KOZO MBETI SO PAUL ATOKUA NA ACORINTHIEN

1 Paul, so a iri lo ti duti bazengele+ ti Christ Jésus na lege ti ye so bê ti Nzapa aye, legeoko na Sosthène, ita ti e, 2 atokua mbeti so na congrégation ti Nzapa so ayeke na Corinthe,+ ala so a zia ala nde tongana azo so asara beoko na Christ Jésus,+ ala so a iri ala ti ga azo ti be-vulu, legeoko na ala kue so na ndo kue ayeke di iri ti Seigneur ti e Jésus Christ,+ Seigneur ti ala na ti e nga.

3 Zia kota nzobe na siriri so alondo na Nzapa Babâ ti e nga so alondo na Seigneur Jésus Christ aduti na ala.

4 Mbi yeke kiri singila lakue na Nzapa ti mbi ndali ti ala ngbanga ti kota nzobe ti Nzapa so a mû na ala na yâ ti Christ Jésus, 5 so na yâ ti aye kue, ala wara aye mingi na lege ti lo, ngangu kue ti fa tënë nga na hingango ye kue,+ 6 gï tongana ti so a sara si gere ti tënë so a fa na ndö ti Christ+ agbu sese ngangu na popo ti ala, 7 tongaso si matabisi oko amanke ala pëpe na ngoi so ala yeke ku kungo lango so Seigneur ti e Jésus Christ ayeke fa terê ti lo na gigi.+ 8 Lo yeke sara nga si ala kpengba juska na nda ni, si ala duti azo so a lingbi ti wara tënë na li ti ala oko pëpe na lâ ti Seigneur ti e Jésus Christ.+ 9 Nzapa ayeke be-ta-zo,+ lo so airi ala ti duti na songo* na Molenge ti lo Jésus Christ, Seigneur ti e.

10 Aita, mbi wa ala na iri ti Seigneur ti e Jésus Christ ti tene tënë ti ala kue amä terê, si kangbi aduti na popo ti ala pëpe,+ me si ala duti biani beoko na yâ ti bibe oko nga na bango ndo oko.+ 11 Aita ti mbi, azo ti da ti Chloé asara tënë ti ala na mbi atene papa ayeke na popo ti ala. 12 Ye so mbi ye ti tene ayeke so: na popo ti ala, mbeni atene: “Mbi yeke zo ti Paul”, mbeni atene: “Mbi, mbi yeke zo ti Apollos,”+ mbeni atene: “Mbi, mbi yeke zo ti Céphas,”* si mbeni atene: “Mbi, mbi yeke zo ti Christ.” 13 Yâ ti Christ akangbi awe? Paul la si a fâ lo na ndö ti keke ndali ti ala? Wala a batize ala na iri ti Paul? 14 Mbi kiri singila na Nzapa so mbi batize ti mbi mbeni zo na popo ti ala pëpe, gï Crispus+ na Gaïus,+ 15 si fade mbeni zo atene pëpe so a batize ala na iri ti mbi. 16 En! Mbi batize nga azo ti da ti Stéphanas.+ Âdu ti atanga ni, mbi hinga pëpe wala mbi batize mbeni zo. 17 Christ atokua mbi ti batize azo pëpe, me ti fa nzoni tënë;+ mbi yeke fa nzoni tënë ni na lege ti ndara ti sarango tënë ti azo pëpe, si keke ti pasi* ti Christ aga ye senge pëpe.

18 Tënë ti keke ti pasi* ayeke ye ti buba na lê ti azo so ayeke gue ti wara futingo,+ me ti e so a ngbâ ti sö e so, tënë ni ayeke ngangu ti Nzapa.+ 19 Ndali ti so Mbeti ti Nzapa atene: “Mbi yeke sara ande si ndara ti awandara afuti, nga mbi yeke pusu yamba hingango ndo ti azo so ahinga ndo.”+ 20 Zo ti ndara ayeke na ndo wa? Zo ti fango Ndia ayeke na ndo wa? Zo ti dengo gaba ti aye ti ngoi ti fadeso* ayeke na ndo wa? Nzapa asara si ndara ti dunia so aga ye ti buba ape? 21 Ndali ti so, na yâ ti ndara ti Nzapa, dunia so na lege ti ndara ti lo+ awara lege ti hinga Nzapa pëpe,+ Nzapa abâ so, ti ala so ayeke mä na bê, a yeke nzoni lo sö ala na lege ti ye ti buba+ so a yeke fa tënë ni so.

22 A-Juif ahunda ti bâ afä+ na aGrec ayeke gi ndara, 23 me e, e yeke fa tënë ti Christ so a fâ lo na ndö ti keke, na lê ti aJuif tënë so ayeke ye so asara si ala pika gere, me na lê ti amara, a yeke ye ti buba.+ 24 Me ti ala so Nzapa airi ala, aJuif nga na aGrec, Christ ayeke ngangu ti Nzapa nga na ndara ti Nzapa.+ 25 Ndali ti so ye ti Nzapa so ayeke ye ti buba so ayeke na ndara mingi ahon azo, nga ye ti Nzapa so ayeke ye so awoko ayeke ngangu mingi ahon azo.+

