MALACHIE

1 Kpengba tokua:

Tënë so Jéhovah atene na azo ti Israël na lege ti prophète Malachie:*

2 Jéhovah atene: “Azo ti mbi, mbi fa na ala yengo so mbi ye na ala.”+

Me ala tene: “Nyen la afa atene mo ye e ni?”

Jéhovah atene: “Eskê Ésaü ayeke lani ita ti Jacob ape?+ Me mbi ye Jacob, 3 na mbi ke Ésaü;+ ni la mbi sara si ndö ti ahoto ti lo aga mbeni ndo so azo ayeke dä pëpe+ nga aye ti lo aga ti ambo ti ngonda ti benyama.”*+

4 “Atâa Édom* atene: ‘A futi e awe, me e yeke kiri ande ti leke ando ni so abuba kue so,’ Jéhovah ti aturugu atene ti lo, atene: ‘Ala yeke leke ni ande, me mbi yeke kungbi ni na sese, na a yeke iri ala ande, a tene, “kodro ti sarango aye ti sioni” nga “azo so Jéhovah afa ngonzo ti lo na terê ti ala biani biani.”+ 5 Ala wani ayeke bâ ni ande na lê ti ala, na ala yeke tene: “Zia a gonda kota ti Jéhovah na yâ ti kodro ti Israël kue.”’”

6 “‘Molenge ayeke mû nengo na babâ ti lo,+ na zo ti kua ayeke mû nengo na wa ti lo. Ni la, tongana mbi yeke babâ,+ nengo so ala doit ti mû na mbi so ayeke na ndo wa?+ Nga tongana mbi yeke mokonzi* ti ala, kpengo mbeto ti* mbi ni ayeke na ndo wa?’ So tënë so mbi, Jéhovah ti aturugu, mbi tene na ala, aprêtre, so ayeke bâ iri ti mbi tongana mbumbuse ye so la.+

“‘Me ala tene: “E bâ iri ti mo tongana mbumbuse ye ni tongana nyen?”’

7 “‘A yeke na lege so ala mû kobe* so ayeke sioni si ala zia na ndö ti gbalaka ti mbi.’

“‘Ala tene: “ E sara si mo ga sioni ni tongana nyen?”’

“‘Na lege so ala tene: “Table ti Jéhovah+ ayeke mbeni ye so a lingbi ti bâ ni tongana mbumbuse ye.” 8 Na ngoi so ala mû mbeni nyama so lê ti lo abuba na sandaga, ala tene: “A yeke sioni pëpe.” Na ngoi so ala mû mbeni nyama so gere ti lo abuba wala so lo yeke na kobela na sandaga, ala tene: “A yeke sioni pëpe.”’”+

Jéhovah ti aturugu atene: “Ala tara ti mû anyama ni so na gouverneur ti ala, e bâ. Eskê bê ti lo ayeke nzere ande na ala? wala lo yeke yamba ala ande nzoni?”

9 “Fadeso, ala voro terê ti ala na Nzapa, si lo sara nzoni bê na e. Na amara ti sandaga tongaso na maboko ti ala, eskê lo yeke yamba ande mbeni zo na popo ti ala na nzoni bê la?” Tënë ti yanga ti Jéhovah ti aturugu la.

10 “Zo wa la na popo ti ala ayeke yeda ti kanga ayanga-da ni?*+ so même ala sara wâ na ndö ti gbalaka ti mbi senge pëpe so.”+ Jéhovah ti aturugu atene: “Bê ti mbi anzere na terê ti ala pëpe. Bê ti mbi anzere oko pëpe ti mû mbeni matabisi ti maboko ti ala.”+

11 “Ti londo na mbage ti sigingo ti lâ ti si na mbage ti lindango ti lâ,* iri ti mbi ayeke ga ande kota na popo ti amara.+ Na ando kue, a yeke zö ande sandaga so guru ni alondo, nga a yeke mû amatabisi na iri ti mbi, tongana nzoni matabisi, ndali ti so iri ti mbi ayeke ga ande kota na popo ti amara.”+ Tënë ti yanga ti Jéhovah ti aturugu la.

12 “Me ala yeke buba ni,*+ ala tene: ‘Table ti Jéhovah ayeke sioni, nga asandaga so a zia na ndö ni wala kobe so ayeke na ndö ni, a yeke ye so a lingbi a bâ ni tongana mbumbuse ye.’+ 13 Ala tene nga, atene: ‘So pasi!’ nga ala zere ni.” Tënë so Jéhovah ti aturugu atene la. “Ala mû nyama so ala nzi nzingo, nyama so gere ti lo abuba nga na nyama so kobela asara lo ala ga na ni. Ala ga na aye so ti mû ni na matabisi. Mbi yeke mû ande ni na maboko ti ala?”+ Tënë ti yanga ti Jéhovah la.

