AGGÉE

1 Na yâ ti use ngu ti komandema ti Gbia Darius, na nze omene ni, na kozo lango ti nze ni, Jéhovah atokua prophète Aggée*+ ti sara tënë na Zorobabel,+ gouverneur ti Juda so ayeke molenge ti Shéaltiel. Nzapa atokua lo nga na Kota prêtre Josué, molenge ti Jéhozadac. Lo tene:

2 “Jéhovah ti aturugu atene: ‘Azo so atene: “Ngoi ti lekengo* da* ti Jéhovah ade ti lingbi pëpe.”’”+

3 Jéhovah akiri atene na prophète Aggée:+ 4 “Ngoi ni la ti tene ala lango na yâ ti ada ti ala so a leke yâ ni na apendere keke na ngoi so da ti mbi abuba kue?+ 5 Fadeso, Jéhovah ti aturugu atene: ‘Ala gbu li ti ala nzoni na ndö ti sarango ye ti ala. 6 Ala lu alê ti kobe mingi, me ala ko lengo ni gï kete.+ Ala te ye, me yâ ti ala asi pëpe. Ala nyon ye, me a lingbi na nzara ti ala pëpe. Ala yü bongo, me terê ti ala achauffé pëpe. Zo ayeke sara kua na lo wara nginza, me bozo so lo zia nginza ni na yâ ni akôro kue awe.’”

7 “Jéhovah ti aturugu atene: ‘Ala gbu li ti ala nzoni na ndö ti sarango ye ti ala.’

8 “Jéhovah atene: ‘Ala monté na ndö ti hoto, ala mû keke ala ga na ni.+ Ala leke da ti mbi,+ tongaso si a mû ngia na mbi nga mbi wara gloire dä.’”+

9 Jéhovah ti aturugu atene: “‘Ala ku ti wara ye mingi, me ala wara ye gï kete; na tongana ala gue na ni na yâ ti da ti mbi, mbi hûru ni kue ahon.+ Ngbanga ti nyen? A yeke ngbanga ti so da ti mbi abuba kue, me ala oko oko kue ayeke gi ti leke gï ada ti ala wani.+ 10 Ye so la asara si nduzu ake ti mû na ala ngu ti pere, na sese ake ti lë alê ti kobe. 11 Mbi sara si buru angbâ na ndö ti sese, ahoto, alê ti kobe, afini vin, mafuta, aye kue so asigi na sese, azo na anyama so ala bata nga na ndö ti akua ti maboko ti ala kue.’”

12 Zorobabel+ molenge ti Shéaltiel,+ Kota prêtre Josué molenge ti Jéhozadac+ nga na tanga ti azo ni kue amä yanga ti Jéhovah Nzapa ti ala nga na tënë ti prophète Aggée, ndali ti so Jéhovah Nzapa ti ala la atokua lo. Azo ni akomanse ti kpe mbeto ti Jéhovah.

13 Tongaso Aggée, watokua ti Jéhovah, atene tokua ni na azo ni alingbi na kua ti lo so Jéhovah amû na lo. Lo tene: “‘Mbi yeke na ala,’+ tënë ti yanga ti Jéhovah la.”

14 Jéhovah apusu*+ Zorobabel gouverneur ti Juda,+ so ayeke molenge ti Shéaltiel, Kota prêtre Josué,+ molenge ti Jéhozadac nga na tanga ti azo ni kue ti komanse ti sara kua. Tongaso ala ga, ala komanse ti sara kua ti da ti Nzapa ti ala, Jéhovah ti aturugu.+ 15 Ye ni so asi lani na lango 24 ti nze omene ni, na ngu use ti komandema ti Gbia Darius.+

2 Na nze mbasambala ni, na lango 21 ti nze ni so, Jéhovah asara tënë na lege ti prophète Aggée,+ lo tene: 2 “Pardon, hunda Zorobabel+ gouverneur ti Juda+ so ayeke molenge ti Shéaltiel, Kota prêtre Josué+ molenge ti Jéhozadac+ nga na tanga ti azo ni kue, mo tene: 3 ‘Azo wa la na popo ti ala abâ da* so na yâ ti gloire ti lo ti ândö?+ Ti fadeso, da ni ayeke tongana nyen na lê ti ala? A yeke ye oko pëpe tongana a haka ni na ti kozo, ni la ape?’+

4 Jéhovah atene: “‘Me ti fadeso Zorobabel, mo sara ye tongana koli. Kota prêtre Josué molenge ti Jéhozadac, mo nga kue mo sara ye tongana koli.’

Jéhovah akiri atene: “‘Ala azo ti kodro ni kue,+ ala sara ye tongana koli nga ala sara kua.’