26 Aita, ala bâ iringo so Nzapa airi na ala: lo iri pëpe azo mingi so ayeke azo ti ndara na lege ti mitele,*+ lo iri pëpe azo mingi so ayeke azo ti ngangu, nga lo iri pëpe azo mingi so a dü ala na yâ ti sewa ti akota zo.+ 27 Me Nzapa asoro aye so ayeke abuba ye ti dunia so si lo zia kamene na lê ti awandara; nga Nzapa asoro aye ti dunia so ayeke awokongo ye si lo zia kamene na lê ti angangu ye ni.+ 28 Nzapa asoro aye so ayeke ye oko pëpe na yâ ti dunia so nga aye so azo abâ tongana mbumbuse ye, aye so ayeke ye pëpe, si lo sara si aye so ayeke ye aga ye oko pëpe,+ 29 ti tene zo* oko apika kate ti lo pëpe na gbele Nzapa. 30 Me a yeke ndali ti lo la si ala yeke beoko na Christ Jésus, lo so aga ndara so alondo na Nzapa ndali ti e, nga mbilimbili ndali ti e+ na ye so asara si e ga nzoni-kue+ nga ye so azi e na lege ti ye so a futa ti zi azo,+ 31 tongaso si ye ni aduti gï tongana ti so Mbeti ti Nzapa atene: “Zo so apika kate ti lo, zia lo pika kate ti lo na ndö ti Jéhovah.”*+

2 Ti mbi, aita, tongana mbi si lani na ala kâ, mbi ga pëpe na angbongboro tënë+ nga na akota ndara ti fa na ala tënë so Nzapa ahonde ndani.+ 2 Ndali ti so mbi leke na bê ti mbi ti hinga mbeni ye nde pëpe, gï Jésus Christ, lo so a fâ lo na ndö ti keke.+ 3 Tongana mbi si lani na ala, mbi yeke na ngangu pëpe, mbeto asara mbi nga terê ti mbi adö mingi. 4 Tënë ti mbi nga na ye so mbi fa ayeke pëpe atënë ti ndara ti woko na bê ti zo, me a yeke atënë so afa na gigi yingo nga na ngangu ti Nzapa,+ 5 si mabe ti ala aluti na ndö ti ndara ti azo pëpe, me na ndö ti ngangu ti Nzapa.

6 E yeke sara tënë ti ndara so na popo ti ala so ayeke abiazo,+ me a yeke ndara ti aye ti ngoi ti fadeso* pëpe, nga a yeke pëpe ndara ti amokonzi ti aye ti ngoi ti fadeso so ala yeke hon ande hongo.+ 7 Me e yeke sara tënë ti ndara ti Nzapa na yâ ti mbeni tënë so lo honde ndani, ndara so a honde ndani,+ so Nzapa aleke tënë ni kozo awe ndali ti gloire ti e kozo na aye ti ngoi ti fadeso. 8 Na popo ti amokonzi ti aye ti ngoi ti fadeso* zo oko awara lege ti hinga ndara so pëpe,+ ndali ti so tongana fade ala hinga ni, ka ala yeke fâ pëpe na ndö ti keke Seigneur so ayeke na gloire. 9 Me a yeke gï tongana ti so Mbeti ti Nzapa atene: “Aye so Nzapa aleke ndali ti ala so andoye lo ayeke aye so lê ti zo abâ ni pëpe, so mê ti zo amä ni pëpe nga so zo abi bê ti lo dä pëpe.”+ 10 Biani, a yeke na e si Nzapa afa aye+ so na lege ti yingo ti lo,+ ndali ti so yingo ayeke gi nda ti aye kue, même aye ti Nzapa so ndani alï mingi.+

11 Zo wa na popo ti azo ahinga aye so ayeke na yâ ti zo? gï yingo ti zo ni so ape? Legeoko nga, zo oko ahinga aye ti Nzapa pëpe, gï yingo ti Nzapa. 12 Ti e, e wara yingo ti dunia so pëpe, me yingo so alondo na Nzapa,+ ti tene e hinga aye so Nzapa amû ni na e na nzoni bê. 13 E yeke sara nga tënë ti aye so na lege ti atënë so yingo afa,+ me pëpe na lege ti atënë so ndara ti zo si afa,+ na ngoi so e mû atënë ti yingo ti fa na nda ti aye ti yingo.

14 Me zo ti mitele ayeda na* aye ti yingo ti Nzapa pëpe, ndali ti so a yeke ye ti buba na lê ti lo, na lo lingbi ti gbu ndani pëpe, ngbanga ti so a yeke na lege ti yingo si a yeke bâ yâ ti aye so nzoni. 15 Me zo ti yingo abâ yâ ti aye kue nzoni,+ zo oko ayeke hinga nda ti lo pëpe. 16 Biani, “zo wa si ahinga bibe ti Jéhovah* si lo fa ye na lo?”+ Me ti e, e yeke na bibe ti Christ.+

3 Tongaso aita, mbi lingbi lani pëpe ti sara tënë na ala tongana azo ti yingo,+ me tongana azo ti mitele, tongana akete molenge+ na yâ ti Christ. 2 Mbi mû lani na ala lait ti nyon, me mbi mû na ala pëpe kpengbango kobe ti tene ala te, ndali ti so ala de ti kpengba lani nzoni pëpe. Même juska fadeso ade ala kpengba nzoni pëpe,+ 3 ndali ti so ala ngbâ azo ti mitele.+ Biani, tongana kota bê na papa ayeke na popo ti ala, ala yeke azo ti mitele la ape?+ nga ala yeke tambela tongana ti azo ti dunia so la ape? 4 Tongana mbeni zo atene: “Mbi yeke zo ti Paul,” na mbeni nde atene: “Mbi yeke zo ti Apollos,”+ ala yeke sara ye tongana asenge zo la ape?