14 “Deba aga na li ti zo so asara ye na mayele, so lo yeke na mbeni pendere nyama na popo ti anyama ti lo, me lo mû zendo na lo mû nyama so ayeke nzoni pëpe,* lo mû na sandaga na Jéhovah. Mbi yeke Kota Gbia+ nga azo ayeke sara ande mbeto ti iri ti mbi na popo ti amara.” Tënë ti yanga ti Jéhovah ti aturugu la.+

2 Fadeso, ala aprêtre, commandement so ayeke ndali ti ala.+ 2 Jéhovah ti aturugu atene: “Tongana ala ke ti mä mbi nga ti zia si tënë ti mungo gonda na iri ti mbi agbu bê ti ala, mbi yeke sara si deba aga na ndö ti ala+ nga mbi yeke sara si tufa so ayeke na ndö ti ala so akiri aga deba.+ Biani, mbi sara si tufa so ayeke na ndö ti ala aga deba awe, ngbanga ti so tënë ni so agbu bê ti ala pëpe.”

3 “Bâ, ngbanga ti ala mbi yeke futi* ngongoa ti kobe so ala lu,+ na mbi yeke tuku puru ti anyama na lê ti ala, puru ti anyama ti amatanga ti ala, na a yeke mû ande ala ti hon na ni kâ.* 4 Tongaso, ala yeke hinga ande atene mbi mû lani commandement so na ala ti tene mbele so mbi te na Lévi angbâ ti sara kua,”+ tënë ti yanga ti Jéhovah ti aturugu la.

5 “Mbele so mbi te na lo ayeke mbele ti fini nga na ti siriri, mbi mû ni na lo legeoko na tënë ti kpengo mbeto.* Lo kpe mbeto ti mbi, biani lo sara mbeto ti iri ti mbi. 6 Ndia* ti tâ tënë ayeke lani na yanga ti lo,+ na a wara tënë ti kirikiri na yanga ti lo pëpe. Lo tambela lani na mbi na siriri nga na yâ ti mbilimbili,+ na lo sara si azo mingi azia lani lege ti faute so ala yeke sara. 7 Hingango ye adoit ti duti lakue na yanga ti prêtre, na azo adoit ti gi ti wara ndia* na yanga ti lo,+ ndali ti so lo yeke watokua ti Jéhovah ti aturugu.

8 “Me ala, ala tourné peko ti ala na lege ni so awe. Ala sara si azo mingi apika gere ti ala na ndia.*+ Ala buba lege ti mbele so mbi te na Lévi,”+ so tënë ti yanga ti Jéhovah ti aturugu la. 9 “Ni la mbi yeke sara si azo ni kue ake ala bê oko nga ala ga kete na lê ti azo ni, ndali ti so ala bata lege ti mbi pëpe, me ala yeke bâ yâ ti azo bango si ala sara kua na ndia ni na lege ni.”+

10 “E kue, babâ ti e ayeke gï oko ape?+ Gï Nzapa oko la asara e kue ape? Tongaso, ngbanga ti nyen la e yeke sara ye na amba ti e na popo ti e na handa?+ Ngbanga ti nyen la e yeke sara si mbele ti akotara ti e aga sioni? 11 Juda asara ye lani na handa. Nga, na yâ ti Israël na Jérusalem azo asara mbeni ye so ayeke sioni mingi. Juda abi nengo ti Jéhovah na sese,+ Nzapa so aye ye so ayeke nzoni-kue, na lo sara mariage na molenge-wali ti mbeni nzapa nde.+ 12 Jéhovah ayeke zi na yâ ti atente ti Jacob zo kue so asara mara ti ye tongaso, atâa lo yeke zo wa,* atâa lo mû sandaga na Jéhovah ti aturugu.”+

