NZONI TËNË SO MARC ASÛ NA MBETI

1 So ayeke tongo nda ti nzoni tënë na ndö ti Jésus Christ, Molenge ti Nzapa: 2 Gï tongana ti so a sû na yâ ti mbeti ti prophète Ésaïe, a tene: “(Bâ, mbi yeke tokua watokua ti mbi kozo ti mo,* na lo yeke leke lege ti mo ti tene mo hon dä.)+ 3 Go ti mbeni zo ayeke dekongo na yâ ti benyama, atene: ‘Ala leke lege ti Jéhovah,* ala sara si alege ti lo aduti droit.’”+ 4 Jean Baptiste ayeke lani na yâ ti benyama, lo yeke fa tënë ti batême so ayeke fä ti changengo bê, tongaso si a pardonné asiokpari ti ala.+ 5 Azo ti sese ti Judée kue nga na azo ti Jérusalem kue ayeke ga na mbage ti lo, na lo batize* ala na yâ ti Ngu ti Jourdain. Ala yeke fa asiokpari ti ala na gigi.+ 6 Jean ayü bongo so a sara ni na kuä ti terê ti chameau, na lo kanga na yâ ti lo mbeni ceinture so a leke ni na poro ti nyama.+ Kobe ti tengo ti lo ayeke agbadora nga na mafuta ti otoro ti ngonda.+ 7 Lo yeke fa tënë, lo tene: “Mbeni zo ayeke ga na peko ti mbi, lo yeke ngangu ahon mbi. Mbi kpa pëpe ti kuku ti zi akamba ti poro ti lo.+ 8 Mbi batize ala na ngu, me ti lo, lo yeke batize ande ala na yingo vulu.”+

9 Na ngoi ni kâ, Jésus alondo na Nazareth ti Galilée lo ga, na Jean abatize lo na yâ ti Ngu ti Jourdain.+ 10 Gï so lo londo na yâ ti ngu ni lo sigi, lo bâ yayu so ayeke zi, na yingo vulu so ayeke descend na ndö ti lo tongana mbeni kolokoto.+ 11 Mbeni go asara tënë na yayu, atene: “Mo yeke Molenge ti mbi, so mbi ndoye mo mingi; bê ti mbi anzere na mo mingi.”+

12 Hio na pekoni, yingo apusu lo ti gue na yâ ti benyama. 13 Tongaso lo ngbâ na benyama lango 40. Satan atara lo,+ na lo yeke na popo ti anyama ti ngonda. Me a-ange ayeke sara kua na lo.+

14 Na peko ti so a gbu Jean a bi lo na kanga, Jésus ague na Galilée,+ lo yeke fa nzoni tënë ti Nzapa,+ 15 lo tene: “Ngoi so a diko ni alingbi awe, na Royaume ti Nzapa aga nduru awe. Ala changé bê ti ala,+ na ala mä na bê na nzoni tënë.”

16 Tongana lo yeke tambela na terê ti Kota ngu ti Galilée, lo bâ Simon na ita ti lo André+ so ayeke bi agbanda ti ala na ngu,+ ngbanga ti so ala yeke azo ti gingo susu.+ 17 Tongaso, Jésus atene na ala: “Ala mû peko ti mbi, na mbi yeke sara si ala ga azo ti gingo azo.”+ 18 Hio, ala zia agbanda ni, na ala mû peko ti lo.+ 19 Tongana lo hon ayo kete, lo bâ Jacques, molenge ti Zébédée, na ita ti lo Jean na ngoi so ala yeke na yâ ti ngö ti ala na ala ngbâ ti leke agbanda ti ala.+ 20 Hio, lo iri ala. Tongaso, ala zia babâ ti ala Zébédée na yâ ti ngö ni, lo na azo ti kua ti lo, na ala mû peko ti Jésus. 21 Ala kue ague na Capernaüm.

Gï so lango ti sabbat ato nda ni awe, Jésus alï na yâ ti synagogue na lo komanse ti fa ye na azo.+ 22 Bê ti ala adö ngbanga ti kode ti fango ye ti lo, ndali ti so lo yeke fa ye na ala tongana zo so awara komandema ni, me tongana ascribe pëpe.+ 23 Tâ gï na ngoi ni so, mbeni koli so sioni yingo ayeke na yâ ti lo ayeke na yâ ti synagogue ti ala ni, na lo dekongo: 24 “Ti mo na e nyen? Jésus, zo ti Nazareth.+ Mo ga ti futi e? Mbi hinga mo nzoni mingi. Mo yeke Lo so ayeke nzoni-kue so alondo na Nzapa.”+ 25 Me Jésus asuku na lo, lo tene: “Kanga yanga ti mo, sigi na yâ ti lo!” 26 Sioni yingo ni ayengi koli ni ngangu, lo dekongo na kota go, na pekoni lo sigi na yâ ti koli ni. 27 Tongaso, bê ti azo kue adö mingi na ala to nda ti sara tënë na popo ti ala, ala tene: “So nyen la? Mbeni fini fango ye! Lo yeke na ngangu ti mû yanga même na asioni yingo, na ala mä yanga ti lo.” 28 Gï hio tongaso, sango ti Jésus amû ndo na yâ ti sese ti Galilée kue.

29 So ala sigi na yâ ti synagogue ni, ala gue na da ti Simon na André. Jacques na Jean kue ague legeoko na ala.+ 30 Andâ fièvre asara mama ti wali ti Simon+ na lo yeke lango na gbogbo, na ala sara tënë ni hio na Jésus. 31 Jésus ague na terê ti lo, lo gbu maboko ti lo, lo yô lo na nduzu. Fièvre ni ahon na terê ti lo, na mama ni ato nda ti sara kua na ala.

32 Tongana lakui alingbi, na lâ alinda awe, azo akomanse ti ga na lo azo kue so terê ti ala ason nga ala so asioni yingo ayeke na yâ ti ala.+ 33 Azo ti gbata ni kue abungbi terê ti ala tâ gï na yanga-da ni. 34 Tongaso, lo sava azo mingi so ayeke na mara ti akobela nde nde.+ Lo tomba asioni yingo mingi, me lo zia lege na asioni yingo ni ti sara tënë pëpe, ndali ti so ala hinga so lo yeke Christ.*

35 Na yanga ti ndapre, so ndo angbâ ti vuko, lo londo lo sigi, lo gue na mbeni ndo so azo ayeke dä pëpe, na kâ, lo to nda ti sambela.+ 36 Me Simon na ala so ayeke na terê ti lo ague ti gi lo, 37 na tongana ala wara lo, ala tene na lo: “Azo kue ayeke gi mo.” 38 Me lo tene na ala: “Zia e gue na mbeni ndo nde. E gue na akete gbata so ayeke nduru ge, tongaso si mbi lingbi nga ti fa tënë kâ, ndali ti so a yeke ye so mbi ga ngbanga ni la.”+ 39 Lo gue, lo fa tënë na yâ ti asynagogue ti ala na sese ti Galilée kue, nga lo tomba asioni yingo.+

40 Mbeni zo ti buruma nga aga na terê ti lo si lo voro yanga na Jésus, même lo kuku na gbe ti lo, lo tene: “Tâ tongana mo ye, mo lingbi ti sara si terê ti mbi aga nzoni.”+ 41 Tongana Jésus abâ ye so, mawa agbu lo, lo yôro maboko ti lo, lo ndu zo ti buruma ni, na lo tene: “Mbi ye! Zia terê ti mo aga nzoni.”+ 42 Hio, buruma ti lo ni ahon na lo ga nzoni. 43 Na pekoni, Jésus agboto mê ti koli ni ngangu, lo hunda na lo ti hon hio 44 na lo tene na lo: “Hange si mo sara tënë ni na zo oko pëpe. Me mo gue, mo fa terê ti mo na prêtre, na mo mû matabisi so Moïse afa ni ndali ti terê ti mo so aga nzoni so,+ si ala bâ ni na lê ti ala.”+ 45 Me na peko ti so koli ni ahon awe, lo to nda ti sara tënë ni mingi na azo na ti sara si tënë ni amû ndo kue. Ye so asara si Jésus alingbi mbeni pëpe ti lï na yâ ti mbeni gbata na lê ti azo. Me lo ngbâ na gigi na ando so azo ayeke dä pëpe. Atâa so kue, azo angbâ ti londo na ando kue ti ga na mbage ti lo.+

2 Ambeni lango na pekoni, Jésus akiri ague na Capernaüm, na azo mingi amä so lo yeke na yanga-da.+ 2 Tongaso, azo abungbi gbani si ndo ti duti ayeke dä mbeni pëpe, même juska na yanga ti da ni, na lo to nda ti fa tënë na ala.+ 3 Azo aga na lo mbeni koli so mbage ti terê ti lo akui na so azo osio si ayô lo.+ 4 Me ala wara lege pëpe ti gue na koli ni tâ na terê ti Jésus ngbanga ti gbâ ti azo ni, tongaso ala kôro dû na li ti da ni tâ gï na ndo so Jésus ayeke dä. Na pekoni, ala descend na zo ti kobela ni na yâ ti da ni legeoko na kete gbogbo so lo yeke na ndö ni. 5 Tongana Jésus abâ mabe ti ala,+ lo tene na koli so mbage ti terê ti lo akui so: “Molenge ti mbi, a pardonné asiokpari ti mo awe.”+ 6 Me ambeni scribe ayeke dä, ala yeke duti na ala yeke tene atënë so na bê ti ala:+ 7 “Ngbanga ti nyen koli so ayeke sara tënë tongaso? Lo yeke zonga Nzapa la. Zo wa la alingbi ti pardonné asiokpari zo wa? Gï Nzapa oko awe.”+ 8 Me hio, na yâ ti li ti lo, Jésus ahinga tënë so ala yeke tene na yâ ti bê ti ala. Tongaso, lo tene na ala: “Ngbanga ti nyen ala yeke tene atënë tongaso na yâ ti bê ti ala?+ 9 Ti tene na koli so mbage ti terê ti lo akui so: ‘A pardonné asiokpari ti mo awe,’ wala ti tene: ‘Londo, mû kete gbogbo ti mo, mo tambela,’ so wa si ayeke ngangu ape? 10 Me ti tene ala hinga so a mû komandema na Molenge ti zo+ na ndö ti sese ti pardonné asiokpari, . . .”+ lo tene na zo so mbage ti terê ti lo akui so: 11 “Mbi tene na mo: ‘Londo, mo mû kete gbogbo ti mo, mo gue na da ti mo.’” 12 Na ndö ti tënë so, koli ni alondo, na hio lo mû kete gbogbo ti lo na lo tambela na lê ti azo kue. Li ti ala kue akpe na ala mû gloire na Nzapa, ala tene: “Ade e bâ mara ti ye tongaso lâ oko pëpe.”+

13 Jésus akiri ague na yanga ti kota ngu ni, na gbâ ti azo ni kue angbâ gï ti mû peko ti lo, na lo to nda ti fa ye na ala. 14 Me tongana lo yeke hon, lê ti lo atï na ndö ti Lévi, molenge ti Alphée, so ayeke duti na da ti rongo nginza ti impôt. Lo tene na lo: “Mû peko ti mbi.” Na mango tënë so, lo londo, lo mû peko ti lo.+ 15 Na pekoni, lo yeke te kobe na da ti Lévi. Gbâ ti azo ti rongo nginza ti impôt nga na awasiokpari ayeke te kobe na Jésus na adisciple ti lo, ndali ti so ala gbani gbani la ayeke mû peko ti lo.+ 16 Me tongana ascribe so ayeke aFarizien abâ so lo yeke te kobe na awasiokpari nga na azo ti rongo nginza ti impôt, ala to nda ti sara tënë na adisciple ti lo, ala tene: “Lo yeke te kobe legeoko na azo ti rongo nginza ti impôt nga na awasiokpari biani?” 17 Tongana Jésus amä tënë so, lo tene na ala: “Azo so angbâ ngangu ayeke na bezoin ti wanganga pëpe, me gï azo ti kobela. Mbi ga ti iri azo ti mbilimbili pëpe, me awasiokpari.”+

18 Adisciple ti Jean nga na aFarizien ayeke mû ka jeûne lakue. Tongaso ala ga si ala hunda lo: “Ngbanga ti nyen la si adisciple ti Jean na ti aFarizien ayeke mû jeûne, me adisciple ti mo ayeke mû jeûne ape so?”+ 19 Jésus atene na ala: “Tongana koli so amû wali fini fini+ angbâ na terê ti akamarade ti lo, ala yeke na raison oko pëpe ti mû jeûne. Ala lingbi pëpe ti mû jeûne na ngoi kue so lo ngbâ na terê ti ala. 20 Me ambeni lango ayeke ga ande so a yeke zi lo na terê ti ala,+ na a yeke na ngoi ni so la si ala yeke mû jeûne. 21 Zo ayeke mû fini yanga ti bongo ti fü na lê ti kä ti ngbene bongo pëpe. Tongana lo sara ni, fini yanga ti bongo ni ayeke gboto yâ ti ngbene ni, na lê ti kä ni ayeke kiri ti kono.+ 22 Nga, zo ayeke tuku fini vin na yâ ti angbene bozo ti vin pëpe. Me tongana lo tuku ni dä, vin ni ayeke sara si yâ ti bozo ni ayeke sungba, na vin ni ayeke yuru kirikiri na bozo ni ayeke buba. Ye oko, a yeke tuku fini vin na yâ ti afini bozo ti vin.”

23 Mbeni lâ, na ngoi so Jésus ayeke hon na yâ ti ayaka ti blé na lâ ti Sabbat, na hongo ni, adisciple ti lo ato nda ti ko alê ti blé ni.+ 24 Me aFarizien atene na lo: “Bâ ye! Ngbanga ti nyen adisciple ti mo ayeke sara ye so ndia amû lege na zo pëpe ti sara ni na lâ ti Sabbat?” 25 Lo tene na ala: “Ala diko lâ oko pëpe tënë ti ye so David asara lani? na ngoi so lo yeke na ye ti tengo ni pëpe na nzara asara lo na azo ti lo.+ 26 Na yâ ti mbaï so asara tënë ti prêtre-mokonzi Abiathar,+ a tene so David alï na yâ ti da ti Nzapa na lo te amapa ti ziango ni na gbele Nzapa,* na lo mû mbeni nga na azo so ayeke na terê ti lo. Amapa so ndia amû lege na mbeni zo nde pëpe ti te ni, me a mû gï lege na aprêtre+ ti te.” 27 Tongaso, lo tene na ala: “Lâ ti Sabbat abâ gigi ngbanga ti zo,+ me a yeke zo si abâ gigi ngbanga ti lâ ti Sabbat pëpe. 28 Ndani la si Molenge ti zo ayeke Seigneur même ti Sabbat.”+

3 Lo kiri lo lï na yâ ti mbeni synagogue, na mbeni koli so maboko ti lo oko abuba* ayeke kâ.+ 2 Lê ti ala ayeke gï na terê ti lo ti bâ wala lo yeke sava koli ni so na lâ ti Sabbat, tongaso si ala wara mbeni tënë ti bi na li ti lo. 3 Lo tene na koli so maboko ti lo abuba* so: “Londo mo ga mo luti na milieu ge.” 4 Na pekoni, lo tene na ala: “Na lâ ti Sabbat, ndia amû lege na zo ti sara ye ti nzoni wala ti sara ye ti sioni na zo? ti sö fini* ti zo wala ti fâ zo?”+ Me ala zi yanga oko pëpe. 5 Lo yô lê ti lo, lo bâ ala oko oko kue, bê ti lo ason mingi. Vundu asara lo mingi ndali ti so bê ti ala akpengba.+ Na pekoni, lo tene na koli ni: “Yôro yâ ti maboko ti mo.” Koli ni ayôro ni, na maboko ti lo ni akiri aga nzoni. 6 Na ndö ti ye so, aFarizien asigi, na hio ala gue ala bungbi na azo ti Hérode+ ti mä terê na ndö ti Jésus ti tene ala fâ lo.

