ti sese ti zia fuku ti sese na ndö ni.+

 9 “Tongaso, bâ tënë so Jéhovah, Seigneur ti dunia kue, atene la:

‘Mawa na gbata so atuku mênë.+

Mbi yeke bungbi keke ti wâ ni gbani na ndö ti terê.

Saleté ni ayeke ga ngu na yâ ti tawa ni,+ na rouille ni ayeke gbi.

Bi ni na wâ legeoko na rouille ni kue.’

13 “‘Mo ga sioni ndali ti sarango ye ti buba ti mo.+ Mbi tara ti zi sioni na terê ti mo, me sioni ti mo ayeke hon na terê ti mo pëpe. Sioni ti mo ayeke hon na terê ti mo pëpe juska kota ngonzo ti mbi so ayeke na ndö ti mo adë si.+ 14 Mbi Jéhovah, mbi sara tënë awe, ye ni ayeke si ande biani. Mbi yeke zia lege ni pëpe, vundu ayeke sara mbi pëpe nga mbi yeke regretté pëpe.+ Ala yeke fâ ande ngbanga ti mo alingbi na tambela ti mo nga na ye so mo sara,’ tënë ti yanga ti Jéhovah, Seigneur ti dunia kue, la.”

15 Jéhovah akiri asara tënë na mbi, lo tene: 16 “Molenge ti zo, gï na lege ti mbeni ye ti ngangu oko, mbi yeke mû zo so mo ye lo mingi so ti hon na ni na terê ti mo.+ Mo sara vundu pëpe,* mo toto pëpe nga ngu ti lê ti mo ayuru pëpe. 17 Mo dema gï na yâ ti bê ti mo kâ na mo sara mua pëpe.+ Mo kanga turban na li ti mo,+ mo yü poro ti mo.+ Kanga ye na ndö ti kuä ti yanga ti mo pëpe*+ nga kobe so azo aga na ni na mo so mo te ni pëpe.”+

18 Mbi sara tënë na azo ni na ndapre ni, a si na lakui wali ti mbi akui. Tongaso, ndade ni na ndapre, mbi sara gï tongana ti so a hunda fade na mbi so. 19 Azo ni atene na mbi: “Mo yeke fa na e ande nda ti ye so mo sara so ape? Ye so abâ e tongana nyen?” 20 Tongaso, mbi tene na ala: “Jéhovah asara tënë na mbi, atene: 21 ‘Tene na azo ti Israël, mo tene: “Bâ tënë so Jéhovah, Seigneur ti dunia kue, atene la: ‘Mbi yeke sara si ndo ti mbi so ayeke nzoni-kue aga sioni,+ ye so ala yeke sara kota baba ndali ni, ye so ala ye ni mingi nga so anzere na bê ti ala.* Amolenge ti ala ti koli na amolenge ti ala ti wali, so ala zia na peko, ayeke kui ande kuâ ti épée.+ 22 Na pekoni, ala yeke sara ye gï tongana ti so mo sara so. Ala kanga ye na ndö ti kuä ti yanga ti ala pëpe na kobe so azo ayeke ga na ni ande na ala, ala yeke te ni pëpe.+ 23 Turban ti ala ayeke ngbâ na li ti ala nga poro ti ala angbâ na gere ti ala. Ala yeke sara mua ande pëpe, ala yeke toto nga pëpe. Ahon ti sara aye so, ala yeke nge ngengo na yâ ti afaute ti ala+ nga ala yeke dema ande na terê ti mba. 24 Ézéchiel aga mbeni tapande ndali ti ala.+ Ala yeke sara ande gï mara ti ye so lo sara so. Tongana ye ni asi, ala yeke hinga so mbi yeke Jéhovah, Seigneur ti dunia kue.’”’”

25 “Ti mo, molenge ti zo, na lango so mbi yeke zi angangu gbagba ti ala ti hon na ni (pendere ye so azia ngia na bê ti ala, ye so ala ye ni mingi, ye so anzere na bê* ti ala), legeoko na amolenge ti ala ti wali nga na amolenge ti ala ti koli,+ 26 mbeni zo so ayeke sö kuâ ande ayeke ga ti fa peko ni na mo.+ 27 Na lango ni so, mo yeke sara tënë ande na lo so asö kuâ si aga so, mo yeke kiri ti duti buburu pëpe.+ Mo yeke ga tongana mbeni tapande na lê ti ala, na ala yeke hinga ande so mbi yeke Jéhovah.”

25 Jéhovah akiri asara tënë na mbi, atene: 2 “Molenge ti zo, mo tourné lê ti mo na mbage ti azo ti mara ti Ammon,+ na mo tene prophétie ti ngbanga na ndö ti ala.+ 3 Mo tene na ndö ti azo ti mara ti Ammon, mo tene: ‘Ala mä tënë ti Jéhovah, Seigneur ti dunia kue. Bâ tënë so Jéhovah, Seigneur ti dunia kue, atene la: “Na ngoi so a bi nengo ti ndo ti mbi so ayeke nzoni-kue na sese, na ngoi so kodro ti Israël abuba lani biani biani nga na ngoi so a gbu azo ti Juda a gue na ala na mbeni kodro-wande, ala azo ti Ammon atene lani wuu! wuu! 4 Ndani la, mbi yeke zia ala na maboko ti azo ti mbage ti est ti tene ala ga ye ti ala. Ala yeke sara ande acamp ti ala na yâ ti kodro ti ala nga ala yeke lu atente ti ala na popo ti ala. Ala yeke te alê ti keke ti ala nga ala yeke nyon lait ti ala. 5 Mbi yeke sara ande si Rabbah+ aga ndo ti tengo pere ti achameau, nga mbi yeke sara si kodro ti azo ti mara ti Ammon aga mbeni ndo so ataba alango da. Ala yeke hinga so mbi yeke Jéhovah.”’”

6 “Bâ tënë so Jéhovah, Seigneur ti dunia kue, atene la: ‘Ndali ti so ala pika maboko ti ala lani,+ nga ala pika sese ti gere ti ala nga ala he kodro ti Israël na ngia sioni sioni tongaso,+ 7 mbi yeke yôro maboko ti mbi ti zia ala na tïtî amara tongana ye so a gbu na peko ti bira. Mbi yeke fâ ala na popo ti amara na mbi yeke futi ala na popo ti akodro.+ Mbi yeke hunzi ala ande kue na ala yeke hinga ande so mbi yeke Jéhovah.’

8 “Bâ tënë so Jéhovah, Seigneur ti dunia kue, atene la: ‘Ngbanga ti so Moab+ na Séir+ atene: “Bâ, azo ti Juda ayeke tongana tanga ti amara kue,” 9 mbi yeke zia si awato ague asara bira na agbata so ayeke na katikati ti Moab, na popo ti agbata ni so a yeke wara gbata ti Beth-Jéshimoth, Baal-Méon juska Kiriathaïm,+ so asara pendere ti kodro ni. 10 Mbi yeke zia ande Moab legeoko na azo ti mara ti Ammon na maboko ti azo ti mbage ti est.+ Tongaso, a yeke dabe na azo ti mara ti Ammon na popo ti amara mbeni pëpe.+ 11 Mbi yeke fâ ngbanga na yâ ti kodro ti Moab+ na ala yeke hinga ande so mbi yeke Jéhovah.’

12 “Bâ tënë so Jéhovah, Seigneur ti dunia kue, atene la: ‘Édom akiri peko ti sioni na azo ti Juda, lo sara kota siokpari ndali ti so lo kiri peko ti sioni na ala,+ 13 tongaso, bâ tënë so Jéhovah, Seigneur ti dunia kue, atene la: “Mbi yeke yôro nga maboko ti mbi na terê ti Édom, mbi yeke fâ azo na anyama na mbi yeke sara si Édom abuba biani biani.+ Ti londo na Téman juska na Dedan, ala yeke kui ande kuâ ti épée.+ 14 ‘Na lege ti azo ti mbi, Israël, mbi yeke kiri na Édom peko ti sioni so lo sara.+ Ala yeke sara ye na Édom na lege ti ngonzo ti mbi nga na kota ngonzo ti mbi, na Édom ayeke bâ lege so mbi yeke kiri na lo peko ti sioni so lo sara,’+ tënë ti yanga ti Jéhovah, Seigneur ti dunia kue, la.”’

15 “Bâ tënë so Jéhovah, Seigneur ti dunia kue, atene la: ‘Ndali ti ngbene sioni bê ti ala na terê ti azo ti Israël, aPhilistin agi ti sara sioni na ala ti kiri na azo ti Israël peko ti sioni so ala sara nga ti futi ala biani biani.+ 16 Ni la bâ tënë so Jéhovah, Seigneur ti dunia kue, atene la: “Mbi yeke yôro maboko ti mbi na terê ti aPhilistin,+ mbi yeke futi azo ti mara ti Kérét+ na mbi yeke futi ande tanga ti azo so asara kodro na terê ti ngu-ingo.+ 17 Mbi yeke kiri na ala peko ti asioni so ala sara, mbi yeke punir ala sioni sioni, na ala yeke hinga ande so mbi yeke Jéhovah, na ngoi so mbi yeke kiri na ala peko ti sioni so ala sara.”’”

26 Na yâ ti ngu 11 ni, na kozo lango ti nze ni, Jéhovah asara tënë na mbi, atene: 2 “Molenge ti zo, Tyr atene na terê ti Jérusalem,+ atene: ‘Wuu! wuu! A kungbi yanga ti gbagba ti kodro ti azo ni awe,+ ye kue ayeke ga ande ti mbi na mbi yeke ga zo ti mosoro, a futi Jérusalem awe.’ 3 Tongaso, bâ tënë so Jéhovah, Seigneur ti dunia kue, atene la: ‘Mo Tyr, mbi yeke ga na terê ti mo, mbi yeke mû gbâ ti azo ti amara ti ga na ni na terê ti mo tongana ti so ngu-ingo ayeke sara si amapo ni alondo na nduzu. 4 Ala yeke futi ande amur ti Tyr na ala yeke kungbi atour ti lo na sese,+ mbi yeke bungbi fuku ti sese ni na mbi yeke sara si lo ga mbeni kota tênë so aza zango na so ndö ni ayeke senge. 5 Lo yeke ga ande mbeni ndo na bê ti ngu-ingo so+ azo agbara akota gbanda ti ala dä ti tene ahule.’

“Jéhovah, Seigneur ti dunia kue, atene: ‘Mbi wani mbi sara tënë ni awe, lo yeke ga tongana ye so amû ahon na ni. 6 Mbi yeke fâ ande na épée azo ti akete kodro* ti lo so ayeke na terê ni, na azo ayeke hinga ande so mbi Jéhovah la.’

7 “Bâ tënë so Jéhovah, Seigneur ti dunia kue, atene la: ‘Mbi yeke mû Gbia Nébucadnezzar* na mbage ti nord ti ga na lo na terê ti Tyr.+ Lo yeke gbia ti agbia,+ lo yeke na ambarata,+ apuse ti mbarata,+ azo ti kpengo na mbarata nga aturugu* ti lo ayeke gbani gbani. 8 Lo yeke futi na épée azo ti akete kodro ti mo so ayeke na terê ni, lo yeke sara gbagba angoro ni kue, lo yeke sara camp ti ala na terê ti gbagba ti mo nga lo yeke yô kota vala na terê ti mo. 9 Lo yeke gu amur ti mo na masini ti kungbingo na aye nga lo yeke mû adö ti lo ti kungbi ande na atour ti mo na sese. 10 Ambarata ti lo ayeke duti ande gbani, tongaso ala yeke sara si poussière amû ndö ti mo kue, toto ti gere ti ambarata so aturugu ni akpe na ni, toto ti aroue nga na ti apuse ti mbarata ayeke yengi amur ti mo na ngoi so lo yeke lï na ayanga ti gbagba ti kodro ti mo tongana ti so azo ayeke lï na ngangu na yâ ti mbeni gbata so amur ni akungbi. 11 Ali ti gere ti ambarata ti lo ayeke dö alege ti gbata ti mo kue,+ lo yeke fâ azo ti mo na épée nga angangu pilier ti mo lo yeke tuku ni na sese. 12 Ala yeke mû amosoro ti mo nga ala yeke mû aye ti kango ti mo ti hon na ni,+ ala yeke kungbi amur ti mo na sese, ala yeke fâ apendere da ti mo na sese. Na pekoni, ala yeke bi na yâ ti ngu atênë ti mo, akeke ti da ti mo nga na sese ti mo.’

13 “‘Mbi yeke kaï totongo ti abia ti mo, na a yeke mä totongo ti aharpe ti mo mbeni pëpe.+ 14 Mbi yeke sara si mo ga mbeni kota tênë so ndö ni aza zango nga so ndö ni ayeke senge. Mo yeke ga ande mbeni ndo so azo agbara akota gbanda ti ala dä ti tene ahule.+ A yeke kiri ti leke mo lâ oko pëpe, mbi Jéhovah, mbi sara tënë ni awe,’ tënë ti yanga ti Jéhovah, Seigneur ti dunia kue, la.

15 “Bâ tënë so Jéhovah, Seigneur ti dunia kue, atene na Tyr la: ‘Na ngoi so a yeke mä toto ti tingo ti mo, tongana azo so ayeke gue ti kui ayeke dema, na ngoi so a yeke fâ azo na yâ ti kodro ti mo, azoa ayeke dö na mbeto ape?+ 16 Amokonzi kue ti ngu-ingo ayeke zia trône ti ala na ala yeke zi ayongoro bongo ti ala nga ala yeke zi abongo ti ala so a kpo apendere dessin na terê ni na ala yeke dö na mbeto. Ala yeke duti ande na yâ ti sese na ala yeke dö na mbeto lakue, na ala yeke bâ mo juska li ti ala akpe.+ 17 Ala yeke he ande bia ti vundu*+ na ndö ti mo, ala tene:

“Aï! Mo gbata so a gonda mo lani mingi so, mo so mo yeke na popo ti ngu-ingo so, bâ a futi mo awe!+

19 “Bâ tënë so Jéhovah, Seigneur ti dunia kue, atene la: ‘Na ngoi so mbi yeke futi mo, legeoko tongana agbata so azo asara kodro na yâ ni pëpe, na ngoi so mbi yeke sara si ngu so ayeke sua amene mo nga akota ngu akungbi na ndö ti mo ti mene mo,+ 20 mbi yeke mû ande mo na ala so ayeke descend na yâ ti kota dû* ti bungbi ala legeoko na azo ti giriri. Mbi yeke sara si mo sara kodro na ndo so ayeke na gbe ni mingi ahon tanga ti ando kue, legeoko tongana angbene ndo so a futi ni awe, legeoko na ala so ayeke descend na yâ ti kota dû,+ tongaso si azo asara kodro na yâ ti mo pëpe. Na pekoni, mbi yeke gonda kodro ti azo so angbâ na fini.

21 “‘Mbi yeke sara si kota mbeto aga na ndö ti mo na mo yeke duti dä mbeni pëpe.+ A yeke gi mo ande me a yeke wara mo lâ oko pëpe,’ tënë ti yanga ti Jéhovah, Seigneur ti dunia kue, la.”

27 Jéhovah akiri asara tënë na mbi, atene: 2 “Ti mo, molenge ti zo, mo he mbeni bia ti vundu* na ndö ti Tyr,+ 3 na mo tene na Tyr:

“Mo Tyr, mo wani mo tene: ‘Mbi yeke tâ pendere mingi.’+

 7 A mû lin so anzoroko nde nde ayeke na terê ni, so alondo na Égypte, si a sara na bongo ti voile ti mo.

Abongo so a zia ni na terê ti bateau ni ti kanga lege na lâ nga na ngu-nzapa, a sara ni na laine so a sara na kamba ti bleu nga na kamba ti violet so alondo na azoa ti Élishah.+

 8 Azo ti kodro ti Sidon na ala ti Arvad+ ayeke azo ti mo so ayeke gbi kâî.

Mo Tyr, azo ti mo so ayeke na kode mingi ayeke lani azo ti kpengo na bateau ti mo.+

 9 Azo ti Guébal+ so ahinga kua nzoni mingi* nga so ayeke na kode mingi ayeke kanga lê ti adû ti terê ti bateau ti mo.+

Abateau kue ti kota ngu-ingo nga na azo ti kpengo na ni aga na ndo ti mo ti kä akungba.

10 Azo ti Perse, ti Ludim na Put+ ayeke na popo ti aturugu ti mo, azo ti bira.

Ala yeke croché avala ti ala nga na acasque ti ala na nduzu na yâ ti mo, na a yeke ala si asara pendere ti mo.

12 “‘“Azo ti Tarsis+ adë buze lani na mo ndali ti gbâ ti amosoro ti mo.+ Ala mû argent, wen, étain nga na plomb ti changé na akungba ti mo.+ 13 Javan, Tubal+ na Méshek+ adë buze lani na mo, ala mû angbâa+ nga na aye ti ala ti cuivre ti changé na akungba ti mo ti kango ni. 14 Azo ti Togarmah+ amû ambarata, angangu mbarata so akpe loro mingi nga na avuko kororo* ti changé na akungba ti mo. 15 Azo ti Dedan+ adë buze lani na mo; mo mû awadengo buze ti azoa mingi na kua. Ala mû apembe ti doli nga na keke ti ébène+ ti futa na mo impôt so ala doit ti futa. 16 Azo ti Édom adë buze lani na mo ndali ti gbâ ti akungba ti mo. Ala mû turquoise, bongo ti laine so ayeke violet, bongo so a kpo apendere dessin na terê ni na anzoroko nde nde, apendere bongo, acorail nga na rubis, ala mû ni ti changé na akungba ti mo.

17 “‘“Juda nga na azo ti kodro ti Israël adë buze lani na mo, ala mû blé ti Minnith,+ apendere kobe, mafuta ti otoro,+ mafuta nga na baume,+ ala mû ni ti changé na akungba ti mo.+

18 “‘“Damas+ adë buze lani na mo ndali ti gbâ ti akungba ti mo nga na amosoro ti mo kue, lo mû vin ti Helbon nga na laine ti Zahar ti changé na akungba ti mo. 19 Védan na Javan so ayeke na Uzal amû wen, casse* na sosongo so afun pendere, ti changé na akungba ti mo. 20 Dedan+ ayeke lani zo ti kango na mo abongo ti ziango na ndö ti mbarata ti tene zo aduti na ndö ni ti kpe na ni. 21 Mo mû lani azo ti kodro ti Arabie nga na amokonzi ti Kédar+ kue na kua, ala so ayeke azo ti kango akete taba, akoli-taba nga na angasa.+ 22 Awadengo buze ti Shéba na ti Raamah+ adë buze lani na mo. Ala mû mara ti ayombo nde nde kue so ayeke pendere mingi, atênë ti ngangu ngere nga na lor ti changé na akungba ti mo.+ 23 Haran,+ Cannéh, Éden,+ awadengo buze ti Shéba,+ Assur+ nga na Kilmad adë buze lani na mo. 24 Na lê ti gara ti mo, ala kä apendere bongo, akota bongo so a leke ni na kamba so nzoroko ni ayeke ti bleu na so a kpo apendere dessin na terê ni na anzoroko nde nde, atapis ti anzoroko nde nde; a kanga aye so kue nzoni na kamba.

28 Na ngoi so azo ti sarango kua na yâ ti abateau ti mo ayeke dekongo, akodro so ayeke na yanga ti ngu ayeke yengi.

32 Na yâ ti toto ti ala, ala yeke he mbeni bia ti vundu ngbanga ti mo, ala tene:

‘Zo wa la alingbi na Tyr fadeso zo wa? so fadeso ye ahunzi na lo awe kâ na bê ti ngu-ingo so.+

33 Na ngoi so akungba ti mo alondo lani na lê ti ngu-ingo aga, mo mû ye na gbâ ti azo alingbi na ala.+

Gbâ ti mosoro ti mo nga na akungba ti mo ti kango ni asara si agbia ti sese aga azo ti mosoro.+

36 Awadengo buze so ayeke na popo ti amara ayeke hûru ande yanga ti ala ndali ti ye so asi na mo.

28 Jéhovah akiri asara tënë na mbi, atene: 2 “Molenge ti zo, mo tene na mokonzi ti Tyr, mo tene: ‘Bâ tënë so Jéhovah, Seigneur ti dunia kue, atene la:

“So baba alï bê ti mo,+ si mo yeke tene: ‘Mbi yeke mbeni nzapa.

Mbi duti na ndö ti trône ti nzapa na bê ti ngu-ingo.’+

 3 Mo bâ ti mo, mo tene mo yeke na ndara ahon Daniel.+

Mbeni secret so a honde na mo ayeke dä pëpe.

6 “‘Tongaso, bâ tënë so Jéhovah, Seigneur ti dunia kue, atene la:

 9 Na devant ti zo so ayeke fâ mo, eskê mo yeke tene ande mo tene: ‘Mbi yeke mbeni nzapa’?

Na yâ ti maboko ti ala so ayeke bi nengo ti mo na sese, mo yeke duti ande mbeni nzapa pëpe, me mo yeke gï senge zo.”’

11 Jéhovah akiri asara tënë na mbi, atene: 12 “Molenge ti zo, he mbeni bia ti vundu* na ndö ti gbia ti Tyr, na mo tene na lo: ‘Bâ tënë so Jéhovah, Seigneur ti dunia kue, atene la:

13 Mo yeke ândö na Éden, yaka ti Nzapa.

A sara amonture ni nga na acadre ni kue na lor.

A leke lani aye so kue na lango so a créé mo.

14 Mbi soro mo mbi zia mo tongana chérubin so akanga ndö ti ye na akpangbi* ti lo.

Mo yeke lani na ndö ti hoto ti Nzapa,+ hoto so ayeke nzoni-kue, mo yeke tambela na popo ti atênë so wâ ayeke za na terê ni.

