HABAKUK
1 Tënë ti ngbanga so a tene na prophète Habakuk* na yâ ti mbeni vision:
2 Jéhovah, juska lawa la mbi yeke toto na mo ti mû maboko na mbi, me mo yeke mä mbi ape?+
Juska lawa la mbi yeke hunda mo ti mû maboko na mbi ndali ti aye ti ngangu, me mo yeke sara mbeni ye ape?*+
3 Ngbanga ti nyen la mo sara si mbi bâ ye ti sioni?
Nga ngbanga ti nyen la mo kanga lê ti mo na ndö ti pasi so azo ayeke sara na amba ti ala?
Ngbanga ti nyen la mbi yeke bâ futingo aye nga sarango ye ti ngangu na zo na lê ti mbi tongaso so?
Ngbanga ti nyen la papa nga na tiri asi singo so?
4 Ndani la ndia ayeke na ngangu pëpe,
nga a yeke fâ ngbanga na lege ti mbilimbili oko pëpe.
Ndali ti so azo ti sioni angoro azo ti mbilimbili,
ni la si a ba yâ ti fango ngbanga ti mbilimbili.+
5 “Ala bâ ndo na popo ti amara, ala bâ.
Ala ngbâ ti bâ ndo, na li ti ala akpe kue, nga zia bê ti ala adö,
ngbanga ti so mbeni ye ayeke si ande na ngoi ti ala,
mbeni ye so ala yeke mä na bê na ni pëpe, même tongana mbeni zo atene tënë ni na ala.+
6 Bâ, mbi yeke sara si azo ti Chaldée alondo aga,+
mbeni mara so ayeke bâ mawa ti zo pëpe nga so lo yeke sara ye sân ti gbu li ti lo.
Ala yeke hon na yâ ti ando so akono na ndö ti sese
ti mû akodro na ngangu, akodro so ayeke ti ala pëpe.+
7 Ala yeke zia mbeto na yâ ti azo, nga azo asara mbeto ti ala mingi.
Ala zia na sese andia ti ala wani nga na komandema* ti ala wani.+
Ambarata ti ala ti bira ayeke mû loro ti gue na devant,
ambarata ti ala alondo na yongoro ndo.
Ala descend na ndö ti azo tongana aigle so adescend ti gi ye ti tengo ni.+
9 Ala kue aga gï ti sara ye ti ngangu na zo.+
Tongana ala bungbi terê ti ala ti ga, face ti ala ayeke tongana pupu so alondo na mbage ti est;+
ala gbu gbâ ti azo na ngbâa tongana ti so zo afû mbutu na yâ ti maboko ti lo.
Ala yeke he ando kue so ayeke na yâ ti angangu gbagba hengo;+
ala bungbi gbâ ti asese aga koto na terê ti gbagba ni si ala mû gbagba ni.
11 Na pekoni, ala hon na yâ ti kodro ni tongana pupu,
me ala yeke ga ande azo so tënë ayeke na li ti ala,+
ngbanga ti so ala tene so ngangu so ala yeke na ni alondo na nzapa ti ala.”*+
12 Jéhovah, eskê mo yeke lakue lakue ape?+
Nzapa ti mbi, Nzapa ti mbi so mo yeke nzoni-kue, mo ngbâ ti mo lakue mo kui pëpe.*+
Jéhovah, mo soro ala ti tene ala fâ ngbanga;
13 Lê ti mo ayeke tâ nzoni-kue si mo peut ti ngbâ ti bâ ye ti sioni gï na lê pëpe,
mo lingbi ti kanga lê na ndö ti ye ti sioni pëpe.+
Tongaso, ngbanga ti nyen la si mo kanga lê na ndö ti azo ti kango amba ti ala so?+
Ngbanga ti nyen la mo duti kpô na ngoi so zo ti sioni amene mbeni zo so ayeke mbilimbili ahon lo so?+
14 Ngbanga ti nyen la mo sara si zo aga tongana susu ti ngu-ingo so?
Tongana anyama so ayeke hara harango, so zo ti komande na ndö ti ala ayeke dä ape so?