7 Me Jésus na adisciple ti lo ague ti ala na kota ngu. Azo mingi mingi alondo na Galilée nga na Judée amû peko ti lo.+ 8 Azo mingi mingi, so amä tënë ti aye mingi so lo yeke sara, alondo même na Jérusalem, na Idumée nga na mbage ti Ngu ti Jourdain nga na akodro so ayeke na terê ti Tyr na Sidon, na ala ga na mbage ti lo. 9 Lo tene na adisciple ti lo ti zia mbeni kete ngö nduru nduru ndali ti lo tongaso si gbâ ti azo ni apete lo pëpe. 10 So lo sava azo mingi, a sara si azo kue so ayeke na angangu kobela ayeke bungbi gbani gbani na terê ti lo ti ndu lo.+ 11 Même asioni yingo,+ na ngoi kue so ala bâ lo, ala yeke tï na gbe ti lo na ala yeke dekongo, ala tene: “Mo yeke Molenge ti Nzapa.”+ 12 Me fani mingi, lo gboto mê ti ala ngangu ti tene ala fa lo na azo pëpe.+

13 Lo gue na ndö ti mbeni hoto na lo iri ala so bê ti lo aye,+ na ala gue na peko ti lo.+ 14 Lo soro mbeni groupe ti akoli 12 so lo di iri ti ala nga abazengele, ala so ayeke ngbâ lakue na terê ti lo, na so lo yeke tokua ala ti fa tënë 15 nga ti wara ngangu ti tomba asioni yingo.+

16 Ala 12+ so lo soro ala ayeke: Simon, so lo mû na lo nga iri ti Pierre;+ 17 Jacques na ita ti lo Jean so ayeke amolenge ti Zébédée (lo mû nga na ala iri ti Boanergès, so ndani aye ti tene, “aMolenge ti bekpa”);+ 18 André, Philippe, Barthélemy, Matthieu, Thomas, Jacques molenge ti Alphée, Thaddée na Simon so a iri lo Cananéen,* 19 nga Judas Iscariote, so na pekoni lo kä Jésus.

Na pekoni, lo lï na yâ ti mbeni da. 20 Gbâ ti azo akiri abungbi na da ni, ye so asara si ala wara même lege ti te kobe pëpe. 21 Me na ngoi so afami ti lo amä tënë ni, ala gue ti gbu lo, ngbanga ti so ala yeke tene ti ala: “Ye asara li ti lo awe.”+ 22 Nga, ascribe so alondo na Jérusalem si aga ayeke tene: “Béelzébub* ayeke na yâ ti lo, na lo yeke tomba asioni yingo na ngangu ti mokonzi ti asioni yingo.”+ 23 Tongaso, na peko ti so lo iri ala na terê ti lo, lo sara tënë na ala na lege ti atapande, lo tene: “Satan alingbi ti tomba Satan tongana nyen? 24 Tongana yâ ti mbeni royaume akangbi, royaume ni so alingbi ti ngbâ na nduzu pëpe;+ 25 na tongana yâ ti mbeni da akangbi, da ni so alingbi ande ti ngbâ na nduzu pëpe. 26 Legeoko nga, tongana Satan alondo ti tiri na lo wani si yâ ti lo akangbi, lo lingbi ti ngbâ na nduzu pëpe, me lo yeke gue ti tï biani. 27 Mbeni zo alingbi pëpe ti lï na da ti mbeni wangangu na ti gbu akungba ti lo tongana lo kanga wangangu ni kozoni pëpe. A yeke gï tongana lo kanga wangangu ni awe si lo lingbi ti gbu akungba ti da ti lo. 28 Ti tâ tënë ni, mbi tene na ala: Aye kue so amolenge ti azo ayeke sara, a yeke pardonné ni ande na ala, atâa asiokpari wa la si ala sara wala asioni zonga wa la si ala zonga. 29 Me, zo so azonga yingo vulu, a yeke pardonné lo lâ oko pëpe,+ me siokpari ni ayeke ngbâ lakue lakue na li ti lo.”+ 30 Jésus atene tongaso ngbanga ti so ala tene: “Lo yeke na mbeni sioni yingo na yâ ti lo.”+

31 Fadeso, mama ti lo na aita ti lo+ aga. Tongana ala luti na gigi, ala tokua mbeni zo ti iri lo.+ 32 Gbâ ti azo aduti na terê ti lo, na ala tene na lo: “Bâ, mama ti mo na aita ti mo ayeke na gigi, ala yeke hunda ti bâ mo.”+ 33 Me lo kiri tënë na ala, lo tene: “Azo wa la ayeke mama ti mbi na aita ti mbi ni?” 34 Na pekoni, lo yô lê ti lo, lo bâ azo so aduti si angoro lo so, lo tene: “Bâ, mama ti mbi na aita ti mbi ni la!+ 35 Zo so asara ye so bê ti Nzapa aye, zo so la ayeke ita ti mbi ti koli, ita ti mbi ti wali nga mama ti mbi.”+

4 Lo kiri lo to nda ti fa ye na terê ti kota ngu ni. Azo mingi mingi abungbi na terê ti lo. Tongaso, lo monté na yâ ti ngö, lo duti na yâ ni ayo kete na yanga ti ngu ni. Me azo ni kue angbâ ti ala na sese na yanga ti kota ngu ni.+ 2 Lo to nda ti fa aye mingi na ala na lege ti atoli.+ Na ngoi so lo yeke fa ye, lo tene na ala:+ 3 “Ala mä tënë so si. Bâ, mbeni zo ti lungo ye ague ti lu ye.+ 4 Na ngoi so lo yeke lu ye ni, ambeni ngongoa ni atï na terê ti lege na andeke aga adë ni kue. 5 Ambeni atï na ndo so ayeke tênë, so sese ayeke dä mingi pëpe, na a sigi hio ngbanga ti so sese ni alï mingi pëpe.+ 6 Me tongana lâ asu, a gbi akobe ni so asigi na ala hule ngbanga ti so gunda ni ayeke dä pëpe. 7 Ambeni atï na popo ti akî, na akî ni akono na apete ndö ni si a lë pëpe.+ 8 Me ambeni atï na ndö ti pendere sese, ala sigi na ala yeke kono, na ala to nda ti lë. Ala lë 30, 60 nga 100.”+ 9 Lo zia tënë so na ndö ni: “Zia zo so ayeke na mê ti mä amä.”+

10 Tongana lo yeke duti gï lo oko, ala so ayeke na terê ti lo nga na adisciple 12 ato nda ti hunda lo na ndö ti atoli so.+ 11 Lo tene na ala: “A mû lege na ala ti mä yâ ti tënë ti Royaume ti Nzapa so Nzapa ahonde ndani.+ Me ti tanga ti azo ni, ala yeke mä gï atoli ni awe,+ 12 tongaso si, atâa so ala yeke bâ ndo, ala lingbi ti bâ ye pëpe. Atâa so ala yeke mä ndo, ala lingbi ti mä yâ ti ye pëpe, na ala changé lege ti ala pëpe si mbi pardonné ala.”+ 13 Lo kiri lo tene na ala: “Ala mä yâ ti toli so ape? Ka ala yeke mä ande yâ ti ambeni toli ni so kue tongana nyen?

14 “Zo ti lungo ye alu tënë ni.+ 15 Ambeni zo ayeke tongana alê ni so ayeke na terê ti lege, ndo so a lu tënë ni dä. Gï hio na peko ti so ala mä tënë ni, Satan aga+ azi tënë ni so a lu na bê ti ala.+ 16 Legeoko nga, ambeni zo ni ayeke tongana alê ni so a lu na ando so ayeke tênë. Gï hio na peko ti so ala mä tënë ni, ala yeda na ni na ngia.+ 17 Me gunda ti ala ayeke dä pëpe, na ala maï teti mbeni ngoi. Gï so aye ti vundu asi wala a sara ye ti ngangu na ala ndali ti tënë ni, ala pika gere ti ala. 18 Ambeni zo nga ayeke tongana alê ni so a lu ni na popo ti akî. A yeke azo so amä tënë ni,+ 19 me agingo bê+ ndali ti aye ti ngoi so,* ngangu so mosoro ayeke na ni ti handa zo+ nga nzara+ ti tanga ti aye alï na bê ti ala na apete ndö ti tënë ni, na a wara lege ti lë lengo pëpe. 20 Na nda ni, alê ni so a lu na ndö ti pendere sese ayeke ala so amä tënë ni, ala yeda na ni nzoni na ala lë, ambeni 30, ambeni 60 nga ambeni 100.”+

21 Nga, lo tene na ala: “Zo ayeke ga na lampe ti zia na gbe ti sakpa* wala na gbe ti gbogbo pëpe. Me lo yeke ga na ni ti zia na ndö ti ye ti yongo lampe, ni la ape?+ 22 Mbeni ye so a honde ni na so ayeke ngbâ gï na hondengo ni ayeke dä pëpe. Ye kue so a honde ndö ni ngangu na so azo ayeke hinga tënë ni lâ oko pëpe ayeke dä pëpe.+ 23 Zo so ayeke na mê ti mä, zia lo mä.”+

24 Lo kiri lo tene na ala: “Ala sara hange na ye so ala yeke mä.+ A yeke ye so ala yeke mû ti haka na ye na azo si a yeke mû ti haka na ye na ala. Biani, a yeke zia ande mbeni na ndö ni na ala. 25 Zo so ayeke na ye, a yeke mû ande na lo mbeni na ndö ni.+ Me zo so ayeke na ye pëpe, même ye so lo yeke na ni, a yeke zi ni na tïtî lo.”+

26 Lo kiri lo tene: “Legeoko nga, Royaume ti Nzapa ayeke tongana mbeni koli so abi angongoa ti kobe na sese. 27 Lo lango na bï na lo zingo na ndapre, ngongoa ti kobe ni asigi na akono, me lege so ye ni asi na ni, lo hinga pëpe. 28 Sese ni wani asara si kobe ni asigi yeke yeke. Kozoni, keke ni asigi, na pekoni li ni asigi, nga na nda ni tâ lê ti kobe ni asigi na ndö ti keke ni. 29 Me gï so alê ni akpengba awe, lo to nda ti fâ ni na zembe ngbanga ti so ngoi ti kongo ni alingbi awe.”

30 Lo tene: “E lingbi ti haka Royaume ti Nzapa na nyen? Wala e lingbi ti mû toli wa ti fa na ni? 31 A yeke tongana lê ti keke ti moutarde. Na ngoi so a lu ni na sese, a yeke kete mingi ahon tanga ti angongoa ti kobe kue na ndö ti sese.+ 32 Me na peko ti so a lu ni awe, a sigi na a kono ahon tanga ti akobe kue ti yaka, na amaboko ni akono mingi. Tongaso andeke ti nduzu awara ndo ti duti ti ala na gbe ti dê ni.”

33 Jésus atene tënë ni na ala na lege ti mara ti gbâ ti atoli+ tongaso. Lo tene na ala gï ye so ala lingbi ti mä yâ ni. 34 Biani, atënë kue so lo fa, lo mû gï toli si lo fa na ni na ala, me tongana gï lo na adisciple ti lo, lo yeke fa nda ti aye ni kue na ala.+

35 Na lango ni so, tongana lakui alingbi awe, lo tene na ala: “Zia e fâ ngu ni e gue na mbage ni kâ.”+ 36 Tongana ala tene na gbâ ti azo ni ti gue awe, ala mû lo na yâ ti ngö ni gï tongaso, na ambeni ngö nga ahon legeoko na lo.+ 37 Mo ye ti bâ, mbeni kota pupu aya ngangu na amapo ti ngu ni ayeke tuku na yâ ti ngö ni, na tongaso ngu aga nduru ti si yâ ti ngö ni.+ 38 Me lo yeke lango na mbage ti ngbonda ti ngö ni, lo zia li ti lo na ndö ti mbeni kohli.* Tongaso ala zingo lo na ala tene na lo: “Maître, so e yeke kui so, a sara ye na mo ape?” 39 Na ndö ti tënë so, lo londo, lo suku na pupu ni na lo tene na kota ngu ni: “Kaï! Duti kpô!”+ Pupu ni akaï na ndo adë ngii. 40 Tongaso lo tene na ala: “Ngbanga ti nyen mbeto* ahon ndö ti ala? Ala de ti duti na mabe ape?” 41 Me tâ mbeni kota mbeto agbu ala, na ala tene na popo ti ala: “So zo wa la tongaso, so même pupu na kota ngu kue amä yanga ti lo so?”+

5 Ala si na mbage ti kota ngu ni, na sese ti azo ti Gérasa.+ 2 Gï so Jésus alondo na yâ ti ngö ni lo descend, mbeni koli so sioni yingo ayeke na yâ ti lo alondo na yâ ti cimetière aga atingbi na lo. 3 Lo yeke lango gï na yâ ti cimetière ni. Juska na ngoi ni so, zo oko awara lege pëpe ti gbu lo ti kanga lo nzoni, même na chaîne. 4 Fani mingi a kanga maboko ti lo nga na gere ti lo na chaîne, me lo yeke fâ gï yâ ni fango. Mbeni zo so ayeke na ngangu ti gbu lo si lo duti kpô ayeke dä pëpe. 5 Bï na lâ, lo yeke dekongo lakue na yâ ti cimetière nga na li ti ahoto, na lo yeke suru terê ti lo na atênë. 6 Me gï so lê ti lo atï na ndö ti Jésus so angbâ ayo, lo kpe loro, lo ga lo kuku na gbe ti Jésus.+ 7 Na pekoni, lo dekongo na kota go, lo tene: “Jésus, Molenge ti Nzapa so ayeke na nduzu na ndö ti aye kue, ti mo na mbi nyen? Mbi hunda na mo ti deba yanga ti mo na iri ti Nzapa ti sara pasi na mbi pëpe.”+ 8 Lo sara tënë so ngbanga ti so Jésus ayeke tene fade na sioni yingo ni: “Mo sioni yingo, mo sigi na yâ ti koli so!”+ 9 Me Jésus ahunda lo: “Iri ti mo ayeke nyen?” Lo kiri tënë na Jésus: “Iri ti mbi ayeke Légion, ngbanga ti so e yeke gbani gbani.” 10 Lo ngbâ gï ti voro yanga na Jésus ti tomba asioni yingo ni na yâ ti kodro ni pëpe.+

11 Andâ gbâ ti acochon+ ayeke te ye kâ na terê ti hoto.+ 12 Tongaso, asioni yingo ni avoro terê na lo, ala tene: “Tokua e na yâ ti acochon so, si e lï na yâ ti ala.” 13 Lo zia lege na ala ti gue. Tongaso, asioni yingo so asigi, ala gue alï na yâ ti acochon ni, na acochon ni, so wungo ti ala ayeke 2 000 tongaso, alondo na loro na li ti hoto ni atï na yâ ti kota ngu ni, na ala nyon ngu ala kui. 14 Me azo ti batango acochon ni akpe ague asara tënë ni na yâ ti gbata ni nga na akete kodro ni. Azo aga ti bâ ye so asi.+ 15 Tongaso, ala ga na terê ti Jésus na ala bâ koli so asioni yingo ayeke fade na yâ ti lo, lo duti, lo yü bongo nga li ti lo aga nzoni awe; lo so lo yeke fade na légion na yâ ti lo so, na mbeto agbu azo ni. 16 Nga, azo so abâ fade ye ni afa na azo so aga peko ti ye so asi na koli so asioni yingo ayeke fade na yâ ti lo nga na acochon ni. 17 Tongaso, ala to nda ti voro yanga na Jésus ti zia sese ti ala ti hon.+

18 Tongana Jésus ayeke monté na yâ ti ngö, koli so fade asioni yingo ayeke na yâ ti lo so avoro yanga ti tene lo na Jésus ague.+ 19 Me Jésus ayeda pëpe, me lo tene na koli ni: “Kiri na ndo ti afami ti mo, na mo fa na ala peko ti aye kue so Jéhovah* asara ndali ti mo nga nzoni bê so lo sara na mo.” 20 Koli so ahon, na lo to nda ti fa na yâ ti kodro ti Décapole* tënë na ndö ti aye kue so Jésus asara ndali ti lo, na li ti azo ni kue akpe.

21 Na peko ti so Jésus amû ngö si lo kiri lo fâ kota ngu ni na mbage ni ge, azo mingi mingi abungbi na terê ti lo. Lo yeke na yanga ti kota ngu ni.+ 22 Mbeni mokonzi ti synagogue so iri ti lo ayeke Jaïrus aga, na tongana lê ti lo atï na ndö ti Jésus, lo gue lo tï na gbe ti lo.+ 23 Lo voro yanga fani mingi na Jésus, lo tene: “Terê ti kete molenge ti mbi ti wali ason ngangu mingi. Pardon, ga mo zia maboko ti mo na ndö ti lo+ ti tene terê ti lo aga nzoni si lo ngbâ na fini.” 24 Na ndö ti tënë so, Jésus ague legeoko na lo. Nga, azo mingi mingi ayeke mû peko ti lo na ala yeke pete lo.