13 “Mbeni ye ni* ayeke nga dä so ala sara, na ye ni so asara si ngu ti lê, toto nga na dema amû ndö ti gbalaka ti Jéhovah kue; ndali ni lo ye ti bi lê ti lo na mbage ti asandaga ti ala encore ape, nga lo ye ti bâ mbeni ye ti maboko ti ala na nzoni lê encore ape.+ 14 Si ala tene: ‘Ngbanga ti nyen?’ A yeke ngbanga ti so Jéhovah ayeke témoin na popo ti mo na wali ti lâ ti maseka ti mo, wali so mo sara ye na lo na handa, atâa so lo yeke wali ti mo, wali ti mo ti mbele.*+ 15 Me mbeni zo oko ayeke dä so lo sara lani tongaso pëpe, ndali ti so mbeni mbage ti yingo ti Nzapa ayeke na lo. Me zo ni so ayeke gi lani nyen? Lo yeke gi hale* ti Nzapa. Tongaso, ala sara hange na bango ndo* so ala yeke na ni so, zia zo oko asara ye na handa pëpe na wali ti lâ ti maseka ti lo. 16 Ndali ti so mbi ke divorce,”+ tënë ti yanga ti Jéhovah Nzapa ti Israël la, “mbi ke nga zo so ayü sarango ye ti ngangu na zo na terê ti lo tongana bongo,” tënë ti yanga ti Jéhovah ti aturugu la. “Ala sara hange na bango ndo so ala yeke na ni so, na ala sara ye na handa pëpe.+

17 “Ala fatigué Jéhovah awe na atënë ti ala so ala tene so.+ Me ala tene: ‘E fatigué lo ni tongana nyen?’ Na lege so ala yeke tene: ‘Zo kue so asara ye ti sioni, lo yeke nzoni na lê ti Jéhovah, na bê ti Lo anzere na terê ti zo ni’+ wala ala yeke tene: ‘Nzapa ti mbilimbili so, lo yeke na ndo wa?’”

3 Jéhovah ti aturugu atene: “Bâ, mbi yeke tokua watokua ti mbi, na lo yeke leke lege na devant ti mbi.+ Gï hio tongaso, tâ Seigneur so ala yeke gi lo so ayeke ga ande na yâ ti temple ti lo,+ nga watokua ti mbele ni ayeke ga ande, lo so bê ti ala awara ngia na lege ti lo. Bâ, lo yeke ga ande biani.”

2 “Me zo wa la ayeke kanga bê ti lo ande na lango ti gango ti lo? Zo wa la alingbi ti luti na nduzu tongana lo si? Ngbanga ti so lo yeke duti ande tongana wâ ti matawa nga tongana savon+ ti azo ti sukulango bongo. 3 Lo yeke duti ande tongana zo so ayeke zi saleté na terê ti ye, zo so atö argent+ ti zi saleté na terê ni, na lo yeke sukula amolenge ti Lévi. Biani, lo yeke sara si ala vuru* tongana lor na argent, na Jéhovah ayeke wara mbeni mara so ayeke mû ande sandaga na lege ti mbilimbili. 4 Sandaga so Juda na Jérusalem ayeke mû ayeke nzere ande biani na Jéhovah tongana ti ngoi ti giriri, tongana ti angu so ahon ândö so.+

5 Jéhovah ti aturugu atene: “Mbi yeke ga nduru na terê ti ala ti fâ ngbanga na li ti ala, hio mbi yeke ga zo ti bingo tënë na li ti azo ti sarango yorö,+ azo ti gingo wali wala koli nde, azo so adeba yanga na ndö ti mvene,+ azo so asara ye ti likisi na mbage ti zo so ala mû lo na kua,+ na mbage ti wali-mua, na mbage ti molenge so babâ ti lo ayeke dä pëpe,*+ nga ti bi tënë na li ti azo so ake ti mû maboko na* awande.+ Azo ni so asara mbeto ti mbi pëpe.”

6 “Mbi yeke Jéhovah; mbi changé pëpe.*+ Ala yeke amolenge ti Jacob; a hunzi ala kue pëpe. 7 A londo na ngoi ti akotara ti ala, ala tourné peko ti ala na andia ti mbi, ala bata ni pëpe.+ Ala kiri na mbi, na mbi yeke kiri na ala.”+ Tënë ti yanga ti Jéhovah ti aturugu la.

Me ala tene: “E yeke sara tongana nyen ti kiri na mo?”

8 “Eskê senge zo alingbi ti nzi Nzapa? Me ala yeke nzi mbi.”

Ala tene: “E nzi mo ni tongana nyen?”

