SOPHONIE
1 Jéhovah asara tënë so na Sophonie* molenge ti Cushi, Cushi ayeke molenge ti Guédaliah, Guédaliah ayeke molenge ti Amariah, Amariah ayeke molenge ti Ézéchias. Nzapa asara tënë so na lo na ngoi ti Josias,+ molenge ti Amon,+ gbia ti Juda:
2 Jéhovah atene: “Mbi yeke futi ande aye kue na ndö ti sese.+
3 “Mbi yeke futi ande azo na anyama.
Mbi yeke futi andeke ti nduzu nga na asusu ti ngu-ingo,+
aye so asara si azo apika gere* ti ala+ so, mbi yeke futi ni legeoko na azo ti sioni;
mbi yeke futi nga azo kue na ndö ti sese,” tënë ti yanga ti Jéhovah la.
4 “Mbi yeke yôro ande maboko ti mbi na terê ti Juda
nga na terê ti azo so kue asara kodro na Jérusalem,
na mbi yeke futi aye kue* ti Baal+ so angbâ na ndo so ge,
mbi yeke futi iri ti aprêtre so ayeke ti ambeni nzapa nde legeoko na aprêtre ni nga.+
5 Mbi yeke futi azo so aluti na li ti ada si akuku na gbe ti aye kue so ayeke na yayu,+
na azo so akuku si ala mû zendo ti ngbâ be-ta-zo na Jéhovah,+
andâ na oko ngoi ni ala mû zendo ti ngbâ be-ta-zo na Malcam.+
6 Mbi yeke futi nga azo so azia ti mû peko ti Jéhovah,+
na so agi Jéhovah pëpe wala so ahunda tënë na lo pëpe.”+
7 Ala duti kpô na gbele Jéhovah, Seigneur ti dunia kue, ndali ti so lâ ti Jéhovah aga nduru awe.+
Jéhovah aleke mbeni sandaga awe; lo sara si azo so lo tisa ala aleke terê ti ala awe.
8 “Na lango so Jéhovah asara sandaga ni, fade mbi yeke punir amokonzi ni,
amolenge ti gbia+ nga na azo kue so ayü bongo ti kodro-wande.
9 Mbi yeke punir ande na lango ni so zo kue so amonté na ndö ti estrade,*
azo so asara si da ti amaître ti ala asi singo na aye ti ngangu nga na handa.
10 Jéhovah atene: “Na lango ni so,
a yeke mä mbeni dekongo so alondo na mbage ti Yanga-ti-gbagba-ti-asusu,+
mbeni demango terê so alondo na Use Vaka ti gbata ni,+
nga na mbeni kota bruit so alondo na ndö ti akete hoto.
11 Ala dema, ala azo so asara kodro na Mactesh,*
ndali ti so a fâ* awadengo buze* kue awe;
azo kue so ayeke pesé argent so, a futi ala awe.
12 Na ngoi ni so mbi yeke mû alampe ti gi yâ ti Jérusalem mbilimbili,
mbi yeke punir ande azo so mbeni ye ti son ala ayeke dä pëpe so,* ala so ayeke tene na yâ ti bê ti ala, atene:
‘Jéhovah ayeke sara ande ye ti nzoni pëpe, wala lo yeke sara ye ti sioni pëpe.’+
13 A yeke mû ande amosoro ti ala ti hon na ni nga a yeke kungbi ada ti ala.+
Ala yeke leke ada, me ala yeke lango ande na yâ ni pëpe;
ala yeke lu avigne, me ala yeke nyon vin ti avigne ni pëpe.+
14 Kota lâ ti Jéhovah aga nduru!+
A yeke pusu nduru, na a yeke ga tâ gï hio hio!*+
Totongo ti lâ ti Jéhovah ayeke yengi ndo.+
Na lâ ni so, zo ti bira ayeke dekongo.+
15 Lâ ni so, a yeke mbeni lango ti kota ngonzo,+
lâ ti kota vundu na ti pasi,+
lâ ti kota pupu ti ngu nga na ti futingo ye,
lâ ti vukongo ndo nga na ndo so avuko pitipiti,+
lâ ti ambinda na ti kota vukongo ndo,+
16 lâ ti hurungo adidi nga na ti dekongo ti bira,+
a yeke ga na terê ti agbata kue so angangu gbagba ayeke na terê ni, nga na terê ti atour so ayeke na coin ti agbagba so ayo na nduzu.+
17 Mbi yeke sara si ye ti vundu aga na ndö ti azo,