25 Mbeni wali ayeke dä so mênë ayeke ga na terê ti lo mingi,+ a sara ngu 12 awe.+ 26 Lo bâ pasi mingi na maboko ti gbâ ti awanganga, nga lo buba nginza ti lo kue; me terê ti lo ni aga nzoni pëpe, ahon so, kobela ni akiri aga ngangu mingi. 27 Tongana lo mä sango ti Jésus, lo lï na popo ti gbâ ti azo ni, lo ga na mbage ti peko ti Jésus na lo ndu bongo ti lo ti ndö ni,+ 28 ndali ti so wali ni ayeke tene: “Tongana mbi ndu gï abongo ti lo ti ndö ni, mbi yeke sava.”+ 29 Gï na lê ni lê ni, mênë so ayeke ga mingi na terê ti lo so akaï, na lo wani lo hinga so ngangu kobela so ayeke na terê ti lo akaï awe.

30 Hio, Jésus ahinga so mbeni ngangu+ asigi na yâ ti terê ti lo. Tongaso, lo bâ ndo na terê ti lo na popo ti gbâ ti azo ni na lo tene: “Zo wa la andu abongo ti mbi ti ndö ni so?”+ 31 Me adisciple ti lo atene na lo: “Mo bâ gbâ ti azo so ayeke pete mo mbage na mbage, na mo kiri mo hunda mo tene: ‘Zo wa la andu mbi?’” 32 Me lo yeke gi ndo na terê ti lo ti bâ zo so andu lo so. 33 Mbeto agbu wali ni na terê ti lo ayeke dö. Ngbanga ti so lo hinga ye so asi na lo, wali ni aga, lo tï na gbe ti Jésus si lo tene na lo tâ tënë kue. 34 Jésus atene na lo: “Molenge ti mbi ti wali, mabe ti mo asava mo awe. Mo gue na siriri,+ na zia mo wara sava na peko ti ngangu kobela ti mo so.”+

35 Tongana lo ngbâ ti sara tënë, ambeni koli ti da ti mokonzi ti synagogue ni aga na ala tene: “Molenge ti mo ti wali ni akui awe. Ndani nyen si mo ngbâ ti son li ti Maître?”+ 36 Me tongana tënë ti ala ni atï na mê ti Jésus, lo tene na mokonzi ti synagogue ni: “Sara mbeto pëpe.* Duti gï na mabe awe.”+ 37 Lo zia lege na azo ti mû peko ti lo pëpe, gï Pierre, Jacques na ita ti lo Jean.+

38 Tongana ala si na da ti mokonzi ti synagogue ni, lo bâ kota wuluwulu, azo so ayeke toto na ayeke dema terê mingi na kongo.+ 39 Na peko ti so lo lï na da ni awe, lo tene na azo ni: “Ngbanga ti nyen ala yeke toto nga ala yeke sara kota wuluwulu tongaso? Molenge ni akui pëpe, me lo yeke lango.”+ 40 Na ndö ti tënë so, ala komanse ti he lo na ti zere lo. Me tongana lo tomba azo ni kue na gigi awe, Jésus amû babâ na mama ti molenge ni nga na ala so ayeke na terê ti lo, na lo lï na ndo so molenge ni ayeke dä. 41 Lo gbu maboko ti molenge ni, lo tene na lo: “Talitha kumi,” so ndani aye ti tene “Maseka-wali, mbi tene na mo, londo!”+ 42 Hio, maseka-wali ni alondo na lo to nda ti tambela. (Lo yeke na ngu 12.) Gï na ndembe ni so, li ti ala akpe kue si terê ti ala anzere ngangu mingi. 43 Me lo mû yanga na ala fani mingi* ti sara tënë ni na zo oko pëpe,+ nga lo tene na ala ti mû mbeni ye ti tengo na molenge ni.

6 Lo londo kâ, lo kiri na kodro so lo kono dä,+ na adisciple ti lo amû peko ti lo. 2 Tongana lâ ti Sabbat alingbi awe, lo to nda ti fa ye na yâ ti synagogue. Mingi ti azo so ayeke mä lo, bê ti ala adö si ala tene: “Koli so awara ti lo aye so na ndo wa?+ A mû ndara tongaso na lo ngbanga ti nyen? Ngbanga ti nyen lo yeke na ngangu ti sara akusala ti ngangu tongaso?+ 3 So charpentier so la ape?+ Lo yeke Molenge ti Marie+ ape? Lo yeke ita ti Jacques,+ Joseph, Judas na Simon+ ape? Aita ti lo ti wali ayeke na popo ti e ge ape?” Tongaso, lo ga ye so asara si ala pika gere ti ala. 4 Me Jésus atene na ala: “A yeke ne ka prophète na kodro ti lo pëpe, na popo ti afami ti lo pëpe nga na yâ ti da ti lo wani pëpe, me gï na mbeni ndo nde.”+ 5 Tongaso, lo wara lege ti sara akusala ti ngangu kâ pëpe, me lo zia maboko ti lo gï na ndö ti ambeni zo ti kobela oko oko na lo sava ala. 6 Biani, lo gi li ti lo gbä na mabe so amanke ala. Lo tambela na yâ ti akete kodro ni oko oko kue, lo fa ye na azo.+

7 Lo iri adisciple 12, na lo to nda ti tokua ala use use+ nga lo mû na ala komandema na ndö ti asioni yingo.+ 8 Nga, lo mû yanga na ala ti mû mbeni ye oko pëpe ndali ti lege, me ti mû gï keke ti tambelango na ni. Lo tene nga na ala ti mû mapa pëpe, bozo ti kobe pëpe nga ti mû nginza* pëpe na yâ ti abozo so ala kanga na gbe ti yâ ti ala.+ 9 Lo mû yanga na ala ti yü poro na gere ti ala, me ti mû bongo use pëpe.* 10 Nga, lo tene na ala: “Na ndo kue so ala lï na yâ ti mbeni da, ala ngbâ kâ juska ala zia ndo ni ti hon.+ 11 Na ndo kue so a yeke yamba ala pëpe wala a yeke mä tënë ti ala pëpe, tongana ala yeke sigi kâ, ala pika sese ti gere ti ala ti fa na azo ni so ala sara ye na lege ni pëpe.”+ 12 Tongaso ala gue, ala fa tënë na azo ni ala tene so ala doit ti changé bê ti ala.+ 13 Ala tomba gbâ ti asioni yingo+ nga ala sara mafuta na terê ti azo ti kobela mingi na ala sava ala.

14 Ndali ti so iri ti Jésus amû ndo kue, a tï na mê ti Gbia Hérode. Azo ayeke tene: “A zingo Jean Baptiste na popo ti akuâ awe, ni la si lo yeke sara akusala ti ngangu so.”+ 15 Me ambeni atene: “So Élie la.” Ambeni nde ayeke tene: “So mbeni prophète tongana tanga ti aprophète ti ândö la.”+ 16 Me tongana Hérode amä tënë ni, lo tene: “Jean so mbi dë go ti lo lani so la a zingo lo na kuâ awe so.” 17 Hérode atene tongaso ngbanga ti so lo la lo tokua lani ti gbu Jean, lo kanga lo na lo bi lo na da ti kanga ndali ti Hérodiade so ayeke wali ti Philippe ita ti Hérode ni, ngbanga ti so Hérode asara mariage na Hérodiade.+ 18 Jean ayeke tene lani na Hérode: “Ndia amû lege na mo ti mû wali ti ita ti mo pëpe.”+ 19 Tongaso, Hérodiade ayeke bata lani Jean na bê na lo ye ti fâ lo, me lo wara lege ni pëpe 20 ngbanga ti so Hérode ayeke sara mbeto ti Jean. Hérode ahinga so Jean ayeke zo ti mbilimbili nga lo yeke nzoni-kue,+ ni la lo ngbâ ti bata lo nzoni. Na peko ti so Hérode amä Jean awe, lo hinga ye so lo lingbi ti sara pëpe, me lo ngbâ ti mä Jean lakue na ngia na bê ti lo.

21 Me lango so Hérodiade ayeke ku asi na ngoi so Hérode asara mbeni matanga na lango ti dungo lo,+ lo tisa akota zo ti yangbo ti lo, amokonzi ti aturugu na akota zo ti kodro ti Galilée.+ 22 Na molenge ti Hérodiade ti wali alï, lo dodo. Lo zia ngia na bê ti Hérode nga na azo so ayeke te kobe na lo. Gbia ni atene na maseka-wali ni: “Mo hunda na mbi ye so mo ye, mbi yeke mû ni na mo.” 23 Lo deba na maseka-wali ni, lo tene: “Ye kue so mo hunda na mbi, mbi yeke mû na mo, même juska ndambo ti royaume ti mbi.” 24 Maseka-wali ni ague atene na mama ti lo: “A yeke nzoni mbi hunda nyen?” Mama ni atene: “Hunda li ti Jean Baptiste.” 25 Hio lo lï na gbia ni kâ na lo hunda ye so lo ye, lo tene: “Mbi ye mo mû na mbi fafadeso li ti Jean Baptiste na yâ ti kpangbala sembe.”+ 26 Atâa so vundu agbu lo mingi, gbia ni aye ti ke tënë ti maseka-wali ni pëpe, ngbanga ti so lo deba yanga ti lo awe, nga ngbanga ti azo so lo tisa ala. 27 Tongaso, gbia ni atokua mbeni garde ti lo hio, lo mû yanga na lo ti ga na li ti Jean. Garde ni ague, lo dë go ti Jean na da ti kanga, 28 lo ga na li ti Jean na yâ ti mbeni kpangbala sembe. Lo mû ni na maseka-wali ni na maseka-wali ni ague na ni na mama ti lo. 29 Tongana adisciple ti Jean amä tënë ni, ala ga na ala mû kuâ ti lo, ala lu ni na yâ ti mbeni dû ti kuâ.

30 Abazengele abungbi na terê ti Jésus si ala fa na lo peko ti aye kue so ala sara nga so ala fa na azo.+ 31 Lo tene na ala: “Ala ga ala duti na mbeni ndo so zo ayeke dä pëpe na ala wu terê ti ala kete.”+ Lo tene tongaso ngbanga ti so azo mingi ayeke ga na ayeke gue, na ala wara même ngoi ti wu terê ti te kobe pëpe. 32 Tongaso, ala monté na yâ ti ngö ti gue na mbeni ndo so zo ayeke dä pëpe ti tene ala duti gï ala awe.+ 33 Me azo abâ ala na guengo ni nga azo mingi ahinga tënë ni. Tongaso, azo ni alondo na yâ ti agbata ni kue, ala kpe loro juska na ndo ni kâ, na azo ni asi kozo ti ala. 34 Tongana lo sigi na yâ ti ngö ni, lo bâ azo mingi mingi, na mawa ti ala asara lo+ ndali ti so ala yeke tongana ataba so ayeke na berger pëpe.+ Na lo to nda ti fa aye mingi na ala.+

35 Na ngoi so lâ aga nduru ti lï, adisciple ti lo aga na terê ti lo, ala tene: “Ndo ni ge ayeke yâ ti benyama na l’heure ahon mingi awe.+ 36 Mo tene na azo so ti gue, tongaso si ala gue na ando so ayeke na yanga ti yaka nga na yâ ti akete kodro ala vo ye ala te.”+ 37 Lo kiri tënë na ala: “Ala wani ala mû ye ti tengo ni na azo so.” Na ndö ti tënë so, ala tene na lo: “E doit ti gue ti vo mapa ti denier* 200 si e mû ni na azo so ti tene ala te?”+ 38 Lo tene na ala: “Ala yeke na mapa oke? Ala gue abâ si!” Na peko ti so ala gue abâ ni awe, ala tene: “Mapa ayeke oku na susu use na terê ni.”+ 39 Lo mû yanga na azo ni kue ti duti na groupe nde nde na ndö ti apere.+ 40 Tongaso, ala bungbi terê ti ala na groupe, ambeni 100, na ambeni 50. 41 Lo mû mapa oku na susu use so, lo yô lê ti lo na nduzu, lo iri tënë nzoni na ndö ni.+ Lo fâ yâ ti amapa ni, lo to nda ti mû ni na adisciple ni ti tene ala zia ni na gbele azo ni. Lo kangbi nga yâ ti asusu use so na azo ni kue. 42 Tongaso, azo ni kue ate, yâ ti ala asi. 43 Ala ro tanga ti anduru mapa ni asi sakpa 12. Ala ro nga tanga ti asusu ni.+ 44 Ala so ate mapa ni ayeke akoli 5 000.

45 Na pekoni, hio, lo mû yanga na adisciple ti lo ti monté na yâ ti ngö na ti hon kozo na lo na mbage ti ngu ni ti gue na mbage ti Bethsaïda, nga na oko ngoi ni, lo tene na gbâ ti azo ni ti gue.+ 46 Me na peko ti so lo tene na azo ni ti gue nzoni, lo gue na ndö ti mbeni hoto ti sambela.+ 47 Tongana ndo avuko awe, ngö ni ayeke na milieu ti kota ngu ni, me Jésus angbâ gï lo oko na sese.+ 48 Lo bâ so ala yeke na kpale ti gbï kâî ndali ti so pupu ayeke ga gï gango na mbage ti ala. Nduru na kota ndapre,* lo ga na mbage ti ala, lo yeke tambela na ndö ti kota ngu ni. Me lo ye ti hon ala hongo. 49 Tongana lê ti ala atï na ndö ti Jésus so ayeke tambela na ndö ti kota ngu ni, ala tene: “So ye ti ndima la!” Ala dekongo, 50 ngbanga ti so ala kue abâ lo, na li ti ala aga kirikiri. Me hio lo tene na ala: “Ala dë bê ti ala! Mbi la. Ala sara mbeto pëpe.”+ 51 Na pekoni, lo monté na yâ ti ngö ni na terê ti ala, na pupu ni akaï. Na bango ye so, bê ti ala adö ngangu 52 ndali ti so ala hinga nda ti ye ti kpene so lo sara fade ti mû na azo mapa so pëpe. Ade ala wara lege ti mä yâ ni pëpe na yâ ti bê ti ala.

53 Tongana ala fâ ngu ni awe, ala si na Gennésareth na ala kanga ngö ni na yanga ti ngu.+ 54 Me gï so ala sigi na yâ ti ngö ni, azo ahinga lo. 55 Azo ni amû loro ague na yâ ti ando ni kue na ala to nda ti mû azo ti kobela, ala yô ala na ndö ti agbogbo na ala ga na ala na ndo so ala mä a tene lo yeke dä. 56 Na ando kue so lo yeke lï dä, atâa na yâ ti akete kodro, agbata nga na ando so ayeke na yanga ti yaka, ala yeke zia azo ti kobela ni na gara, na ala voro yanga na lo ti tene ala ndu gï yanga ti bongo ti lo ti ndö ni.+ Azo kue so andu ni, terê ti ala aga nzoni.