17 Ndali ti pendere ti mo, baba alï bê ti mo.+

Ndali ti pendere gloire ti mo, mo buba ndara ti mo.+

Mbi yeke bi mo ande na sese.+

Mbi yeke zia mo ande na devant ti agbia na ala yeke bâ mo, li ti ala akpe.

18 Ndali ti so faute ti mo ayeke kota mingi nga ndali ti dengo buze ti likisi ti mo, mo bi nengo ti ando ti mo so ayeke nzoni-kue so na sese.

Mbi yeke sara si wâ alondo na yâ ti mo, na a yeke gbi mo kue.+

Mbi yeke sara si mo ga mburu ti wâ na ndö ti sese na lê ti azo so ayeke bâ mo.

19 Azo kue so ahinga mo lani na popo ti amara, ala yeke bâ mo na li ti ala ayeke kpe.+

20 Jéhovah akiri asara tënë na mbi, atene: 21 “Molenge ti zo, tourné lê ti mo na mbage ti Sidon+ na mo tene prophétie ti ngbanga na ndö ti lo. 22 Tene na lo, mo tene: ‘Bâ tënë so Jéhovah, Seigneur ti dunia kue, atene la:

“Mo Sidon, bâ mbi yeke ga na terê ti mo, mbi yeke wara ande gloire na yâ ti mo.

Na ngoi so mbi yeke fâ ngbanga na ndö ti lo azo ayeke hinga so mbi yeke Jéhovah, na mbi yeke ga nzoni-kue na yâ ti kodro ni.

23 Mbi yeke tokua ande sioni kobela na yâ ti kodro ni, so ayeke fâ gbâ ti azo na mênë ayeke sua na ndö ti alege ti kodro ni.

Na ngoi so épée ayeke londo na ando nde nde kue ti ga na terê ti lo, azo so a yeke fâ ande ala ayeke tï na yâ ti kodro ni.

Ala yeke hinga ande so mbi yeke Jéhovah.+

24 “‘“Tongaso, asioni kî+ nga na asisi so akpo zo ason mingi so ayeke ngoro azo ti Israël encore ape, ala so ayeke bâ azo ti Israël tongana ambumbuse zo so. Azo ayeke hinga so mbi yeke Jéhovah, Seigneur ti dunia kue. ”’

25 “‘Bâ tënë so Jéhovah, Seigneur ti dunia kue, atene la: “Na ngoi so mbi yeke mû azo ti Israël na yâ ti akodro so a kangbi ala dä,+ mbi kiri mbi bungbi ala na ndo oko, mbi yeke ga ande nzoni-kue na popo ti ala na lê ti amara.+ Na pekoni, ala yeke sara kodro na ndö ti sese ti ala+ so mbi mû lani na wakua ti mbi Jacob.+ 26 Ala yeke sara ande kodro na ndö ti sese ni na mbeto pëpe,+ ala yeke leke da, ala yeke fâ ayaka ti vigne+ na ala yeke duti na mbeto pëpe na ngoi so mbi yeke fâ ngbanga na ndö ti azo kue so angoro ala si ayeke bâ ala tongana ambumbuse zo so.+ Ala yeke hinga ande so mbi yeke Jéhovah Nzapa ti ala.”’”

29 Na lango 12 ti nze bale-oko ti ngu bale-oko ni, Jéhovah asara tënë na mbi, lo tene: 2 “Molenge ti zo, mo tourné lê ti mo na mbage ti Pharaon, gbia ti Égypte, na mo tene prophétie ti ngbanga na ndö ti lo nga na ndö ti Égypte kue.+ 3 Mo tene: ‘Bâ tënë so Jéhovah, Seigneur ti dunia kue, atene la:

Mbi leke ni ndali ti mbi.’+

 4 Me mbi yeke zia ande ayango na ngbangba ti mo na mbi yeke sara si asusu ti Nil acalé na terê ti a-écaille ti mo.

Mbi yeke gboto mo na yâ ti Ngu ti Nil na asusu kue ti Nil so acalé na terê ti a-écaille ti mo ti sigi na ala na gigi.

 5 Mbi yeke bi mo na asusu ti Nil ni kue na yâ ti désert.

Mo yeke tï ande na yâ ti ngonda, a yeke wara lege ti bungbi anyama ti terê ti mo so akangbi kirikiri so pëpe.+

Mbi yeke sara si mo ga kobe ti anyama ti ngonda na ti andeke ti nduzu.+

8 “‘Tongaso, bâ tënë so Jéhovah, Seigneur ti dunia kue, atene la: “Bâ, mbi yeke ga na épée na terê ti mo,+ mbi yeke hunzi ande azo na anyama so ayeke na yâ ti kodro ti mo. 9 Kodro ti Égypte ayeke ga mbeni ndo so zo ayeke lango dä pëpe+ nga so abuba kue awe. Azo ti kodro ni ayeke hinga ande so mbi yeke Jéhovah, ndali ti so mo tene: ‘Ngu ti Nil ayeke ti mbi. Mbi la mbi sara ni.’+ 10 Ni la, mbi yeke ga na terê ti mo nga na terê ti Nil ti mo ni, na mbi yeke sara si kodro ti Égypte aga mbeni ndo so abuba kue awe nga so ahule, mbeni ndo so afuti awe+ ti londo na Migdol+ ti si na Syène+ juska na katikati ti Éthiopie. 11 Atâa zo wala nyama ayeke fâ yâ ti kodro ni pëpe.+ Zo ayeke sara kodro ande dä pëpe ngu 40. 12 Mbi yeke sara ande si kodro ti Égypte aga tâ mbeni ndo so abuba kue ahon tanga ti ando kue. Ngu 40,+ agbata ni ayeke ga ande ando so ayeke tâ mbeni ndo so abuba kue ahon tanga ti ando kue. Mbi yeke kangbi ande azo ti Égypte kirikiri na popo ti amara, na mbi yeke sara si ala hon kirikiri na yâ ti akodro ni.”+

13 “‘Bâ tënë so Jéhovah, Seigneur ti dunia kue, atene la: “Na peko ti ngu 40, mbi yeke mû ande azo ti Égypte na yâ ti akodro so a kangbi ala dä ti kiri na ala na ndo ti ala,+ 14 mbi yeke mû azo ti Égypte so a gbu ala lani na ngbâa so, mbi yeke kiri na ala na kodro ti Pathros,+ kodro so a dü ala dä, na ala yeke ga ande mbeni royaume so ayeke kete mingi. 15 Égypte ayeke ga ande kete na gbe ti atanga ti aroyaume, na lo yeke komande na ndö ti atanga ti amara mbeni pëpe,+ mbi yeke sara si lo ga kete mingi tongaso si lo wara lege ti komande na ndö ti ambeni mara pëpe.+ 16 Azo ti Israël ayeke kiri ande ti zia bê ti ala na ndö ti lo mbeni pëpe,+ me tongana ala mä iri ti Égypte, a yeke dabe ti ala gï na faute ti ala na ngoi so ala tourné na mbage ti azo ti Égypte ni ti hunda mungo maboko. Ala yeke hinga ande so mbi yeke Jéhovah, Seigneur ti dunia kue.”’”

17 Na yâ ti ngu 27 ni, na yâ ti kozo nze ti ngu ni, na kozo lango ti nze ni, Jéhovah asara tënë na mbi, lo tene: 18 “Molenge ti zo, Nébucadnezzar,*+ gbia ti Babylone, apusu aturugu ti lo ti sara ngangu kua na terê ti Tyr.+ Li ti ala kue amboko nga ndö ti go ti ala kue amboko na kä. Me lo na aturugu ti lo awara futa oko pëpe ndali ti ngangu kua so lo sara na terê ti Tyr.

19 “Tongaso, bâ tënë so Jéhovah, Seigneur ti dunia kue, atene la: ‘Bâ, mbi mû kodro ti Égypte na Nébucadnezzar,* gbia ti Babylone,+ na lo yeke mû ande amosoro ti kodro ni ti hon na ni, lo yeke gbu aye mingi na yâ ti kodro ni ti ga ti lo. A yeke ga ande futa ti aturugu ti lo.’

20 “‘Mbi yeke mû ande kodro ti Égypte na lo tongana futa ti peko ti ngangu kua ti lo na terê ti Tyr, ngbanga ti so ala sara kua ndali ti mbi,’+ tënë ti yanga ti Jéhovah, Seigneur ti dunia kue, la.

21 “Na lango ni so, mbi yeke sara ande si mbeni didi asigi ndali ti azo ti Israël,*+ na mbi yeke mû lege na mo ti sara tënë na popo ti ala. Ala yeke hinga ande so mbi yeke Jéhovah.”

30 Jéhovah akiri asara tënë na mbi, atene: 2 “Molenge ti zo, tene prophétie, mo tene: ‘Bâ tënë so Jéhovah, Seigneur ti dunia kue, atene la:

“Ala toto atene: ‘Aï! Lango ni ayeke ga.’

 3 Lango ni ayeke pusu nduru, biani, lango ti Jéhovah ayeke pusu nduru.+

A yeke duti ande mbeni lango ti ambinda,+ mbeni ngoi ti fango ngbanga na ndö ti amara.+

 4 Épée ayeke ga na terê ti Égypte, mbeto ayeke gbu azo ngangu na yâ ti Éthiopie na ngoi so a yeke fâ azo na Égypte.

A mû amosoro ti kodro ni a hon na ni, nga afondation ti kodro ni.+

 6 Bâ tënë so Jéhovah atene la:

“‘Ti londo na Migdol+ ti si na Syène,+ ala yeke kui ande kuâ ti épée,’ tënë ti yanga ti Jéhovah, Seigneur ti dunia kue, la. 7 ‘A yeke sara ande si akodro so aga ando so azo ayeke lango dä pëpe, na agbata ni ayeke buba ande ahon agbata kue.+ 8 Na ngoi so mbi yeke bi wâ na yâ ti Égypte na a yeke futi azo kue so amû maboko na lo, ala yeke hinga ande so mbi yeke Jéhovah. 9 Na lango ni so, mbi yeke tokua azo na abateau ti sara si azo ti Éthiopie so ala bâ terê ti ala wani so ala lingbi awe so adö na mbeto. Mbeto ayeke gbu ala ngangu na lango so aye so ayeke ga na ndö ti Égypte, lango ni so ayeke si biani.’

10 “Bâ tënë so Jéhovah, Seigneur ti dunia kue, atene la: ‘Mbi yeke ga na Nébucadnezzar,* gbia ti Babylone,+ ti futi gbâ ti azo ti Égypte. 11 Mbi yeke mû lo na aturugu ti lo so ayeke sioni mingi na popo ti amara+ so ti ga na ala si ala yeke futi ande kodro ni. Ala yeke gboto a-épée ti ala na terê ti Égypte, na akuâ ayeke mû yâ ti kodro ni kue.+ 12 Mbi yeke sara si acanal ti Ngu ti Nil+ aga kuru sese na mbi yeke kä kodro ni na asioni zo. Mbi yeke sara si kodro ni nga na aye kue so ayeke na yâ ni aga mbeni ndo so abuba kue na maboko ti awande.+ Mbi Jéhovah, mbi sara tënë awe.’

13 “Bâ tënë so Jéhovah, Seigneur ti dunia kue, atene la: ‘Mbi yeke futi nga afungo yanda* ti ala, na mbi yeke futi anzapa ti Noph*+ so ayeke ambumbuse nzapa. A yeke wara ande mokonzi na yâ ti kodro ti Égypte mbeni pëpe, na mbi yeke zia mbeto na yâ ti kodro ti Égypte.+ 14 Mbi yeke sara si azo alango na yâ ti Pathros+ mbeni pëpe, mbi yeke bi wâ na yâ ti Zoan na mbi yeke fâ ngbanga na ndö ti No.*+ 15 Mbi yeke fa ande ngonzo ti mbi kue na ndö ti Sîn, gbata ti Égypte so a yeke ngangu na awato ti kinda ni so, na mbi yeke futi azo ti No. 16 Mbi yeke bi ande wâ na yâ ti kodro ti Égypte. Mbeto ayeke gbu ande azo ti Sîn ngangu, a yeke kôro ande dû na yâ ti mur ti No, na a yeke sara bira na Noph* na kota lâ. 17 Amaseka-koli ti kodro ti On* na ti Pibéseth ayeke kui ande kuâ ti épée, a yeke gbu azo ti agbata ni ti hon na ala na ngbâa. 18 Kâ na Tahpanès, na ngoi so mbi yeke kungbi ande abarre ti joug ti Égypte,+ kota lâ ayeke ga vukongo ndo. Ngangu ti lo so lo yeke pika kate ndali ni so ayeke hunzi ande,+ ambinda ayeke mû ndö ti lo kue nga a yeke gbu azo ti agbata ni ti hon na ala na ngbâa.+ 19 Mbi yeke dë ngbanga ande na ndö ti Égypte, na ala yeke hinga ande atene mbi Jéhovah la.’”

20 Na lango mbasambala ti kozo nze ti ngu 11 ni, Jéhovah asara tënë na mbi, atene: 21 “Molenge ti zo, mbi kungbi maboko ti Pharaon, gbia ti Égypte awe. A yeke zia yorö na lê ti kä ni pëpe ndali ti tene amü wala a yeke kanga ni na bongo pëpe tongaso si lo wara ngangu pëpe ti gbu épée.”

22 “Tongaso, bâ tënë so Jéhovah, Seigneur ti dunia kue, atene la: ‘Bâ, mbi yeke ga na terê ti Pharaon, gbia ti Égypte,+ mbi yeke kungbi ande amaboko ti lo, ti so angbâ nzoni nga na ti so akungbi awe so,+ na mbi yeke sara si épée alondo na maboko ti lo atï.+ 23 Na pekoni, mbi yeke kangbi azo ti Égypte na popo ti amara nga mbi yeke sara si ala hon kirikiri na yâ ti akodro.+ 24 Mbi yeke sara si amaboko ti gbia ti Babylone+ akpengba,* mbi yeke zia épée ti mbi na yâ ti maboko ti lo,+ mbi yeke kungbi amaboko ti Pharaon na lo yeke dema ngangu na devant ti gbia ti Babylone tongana zo so ayeke gue ti kui. 25 Mbi yeke sara si amaboko ti gbia ti Babylone akpengba, me amaboko ti Pharaon ayeke tï. Na ngoi so mbi yeke zia épée ti mbi na yâ ti maboko ti gbia ti Babylone na lo yeke gue na ni na terê ti kodro ti Égypte, ala yeke hinga ande so mbi yeke Jéhovah.+ 26 Mbi yeke kangbi azo ti Égypte na popo ti amara nga mbi yeke sara si ala hon kirikiri na yâ ti akodro.+ Ala yeke hinga ande so mbi yeke Jéhovah.’”

31 Na kozo lango ti ota nze ti ngu 11 ni, Jéhovah asara tënë na mbi, atene: 2 “Molenge ti zo, tene na Pharaon, gbia ti Égypte nga na gbâ ti azo ti lo, mo tene:+

‘Na lege ti kota ti mo ni so, mo kpa zo wa?

Li ni ayeke na yâ ti ambinda.

 4 Angu asara si keke ni aga kota, angu so alï mingi asara si lo yo na nduzu.

 5 Ndani la si lo kono lo yo mingi lo hon atanga ti akeke ti ngonda kue.

 8 Mbeni keke ti cèdre ti yâ ti yaka ti Nzapa+ ti haka na lo ayeke dä pëpe.

Mbeni keke so ayeke na yâ ti yaka ti Nzapa ti lingbi na pendere ti lo ayeke dä pëpe.

10 “Tongaso, bâ tënë so Jéhovah, Seigneur ti dunia kue, atene la: ‘Ndali ti so lo yo na nduzu mingi, si li ti lo ayeke na yâ ti ambinda nga baba alï bê ti lo ndali ti yongo ti lo so, 11 mbi yeke zia lo ande na maboko ti ngangu gbia ti amara.+ Gbia ni so ayeke sara ande sioni na lo na mbi yeke ke lo ande ndali ti sioni ti lo. 12 Awande, ala so ayeke sioni mingi na popo ti amara, ayeke dë lo na sese ande, ala yeke zia lo ngbâ na li ti ahoto, akugbe ti lo ayeke tuku na yâ ti apopo-hoto kue, akete maboko ti lo ayeke fâ ti tï na sese na terê ti angu kue so ayeke sua na yâ ti kodro ni.+ Azo kue ti sese ayeke zia gbe ti dê ti lo ti hon. 13 Andeke kue ti nduzu ayeke lango ande na ndö ti keke ni so atï na sese awe so nga anyama ti ngonda kue ayeke lango na ndö ti akete maboko ni.+ 14 Ye ni asi tongaso ti tene mbeni keke so ayeke na terê ti ngu ayo na nduzu mingi tongaso pëpe, na li ti lo asi na yâ ti ambinda pëpe, nga keke so ngu asua na terê ni nzoni alingbi ti yo ti lingbi na ala pëpe. A yeke fâ ande ala kue, ala yeke gue na ndo so ayeke na gbe ti sese, legeoko na amolenge ti azo so ayeke descend na yâ ti dû.’*

15 “Bâ tënë so Jéhovah, Seigneur ti dunia kue, atene la: ‘Na lango so lo yeke descend na yâ ti Dû ti kuâ,* mbi yeke sara ande si azo aduti na vundu. Tongaso, mbi yeke kanga ndö ti angu so alï mingi nga mbi yeke gbanzi angu ti lo so ayeke sua tongaso si gbâ ti angu angbâ place oko. Ndali ti ye so, mbi yeke sara si ndo avuko na Liban nga akeke ti ngonda kue ayeke hule. 16 Na mango totongo ti tingo ti lo, mbi yeke sara si amara adö na mbeto na ngoi so mbi yeke sara si lo descend na yâ ti Dû ti kuâ legeoko na ala so ayeke gue na yâ ni, nga akeke kue ti Éden,+ akeke so ayeke pendere mingi so ayeke ti Liban, akeke kue so ngu asua na terê ti ala nzoni, ande na gbe ti sese kâ bê ti ala ayeke dë. 17 Ala descend na Dû ti kuâ* legeoko na lo, legeoko na ala so a fâ ala na épée,+ ala so amû maboko na lo na so aduti lani na gbe ti dê ti lo na popo ti amara.’+

18 “‘Keke wa na popo ti akeke ti Éden alingbi lani na gloire ti mo nga na kota ti mo?+ Me a yeke dë mo ande na sese legeoko na akeke ti Éden si ala gue na ndo so ayeke na gbe ti sese. Mo yeke lango ande na popo ti azo so afâ ganza pëpe, ala so a fâ ala na épée. Bâ ye so ayeke si ande na Pharaon nga na gbâ ti azo ti lo la,’ tënë ti yanga ti Jéhovah, Seigneur ti dunia kue, la.”

32 Na kozo lango ti nze 12 ti ngu 12 ni, Jéhovah akiri asara tënë na mbi, atene: 2 “Molenge ti zo, mo he mbeni bia ti vundu* na ndö ti Pharaon, gbia ti Égypte, mo tene:

 3 Bâ tënë so Jéhovah, Seigneur ti dunia kue, atene la:

 7 ‘Na ngoi so mo yeke kui, mbi yeke kanga ande lê ti nduzu na mbi yeke sara si atongoro avuko.

11 Bâ tënë so Jéhovah, Seigneur ti dunia kue, atene la:

‘Épée ti gbia ti Babylone ayeke ga ande na ndö ti mo.+

12 Mbi yeke sara si gbâ ti azo ti mo kue akui kuâ ti épée na maboko ti angangu zo ti bira.

Ala so ayeke sara sioni mingi na zo ahon tanga ti amara kue.+

Ala yeke sara si baba ti Égypte atï na sese, na a yeke futi ande gbâ ti azo ti lo kue.+

16 ‘So ayeke bia ti vundu, azo ayeke he ni ande biani.

Amolenge-wali ti amara ayeke he ni ande.

Ala yeke he ni ande na ndö ti Égypte nga na ndö ti gbâ ti azo ti lo,’ tënë ti yanga ti Jéhovah, Seigneur ti dunia kue, la.”

17 Na yâ ti ngu 12 ni, na lango 15 ti nze ni, Jéhovah asara tënë na mbi, atene: 18 “Molenge ti zo, mo toto na ndö ti gbâ ti azo ti Égypte na mo tokua lo na ndo so ayeke na gbe ti sese, lo na amolenge-wali ti amara so ayeke ngangu mingi, legeoko na azo so ayeke descend na yâ ti dû.*

19 “‘Mo hon zo wa na pendere ti mo ni? Mo gue na gbe ti sese kâ, na mo lango legeoko na azo so afâ ganza pëpe so!’

20 “‘Ala yeke kui na popo ti azo so akui kuâ ti épée.+ A zia lo na lê ti épée; a gboto lo legeoko na gbâ ti azo ti lo kue.

21 “‘Kâ na yâ ti Dû ti kuâ ni,* angangu zo ti bira ayeke sara ande tënë na lo nga na azo so amû maboko na lo. Ala yeke descend ande biani na gbe ti sese; ala yeke kui kuâ ti épée na ala yeke lango gï tongana azo so afâ ganza pëpe. 22 Assyrie na bungbi ti azo ti lo kue ayeke kâ. Adû ti kuâ ti ala kue angoro lo, ala kue a fâ ala na épée.+ 23 Adû ti kuâ ti lo ayeke kâ na yâ ti dû,* bungbi ti azo ti lo angoro dû ti kuâ ti lo, ala kue so akui kuâ ti épée, ngbanga ti so ala sara si mbeto aga na yâ ti kodro ti azo so ayeke na fini.