“‘Biani, mbi yeke na ala,’+ tënë ti yanga ti Jéhovah ti aturugu la. 5 ‘Ala dabe ti ala na ye so mbi mû zendo ni na ala na ngoi so ala sigi lani na Égypte,+ na yingo ti mbi ayeke na popo ti ala.*+ Ala sara mbeto pëpe.’”+

6 “Jéhovah ti aturugu atene: ‘Na yâ ti kete ngoi, mbi yeke kiri ande ti yengi yayu, sese, ngu-ingo nga na kuru sese.’+

7 “Jéhovah ti aturugu atene: ‘Mbi yeke yengi amara kue, nga aye ti nginza* ti amara kue ayeke ga ande na yâ ti da so,+ na mbi yeke sara si da ni asi na gloire.’+

8 “Jéhovah ti aturugu atene: ‘Argent ayeke ti mbi, nga lor ayeke ti mbi.’

9 “Jéhovah ti aturugu atene: ‘Gloire so ayeke ga ande na ndö ti da so ayeke duti kota ahon ti kozoni so,+

nga mbi yeke sara si siriri aduti na ndo so,’+ tënë ti yanga ti Jéhovah ti aturugu la.”

10 Na yâ ti use ngu ti komandema ti Darius, na lango 24 ti nze gumbaya ni, Jéhovah asara tënë na prophète Aggée,+ atene: 11 “Jéhovah ti aturugu atene: ‘Pardon, hunda aprêtre na ndö ti ndia,+ mo tene: 12 “Tongana mbeni zo ayô kasa ti nyama so a zia ni nde ndali ti Nzapa na yâ ti bongo ti lo, na bongo ni andu mapa wala soupe wala mafuta wala vin wala mbeni ye ti tengo ni, eskê aye ni so ayeke ga nzoni-kue?”’”

Aprêtre ni atene: “Ên-ën!”

13 Aggée akiri ahunda ndo, atene: “Tongana mbeni zo aga sioni ndali ti so lo ndu mbeni zo* so akui, na lo ndu mbeni oko ti aye ti tengo ni so, eskê ye ni ayeke ga sioni?”+

Aprêtre ni atene: “En, a yeke ga sioni.”

14 Tongaso Aggée atene: “Jéhovah atene: ‘Na lê ti mbi, mara ni, azo ni nga na kusala kue ti maboko ti ala ayeke sioni. Sandaga kue so ala mû ayeke sioni.’

15 “‘Me ti fadeso, pardon, ala gbu li ti ala nzoni na ndö ti ye so laso ti gue na ni: Kozo si a komanse ti kiri ti leke temple ti Jéhovah,+ 16 ye ni ayeke lani tongana nyen? Tongana zo ague ti mû sakpa ti lê ti kobe 20, lo yeke wara gï sakpa 10, na tongana zo ague ti mû ngbenda ti vin 50, lo yeke wara gï ngbenda 20 awe.+ 17 Mbi buba akusala ti maboko ti ala kue. Mbi sara si akobe ti yaka ahule hulengo, buruma agbu akobe ni,+ nga ngu apika na akota glason. Me mbeni zo na popo ti ala atourné na mbage ti mbi pëpe,’ tënë ti yanga ti Jéhovah la.

18 “‘Laso, lango 24 ti nze gumbaya ni, a zia gere ti temple ti Jéhovah na sese.+ Ti komanse laso ti gue na ni, ala gbu li ti ala na ndö ti ye so: 19 Eskê ngongoa ti kobe angbâ na yâ ti gogoro?*+ Keke ti vigne, keke ti figue, keke ti grenade nga na keke ti olive ade alë pëpe. A yeke tongaso ape? Ti londo laso ti gue na ni, mbi yeke iri tënë nzoni na ndö ti ala.’”+

20 Jéhovah akiri asara tënë na Aggée ti fani use ni na lango 24 ti nze ni,+ lo tene: 21 “Tene na Zorobabel gouverneur ti Juda, mo tene: ‘Mbi yeke yengi yayu na sese.+ 22 Mbi yeke kinda atrône ti agbia, mbi yeke futi biani biani ngangu ti aroyaume ti amara.+ Mbi yeke kinda apuse ti mbarata nga na azo so ayeke kpe na ni. Ambarata ayeke tï, na azo ti kpengo na ambarata ni ayeke fâ terê na popo ti ala na épée.’”+

23 “Jéhovah ti aturugu atene: ‘Na lango ni so, mbi yeke mû mo wakua ti mbi Zorobabel+ molenge ti Shéaltiel,+ na mbi sara si mo ga tongana bague ti kpongo na nzoroko,’ tënë ti yanga ti Jéhovah la. ‘A yeke ndali ti so mo la mbi soro mo,’ tënë ti yanga ti Jéhovah ti aturugu la.”