7 A-Farizien na ambeni scribe so alondo na Jérusalem si aga abungbi na terê ti lo.+ 2 Ala bâ so ambeni disciple ti lo ayeke mû maboko ti ala so ayeke sioni, ala yeke te na kobe, so ti tene ala sukula maboko ti ala ni pëpe.* 3 (Ti aFarizien nga na aJuif kue, tongana ala ye ti te kobe, ala yeke sukula maboko ti ala juska na nduzu si. Ala sara tongaso ti bata ngobo ti azo ti giriri ngangu. 4 Tongana ala londo na gara ala kiri, kozo ti te kobe, ala yeke sukula ngu si. A fa nga na ala gbâ ti ambeni ngobo ni so ala yeke bata ni ngangu, na tapande, yorongo na yâ ti ngu akopo, ayongoro kopo nga na ata so a sara ni na cuivre.)+ 5 A-Farizien na ascribe so ahunda lo: “Ngbanga ti nyen adisciple ti mo akpe ngobo ti azo ti giriri pëpe, me ala yeke te kobe na maboko ti ala so ayeke sioni?”+ 6 Lo tene na ala: “Ala azo ti handango lê ti zo so, a yeke na lege ni la si Ésaïe atene prophétie na ndö ti ala, tongana ti so Mbeti ti Nzapa atene: ‘Azo so agonda mbi gï na yanga ti ala senge, me bê ti ala ague yongoro mingi na mbi.+ 7 A yeke senge senge si ala ngbâ ti voro mbi, ngbanga ti so aye so ala yeke fa ayeke gï acommandement so alondo na azo.’+ 8 Ala dö lege ti commandement ti Nzapa ala zia awe na ala yeke bata ngobo ti azo ngangu.”+

9 Lo kiri lo tene na ala: “Na mayele, ala ke commandement ti Nzapa tongaso si ala bata ngobo ti ala.+ 10 Na tapande, Moïse atene: ‘Mo ne babâ na mama ti mo’,+ nga, ‘Zo so azonga babâ wala mama ti lo, a lingbi a fâ lo.’+ 11 Me ti ala, ala tene: ‘Tongana mbeni zo atene na babâ wala mama ti lo: “Ye kue so mbi yeke na ni na so mo lingbi fade ti bâ nzoni dä aga corban awe (so ti tene, matabisi so a zia ni nde awe ti mû na Nzapa),”’ 12 ala zia lege pëpe na zo tongaso ti sara mbeni kete ye ndali ti babâ wala mama ti lo.+ 13 Na sarango tongaso, ala sara si tënë ti Nzapa ayeke na ngangu mbeni pëpe ndali ti ngobo so ala ngbâ ti fa ni ti gue na ni.+ Ala yeke sara nga ambeni mara ti aye tongaso mingi.”+ 14 Tongaso, lo kiri lo iri gbâ ti azo ni na terê ti lo, na lo tene na ala: “Ala kue, ala mä mbi na ala mä yâ ti tënë so:+ 15 Mbeni ye so alondo na gigi si ague na yâ ti zo na so alingbi ti sara si lo ga sioni ayeke dä pëpe. Me a yeke aye so alondo na yâ ti zo asigi la asara si lo ga sioni.”+ 16 * ——

17 Tongana lo zia gbâ ti azo ni si lo lï na yâ ti da, adisciple ti lo ato nda ti hunda lo na ndo ti tapande so.+ 18 Lo tene na ala: “Ala nga kue ala hinga ti mä yâ ti tënë pëpe tongana azo so? Ala hinga pëpe so mbeni ye so alondo na gigi si alï na yâ ti zo na so alingbi ti sara si lo ga sioni ayeke ti lo dä pëpe? 19 Ndali ti so ye ni so alï na yâ ti bê ti zo ni pëpe, me a yeke hon na yâ ti akamba ti yâ ti lo si a sigi a gue na dû ti kabinë.” Na lege ti tënë so, lo fa so akobe kue ayeke nzoni. 20 Lo kiri lo tene: “A yeke ye so alondo na yâ ti zo asigi la asara si lo ga sioni.+ 21 Biani, a yeke na yâ ti azo, na yâ ti bê ti azo,+ si asioni pensé alondo dä asigi: lango-sioni,* nzi, fango zo, 22 gingo wali wala koli nde, sarango bê ti ye, asioni kusala, handa, sarango sioni ye sân kamene,* lê so abâ ye na nzara ni, zonga, baba nga sarango ye ahon ndö ni. 23 Aye ti sioni so kue alondo na yâ ti bê ti zo na asara si lo ga sioni.”

24 Lo londo na ndo so, lo gue na sese ti Tyr na Sidon.+ Kâ, lo lï na yâ ti mbeni da na lo ye si zo ahinga tënë ni pëpe. Atâa so kue, a hinga tënë ni. 25 Hio, mbeni wali so sioni yingo ayeke na yâ ti kete molenge ti lo ti wali amä tënë ti lo na lo ga lo tï na gbe ti Jésus.+ 26 Wali ni ayeke zo ti Grèce, me lo londo na Phénicie so ayeke na kodro ti Syrie. Lo ngbâ ti hunda na Jésus ti tomba sioni yingo so ayeke na yâ ti molenge ti lo ti wali. 27 Me Jésus atene na wali ni: “Zia amolenge ate ye yâ ti ala asi awe si, ndali ti so a yeke na lege ni pëpe ti mû mapa ti amolenge ti bi ni na akete mbo.”+ 28 Me wali ni akiri tënë na Jésus, atene: “Tâ tënë, seigneur. Me, même akete mbo so ayeke na gbe ti table ayeke te afuku ti mapa ti akete molenge so.” 29 Na ndo ti tënë so, Jésus atene na wali ni: “Ndali ti tënë so mo tene so, mo gue, sioni yingo so asigi na yâ ti molenge ti mo ti wali ni awe.”+ 30 Tongaso, wali ni akiri na yanga-da ti lo, lo wara kete molenge ti lo ni so alango na ndö ti gbogbo na sioni yingo ni asigi na yâ ti lo awe.+

31 Tongana Jésus alondo na sese ti Tyr lo yeke kiri, lo fâ yâ ti Sidon ti gue na mbage ti Kota ngu ti Galilée na lo hon na yâ ti sese ti Décapole.*+ 32 Na ndo so, ala ga na lo mbeni koli so mê ti lo akanga nga so lo yeke na kpale ti sarango tënë.+ Ala voro yanga na Jésus ti zia maboko ti lo na ndö ti koli ni so. 33 Lo mû koli ni lo sigi na lo na popo ti gbâ ti azo ni lo gue na lo yongoro kete gï li ti ala use. Lo yôro ali ti maboko ti lo na yâ ti mê ti koli ni. Na peko ti so lo tuku ngu ti yanga, lo ndu langue ti koli ni.+ 34 Lo bâ ndo na nduzu, lo wu ngangu, lo tene: “Ephphatha,” so aye ti tene, “Zi.” 35 Mo ye ti bâ, mê ti koli ni azi+ nga a zi kpale ti lo ti sarango tënë ni, na lo to nda ti sara tënë nzoni. 36 Lo gboto mê ti ala ti sara tënë ti ye so na mbeni zo pëpe.+ Me lakue tongana lo yeke gboto mê ti ala ti sara tënë ni pëpe, ala kiri ato mbela na ni mingi.+ 37 Biani, bê ti ala kue adö ngangu mingi+ na ala tene: “Lo yeke sara aye kue nzoni. Même lo sara si azo so mê ti ala akanga amä ndo nga azo so yanga ti ala akanga asara tënë.”+

8 Na ngoi ni so, azo akiri abungbi gbani gbani na ala yeke na ye ti tengo ni pëpe. Tongaso, lo iri adisciple si lo tene na ala: 2 “Mawa ti gbâ ti azo so asara mbi,+ ngbanga ti so a sara laso lango ota awe si ala yeke na terê ti mbi na ala yeke na ye ti tengo ni pëpe.+ 3 Tongana mbi tene na ala ti gue na kodro na nzara na yâ ti ala, ala yeke woko ande na lege, nga ambeni alondo ayo.” 4 Me adisciple ti lo atene na lo: “Ge na yâ ti benyama tongaso, zo ayeke wara ande mapa na ndo wa ti lingbi gbâ ti azo so si ala te, yâ ti ala asi?” 5 Tongaso Jésus ahunda ala: “Ala yeke na mapa oke?” Ala tene: “Mbasambala.”+ 6 Lo mû yanga na gbâ ti azo so ti duti na sese. Lo mû mapa mbasambala ni, lo kiri singila na Nzapa, lo fâ yâ ni na lo mû ni na adisciple ti lo ti kangbi ni, na ala kangbi ni na gbâ ti azo so.+ 7 Ala yeke nga na ambeni kete susu so ayeke mingi pëpe. Tongana lo iri tënë nzoni na ndö ni awe, lo tene na ala ti kangbi ni nga. 8 Tongaso ala te ni na yâ ti ala asi. A ro tanga ti anduru ni so angbâ, na a si akota sakpa* mbasambala.+ 9 Akoli so ayeke dä ayeke 4 000 tongaso. Na pekoni, lo tene na ala ti gue.

10 Hio lo na adisciple ti lo amonté na yâ ti ngö na ala si na mbage ti sese ti Dalmanutha.+ 11 Ge, aFarizien aga, ala to nda ti dë gaba na lo. Ti tara lo, ala hunda lo ti sara mbeni fä so alondo na yayu.+ 12 Lo dema na lo wu ngangu, lo tene: “Ngbanga ti nyen azo ti ngoi so ahunda ti bâ mbeni fä?+ Ti tâ tënë ni, mbi tene na ala: A yeke fa mbeni fä oko pëpe na azo ti ngoi so.”+ 13 Na ndö ti tënë so, lo zia ala, lo kiri lo monté na yâ ti ngö na lo gue na mbage ti ngu ni kâ.

14 Ye oko, ala girisa ti mû mapa, na ala yeke na mbeni ye ti tengo ni na yâ ti ngö ni pëpe, gï mapa oko awe.+ 15 Jésus agboto mê ti ala na atënë so ayeke polele, lo tene: “Ala zi lê ti ala, ala sara hange na levure ti aFarizien nga na levure ti Hérode.”+ 16 Ala komanse ti papa na popo ti ala ngbanga ti so ala yeke na mapa pëpe. 17 Tongana lo bâ ye so, lo tene na ala: “Ndali ti nyen si ala papa na popo ti ala ngbanga ti so ala yeke na mapa ape? Ade ala bâ ye so mbi ye ti sara tënë ni so ape? Ade ala mä yâ ni ape? Ala ngbâ lakue ti ne nengo na mango yâ ti ye? 18 ‘Atâa so lê ti ala ayeke dä, ala bâ ndo ape? Atâa so mê ti ala ayeke dä, ala mä ndo ape?’ Ala girisa awe, 19 lani so mbi fâ yâ ti mapa oku+ ndali ti akoli 5 000 so, tanga ti anduru ni so ala ro asi sakpa oke?” Ala tene na lo: “Bale-oko na use.”+ 20 “Lani so mbi fâ yâ ti mapa mbasambala ndali ti akoli 4 000 so, tanga ti anduru ni so ala ro asi akota sakpa* oke?” Ala tene na lo: “Mbasambala.”+ 21 Na ndö ti tënë so, lo tene na ala: “Ade ala mä yâ ni ape?”

22 Ala si na Bethsaïda. Mo ye ti bâ, azo aga na lo mbeni koli so ayeke waziba, ala voro yanga na Jésus ti ndu lo.+ 23 Lo gbu maboko ti waziba so, lo gue na lo na gigi ti kete kodro ni. Lo tuku ngu ti yanga na ndö ti alê ti lo,+ lo zia maboko ti lo na ndö ti koli ni, na Jésus ahunda lo: “Mo bâ mbeni ye?” 24 Koli ni ayo lê ti lo, lo tene: “Mbi bâ azo, me mo bâ mo tene akeke la ayeke tambela.” 25 Lo kiri lo zia maboko ti lo na ndö ti alê ti koli ni, na koli ni abâ ndö nzoni. Lê ti lo akiri aga nzoni na lo lingbi ti bâ ye kue polele. 26 Tongaso, lo tene na koli ni ti kiri na da ti lo, me lo tene: “Mo lï na yâ ti kete kodro ni pëpe.”

27 Jésus na adisciple ti lo alondo na ndo so ti gue na akete kodro ti Césarée ti Philippe. Tongana ala yeke na lege, Jésus ato nda ti hunda adisciple ti lo, lo tene: “Azo ayeke tene ti ala so mbi yeke zo wa?”+ 28 Ala tene na lo: “Ambeni zo atene Jean Baptiste,+ me ambeni nde atene Élie,+ ambeni nga atene so mo yeke mbeni oko ti aprophète.” 29 Lo hunda ala: “Me ti ala, ala tene mbi yeke zo wa?” Pierre akiri tënë na lo: “Mo yeke Christ.”+ 30 Na ndö ti tënë so, lo gboto mê ti ala ngangu ti sara tënë ti lo na mbeni zo pëpe.+ 31 Nga, Jésus ato nda ti fa na ala so a lingbi Molenge ti zo abâ pasi mingi, nga so a-ancien, aprêtre-mokonzi nga na ascribe ayeke ke lo. A yeke fâ lo ande,+ me lango ota na pekoni, lo yeke zingo na kuâ.+ 32 Biani, lo sara tënë so dandara. Me Pierre agboto lo yongoro kete na lo to nda ti suku na lo.+ 33 Jésus atourné, lo bâ adisciple ti lo na lo suku na Pierre, lo tene: “Hon na peko ti mbi kâ, Satan, ngbanga ti so mo yeke na pensé ti Nzapa pëpe, me ti azo!”+

34 Na pekoni, Jésus airi gbâ ti azo ni nga na adisciple ti lo na terê ti lo, na lo tene na ala: “Tongana mbeni zo aye ti ga na peko ti mbi, zia lo ke terê ti lo wani, lo yô keke ti pasi* ti lo na lo ngbâ ti mû peko ti mbi,+ 35 ndali ti so zo so aye ti sö fini* ti lo, lo yeke girisa ni. Me zo so agirisa fini* ti lo ndali ti mbi nga ndali ti nzoni tënë, lo yeke sö ni.+ 36 Ti tâ tënë ni, tongana mbeni zo awara dunia so kue me lo girisa fini* ti lo, ye ti nzoni wa la lo yeke wara ande dä?+ 37 Biani, nyen la si zo ayeke mû na place ti fini* ti lo?+ 38 Ndali ti so zo so asara kamene ti mbi nga na ti tënë ti mbi na gbele azo ti ngoi so, so ayeke be-ta-zo na Nzapa pëpe* na so ayeke azo ti sarango siokpari, Molenge ti zo ayeke sara nga kamene ti lo+ na ngoi so lo yeke ga na yâ ti gloire ti Babâ ti lo legeoko na a-ange so ayeke nzoni-kue.”+

9 Jésus akiri atene na ala: “Ti tâ tënë ni, mbi tene na ala so na popo ti azo so aluti ge so, ambeni ayeke kui ande pëpe juska ala bâ Royaume ti Nzapa aga na ngangu ti lo awe si.”+ 2 Lango omene na pekoni, Jésus amû gï Pierre, Jacques na Jean, lo gue na ala na ndö ti mbeni hoto so ayo na nduzu mingi, so zo ayeke dä pëpe. Na terê ti lo agbian na lê ti ala,+ 3 abongo ti lo ti ndö ni akomanse ti za na avuru mingi. Mbeni zo ti sukulango bongo na ndö ti sese so alingbi pëpe ti sukula bongo si avuru tongaso. 4 Nga, Élie na Moïse asigi na lê ti ala, na ala yeke sara lisoro na Jésus. 5 Pierre angbâ atene na Jésus: “Rabbi, a yeke nzoni mingi so e yeke ge so. Tongaso, zia e leke atente ota, oko ti mo, oko ti Moïse na oko ti Élie.” 6 Biani, lo hinga ye so lo lingbi ti sara pëpe, ndali ti so mbeto ahon ndö ti ala mingi. 7 Mbeni mbinda aga amû ndö ti ala kue, na mbeni go+ asara tënë na yâ ti mbinda ni, atene: “So ayeke Molenge ti mbi, lo so mbi ndoye lo mingi.+ Ala mä lo.”+ 8 Mo ye ti bâ, ala bâ ndo na terê ti ala, na ala bâ so mbeni zo nde ayeke dä pëpe, gï Jésus awe.