“Ala nzi mbi na yâ ti adîme nga na yâ ti amatabisi. 9 Deba ayeke biani na li ti ala ndali ti so ala yeke nzi mbi, mara ni kue la ayeke nzi mbi so. 10 Ala ga na dîme ni kue na ndo ti batango aye dä,+ tongaso si kobe alingbi ti duti na yâ ti da ti mbi.+ Ala tara mbi na ndö ti tënë so ti bâ wala mbi yeke zi fenêtre ti yayu ti tuku tufa ti mbi mingi mingi na ndö ti ala ape si,+ juska ye oko amanke ala pëpe.” Tënë ti yanga ti Jéhovah ti aturugu la.+

11 “Mbi yeke suku ande na lo* so ayeke te aye ti ala kue so, na lo yeke buba ande akobe ti yaka ti ala pëpe, wala akeke ti vigne ti ala ayeke ngbâ senge pëpe, lê ni ayeke duti dä.”+ Tënë ti yanga ti Jéhovah ti aturugu la.

12 Jéhovah ti aturugu atene: “Amara kue ayeke tene so ala yeke azo so ayeke na ngia,+ ndali ti so ala yeke duti ande mbeni kodro so azia ngia na bê ti zo.”

13 Jéhovah atene: “Atënë so ala tene na terê ti mbi ayeke sioni mingi.”

Me ala tene: “Tënë ti nyen la si e tene na terê ti mo na popo ti e ni?”+

14 “Ala tene: ‘Vorongo Nzapa ayeke gï senge senge.+ So e yeke sara ye alingbi na aye so lo hunda na e nga e yeke tambela na yâ ti vundu na gbele Jéhovah ti aturugu so, ye ti nzoni ti nyen la e wara dä? 15 Fadeso, e bâ so azo ti fandara la ayeke na ngia. Nga, azo so angbâ na yâ ti sarango ye ti sioni la aye ti ala aga nzoni.+ Ala gue juska ti tara bê ti Nzapa me ye oko asi na ala pëpe.’”

16 Na ngoi ni so, azo so akpe mbeto ti Jéhovah asara tënë na popo ti ala, zo oko oko na kamarade ti lo, na Jéhovah ayeke dengi mê ti lo, lo yeke mä ala. A sû na gbele lo mbeni buku ti dango bê+ ndali ti ala so akpe mbeto ti Jéhovah nga ndali ti ala so ayeke gbu li na ndö ti* iri ti lo.+

17 Jéhovah ti aturugu atene: “Ala yeke duti ande azo ti mbi+ na lango so mbi yeke sara si ala ga ye* ti mbi so mara ni ayeke use pëpe.+ Mbi yeke bâ ande mawa ti ala, legeoko tongana ti so mbeni koli ayeke bâ mawa ti molenge ti lo ti koli so ayeke sara kua na lo.+ 18 Ala yeke kiri ande ti bâ kangbi so ayeke na popo ti zo ti mbilimbili na zo ti sioni,+ na kangbi so ayeke na popo ti zo so ayeke sara kua na Nzapa na zo so ayeke sara kua na lo pëpe.”

4 Jéhovah ti aturugu atene: “Bâ, lango ni ayeke ga, lango so ayeke za wâ tongana four;+ na lango ni so, azo ti fandara kue nga na azo so ayeke sara ye ti sioni ayeke ga ande tongana asaleté ti peko ti alê ti kobe. Biani, lango ni so ayeke ga so ayeke hunzi ala kue, na a yeke zia mbeni gere ti keke ni wala amaboko ni ti ngbâ na ala pëpe. 2 Me ti ala so amû nengo na* iri ti mbi, lâ ti mbilimbili ayeke londo ti su na ndö ti ala, na sungo* ni ayeke sava ala. Ala yeke huru na ngia tongana akete molenge ti bagara so akono pendere.”

3 “Ala yeke dö ande azo ti sioni na gbe ti gere ti ala, ndali ti so azo ni ayeke ga ande tongana poussière na gbe ti gere ti ala na lango so mbi yeke londo ti sara mbeni ye.” So tënë ti yanga ti Jéhovah ti aturugu la.

4 “Ala dabe ti ala na Ndia ti Moïse, wakua ti mbi, so ti tene andia nga na ambela so mbi mû yanga lani na azo ti Israël kue na Horeb ti tene ala sara ye alingbi na ni.+

5 “Bâ, mbi yeke tokua na ala prophète Élie+ kozoni si kota lâ ti Jéhovah so amû mbeto mingi asi.+ 6 Lo yeke sara si bê ti ababâ aga tongana ti amolenge ti ala,*+ na bê ti amolenge aga tongana ti ababâ ti ala, tongaso si mbi nga mbi lingbi ti ga ti sara ye ti sioni na sese pëpe, ti futi ni biani.”

(Mbage ti Mbeti ti Nzapa so a sû ândö na Hébreu nga na Araméen ahunzi awe. Ti so aga na peko ayeke mbage ti Mbeti ti Nzapa so a sû ândö na Grec)