5 Tongaso, Apollos ayeke zo wa? Paul ayeke zo wa? Ala yeke awakua+ so na lege ti ala, ala ga azo so amä na bê, a lingbi na kusala so Seigneur amû na zo oko oko. 6 Mbi lu ye lani,+ Apollos atuku ngu dä,+ me Nzapa asara si angbâ ti kono. 7 Ni la, zo so alu ye ni ayeke ye oko pëpe, nga zo so atuku ngu dä ayeke ye oko pëpe, me kota ye ni ayeke Nzapa so asara si ye ni akono.+ 8 Lo so alu ye nga lo so atuku ngu dä, ala kue ayeke oko,* me zo oko oko ayeke wara ande futa ti lo alingbi na kua ti lo wani.+ 9 Ndali ti so e na Nzapa e sara kua oko. Ala yeke yaka ti Nzapa so a ngbâ ti dë ni, ala yeke mbeni da so Nzapa si aleke.+

10 A lingbi na kota nzobe ti Nzapa so mbi wara, mbi zia gere ti da ni+ tongana mbeni kota wakode ti sarango da,* me mbeni zo nde la si aleke da na ndö ni. Me zia zo oko oko angbâ ti sara hange na lege so lo yeke leke da na ndö ti gere ni so. 11 Ndali ti so mbeni zo alingbi ti zia mbeni gere ti da nde pëpe, gï gere ni so a zia ni awe so, so ti tene Jésus Christ.+ 12 Me tongana mbeni zo amû lor, argent, atênë ti ngangu ngere, akeke na amara ti apere nde nde si lo leke na da na ndö ti gere ti da ni so, 13 kua ti zo oko oko ayeke sigi ande polele, ngbanga ti so lango ni la ayeke fa ande kua ni na gigi, ndali ti so a yeke wâ si ayeke fa kua ni polele;+ na wâ ni ayeke tara kua ti zo oko oko ti bâ wala ayeke tongana nyen. 14 Tongana kua ti mbeni zo so lo leke na ndö ti gere ti da ni angbâ, zo ni ayeke wara ande futa. 15 Me tongana wâ agbi kua ti mbeni zo, zo ni ayeke girisa ande kua ti lo so, me ti lo a yeke sö lo; na tongana a yeke tongaso, a yeke duti mo bâ mo tene lo sigi na yâ ti wâ.

16 Ala hinga pëpe so ala wani ala yeke temple ti Nzapa,+ na so yingo ti Nzapa aduti na yâ ti ala?+ 17 Tongana mbeni zo afuti temple ti Nzapa, Nzapa ayeke futi lo ande. Ndali ti so temple ti Nzapa ayeke nzoni-kue, na ala la ayeke temple ni so.+

18 Zia mbeni zo ahanda terê ti lo pëpe: Tongana mbeni zo na popo ti ala abâ ti lo atene lo yeke zo ti ndara na yâ ti aye ti ngoi ti fadeso,* zia lo ga zo ti buba, tongaso si lo ga zo ti ndara. 19 Ndara ti dunia so ayeke ye ti buba na lê ti Nzapa, ndali ti so Mbeti ti Nzapa atene: “Lo gbu azo ti ndara na lege ti mayele ti ala wani.”+ 20 Mbeti ti Nzapa akiri atene: “Jéhovah* ahinga so atënë ti bê ti azo ti ndara ayeke senge ye.”+ 21 Tongaso zia zo oko apika kate ti lo pëpe na ndö ti azo, ndali ti so aye kue ayeke ti ala, 22 atâa Paul, wala Apollos, wala Céphas,*+ wala dunia so, wala fini, wala kuâ, wala aye so ayeke dä fadeso wala aye so ayeke ga, aye kue ayeke ti ala. 23 Âdu ti ala, ala yeke ti Christ,+ na âdu ti Christ, lo yeke ti Nzapa.

4 Zia zo abâ e tongana azo ti kua ti Christ* nga awabatango ye so ayeke bata atënë ti Nzapa so lo honde ndani.+ 2 Tongaso, ye so a yeke gi na mbage ti awabatango ye ayeke ti tene ala duti be-ta-zo. 3 Ti mbi, a yeke gï mbeni senge ye tongana ala wala mbeni da-ngbanga ti azo si abâ tënë ti mbi. Même mbi kue mbi bâ tënë ti mbi wani pëpe. 4 Mbi hinga ti mbi mbeni ye ti sioni so mbi sara pëpe. Me mbi ye ti tene pëpe so mbi yeke mbilimbili, me a yeke Jéhovah* si ayeke bâ tënë ti mbi.+ 5 Tongaso, ala fâ ngbanga na ndö ti mbeni ye pëpe+ kozo si ngoi ni alingbi, juska Seigneur aga, lo so ayeke mû ande aye so a sara na hondengo ni na yâ ti bingo ti sigi na ni na lumière, nga lo so ayeke fa na gigi aye so azo aleke na bê ti ala ti sara. Na pekoni, zo oko oko ayeke wara ande gonda ti lo so ayeke londo na Nzapa.+

6 Aita, mbi sara tënë ti aye so na mungo tapande ni na ndö ti mbi nga na Apollos+ ndali ti nzoni ti ala, si na lege ti tapande ti e, ala lingbi ti hinga ye so: “Ala sara ye ahon ti so a sû na mbeti pëpe,” tongaso si zo oko oko asara baba pëpe+ na bango mbeni zo kota ahon mbeni. 7 Zo wa la si asara si mo yeke nde na mba ti mo? Biani, nyen la mo yeke na ni so a mû na mo mungo ape?+ Tongana a mû ni na mo mungo, ngbanga ti nyen mo yeke pika kate ti mo mo bâ mo tene a mû ni na mo mungo ape so?