ala yeke tambela ande tongana azo so lê ti ala abuba.+
Ndali ti so ala sara siokpari na terê ti Jéhovah.+
A yeke tuku mênë ti ala ande tongana ti so a yeke tuku na poussière,
18 Atâa argent ti ala wala lor ti ala alingbi ti sö ala na lâ ti kota ngonzo ti Jéhovah pëpe.+
Biani, ngonzo ti lo so ayeke tongana wâ ayeke gbi ande sese kue,+
ngbanga ti so lo yeke futi biani biani azo kue so ayeke sara kodro na ndö ti sese, lo yeke futi ala ti sioni ni.”+
2 Kozoni si mbela ni ato nda ti sara kua,
kozoni si lâ ni ahon tongana hulengo pere so pupu ahon na ni,
kozoni si kota ngonzo ti Jéhovah so agbi tongana wâ aga na ndö ti ala,+
kozoni si lâ ti ngonzo ti Jéhovah aga na ndö ti ala,
3 ala gi Jéhovah,+ ala kue so asara terê ti ala kete* na ndö ti sese so,
ala so asara ye alingbi na ambela ti lo so ayeke mbilimbili.*
Ala gi mbilimbili, ala gi ti sara terê ti ala kete.*
Hinga ape* a yeke honde ala ande na lâ ti ngonzo ti Jéhovah.+
4 Gaza ayeke ga ande mbeni gbata so azo angbâ na yâ ni pëpe.
Askélon ayeke ga ande mbeni ndo so yâ ni angbâ senge,+
a yeke tomba ande Ashdod tâ na kota lâ,*
a yeke gboto Écron na gunda ti lo kue tongana ti so a yeke gboto na pere.+
5 “Mawa na azo so asara kodro na terê ti ngu-ingo, na mara ti Kérét!+
Tënë so Jéhovah atene ayeke ga na ndö ti ala.
Mo Canaan, sese ti aPhilistin, mbi yeke futi mo ande,
tongaso si mbeni zo oko ti sara kodro kâ ayeke duti ande dä pëpe.
6 Akodro so ayeke na terê ti ngu so ayeke ga ande ando ti tengo pere ti anyama,
so a yeke wara adû ti ngu dä ndali ti aberger nga a yeke wara agbagba ti batango ataba dä, agbagba so a leke ni na tênë.
7 A yeke ga mbeni ndo ndali ti tanga ti azo ti mara ti Juda so angbâ;+
ala yeke te ye na ndo ni so.
Na bï, ala yeke lango na yâ ti ada ti Askélon,
ndali ti so Jéhovah Nzapa ti ala ayeke bi lê ti lo na ndö ti ala,*
na lo yeke mû ande ala so a gue na ala na ngbâa so ti kiri na ala.”+
8 “Mbi mä sioni tënë so azo ti Moab+ atene, mbi mä zongango ndo ti azo ti Ammon,+
ala he azo ti mbi nga ala pika kate ti ala na ndö ti sese ti azo ti mbi.+
9 Jéhovah ti aturugu, Nzapa ti Israël, atene: “Mbi so mbi yeke na fini, mbi deba yanga, mbi tene,
Moab ayeke ga tongana Sodome,+
azo ti Ammon ayeke ga tongana Gomorrhe,+
a yeke ga mbeni ndo so asisi asigi dä, mbeni dû so gï ingo la ayeke dä nga ayeke désert biani biani.+
Tanga ti azo ti mbi so angbâ ayeke gbu aye ti azo so ti hon na ni,
tanga ti azo ti mara ti mbi so angbâ ayeke ro aye ti akodro so ti ga ti ala.
10 Ye so ayeke si ande na ala ndali ti baba ti ala la,+
ngbanga ti so ala he azo ti Jéhovah ti aturugu nga ala bâ terê ti ala kota na ndö ti azo ni.
11 Jéhovah ayeke duti ande mbeni ye so amû mbeto na ala;*
lo yeke futi anzapa kue ti sese,*
na azoa kue ti amara ayeke kuku ande na gbe ti lo,*+
zo oko oko na ndo ti lo.
12 Ala azo ti Éthiopie, ala nga kue a yeke fâ ala na épée.+
13 Lo yeke yôro ande maboko ti lo na mbage ti nord na lo yeke futi Assyrie,
lo yeke sara ande si Ninive aga mbeni ndo so zo asara kodro na yâ ni pëpe,+ so ahule tongana désert.