9 Tongana ala londo na ndö ti hoto ni ala yeke descend, Jésus agboto mê ti ala ngangu ti sara tënë ti ye so ala bâ+ so na zo oko pëpe juska Molenge ti zo azingo na kuâ si.+ 10 Ala bata tënë so na yâ ti bê ti ala,* me ala hunda terê na popo ti ala na ndö ti nda ti tënë ti zingongo ti lo na kuâ so. 11 Ala komanse ti hunda lo, ala tene: “Ngbanga ti nyen si ascribe atene so a lingbi Élie+ aga kozoni si?”+ 12 Lo tene na ala: “Biani, a lingbi Élie aga kozoni na lo yeke kiri ti leke aye kue na place ni.+ Me ngbanga ti nyen Mbeti ti Nzapa atene so a lingbi Molenge ti zo abâ pasi mingi+ nga azo ayeke bâ lo tongana mbumbuse zo?+ 13 Me mbi tene na ala so Élie+ aga ti lo awe, na ala sara na lo aye kue so bê ti ala aye, gï tongana ti so a sû tënë ni na ndö ti lo na yâ ti Mbeti ti Nzapa.”+

14 Tongana ala ga na terê ti tanga ti adisciple ni, ala bâ azo mingi mingi so angoro ala na ascribe so ayeke dë gaba na adisciple ni.+ 15 Me gï so lê ti gbâ ti azo ni kue atï na ndö ti Jésus, bê ti ala apika, na ala kpe loro aga na mbage ti lo ti bara lo. 16 Jésus ahunda ala: “Nyen la ala yeke dë gaba na ndö ni na adisciple ti mbi so?” 17 Mbeni oko na popo ti gbâ ti azo ni atene na lo: “Maître, mbi ga na molenge ti mbi ti koli na mo ngbanga ti so lo yeke na mbeni yingo so asara si lo sara tënë pëpe.+ 18 Na ndo kue so yingo ni agbu lo, lo yeke bi molenge ni na sese, na mousse ayeke sigi na yanga ti lo, lo yeke te pembe ti lo nga ngangu ayeke hunzi na lo. Mbi tene na adisciple ti mo ti tomba sioni yingo so, me ala sara gbä.” 19 Jésus akiri tënë na ala, lo tene: “Ala, azo ti ngoi so,+ so ayeke na mabe pëpe, mbi yeke ngbâ na terê ti ala juska lawa? Mbi yeke kanga bê na ala juska lawa? Ala ga na lo na mbi.”+ 20 Tongaso, ala ga na molenge ni na lo. Me gï so sioni yingo so abâ Jésus, lo sara si molenge ni akomanse ti gboto. Na pekoni, molenge ni atï lo yeke roulé terê ti lo na sese na mousse ayeke sigi na yanga ti lo. 21 Jésus ahunda babâ ti molenge ni, lo tene: “Ye ni akomanse ti sara lo lawa?” Babâ ni atene: “Ye ni akomanse ti sara lo ngbene ye so lo ngbâ kete. 22 Fani mingi sioni yingo so ayeke bi lo na lê ti wâ nga na yâ ti ngu ti fâ lo. Me tongana mo lingbi ti sara mbeni ye, bâ mawa ti e na mû maboko na e.” 23 Jésus atene na lo: Ngbanga ti nyen mo tene: ‘Tongana mo lingbi?’ Biani, ti zo so ayeke na mabe, ye kue alingbi ti si.”+ 24 Hio, babâ ti molenge ni adekongo, lo tene: “Mbi yeke na mabe! Mû maboko na mbi na ndo so mabe amanke mbi dä!”+

25 Tongana Jésus abâ so gbâ ti azo ayeke kpe loro ti ga na terê ti ala, lo suku na sioni yingo ni, lo tene: “Mo yingo so mo sara si yanga ti molenge so nga na mê ti lo akanga so, mbi tene na mo: Sigi na yâ ti lo, na mo kiri na yâ ti lo encore ape.”+ 26 Na peko ti so sioni yingo so adekongo na lo sara si molenge ni agboto lege mingi, lo sigi. Mo bâ mo tene molenge ni akui awe, tongaso mingi ti azo ni ayeke tene: “Lo kui awe!” 27 Me Jésus agbu maboko ti molenge ni, lo yô lo na nduzu na molenge ni aluti. 28 Na peko ti so lo lï na yâ ti mbeni da, adisciple ti lo ahunda lo na ngoi so azo ayeke dä pëpe, ala tene: “Ngbanga ti nyen si e tomba sioni yingo so gbä?”+ 29 Lo tene na ala: “A lingbi ti tomba mara ti sioni yingo tongaso gï na lege ti sambela awe.”

30 Ala londo na ndo so ala fâ na yâ ti Galilée, me lo ye pëpe si mbeni zo ahinga tënë ni. 31 Lo yeke fa ye na adisciple ti lo, lo tene: “A yeke kä ande Molenge ti zo ti zia lo na maboko ti azo, na ala yeke fâ lo ande. Me atâa so ala yeke fâ lo,+ lango ota na pekoni, lo yeke zingo na kuâ.”+ 32 Ye oko, ala mä yâ ti tënë ti lo so pëpe, nga ala sara mbeto ti hunda lo na ndö ni.

33 Ala si na Capernaüm. Na tongana lo yeke na yâ ti da, lo hunda ala: “Tënë ti nyen la si ala yeke papa fade na ndö ni na lege so?”+ 34 Ala duti kpô, ndali ti so, fade na lege, ala yeke papa na popo ti ala ti bâ zo wa la ayeke kota ahon atanga ni. 35 Tongaso lo duti, lo iri adisciple 12 ni na lo tene na ala: “Zo so aye ti duti zo ti li ni, a lingbi lo duti ndangba ti ala kue na lo sara kua na ala kue.”+ 36 Na pekoni, lo mû mbeni kete molenge, lo zia lo, lo luti na popo ti ala, lo zia maboko ti lo na ndö ti go ti molenge ni na lo tene na ala: 37 “Zo so ayamba mbeni oko ti akete molenge+ tongaso ndali ti iri ti mbi, lo yamba mbi nga. Nga, zo so ayamba mbi, lo yamba gï mbi oko pëpe me lo yamba nga Lo so atokua mbi.”+

38 Jean atene na lo: “Maître, e bâ mbeni zo so ayeke tomba asioni yingo na iri ti mo, na e tara ti kanga lege na lo ngbanga ti so lo yeke mû peko ti e pëpe.”+ 39 Me Jésus atene: “Ala tara ti kanga lege na lo pëpe, ndali ti so mbeni zo so ayeke sara kusala ti ngangu na iri ti mbi na so hio na pekoni lo lingbi ti tene sioni tënë ti mbi ayeke dä pëpe. 40 Ndali ti so zo so ake e pëpe, lo yeke zo ti e.+ 41 Nga zo so amû na ala mbeni kopo ti ngu ti tene ala nyon ngbanga ti so ala yeke azo ti Christ,+ ti tâ tënë ni, mbi tene na ala, lo yeke girisa ande futa+ ti lo oko pëpe. 42 Me zo so asara si mbeni oko ti akete zo so ayeke na mabe apika gere ti lo, a yeke nzoni a zia kota tênë ti nekango na ye na go ti lo, mara ni so akororo ayeke gboto ni si a yeke tourné, na a bi lo na yâ ti ngu-ingo.+

43 “Tongana maboko ti mo asara si mo pika gere ti mo, fâ ni. A yeke nzoni mingi ndali ti mo ti tene mbeni mbage ti terê ti mo abuba, me mo wara fini, ahon ti tene a bi mo na amaboko ti mo use kue na yâ ti Géhenne,* na lê ti wâ so a lingbi ti mingo ni pëpe.+ 44 *—— 45 Tongana gere ti mo asara si mo pika gere, fâ ni. A yeke nzoni mingi ndali ti mo ti tene mbeni gere ti mo abuba, me mo wara fini, ahon ti tene a bi mo na agere ti mo use kue na yâ ti Géhenne.*+ 46 *—— 47 Nga, tongana lê ti mo asara si mo pika gere ti mo, bi ni yongoro.+ A yeke nzoni mingi ndali ti mo ti lï na yâ ti Royaume ti Nzapa na lê ti mo oko, ahon ti tene a bi mo na alê ti mo use kue na yâ ti Géhenne,*+ 48 ndo so angusu ni ayeke kui pëpe nga so a lingbi ti mingo wâ ni pëpe.+

49 “A lingbi a tuku wâ na terê ti zo oko oko kue, tongana ti so a yeke tuku ingo na terê ti mbeni ye.+ 50 Ingo ayeke nzoni; me tongana songo ti ingo asigi dä awe, nyen la a lingbi ti zia dä ti kiri na songo ni?+ Ala duti na ingo na yâ ti fini ti ala+ nga ala duti lakue na siriri na popo ti ala.”+

10 Lo londo kâ, lo si na akatikati ti sese* ti Judée, na mbage ti Ngu ti Jourdain. Gbâ ti azo akiri abungbi na terê ti lo, na tongana ti so lo yeke sara ka lakue, lo kiri lo komanse ti fa ye na ala.+ 2 Na pekoni, aFarizien aga na terê ti lo ti tara lo, na ala hunda lo wala ndia amû lege na koli ti sara divorce na wali ti lo.+ 3 Lo kiri tënë na ala, lo tene: “Moïse amû lani yanga na ala ti sara nyen?” 4 Ala tene: “Moïse amû lege na koli ti sara mbeni mbeti ti divorce na ti tomba wali ti lo.”+ 5 Jésus atene na ala: “A yeke ndali ti kpengbango bê ti ala+ si lo sû na ala commandement so na mbeti.+ 6 Me ti londo na komansema ti création, ‘Lo sara ala koli na wali.+ 7 Ndani la, koli ayeke zia ande babâ na mama ti lo,+ 8 na ala use kue ayeke ga terê oko.’+ Tongaso, ala yeke use mbeni pëpe, me terê oko. 9 Ni la, ye so Nzapa abungbi na gbe ti joug oko awe, zia zo akangbi yâ ni pëpe.”+ 10 Tongana ala kiri na da, adisciple akomanse ti hunda lo na ndö ti tënë so. 11 Lo tene na ala: “Zo so asara divorce na wali ti lo na lo sara mariage na mbeni wali nde, andâ lo gi mbeni wali nde la,+ na lo sara sioni na wali ti lo. 12 Na tongana mbeni wali asara divorce na koli ti lo si na pekoni lo sara mariage na mbeni koli nde, andâ lo gi mbeni koli nde la.”+

13 Na pekoni, azo akomanse ti ga na akete molenge na lo ti tene lo ndu ala. Me adisciple asuku na ala.+ 14 Tongana Jésus abâ ye so, bê ti lo ason si lo tene na ala: “Ala zia akete molenge ni aga na mbi. Ala tara ti kanga lege na ala pëpe, ndali ti so Royaume ti Nzapa ayeke ti azo so ayeke tongana akete molenge so.+ 15 Ti tâ tënë ni, mbi tene na ala: Zo so ayeda na Royaume ti Nzapa pëpe, tongana ti so mbeni kete molenge ayeke yeda na aye, lo yeke lï ande na yâ ni oko pëpe.”+ 16 Jésus amû amolenge ni na yâ ti maboko ti lo na lo komanse ti iri tënë nzoni na ndö ti ala na ziango maboko ti lo na ndö ti ala.+

17 Tongana lo mû lege ti hon, mbeni koli amû loro aga, lo tï na gbe ti Jésus, lo sara agenou na lo hunda lo: “Nzoni Maître, nyen la mbi doit ti sara ti wara ande fini ti lakue lakue?”+ 18 Jésus atene na lo: “Ngbanga ti nyen mo iri mbi nzoni zo? Nzoni zo oko ayeke dä pëpe, gï Nzapa awe.+ 19 Mo hinga acommandement ni awe: ‘Mo fâ zo pëpe,+ mo gi wali wala koli nde pëpe,+ mo nzi ye pëpe,+ mo tene mvene na li ti mbeni zo na gbele ngbanga pëpe,+ mo handa zo+ ti mû ye ti lo pëpe na mo ne babâ na mama ti mo.’”+ 20 Koli ni atene na lo: “Maître, ngbene ye so mbi ngbâ maseka, mbi yeke bata aye so kue.” 21 Jésus abâ lo, lo ye lo na bê ti lo si lo tene: “A ngbâ na mo ye oko ti sara: Gue, mo kä aye ti mo, mo mû nginza ni na awayere, na mo yeke wara ande mosoro na yayu; na mo ga mo mû peko ti mbi.”+ 22 Me terê ti lo adë kue na mango tënë so, na lo hon na vundu na bê ti lo, ngbanga ti so lo yeke na aye mingi.+

23 Na peko ti so Jésus abâ ndo na terê ti lo, lo tene na adisciple ti lo: “A yeke duti ande tâ ngangu mingi na azo so ayeke na nginza ti lï na yâ ti Royaume ti Nzapa!”+ 24 Me na mango tënë ti Jésus so, li ti adisciple ni akpe kue. Jésus akiri atene na ala: “Amolenge ti mbi, a yeke ngangu mingi ti lï na yâ ti Royaume ti Nzapa! 25 A yeke duti ngangu pëpe na mbeni chameau ti lï na yâ ti dû ti suä ahon mbeni zo ti mosoro ti lï na yâ ti Royaume ti Nzapa.”+ 26 Li ti ala akiri akpe kue, na ala tene na lo:* “A lingbi ti sö ande zo wa biani?”+ 27 Jésus abâ ndo droit na yâ ti lê ti ala, na lo tene: “Ye so akara azo, me a kara Nzapa ape, ndali ti so Nzapa alingbi ti sara ye kue.”+ 28 Pierre ato nda ti sara tënë na lo: “Bâ, e dö aye kue e zia na e mû peko ti mo.”+ 29 Jésus atene: “Ti tâ tënë ni, mbi tene na ala: Zo kue so azia da ti lo, aita ti lo ti koli, aita ti lo ti wali, mama ti lo, babâ ti lo, amolenge ti lo na ayaka ti lo ngbanga ti mbi nga ngbanga ti nzoni tënë,+ 30 lo yeke wara na yâ ti ngoi ti fadeso ada, aita ti koli, aita ti wali, amama, amolenge na ayaka. Aye so kue lo yeke wara ni fani 100, nga a yeke sara aye ti ngangu na lo na ndö ni.+ Me na yâ ti aye ti ngoi so ayeke ga,* lo yeke wara ande fini ti lakue lakue. 31 Me azo mingi so ayeke na li ni ayeke ga azo ti nda ni, na azo so ayeke na nda ni ayeke ga azo ti li ni.”+

32 Ala yeke na lege ti monté na Jérusalem, na Jésus ayeke tambela kozo na ala, na bê ti ala adö. Nga ala so ayeke mû peko ti ala ato nda ti sara mbeto. Me lo kiri lo mû gï adisciple ti lo 12 na mbage, na lo komanse ti tene na ala tënë ti aye so ayeke nduru ti si na lo, lo tene:+ 33 “Bâ, e yeke monté na Jérusalem la, na a yeke zia ande Molenge ti zo na maboko ti aprêtre-mokonzi nga na ascribe. Ala yeke fâ ngbanga ti kuâ na li ti lo, na ala yeke zia lo na maboko ti azo ti amara; 34 azo ni so ayeke he lo, ala yeke tuku ngu ti yanga na terê ti lo, ala yeke pika lo na zaza nga ala yeke fâ lo. Me lango ota na pekoni, lo yeke zingo na kuâ.”+

35 Jacques na Jean, amolenge ti Zébédée,+ aga na terê ti lo si ala tene na lo: “Maître, e ye si mo sara na e ye so e yeke hunda ni na mo.”+ 36 Lo tene na ala: “Ala ye mbi sara nyen ndali ti ala?” 37 Ala kiri tënë: “Mû lege na e ti duti na terê ti mo, oko na mbage ti maboko ti mo ti koli na oko na mbage ti maboko ti mo ti wali, na yâ ti gloire ti mo.”+ 38 Me Jésus atene na ala: “Ala hinga ye so ala yeke hunda so pëpe. Ala lingbi ti nyon kopo so mbi ngbâ ti nyon ni so? Wala ti wara batême so mbi ngbâ ti wara ni so?”+ 39 Ala tene na lo: “En, e lingbi.” Na mango tënë ti ala so, Jésus atene na ala: “Ti kopo so mbi ngbâ ti nyon so, ala yeke nyon ni ande. Nga batême so mbi ngbâ ti wara ni so, ala yeke wara ni ande nga.+ 40 Me ti duti na mbage ti maboko ti mbi ti koli wala na mbage ti maboko ti mbi ti wali, a yeke ti mbi ti mû ni pëpe. Me a yeke ti ala so a leke ni ndali ti ala.”