15 Ala so kue, wato ni* agbu ala na yango.
Lo gbu ala na yâ ti kota gbanda ti lo,
lo bungbi ala ndo oko na yâ ti gbanda ti lo ti gbungo na asusu.
Ndani la si terê ti lo anzere mingi tongaso so.+
16 Ndani la si lo yâa asandaga na kota gbanda ti lo ni
nga lo mû asandaga* na gbanda ti lo ti gbungo na asusu,
ndali ti so na lege ti agbanda ni la lo wara nzoni kobe,*
nga lo yeke te anzoni kobe.
17 Tongaso, lo yeke ngbâ lakue gï ti tuku na sese asusu so asi yâ ti gbanda* ti lo ni so?
Lo yeke ngbâ lakue gï ti fâ amara sân ti bâ mawa ti ala?+
2 Mbi yeke ngbâ ti luti na ndo so mbi yeke sara sinziri dä,+
mbi yeke luti ande na ndö ti ngangu gbagba ni.
Mbi yeke ngbâ ti bâ ndo ti bâ tënë so lo yeke tene na lege ti mbi,
nga tënë so mbi yeke kiri na ni tongana lo suku na mbi.
2 Jéhovah akiri tënë na mbi, lo tene:
“Mo sû tënë ti vision so na mbeti, mo sû ni a sigi nzoni na ndö ti akete tableau,+
tongaso si zo so ayeke diko ni na kota go alingbi ti diko ni nzoni.*+
3 Ngbanga ti so vision ni ayeke ndali ti ngoi so a fa ni awe,
a yeke gue na loro juska na nda ni,* a yeke ga mvene pëpe.
Même tongana a si hio pëpe,* mo ngbâ ti ku ni!*+
Nyen na nyen kue a yeke si.
A yeke si na retard ape!
Me zo ti mbilimbili ayeke ngbâ ande na fini ndali ti so lo duti be-ta-zo.*+
5 Biani, vin ayeke handa zo;
ni la, zo so wuma ahon ndö ti lo ayeke si ande pëpe na ye so lo zia na gbele lo ti si dä.
Lo sara si nzara so lo yeke* na ni aga kota tongana Dû ti kuâ;*
lo yeke tongana kuâ, na nzara ti lo alingbi ti hunzi pëpe.
Lo ngbâ ti bungbi amara kue
na ti bungbi azo kue na terê ti lo.+
6 Eskê ala so kue ayeke tene ande mbeni proverbe na terê ti lo ape?+ mbeni tënë ti kpongo zo nga so a yeke ngangu ti mä yâ ni;
ala yeke tene ande:
‘Mawa na zo so abungbi aye so ayeke ti lo pëpe,
aye ni so ayeke ngbâ juska lawa?
Mawa na zo so asara si bon ahon ndö ni na li ti lo!
7 Azo so mo mû bon ti ala ayeke londo gï hio tongaso na terê ti mo ape?
Ala yeke zingo na ala yeke yengi mo ngangu,
na mo yeke ga tongana kungba so ala gbu na ngangu ahon na ni.+
8 Ngbanga ti so mo gbu lani aye ti amara mo hon na ni,
tanga ti azo ni kue ayeke gbu ande aye ti mo ti hon na ni,+
ndali ti so mo tuku mênë ti azo,
mo sara aye ti ngangu na sese,
na agbata nga na azo so alango na yâ ti agbata ni.+
9 Mawa na zo so awara ye na lege ti likisi lo ga na ni na yâ ti sewa* ti lo,
ti tene lo sara da ti lo na nduzu tongana da ti ndeke,
si a zi lo na yâ ti ye ti sioni.
10 Mo sara ye na mayele ti zia kamene na lê ti sewa* ti mo.
So mo futi amara mingi so, mo sara siokpari na terê* ti mo wani.+
11 Mbeni tênë ti gbagba ni ayeke dekongo,
na mbeni kota keke ti li ti da ayeke ye gbe ni ande.
12 Mawa na zo so asara mbeni gbata na lege ti tukungo mênë,
nga na zo so aleke mbeni kodro na lege ti sarango ye so ayeke mbilimbili pëpe.