14 Agroupe ti anyama ayeke lango na yâ ti Ninive, mara ti anyama ti ngonda nde nde kue.*
Ndeke so a iri lo Pélican na porc-épic ayeke lango na bï na popo ti ali ti apilier ni so akungbi awe.
Mbeni go ayeke he ande bia na lê ti fenêtre.
Aye so afuti awe la ayeke na yanga ti da ni;
aye ti pendere so a leke na keke ti cèdre so, terê ni ayeke ngbâ senge.
15 So ayeke gbata ti baba so aduti lani na siriri so la,
gbata so ayeke tene lani na yâ ti bê ti lo, atene: ‘Gï mbi oko awe, mbeni zo nde ayeke dä pëpe.’
Bâ tongana nyen la si lo ga mbeni ye so amû mbeto na zo so,
tâ mbeni ndo ti lango ti anyama ti ngonda!
Azo kue so ayeke hon na lege ayeke hûru yanga ti ala nga ala yeke pika li ti maboko ti ala.+
3 Mawa na gbata so asara kpengba-li, gbata so sioni ayeke na terê ni, gbata so asara pasi na azo ti lo wani!+
2 Lo mä yanga pëpe,+ lo yeda na wango pëpe.+
Lo zia bê ti lo na Jéhovah pëpe,+ lo ga nduru na Nzapa ti lo pëpe.+
3 Amokonzi ti lo ayeke abamara so ayeke toto.+
Ajuge ti lo ayeke tongana ambo ti ngonda* na bï,
ala zia mbeni bio oko tongaso angbâ juska na ndapre ti tene ala te pëpe.
4 Aprophète ti lo ayeke azo ti fandara, azo ti kango zo.+
5 Jéhovah, so ayeke na yâ ti gbata ni, ayeke mbilimbili,+ lo sara ye ti sioni pëpe.
Lakue na ndapre, lo yeke sara si azo ahinga tënë ti ngbanga so lo fâ,+
a yeke gï dä lakue tongana ti so kota ndapre ayeke dä lakue.
Me, kamene asara zo ti sioni pëpe.+
6 “Mbi futi amara, akota tour ti ala so ayeke na acoin ti gbagba angbâ senge.
Mbi buba alege ti ala kue, na a sara si zo ayeke hon dä pëpe.
Agbata ti ala abuba kue, zo oko ayeke na yâ ni pëpe, zo asara kodro dä pëpe.+
7 Mbi tene: ‘Ti tâ tënë ni, mo yeke sara ande mbeto ti mbi na mo yeke yeda na wango ti mbi,’*+
tongaso si a futi ndo so lo lango dä so pëpe.+
Mbi doit ti punir lo ndali ti aye so kue.
Me, ala yeke tâ gï nduru ti sara ye ti sioni.+
8 Jéhovah atene: ‘Ala ngbâ ti ku* mbi,+
juska na lango so mbi yeke londo ti gbu aye na ngangu,*
ndali ti so mbela ti mbi ayeke ti bungbi amara, ti bungbi aroyaume,
ti tuku ngonzo ti mbi na ndö ti ala, ngonzo ti mbi kue, ngonzo ti mbi so ayeke tongana wâ.+
Biani, ngonzo ti mbi so ayeke tongana wâ ayeke gbi ande sese kue.+
9 Na ngoi ni so, mbi yeke changé ande yanga ti kodro ti amara na mbeni yanga ti kodro so ayeke nzoni kue,
si ala kue alingbi ti di iri ti Jéhovah,
10 Ti londo na ando so ayeke na terê ti akota ngu ti Éthiopie,
ala so avoro yanga na mbi, so ti tene molenge-wali ti azo ti mbi so a kangbi ala lani kirikiri, ayeke mû ande matabisi ti ga na ni na mbi.+
11 Na lango ni so, a yeke zia ande kamene na lê ti mo pëpe
ndali ti aye kue so mo sara ti sara kpengba-li na mbi.+
Biani, na lango ni so, mbi yeke zi azo ti baba so ayeke na yâ ti mo si ayeke pika kate ti ala so,
na mo yeke duti zo ti baba pëpe na ndö ti hoto ti mbi so ayeke nzoni-kue.+
12 Mbi yeke zia lege na azo so asara terê ti ala kete na so ayeke asenge zo so ti ngbâ na yâ ti mo,+
na ala yeke bata terê ti ala na gbe ti iri ti mbi, Jéhovah.