41 Tongana atanga ni bale-oko amä tënë so, bê ti ala ason na terê ti Jacques na Jean.+ 42 Me Jésus airi ala na terê ti lo, lo tene na ala: “Ala hinga so azo so a bâ ala tongana amokonzi ti amara ayeke sara mokonzi na ndö ti amara ni, na akota zo ti ala ayeke na komandema na ndö ti ala.+ 43 Ti ala, a doit ti duti tongaso pëpe. Me zo so aye ti ga kota na popo ti ala, a lingbi lo duti zo ti kua ti ala;+ 44 na zo so aye ti duti na li ni na popo ti ala, a lingbi lo duti ngbâa ti ala kue. 45 Même Molenge ti zo aga ti tene azo asara kua na lo pëpe, me ti sara kua na azo+ na ti mû fini* ti lo tongana ye so a futa ti zi azo mingi.”+

46 Na pekoni ala lï na Jéricho. Me tongana Jésus na adisciple ti lo nga na azo mingi mingi so amû peko ti lo ayeke sigi na yâ ti Jéricho, Bartimée (molenge ti Timée) ayeke duti na terê ti lege. Lo yeke waziba nga zo ti iringo ye.+ 47 Tongana lo mä so a yeke Jésus, zo ti Nazareth, lo komanse ti dekongo, lo tene: “Jésus, Molenge ti David,+ sara nzoni bê na mbi!”+ 48 Na mango lo, azo mingi akomanse ti suku na lo ti tene lo kanga yanga ti lo. Me lo ngbâ ti dekongo ngangu ahon ti kozo: “Molenge ti David, sara nzoni bê na mbi!” 49 Tongaso Jésus aluti, na lo tene: “Ala iri lo na mbi.” Tongaso, ala iri waziba ni, ala tene: “Kanga bê ti mo, londo, bâ lo yeke iri mo.” 50 Lo bi bongo ti lo ti ndö ni, lo huru lo luti na gere ti lo, na lo gue na terê ti Jésus. 51 Jésus atene na lo: “Mo ye mbi sara nyen ndali ti mo?” Waziba ni atene na lo: “Rabbouni,* sara si mbi kiri mbi bâ ndo.” 52 Jésus atene na lo: “Mo gue, mabe ti mo asava mo awe.”+ Hio, lo kiri lo bâ ndo,+ na lo komanse ti mû peko ti Jésus na ndö ti lege ni.

11 Tongana ala si nduru na Jérusalem, na Bethphagé nga na Béthanie,+ na ndö ti Hoto ti akeke ti olive, lo tokua ambeni disciple ti lo use,+ 2 na lo tene na ala: “Ala gue na yâ ti kete kodro so ala yeke bâ so. Gï na lingo ti ala, ala yeke wara mbeni kete kororo so a kanga lo, so zo ade ti duti na ndö ti lo pëpe. Ala zi lo ala ga na lo ge. 3 Me tongana mbeni zo ahunda ala, atene: ‘Ngbanga ti nyen ala yeke sara tongaso?’ Ala tene: ‘Seigneur la ayeke na bezoin ni, na lo yeke kiri na lo ge fafadeso.’” 4 Tongaso, ala gue na ala wara kete kororo ni so a kanga lo na yanga ti mbeni da na gigi na terê ti mbeni kete lege, na ala zi lo.+ 5 Me ambeni zo so ayeke luti kâ atene na ala: “Nyen la ala yeke sara so? Ala yeke zi kete kororo ni ngbanga ti nyen?” 6 Ala tene gï peko ti yanga ti Jésus na azo ni, na a zia lege na ala ti gue.

7 Ala ga na kete kororo ni+ na Jésus, ala bi abongo ti ala ti ndö ni na ndö ti kororo ni, na Jésus aduti na ndö ti lo.+ 8 Nga, gbâ ti azo agbara abongo ti ala ti ndö ni na ndö ti lege. Ambeni afâ amaboko ti keke so ayeke na terê ti lege ni na so akugbe angbâ na terê ni.+ 9 Ala so ayeke hon kozo na lo nga ala so ayeke ga na peko ti lo ayeke dekongo, atene: “E voro mo, mo sö lo!+ Tufa ayeke na ndö ti lo so aga na iri ti Jéhovah!+ 10 Tufa na ndö ti Royaume so ayeke ga, Royaume ti babâ ti e David!+ Mo so mo yeke kâ na nduzu, e voro mo, mo sö lo!” 11 Lo lï na Jérusalem, lo gue na yâ ti temple. Lo bi lê ti lo, lo bâ aye kue, na ndali ti so l’heure ahon mingi awe, lo sigi lo gue na Béthanie, lo na adisciple 12.+

12 Na ndade ni, tongana ala londo na Béthanie ti sigi, nzara asara lo.+ 13 Tongana lo ngbâ ayo, lê ti lo atï na ndö ti mbeni keke ti figue so akugbe ni ayeke dä. Lo gue ti bâ wala lo lingbi ti wara lengo ni dä. Me, tongana lo si na terê ni, lo wara ye oko pëpe, gï akugbe ni, ngbanga ti so a yeke ngoi ti lengo ti afigue la pëpe. 14 Tongaso, lo tene na keke ni: “Zia zo ate lengo ti mo mbeni pëpe biani biani.”+ Adisciple ti lo amä tënë so lo tene so.

15 Ala si fadeso na Jérusalem. Kâ, lo lï na yâ ti temple na lo komanse ti tomba azo so ayeke kä ye nga na azo so ayeke vo ye na yâ ni. Lo kinda atable ti azo so ayeke changé nginza nga na aye ti duti ti azo so ayeke kä akolokoto.+ 16 Lo zia lege na mbeni zo pëpe ti yô kungba ti hon na ni na yâ ti temple. 17 Lo ngbâ ti fa ye na azo, lo tene: “Mbeti ti Nzapa atene: ‘A yeke iri da ti mbi da ti sambela ti azo ti amara kue.’+ Me, ala sara si da ni aga kota dû ti azo ti gbungo aye ti azo na ngangu.”+ 18 Aprêtre-mokonzi na ascribe amä tënë so, na ala yeke gi lege ti fâ lo.+ Me ala sara mbeto ti lo, ngbanga ti so bê ti gbâ ti azo ni kue adö ndali ti fango ye ti lo.+

19 Tongana a si na lakui awe, ala sigi na yâ ti gbata ni. 20 Me tongana ala yeke hon na lege na yanga ti ndapre, ala bâ keke ti figue ni. Keke ni ahule juska na gunda ni kue awe.+ 21 Tongaso Pierre adabe ti lo na ni si lo tene na Jésus: “Rabbi, bâ ye! Keke ti figue so mo deba ni so ahule awe.”+ 22 Jésus akiri tënë na ala, lo tene: “Ala mä na bê na Nzapa. 23 Ti tâ tënë ni, mbi tene na ala: Zo so atene na hoto so: ‘Mo londo, mo gue mo tï na yâ ti ngu-ingo,’ na lo dë kite na yâ ti bê ti lo pëpe, me lo yeke na mabe so ye ni ayeke si biani, a yeke si ande tongana ti so lo hunda.+ 24 Ndani la mbi tene na ala: Ye kue so ala hunda na yâ ti sambela, ala mä na bê so ala wara ni awe, na ala yeke wara ni ande.+ 25 Tongana ala luti na ala yeke sambela, ala pardonné tënë kue so ala yeke na ni na bê ti ala na terê ti mbeni zo, tongaso si Babâ ti ala so ayeke na yayu alingbi nga ti pardonné afaute ti ala.”+ 26 *——

27 Ala kiri aga na Jérusalem. Tongana Jésus ayeke tambela na yâ ti temple, aprêtre-mokonzi na ascribe nga na a-ancien aga, 28 ala tene na lo: “Na iri ti zo wa si mo yeke sara aye so? Zo wa si amû na mo komandema ti sara aye so?”+ 29 Jésus atene na ala: “Mbi yeke hunda ala na tënë oko. Tongana ala kiri tënë na mbi, mbi kue mbi yeke fa na ala iri ti zo so amû na mbi komandema ti sara aye so. 30 Batême ti Jean+ alondo na yayu wala na azo? Ala kiri tënë na mbi.”+ 31 Tongaso, ala komanse ti sara tënë na popo ti ala, ala yeke tene: “Tongana e tene: ‘A londo na yayu,’ lo yeke tene ande: ‘Ka ngbanga ti nyen ala mä na bê na lo ape?’ 32 Me a lingbi e zia ye ahanda e si e tene: ‘A londo na azo’?” Ala yeke na mbeto ti gbâ ti azo so, ngbanga ti so azo ni kue abâ so Jean ayeke lani mbeni prophète biani.+ 33 Ala kiri tënë na Jésus, ala tene: “E hinga pëpe.” Jésus atene nga na ala: “Mbi kue mbi yeke fa na ala pëpe iri ti zo so amû na mbi komandema ti sara aye so.”

12 Na pekoni, lo komanse ti sara tënë na ala na lege ti atoli, lo tene: “Mbeni koli afâ yaka ti vigne+ na lo sara gbagba angoro ni, lo zi dû ti sarango na vin dä nga lo leke mbeni tour dä.+ Lo zia yaka ni na maboko ti azo ti fango yaka ti tene ala loué ni, na lo gue na mbeni tambela na kodro-wande.+ 2 Tongana ngoi ti fango alê ti vigne ni alingbi awe, lo tokua mbeni ngbâa na azo ti fango yaka ni ti tene ala mû na lo ambeni lê ti vigne ti yaka ni. 3 Me azo ti fango yaka ni agbu lo, ala pika lo si ala zia lo, lo kiri maboko senge. 4 Lo kiri lo tokua mbeni ngbâa ni na ala, lo so ni so ala pika lo na li ti lo na ala zia kamene na lê ti lo.+ 5 Na lo kiri lo tokua mbeni ngbâa ni nde, me ala fâ lo. Ti ambeni ngbâa ni mingi, azo ti fango yaka ni apika ala, ti ambeni ala fâ ala. 6 Oko zo so angbâ na lo ayeke molenge ti lo ti koli so lo ye lo mingi.+ Na nda ni, lo tokua molenge so na ala, lo tene: ‘Ala yeke kpe mbeto ti molenge ti mbi so.’ 7 Me azo ti fango yaka so atene na popo ti ala: ‘So héritier+ ni la. Ala ga, e fâ lo na héritage ni ayeke ga ti e!’ 8 Tongaso ala gbu lo, ala fâ lo na ala bi lo na gigi na peko ti yaka ti vigne ni.+ 9 Wa ti yaka ti vigne ni ayeke sara ande nyen? Lo yeke ga ande ti fâ azo ti fango yaka so na lo yeke mû yaka ti vigne ni na ambeni zo nde.+ 10 Ala diko tënë so na yâ ti Mbeti ti Nzapa lâ oko ape? ‘Tênë so azo ti lekengo da ake ni so, ni la aga ngangu tênë ti coin ti da ni.*+ 11 Ye so alondo na Jéhovah,* na a yeke ye ti dongo bê na lê ti e.’”+

12 Na mango tënë so, ala ye ti gbu lo, me mbeto ti gbâ ti azo ni asara ala, ndali ti so ala hinga so lo tene toli so ti kpo ala. Ni la ala zia lo ala hon.+

13 Na pekoni, ala tokua ambeni Farizien nga na azo ti Hérode ti gue na mbage ti lo ti tene ala gbu lo na lege ti tënë ti yanga ti lo.+ 14 Tongana ala si kâ, ala tene na lo: “Maître, e hinga so mo yeke tene gï tâ tënë lakue nga mo yeke mû mbage ti mbeni zo pëpe, ndali ti so mo yeke bâ gï lê ti zo pëpe. Me mo yeke fa tënë ti Nzapa na lege ti tâ tënë. Ndia amû lege na zo* ti futa impôt ti molenge ti kodro na César wala pëpe? 15 A lingbi e futa ni wala e futa ni ape?” So Jésus ahinga so ala sara ye gï ti handa lê ti lo, lo tene na ala: “Ngbanga ti nyen ala yeke tara mbi? Ala ga na mbi mbeni denier* oko mbi bâ.” 16 Ala ga na lo denier oko, na lo tene na ala: “Li ti zo so nga na iri so ayeke na ndö ni so ayeke ti zo wa?” Ala tene na lo: “A yeke ti César.” 17 Tongaso Jésus atene na ala: “Ala kiri na César aye so ayeke ti César,+ me na Nzapa aye so ayeke ti Nzapa.”+ Tongana ala mä tënë so, bê ti ala adö.

18 Na pekoni aSadducéen, so atene zingongo ti akuâ+ ayeke dä pëpe, aga ahunda lo, atene:+ 19 “Maître, Moïse asû na e na mbeti so tongana ita ti mbeni zo akui, si lo zia na peko ti lo wali, me lo dü molenge pëpe, a lingbi ita ti lo ti koli amû wali ni ti dü molenge na iri ti ita ti lo.+ 20 Lani ambeni ita ti koli mbasambala ayeke dä. Yaya ni amû wali me lo kui na lo zia molenge na peko ti lo pëpe. 21 Use ita ti lo amû wali ni, me lo kui na lo zia molenge na peko ti lo pëpe. Ti ota ita ti lo ni nga ayeke tongaso. 22 Ala mbasambala kue azia amolenge na peko ti ala pëpe. Na peko ti ala kue, wali ni nga akui. 23 Na ngoi ti zingongo ti akuâ, wali ni ayeke duti ande wali ti lo so wa? So ala mbasambala kue la amû wali ni so.” 24 Jésus atene na ala: “A yeke ngbanga ti tënë so si ala girisa lege awe so ape? Ndali ti so ala hinga Mbeti ti Nzapa nga na ngangu ti Nzapa oko pëpe.+ 25 Na ngoi so ala yeke zingo na kuâ, akoli ayeke sara mariage pëpe na awali nga ayeke sara mariage pëpe. Me ala yeke tongana a-ange na yayu.+ 26 Me na ndö ti tënë ti akuâ so a yeke zingo ala, ala diko na yâ ti mbeti ti Moïse ape? So na yâ ti mbaï so asara tënë ti keke ti sisi, Nzapa atene na lo: ‘Mbi yeke Nzapa ti Abraham, Nzapa ti Isaac na Nzapa ti Jacob.’+ 27 Lo yeke Nzapa ti akuâ pëpe, me ti azo so ayeke na fini. Ala girisa lege tâ ngangu mingi.”+

28 Mbeni oko ti ascribe aga, lo mä ala na ngoi so ala yeke dë gaba na popo ti ala, na lo hinga so Jésus akiri tënë na ala pendere mingi. Tongaso, lo hunda Jésus: “Commandement so ayeke kozo* na atanga ni kue ayeke so wa?”+ 29 Jésus akiri tënë: “Kozo commandement ni ayeke so: ‘Azo ti Israël, ala mä si, Jéhovah* Nzapa ti e, lo yeke gï Jéhovah* oko. 30 Mo doit ti ndoye Jéhovah* Nzapa ti mo na bê ti mo kue, na âme* ti mo kue, na bibe ti mo kue nga na ngangu ti mo kue.’+ 31 Use commandement ni ayeke so: ‘Mo doit ti ndoye mba ti mo tongana mo wani.’+ Mbeni commandement so ayeke kota ahon ala so ayeke dä pëpe.” 32 Scribe ni atene na lo: “Maître, tënë so mo tene ayeke tâ tënë: ‘Lo yeke gï oko awe, na mbeni nde ayeke dä pëpe, gï lo awe.’+ 33 Ti ndoye lo na bê ti mo kue, na hingango ndo ti mo kue, na ngangu ti mo kue nga ti ndoye mba ti mo tongana mo wani ayeke nzoni mingi ahon asandaga kue so a zö ni agbi kue nga na asandaga nde nde kue.”+ 34 Na mango tënë so, Jésus abâ so koli so akiri tënë nzoni mingi, lo tene na lo: “Mo yeke yongoro na Royaume ti Nzapa pëpe.” Me mbeni zo ti tara ti hunda tënë na lo encore ayeke dä pëpe.+

35 Me na ngoi so Jésus angbâ ti fa ye na yâ ti temple, lo hunda ndo, lo tene: “A sara tongana nyen si ascribe atene so Christ ayeke molenge ti David?+ 36 Na lege ti yingo vulu,+ David wani atene: ‘Jéhovah* atene na Seigneur ti mbi: “Mo duti na mbage ti maboko ti mbi ti koli juska mbi zia awato ti mo na gbe ti gere ti mo.”’+ 37 David wani airi lo Seigneur, tongaso, lo kiri ti duti molenge ti lo ni tongana nyen?”+

Azo mingi mingi so ayeke mä lo na ngia na bê ti ala. 38 Na yâ ti fango ye ti lo, lo tene: “Ala sara hange na ascribe so aye ti yü ayongoro bongo ti fono na ni nga ala ye ti tene azo abara ala na yâ ti agara.+ 39 Ala ye akozo* ngende na yâ ti asynagogue nga ala ye gï akozo place na ngoi ti tengo akobe ti lakui.+ 40 Ala yeke hunzi aye kue ti yâ ti ada ti* awali-mua, na ala yeke tene ayongoro sambela ti tene azo abâ ala. Ngbanga ti ala ayeke duti ande ngangu* mingi.”