8 Ala wara ti ala ye ni alingbi ala awe? Ala ga azo ti mosoro awe? Ala komanse ti komande tongana agbia+ sân e awe? Biani, mbi ye si ala komanse ti komande tongana agbia si e nga kue e komande legeoko na ala tongana agbia.+ 9 Ti mbi, ye ni ayeke mo bâ mo tene Nzapa afa e abazengele na gigi na ndangba ni tongana azo so a fâ ngbanga ti kuâ na li ti ala awe,+ ndali ti so e ga mbeni ngia ti théâtre so dunia so,+ a-ange nga na azo ayeke bâ ni. 10 E ga azo ti buba+ ndali ti Christ, me ala, ala yeke sara ye na ndara na yâ ti Christ. E woko, me ala kpengba ti ala. Azo agonda ala, me azo abâ e tongana ambumbuse zo. 11 Juska na ngoi so, nzara ti kobe+ na nzara ti ngu angbâ ti sara e,+ e yeke yü bongo nzoni pëpe,* a yeke pika e,*+ e yeke na ndo ti lango pëpe 12 na e yeke sara ngangu kua na maboko ti e wani.+ Na ngoi so azo ayeke zonga e, e yeke iri tufa na ndö ti ala;+ na ngoi so azo ayeke sara ye ti ngangu na e, e yeke kanga bê e gbu ngangu;+ 13 na ngoi so azo ayeke buba iri ti e, e yeke voro yanga na ala;+ e ga tongana azende ti dunia so nga saka ti aye kue, juska fadeso.

14 Mbi sû aye so na mbeti na ala ti zia kamene na lê ti ala pëpe, me ti gboto mê ti ala tongana amolenge ti mbi so mbi ndoye ala mingi. 15 Biani, atâa so na yâ ti Christ ala lingbi ti duti na azo 10 000 so ayeke azo ti batango ala, so kue ala yeke na ababâ mingi pëpe la. Ndali ti so na yâ ti Christ Jésus, na lege ti nzoni tënë mbi ga babâ ti ala.+ 16 Mbi voro yanga na ala mingi: Ala ga azo so asara ye tongana mbi.+ 17 Ndani la, mbi yeke tokua Timothée na ala, ndali ti so lo yeke molenge ti mbi so mbi ndoye lo mingi nga so lo yeke be-ta-zo na yâ ti Seigneur. Lo yeke kiri ande ti dabe ti ala na akode ti mbi na ndö ti tënë ti Christ Jésus,+ a-oko kode so mbi yeke fa na ye na ndo kue na yâ ti acongrégation oko oko kue.

18 Baba ti ambeni ahon ndö ni mo bâ mo tene mbi yeke si na ala kâ pëpe. 19 Me tongana Jéhovah* aye, na yâ ti kete ngoi mbi yeke si na ala kâ, mbi yeke zia ande bê ti mbi pëpe na tënë ti yanga ti azo so baba ti ala ahon ndö ni so, me mbi yeke bâ ngangu ti ala ni. 20 Ndali ti so Royaume ti Nzapa ayeke tënë ti yanga pëpe, me a yeke tënë ti ngangu. 21 Ala ye nyen? Ala ye mbi mû keke si mbi gue na ni na terê ti ala kâ?+ Wala ala ye si mbi si na ala kâ na ndoye nga na bibe ti sarango ye na ngangu pëpe?

5 Biani, a tene so lango-sioni*+ ayeke na popo ti ala, mbeni lango-sioni* so mara ni ayeke même na popo ti azo ti amara pëpe: mbeni koli ayeke duti na wali ti babâ ti lo.+ 2 Na ala yeke pika kate ndali ni? A lingbi fade ala sara vundu+ ndali ti ye so koli so asara so na ala zi lo na popo ti ala ape?+ 3 Ti mbi, atâa so mbi yeke na terê ti ala kâ pëpe, na lege ti yingo mbi yeke na terê ti ala, na mbi fâ ti mbi ngbanga na ndö ti koli so asara mara ti ye so awe, mo bâ mo tene mbi yeke biani na terê ti ala kâ, 4 si, tongana ala bungbi terê ti ala na iri ti Seigneur ti e Jésus, na ala hinga so mbi yeke na terê ti ala na lege ti yingo na yâ ti ngangu ti Seigneur ti e Jésus, 5 ala zia mara ti zo tongaso na maboko ti Satan+ ti tene a futi mitele, tongaso si a bata bibe ti congrégation* ni na lâ ti Seigneur.+

6 Pikango kate ti ala ni ayeke nzoni pëpe. Ala hinga pëpe so kete levure asara si mengo farine ni kue asuku?+ 7 Ala zi ngbene levure ni tongaso si ala duti mbeni fini mengo farine, legeoko tongana ti so ala yeke na levure na terê ti ala pëpe. Biani, a mû Christ, kete taba ti Pâque ti e,+ a fâ lo awe.+ 8 Ndani la, zia e ngbâ ti sara matanga ni+ na ngbene levure pëpe, wala na levure ti sioni nga na ti siokpari pëpe, me na mapa so a sara na levure pëpe, mapa ti vuru bê na ti tâ tënë.