24 “‘Élam+ ayeke kâ na gbâ ti azo ti lo so angoro dû ti kuâ ti lo, ala kue so a fâ ala na épée. Ala yeke azo so afâ ganza pëpe, ala descend na ni tongaso na ndo so ayeke na gbe ti sese, ala so asara si mbeto aga na yâ ti kodro ti azo so ayeke na fini. Ala yeke yô kamene ti ala na ndö ti ala legeoko na ala so ayeke descend na yâ ti dû.* 25 A yeke na popo ti azo so a fâ ala awe si a leke gbogbo ndali ti lo nga ndali ti gbâ ti azo ti lo kue so angoro adû ti kuâ ti lo. Ala kue ayeke azo so afâ ganza pëpe, so a fâ ala na épée ngbanga ti so ala sara si mbeto aga na yâ ti kodro ti azo so ayeke na fini. Ala yeke yô ande kamene ti ala na ndö ti ala legeoko na ala so ayeke descend na yâ ti dû.* A zia lo na popo ti azo so a fâ ala awe.

26 “‘Kâ, a yeke wara Méshek na Tubal+ nga na gbâ ti azo ti ala kue. Adû ti kuâ ti ala angoro lo kue. Ala kue ayeke azo so afâ ganza pëpe, a kpo yâ ti ala na épée, ngbanga ti so ala sara si mbeto aga na yâ ti kodro ti azo so ayeke na fini. 27 Ala yeke lango legeoko na angangu zo ti bira so a fâ ala na ganza pëpe, ala so akui, ala so adescend na Dû ti kuâ* na aye ti bira ti ala. Ala yeke zia a-épée ti ala na gbe ti li ti ala,* na asiokpari ti ala ayeke na ndö ti abio ti ala, ngbanga ti so ala sara si mbeto aga na yâ ti kodro ti azo so ayeke na fini. 28 Me ti mo, a yeke neka mo ande na popo ti azo so afâ ganza pëpe na mo yeke lango legeoko na ala so akui kuâ ti épée.

29 “‘Édom+ ayeke kâ, agbia ti lo nga amokonzi ti lo kue, ala so, atâa so ngangu ti ala ayeke mingi, a zia ala na popo ti ala so a fâ ala na épée. Ala nga ala lango legeoko na azo so afâ ganza pëpe+ nga na ala so ayeke descend na yâ ti dû.*

30 “‘Amokonzi kue ti nord ayeke kâ legeoko na azo kue ti kodro ti Sidon,+ ala so adescend na gbe ti sese na kamene legeoko na ala so a fâ ala, atâa so ala zia mbeto na yâ ti azo ndali ti ngangu so ala yeke na ni. Ala yeke azo so afâ ganza pëpe, ala yeke lango ande legeoko na ala so a fâ ala na épée nga ala yeke yô kamene ti ala na ndö ti ala legeoko na ala so ayeke descend na dû.*

31 “‘Pharaon ayeke bâ ande aye so kue, bê ti lo ayeke dë ndali ti aye kue so asi na gbâ ti azo ti lo.+ Pharaon nga na aturugu ti lo kue ayeke kui ande kuâ ti épée’, tënë ti yanga ti Jéhovah, Seigneur ti dunia kue, la.

32 “‘So Pharaon asara si mbeto aga na yâ ti kodro ti azo so ayeke na fini, a yeke mû lo nga na gbâ ti azo ti lo kue ti zia ala ande ala lango na terê ti azo so afâ ganza pëpe, na terê ti ala so a fâ ala na épée,’ tënë ti yanga ti Jéhovah, Seigneur ti dunia kue, la.”

33 Jéhovah asara tënë na mbi, atene: 2 “Molenge ti zo, tene na azo ti kodro ti mo,+ mo tene:

“‘Na tapande tongana mbi ga na épée na ndö ti mbeni kodro,+ si azo ti kodro ni kue asoro mbeni zo na ala zia lo sinziri ti ala, 3 na lo bâ épée ni so ayeke ga na ndö ti kodro ni si lo hûru didi ti sara tënë ni na azo ni,+ 4 tongana mbeni zo amä toto ti didi ni me lo sara sanka ti gbotongo mê ni,+ si épée ni aga afâ lo, mênë ti lo ayeke na li ti lo wani.+ 5 Lo mä toto ti didi ni me lo sara sanka ti gbotongo mê ni, mênë ti lo ayeke na li ti lo wani. Tongana fade lo sara ye alingbi na gbotongo mê ni, ka lo sö fini* ti lo.

6 “‘Me tongana sinziri ni abâ épée ni na gango ni si lo hûru didi ni pëpe+ nga si azo ni amä gbotongo mê ni pëpe si épée ni aga afâ mbeni zo, zo ni so ayeke kui ndali ti faute ti lo wani me mbi yeke hunda ande mênë ti lo na maboko ti sinziri ni.’+

7 “Âdu ti mo, molenge ti zo, mbi zia mo tongana sinziri na ndö ti azo ti Israël. Tongana mo mä mbeni tënë na yanga ti mbi, a lingbi mo gboto mê ti ala na mbi.+ 8 Tongana mbi tene na zo ti sioni, mbi tene: ‘Mo zo ti sioni, ti tâ tënë ni mo yeke kui!’+ me mo sara tënë ni na lo ti gboto mê ti lo pëpe ti tene lo changé lege ti lo, lo yeke kui ndali ti faute ti lo+ ndali ti so lo yeke zo ti sioni, me mbi yeke hunda mênë ti lo na tïtî mo. 9 Me tongana mo gboto mê ti zo ti sioni ti changé lege ti lo na lo ke ti changé, lo yeke kui ndali ti faute ti lo+ me ti mo, mo yeke sö ande fini* ti mo.+

10 “Molenge ti zo, tene na azo ti Israël, mo tene: ‘Ala tene: “Kengo yanga so e ke nga na asiokpari ti e ane na ndö ti e mingi na asara si e nge ngengo.+ Tongaso e yeke ngbâ ande na fini tongana nyen?”’+ 11 Mo tene na ala: ‘Jéhovah, Seigneur ti dunia kue, atene: “Mbi so mbi yeke na fini, mbi deba yanga, mbi tene, mbi wara ngia pëpe tongana mbeni zo ti sioni akui,+ me mbi ye si zo ti sioni achangé lege ti lo+ na lo ngbâ na fini.+ Ala changé, ala changé sioni lege ti ala.+ Ala ye ti kui ngbanga ti nyen? azo ti Israël.”’+

12 “Molenge ti zo, mo tene na azo ti kodro ti mo, mo tene: ‘Mbilimbili ti zo ti mbilimbili ayeke sö lo pëpe na ngoi so lo ke yanga ti mbi.+ Nga sioni ti zo ti sioni ayeke sara pëpe si lo pika gere ti lo na ngoi so lo zia lege ti sioni ti lo.+ Wala zo ti mbilimbili ayeke ngbâ na fini pëpe ndali ti mbilimbili ti lo na lango so lo sara siokpari.+ 13 Tongana mbi tene na zo ti mbilimbili, mbi tene: “Ti tâ tënë ni mo yeke ngbâ na fini,” me na pekoni lo zia bê ti lo gï na mbilimbili ti lo na lo sara ye ti sioni,*+ mbi yeke dabe ti mbi ande kete pëpe na aye ti mbilimbili so lo sara ândö, me lo yeke kui ndali ti sioni so lo sara.+

14 “‘Tongana mbi tene na zo ti sioni, mbi tene: “Ti tâ tënë ni mo yeke kui,” me na pekoni lo dö lege ti siokpari ti lo lo zia na lo sara ye so ayeke na lege ni nga ye ti mbilimbili,+ 15 lo kiri na aye so lo mû na place ti bon,+ lo futa aye so lo nzi,+ lo sara ye alingbi na andia ti gigi na lo sara ye ti sioni mbeni pëpe, ti tâ tënë ni lo yeke ngbâ na fini.+ Lo yeke kui pëpe. 16 Asiokpari so lo sara lani, mbi yeke dabe ti mbi na ni oko pëpe.+ Teti so lo sara ye so ayeke na lege ni nga ye ti mbilimbili, lo yeke ngbâ na fini.’+

17 “Me azo ti kodro ti mo atene: ‘Lege ti Jéhovah ayeke na lege ni pëpe,’ me ti tâ tënë ni a yeke lege ti ala la ayeke na lege ni pëpe.

18 “Tongana zo ti mbilimbili adö lege ti mbilimbili ti lo lo zia, na lo sara ye ti sioni, lo doit ti kui ndali ni.+ 19 Me tongana zo ti sioni adö lege ti sioni ti lo lo zia, na lo sara ye so ayeke na lege ni nga lo sara ye ti mbilimbili, lo yeke ngbâ ande na fini ndali ti so lo sara tongaso.+

20 “Me ala tene: ‘Lege ti Jéhovah ayeke na lege ni pëpe.’+ Ala, azo ti Israël, mbi yeke fâ ande ngbanga ti zo oko oko alingbi na lege ti lo.”

21 Na nda ni, na yâ ti ngu 12 ni, na lango oku ti nze bale-oko so a gbu e a hon na e na kodro-wande, mbeni koli so akpe Jérusalem aga atene na mbi:+ “A futi gbata ni awe!”+

22 Na lakui kozoni si koli so akpe so aga, maboko ti Jéhovah aga na ndö ti mbi na lo zi yanga ti mbi kozoni si koli ni aga na mbi na ndapre. Tongaso yanga ti mbi azi na mbi lingbi fadeso ti sara tënë.+

23 Na pekoni, Jéhovah asara tënë na mbi, atene: 24 “Molenge ti zo, azo so ayeke lango na ando so abuba kue+ so ayeke tene tënë so na ndö ti kodro ti Israël: ‘Abraham ayeke lani gï lo oko, me lo mû kodro ni+ ti ga ti lo. Me e ga fadeso mingi; nyen na nyen kue a mû kodro ni na e awe ti ga ti e.’

25 “Tongaso, tene na ala: ‘Bâ tënë so Jéhovah, Seigneur ti dunia kue, atene la: “Ala yeke te nyama so mênë ni+ angbâ dä, ala yeke bâ ndo na mbage ti afungo yanda* ti ala, na ala ngbâ ti tuku mênë.+ Sese ni ayeke ga ande ti ala? 26 Ala zia bê ti ala na ndö ti épée ti ala+ na ala bi terê ti ala ti sara ye so ayeke sioni mingi, ala yeke lango na awali ti amba ti ala.+ Sese ni ayeke ga ande ti ala tongana nyen?”’+

27 “Tongaso mo tene na ala mo tene: ‘Bâ tënë so Jéhovah, Seigneur ti dunia kue, atene la: “Mbi so mbi yeke na fini, mbi deba yanga, mbi tene, azo so ayeke lango na yâ ti ando so abuba kue so, ala yeke kui kuâ ti épée. Mbi yeke sara ande si azo so ayeke na yâ ti ngonda aga kobe ti anyama ti ngonda; nga ala so ayeke lango na yâ ti angangu gbata nga na yâ ti adû ti tênë, ala yeke kui ande na kobela.+ 28 Mbi yeke sara ande si kodro ni aga benyama+ na baba ti lo ayeke hunzi. Ahoto ti Israël ayeke ga benyama,+ zo ayeke hon na yâ ni pëpe. 29 Ala yeke hinga ande so mbi yeke Jéhovah, na ngoi so mbi yeke sara si kodro ni kue aga benyama+ ndali ti asioni ye kue so ala sara.”’+

30 “Molenge ti zo, azo ti kodro ti mo ayeke sara tënë ti mo na mba na terê ti amur nga na terê ti aporte ti ada.+ Ala yeke tene na mba, zo oko oko na aita ti lo, atene: ‘Ala ga, e mä tënë so Jéhovah atene.’ 31 Ala yeke ga ande gbani gbani ti duti na gbele mo tongana azo ti mbi. Ala yeke mä atënë ti mo, me ala yeke sara ye alingbi na ni pëpe.+ Ndali ti so ala yeke woko mo na tënë ti yanga ti ala, me bê ti ala asi singo na nzara ti warango ye ti likisi. 32 Bâ, na lê ti ala, mo yeke tongana bia ti bolingo, so a he ni na pendere totongo ti go na mozoko atoto na gbe ni, mozoko so a pika ni na kode na ye ti mozoko so a sara ni na kamba. Ala yeke mä ande atënë ti mo, me ala yeke sara ye alingbi na ni pëpe. 33 Me tongana a ga tâ tënë, ndali ti so a yeke ga tâ tënë biani, ala yeke hinga ande atene mbeni prophète ayeke na popo ti ala.”+

34 Jéhovah akiri asara tënë na mbi, atene: 2 “Molenge ti zo, mo tene prophétie ti ngbanga na ndö ti aberger ti Israël. Mo tene prophétie so na ndö ti ala mo tene: ‘Bâ tënë so Jéhovah, Seigneur ti dunia kue, atene la: “Mawa na aberger ti Israël+ so ayeke gi kobe gï na yanga ti ala wani! Eskê a yeke ataba si aberger adoit ti gi kobe na yanga ti ala ape?+ 3 Ala te mafuta ti anyama ni, ala yü bongo ti kuä ti terê ti anyama ni, ala fâ nyama so akono ahon tanga ti anyama ni,+ me ala gue na ataba ni pëpe ti te pere.+ 4 Ataba so awoko ala gi pëpe ti sara si ala wara ngangu, ataba so ayeke na kobela ala gi ti sava ala pëpe, ataba so awara kä ala gi ti kanga kä ti ala pëpe, ataba so ague yongoro ala gi ti mû ala ti kiri na ni pëpe nga ataba so agirisa awe+ ala gi peko ti ala pëpe. Me ala yeke komande na ndö ti ataba ni na ngangu nga ala yeke sara pasi na ala.+ 5 Tongaso, yâ ti anyama ni akangbi kirikiri ndali ti so berger ti fa lege na ala ayeke pëpe.+ Ala kangbi kirikiri na ala ga akobe ti yanga ti anyama ti ngonda kue. 6 Ataba ti mbi ague lani kirikiri na ndö ti akota hoto kue nga na akete hoto kue so ayo na nduzu. Ataba ti mbi akangbi lani kirikiri na ndö ti lê ti sese kue me zo oko agi peko ti ala pëpe wala agi ti wara ala pëpe.

7 “‘“Tongaso, ala aberger ni, ala mä tënë ti yanga ti Jéhovah: 8 ‘Jéhovah, Seigneur ti dunia kue, atene: “Mbi so mbi yeke na fini so, mbi deba yanga, mbi tene, mbi yeke sara ande mbeni ye. Mbi yeke sara mbeni ye ndali ti so ataba ti mbi aga anyama ti gbungo ni nga kobe ti yanga ti anyama ti ngonda kue, ndali ti so berger ayeke dä pëpe. Aberger ti mbi agi peko ti ataba ti mbi pëpe, me ala wani ayeke gi kobe gï na yanga ti ala wani na ala gue pëpe na ataba ti mbi ti te pere.”’ 9 Ni la, ala aberger ni, zia ala mä tënë ti yanga ti Jéhovah. 10 Bâ tënë so Jéhovah, Seigneur ti dunia kue, atene la: ‘Mbi yeke ga na terê ti aberger ni, na mbi yeke hunda ande ataba ti mbi na maboko ti ala. Mbi yeke tomba ala na kua ti batango ataba ti mbi, na aberger ni ayeke gi kobe na yanga ti ala wani pëpe.+ Mbi yeke zi ande ataba ti mbi na yanga ti aberger ni na ataba ni ayeke kiri ande ti duti kobe ti ala mbeni pëpe.’”

11 “‘Bâ tënë so Jéhovah, Seigneur ti dunia kue, atene la: “Mbi la, mbi yeke gi peko ti ataba ti mbi na mbi yeke bâ lege ti ala ande.+ 12 Mbi yeke bâ ande lege ti ataba ti mbi tongana ti so mbeni berger so awara ataba ti lo so yâ ti ala akangbi kirikiri na lo mû kobe na ala.+ Mbi yeke zi ala ande na ando kue so ala kangbi lani kirikiri dä na lango so ambinda amû ndo nga ndo avuko pitipiti.+ 13 Mbi yeke sigi ande na ala na popo ti amara, mbi yeke mû ala na yâ ti akodro ti bungbi ala kue ndo oko na mbi yeke gue na ala na sese ti ala. Mbi yeke gue na ala ande ti te pere na ndö ti ahoto ti Israël,+ na terê ti akota ngu nga na terê ti ando kue so ala sara kodro dä. 14 Mbi yeke gue na ala na mbeni pendere ndo ti tengo pere ti tene ala te pere kâ. Ndo ti tengo pere ti ala ayeke duti ande na ndö ti ahoto ti Israël so ayo na nduzu mingi.+ Ala yeke lango ande na yâ ti apendere ndo so pere asigi dä mingi,+ mbi yeke sara si ala te pere na ndö ti ahoto ti Israël na ando ti tengo pere so ayeke tâ pendere mingi.”

15 “‘Jéhovah, Seigneur ti dunia kue, atene: “Mbi wani la mbi yeke mû kobe na ataba ti mbi,+ na mbi yeke zia ala lango na sese.+ 16 Taba so agirisa, mbi yeke gi peko ti lo.+ Lo so ahon yongoro, mbi yeke mû lo ti kiri na lo. Lo so awara kä, mbi yeke kanga lê ti kä ni. Lo so awoko, mbi yeke mû ngangu na lo, me lo so akono nga na lo so ayeke na ngangu mbi yeke fâ ala. Kobe so mbi yeke mû na ala ayeke ngbanga so mbi yeke fâ na ndö ti ala.”

17 “‘Âdu ti ala ataba ti mbi, bâ tënë so mbi Jéhovah, Seigneur ti dunia kue, mbi tene la: “Mbi yeke fâ ngbanga na popo ti taba na taba, na popo ti akoli-taba na akoli-ngasa.+ 18 So ala yeke te pere na apendere ndo ti tengo pere so, a lingbi na ala ape? Ala doit ti dö tanga ni na gere ti ala? So ala nyon ngu so lê ni avuru tarara so, ala doit ti dö yâ ti ngu ni na gere ti ala ti buba lê ni? 19 Ataba ti mbi la ayeke te fadeso apere so ala dö ni na gere ti ala nga ayeke nyon ngu so ala dö yâ ni na gere ti ala si lê ni abuba so?”

20 “‘Ni la, bâ tënë so Jéhovah, Seigneur ti dunia kue, atene la: “Mbi la, mbi yeke fâ ande ngbanga na popo ti taba so akono na taba so ange ngengo, 21 ngbanga ti so ala mû terê ti kate ti ala nga na ndö ti go ti ala, ala pusu na ataba kue so terê ti ala ason. Ala mû nga adidi ti ala ti pusu na ataba ni so na ngangu juska ala kangbi ataba kirikiri na ando nde nde. 22 Mbi yeke bata ataba ti mbi, ala yeke ga nyama ti gbungo ni mbeni pëpe.+ Mbi yeke fâ ande ngbanga na popo ti taba na taba. 23 Mbi yeke soro mbeni berger ti bâ ndo na ndö ti ala.+ A yeke wakua ti mbi David,+ na lo yeke mû kobe na ataba ni. Lo wani lo yeke mû kobe na ala na lo yeke ga berger ti ala.+ 24 Mbi Jéhovah, mbi yeke ga Nzapa ti ala,+ na wakua ti mbi David ayeke ga mokonzi na popo ti ala.+ Mbi Jéhovah, mbi sara tënë awe.

25 “‘“Mbi yeke te ande mbele ti siriri na ala,+ na mbi yeke zi asioni nyama ti ngonda+ na yâ ti kodro ni, tongaso si ataba ti mbi aduti nzoni na benyama, na ala lango na yâ ti agbako.+ 26 Mbi yeke sara ande si na lege ti ala nga na lege ti sese so angoro kete hoto ti mbi azo awara tufa.+ Mbi yeke sara si ngu-nzapa apika na ngoi ni so alingbi. Mbi yeke sara si tufa ti mbi atuku tongana ngu-nzapa so apika.+ 27 Lengo ti akeke ti gbako ayeke sigi ande, sese ayeke sara si ye asigi.+ Ala yeke duti nzoni na yâ ti kodro ni. Ala yeke hinga ande so mbi yeke Jéhovah, na ngoi so mbi yeke fâ abarre ti joug ti ala+ na mbi yeke zi ala na maboko ti azo so asara ala na ngbâa. 28 Ala yeke kiri ande ti duti pëpe mbeni ye so amara agbu ni. Anyama ti ngonda ayeke te ala mbeni pëpe, ala yeke duti nzoni na zo oko ayeke zia mbeto na yâ ti ala pëpe.+

29 “‘“Mbi yeke leke ande ndali ti ala mbeni yaka so iri ni awu, na ala yeke kui nzara na yâ ti kodro ni mbeni pëpe,+ nga amara ayeke zia kamene na lê ti ala mbeni pëpe.+ 30 ‘Na pekoni, ala yeke hinga ande atene, mbi Jéhovah Nzapa ti ala, mbi yeke na terê ti ala, na azo ti Israël ayeke azo ti mbi,’+ tënë ti yanga ti Jéhovah, Seigneur ti dunia kue, la.”’

31 “‘Âdu ti ala ataba ti mbi+ so mbi yeke bâ lege ti ala, ala yeke azo, na mbi yeke Nzapa ti ala,’ tënë ti yanga ti Jéhovah, Seigneur ti dunia kue, la.”