13 Bâ, a yeke Jéhovah ti aturugu la asara si azo so asara kua ngangu ndali ti mbeni ye so na nda ni wâ ayeke futi ni,
nga si amara afatigué gï senge senge, ni la ape?+
14 Bâ, hingango ye na ndö ti gloire ti Jéhovah ayeke si singo na ndö ti sese
tongana ti so ngu asi yâ ti ngu-ingo.+
15 Mawa na zo so amû na akamarade ti lo mbeni ye ti nyongo ni,
lo mélangé ni na ngonzo nga na kota ngonzo,
ti tene ala nyon ni asoulé ala si lo bâ terê ti ala senge.
16 Kamene la ayeke gbu lê ti mo ahon ti tene mo wara gloire.
Mo kue, mo nyon sämba ni na mo zia terê ti mo so a fâ na ganza pëpe so na gigi.*
Kopo so ayeke na maboko ti Jéhovah na mbage ti koli so ayeke ga na mbage ti mo,+
na gloire ti mo ayeke ga ye ti kamene.
17 Aye ti ngangu so mo sara na Liban ayeke kiri ti tï na ndö ti mo,
futingo so amû mbeto mingi na anyama ti ngonda so, a yeke tï na ndö ti mo,
ndali ti so mo tuku mênë ti azo
na mo sara ye ti ngangu na sese,
na agbata nga na azo so alango na yâ ti agbata ni.+
18 Yanda so zo aleke ni na kode so,
a yeke sara kua ti nyen?
Statue* so azo la amû wen si aleke na ni nga so ayeke fa gï atënë ti mvene, a yeke sara kua ti nyen?
même tongana zo so aleke ni azia bê ti lo na ndö ni,
si lo leke anzapa so ayeke aye senge senge na so ayeke sara nga tënë pëpe so, a yeke sara kua ti nyen?+
19 Mawa na zo so atene na mbeni morceau ti keke, atene: “Mo zingo!”
Wala lo tene na mbeni tênë so ayeke sara tënë pëpe so, lo tene: “Zingo, mo fa ye na e!”
20 Me Jéhovah ayeke na yâ ti temple ti lo so ayeke nzoni-kue.+
Sese kue, duti kpô na devant ti lo!’”+
3 Sambela ti prophète Habakuk, na yâ ti abia ti vundu:*
2 Jéhovah, mbi mä atënë so a tene na ndö ti mo.
Jéhovah, kusala ti mo asara si li ti mbi akpe kue.
Na yâ ti angu ni,* sara si ye ni akiri abâ gigi.
Na yâ ti angu ni,* sara si azo ahinga ni.
Zia mo girisa pëpe ti bâ mawa ti zo na ngoi ti wusuwusu.+
Gloire ti lo amû yâ ti yayu kue,+
sese asi singo na tënë ti gondango lo.
Azango ye tongana lumière asigi na yâ ti maboko ti lo,
ndo so lo honde ngangu ti lo dä.
5 Sioni kobela ayeke tambela na devant ti lo,+
kobela so asara si terê ti zo amû wâ mingi amû peko ti lo.
Gï bango ndo ti lo asara si amara ahuru na nduzu.+
Ahoto so ayeke kpu na kpu so, yâ ni asuru,
ahoto so ayeke ândö giriri so akuku na sese.+
Alege so aninga mingi awe so ayeke ti lo.
7 Mbi bâ aye ti kirikiri na yâ ti atente ti Cushan.
Abongo ti tente ti kodro ti Madian adö.+
8 Jéhovah, bê ti mo ason na terê ti angu so ayeke sua?
Eskê ngonzo ti mo alondo na terê ti angu so ayeke sua?
Wala mo sara kota ngonzo ni na terê ti ngu-ingo?+
9 Mo sigi na kokora ti mo, na mo leke terê ti mo ti pika ni.
Akeke* ni ayeke nduru ti sara kua ti ala alingbi na tënë ti dengo bä.* (Sélah)
Mo sara si angu so asua asuru yâ ti sese.
10 So ahoto abâ mo, yâ ti terê ti ala ason.+
Kota ngu-nzapa apika amû ndo kue.
A mä totongo ti ngu so alï mingi.+
Ngu ni ayô amaboko ti lo na nduzu.