9 Na yâ ti mbeti ti mbi, mbi tene na ala ti zia ti sara songo na azo ti sarango lango-sioni.* 10 Mbi tene pëpe ti ke biani biani ti sara songo na azo ti sarango lango-sioni* ti dunia so,+ wala azo ti sarango bê ti ye, azo ti mungo ye ti zo na likisi wala azo ti vorongo ayanda. Tongana tënë ti mbi ni ayeke tongaso, andâ a lingbi ala sigi na yâ ti dunia so biani.+ 11 Me ti fadeso, mbi yeke sara mbeti na ala ti tene ala zia ti sara songo+ na mbeni zo so a iri lo ita na so lo yeke zo ti sarango lango-sioni,* wala zo ti sarango bê ti ye,+ wala zo ti vorongo ayanda, wala zo ti zongango ndo,* wala ngbâa ti sämba,+ wala zo ti mungo ye ti zo na likisi,+ na même ti tene ala te kobe na mara ti zo tongaso pëpe. 12 Ti mbi dä nyen ti fâ ngbanga ti azo ti gigi? A yeke ti ala ti fâ ngbanga ti azo so ayeke na yâ ni ape? 13 na ti azo ti gigi, Nzapa la si ayeke fâ ngbanga ti ala ape?+ “Ala zi zo ti sioni so na popo ti ala.”+

6 Tongana mbeni zo na popo ti ala ayeke na tënë na mba ti lo,+ a sara tongana nyen si lo yeke gue tâ na ni na gbe ti azo so ayeke mbilimbili pëpe, ahon ti gue na ni na gbe ti azo ti be-vulu? 2 Wala ala hinga pëpe so a yeke azo ti be-vulu la si ayeke fâ ande ngbanga ti dunia so?+ Tongana a yeke ala la si ayeke fâ ande ngbanga ti dunia ni, ala lingbi pëpe ti fâ ngbanga ti asenge senge tënë? 3 Ala hinga pëpe so e yeke fâ ande ngbanga ti a-ange?+ Tongaso, ngbanga ti nyen si e lingbi nga ti fâ ngbanga ti atënë ti gigi so ape? 4 Tongana ala yeke na atënë ti gigi so ti tene a fâ ngbanga na ndö ni,+ a yeke azo so congrégation abâ ala na nene ni pëpe so si ala yeke mû ala tongana ajuge? 5 Mbi yeke sara tënë so ti zia kamene na lê ti ala. Biani, mbeni zo ti ndara oko tongaso ayeke na popo ti ala pëpe so alingbi ti fâ ngbanga ti mbeni tënë na popo ti aita ti lo? 6 Me ita na ita ayeke gue na tënë ti ala na gbele ngbanga; na ala gue na gbele azo so amä na bê ape!

7 Ti tâ tënë ni, so ala yeke gue na mba na gbele ngbanga afa so ala tï biani awe. Ngbanga ti nyen ala zia pëpe si a sara sioni na ala?+ Ngbanga ti nyen ala zia pëpe si a mû ye ti ala? 8 Me ala la si ayeke sara sioni na azo nga ayeke mû ye ti azo, na azo ni so ayeke aita ti ala.

9 Ala hinga ape? azo ti mbilimbili pëpe, Royaume ti Nzapa+ ayeke ga ande ti ala pëpe. Ala handa terê ti ala pëpe: atâa azo ti sarango lango-sioni,*+ wala azo ti vorongo ayanda,+ wala azo ti gingo wali wala koli nde,+ wala akoli so azia terê ti ala na amba ti ala koli,+ wala akoli so alango na amba ti ala koli,+ 10 wala azo ti nzi, wala azo ti sarango bê ti ye,+ wala angbâa ti sämba,+ wala azo ti zongango ndo,* wala azo ti mungo ye ti zo na likisi, Royaume ti Nzapa ayeke ga ti ala pëpe.+ 11 Ye oko, ambeni na popo ti ala ayeke ândö tongaso. Me a sukula ala si ala ga nzoni,+ a sara si ala ga nzoni-kue,+ a diko ala tongana azo ti mbilimbili+ na iri ti Seigneur Jésus Christ nga na lege ti yingo ti Nzapa ti e.

12 A mû lege na mbi ti sara ye kue, me a yeke ye kue la si ayeke ga na mbi ye ti nzoni pëpe.+ A mû lege na mbi ti sara ye kue, me mbi yeke zia ande terê ti mbi na gbe ti komandema ti mbeni ye pëpe. 13 Kobe ayeke ngbanga ti yâ, na yâ ayeke ngbanga ti kobe. Me Nzapa ayeke sara ande si yâ nga na kobe aga senge ye.+ Terê ti zo ayeke ndali ti lango-sioni* pëpe, me a yeke ndali ti Seigneur,+ na Seigneur ayeke ndali ti terê ti zo. 14 Me Nzapa, na lege ti ngangu ti lo,+ azingo lani Seigneur+ na kuâ+ na lo yeke zingo ande e na kuâ nga.