13 Tanga ti azo ti Israël+ so angbâ ayeke sara ande ye ti sioni pëpe;+
ala yeke tene ande mvene pëpe, wala a yeke wara tënë ti handango zo na yanga ti ala pëpe.
Ala yeke te ye* na ala yeke lango, zo oko ayeke zia mbeto na yâ ti ala pëpe.”+
14 Mo dekongo na ngia, molenge-wali ti Sion!
Mo Israël, mo dekongo ti songo benda!+
Molenge-wali ti Jérusalem, mo sara ngia, zia bê ti mo asi na ngia!+
15 Jéhovah azi ngbanga ti lo na li ti mo awe.+
Lo sara si wato ti mo akpe yongoro awe.+
Jéhovah, Gbia ti Israël, ayeke na popo ti mo.+
Mo yeke sara mbeto ti ye ti vundu encore ape.+
16 Na lango ni so, a yeke tene ande na Jérusalem, a tene:
“Sion, mo sara mbeto pëpe.+
Zia maboko ti mo atï pëpe.
17 Jéhovah Nzapa ti mo ayeke na popo ti mo.+
So lo yeke ngangu zo ti bira, lo yeke sö mo ande.
Terê ti lo ayeke nzere ande mingi ndali ti mo.+
Na lege ti ndoye ti lo, lo yeke sara tënë pëpe.*
Terê ti lo ayeke nzere mingi ndali ti mo, lo yeke dekongo na ngia.
18 Mbi yeke bungbi ande na ndo oko ala so vundu asara ala ndali ti so ala yeke dä pëpe na ngoi ti amatanga ti mo,+
ala yeke lani na terê ti mo pëpe ngbanga ti so a bi kamene na lê ti ala ndali ti lo.+
19 Bâ, na ngoi ni so, mbi yeke sara ande mbeni ye ti ngangu na azo kue so asara pasi na mo.+
Mbi yeke sara si ala ga mbeni ye ti gonda nga mbeni ye so iri ni awu*
na yâ ti kodro kue so a bi kamene na lê ti ala dä so.
20 Na ngoi ni so, mbi yeke mû ala ti kiri na ni,
na ngoi ni so, mbi yeke bungbi ala ndo oko.
Mbi yeke sara si ala ga mbeni ye so iri ni awu,* mbeni ye ti gonda+ na popo ti azo kue ti sese,
na ngoi so ala yeke bâ so mbi mû azo ti ala so ayeke na ngbâa so, mbi kiri na ala na ndo ti ala,” tënë ti yanga ti Jéhovah la.+
Ndani aye ti tene “Jéhovah ahonde ye (wala lo bata ye nzoni).”
Na bango ni a ye ti sara tënë ti aye so andu vorongo ayanda.
Wala “trace kue.”
Wala “podium; yanga-da.” Peut-être estrade so trône ti gbia ayeke dä.
Na bango ni ayeke mbeni fini mbage ti Jérusalem so ayeke nduru na Yanga-ti-gbagba-ti-asusu.
Na Hébreu: “a kanga yanga ti.”
Wala “azo ti kango ye.”
Na Hébreu: “ala so akpengba terê ti ala na ndö ti saka ti ala,” tongana ti saka so akpengba na yâ ti tuku ti vin.
Wala “a yeke kpe loro hio.”
Na Hébreu: “akamba ti yâ.”
Wala “azo ti tâ be-ti-molenge.”
Na Hébreu: “ngbanga so lo fâ.”
Wala “duti na tâ be-ti-molenge.”
Wala “A peut ti si so.”
Wala “na midi.”
Wala “ayeke bâ lege ti ala.”
Wala “so asara si mbeto ahon ndö ti ala.”
Wala “sara si ala nge.”
Wala “ayeke voro lo ande.”
Na Hébreu: “anyama nde nde kue ti mbeni mara.”
Wala “aloup.”
Wala “mo yeke kiri na nzoni lege.”
Wala “Ala kanga bê ti ku.”
A lingbi nga ti tene “mbi londo tongana témoin.”
Wala “ala duti beoko ti voro lo.”
Wala “pere.”
Wala “lo yeke duti kpô.”
Na Hébreu: “ala wara mbeni iri.”
Na Hébreu: “ala wara mbeni iri.”