11 Lâ na nze aluti kpô na lê ti nduzu kâ.+
Alê ti kokora ti mo akpe tongana lumière.+
Zango ti likongo ti mo ayeke tongana ti wâ ti bekpa.
12 Mo tambela na ndö ti sese na ngonzo.
Mo dö* amara na gbe ti gere na yâ ti ngonzo ti mo.
13 Mo sigi ndali ti salut ti azo ti mo, ti sö zo ti mo so mo soro lo.
Mo neka mokonzi* ti da ti zo ti sioni.
A londo na fondation ni ti si na li* ni, a zi ni kue. (Sélah)
14 Mo kôro li ti mokonzi ti aturugu ti lo na aye ti bira* ti lo wani,
na ngoi so ala londo na loro tongana kota pupu ti ngu ti ga ti tomba mbi.
Terê ti ala anzere mingi ti futi na hondengo ni zo so abâ pasi.
15 Mo hon na ambarata ti mo na yâ ti ngu-ingo,
mo hon na ala na yâ ti kota ngu so asua ngangu ngangu.
Abio ti mbi awoko;+
gere ti mbi ayeke dö dongo.
Me mbi yeke duti kpô ti ku lango ti ye ti vundu,+
ndali ti so ye ti vundu ni ayeke ga na ndö ti azo so aga ti sara bira na e.
17 Atâa so peut-être keke ti figue asara fleur pëpe,
na peut-être alê ti vigne ade ti sigi pëpe;
atâa so alê ti olive ayeke dä pëpe,
nga so ayaka alë alê ti kobe pëpe;
atâa so ataba ayeke na yâ ti gbagba ti ala pëpe,
na abagara ayeke dä pëpe na yâ ti gbagba so a bata ala dä;
18 me ti mbi, mbi yeke dekongo na ngia ande ndali ti Jéhovah;
mbi yeke duti ande na ngia ndali ti Nzapa ti salut ti mbi.+
19 Jéhovah, Seigneur ti dunia kue, ayeke ngangu ti mbi,+
lo yeke sara si gere ti mbi ayapu tongana gere ti lekpa,
na lo yeke sara si mbi tambela na ndö ti ando so ayeke na nduzu.+
Na mokonzi ti azo ti hengo bia: ti he ni na aye ti pikango na mozoko ti mbi so ayeke na kamba.
Peut-être a ye ti sara tënë ti “Gbungo terê na ngia.”
Wala “mo sö e ape?”
Wala “ye so afa nengo.”
A lingbi nga ti tene “ngangu ti ala ayeke nzapa ti ala.”
A lingbi nga ti tene “e yeke kui ande pëpe.”
Wala “ti kiri na azo na nzoni lege.”
So ti tene “azo ti Chaldée so ayeke awato.”
Wala “lo zö dukane.”
Wala “kobe ti mafuta.”
A lingbi nga ti tene “lo yeke ngbâ lakue ti gboto épée.”
Wala “asua nzoni.”
Wala “tënë ni ayeke ga tâ tënë.”
Wala “mo bâ mo tene a si hio pëpe.”
Wala “lê ti mo ayeke gï na lege ti ku ni.”
Wala “Bâ zo so âme ti lo asuku.”
A lingbi nga ti tene “na lege ti mabe ti lo.”
Wala “so âme ti lo ayeke.”
Wala “Shéol,” so ti tene dû ti kuâ so azo kue ayeke gue dä. Bâ na kete bakari.
Wala “mara.”
Wala “mara.”
Wala “âme.”
A lingbi nga ti tene “tambela kirikiri tongana zo so anyon sämba.”
Wala “Statue so a tö wen aga ngu si a leke na ni.”
Wala “abia ti totongo kuâ.”
A lingbi nga ti tene “Na ngoi ti e.”
A lingbi nga ti tene “Na ngoi ti e.”
Bâ na kete bakari.
Wala “aga na salut.”
A lingbi nga ti tene “Akokora.”
A lingbi nga ti tene “dengo bä ti yanga so amara adë.”
Na Hébreu: “pika ala tongana ti so a pika na alê ti kobe.”
Na Hébreu: “li.”
Na Hébreu: “go.”
Na Hébreu: “akeke.”
Na Hébreu: “yâ ti mbi adö.”