15 Ala hinga pëpe so terê ti ala ayeke amembre ti terê ti Christ?+ Tongaso, mbi yeke zi ande amembre ti terê ti Christ ti sara si aga amembre ti terê ti mbeni wali-ndumba? Oko pëpe! 16 Ala hinga pëpe so zo so abungbi oko na mbeni wali-ndumba ayeke terê oko na lo? Ndali ti so Nzapa atene: “Ala use kue ayeke ga terê oko.”+ 17 Me zo kue so abungbi oko na Seigneur ayeke yingo oko na lo.+ 18 Ala kpe yongoro na lango-sioni.*+ Siokpari kue so mbeni zo asara ni ayeke na gigi ti terê ti lo, me zo kue so angbâ na yâ ti lango-sioni lo yeke sara siokpari na terê ti lo wani.+ 19 Ala hinga pëpe so terê ti ala ayeke temple+ ti yingo vulu so alondo na Nzapa+ na so ayeke na yâ ti ala? Nga, ala yeke ti ala wani pëpe,+ 20 ndali ti so a vo ala na mbeni ngere awe.+ Tongaso, ala mû gloire na Nzapa+ na yâ ti terê ti ala.+

7 Fadeso, ti aye so ala sû mbeti na mbi na ndö ni so, a yeke duti nzoni mingi ti tene mbeni koli andu* wali pëpe. 2 Me so lango-sioni* ahon ndö ni so, zia koli oko oko ayeke na wali ti lo wani,+ na zia wali oko oko ayeke na koli ti lo wani.+ 3 Zia koli amû ye ti wali ti lo na lo, na zia wali nga asara tongaso na koli ti lo.+ 4 Wali ayeke na komandema na ndö ti terê ti lo wani pëpe, me a yeke koli ti lo la si ayeke na komandema na ndö ni. Nga, koli ayeke na komandema na ndö ti terê ti lo wani pëpe, me a yeke wali ti lo la si ayeke na komandema na ndö ni. 5 Ala gbanzi terê ti ala na popo ti ala pëpe, ala gbanzi terê ti ala gï tongana ala use kue amä terê ti sara tongaso ndali ti mbeni ngoi, ti tene ala mû ngoi ndali ti sambela na ala kiri ala bungbi, tongaso si Satan angbâ ti tara ala pëpe ndali ti so ala kanga nzara ti terê ti ala pëpe. 6 Ye oko, mbi tene tongaso ti mû lege na ala ti sara ni, me ayeke commandement pëpe. 7 Mbi ye si azo kue aduti tongana mbi. Ye oko, zo oko oko ayeke na matabisi ti lo+ so Nzapa amû na lo, ti mbeni a yeke tongaso, ti mbeni nga a yeke nde.

8 Fadeso mbi tene na ala so ade ti sara mariage pëpe nga na awali-mua, so a yeke nzoni mingi ti tene ala ngbâ tongana mbi.+ 9 Me tongana ala lingbi ti hon ndö ti nzara ti bê ti ala pëpe, zia ala sara mariage, ndali ti so a yeke nzoni mingi ti sara mariage ahon ti tene nzara ti terê ti ala ahon ndö ti ala.*+

10 Mbi mû wango so na ala so asara mariage awe, na wango ni alondo na mbi pëpe, me na Seigneur: a yeke nzoni mbeni wali akangbi na koli ti lo pëpe.+ 11 Me tongana a si so lo kangbi na koli ti lo, zia lo mû mbeni koli pëpe wala zia lo kiri lo leke songo na koli ti lo. Nga, a yeke nzoni mbeni koli azia wali ti lo pëpe.+

12 Mbi tene tënë so na atanga ni, tënë ni alondo na Seigneur pëpe,+ me na mbi: Tongana mbeni ita ayeke na mbeni wali so amä na bê pëpe, si wali ni aye ti ngbâ na lo, a yeke nzoni lo zia wali ni pëpe. 13 Nga, tongana mbeni wali ayeke na koli so amä na bê pëpe, na koli ni aye ti ngbâ na lo, a yeke nzoni lo zia koli ti lo ni pëpe. 14 Mbeni koli so amä na bê pëpe ayeke ga nzoni-kue ndali ti wali ti lo, na mbeni wali so amä na bê pëpe ayeke ga nzoni-kue ndali ti koli ti lo; tongana a yeke tongaso pëpe ka amolenge ti ala ayeke duti sioni, me fadeso amolenge ni ayeke nzoni-kue. 15 Me tongana koli wala wali so amä na bê pëpe aye ti londo, zia lo londo. Na yâ ti mara ti ye tongaso, mbeni ye ti kanga ita-koli ni wala ita-wali ni na lo ayeke dä pëpe, me ti ala Nzapa airi ala ti duti na siriri.+ 16 Mo wali, mo hinga tongana nyen so mo yeke sö ande koli ti mo ape?+ Wala mo koli, mo hinga tongana nyen so mo yeke sö ande wali ti mo ape?