35 Jéhovah akiri asara tënë na mbi, atene: 2 “Molenge ti zo, mo tourné lê ti mo na mbage ti Séir+ na ndo so ahoto ayeke dä na mo fa tënë ti aye ti sioni so ayeke si ande na lo.+ 3 Mo tene: ‘Bâ tënë so Jéhovah, Seigneur ti dunia kue, atene la: “Mo ndo so ahoto ayeke dä na Séir, bâ mbi yeke ga na terê ti mo, mbi yeke yôro maboko ti mbi na terê ti mo na mbi yeke sara si mo ga mbeni ndo so azo ayeke sara kodro dä pëpe.+ 4 Mbi yeke futi agbata ti mo, mo yeke ga mbeni ndo so azo ayeke sara kodro dä pëpe,+ mo yeke hinga so mbi yeke Jéhovah. 5 Lakue mo sara ye na sioni bê na terê ti azo ti Israël+ nga mo zia ala na lê ti épée na ngoi ti ye ti vundu so asi na ala, na ngoi ti ndangba punition ti ala.”’+

6 “‘Jéhovah, Seigneur ti dunia kue, atene: ‘Mbi so mbi yeke na fini, mbi deba yanga, mbi tene, mbi yeke leke mo ndali ti tukungo mênë, na tukungo mênë ayeke mû peko ti mo.+ So mo ke mênë lani, tukungo mênë la ayeke mû ande peko ti mo.+ 7 Mbi yeke sara si ndo so ahoto ayeke dä na Séir aga ndo so azo ayeke lango dä pëpe,+ mbi yeke fâ azo kue so ayeke hon na yâ ni. 8 Mbi yeke sara si kuâ ti azo so a fâ ala amû ndö ti ahoto ni kue. Ala so ayeke kui ande kuâ ti épée ayeke tï na ndö ti akete hoto ti mo, na yâ ti apopo-hoto ti mo nga na yanga ti angu ti kodro ti mo kue. 9 Mbi yeke sara si mo ga mbeni ndo so azo alango dä pëpe kpu na kpu, azo ayeke sara ande kodro na yâ ti agbata ti mo mbeni pëpe,+ na mo yeke hinga so mbi yeke Jéhovah.’

10 “Ndali ti so mo tene: ‘Amara use so nga na akodro use so kue ayeke ga ande ti mbi, e yeke mû ala use kue,’+ atâa so Jéhovah ayeke kâ. 11 Jéhovah, Seigneur ti dunia kue, atene: ‘Mbi so mbi yeke na fini, mbi deba yanga, mbi tene, mbi yeke sara ye alingbi na ngonzo nga na kota bê so mo fa ni ndali ti kengo so mo ke na ala.+ Mbi wani mbi yeke sara ande si a hinga mbi na popo ti ala na ngoi so mbi yeke fâ ngbanga na ndö ti mo. 12 Na pekoni, mo yeke hinga ande so mbi Jéhovah, mbi mä asioni tënë kue so mo tene na terê ti ahoto ti Israël ndali ti so mo tene: “Ala ga mbeni ndo so azo ayeke dä mbeni pëpe na a mû ala na e ti futi ala biani biani.”* 13 Na fandara, mo sara tënë na terê ti mbi, nga mo kiri mo sara gbâ ti atënë na terê ti mbi,+ me mbi mä ni kue.’

14 “Bâ tënë so Jéhovah, Seigneur ti dunia kue, atene la: ‘Na ngoi so mbi yeke sara si mo ga mbeni ndo so azo ayeke lango dä mbeni pëpe, sese kue ayeke duti ande na ngia. 15 Mo duti lani na ngia na ngoi so kodro ti Israël aga lani mbeni ndo so azo alango dä pëpe, me a yeke gï oko ye so la mbi yeke sara na mo.+ Mo ndo so ahoto ayeke dä na Séir, mo yeke ga mbeni ndo so abuba kue, so azo ayeke lango dä pëpe, sese ti Édom+ kue. Ala yeke hinga ande so mbi yeke Jéhovah.’”

36 “Âdu ti mo, molenge ti zo, tene prophétie so andu ahoto ti Israël, mo tene: ‘Ahoto ti Israël, ala mä tënë ti Jéhovah. 2 Bâ tënë so Jéhovah, Seigneur ti dunia kue, atene la: “Wato asara tënë na terê ti ala, lo tene: ‘Wûu! Même angbene ndo so ayeke na nduzu aga ti e awe!’”’+

3 “Tongaso, mo tene prophétie so, mo tene: ‘Bâ tënë so Jéhovah, Seigneur ti dunia kue, atene la: “Ndali ti so ala londo na ando nde nde ala ga ala sara si kodro ti mo aga ndo so azo alango dä mbeni pëpe nga ala sara bira na mo si mo ga ye ti tanga ti azo so angbâ na popo ti amara, nga azo angbâ ti sara tënë ti mo na ti pa mo,+ 4 tongaso, ala ahoto ti Israël, ala mä tënë ti yanga ti Jéhovah, Seigneur ti dunia kue! Bâ tënë so Jéhovah, Seigneur ti dunia kue, atene na ahoto, akete hoto, angu ti kodro ni, apopo-hoto, ando ni so abuba kue si zo alango dä pëpe so,+ agbata ni so azo ni adö ni azia si tanga ti azo ti amara so angoro ni aga anzi aye ti yâ ni na ahe ni na ngia so;+ 5 Jéhovah, Seigneur ti dunia kue, atene na ala: ‘Na lege ti ngonzo ti mbi so ayeke tongana wâ,+ mbi yeke sara tënë ti ke tanga ti azo ti amara nga na azo ti kodro ti Édom kue, ala so na kota ngia na bê ala bâ kodro ti mbi tongana mbumbuse ye+ nga ala mû ni ti ga ti ala, ala mû ando ti tengo pere ni nga ala nzi aye ti yâ ni.’”’+

6 “Tongaso, mo tene prophétie so andu kodro ti Israël, mo tene na akota hoto nga na akete hoto ni, angu ni nga na apopo-hoto ni, mo tene: ‘Bâ tënë so Jéhovah, Seigneur ti dunia kue, atene la: “Bâ, na yapungo terê nga na ngonzo mbi yeke sara tënë ndali ti so amara azia kamene na lê ti ala.”’+

7 “Tongaso, bâ tënë so Jéhovah, Seigneur ti dunia kue, atene la: ‘Mbi yôro maboko ti mbi na nduzu mbi deba mbi tene amara so angoro ala ayeke yô ande kamene ti ala na ndö ti ala wani.+ 8 Me ala, ahoto ti Israël, maboko ti akeke ti ala ayeke sigi ande na ayeke lë lengo ndali ti azo ti mbi, Israël,+ ndali ti so ala yeke kiri ande fafadeso. 9 Mbi yeke na ala, mbi yeke tourné na mbage ti ala, na a yeke fâ yaka na ndö ti ala nga a yeke lu lê ti kobe dä. 10 Mbi yeke sara si azo ti ala, azo ti Israël kue, aga gbani; azo ayeke lango na yâ ti agbata ni,+ nga ando ni so abuba awe so, a yeke kiri ti leke ni.+ 11 Mbi yeke sara si azo ti ala nga na anyama ti ala aga gbani.+ Ala yeke wu nga ala yeke dü mingi. Na mbi yeke sara si azo alango na yâ ti ala tongana ti ândö,+ mbi yeke sara si ala duti na mosoro ahon ti ândö,+ na ala yeke hinga so mbi yeke Jéhovah.+ 12 Mbi yeke sara si azo ti mbi, Israël, atambela na ndö ti ala na ala yeke mû ala ti ga ye ti ala.+ Ala yeke ga ye ti Israël na ala yeke kiri ti fâ amolenge ti ala mbeni pëpe.’”+

13 “Bâ tënë so Jéhovah, Seigneur ti dunia kue, atene la: ‘So ala yeke tene na mo, atene: “Mo yeke mbeni sese so ayeke futi azo na so ayeke fâ amolenge ti amara ti mo,”’ 14 ‘tongaso, mo yeke futi azo mbeni pëpe nga mo yeke fâ amolenge ti amara ti mo mbeni pëpe,’ tënë ti yanga ti Jéhovah, Seigneur ti dunia kue, la. 15 ‘Mbi yeke zia lege ande na amara ti zonga mo mbeni pëpe, wala ti tene azo atene sioni tënë na mo pëpe;+ ala yeke sara ande pëpe si amara ti mo akiri apika gere ti ala,’ tënë ti yanga ti Jéhovah, Seigneur ti dunia kue, la.”

16 Jéhovah akiri asara tënë na mbi, atene: 17 “Molenge ti zo, lani so azo ti Israël ayeke sara kodro na ndö ti sese ti ala, ala sara si sese ni aga sioni na lege ti asarango ye ti ala.+ Na lê ti mbi, asarango ye ti ala ayeke lani sioni tongana wali so aga sioni na ngoi so lo bâ yâ ti lo.+ 18 Tongaso, mbi fa lani ngonzo ti mbi na ndö ti ala ndali ti so ala tuku mênë mingi na yâ ti kodro ni+ nga ndali ti so ala buba kodro ni na afungo yanda* ti ala.+ 19 Mbi kangbi ala na popo ti amara na mbi sara si ala hon kirikiri na yâ ti akodro nde nde.+ Mbi fâ ngbanga na ndö ti ala alingbi na asarango ye ti ala. 20 Me tongana ala si kâ na amara so, azo abuba iri ti mbi so ayeke nzoni-kue+ so na azo ni atene na ala, atene: ‘Bâ, azo ti Jéhovah la, me ala zia kodro ti lo ni ala hon.’ 21 Ni la, mbi yeke sara mbeni ye ande ngbanga ti iri ti mbi so ayeke nzoni-kue, iri ti mbi so azo ti Israël abuba ni na popo ti amara so ala gue dä.”+

22 “Tongaso, mo tene na azo ti Israël, mo tene: ‘Bâ tënë so Jéhovah, Seigneur ti dunia kue, atene la: “Azo ti Israël, mbi yeke sara ye so ndali ti ala pëpe me ndali ti iri ti mbi so ayeke nzoni-kue, iri ti mbi so ala buba ni na popo ti amara so ala gue dä.”’+ 23 ‘Biani, mbi yeke sara ande si iri ti mbi, so ayeke kota mingi so, aga nzoni-kue,+ iri ti mbi so abuba na popo ti amara, na a yeke ala si abuba ni. Na ngoi so mbi yeke sara si iri ti mbi aga nzoni-kue na lê ti amara, amara ni ayeke hinga ande so mbi yeke Jéhovah,’+ tënë ti yanga ti Jéhovah, Seigneur ti dunia kue, la. 24 Mbi yeke mû ala na popo ti amara kue, mbi yeke bungbi ala na mbi yeke gue na ala na sese ti ala.+ 25 Mbi yeke fi nzoni ngu na ndö ti ala, na ala yeke ga nzoni.+ Mbi yeke zi sioni ye ti ala kue na terê ti ala,+ mbi yeke zi nga afungo yanda ti ala kue.+ 26 Mbi yeke mû na ala fini bê,+ na mbi yeke zia mbeni fini yingo na yâ ti ala.+ Mbi yeke zi bê ti ala so akpengba tongana tênë+ so na mbi yeke mû na ala bê so awoko.* 27 Mbi yeke zia ande yingo ti mbi na yâ ti ala, mbi yeke sara si ala tambela alingbi na andia ti mbi,+ ala yeke bata ambela ti mbi na ala yeke sara ye alingbi na ni. 28 Tongaso, ala yeke duti ande na yâ ti kodro so mbi mû ândö na akotara ti ala, ala yeke duti azo ti mbi na mbi yeke ga Nzapa ti ala.’+

29 “‘Mbi yeke zi ala ande na yâ ti asioni ye ti ala kue, mbi yeke tene na alê ti kobe ti tene ala lë gbani, na mbi yeke sara si kota nzara aduti na yâ ti kodro ti ala pëpe.+ 30 Mbi yeke sara si alê ti keke adü mingi nga akobe ti ayaka asigi mingi, si ala duti na kamene ti bâ pasi na nzara na popo ti amara mbeni pëpe.+ 31 Ala yeke dabe ti ala ande na asioni sarango ye ti ala nga na asioni kusala ti ala, na bê ti ala ayeke son ngangu na terê ti ala wani ndali ti tënë so ayeke na li ti ala, nga ndali ti aye ti sioni so ala sara.+ 32 Me zia ala hinga ye so na li ti ala: Mbi yeke sara ye so ndali ti ala pëpe,’+ tënë ti yanga ti Jéhovah, Seigneur ti dunia kue, la. ‘Tongaso, azo ti Israël, a yeke nzoni kamene agbu lê ti ala ngbanga ti aye so ala sara so.’

33 “Bâ tënë so Jéhovah, Seigneur ti dunia kue, atene la: ‘Na lango so mbi yeke zi ande aye ti sioni na terê ti ala, mbi yeke sara si azo akiri alango na yâ ti agbata ni+ na a yeke kiri ti leke agbata ni so akungbi kue so.+ 34 A yeke fâ ande yaka na ndö ti sese ni, sese ni so azo so ayeke hon lani na terê ni na ala bâ so zo asara kodro dä pëpe. 35 Azo ayeke tene ande, atene: “Sese ni so ândö zo alango dä pëpe so, laso a ga tongana yaka ti Éden.+ Agbata ni so ândö akungbi kue so, so a yeke wara lani zo na yâ ni pëpe so, na so abuba kue so, bâ laso ala ga angangu gbata na azo alango dä.”+ 36 Amara so angoro ala ayeke hinga ande so mbi yeke Jéhovah, mbi leke akodro so a kungbi ni so, na mbi la mbi kiri mbi lu ye na yâ ti ndo so abuba lani awe so. Mbi Jéhovah la mbi sara tënë so na mbi yeke sara ye ti peko ni.’+

37 “Bâ tënë so Jéhovah, Seigneur ti dunia kue, atene la: ‘Mbi yeke zia lege ande na azo ti Israël ti hunda mbi ti sara ye so ndali ti ala: ti sara si azo ti ala aga gbani tongana gbâ ti ataba. 38 Agbata ni so akungbi ândö so, azo ayeke ga ande gbani+ na yâ ni tongana gbâ ti azo ti be-vulu, tongana ataba na Jérusalem* na lâ ti amatanga ti kodro ni.+ Na ala yeke hinga ande so mbi yeke Jéhovah.’”

37 Maboko ti Jéhovah ayeke lani na ndö ti mbi, tongaso na lege ti yingo ti lo, Jéhovah amû mbi lo gue na mbi na yâ ti mbeni popo-hoto,+ na bâ bio ti azo asi yâ ni. 2 Lo mû mbi lo ngoro na mbi na terê ni, mbi bâ gbâ ti abio ti azo so alango na sese na yâ ti popo-hoto ni, abio ni so ahule tâ ngangu.+ 3 Lo hunda mbi, lo tene: “Molenge ti zo, abio ti azo so alingbi ti kiri na fini?” Mbi kiri tënë na lo, mbi tene: “Jéhovah, Seigneur ti dunia kue, mo la mo hinga.”+ 4 Tongaso, lo tene na mbi: “Mo tene prophétie na ndö ti abio so, mo tene na ala, mo tene: ‘Ala abio so ahule awe so, ala mä tënë ti yanga ti Jéhovah:

5 “‘Bâ tënë so Jéhovah, Seigneur ti dunia kue, atene na abio so la: “Mbi yeke tokua pupu na yâ ti ala na ala yeke kiri na fini.+ 6 Mbi yeke zia akamba ti terê nga na anyama ti terê na ndö ti ala, na mbi yeke kanga ni na poro ti terê, mbi yeke tokua pupu na yâ ti ala na ala yeke kiri na fini. Ala yeke hinga so mbi yeke Jéhovah.”’”

7 Tongaso, mbi tene prophétie ni gï tongana ti so a hunda na mbi. Gï so mbi tene prophétie ni awe, mbi mä totongo ti mbeni ye, ye ni atoto ngangu, na abio ni akomanse ti bungbi na terê ti terê, bio na bio. 8 Na pekoni, mbi bâ akamba ti terê nga na anyama ti terê aga na ndö ti abio ni na poro ti terê aga akanga ndö ni. Me ade pupu aga na yâ ti ala pëpe.

9 Na pekoni, lo tene na mbi: “Mo sara tënë na pupu ni. Molenge ti zo, mo tene na pupu ni, mo tene: ‘Bâ tënë so Jéhovah, Seigneur ti dunia kue, atene la: “Pupu* mo londo na apupu osio ti sese mo ga na ndö ti azo so a fâ ala lani so, tongaso si ala kiri na fini.”’”

10 Tongaso mbi sara tënë ni tongana ti so a hunda na mbi, na pupu* ni aga alï na yâ ti ala, na ala komanse ti kiri na fini si ala luti na nduzu,+ ala ga aturugu so ayeke gbani gbani.

11 Na pekoni, lo tene na mbi: “Molenge ti zo, abio so ayeke azo ti Israël kue.+ Bâ, ala yeke tene: ‘Abio ti e ahule awe nga beku so e yeke na ni agirisa awe.+ Ti e ahunzi biaku awe.’ 12 Ni la, tene prophétie so na ala, mo tene: ‘Bâ tënë so Jéhovah, Seigneur ti dunia kue, atene la: “Azo ti mbi, mbi yeke zi yanga ti adû ti kuâ ti ala,+ mbi yeke sara si ala londo na yâ ti adû ti kuâ ti ala ti sigi, na mbi yeke gue na ala na sese ti Israël.+ 13 Ala azo ti mbi, na ngoi so mbi yeke zi ande yanga ti adû ti kuâ ti ala nga mbi yeke sara si ala londo na yâ ni ala sigi, ala yeke hinga so mbi yeke Jéhovah.”’+ 14 ‘Mbi yeke zia ande yingo ti mbi na yâ ti ala na ala yeke kiri na fini,+ mbi yeke gue ti zia ala na ndö ti sese ti ala. Ala yeke hinga so mbi yeke Jéhovah, mbi sara tënë awe, na mbi yeke sara ye ti peko ni.’ Tënë ti yanga ti Jéhovah la.”

15 Jéhovah akiri asara tënë na mbi, atene: 16 “Molenge ti zo, mo mû mbeni nduru keke mo sara mbeti na terê ni, mo tene: ‘So ayeke keke ti Juda nga na ti azo ti Israël so ayeke na terê ti lo.’+ Na pekoni, mo mû mbeni nduru keke ni nde mo sara mbeti na terê ni, mo tene: ‘So ayeke keke ti Joseph (so ti tene keke ti Éphraïm) nga na ti azo ti Israël kue so ayeke na terê ti lo.’+ 17 Mo mû akeke ni so mo bungbi ni na terê ti mba ti tene aga gï nduru keke oko na yâ ti maboko ti mo.+ 18 Tongana azo ti kodro ti mo ahunda mo, atene: ‘Mo yeke fa ande nda ti aye so na e ape?’ 19 mo tene na ala, mo tene: ‘Bâ tënë so Jéhovah, Seigneur ti dunia kue, atene la: “Mbi yeke mû keke ti Joseph (so ayeke na maboko ti Éphraïm) nga na amara ti Israël so ayeke na terê ti lo, mbi yeke bungbi ni na terê ti keke ti Juda, na mbi yeke sara si a ga gï keke oko.+ Ala yeke ga gï oko na yâ ti maboko ti mbi.”’ 20 Akeke ni so mo sara mbeti na terê ni so ayeke ngbâ na yâ ti maboko ti mo si ala bâ ni.

21 “Mo tene na ala, mo tene: ‘Bâ tënë so Jéhovah, Seigneur ti dunia kue, atene la: “Mbi yeke mû azo ti Israël na yâ ti amara so ala gue dä. Mbi yeke mû ala na ando nde nde kue ti bungbi ala, na mbi yeke gue na ala na sese ti ala.+ 22 Mbi yeke sara ande si ala ga mara oko na ndö ti sese ti ala,+ na ndö ti ahoto ti Israël. Gbia oko si ayeke komande na ndö ti ala kue,+ ala yeke duti amara use mbeni pëpe nga yâ ti ala ayeke kangbi na royaume use mbeni pëpe.+ 23 Ala yeke buba terê ti ala mbeni pëpe na lege ti afungo yanda* ti ala, na lege ti asioni ye so ala sara nga na lege ti akengo ndia kue so ala ke.+ Mbi yeke zi ala na yâ ti siokpari so ala sara lani na ngoi so ala duti be-ta-zo na mbi pëpe, na mbi yeke zi sioni ye na terê ti ala. Ala yeke ga azo ti mbi na mbi yeke ga Nzapa ti ala.+

24 “‘“Wakua ti mbi David ayeke duti ande gbia ti ala,+ ala yeke duti gï na berger oko.+ Ala yeke sara ande ye alingbi na ambela ti mbi nga ala yeke kpe andia ti mbi mingi.+ 25 Ala yeke lango ande na ndö ti sese so mbi mû lani na wakua ti mbi Jacob, sese so akotara ti ala alango lani dä.+ Ala yeke sara kodro dä lakue,+ ala na amolenge ti ala nga na a-âta ti ala.+ Wakua ti mbi David ayeke duti ande mokonzi ti ala lakue lakue.+

26 “‘“Mbi yeke te mbele ti siriri na ala.+ A yeke mbeni mbele so ayeke ngbâ lakue lakue na popo ti mbi na ala. Mbi yeke zia ala na ndö ti sese ti ala, mbi yeke sara si ala ga gbani+ na mbi yeke zia temple ti mbi na popo ti ala lakue. 27 Tente ti mbi ayeke duti ande na popo* ti ala, mbi yeke ga Nzapa ti ala na ala yeke ga azo ti mbi.+ 28 Na ngoi so temple ti mbi ayeke duti na popo ti ala lakue lakue, amara ayeke hinga ande so mbi yeke Jéhovah, mbi la mbi sara si azo ti Israël aga nzoni-kue so.”’”+

38 Jéhovah akiri asara tënë na mbi, atene: 2 “Molenge ti zo, mo tourné lê ti mo na mbage ti Gog ti kodro ti Magog,+ kota mokonzi ti Méshek na Tubal,+ na mo fa tënë ti aye so ayeke si ande na lo.+ 3 Mo tene: ‘Bâ tënë so Jéhovah, Seigneur ti dunia kue, atene la: “Mo Gog, kota mokonzi ti Méshek na Tubal, bâ mbi yeke ga na terê ti mo. 4 Mbi yeke sara ande si mo mû mbeni lege nde, mbi yeke zia acrochet na ngbangba ti mo+ na mbi yeke gboto mo na gigi legeoko na aturugu ti mo kue,+ ambarata nga na azo ti kpengo na ambarata ni, azo kue so ayü pendere bongo, gbâ ti aturugu so ayeke na akota vala nga na akete vala, ala kue so amû épée; 5 Perse, Éthiopie na Put+ ayeke na terê ti ala, ala kue ayeke na akete vala nga na casque. 6 Gomer nga na aturugu ti lo kue, ahale ti Togarmah+ so alondo na ando so ayeke tâ yongoro kâ na mbage ti nord, legeoko na aturugu ti lo kue, gbâ ti azo so ayeke na terê ti mo.+

7 “‘“Mo leke terê ti mo, mo na aturugu ti mo kue so abungbi na terê ti mo, mo la mo yeke mû li ni na ndö ti ala.*

8 “‘“Na peko ti alango mingi, a yeke bi lê ande na mbage ti mo.* Na hunzingo ti angu ni, mo yeke lï na ngangu na yâ ti kodro ti azo so épée afuti ala si a mû ala a kiri na ala dä so, azo so a mû ala na yâ ti akodro mingi si a bungbi ala na li ti ahoto ti Israël, kodro so ândö a buba ni kue. A mû azo ti kodro ni na popo ti amara nde nde si a ga na ala, na ala kue aduti na siriri.+ 9 Mo yeke ga ande na terê ti ala tongana kota pupu ti ngu, na mo yeke mû ndö ti kodro ni tongana mbinda, mo na aturugu ti mo nga na gbâ ti azo so ayeke na terê ti mo.”’