41 Lo duti lê na lê na asanduku ti nginza*+ na lo yeke bâ gbâ ti azo so ayeke bi nginza na yâ ti asanduku ti nginza ni. Azo ti mosoro mingi ayeke bi gbâ ti alê ti nginza na yâ ni.+ 42 Mo ye ti bâ, mbeni wali-mua so ayeke wayere aga, na lo bi na yâ ti sanduku ni akete lê ti nginza use so ngere ni ayeke kete mingi.*+ 43 Tongaso Jésus airi adisciple ti lo, lo tene na ala: “Ti tâ tënë ni, mbi tene na ala: Wali-mua so ayeke wayere so abi ye mingi ahon azo kue so abi nginza na yâ ti asanduku ni,+ 44 ngbanga ti so ala kue abi gï nginza ti ala ti ndö ni, me wali so, na yâ ti yere ti lo, abi ye kue so lo yeke na ni, ye kue so lo yeke na ni ti bata na fini ti lo.”+

13 Tongana lo yeke sigi na yâ ti temple, mbeni disciple ti lo oko atene na lo: “Maître, bâ tâ apendere tênë nga na apendere da so ma!”+ 2 Me Jésus atene na lo: “Mo bâ akota da so? Tênë oko ayeke ngbâ ande ge na ndö ti mbeni pëpe. A yeke tuku ande ni kue na sese.”+

3 Na ngoi so lo yeke duti na ndö ti Hoto ti akeke ti olive na lo lingbi ti bâ temple ni, gï Pierre, Jacques, Jean na André la ayeke na terê ti lo, na ala hunda lo, atene: 4 “Tene na e: Lawa si aye so ayeke si ande? Nga, fä wa la ayeke fa so aye so kue ayeke gue ti hunzi?”+ 5 Jésus akomanse ti tene na ala: “Ala sara hange si mbeni zo ahanda ala pëpe.+ 6 Azo mingi ayeke ga na iri ti mbi, ala yeke tene: ‘Mbi si mbi yeke lo,’ na ala yeke handa azo mingi. 7 Nga, tongana ala yeke mä tënë ti abira so atï nduru na ala nga na ambeni so atï yongoro na ala, ala zia si mbeto ahon ndö ti ala pëpe; a lingbi aye ni so asi, me ade nda ni asi pëpe.+

8 “Mara ayeke londo na bira na terê ti mbeni mara, na royaume ayeke londo na bira na terê ti mbeni royaume.+ Sese ayeke yengi na ando nde nde na peko ti terê, nga kota nzara ayeke tï.+ Aye so ayeke tongo nda ti aye ti vundu ni so akpa songo yâ so agbu wali so aye ti dü.+

9 “Ti ala, ala bâ terê ti ala nzoni. Azo ayeke gue ande na ala na gbele ngbanga,+ a yeke pika ala na yâ ti asynagogue.+ A yeke gue na ala na ngbanga na gbele agouverneur nga na agbia ndali ti mbi, si ala wara lege ti fa tënë na azo so.+ 10 Nga, a lingbi a fa nzoni tënë na amara kue kozoni si.+ 11 Me, tongana azo ayeke gue na ala na devant ti ngbanga, ala gi bê ti ala kozoni pëpe na ndö ti tënë so ala lingbi ande ti tene. Me ye so a zia na yanga ti ala ti tene na l’heure ni so, ala tene ni, ndali ti so a yeke ala pëpe si ayeke sara tënë, me a yeke yingo vulu si ayeke sara tënë.+ 12 Nga, ita ayeke kä ita ti lo si a fâ lo, na babâ ayeke sara nga tongaso na molenge ti lo. Amolenge ayeke londo ande ti ke ababâ na amama ti ala na ti sara si a fâ ala.+ 13 Azo kue ayeke ke ala ndali ti iri ti mbi.+ Me zo so agbu ngangu juska na nda ni,+ a yeke sö lo ande.+

14 “Tongana ala bâ ye ti saleté so asara si ye kue abuba+ aduti na ndo so a lingbi lo duti fade dä pëpe (zia zo so ayeke diko tënë ni abâ ndani nzoni), na ngoi ni so, zia ala so ayeke na Judée alondo akpe na li ti ahoto.+ 15 Zia zo so ayeke na li ti da adescend pëpe nga lo lï pëpe na yâ ti da ti lo ti mû mbeni ye ti hon na ni. 16 Nga, zia zo so ayeke na yaka akiri pëpe ndali ti aye so angbâ na peko ti lo ti mû bongo ti lo ti ndö ni. 17 Mawa na awali so ayeke na ngo, nga na ala so angbâ ti mû me na amolenge na alango ni so!+ 18 Ala ngbâ ti sambela si ye ni asi pëpe na ngoi so dê ayeke mingi; 19 ndali ti so alango ni so ayeke duti ande alango ti mbeni kota ye ti vundu+ so mara ni ade ti si lâ oko pëpe ngbene ye so Nzapa aleke aye juska ti si na ngoi ti fadeso, na mara ni ayeke kiri ti si ande pëpe.+ 20 Biani, tongana Jéhovah* afâ yâ ti ngoi ni so fade pëpe, ka mitele oko ayeke sö kuâ pëpe. Me ndali ti azo so lo soro ala, lo fâ yâ ti ngoi ni so.+

21 “Nga, tongana mbeni zo atene na ala: ‘Bâ! Christ la ge so,’ wala ‘Bâ! lo la kâ so’ ala mä na bê na ni pëpe;+ 22 ndali ti so aChrist ti wataka nga na aprophète ti wataka ayeke londo+ na ala yeke sara ande afä nga na aye ti kpene si, tongana lege ayeke dä, ala handa azo so a soro ala. 23 Tongaso, ala sara hange.+ Mbi sara tënë ti aye so kue na ala kozoni awe.

24 “Me na alango ni so, na peko ti kota ye ti vundu so, lâ ayeke vuko, na nze ayeke su pëpe,+ 25 atongoro ayeke londo ande na nduzu ti tï nga angangu so ayeke na yayu ayeke yengi ande. 26 Na pekoni, ala yeke bâ ande Molenge ti zo+ so ayeke ga na yâ ti ambinda na kota ngangu nga na gloire.+ 27 Lo yeke tokua ande a-ange, si ala yeke bungbi na ndo oko azo ti lo so a soro ala, ti londo na apupu osio, nga ti londo na mbeni mbage ti sese ti si na mbeni mbage ti yayu.+

28 “Fadeso, zia ala manda ye na lege ti tapande ti keke ti figue: Gï na ngoi so akete maboko ni ato nda ti sigi na afini kugbe ni nga asigi, ala hinga so ngoi ti ndowa aga nduru awe.+ 29 Legeoko, ala nga, tongana ala bâ aye so ayeke si, zia ala hinga so lo si nduru awe, lo yeke na yanga-da.+ 30 Ti tâ tënë ni, mbi tene na ala: Azo ti ngoi ni so ayeke hon kue pëpe juska aye so kue asi awe si.+ 31 Yayu na sese ayeke hon ande,+ me atënë ti mbi ayeke hon oko pëpe.+

32 “Na ndö ti tënë ti lango ni so nga na l’heure ni so, zo oko ahinga ni pëpe, atâa a-ange na yayu, wala Molenge ni ahinga ni pëpe, me gï Babâ ni.+ 33 Ala sara hange, zia lê ti ala angbâ na zingo ni,+ ndali ti so ala hinga pëpe lawa si lango so a fa ni awe ayeke si.+ 34 A yeke tongana mbeni koli so ayeke gue na kodro-wande na lo zia da ti lo na peko ti lo, lo mû komandema na angbâa ti lo,+ lo fa kua ti zo oko oko na lo, na lo mû yanga na sinziri ni ti lango pëpe.+ 35 Ni la, ala lango pëpe, ngbanga ti so ala hinga pëpe ngoi ni so wa ti da ni ayeke ga na ni,+ wala na lakui, wala na bê ti bï, wala kozo na toto ti kondo wala na yanga ti ndapre,+ 36 tongaso si na ngoi so lo ga gï hio tongaso, lo wara ala na lango pëpe.+ 37 Me tënë so mbi tene na ala so, mbi tene ni na azo kue: Ala lango pëpe.”+

14 Andâ Matanga ti Pâque+ nga na Matanga ti mapa so a sara na levure pëpe+ angbâ lango use.+ Aprêtre-mokonzi na ascribe ayeke gi mbeni lege ti gbu lo na lege ti mayele* na ti fâ lo,+ 2 ndali ti so ala yeke tene: “Zia e sara ni pëpe na ngoi ti matanga ni, peut-être wusuwusu alingbi ti londo na popo ti azo ni.”

3 Na ngoi so Jésus ayeke na Béthanie si lo yeke te kobe na da ti Simon, zo ti buruma, mbeni wali aga na ngbenda ti albâtre, so mafuta so afun pendere ayeke na yâ ni, tâ mafuta ti nard, ti nginza mingi. Lo fâ yanga ti ngbenda ni so, na lo komanse ti tuku mafuta ni na li ti Jésus.+ 4 Na bango ye so, bê ti ambeni disciple ason si ala tene na mba: “Mafuta so afun pendere so, a buba ni ngbanga ti nyen? 5 A lingbi fade ti kä mafuta so afun pendere so ahon denier* 300 na a mû nginza ni na awayere!” Bê ti ala ason mingi na terê ti wali ni.* 6 Me Jésus atene: “Ala zia lo kpô. Ngbanga ti nyen ala ye ti ga na kpale na lo? Ye so lo sara na mbi ayeke nzoni mingi.+ 7 Awayere ayeke ngbâ lakue na ala,+ ala lingbi ti sara ye ti nzoni na awayere so na ngoi kue so ala ye. Me mbi yeke ngbâ lakue na ala pëpe.+ 8 Wali so asara ye so alingbi na ngangu ti lo. Lo tuku mafuta so afun pendere so na terê ti mbi ti leke mbi kozo na ngoi ti lungo mbi.+ 9 Ti tâ tënë ni, mbi tene na ala: Na ndo kue so a yeke fa ande nzoni tënë dä na dunia kue,+ a yeke sara nga tënë ti ye so wali so asara so, ti tene azo adabe ti ala na lo.”+

10 Judas Iscariote, mbeni oko na popo ti adisciple 12, ague na mbage ti aprêtre-mokonzi ti tene lo kä Jésus na ala.+ 11 Tongana ala mä tënë so, terê ti ala anzere na ala mû zendo ti mû na lo alê ti nginza ti argent.+ Tongaso, lo komanse ti gi mbeni ngoi ti kä Jésus.

12 Na kozo lango ti Matanga ti mapa so a sara na levure pëpe,+ lango so lakue a yeke mû sandaga ti Matanga ti Pâque,+ adisciple ti Jésus atene na lo: “Mo ye e gue e leke aye ni na ndo wa si mo te kobe ti Pâque ni?”+ 13 Na ndö ti tënë so, lo tokua ambeni disciple ti lo use, lo tene na ala: “Ala gue na yâ ti gbata ni. Kâ, mbeni koli so ayô ta ti sese na ngu na yâ ni ayeke tingbi ande na ala. Ala mû peko ti lo,+ 14 na ndo so lo lï dä, ala tene na wa ti da ni: ‘Maître atene: “Kubu ti agene so mbi lingbi ti te kobe ti Pâque dä na adisciple ti mbi ayeke na ndo wa?”’ 15 Lo yeke fa na ala ande mbeni kota kubu so ayeke na nduzu, so a leke ye kue na yâ ni awe. Ala leke aye ni kâ ndali ti e.” 16 Tongaso, adisciple ni ague, ala lï na yâ ti gbata ni na ala wara aye ni gï tongana ti so Jésus atene fade na ala. Ala leke aye kue ndali ti Pâque ni.

17 Tongana a si na lakui awe, lo na adisciple 12 ni aga.+ 18 Na ngoi so ala yeke na terê ti table na ala yeke te ye, Jésus atene: “Ti tâ tënë ni, mbi tene na ala: Mbeni oko na popo ti ala, so ayeke te ye legeoko na mbi, ayeke kä mbi ande.”+ 19 Ala komanse ti sara vundu, na ala oko na oko atene na lo: “A yeke mbi?” 20 Lo tene na ala: “A yeke mbeni oko na popo ti ala 12, so ayeke yôro maboko legeoko na mbi na yâ ti sembe.+ 21 Molenge ti zo ayeke hon, gï tongana ti so a sû tënë ni na ndö ti lo na yâ ti Mbeti ti Nzapa. Me mawa na zo so na lege ti lo si a kä Molenge ti zo!+ A yeke nzoni mingi ngbanga ti zo ni so tongana a dü lo fade pëpe.”+

22 Tongana ala ngbâ ti te kobe, lo mû mbeni mapa, lo iri tënë nzoni na ndö ni, lo kungbi yâ ni na lo mû ni na ala, lo tene: “Ala mû ni, so ayeke tongana tapande ti terê ti mbi.”+ 23 Lo mû nga mbeni kopo ti vin, lo kiri singila na Nzapa, lo mû ni na ala, na ala kue anyon ni.+ 24 Lo tene na ala: “So ayeke tongana tapande ti ‘mênë+ ti mbele ni,’+ mênë ti mbi so ayeke tuku ande ndali ti azo mingi.+ 25 Ti tâ tënë ni, mbi tene na ala: Mbi yeke nyon ande ngu ti lê ti vigne mbeni pëpe juska na lango so mbi yeke nyon fini ni na yâ ti Royaume ti Nzapa.” 26 Na nda ni, tongana ala sepela Nzapa na bia* awe, ala sigi ala gue na ndö ti Hoto ti akeke ti olive.+

27 Jésus atene na ala: “Ala kue ayeke pika gere ti ala, ndali ti so Mbeti ti Nzapa atene: ‘Mbi yeke dë berger ni,+ na ataba ni ayeke kangbi kirikiri.’+ 28 Me tongana a zingo mbi na kuâ awe, mbi yeke gue kozo ti ala na Galilée.”+ 29 Me Pierre atene na lo: “Atâa atanga ni kue apika gere, mbi yeke pika gere pëpe!”+ 30 Na mango tënë so, Jésus atene na lo: “Ti tâ tënë ni, mbi tene na mo: Laso, tâ gï na bï so, kozo si mbeni koli-kondo atoto lege use, fani ota mo yeke tene ande so mo hinga mbi pëpe.”+ 31 Me Pierre angbâ gï ti tene: “Atâa a yeke ti tene mbi na mo e kui oko, mbi yeke tene ande lâ oko pëpe so mbi hinga mo pëpe.” Tanga ti adisciple ni nga kue akomanse ti tene tongaso.+

32 Na pekoni, ala si na ndo so a iri ni Gethsémané, na lo tene na adisciple ti lo: “Ala duti ti ala ge, na ngoi so mbi yeke sambela.”+ 33 Lo mû Pierre, Jacques na Jean na terê ti lo.+ Vundu ato nda ti gbu lo ngangu,* na lo komanse ti gi bê ti lo ngangu mingi. 34 Lo tene na ala: “Mbi yeke* na vundu mingi,+ même nduru na kuâ. Ala ngbâ ge, na ala lango pëpe.”+ 35 Lo hon kete, lo tï na sese, na lo komanse ti sambela ti tene tongana lege ayeke dä, ngbonga ni so alingbi ti hon yongoro na lo. 36 Na lo tene: “Abba,* Babâ,+ mo lingbi ti sara ye kue. Mo zi kopo so yongoro na mbi. Me zia a duti tongana ti so bê ti mbi aye pëpe, me tongana ti so bê ti mo aye.”+ 37 Tongana lo kiri, lo bâ so ala yeke lango, na lo tene na Pierre: “Simon, mo yeke lango? Mo yeke na ngangu pëpe ti lango pëpe même gï l’heure oko?+ 38 Ala lango pëpe, ala ngbâ ti sambela lakue tongaso si ala tï na yâ ti tara pëpe.+ Biani, yingo ti zo ayeke na nzara ti sara ye, me mitele awoko.”*+ 39 Lo kiri lo hon na lo sambela, lo tene gï oko tënë ni.+ 40 Me lo kiri lo ga, na lo wara ala na lango, ndali ti so lê ti ala ane na lango. Tongaso ala hinga tënë ti kiri na ni na lo pëpe. 41 Lo kiri ti fani ota ni, lo tene na ala: “Na mara ti ngoi tongaso, ala yeke lango na ala yeke wu terê ti ala? Awe! L’heure ni asi awe!+ Bâ, a ngbâ ti kä Molenge ti zo ti zia lo na maboko ti awasiokpari. 42 Ala londo, e gue. Bâ, zo ti kango mbi aga nduru ge awe.”+