17 Ye oko, tâ gï tongana ti so Jéhovah* amû mbeni mbage ti ye na zo oko oko, zia zo kue atambela tongana ti so Nzapa airi na lo.+ A yeke yanga so mbi mû na acongrégation kue la. 18 Mbeni zo afâ ganza awe si a iri lo?+ Zia lo ngbâ gï tongaso. Mbeni zo ade ti fâ ganza pëpe si a iri lo? Zia lo ga pëpe zo so afâ ganza.+ 19 Fango ganza ayeke mbeni ye pëpe, na fango ganza pëpe ayeke nga mbeni ye pëpe,+ kota ye ni ayeke batango acommandement ti Nzapa.+ 20 Atâa mbeni zo ayeke na yâ ti dutingo wa la si a iri na lo, zia lo ngbâ gï tongaso.+ 21 A iri mo na ngoi so mo yeke lani ngbâa? Zia mo gi bê ti mo dä pëpe.+ Me tongana mo lingbi ti sigi na gbe ni, mo sigi biani. 22 Biani, na yâ ti Seigneur, zo kue so a iri lo na ngoi so lo yeke lani ngbâa, lo yeke zo so Seigneur azi lo awe.+ Legeoko nga, zo so a iri lo na ngoi so lani lo yeke ngbâa pëpe, lo yeke ngbâa ti Christ. 23 A vo ala lani vongo na mbeni ngere.+ Tongaso ala zia ti ga ngbâa ti azo. 24 Aita, atâa mbeni zo ayeke na yâ ti dutingo wa la si a iri na lo, zia lo ngbâ gï tongaso na gbele ti Nzapa.

25 Ti ala so ade ti hinga wali wala koli pëpe,* mbi yeke na mbeni ndia ti Seigneur ti fa na ala pëpe, me mbi fa na ala bango ndo ti mbi+ tongana mbeni zo so Seigneur asara nzoni bê na lo si lo duti be-ta-zo. 26 Ni la, ndali ti akpale so, mbi bâ ti mbi so a yeke nzoni na mbeni koli ti ngbâ gï tongana ti so lo yeke duti na ni so. 27 A kanga mo na terê ti mbeni wali? Mo zia ti gi ti zi terê ti mo.+ A zi mo na terê ti mbeni wali awe? Mo zia ti gi ti wara mbeni wali. 28 Me tongana mo sara mariage biani, mo sara siokpari pëpe. Nga, tongana mbeni zo so ade ti hinga wali wala koli pëpe asara mariage, lo nga kue lo sara siokpari pëpe. Me ala so asara mariage ayeke wara aye ti vundu na yâ ti mitele ti ala. Me mbi ye ti zi ala na yâ ni.

29 Nga, mbi tene tënë so na ala, aita: Ngoi so angbâ ayeke mingi pëpe.+ Ni la, zia ala so ayeke na wali aduti mo bâ mo tene ala yeke na wali pëpe, 30 nga ala so atoto aduti tongana ala so atoto pëpe, ala so ayeke na ngia aduti tongana ala so ayeke na ngia pëpe, ala so avo ye aduti tongana ala so ayeke na ye pëpe, 31 ala so ayeke sara kua na ye ti dunia so aduti tongana ala so ayeke sara kua na ni kue pëpe; ndali ti so aye so ayeke si na yâ ti dunia so ayeke changé changengo. 32 Biani, mbi ye si ala duti na gingo bê oko pëpe. Koli so ade ti sara mariage pëpe ayeke gi bê ti lo na ndö ti aye ti Seigneur, ti bâ tongana nyen lo lingbi ti nzere na lê ti Seigneur. 33 Me koli so asara mariage awe ayeke gi bê ti lo na ndö ti aye ti dunia so,+ ti bâ tongana nyen lo lingbi ti nzere na lê ti wali ti lo, 34 na bê ti lo ayeke na ndö ti aye use. Na ndö ni, wali so asara mariage pëpe, nga wali so ade ti hinga koli pëpe, ayeke gi bê ti lo na ndö ti aye ti Seigneur,+ si lo duti nzoni-kue na yâ ti terê ti lo nga na yâ ti li ti lo. Me, wali so asara mariage awe ayeke gi bê ti lo na ndö ti aye ti dunia so, ti bâ tongana nyen lo lingbi ti nzere na lê ti koli ti lo. 35 Mbi yeke sara tënë so ndali ti nzoni ti ala wani, mbi ye ti bi kamba na go ti ala la pëpe, me mbi ye ti gue na ala na mbage ti ye so ayeke na lege ni nga ti mû bê ti ala kue lakue na kua ti Seigneur, na ziango si mbeni ye agboto lê ti ala pëpe.

36 Me tongana mbeni zo abâ ti lo so lo yeke bata terê ti lo nzoni pëpe na ngbango zo so asara mariage pëpe, nga tongana lo kpengba koli wala wali awe, zia ye ni aduti tongaso: zia lo sara ye so lo ye, lo sara siokpari pëpe. Zia ala sara mariage.+ 37 Me tongana mbeni zo aleke na bê ti lo ti ngbâ ti duti zo so asara mariage pëpe,* na mbeni ye agbu lo na ngangu pëpe, me lo yeke na komandema na ndö ti ye so lo ye ti sara nga lo mû desizion so na bê ti lo wani, lo yeke sara ande nzoni.+ 38 Tongaso, zo kue so asara mariage, lo sara nzoni, me zo kue so asara mariage pëpe, lo yeke sara ande nzoni mingi.+

39 A kanga mbeni wali na terê ti koli ti lo na ngoi kue so koli ti lo ayeke na fini.+ Me tongana a si so koli ti lo akui,* lo lingbi ti sara mariage na koli so bê ti lo aye, me gï na yâ ti Seigneur.+ 40 Me na bango ndo ti mbi, lo yeke duti na ngia mingi tongana lo ngbâ tongaso. Mbi hinga biani so mbi nga mbi yeke na yingo ti Nzapa.