10 “Bâ tënë so Jéhovah, Seigneur ti dunia kue, atene la: ‘Na lango ni so, ambeni pensé ayeke ga ande na li ti mo, na mo yeke leke na bê ti mo ti sara mbeni ye ti sioni. 11 Mo yeke tene ande, mo tene: “Mbi yeke lï na ngangu na yâ ti kodro so agbagba ti bata akete kodro ni ayeke dä pëpe so.+ Mbi yeke ga na terê ti ala so aduti ti ala na siriri si mbeni ye ti sara mbeto na ala ayeke dä pëpe so. Ala kue so alango na yâ ti akete kodro so amur, abarre nga na ayanga ti gbagba ti batango ala ayeke dä pëpe so.” 12 Mo yeke lï ande na ngangu ti gbu aye nga ti nzi aye, ti sara bira na ando so abuba awe si azo akiri asara kodro dä fadeso awe,+ nga ti sara bira na azo so a mû ala na popo ti amara nde nde si a kiri a bungbi ala na yâ ni,+ ala so abungbi gbâ ti amosoro nga na akungba,+ ala so alango na ndo so ayeke na milieu ti sese.

13 “‘Shéba,+ Dedan+ na awadengo buze ti kodro ti Tarsis+ nga na aturugu* ni kue ayeke hunda mo ande, atene: “Mo yeke lï na ngangu na yâ ti kodro ni ti gbu gbâ ti aye? ti nzi gbâ ti aye? Mo bungbi aturugu ti mo ti tene ala mû argent na lor ala hon na ni? ti tene ala yô amosoro nga na akungba ala hon na ni? ti tene ala gbu aye gbani gbani?”’

14 “Molenge ti zo, mo fa tënë ti prophétie, mo tene na Gog: ‘Bâ tënë so Jéhovah, Seigneur ti dunia kue, atene la: “Na lango so azo ti mbi, Israël, ayeke duti na siriri, mo yeke hinga ande ape?+ 15 Mo yeke londo ande na ndo ti mo kâ ti ga, ndo ti mo so ayeke tâ yongoro kâ na mbage ti nord,+ mo na gbâ ti azo ti mo na terê ti mo, ala kue ayeke kpe na ambarata, gbâ ti bungbi ti azo, aturugu gbani gbani.+ 16 Mo yeke ga ande ti sara sioni na azo ti mbi Israël, gï tongana ti so mbinda ayeke mû ndö ti kodro. Na lâ ti nda ni, mbi yeke sara ande si mo ga ti sara sioni na kodro ti mbi+ si amara ahinga mbi, na ngoi so mbi yeke sara si iri ti mbi aga nzoni-kue na lê ti mo, Gog.”’+

17 “Bâ tënë so Jéhovah, Seigneur ti dunia kue, atene la: ‘Mo la mo yeke zo so na lege ti awakua ti mbi, aprophète ti Israël, mbi sara tënë ti mo giriri so ape? mo so a sara angu mingi awe la ala tene a yeke ga na mo ande ti sara sioni na azo ti Israël so.’

18 “Jéhovah, Seigneur ti dunia kue, atene: ‘Na lango so, lango ni so mo yeke lï na ngangu na yâ ti kodro ti Israël, ngonzo ti mbi ayeke londo tâ ngangu.+ 19 Na yapungo terê nga na yâ ti kota ngonzo ti mbi, mbi yeke sara tënë. Na lango ni so, sese ayeke yengi ande ngangu mingi na kodro ti Israël. 20 Asusu ti ngu-ingo, andeke ti nduzu, anyama ti ngonda, anyama kue so ayeke hara na sese nga na azo kue so ayeke na ndö ti sese ayeke dö ande na mbeto ndali ti mbi; ahoto ayeke tuku na sese,+ ahoto so li ni ayo mingi ayeke tï, na aye kue ayeke kungbi na sese.’

21 “Jéhovah, Seigneur ti dunia kue, atene: ‘Mbi yeke iri ande épée ti ga ti sara sioni na lo na ndö ti ahoto ti mbi kue. Épée ti zo oko oko ayeke tourné ti sara sioni na ita ti lo wani.+ 22 Mbi yeke fâ ande ngbanga na li ti lo na lege ti asioni kobela so amû ndo+ nga na mênë so ayeke tuku. Mbi yeke tokua ande kota ngu-nzapa, akota glason+ na wâ+ ti soufre+ na ndö ti lo, na ndö ti aturugu ti lo nga na ndö ti gbâ ti azo so ayeke na terê ti lo.+ 23 Mbi yeke ga ande kota biani nga mbi yeke sara si iri ti mbi aga nzoni-kue, na mbi yeke sara si a hinga mbi na popo ti amara mingi; ala yeke hinga ande so mbi yeke Jéhovah.’

39 “Molenge ti zo, mo fa na Gog+ tënë ti aye so ayeke si ande na lo, mo tene: ‘Bâ tënë so Jéhovah, Seigneur ti dunia kue, atene la: “Mo Gog, kota mokonzi ti Méshek na Tubal,+ mbi yeke ga na terê ti mo. 2 Mbi yeke sara si mo mû mbeni lege nde, mbi yeke fa lege na mo nga mbi yeke sara si mo londo na ando so ayeke tâ yongoro kâ na mbage ti nord,+ na mbi yeke gue na mo na ndö ti ahoto ti Israël. 3 Mbi yeke pika keke ti kokora so ayeke na yâ ti maboko ti mo ti wali so na sese, na mbi yeke sara si alê ti kokora ti mo so ayeke na yâ ti maboko ti mo ti koli atï. 4 Mo na aturugu ti mo nga na azo so ayeke na terê ti mo ayeke kui na ndö ti ahoto ti Israël.+ Mo yeke ga kobe ti yanga ti andeke nde nde kue nga na ti anyama ti ngonda.”’+

5 “Jéhovah, Seigneur ti dunia kue, atene: ‘Mbi tene awe, mo yeke kui ande na yâ ti ngonda.+

6 “‘Mbi yeke tokua ande wâ na terê ti Magog nga na terê ti azo so alango na ndö ti azoa na siriri.+ Ala yeke hinga ande so mbi yeke Jéhovah. 7 Mbi yeke sara si a hinga iri ti mbi so ayeke nzoni-kue so na popo ti azo ti mbi Israël. Mbi yeke zia lege si a buba iri ti mbi so ayeke nzoni-kue so mbeni pëpe. Amara ayeke hinga ande so mbi yeke Jéhovah,+ lo so ayeke nzoni-kue na Israël.’+

8 “Jéhovah, Seigneur ti dunia kue, atene: ‘Biani, ye so ayeke si. Lango so mbi sara tënë ni giriri so ayeke ga. 9 Azo so alango na yâ ti gbata ti Israël ayeke sigi ande na ala yeke mû aye ti bira ti sara na wâ. Aye ti bira ni ayeke akete vala* na akota vala, keke ti kokora na alê ti kokora, anduru keke nga na alikongo. Ala yeke mû ni ande ti sara na wâ+ na yâ ti ngu mbasambala. 10 Ala yeke duti ande pëpe na bezoin ti ro akeke na yâ ti ngonda wala ti bungbi akeke na yâ ti gbako, ndali ti so ala yeke mû aye ti bira ni so ti sara na wâ.’

“‘Ala yeke gbu ande aye ti azo so agbu lani aye ti ala, ala yeke gbu nga aye ti azo so anzi lani aye ti ala,’ tënë ti yanga ti Jéhovah, Seigneur ti dunia kue, la.

11 “‘Na lango ni so, mbi yeke mû ande na Gog+ mbeni ndo ti tene a lu lo dä na Israël, na yâ ti popo-hoto ti azo so ayeke hon na mbage ti est ti ngu-ingo na a yeke kanga ande lege na ala so ayeke hon kâ. Na ndo ni so la a yeke lu Gog na gbâ ti azo so ayeke na terê ti lo. A yeke iri ndo ni so Popo-hoto ti Hamon-Gog.*+ 12 Azo ti Israël ayeke mû nze mbasambala ti lu ala tongaso si sese ni aga nzoni.+ 13 Azo kue ti kodro ni ayeke sara ande kua ti lungo akuâ ti ala, na ye so ayeke sara si iri ti azo ti kodro ni awu na lango ni so mbi yeke wara gloire,’+ tënë ti yanga ti Jéhovah, Seigneur ti dunia kue, la.

14 “‘Azo ayeke hon ande lakue na yâ ti kodro ni, na a yeke soro ambeni na popo ti ala ti lu akuâ so angbâ na ndö ti sese ni ti tene sese ni aga nzoni. Ala yeke ngbâ ti gi akuâ ni nze mbasambala. 15 Tongana ala so ayeke hon na yâ ti kodro ni abâ bio ti mbeni zo, ala yeke sara marque na place ni so. Na pekoni, ala so a soro ala ti lu akuâ ayeke lu bio ni so na Popo-hoto ti Hamon-Gog.+ 16 Kâ, mbeni gbata ayeke duti ande nga dä so a iri ni Hamonah.* Ala yeke sara ande si sese ni aga nzoni.’+

17 “Âdu ti mo molenge ti zo, bâ tënë so Jéhovah, Seigneur ti dunia kue, atene la: ‘Tene na andeke nde nde kue nga na anyama ti ngonda kue, mo tene: “Ala bungbi terê ti ala ala ga. Ala ga na terê ti sandaga so mbi leke ngbanga ti ala, kota sandaga so ayeke na ndö ti ahoto ti Israël.+ Ala yeke te ande nyama na ala yeke nyon mênë.+ 18 Ala yeke te nyama ti terê ti awangangu, ala yeke nyon mênë ti amokonzi ti sese ni: akoli-taba, akete taba, angasa, akoli-bagara. Ala yeke anyama ti mafuta kue so ayeke na Basan. 19 Ala yeke te ande mafuta ti sandaga ni asi na go ti ala na ala nyon mênë ni juska ala soulé na ndo so mbi leke sandaga ti mbi dä ndali ti ala.”’

20 “‘Na terê ti table ti mbi, yâ ti ala ayeke si ande na nyama ti ambarata nga na ti azo ti kpengo na apuse ti mbarata, ti awangangu nga na ti aturugu nde nde kue,’+ tënë ti yanga ti Jéhovah, Seigneur ti dunia kue, la.

21 “‘Mbi yeke fa ande gloire ti mbi na popo ti amara; na amara kue ayeke bâ ngbanga so mbi dë na popo ti ala nga ngangu* so mbi fa ni na popo ti ala.+ 22 Ti londo na lango ni so ti ga na ni, azo ti Israël ayeke hinga so mbi yeke Jéhovah Nzapa ti ala. 23 Amara ayeke hinga ande atene a yeke ndali ti siokpari ti azo ti Israël si a gbu ala a gue na ala na mbeni ndo nde ngbanga ti so ala yeke be-ta-zo na mbi pëpe.+ Tongaso, mbi honde lê ti mbi na ala+ na a yeke mbi si mbi zia ala na maboko ti awato ti ala+ na ala kue akui kuâ ti épée. 24 Mbi sara ye na ala alingbi na sioye ti ala nga na kengo ndia so ala ke, na mbi honde lê ti mbi na ala.’

25 “Tongaso, bâ tënë so Jéhovah, Seigneur ti dunia kue, atene la: ‘Mbi yeke mû ande tanga ti azo ti Jacob+ so a gbu ala na ngbâa ti kiri na ala, na mbi yeke bâ mawa ti azo ti Israël+ kue. Mbi yeke yapu ande ti gbu koko ti iri ti mbi so ayeke nzoni-kue.+ 26 Na peko ti so a zia kamene na lê ti ala awe ndali ti so ala yeke be-ta-zo na mbi pëpe na yâ ti aye kue,+ ala yeke duti ande na siriri na yâ ti kodro ti ala na zo oko ayeke zia mbeto na yâ ti ala pëpe.+ 27 Na ngoi so mbi yeke mû ala na popo ti amara nga na ndö ti sese ti awato ti ala ti bungbi ala ndo oko,+ mbi yeke ga ande nga nzoni-kue na popo ti ala na lê ti gbâ ti amara.’+

28 “‘Ala yeke hinga ande so mbi yeke Jéhovah Nzapa ti ala, ngbanga ti so mbi yeke sara si a mû ala a gue na ala na mbeni kodro nde na popo ti amara na pekoni mbi yeke mû ala mbi kiri na ni na ndö ti sese ti ala na mbi yeke zia mbeni oko angbâ kâ pëpe.+ 29 Mbi yeke honde lê ti mbi ande na ala mbeni pëpe+ ndali ti so mbi yeke tuku yingo ti mbi na ndö ti azo ti Israël,’+ tënë ti yanga ti Jéhovah, Seigneur ti dunia kue, la.”

40 Na yâ ti ngu 25 so a gue na e na kodro-wande,+ na tongo nda ti ngu ni, na lango bale-oko ti kozo nze ni, na ngu 14 na peko ti so gbata ti Jérusalem atï,+ tâ na lango ni so, maboko ti Jéhovah aga na ndö ti mbi na lo gue na mbi na yâ ti gbata ni.+ 2 Na lege ti avision so alondo na Nzapa, lo gue na mbi na kodro ti Israël na lo zia mbi na ndö ti mbeni yongoro hoto. Na li ti hoto ni kâ,+ na mbage ti sud, a yeke wara mbeni ndo so ayeke tongana mbeni gbata.

3 Tongana lo gue na mbi kâ, mbi bâ mbeni koli so terê ti lo akpa cuivre.+ Lo gbu na maboko ti lo kamba ti lin nga na keke ti sosongo* ti mungo na mesure ti aye,+ lo luti na yâ ti mbeni yanga ti gbagba.* 4 Lo tene na mbi: “Molenge ti zo, bâ ndo nzoni, mä mbi nzoni, na mo dengi mê ti mo* na aye kue so mbi yeke fa na mo, ndani so a ga na mo ge so la. Mo yeke tene ande na azo ti Israël aye kue so mo bâ.”+

5 Mbi bâ mbeni mur angoro terê ti temple* ni na gigi. Keke ti sosongo ti mungo na mesure ti aye ayeke na maboko ti koli ni so. Yongo ti keke ti sosongo ni ayeke coudée omene (a zia mesure so ayeke ti konongo ti lê ti maboko ti zo na ndö ti coudée ni oko oko).* Lo komanse ti mû mesure ti mur ni, épaisseur ti mur ni alingbi na yongo ti keke ti sosongo oko; yongo ti mur ni na nduzu nga alingbi na yongo ti keke ti sosongo oko.

6 Na pekoni, lo gue na yanga ti gbagba so abâ ndo na mbage ti est,+ lo monté escalier ni. Lo mû mesure ti ndo so ayeke na gbe ti yanga ti gbagba ni: largeur ni alingbi na yongo ti keke ti sosongo oko. Lo mû nga mesure ti ndo so ayeke na gbe ti mbeni yanga ti gbagba ni: largeur ni nga alingbi na yongo ti keke ti sosongo oko. 7 Longueur ti da ti sinziri oko oko alingbi na yongo ti keke ti sosongo oko, na largeur ni nga alingbi na yongo ti keke ti sosongo oko. Yongo ti popo ti ada ti sinziri+ ni ayeke coudée oku. Devant ti yanga ti gbagba so ayeke na terê ti salle ni na mbage ti yâ ni alingbi na yongo ti keke ti sosongo oko.

8 Lo mû mesure ti salle ti yanga ti gbagba so abâ ndo na mbage ti yâ ni, na a lingbi na yongo ti keke ti sosongo oko. 9 Na pekoni, lo mû mesure ti salle ti yanga ti gbagba ni, a yeke coudée miombe. Lo mû mesure ti apilier so ayeke na aterê ni, pilier oko ayeke coudée use. Salle ni abâ ndo na mbage ti yâ ni.

10 Na yâ ti yanga ti gbagba ti mbage ti est, a yeke wara ada ti sinziri ota mbage na mbage. Konongo ti ala ota kue alingbi terê nga apilier ni mbage na mbage alingbi terê.

11 Na pekoni, lo mû mesure ti largeur ti ndo ti lingo na yanga ti gbagba ni, a yeke coudée 10. Longueur ti yanga ti gbagba ni ayeke coudée 13.

12 Yongo ti kete da so ayeke na devant ti ada ti sinziri ni mbage na mbage ayeke coudée oko. Yongo ti akete da ti sinziri ni ayeke coudée omene mbage na mbage.

13 Na pekoni, lo mû mesure ti yanga ti gbagba ni a londo na li ti da* ti sinziri oko ti si na li ti mbeni, na largeur ni ayeke coudée 25; ayanga ti da ni abâ ndo lê na lê.+ 14 Lo mû mesure ti apilier so ayeke na terê ni, na a yo na nduzu coudée 60. Lo mû nga mesure ti apilier ti ayanga ti gbagba so ayeke na aterê ti lacour ni kue. 15 Ti londo na yanga ti gbagba ni ti si na devant ti salle so ayeke na terê ti yanga ti gbagba so abâ ndo na mbage ti yâ ni, yongo ni ayeke coudée 50.

16 A yeke wara afenêtre+ na terê ti ada ti asinziri ni nga na terê ti apilier ni so ayeke na yâ ti yanga ti gbagba ni mbage na mbage. Fenêtre oko oko ayeke na cadre so akono na mbage ti yâ ni. Na yâ ti asalle ni, a yeke wara nga afenêtre mbage na mbage, na adessin ti keke ti mbûrü+ ayeke na terê ti apilier ni.

17 Na pekoni, lo gue na mbi na yâ ti kota lacour ni, na mbi bâ ada* ti tengo kobe+ nga ndo so angoro terê ti lacour ni, a sara ndo ni so kue gï na tênë. A leke ada ti tengo kobe 30 na ndö ti ndo so a sara na tênë so. 18 Sese ti ndo so a leke ni kue gï na tênë si ayeke na terê ti ayanga ti gbagba ni so alingbi na longueur ti ayanga ti gbagba ni; ndo so a leke ni na tênë si ayeke na mbage ti gbe ni la.

19 Na pekoni, lo mû mesure ti ndo so alondo na yanga ti gbagba* ti mbage ti gbe ni ti si na konongo ti lê ti kete lacour ni. Na mbage ti est nga na mbage ti nord, yongo ni ayeke coudée 100.

20 Mbeni yanga ti gbagba ti kota lacour ni abâ ndo na mbage ti nord, lo mû mesure ti longueur nga na largeur ti yanga ti gbagba ni. 21 A yeke wara ada ota ti asinziri mbage na mbage. Yongo ti apilier ni alingbi na ti kozo yanga ti gbagba ni, na yongo ti salle ni nga alingbi na ti kozo yanga ti gbagba ni. Longueur ni ayeke coudée 50 nga largeur ni ayeke coudée 25. 22 Amesure ti afenêtre ni, ti salle ni nga ti adessin ti keke ti mbûrü+ ni alingbi terê na ti yanga ti gbagba ti mbage ti est. Azo ayeke monté escalier mbasambala ti lï na yâ ni, na salle ni ayeke na devant ti ala.

23 A yeke wara yanga ti gbagba na terê ti kete lacour ni so abâ ndo lê na lê na yanga ti gbagba so ayeke na mbage ti nord nga na est. Lo mû mesure ti ndo so alondo na yanga ti gbagba oko ti si na mbeni, a yeke coudée 100.

24 Na pekoni, lo gue na mbi na mbage ti sud, na mbi bâ yanga ti gbagba so ayeke na mbage ti sud.+ Lo mû mesure ti apilier ni nga na ti salle ni, na a lingbi terê na ati kozoni. 25 Afenêtre ayeke na terê ni mbage na mbage nga na terê ti salle ni, afenêtre ni akpa ambeni kozoni so. Longueur ti porte ni ayeke coudée 50, largeur ni ayeke coudée 25. 26 A yeke wara escalier mbasambala so amû lege na zo ti lï na yâ ni kâ,+ na salle ni abâ ndo lê na lê na ni. A yeke wara adessin ti keke ti mbûrü na terê ti apilier ni, oko mbage na mbage.