43 So tënë angbâ na yanga ti lo, mo ye ti bâ, Judas, mbeni oko na popo ti adisciple 12, aga. Lo mû na peko ti lo gbâ ti azo so ayeke na a-épée nga na anduru keke, so aprêtre-mokonzi, ascribe nga na a-ancien si atokua ala.+ 44 Zo ti kango lo ni afa mbeni ye na azo ni kozoni, ye so lo na ala amä terê na ndö ni, lo tene: “Zo so mbi yeke su ande ngbangba ti lo, a yeke lo la; ala gbu lo na ala bâ ndo na ndö ti lo nzoni tongana ala yeke gue na lo.” 45 Lo gue droit na mbage ti Jésus, lo ga nduru na lo, lo tene: “Rabbi!” Na lo su ngbangba ti lo yeke. 46 Tongaso ala zia maboko na ndö ti Jésus si ala gbu lo. 47 Me mbeni oko ti ala so ayeke luti na ndo ni so agboto épée ti lo, lo dë ngbâa ti kota prêtre, lo fâ mê ti lo.+ 48 Jésus atene na azo ni: “Ala ga na a-épée nga na anduru keke ti gbu mbi tongana ti so a yeke sara na mbeni zo ti gbungo aye ti azo na ngangu?+ 49 Lâ na lâ mbi yeke na terê ti ala na yâ ti temple, mbi yeke fa ye,+ me ala gbu mbi lani pëpe. Me aye so asi ti tene tënë ti Mbeti ti Nzapa aga tâ tënë.”+

50 Adisciple ni kue azia lo, ala kpe.+ 51 Mbeni maseka-koli so ayü na terê ti lo gï mbeni bongo so a sara ni na pendere lin akomanse ti mû peko ti Jésus nduru nduru. Ala tara ti gbu lo, 52 me lo dö bongo ti lo ti lin ni lo zia si lo kpe terê ti lo senge.*

53 Fadeso ala gue na Jésus na kota prêtre+ ni. Aprêtre-mokonzi, a-ancien nga na ascribe, ala kue abungbi terê ti ala.+ 54 Pierre amû peko ti lo, me lo ngbâ ayo. Lo gue juska na gbagba ti kota prêtre ni, na lo yeke duti legeoko na azo ti kua ti yâ ti gbagba ni, lo yeke duti na terê ti mbeni wâ so aza mingi ti tomba dê na terê ti lo.+ 55 Andâ aprêtre-mokonzi nga na amembre ti Sanhédrin ni kue ayeke gi tënë ti bi na li ti Jésus ti wara lege ti fâ lo. Me ala wara mbeni tënë oko pëpe.+ 56 Biani, azo mingi abi atënë ti wataka na ndö ti lo,+ me atënë ti ala ni amä terê pëpe. 57 Ambeni zo nga alondo na ala bi tënë ti wataka na li ti lo, ala tene: 58 “E mä lo tene: ‘Mbi yeke kungbi ande temple so na sese, temple so maboko ti zo si aleke ni so, na mbi yeke leke mbeni nde na lango ota, so maboko ti zo si asara ni pëpe.’”+ 59 Me na ndö ti tënë so kue, tënë ti ala ni ague kirikiri.

60 Na pekoni, kota prêtre ni alondo na popo ti azo ni na lo hunda Jésus, lo tene: “Mo yeke na mbeni tënë ti kiri na ni ape? So tënë ti nyen la si akoli so ayeke bi na li ti mo so?”+ 61 Me Jésus azi yanga pëpe, lo kiri tënë oko pëpe.+ Na kota prêtre ni akomanse ti hunda lo, atene: “Mo yeke Christ, Molenge ti Lo so azo ayeke gonda Lo so?” 62 Jésus atene: “Mbi yeke lo. Ala yeke bâ ande Molenge ti zo+ so ayeke duti na terê ti Nzapa so ayeke ngangu mingi na mbage ti koli,+ na lo yeke ga na ndö ti ambinda ti yayu.”+ 63 Na mango tënë so, kota prêtre ni asuru abongo na terê ti lo na lo tene: “E yeke na bezoin ti ambeni témoin ti sara na nyen?+ 64 Ala mä zonga ni na mê ti ala awe. Ala tene ti ala nyen dä?”* Ala kue atene so lo lingbi na kuâ.+ 65 Ambeni atuku ngu ti yanga na terê ti lo,+ ala kanga lê ti lo kue, ala kpo lo na gobo na ala tene na lo: “Tongana mo yeke mbeni prophète, fa na e zo so apika mo so!” Azo ti kua ti da-ngbanga ni apika lê ti lo na ahon na lo.+

66 Tongana Pierre ayeke na gbe ni na yâ ti lacour ni, mbeni oko ti amaseka-wali so ayeke zo ti kua ti kota prêtre ni aga,+ 67 na tongana lo bâ Pierre so ayeke duti na terê ti wâ ti tomba dê na terê ti lo, lo bâ ndo droit na mbage ti Pierre, lo tene: “Mo kue mo yeke fade na terê ti Jésus, zo ti Nazareth so!” 68 Me Pierre abere tënë ni, lo tene: “Mbi hinga ti mbi lo pëpe, mbi hinga li ti mbi na tënë so mo yeke tene so pëpe.” Lo sigi, lo gue na mbage ti yanga ti gbagba ni. 69 Kâ, maseka-wali ni abâ Pierre, na lo komanse encore ti tene na ala so ayeke luti na ndo ni so: “Lo so kue ayeke mbeni oko ti ala.” 70 Pierre akiri ayeke bere tënë ni. Kete na pekoni, azo so ayeke luti na ndo ni so akomanse encore ti tene na Pierre: “Ti tâ tënë ni, mo yeke oko ti ala, ndali ti so mo yeke biani mbeni zo ti Galilée.” 71 Me lo komanse ti iri sioni na ndö ti lo wani nga ti deba terê ti lo: “Mbi hinga ti mbi koli so ala yeke sara tënë ti lo so pëpe.” 72 Hio, mbeni koli-kondo atoto ti fani use ni.+ Pierre adabe ti lo na tënë so Jésus atene fade na lo: “Kozo si mbeni koli-kondo atoto lege use, fani ota mo yeke tene ande so mo hinga mbi pëpe.”+ Vundu asara lo mingi si lo komanse ti toto.

15 Hio na kota ndapre, aprêtre-mokonzi, a-ancien nga na ascribe, so ti tene amembre ti Sanhédrin ni kue, abungbi ti mä terê. Na pekoni, ala kanga Jésus, ala gue na lo ala mû lo na Pilate.+ 2 Tongaso Pilate ahunda lo atene: “Mo yeke Gbia ti aJuif?”+ Lo kiri tënë, lo tene: “Mo wani mo tene awe.”+ 3 Me aprêtre-mokonzi ni ayeke bi atënë mingi na li ti lo. 4 Pilate akiri ahunda lo: “Mo yeke na tënë ti kiri na ni ape?+ Bâ gbâ ti atënë so ala yeke bi na li ti mo so.”+ 5 Me Jésus akiri tënë oko pëpe, tongaso li ti Pilate akpe kue.+

6 Lakue na ngoi ti matanga so, Pilate ayeke zi ka na ala mbeni zo ti kanga oko, lo so ala hunda ti tene a zi lo.+ 7 Na ngoi ni so, mbeni zo so iri ti lo ayeke Barabbas ayeke na da ti kanga legeoko na azo so ake yanga ti gouvernement, so na yâ ti kengo yanga ni ala fâ zo. 8 Tongaso, gbâ ti azo ni aga na ala komanse ti hunda Pilate ti sara tongana ti so lo yeke sara ka na ala. 9 Lo kiri tënë na ala, lo tene: “Ala ye mbi zi na ala Gbia ti aJuif ni?”+ 10 Pilate ahinga so a yeke kota bê la apusu aprêtre-mokonzi ti zia Jésus na tïtî lo.+ 11 Me aprêtre-mokonzi ni apusu gbâ ti azo ni ti hunda ti tene lo zi gï Barabbas na ala.+ 12 Pilate akiri atene na ala: “Ka lo so ala iri lo Gbia ti aJuif so, mbi doit ti sara nyen na lo?”+ 13 Ala kiri adekongo, ala tene: “Fâ lo na ndö ti keke!”+ 14 Me Pilate atene na ala: “Ngbanga ti nyen? Sioni ti nyen la lo sara?” Azo ni kue angbâ gï ti dekongo ngangu: “Fâ lo na ndö ti keke!”+ 15 So Pilate aye ti sara ye so bê ti gbâ ti azo ni aye, lo zi na ala Barabbas. Lo mû yanga si a pika Jésus na zaza,+ na pekoni lo mû lo ti tene a fâ lo na ndö ti keke.+

16 Na pekoni, aturugu alï na lo na yâ ti gbagba, so ti tene na da ti gouverneur ni. Ala iri aturugu ni kue ti bungbi.+ 17 Ala yü na lo mbeni bongo ti violet, ala leke mbeni couronne ti kî, ala zia ni na li ti lo. 18 Ala komanse ti bara lo, ala tene: “Bara mo, Gbia ti aJuif!”+ 19 Nga, ala yeke pika li ti lo na keke ti sosongo, ala tuku ngu ti yanga na terê ti lo, ala sara agenou na ala kuku* li ti ala na gbe ti lo. 20 Na nda ni, na peko ti so ala he lo alingbi ala awe, ala zi bongo ni so ayeke violet so na terê ti lo na ngangu, na ala yü na lo abongo ti lo ti ndö ni. Ala sigi na lo ti gue ti pika lo na pointe na ndö ti keke.+ 21 Nga, ala gbu na ngangu mbeni koli so ayeke hon hongo, so lo londo na mbeni kete kodro si lo yeke kiri, ti tene lo yô keke ti pasi* ti Jésus. Iri ti lo ayeke Simon, zo ti kodro ti Cyrène nga babâ ti Alexandre na Rufus.+

22 Ala gue na lo na ndo so a iri ni Golgotha, so ndani aye ti tene “Ndo-ti-bio-ti-li.”+ 23 Na ndo so, ala tara ti mû na lo vin so ala zia myrrhe dä so ayeke sara zo tongana mbangi.+ Me lo ke ti nyon ni. 24 Na pekoni, ala pika lo na pointe na ndö ti keke, ala kangbi yâ ti abongo ti lo ti ndö ni na popo ti ala na peko ti so ala bi mbeni ye ti mû lege na ala ti bâ zo wa si ayeke mû bongo ti so wa.+ 25 A yeke nduru na ngbonga ota,* na ala pika lo na pointe na ndö ti keke. 26 A sû mbeni mbeti ti fa tënë so a bi na li ti lo. Mbeti ni atene: “Gbia ti aJuif.”+ 27 A pika nga na ndö ti keke na terê ti lo azo use so ayeke azo ti gbungo aye ti azo na ngangu, oko na mbage ti maboko ti lo ti koli na oko na mbage ti maboko ti lo ti wali.+ 28 *—— 29 Azo so ayeke hon na lege ayeke sara sioni tënë na lo, ala yeke yengi li ti ala,+ ala yeke tene: “He, mo so mo tene mo yeke kungbi temple na mo yeke leke ni na lango ota so,+ 30 mo sö fini ti mo wani, londo na ndö ti keke ti pasi* so mo descend ma!” 31 Legeoko nga, aprêtre-mokonzi na ascribe ayeke he lo na popo ti ala, ala tene: “Lo sö lani fini ti ambeni zo, me lo lingbi ti sö fini ti lo wani pëpe!+ 32 Zia lo Christ ni, Gbia ti Israël, alondo fadeso na ndö ti keke ti pasi* so lo descend ma, tongaso si e bâ na lê ti e nga e mä na bê na lo!”+ Même ala so ayeke na ndö ti keke na terê ti lo ayeke zonga lo.+

33 Ti si nduru na ngbonga omene,* bingo atï na ndö ti kodro ni kue juska nduru na ngbonga gumbaya.*+ 34 A si nduru na ngbonga gumbaya, Jésus adekongo, atene: “Eli, Eli, lama sabachthani?”, so ndani aye ti tene: “Nzapa ti mbi, Nzapa ti mbi, mo zia mbi ngbanga ti nyen?”+ 35 Me ambeni zo so aluti nduru na ndo ni so amä tënë so, na ala komanse ti tene: “Bâ, lo yeke iri Élie.” 36 Me mbeni zo akpe loro, lo yôro ndokoro na yâ ti kpingo vin, lo zia ni na li ti mbeni keke ti sosongo, lo mû ni na lo ti tene lo nyon,+ lo tene: “Ala zia lo. Zia e bâ wala Élie ayeke ga ti mû lo ti zia lo na sese.” 37 Me Jésus adekongo na kota go, na lo kui;*+ 38 na yâ ti rideau ti temple+ asuru use, a londo na nduzu juska na gbe ni.+ 39 Tongana turugu ti kota kamba so ayeke luti na gbele Jésus abâ lege so Jésus akui na ni, lo tene: “Ti tâ tënë ni, koli so ayeke fade Molenge ti Nzapa.”+

40 Ambeni wali nga ayeke dä so angbâ yongoro si ayeke bâ ye ni. Na popo ti ala, a yeke wara Marie ti Magdala nga na Marie mama ti Jacques Kete na ti Joses. A yeke wara nga Salomé.+ 41 A yeke awali so atambela lani na peko ti lo ti sara kua na lo+ ngbene ye so lo yeke na Galilée. Ambeni wali mingi ayeke nga dä so aga legeoko na lo na Jérusalem.

42 So lakui apusu nduru awe, na a yeke lango ti Lekengo aye, so ti tene lango so aga kozoni na lâ ti Sabbat, 43 Joseph zo ti Arimathée aga. Lo yeke mbeni zo ti Kota da-ngbanga ti aJuif so iri ti lo awu mingi. Lo nga kue lo yeke ku Royaume ti Nzapa. Lo sara mbeto pëpe, lo gue na gbele Pilate na lo hunda ti mû kuâ ti Jésus.+ 44 Me Pilate ahunda terê ti lo wala Jésus akui awe; tongaso, lo iri turugu ti kota kamba ni, lo hunda lo ti hinga wala Jésus akui awe. 45 Na peko ti so turugu ni afa na lo biani so Jésus akui awe, Pilate amû kuâ ni na Joseph. 46 Joseph avo mbeni pendere bongo ti lin, na pekoni lo zi Jésus lo zia na sese, lo kanga lo na pendere bongo ti lin so, lo zia lo na yâ ti mbeni dû ti kuâ+ so a zi ni na yâ ti mbeni kota tênë. Na pekoni, lo pusu mbeni kota tênë lo kanga na yanga ti dû ti kuâ ni.+ 47 Me Marie ti Magdala nga na Marie mama ti Joses angbâ ti bâ ndo so a zia lo dä.+

16 Tongana lâ ti Sabbat+ ahon awe, Marie ti Magdala na Marie+ mama ti Jacques, nga na Salomé avo akugbe so afun pendere ti tene ala gue akpaka ni na terê ti kuâ ti Jésus.+ 2 Na kota ndapre ti kozo lango ti yenga ni, na ngoi so lâ asigi awe, ala ga na yanga ti dû ti kuâ ni.+ 3 Ala yeke tene na popo ti ala: “Zo wa si ayeke pusu ande na e tênë so ayeke na yanga ti dû ti kuâ ni?” 4 Me na ngoi so ala bâ ndo, ala bâ so, atâa so tênë ni akono mingi, a pusu ni a zia nde awe.+ 5 Tongana ala lï na yâ ti dû ti kuâ ni, ala bâ mbeni maseka-koli so ayeke duti na mbage ti maboko ti koli na lo yü mbeni yongoro vuru bongo, na li ti ala akpe kue. 6 Lo tene na ala: “Zia li ti ala akpe pëpe.+ Ala yeke gi Jésus, zo ti Nazareth, lo so a fâ lo na ndö ti keke. Lo yeke ge pëpe, a zingo lo na kuâ awe.+ Ala bâ ndo so a zia lo fade dä la.+ 7 Me ala gue, ala tene na adisciple ti lo nga na Pierre, ala tene: ‘Lo yeke gue kozo ti ala na Galilée.+ Ala yeke bâ ande lo kâ, tongana ti so lo tene na ala kozoni awe.’”+ 8 Tongaso, ala sigi na yâ ti dû ti kuâ ni ala kpe ahon, terê ti ala ayeke dö dongo, nga bê ti ala adö ngangu mingi. Ala sara tënë ni na mbeni zo pëpe ndali ti so mbeto ahon ndö ti ala.*+