27 Mbeni yanga ti gbagba ti kete lacour ni abâ ndo na mbage ti sud; lo mû mesure ti ndo so alondo na yanga ti gbagba oko ti si na mbeni, na a yo coudée 100. 28 Na pekoni, lo hon na mbi na yanga ti gbagba so abâ ndo na mbage ti sud na lo lï na mbi na yâ ti kete lacour ni; lo mû mesure ti yanga ti gbagba so ayeke na mbage ti sud, na a lingbi terê na ati kozoni so. 29 Ada ti asinziri ni, apilier ni na salle ni alingbi terê na ati kozoni so. Afenêtre ayeke na terê ni mbage na mbage nga na terê ti salle ni. Longueur ti porte ni ayeke coudée 50, largeur ni ayeke coudée 25.+ 30 A yeke wara asalle na yâ ti aporte ni kue. Longueur ti salle oko ayeke coudée 25 na largeur ni ayeke coudée 5. 31 Salle ni abâ ndo lê na lê na kota lacour ni; a yeke wara adessin ti keke ti mbûrü na terê ti apilier ni;+ a yeke wara nga a-escalier miombe ti lï na yâ ni kâ.+

32 Tongana lo lï na mbi na yâ ti kete lacour ni na mbage ti est, lo mû mesure ti yanga ti gbagba ni, na amesure ni alingbi terê na ati kozoni so. 33 Ada ti asinziri ni, apilier ni na salle ni alingbi terê na ati kozoni so. Afenêtre ayeke na terê ni mbage na mbage nga na terê ti salle ni. Longueur ti porte ni ayeke coudée 50, largeur ni ayeke coudée 25. 34 Salle ni abâ ndo lê na lê na kota lacour ni, a yeke wara adessin ti keke ti mbûrü na terê ti apilier ni; a yeke wara nga escalier miombe ti lï na yâ ni kâ.

35 Tongana lo lï na mbi na yâ ti kete lacour ni na mbage ti nord,+ lo mû mesure ti yanga ti gbagba ni, na amesure ni alingbi terê na ati kozoni so. 36 Ada ti asinziri ni, apilier ni na salle ni alingbi terê na ati kozoni so. Afenêtre ayeke na terê ni mbage na mbage. Longueur ti porte ni ayeke coudée 50, largeur ni ayeke coudée 25. 37 Apilier ni abâ ndo lê na lê na kota lacour ni, a yeke wara adessin ti keke ti mbûrü na terê ti apilier ni use kue; a yeke wara nga escalier miombe ti lï na yâ ni kâ.

38 Nduru na apilier ti ayanga ti gbagba ni, a yeke wara mbeni kete da ti tengo kobe so yanga ni ayeke dä. A yeke na ndo so si a yeke sukula anyama ti sandaga so a zö ni agbi kue.+

39 A yeke wara atable na yâ ti salle ti yanga ti gbagba ni, use mbage na mbage, so na ndö ni a yeke fâ anyama ti sandaga so a zö ni agbi kue,+ ati so a yeke mû na sandaga ndali ti siokpari+ nga na ati so a yeke mû na sandaga ti zingo tënë na li ti zo.+ 40 Ti gue na yanga ti gbagba so ayeke na mbage ti nord, a yeke wara atable use na gigi ti porte ni. A yeke wara nga atable use na mbeni mbage ti salle ti yanga ti gbagba ni. 41 A yeke wara atable osio mbage na mbage na terê ti yanga ti gbagba ni: atable ni kue ayeke miombe, so na ndö ni a yeke fâ anyama so a yeke mû na sandaga dä. 42 A yeke wara atable osio so na ndö ni a yeke fâ anyama ti sandaga so a zö ni agbi kue. A leke atable ni so na atênë so a dë terê ni pendere. Longueur ti table oko ayeke coudée oko na ndambo, largeur ni ayeke coudée oko na ndambo, nga yongo ni na nduzu ayeke coudée oko. A yeke zia na ndö ni aye so a sara na kua ti fango na anyama ti sandaga so a zö ni agbi kue nga na ti ambeni sandaga ni. 43 A yeke wara akete placard, so largeur ni alingbi na konongo ti lê ti maboko ti zo, na so a croché ni na nduzu na terê ti amur ti yâ ti da ni. A yeke zia na ndö ti atable ni anyama ti mungo na sandaga.

44 Na gigi ti yanga ti gbagba ti yâ ni, a yeke wara akete da ti tengo kobe ti azo ti hengo bia.+ Ala yeke na yâ ti kete lacour ni so ayeke nduru na yanga ti gbagba so ayeke na mbage ti nord, na a bâ ndo lê na lê na mbage ti sud. Mbeni da ti tengo kobe ni ayeke nduru na yanga ti gbagba so ayeke na mbage ti est na abâ ndo lê na lê na mbage ti nord.

45 Lo tene na mbi: “Kete da ti tengo kobe so abâ ndo na mbage ti sud so, a yeke ti aprêtre so abâ ndo na ndö ti akua so a yeke sara na yâ ti temple ni.+ 46 Kete da ti tengo kobe so abâ ndo na mbage ti nord, a yeke ti aprêtre so ayeke bâ ndo na ndö ti akua so andu gbalaka ni.+ Ala yeke amolenge ti Zadoc.+ Ala yeke azo ti mara ti Lévi so a soro ala ti ga nduru na Jéhovah ti sara kua na lo.”+

47 Lo mû mesure ti kete lacour ni. Longueur ni ayeke coudée 100, largeur ni ayeke coudée 100, a yeke carré. Gbalaka ni ayeke na devant ti temple ni.

48 Na pekoni, lo lï na mbi na yâ ti salle ti temple+ ni, lo mû mesure ti pilier so ayeke na yâ ti salle ni, na a yeke coudée oku na mbage ge, coudée oku na mbage kâ. Largeur ti yanga ti gbagba ni ayeke coudée ota na mbage ge, coudée ota na mbage kâ.

49 Longueur ti salle ni ayeke coudée 20 na largeur ni ayeke coudée 11.* Azo ayeke monté escalier si ague dä. Apilier ayeke na terê ti apoteau ti salle ni, oko mbage na mbage.+

41 Na pekoni, lo kiri na mbi na yâ ti kubu so ayeke nzoni-kue* na lo mû mesure ti apilier ni; largeur ti pilier oko ayeke coudée* omene, nga largeur ti mbeni pilier ni ayeke coudée omene. 2 Largeur ti yanga-da ni ayeke coudée bale-oko. Largeur ti amur* ti yanga-da ni ayeke coudée oku na mbage ge nga coudée oku na mbage kâ. Lo mû mesure ti longueur ti kubu ni, a yeke coudée 40, na largeur ni ayeke coudée 20.

3 Na pekoni, lo lï na yâ ni kâ* na lo mû mesure ti pilier ti yanga-da ni, épaisseur ni ayeke coudée use. Largeur ti yanga-da ni ayeke coudée omene. Largeur ti amur ti yanga-da ni ayeke coudée mbasambala. 4 Lo mû nga mesure ti kubu so abâ ndo na mbage ti kubu so ayeke nzoni-kue: longueur ni ayeke coudée 20, largeur ni ayeke coudée 20.+ Na lo tene na mbi: “So Ndo so ayeke nzoni kue kue kue la.”+

5 Na pekoni, lo mû mesure ti mur ti temple ni, na épaisseur ni ayeke coudée omene. Largeur ti akubu ti terê ti temple ni ayeke coudée osio.+ 6 Akubu ni so ayeke na ndö ti terê, kue asara étage ota. Étage oko ayeke na akubu 30. Na terê ti mur ti kota da ni, a yeke wara ambeni yanga ti mur ni so asigi kete alï na yâ ti mur ti akubu ni si ala luti nzoni, me amur ni so atingbi na mur ti temple ni pëpe.+ 7 Mbeni escalier so angoro ngorongo ayeke na terê ti temple ni mbage na mbage, tongana zo ayeke monté escalier ni ti gue na mbage ti nduzu, escalier ni ayeke kete na mbage ti gbe ni me akono na nduzu kâ.+ Ti londo na kozo étage ti gue na ota ni a lingbi zo ahon na yâ ti use étage ni si. Tongana zo alondo na kozo étage ni ti gue na use ni, akubu ti use étage ni akono ahon ati kozo étage ni nga akubu ti ota étage ni akono ahon ti use étage ni.

8 Mbi bâ so fondation ti temple ni ayo na nduzu mingi. Agere ti akubu ni so, ti londo na yanga ni ti si na ndo so amur ni atingbi dä, yongo ni alingbi na yongo ti keke ti sosongo ni kue so ayeke coudée omene. 9 Largeur ti amur ti akubu ni na mbage ti gigi ayeke coudée oku. A zia mbeni ndo* angbâ senge na terê ti mbeni mbage ti akubu ni so atingbi na temple ni so.

10 Na popo ti temple ni na ada ti tengo kobe ni,+ a zia mbeni place so angbâ senge mbage na mbage, so konongo ti lê ni ayeke coudée 20. 11 A yeke wara mbeni yanga-da na popo ti akubu so ayeke na terê ti temple ni na ndo so a zia ni angbâ senge na mbage ti nord so, mbeni yanga-da ni nga ayeke na mbage ti sud. Largeur ti ndo so angbâ senge so ayeke coudée oku na angoro terê ti temple ni kue.

12 Largeur ti kota da so ayeke na mbage ti ouest nduru na place so a zia ni angbâ senge so ayeke coudée 70. Longueur ni ayeke coudée 90. Épaisseur ti mur so angoro da ni ayeke coudée oku.

13 Lo mû mesure ti temple ni, longueur ni ayeke coudée 100. Ndo so a zia ni angbâ senge so, kota da* ni nga na amur ni, longueur ni ayeke coudée 100. 14 Largeur ti devant ti temple ni so abâ ndo na mbage ti est, nga na place so angbâ senge so, ayeke coudée 100.

15 Lo mû mesure ti da ni so ayeke na peko ti temple ni si abâ ndo lê na lê na place so angbâ senge so nga na abalcon ni, yongo ni kue ayeke coudée 100.

Lo mû nga mesure ti kubu so ayeke nzoni-kue, ti kubu so ayeke nzoni kue kue kue+ nga na ti asalle ti lacour ni. 16 Lo mû nga mesure ti devant ti yanga-da ni, ti afenêtre ni so acadre+ ni akono na mbage ti yâ ni, na ti abalcon ni so angoro terê ni ota kue. Nduru na devant ti yanga-da ni,+ a leke mbeni ndo na keke ti londo na gbe ni juska na afenêtre ni; na a kanga lê ti afenêtre ni. 17 Lo mû amesure ti ndö ti yanga-da ni, ti kubu so ayeke na yâ ti temple ni kâ nga na gigi ni, ti amur ni so angoro ni kue. 18 A sara dessin ti achérubin+ na dessin ti akeke ti mbûrü na terê ni,+ keke ti mbûrü oko oko ayeke na popo ti achérubin use, na achérubin ni ayeke na face use. 19 Face oko so ayeke ti zo abâ ndo na mbage ti keke ti mbûrü ni na mbage ge, na mbeni face ni so ayeke ti bamara* so abâ ndo na mbage ti keke ti mbûrü ni na mbage kâ.+ A sara dessin ni tongaso na amû terê ti mur ti temple ni kue. 20 Ti londo na sese ti si na ndö ti yanga-da ni na nduzu, a sara dessin ti achérubin nga ti akeke ti mbûrü na terê ti mur ti temple ni.

21 Akeke ti cadre ti porte* ti temple ni ayeke carré carré.+ Lê na lê na ndo so ayeke nzoni-kue* so, a yeke bâ mbeni ye tongana 22 gbalaka ti keke+ so yongo ni na nduzu ayeke coudée ota na longueur ni ayeke coudée use. Adidi ayeke na acoin ni, a sara gbe ni* nga na aterê ni na keke. Na pekoni, lo tene na mbi: “So table so ayeke na devant ti Jéhovah la.”+

23 Kubu so ayeke nzoni-kue ayeke na ayanga-da use nga kubu so ayeke nzoni kue kue kue so ayeke na ayanga-da use.+ 24 Ayanga-da ni oko oko ayeke na alê ti porte use, na ala use kue zo alingbi ti pusu ni na mbage ti yâ ni wala na mbage ti gigi. Yanga-da oko oko ayeke na alê ti porte use. 25 A sara na ndö ti lê ti aporte ti temple ni, dessin ti achérubin na ti akeke ti mbûrü so akpa ati so a sara ni na terê ti amur ti temple ni.+ A leke nga kete véranda ti keke na mbage ti devant ti salle ni na gigi. 26 A yeke wara nga afenêtre so acadre ni akono na mbage ti yâ ni,+ nga adessin ti akeke ti mbûrü ayeke na terê ti salle ni mbage na mbage. Adessin ni so ayeke nga na terê ti akete da so ayeke na terê ti temple ni na akete véranda ni.

42 Na pekoni, lo gue na mbi na lê ti kota lacour ni na mbage ti nord.+ Lo gue na mbi na terê ti ada ti tengo kobe so ayeke na terê ti place so a zia ni angbâ senge so,+ na mbage ti nord ti ndo so ada ni atingbi terê dä.+ 2 Na yanga-da ni so ayeke na nord, longueur ti ada ti tengo kobe ni kue ayeke coudée* 100, na largeur ni ayeke coudée 50. 3 Ada ti tengo kobe ni ayeke na popo ti kete lacour ni na ndo so a leke lê ni na tênë na terê ti kota lacour ni so, largeur ti kete lacour ni ayeke coudée 20.+ Abalcon ni abâ ndo lê na lê na ayeke na étage ota. 4 Na devant ti ada* ti tengo kobe ni, a yeke wara mbeni ndo so zo alingbi ti tambela dä+ na largeur ni ayeke coudée 10, longueur ni ayeke coudée 100.* Ayanga ti ada ti tengo kobe ni atourné na mbage ti nord. 5 Ada ti tengo kobe so ayeke na li ni ayeke kete mingi ahon ala so ayeke na gbe ni nga na ati so ayeke na milieu ni ngbanga ti so abalcon ni amû gbâ ti aplace ni. 6 Ala yeke na a-étage ota me ala yeke na apilier pëpe tongana apilier ti alacour ni. Ndani la si étage ti gbe ni nga ti milieu ni akono ahon ti nduzu.

7 Mur ti tênë so ayeke na mbage ti gigi so ayeke nduru na ada ti tengo kobe ni so ayeke na mbage ti kota lacour ni so abâ ndo lê na lê na ambeni da ti tengo kobe ni so, longueur ni ayeke coudée 50. 8 Longueur ti ada ti tengo kobe ni so ayeke na mbage ti kota lacour ni ayeke coudée 50. Me ti ada ti tengo kobe so abâ ndo lê na lê na temple ni, longueur ni ayeke coudée 100. 9 Mbeni porte ti lingo na ada ti tengo kobe ni ayeke na mbage ti est; azo so ayeke londo na yâ ti kota lacour ni ayeke lï dä si ala gue na ada ti tengo kobe ni so.

10 Na largeur ti mur ti tênë ti kota lacour ni so ayeke na mbage ti est, a yeke wara nga ada ti tengo kobe dä, nduru na place so a zia ni a ngbâ senge so nga na kota da ni.+ 11 A yeke wara na devant ni mbeni ndo so zo alingbi ti tambela dä so akpa ti so ayeke na terê ti ada ti tengo kobe so ayeke na mbage ti nord so.+ Longueur ni nga na largeur ti ada ti tengo kobe ni alingbi terê, ayanga ti sigingo na ni nga aplan so a leke na ni alingbi terê. Ayanga ti lingo na ada ti tengo kobe ni 12 akpa terê na ati ada ti tengo kobe so ayeke na mbage ti sud so. A yeke wara mbeni yanga-da ni na yanga ti ndo so zo alingbi ti tambela dä so, me a yeke kozo na mur ti tênë so ayeke na mbage ti est, ndo so zo alingbi ti lï dä.+

13 Na pekoni, lo tene na mbi: “Ada ti tengo kobe so ayeke na mbage ti nord na ada ti tengo kobe so ayeke na mbage ti sud nduru na place so a zia ni angbâ senge so,+ a yeke ada so ayeke nzoni-kue. A yeke na yâ ti ada so si aprêtre so ayeke ga nduru na Jéhovah ayeke te asandaga so ayeke nzoni kue kue kue.+ Ala yeke zia na ndo ni so asandaga so ayeke nzoni kue kue kue, sandaga ti lê ti kobe, sandaga ndali ti siokpari nga na sandaga ti zingo tënë na li ti zo, ngbanga ti so ndo ni so ayeke nzoni-kue.+ 14 Tongana aprêtre ni alï na ndo so awe, kozoni si ala sigi ti lï na yâ ti kota lacour ni, a lingbi ala zi abongo so ala sara na kua+ ngbanga ti so abongo ni so ayeke nzoni-kue. Na pekoni, ala yeke yü ambeni bongo nde si ala gue na ando so a mû lege na azo ti mara ni kue ti gue dä.”

15 Na ngoi so lo hunzi ti mû mesure ti temple ni na ando* so ayeke na terê ni awe, lo sigi na mbi na yanga-da so abâ ndo lê na lê na est,+ na pekoni lo mû mesure ti ndo ni so kue.

16 Lo mû mesure ti terê ni so ayeke na mbage ti est, lo mû ni na keke ti sosongo* ti mungo na mesure ti aye ni. Longueur ni ti londo na mbeni mbage ti si na mbeni mbage alingbi na yongo ti keke ti sosongo ni 500.

17 Lo mû mesure ti terê ni so ayeke na mbage ti nord, longueur ni alingbi na yongo ti keke ti sosongo ni 500.

18 Lo mû mesure ti terê ni so ayeke na mbage ti sud, longueur ni alingbi na yongo ti keke ti sosongo ni 500.

19 Lo gue na mbage ti terê ni so ayeke na mbage ti ouest. Lo mû mesure ni na keke ti sosongo ni, longueur ni alingbi na yongo ti keke ti sosongo ni 500.

20 Lo mû mesure ti ndo ni so na acoin osio ni kue. Mbeni mur angoro ni,+ na longueur ni alingbi na yongo ti keke ti sosongo ni 500, largeur ni alingbi na yongo ti keke ti sosongo ni 500,+ mur ni akangbi popo ti ndo so ayeke nzoni-kue na ndo so azo kue alingbi ti gue dä.+

43 Na pekoni, lo gue na mbi na yanga ti gbagba so abâ ndo na mbage ti est.+ 2 Kâ, mbi bâ gloire ti Nzapa ti Israël so alondo na mbage ti est.+ Totongo ti go ti lo akpa totongo ti kota ngu+ so ayeke sua. Gloire ti lo asu na ndö ti sese.+ 3 Ye so mbi bâ akpa vision so mbi bâ lani na ngoi so mbi* ga ti futi gbata ni. Ye ni akpa ye so mbi bâ lani na terê ti ngu ti Kébar+ so. Tongaso, mbi kuku mbi kpo li ti mbi na sese.

4 Na pekoni, gloire ti Jéhovah alï na yâ ti temple* ni na yanga ti gbagba so abâ ndo na mbage ti est.+ 5 Tongaso, mbeni yingo ayô mbi ague na mbi na yâ ti kete lacour ni na mbi bâ so gloire ti Jéhovah asi yâ ti temple ni kue.+ 6 Mbi mä mbeni zo kâ na yâ ti temple ni asara tënë na mbi, na koli ni aga aluti na terê ti mbi.+ 7 Lo tene na mbi:

“Molenge ti zo, ndo so trône ti mbi ayeke dä la+ nga ndo so mbi zia gere ti mbi dä,+ ndo so mbi yeke sara kodro dä kpu na kpu na popo ti azo ti Israël.+ Iri ti mbi so ayeke nzoni-kue,+ azo ti Israël na agbia ti ala ayeke buba ni mbeni pëpe na lege ti ndumba so ala sara na lege ti yingo nga na lege ti kuâ ti agbia ti ala. 8 Ala buba lani iri ti mbi na lege so ala zia devant ti yanga-da ti ala na terê ti devant ti yanga-da ti mbi, ndö ti porte ti ala na terê ti ndö ti porte ti mbi, gï mbeni mur la akangbi popo ti mbi na ala.+ Na lege ti aye ti sioni so ala sara, ala sara si iri ti mbi so ayeke nzoni-kue so abuba, ndani la na yâ ti ngonzo ti mbi, mbi hunzi lani ala kue.+ 9 Ni la, a yeke nzoni ala zia lege ti ndumba so ala sara na lege ti yingo nga ala zi akuâ ti agbia ti ala yongoro na terê ti mbi, na mbi yeke sara ande kodro kpu na kpu na popo ti ala.+

10 “Ti mo, molenge ti zo, mo fa na azo ti Israël+ temple ni so mo bâ, tongaso si kamene asara ala ndali ti asioni so ala sara,+ si ala gbu li ti ala na ndö ti plan* ti temple ni nzoni. 11 Tongana kamene asara ala ndali ti aye kue so ala sara, a lingbi mo fa na ala plan ti temple ni, kode so a leke na ni, ayanga ti sigingo na ni nga ti lingo na ni.+ Mo fa na ala adessin ni kue, nga na ambela ni, adessin ni nga na andia ni, na mo sû ni na mbeti na devant ti ala, tongaso si ala bâ dessin ni kue na ala sara ye alingbi na ambela ni.+ 12 So ndia ti temple ni la. Ando kue so angoro li ti hoto ni ayeke nzoni kue kue kue.+ Bâ, so ndia ti temple ni la.

13 “Amesure ti gbalaka ni ayeke na coudée+ (a zia mesure so ayeke ti konongo ti lê ti maboko ti zo na ndö ti coudée oko oko).* Gbe ti gbalaka ni coudée oko, largeur ni coudée oko. Li ti ayanga ni so angoro terê ni asigi kete si largeur ni alingbi empan* oko. So gbe ti gbalaka ni la. 14 Ti londo na gbe ti gbalaka ni na sese juska na terê ti ayanga ni so ayeke na nduzu kete, longueur ni ayeke coudée use, largeur ni coudée oko. Ti londo na kete yanga ni so angoro gbalaka ni ti si na kota yanga ni, longueur ni coudée osio na largeur ni coudée oko. 15 Lê ti gbalaka ni ayo na nduzu coudée osio na adidi osio ayeke na terê ti ayanga ni.+ 16 Lê ti gbalaka ni ayeke carré carré, longueur ni coudée 12 na largeur ni coudée 12.+ 17 Kete yanga ti gbalaka ni na mbage osio kue, longueur ni coudée 14 na largeur ni coudée 14. Aterê ti yanga ti gbalaka ni ayo alingbi na ndambo ti coudée, na gere ni asigi alingbi na coudée oko na ambage ti terê ti gbalaka ni kue.

“Escalier ni abâ ndo na mbage ti est.”

18 Lo tene na mbi: “Molenge ti zo, bâ tënë so Jéhovah, Seigneur ti dunia kue, atene la: ‘Tongana a sara gbalaka ni awe, a lingbi a sara ye alingbi na atënë so, tongaso si a lingbi ti yâa na ndö ni asandaga so a zö ni agbi kue nga a fi mênë na ndö ni.’+

19 “Jéhovah, Seigneur ti dunia kue, atene: ‘Mo mû kete koli-bagara na sandaga ndali ti siokpari+ ti aprêtre ti mara ti Lévi so ayeke ahale ti Zadoc,+ ala so ayeke ga nduru na mbi ti sara kua ti mbi. 20 Mo mû mbeni mênë ni mo zia ni na ndö ti adidi osio ti gbalaka ni, mo zia ni nga na acoin osio ti aterê ti kete yanga ni, na ndö ti aterê ti yanga ti gbalaka ni so angoro ni kue ti zi sioni ye na terê ti gbalaka ni nga ti sara si aga nzoni.+ 21 Na pekoni mo mû kete koli-bagara, mo yâa na sandaga ndali ti siokpari, ti tene mo zö ni na ndo so a fa na mo na yâ ti temple ni, na gigi ti kubu so ayeke nzoni-kue.+ 22 Na use lango ni, mo yeke mû mbeni koli-ngasa so sioni ye oko ayeke na terê ti lo pëpe na sandaga ndali ti siokpari. Aprêtre ayeke sara ande si gbalaka ni aga sioni pëpe ndali ti siokpari gï tongana ti so a mû fade kete koli-bagara so na sandaga ti sara si gbalaka ni aga sioni pëpe ndali ti siokpari so.’

23 “‘Tongana mo hunzi ti sara si gbalaka ni aga nzoni-kue awe, mo mû mbeni kete bagara na popo ti abagara ti mo nga na koli-taba na popo ti ataba ti mo. 24 Mo ga na anyama ni so na Jéhovah, na aprêtre ayeke tuku ingo na terê ti ala+ na ala yeke yâa ni na Jéhovah tongana sandaga so a zö ni agbi kue. 25 Lâ oko oko, mo yeke mû koli-ngasa oko na sandaga ndali ti siokpari,+ mo yeke sara ni lango mbasambala, mo yeke mû nga kete koli-bagara ni na koli-taba ni. Mo mû anyama so sioni ye ayeke na terê ti ala pëpe. 26 Na yâ ti lango mbasambala a yeke sara si gbalaka ni aga nzoni, na a lingbi a zi sioni ye na terê ni na a zia ni ti tene a sara kua na ni. 27 Tongana alango ni so ahunzi awe, na lango miombe ni+ nga na pekoni, aprêtre ayeke yâa na ndö ti gbalaka ndali ti azo ni asandaga so a zö ni agbi kue nga na sandaga ti beoko, si bê ti mbi ayeke nzere na terê ti ala,’+ tënë ti yanga ti Jéhovah, Seigneur ti dunia kue, la.”

44 Lo mû mbi lo kiri na ni na lege ti yanga ti gbagba so abâ ndo na mbage ti est,+ me porte ni akanga.+ 2 Na pekoni, Jéhovah atene na mbi: “Porte ni so ayeke ngbâ na kangango ni. A yeke zi ni pëpe nga zo ayeke lï dä pëpe ngbanga ti so Jéhovah Nzapa ti Israël alï na porte ni so awe.+ Tongaso, a lingbi porte ni angbâ na kangango ni. 3 Me gï mokonzi ni la ayeke duti na yâ ti ndo so ti tene lo te mapa na devant ti Jéhovah,+ ndali ti so lo yeke mokonzi. Lo yeke hon na yâ ti salon ni si lo lï, na lo yeke sigi na oko lege ni.”+

4 Na pekoni, lo gue na mbi na lege ti yanga ti gbagba so ayeke na mbage ti nord so abâ ndo lê na lê na temple ni. Na ngoi so mbi bâ ndo, mbi bâ so gloire ti Jéhovah asi yâ ti temple ti Jéhovah.+ Tongaso, mbi kuku, mbi kpo li ti mbi na sese.+ 5 Na Jéhovah atene na mbi: “Molenge ti zo, mä mbi nzoni, bâ ndo nzoni na mo dengi mê ti mo na aye kue so mbi yeke fa na mo na ndö ti atënë nga na andia so andu temple ti Jéhovah. Bâ lege ti lingo na yâ ti temple ni mbilimbili nga na alege kue ti sigingo na yâ ti ndo so ayeke nzoni-kue.+ 6 Mo tene na azo ti Israël so li ti ala akpengba so, mo tene: ‘Bâ tënë so Jéhovah, Seigneur ti dunia kue, atene la: “Azo ti Israël, aye ti sioni so ala sara so ahon ndö ni awe! 7 Na ngoi so ala ga na awande so afâ bê ti ala na ganza pëpe nga so afâ ganza pëpe na yâ ti ndo ti mbi so ayeke nzoni-kue, ala yeke buba nengo ti temple ti mbi la. Ala yeke ga na kobe ti mbi, mafuta ti nyama nga na mênë, me na oko ngoi ni ala yeke buba yâ ti mbele ti mbi na lege ti aye ti sioni kue so ala yeke sara. 8 Ala ke ti bâ lege ti aye ti mbi so ayeke nzoni-kue.+ Me ala soro ambeni zo na place ti ala ti sara akua na yâ ti ndo ti mbi so ayeke nzoni-kue.”’

9 “‘Bâ tënë so Jéhovah, Seigneur ti dunia kue, atene la: “Wande kue so ayeke na Israël, so afâ bê ti lo na ganza pëpe nga so afâ ganza pëpe, ayeke lï pëpe na yâ ti ndo ti mbi so ayeke nzoni-kue.”’

10 “‘Me azo ti mara ti Lévi so ague yongoro na mbi+ na ngoi so azo ti Israël azia mbi ti gue na peko ti afungo yanda* ti ala, sioni ti ala ayeke kiri ande na ndö ti ala. 11 Ala yeke ga awakua na yâ ti ndo ti mbi so ayeke nzoni-kue, ala yeke bâ ndo na ndö ti ayanga ti temple ni+ nga ala yeke sara kua na temple ni. Ala yeke fâ anyama ti yâa na sandaga so a zö ni agbi kue nga na anyama ti ambeni sandaga ni ndali ti azo ti Israël; ala yeke luti ande na gbele azo ni ti sara kua na ala. 12 Jéhovah, Seigneur ti dunia kue, atene: ‘Ndali ti so ala sara kua na azo ti Israël na gbele afungo yanda ti ala so, nga ala sara si azo ti Israël asara siokpari,+ ndani la mbi yôro maboko ti mbi mbi deba ti sara sioni na ala, sioni ti ala ni ayeke kiri na ndö ti ala. 13 Ala yeke pusu ande nduru na mbi pëpe ti sara kua ti prêtre na mbi; nga ala yeke pusu nduru pëpe na terê ti aye ti mbi so ayeke nzoni-kue, nga na ati so ayeke nzoni kue kue kue. Ala yeke yô ande kamene ti ala na ndö ti ala ndali ti aye ti sioni so ala sara. 14 Me mbi yeke zia ala ande ti bâ lege ti akua ti temple ni, ala yeke bâ lege ti kusala ni nga na aye kue so a yeke sara na yâ ni.’+

15 “‘Âdu ti aprêtre ti mara ti Lévi, amolenge ti Zadoc,+ ala so abâ lani lege ti akua na yâ ti ndo ti mbi so ayeke nzoni-kue, na ngoi so azo ti Israël ague yongoro na mbi,+ ala yeke pusu ande nduru na mbi ti sara kua na mbi. Ala yeke luti ande na gbele mbi ti yâa na mbi mafuta ti nyama+ nga na mênë,’+ tënë ti yanga ti Jéhovah, Seigneur ti dunia kue, la. 16 ‘Ala la ayeke lï na yâ ti temple ti mbi, ala la ayeke pusu nduru na table ti mbi ti sara kua na mbi,+ nga ala la ayeke bâ ande lege ti akua so mbi hunda na ala ti sara na mbi.+

17 “‘Tongana ala lï na yâ ti ayanga ti gbagba ti kete lacour ti temple ni, ala yeke yü abongo ti lin.+ Na ngoi so ala yeke sara kua na yâ ti ayanga ti gbagba ti kete lacour ni wala na yâ ti ando so ayeke na yâ ni, ala yeke yü abongo ti laine pëpe. 18 Ala yeke kanga aturban ti lin na li ti ala, nga ala yü culotte ti lin. Ala yü pëpe abongo so alingbi ti sara ala gbiki.+ 19 Kozoni si ala sigi ti gue na yâ ti kota lacour ni so azo ayeke dä, ala yeke zi abongo ti kua ti ala ni+ ala zia na yâ ti ada ti tengo kobe,+ ada* so ayeke nzoni-kue. Ala yeke yü ande ambeni bongo nde tongaso si na lege ti bongo ti ala ti kua ni, ala sara pëpe si azo ni aga nzoni-kue. 20 Ala yeke kio kuä ti li ti ala pëpe+ nga ala yeke zia kuä ti li ti ala ayo pëpe. Ala yeke fâ kuä ti li ti ala gï nduru. 21 Tongana aprêtre aye ti lï na yâ ti kete lacour ni, a lingbi ala nyon vin pëpe.+ 22 Ala yeke mû pëpe awali so akoli ti ala akui awe wala awali so asara divorce.+ Me ala yeke sara mariage gï na awali so ade ti hinga koli pëpe so ayeke amolenge ti azo ti Israël wala na awali ti aprêtre so akui awe.’+

23 “‘Ala yeke fa na azo ti mbi kangbi so ayeke na popo ti ye so ayeke nzoni-kue na ye so ayeke senge ye. Ala yeke fa na ala kangbi so ayeke na popo ti ye so ayeke sioni na ye so ayeke nzoni.+ 24 Ala la si ayeke mû li ni na ngoi ti fango ngbanga.+ Ala yeke fâ ngbanga alingbi na ambela ti mbi.+ Ala yeke sara ye alingbi na andia ti mbi nga na aye so mbi fa na ndö ti tënë ti amatanga;+ ala yeke sara si lango ti sabbat ti mbi aga nzoni-kue. 25 Ala yeke si nduru pëpe na akuâ ndali ti tene ala ga sioni. Me ala yeke ga sioni gï tongana ala ga nduru na kuâ ti ababâ ti ala, ti amama ti ala, ti amolenge ti ala ti koli, ti amolenge ti ala ti wali, ti aita ti ala ti koli nga na ti aita ti ala ti wali so ade ti sara mariage pëpe.+ 26 Tongana a zi sioni ye na terê ti mbeni prêtre awe, a yeke hunda na lo ti ku lango mbasambala awe si lo kiri lo sara kua ti lo. 27 Na lango ni so lo yeke lï na yâ ti ndo so ayeke nzoni-kue, na yâ ti kete lacour ni, ti sara kua na ndo so ayeke nzoni-kue, lo yeke ga na sandaga ndali ti siokpari ti lo,’+ tënë ti yanga ti Jéhovah, Seigneur ti dunia kue, la.

28 “‘Héritage ti ala ayeke so: Mbi la mbi yeke héritage ti ala.+ Ala yeke mû na aprêtre mbeni sese na Israël pëpe, ndali ti so mbi la mbi yeke héritage ti ala. 29 Ala la ayeke te asandaga ti lê ti kobe,+ asandaga ndali ti siokpari nga na asandaga ti zingo tënë na li ti zo.+ Nga aye kue na Israël so a mû na Nzapa ayeke ti ala.+ 30 Pendere lengo ti akozo lê ti keke ti ala so abe awe nga aye kue so ala mû na matabisi ayeke ti aprêtre.+ Nga, kozo farine ti ala so lê ni angbâ dä, ala yeke mû na aprêtre.+ Sarango tongaso ayeke ga na tufa na ndö ti ala nga na ndö ti azo ti da ti ala.+ 31 Mbeni nyama so akui wala mbeni nyama so mba ti lo asuru yâ ti lo, atâa a yeke ndeke wala mbeni nyama nde, aprêtre ayeke te ni pëpe.’+

45 “‘Na ngoi so ala yeke kangbi yâ ti sese ni ti mû na azo ni,+ ala yeke zia mbeni mbage ti sese ni nde na matabisi na Jéhovah.+ Longueur ni coudée* 25 000, largeur ni coudée 10 000.+ Ndo ni so kue ayeke mbeni ndo so a zia ni nde. 2 Na yâ ti ndo ni so, a yeke wara mbeni terrain so ayeke carré carré so a zia ni ndali ti temple ni, longueur ni coudée 500 largeur ni coudée 500.+ Na terê ni a yeke wara mbeni ndo ti tengo pere ti anyama so yongo ni ayeke coudée 50 mbage na mbage kue.+ 3 Na pekoni, ala yeke mû mesure ti ndo ni so, longueur ni coudée 25 000 na largeur ni coudée 10 000. Temple ni ayeke duti na yâ ni, a yeke ndo so ayeke nzoni kue kue kue. 4 A yeke ndo so a zia ni nde ndali ti aprêtre so+ ayeke azo ti kua ti temple, ala so ayeke ga nduru na Jéhovah ti sara kua na lo.+ Na ndo ni so la aprêtre ayeke sara da ti ala dä, temple ni nga ayeke duti na ndo ni so ayeke nzoni-kue so.

5 “‘Ti azo ti mara ti Lévi so ayeke azo ti kua ti temple, ndo so a yeke mû ande na ala, longueur ni ayeke coudée 25 000 na largeur ni ayeke coudée 10 000,+ nga a yeke mû na ala ada* ti tengo kobe 20+ na ndo ni so.

6 “‘A lingbi ala mû mbeni ndo ndali ti gbata ni, longueur ni ayeke coudée 25 000 na largeur ni ayeke coudée 5 000 (a yeke mbeni mbage ti sese so ayeke nzoni-kue).+ Ndo ni so ayeke ti azo ti Israël kue.

7 “‘Ti mokonzi ni, a yeke zia mbeni sese ndali ti lo na terê ti mbage ti sese so ayeke nzoni-kue so nga na terê ti ndo so a soro ndali ti gbata ni. A yeke duti ande nduru na mbage ti sese so ayeke nzoni-kue so nga nduru na ndo so ayeke ndali ti gbata ni. Sese ni so ayeke duti na mbage ti ouest nga na mbage ti est. Ti londo na katikati ni na mbage ti ouest ti si na katikati ni na mbage ti est, longueur ni alingbi na ti sese so a mû na mara oko oko.+ 8 Sese so mokonzi ayeke wara ande na kodro ti Israël la. Amokonzi ti mbi ayeke sara ande pasi na azo ti mbi mbeni pëpe,+ ala yeke mû sese na azo ti Israël alingbi na mara ti ala oko oko.’+

9 “Bâ tënë so Jéhovah, Seigneur ti dunia kue, atene la: ‘Amokonzi ti Israël, ala sara ye ni ahon ndö ni awe!’

“‘Ala zia lege ti aye ti ngangu nga na pasi so ala yeke sara na azo, ala sara ye so ayeke na lege ni.+ Ala zia ti gbu aye ti azo ti mbi,’+ tënë ti yanga ti Jéhovah, Seigneur ti dunia kue, la. 10 ‘A yeke nzoni ala mû akilo so ayeke na lege ni si ala haka na ye, ala mû nga épha* na bath* so ayeke na lege ni.+ 11 Zia mesure ti épha na ti bath kue alingbi terê. Bath oko alingbi na homer* bale-oko nga épha oko alingbi na homer bale-oko. A yeke mû ande homer si a hinga na mesure ti aye. 12 Sicle*+ oko alingbi na guérah* 20. A mû sicle 20 a zia sicle 25 na ndö ni, a kiri a zia sicle 15 na ndö ni, kue aga mané* oko.’

13 “‘Matabisi so ala yeke mû ayeke so: sixième ti épha oko na yâ ti homer oko ti blé nga sixième ti épha oko na yâ ti homer oko ti orge. 14 Ti mafuta so ala yeke mû, ala yeke mû bath ti mû na mesure ni. Bath oko alingbi na kor* bale-oko, bath bale-oko ayeke homer oko, ndali ti so bath bale-oko alingbi na homer oko. 15 Nga na popo ti anyama so azo ti Israël ayeke bata, a lingbi a mû taba oko na popo ti ataba 200. A yeke mû aye so ndali ti sandaga ti lê ti kobe,+ sandaga so a zö ni agbi kue+ nga na sandaga ti beoko+ ti tene a zi siokpari ti azo ni,’+ tënë ti yanga ti Jéhovah, Seigneur ti dunia kue, la.

16 “‘Azo ti kodro ni kue ayeke mû ande matabisi so+ na mokonzi so ayeke na Israël. 17 Mokonzi ni la ayeke bâ ndo na ndö ti asandaga so a zö ni agbi kue,+ sandaga ti lê ti kobe,+ sandaga ti sämba na ngoi ti amatanga,+ afini nze, aSabbat+ nga na amatanga kue so ayeke na sese ti Israël.+ Lo la lo yeke mû aye ti sandaga ndali ti siokpari, sandaga ti lê ti kobe, sandaga so a zö ni agbi kue nga na sandaga ti beoko, ti tene a zi siokpari ti azo ti Israël.’

18 “Bâ tënë so Jéhovah, Seigneur ti dunia kue, atene la: ‘Na kozo nze ni, na kozo lango ti nze ni, a lingbi mo mû na popo ti abagara mbeni kete koli-bagara so sioni ye ayeke na terê ti lo pëpe ti zi sioni ye na terê ti temple ni.+ 19 Prêtre ni ayeke mû ande mbeni mbage ti mênë ti sandaga ndali ti siokpari, lo zia ni na li ti cadre ti porte ti temple ni,+ lo zia ni na ndö ti adidi osio so ayeke na acoin ti yanga ti gbalaka ni nga lo zia ni na li ti cadre ti porte ti yanga ti gbagba ti kete lacour ni. 20 A yeke ye so a lingbi mo sara ni na lango mbasambala ti nze ni la ndali ti azo kue so asara siokpari na mbana pëpe wala so ala hinga pëpe so ye so ala sara ayeke siokpari.+ Tongaso mo yeke sara si temple aga sioni pëpe.+

21 “‘Na kozo nze ni, na lango 14 ti nze ni, ala yeke sara Matanga ti Pâque.+ Na yâ ti alango mbasambala, ala yeke te mapa so a sara na levure pëpe.+ 22 Na lango ni so, mokonzi ni ayeke mû kete koli-bagara ti tene a yâa na sandaga ndali ti siokpari ti lo wani nga ndali ti siokpari ti azo ti kodro ni kue.+ 23 Na yâ ti alango mbasambala ti matanga ni, lango oko oko, mokonzi ni ayeke mû akete koli-bagara mbasambala so sioni ye ayeke na terê ti ala pëpe, nga akoli-taba mbasambala so sioni ye ayeke na terê ti ala pëpe, ti tene a yâa na sandaga so a zö ni agbi kue na Jéhovah.+ Lo yeke mû nga lango oko oko mbeni koli-ngasa oko ti tene a yâa na sandaga ndali ti siokpari. 24 Lo yeke mû nga aye ndali ti sandaga ti lê ti kobe, épha oko ti farine ndali ti bagara oko épha oko ti farine ndali ti taba oko na hîn* oko ti mafuta ndali ti épha oko ti farine.

25 “‘Na nze mbasambala ni, na lango 15 ti nze ni, na yâ ti alango mbasambala so a yeke sara matanga ni,+ lo yeke mû gï a-oko ye ni so ndali ti sandaga ti siokpari, sandaga so a zö ni agbi kue nga ndali ti sandaga ti lê ti kobe nga na mafuta.’”

46 “Bâ tënë so Jéhovah, Seigneur ti dunia kue, atene la: ‘Porte ti yanga ti gbagba ti lingo na kete lacour ni so abâ ndo na mbage ti est+ ayeke ngbâ na kangango ni+ na yâ ti alango omene ti sarango akua,+ me na lango ti Sabbat nga na lango ti fini nze, a zi ni. 2 Mokonzi ni ayeke londo na gigi ti hon na yâ ti salon ti yanga ti gbagba ni,+ lo yeke luti na terê ti cadre ti porte ti yanga ti gbagba ni. Aprêtre ayeke yâa sandaga so a zö ni agbi kue nga na sandaga ti beoko ndali ti lo, na lo yeke kuku na sese na devant ti porte ti yanga ti gbagba ni na pekoni lo yeke sigi. Me a kanga porte ti yanga ti gbagba ni pëpe juska na lakui. 3 Azo ti kodro ni nga ayeke kuku na sese na gbele Jéhovah na yanga ti gbagba ni na lango ti Sabbat nga na lango ti fini nze.+

4 “‘Anyama so mokonzi ni ayeke ga na ni na Jéhovah na lango ti Sabbat ti tene a zö ni agbi kue ayeke: amolenge ti taba omene so sioni ye ayeke na terê ti ala pëpe nga koli-taba oko so sioni ye ayeke na terê ti lo pëpe.+ 5 Ti koli-taba ni, sandaga ti lê ti kobe ni ayeke épha* oko ti farine; ti amolenge ti taba ni, lo mû ye so alingbi na ngangu ti lo, nga hîn* oko ti mafuta na terê ti épha oko oko ti farine.+ 6 Sandaga so lo yeke mû na lango ti fini nze ayeke so: kete koli-bagara oko, amolenge ti taba omene nga na koli-taba oko. A lingbi sioni ye ayeke na terê ti anyama ni pëpe.+ 7 A lingbi lo mû na sandaga ti lê ti kobe épha oko ti farine ndali ti koli-bagara ni, épha oko ti farine ndali ti koli-taba ni nga lo yeke mû ye so alingbi na ngangu ti lo ndali ti amolenge ti taba ni. Lo mû nga hîn oko ti mafuta ndali ti épha oko oko ti farine.

8 “‘Tongana mokonzi ni ayeke lï, a lingbi lo hon na yâ ti salon ti yanga ti gbagba ni nga lo sigi na oko lege ni so.+ 9 Na ngoi so azo ti kodro ni ayeke ga na gbele Jéhovah na ngoi ti amatanga,+ ala so ayeke lï na yanga ti gbagba ti mbage ti nord+ ti gue ti voro Nzapa, a lingbi ala sigi na porte ti yanga ti gbagba ti mbage ti sud.+ Na ala so ayeke lï na yanga ti gbagba ti mbage ti sud, ala yeke sigi na yanga ti gbagba ti mbage ti nord. A lingbi mbeni zo asigi pëpe na porte ti yanga ti gbagba so lo lï fade na ni, ala yeke sigi na yanga ti gbagba so abâ ndo lê na lê na ala. 10 Âdu ti mokonzi ni so lo yeke na popo ti ala, lo yeke lï na ngoi so azo ni ayeke lï, nga lo yeke sigi na ngoi so ala yeke sigi. 11 Na ngoi ti amatanga nga na ti akota bungbi, sandaga ti lê ti kobe so lo yeke mû ni ayeke so: épha oko ti farine ndali ti koli-bagara ni, épha oko ti farine ndali ti koli-taba ni, ye kue so alingbi na ngangu ti lo ti mû ni ndali ti amolenge ti taba ni, nga hîn oko ti mafuta na terê ti épha oko oko ti farine.+

12 “‘Tongana mokonzi ni amû aye ndali ti sandaga so a zö ni agbi kue+ wala ndali ti sandaga ti beoko, si lo mû ni na bê ti lo wani na Jéhovah, a yeke zi na lo porte ti yanga ti gbagba so abâ ndo na mbage ti est. Tongaso, lo yeke mû ande aye ndali ti sandaga so a zö ni agbi kue nga ndali ti sandaga ti beoko ni, gï tongana ti so lo yeke sara ni na lango ti Sabbat so.+ Na peko ti so lo sigi awe, a yeke kanga porte ni na peko ti lo.+

13 “‘Lango oko oko, mo yeke mû kete koli-taba ti ngu oko so sioni ye ayeke na terê ti lo pëpe ti tene a zö na sandaga so agbi kue na Jéhovah.+ Mo yeke mû ni lakue na ndapre. 14 Lakue na ndapre, ala zia na terê ni sixième ti épha oko ti farine tongana sandaga ti lê ti kobe nga na tiers oko ti hîn ti mafuta ti tene a fi ni na ndö ti pendere farine ni tongana sandaga ti lê ti kobe so a mû na Jéhovah. Ndia so ayeke ngbâ lakue. 15 Ni la, ala yeke mû lakue na ndapre kete koli-taba ni, sandaga ti lê ti kobe ni, nga na mafuta ni ndali ti sandaga so lakue a yeke zö ni agbi kue.’

16 “Bâ tënë so Jéhovah, Seigneur ti dunia kue, atene la: ‘Tongana mokonzi ni amû sese na matabisi na amolenge ti lo ti koli, sese ni ayeke ga ti amolenge ni. A yeke ga sese ti amolenge ni nga na ti ahale ti ala ti gue na ni. 17 Me tongana lo mû mbeni sese ti lo, lo mû na matabisi na mbeni zo ti kua ti lo, sese ni ayeke ngbâ ti zo ti kua ni juska na ngu ti liberté.+ Na pekoni, sese ni ayeke kiri na mokonzi ni. Gï sese so lo mû na amolenge ti lo la ayeke ngbâ ti ala lakue lakue. 18 Mokonzi ni ayeke mû pëpe sese ti azo ti kodro ni na ngangu na maboko ti ala. Gï sese ti lo wani la lo yeke mû na amolenge ti lo, tongaso si a tomba mbeni zo pëpe na ndö ti sese ti lo na popo ti azo ti mbi.’”

19 Na pekoni, zo ni so ahon na mbi na mbeni lege so ayeke nduru na yanga ti gbagba so ague na ada*+ so ayeke nzoni-kue ti tengo kobe ti aprêtre na so abâ ndo na mbage ti nord.+ Kâ, mbi bâ mbeni ndo so ayeke na mbage ti peko ni na so abâ ndo na mbage ti ouest. 20 Lo tene na mbi, lo tene: “Na ndo so la aprêtre ayeke tö ande anyama ti sandaga ti zingo tënë na li ti zo nga na ti sandaga ndali ti siokpari. Na ndo so nga, ala yeke zö ande sandaga ti lê ti kobe dä,+ tongaso si ala mû pëpe aye ni so ti sigi na ni na yâ ti kota lacour ni si ala sara pëpe si azo ni aga nzoni-kue na lege ti aye so.”+

21 Lo gue na mbi na yâ ti kota lacour ni na lo hon na mbi na acoin osio ti lacour ni, na mbi bâ mbeni lacour na terê ti coin oko oko ti kota lacour ni. 22 Na terê ti acoin osio ti kota lacour ni a yeke wara akete lacour, so longueur ni ayeke coudée* 40 nga largeur ni ayeke coudée 30. Yongo ti ala osio kue alingbi terê.* 23 Ambeni mur so ayo na nduzu pëpe angoro terê ti lacour ni osio kue, na a leke ando ti tongo anyama ti sandaga dä na gere ti amur ni so. 24 Na pekoni, lo tene na mbi: “So ayeke ada so na yâ ni azo ti kua ti temple ayeke tö anyama so azo ni amû na sandaga.”+

47 Na pekoni, lo kiri na mbi na yanga ti temple ni.+ Kâ, mbi bâ mbeni ngu so ayeke sua na mbage ti est, ngu ni so alondo na gbe ti yanga ti porte ti temple ni,+ ndali ti so temple ni abâ ndo na mbage ti est. Ngu ni alondo na gbe ti temple ni na mbage ti maboko ti koli si ayeke sua na mbage ti sud ti gbalaka ni.

2 Na pekoni, lo sigi na mbi na lege ti yanga ti gbagba ti mbage ti nord,+ lo ngoro na mbi na porte so abâ ndo na mbage ti est,+ na mbi bâ mbeni ngu so alondo na mbage ti maboko ti koli si ayeke sua kete kete.

3 Tongana koli ni asigi na mbage ti est, lo yeke na kamba ti mungo na mesure ti ye na maboko ti lo,+ lo mû mesure ti ngu ni ayeke coudée* 1 000, na lo hon na mbi na yâ ti ngu ni, ngu ni agbu mbi na gere ti mbi.

4 Na pekoni, lo kiri lo mû mesure ti ngu ni ayeke coudée 1 000, na lo hon na mbi na yâ ti ngu ni, ngu ni agbu mbi na genou.

Lo kiri lo mû mesure ti ngu ni ayeke coudée 1 000, na lo hon na mbi na yâ ti ngu ni, ngu ni agbu mbi na gbe ti yâ ti mbi.

5 Tongana lo kiri lo mû mesure ti ngu ni, a yeke coudée 1 000, ngu ni aga kota ngu so mbi lingbi ti fâ ni na gere pëpe, ndali ti so ngu ni alï mingi si zo alingbi ti tï ngu dä; ngu ni aga kota ngu so zo alingbi ti fâ ni na gere pëpe.

6 Lo hunda mbi, lo tene: “Molenge ti zo, mo bâ ye so awe?”

Na pekoni, lo mû mbi lo tambela na ni na lo kiri na mbi na yanga ti ngu ni. 7 Na ngoi so mbi kiri, mbi bâ gbâ ti akeke na yanga ti ngu ni mbage na mbage.+ 8 Lo tene na mbi: “Ngu so ayeke sua na mbage ti sese ti est na ayeke gue juska ti hon na yâ ti Arabah*+ na ayeke tuku na ngu-ingo. Tongana a tuku na ngu-ingo awe, a yeke sara si ngu-ingo ni+ aga nzoni. 9 Na ndo kue so angu* ni ayeke sua ande dä, gbâ ti anyama* alingbi ti ngbâ na fini dä. Asusu nga ayeke dü ande gbani na ndo ni so. Ngu-ingo ni ayeke ga ande nzoni, na aye kue ayeke ngbâ na fini na ndo kue so ngu ni ayeke gue dä.

10 “Azo ti gingo susu ayeke luti na terê ti ngu ni, ti londo na En-Guédi+ juska na En-Églaïm, ndo so a yeke wara mbeni place so azo agbara akota gbanda ti ala dä ti tene ahule. A yeke wara ande na ndo so mara ti gbâ ti asusu nde nde kue, tongana asusu ti Kota ngu-ingo ti Méditerranée.+

11 “Me ti alando nga na ando ni so ayeke popoto si ayeke na terê ti ngu ni so, ala yeke ga ande nzoni pëpe. A yeke zia si ingo amû ando ni so.+

12 “Na ayanga ti ngu ni so, a yeke wara mara ti akeke nde nde so a yeke te lê ni. Kugbe ti akeke ni ayeke hule ande pëpe nga alengo ni ayeke tuku pëpe. Nze oko oko ala yeke lë afini lengo, ndali ti so ngu so ayeke sua na gunda ti ala alondo na temple ni.+ Alengo ti ala ayeke ga ande kobe ti tengo ni nga a yeke mû akugbe ti ala ti kaï na kobela.”+

13 Bâ tënë so Jéhovah, Seigneur ti dunia kue, atene la: “Bâ sese so ala yeke mû ni ande na amara 12 ti Israël ti ga ye ti ala la, Joseph ayeke wara ti lo mbage ti sese ni use.+ 14 A yeke mû ande na ala sese ni ti ga ti ala, zo oko oko ayeke wara ni alingbi na ti mba ti lo. Mbi deba lani ti mû sese ni so na akotara ti ala,+ na fadeso a kangbi ni na ala si a ga ti ala.

15 “Yanga ti sese ni na mbage ti nord ayeke tongaso: A londo na Kota ngu-ingo ti Méditerranée ahon na lege ti Hethlon+ ti si na Zédad,+ 16 Hamath,+ Bérotha+ na Sibraïm so ayeke na popo ti sese ti Damas na ti sese ti Hamath ti si na Hazer-Hatticon so ayeke na yanga ti sese ti Hauran.+ 17 Tongaso, yanga ti sese ni ayeke londo na ngu-ingo ti si na Hazar-Énon,+ na a yeke hon na yanga ti sese ti Damas ti si na mbage ti nord, nga na yanga ti sese ti Hamath.+ So yanga ti sese ni na mbage ti nord la.

18 “Ti mbage ti est alondo na popo ti Hauran na Damas ahon na terê ti Ngu ti Jourdain na popo ti Galaad+ nga na sese ti Israël. Ala mû mesure ni alondo na yanga ti sese ni ti si na ngu-ingo* ti mbage ti est. So yanga ti sese ni na mbage ti est la.

19 “Yanga ti sese ni na mbage ti sud ayeke londo na Tamar ti si na angu ti Méribath-Cadès+ juska na popo-hoto ti Égypte nga ti si na Kota ngu-ingo ti Méditerranée.+ So yanga ti sese ni na mbage ti sud la.

20 “Na mbage ti ouest, yanga ti sese ni alondo na Kota ngu-ingo ti Méditerranée ti si na mbeni ndo so abâ ndo lê na lê na Lebo-Hamath.*+ So yanga ti sese ni na mbage ti ouest la.”

21 “Ala yeke kangbi yâ ti sese ni na popo ti ala, na popo ti amara 12 ti Israël. 22 Ala yeke kangbi yâ ti sese ni na popo ti ala ti ga ti ala; ala yeke mû nga mbeni mbage ni na awande so asara kodro na popo ti ala, ala so adü amolenge na popo ti ala. Ala yeke bâ ala nga tongana amolenge ti kodro ni. Awande so nga ayeke wara ande mbeni sese na popo ti amara ti Israël ti ga ti ala. 23 Ti wande so asara kodro na popo ti ala, ala yeke mû mbeni sese na lo gï na yâ ti sese ti mara so lo sara kodro dä,” tënë ti yanga ti Jéhovah, Seigneur ti dunia kue, la.

48 “So ayeke iri ti amara ni nga na yanga ti sese ti ala la: ti londo na yanga ti sese ni so ayeke na mbage ti nord, sese ti Dan+ ahon na lege ti Hethlon ti si na Lebo-Hamath*+ juska na Hazar-Énan nduru na yanga ti sese ti Damas na mbage ti nord, na terê ti Hamath;+ a londo na mbage ti est ti si na yanga ti sese ni na mbage ti ouest. 2 Sese ti Aser+ ayeke na terê ti yanga ti sese ti Dan, a londo na yanga ti sese ni na mbage ti est ti si na yanga ti sese ni na mbage ti ouest. 3 Sese ti Nephtali+ ayeke na terê ti yanga ti sese ti Aser, a londo na yanga ti sese ni na mbage ti est ti si na yanga ti sese ni na mbage ti ouest. 4 Sese ti Manassé+ ayeke na terê ti yanga ti sese ti Nephtali, a londo na yanga ti sese ni na mbage ti est ti si na yanga ti sese ni na mbage ti ouest. 5 Sese ti Éphraïm ayeke na terê ti yanga ti sese ti Manassé,+ a londo na yanga ti sese ni na mbage ti est ti si na yanga ti sese ni na mbage ti ouest. 6 Sese ti Ruben ayeke na terê ti yanga ti sese ti Éphraïm,+ a londo na yanga ti sese ni na mbage ti est ti si na yanga ti sese ni na mbage ti ouest. 7 Sese ti Juda ayeke na terê ti yanga ti sese ti Ruben,+ a londo na yanga ti sese ni na mbage ti est ti si na yanga ti sese ni na mbage ti ouest. 8 Na yanga ti sese ti Juda, ti londo na yanga ni na mbage ti est ti si na yanga ni ti mbage ti ouest, ala yeke zia mbeni mbage ti sese ni nde na matabisi na Jéhovah. Largeur ni ayeke coudée* 25 000,+ na a lingbi na longueur ti sese so tanga ti akete mara ni awara ti londo na yanga ti sese ni na mbage ti est ti si na yanga ti sese ni na mbage ti ouest. Temple ni ayeke duti na milieu ni.

9 “Longueur ti mbage ti sese so ala yeke zia ni nde na matabisi na Jéhovah ayeke duti ande coudée 25 000, nga largeur ni coudée 10 000. 10 Ndo so a yeke zia ande ni nde ndali ti aprêtre+ ayeke tongaso: Yongo ni na mbage ti nord ayeke coudée 25 000, na mbage ti ouest ayeke coudée 10 000, na mbage ti est ayeke coudée 10 000 nga na mbage ti sud ayeke coudée 25 000. Temple ni ayeke duti ande na milieu ni. 11 A yeke duti ande ndali ti aprêtre so ayeke ti amolenge ti Zadoc,+ ala so a zia ala nde ndali ti mbi ti bâ lege ti akua ti mbi, ala hon lani yongoro na mbi pëpe na ngoi so azo ti Israël na azo ti mara ti Lévi ahon lani yongoro na mbi.+ 12 Ala yeke wara ande mbeni mbage ti sese ni so a zia ni nde na matabisi na mbi tongana mbeni ye so ayeke nzoni kue kue kue. Sese ni so ayeke na terê ti yanga ti sese ti azo ti mara ti Lévi.

13 “Na terê ti sese ti aprêtre ni, azo ti mara ti Lévi ayeke wara mbeni sese so longueur ni ayeke duti ande coudée 25 000 na largeur ni coudée 10 000. (Yongo ti lê ti sese ni kue ayeke tongaso, longueur ni ayeke coudée 25 000 na largeur ni ayeke coudée 10 000.) 14 Mbage ti sese ni so ayeke pendere mingi so, ala yeke kä ni pëpe, ala yeke changé ni na mbeni ye pëpe nga ala yeke mû ni na mbeni zo pëpe, ngbanga ti so a zia ni nde ndali ti Jéhovah.

15 “Tanga ti ndo ni so angbâ si largeur ni ayeke coudée 5 000 nga longueur ni ayeke coudée 25 000 so ayeke duti ande ti azo ti gbata ni+ ti tene ala leke ada na ndö ni nga ti tene anyama ti ala ate pere dä. Gbata ni ayeke duti ande na milieu ni.+ 16 Amesure ti gbata ni ayeke tongaso: Ti yanga ti sese ni so ayeke na mbage ti nord, ayeke coudée 4 500, ti mbage ti sud ayeke coudée 4 500, ti mbage ti est ayeke coudée 4 500 nga ti mbage ti ouest ayeke coudée 4 500. 17 Ti ndo so a zia ni ndali ti tengo pere ti anyama ti azo ti gbata ni so, na mbage ti nord ayeke coudée 250, na mbage ti sud ayeke coudée 250, na mbage ti est ayeke coudée 250 nga na mbage ti ouest ayeke coudée 250.

18 “Longueur ti ndo so ayeke ngbâ ande so ayeke lingbi na sese so ayeke nzoni-kue so,+ na mbage ti est ayeke coudée 10 000, na mbage ti ouest ayeke coudée 10 000. Kobe so sese ni so ayeke lë ni ande ayeke ga ti azo so ayeke sara kua ndali ti gbata ni. 19 Azo ti amara ti Israël kue so ayeke sara kua ndali ti gbata ni ayeke fâ yaka na ndö ti sese ni.+

20 “Ndo ni kue so a mû na matabisi so ayeke duti ande carré, na a yeke coudée 25 000. Ala yeke zia ni nde tongana sese so ayeke nzoni-kue, legeoko na ndo so ayeke ndali ti gbata ni.

21 “Tanga ti ndo so angbâ na yanga ti sese so ayeke nzoni-kue so nga na ti ndo so ayeke ndali ti gbata ni, yanga ni use kue ayeke ti mokonzi ni.+ A yeke duti na terê ti ayanga ti sese so ayeke coudée 25 000 si ayeke na mbage ti est nga na mbage ti ouest ti ndo so a zia na matabisi so. Ndo ni alingbi na ayanga ti sese ni so atingbi na ni so, na a yeke ga ti mokonzi ni. Sese so ayeke nzoni-kue so nga na temple ni ayeke duti ande na milieu ni.

22 “Sese ti azo ti mara ti Lévi nga na ndo so ayeke ndali ti gbata ni ayeke duti na yâ ti ndo so ayeke ti mokonzi ni. Sese ti mokonzi ni ayeke duti na popo ti yanga ti sese ti Juda+ nga na yanga ti sese ti Benjamin.

23 “Ti amara so angbâ, sese ti Benjamin alondo na yanga ti sese ni na mbage ti est ti si na yanga ti sese ni na mbage ti ouest.+ 24 Sese ti Siméon ayeke na terê ti yanga ti sese ti Benjamin,+ a londo na yanga ti sese ni na mbage ti est ti si na yanga ti sese ni na mbage ti ouest. 25 Sese ti Issacar+ ayeke na terê ti yanga ti sese ti Siméon, a londo na yanga ti sese ni na mbage ti est ti si na yanga ti sese ni na mbage ti ouest. 26 Sese ti Zabulon ayeke na terê ti yanga ti sese ti Issacar,+ a londo na yanga ti sese ni na mbage ti est ti si na yanga ti sese ni na mbage ti ouest.+ 27 Sese ti Gad ayeke na terê ti yanga ti sese ti Zabulon,+ a londo na yanga ti sese ni na mbage ti est ti si na yanga ti sese ni na mbage ti ouest. 28 Yanga ti sese ti Gad na mbage ti sud ayeke londo na Tamar+ ti si na angu ti Méribath-Cadès,+ ti si na popo-hoto ti Égypte+ nga juska na Kota ngu-ingo ti Méditerranée.

29 “So ayeke sese so ala yeke kangbi ni ande na amara ti Israël+ ti ga ti ala la; ambage so a yeke mû ande na ala la,”+ tënë ti yanga ti Jéhovah, Seigneur ti dunia kue, la.

30 “Bâ alege ti sigingo na yâ ti gbata ni la: Ti londo na mbage ti nord, yongo ni ayeke duti ande coudée 4 500.+

31 “A yeke zia iri ti ayanga ti gbata ni alingbi na iri ti amara ti Israël. Ti ayanga ti gbata ni ota na mbage ti nord a yeke wara oko ndali ti Ruben, oko ndali ti Juda, oko ndali ti Lévi.

32 “Ti mbage ti est, longueur ni ayeke duti ande coudée 4 500, na a yeke wara ayanga ti gbata ota, oko ndali ti Joseph, oko ndali ti Benjamin nga oko ndali ti Dan.

33 “Ti mbage ti sud, yongo ni ayeke duti ande coudée 4 500, na a yeke wara ayanga ti gbata ota, oko ndali ti Siméon, oko ndali ti Issacar nga oko ndali ti Zabulon.

34 “Ti mbage ti ouest, yongo ni ayeke duti ande coudée 4 500, na a yeke wara ayanga ti gbata ota, oko ndali ti Gad, oko ndali ti Aser nga oko ndali ti Nephtali.

35 “Mesure ti gbata ni kue ayeke duti ande coudée 18 000. Ti londo na lango ni so ti ga na ni, iri ti gbata ni ayeke duti ande Jéhovah ayeke kâ.”+