8 Fadeso, a yeke tënë ti kobe so a mû na ayanda:+ E kue e hinga tënë ti ye so awe.+ Hingango ye asara si baba ahon ndö ti zo, me ndoye akpengba zo.+ 2 Tongana mbeni zo abâ ti lo atene ni hinga ye na ndö ti mbeni ye awe, ade lo hinga ye ni so pëpe tongana ti so a lingbi lo hinga ni. 3 Me tongana mbeni zo andoye Nzapa, Nzapa ahinga zo ni so.

4 Na ndö ti tënë ti tengo kobe so a mû na ayanda, e hinga so yanda ayeke ye oko pëpe+ na yâ ti dunia so, na e hinga so mbeni Nzapa nde ayeke dä pëpe, gï Nzapa oko.+ 5 Atâa so na yayu wala na sese+ aye ayeke dä so a iri ni atene “anzapa”, gï tongana ti so “anzapa” ayeke mingi na “aseigneur” ayeke nga mingi, 6 ti e, Nzapa ayeke biani gï oko,+ Babâ ni,+ lo so aye kue alondo na lo na e yeke na fini ndali ti lo.+ Nga, Seigneur ayeke gï oko, Jésus Christ, lo so aye kue abâ gigi na lege ti lo,+ nga e yeke na fini na lege ti lo.

7 Ye oko, azo kue la ahinga ye so pëpe.+ Me ambeni zo, ndali ti so ândö ala yeke na songo na ayanda, ala yeke te kobe so ala bâ ti ala atene a mû ni na sandaga na ayanda+ awe na conscience ti ala so awoko so aga sioni.+ 8 Me kobe la si ayeke sara si e ga nzoni na lê ti Nzapa pëpe.+ Tongana e te ye pëpe, e yeke bâ sioni dä pëpe, nga tongana e te ye, e yeke bâ nzoni dä pëpe.+ 9 Me ala sara hange si, na mbeni lege, droit ti ala ni so aga pëpe mbeni ye ti pikango gere ndali ti azo so awoko.+ 10 Biani, tongana a si so mbeni zo abâ mo, mo so mo hinga ye na ndö ti tënë so, mo yeke te kobe na yâ ti mbeni temple ti ayanda, conscience ti zo so awoko so ayeke gue na lo juska ti te kobe so a mû na ayanda ape? 11 Ni la, ndali ti hingango ye ti mo, zo so awoko awe so ayeke buba, ita ti mo so Christ akui ndali ti lo.+ 12 Me na ngoi so ala sara siokpari tongaso na terê ti aita ti ala nga ala sara si conscience ti aita ni so awoko awe so afâ ngbanga na ndö ti ala wani,+ ala yeke sara siokpari na terê ti Christ. 13 Ndani la, tongana mbeni kobe asara si ita ti mbi apika gere ti lo, mbi yeke kiri ti te nyama mbeni pëpe si mbi sara pëpe si ita ti mbi apika gere ti lo.+

9 Mbi yeke zo so a zi lo awe ape? Mbi yeke bazengele ape? Mbi bâ Jésus Seigneur ti e ape?+ Ala yeke kusala ti mbi na yâ ti Seigneur ape? 2 Tongana mbi yeke bazengele ndali ti ambeni zo pëpe, mbi yeke biani bazengele ndali ti ala, ngbanga ti so ala yeke nzoroko so afa kusala ti mbi ti bazengele na yâ ti Seigneur.

3 Tënë so mbi tene ti gbu koko ti mbi na gbele ala so abâ tënë ti mbi ayeke so: 4 E yeke na droit* ti te ye na ti nyon ye, ni la ape? 5 E yeke na droit ti sara mariage na mbeni ita-wali+ si lo tambela na terê ti e ape? tongana ti so tanga ti abazengele, aita ti Seigneur+ nga na Céphas*+ asara. 6 Wala a yeke gï mbi na Barnabas+ la si e yeke na droit ti ngbâ lakue ti sara mbeni kua ti wara na kobe ti yanga ti e? 7 Zo wa la si ayeke sara kua ti turugu na lo wani la lo futa terê ti lo? Zo wa la si alu yaka ti vigne na lo te lengo ni ape?+ Wala zo wa la si ayeke bata anyama na lo nyon mbeni lait ni ape?

8 Mbi yeke sara tënë ti aye so na lege ti bango ndo ti azo? Wala Ndia nga asara tënë ti aye so ape? 9 Ndali ti so a sû na yâ ti ndia ti Moïse, a tene: “A yeke nzoni mo kanga yanga ti bagara pëpe na ngoi so lo yeke sara kua na ndo so a yeke pika alê ti kobe dä.”+ A yeke tënë ti abagara la agbu bê ti Nzapa? 10 Wala a yeke gï ndali ti e la si lo sara tënë so? Biani, a sû tënë so ndali ti e ngbanga ti so zo so ayeke fâ yaka, a lingbi lo fâ yaka ni na beku, nga zo so ayeke pika alê ti kobe, a lingbi lo pika ni na beku ti wara ti lo mbage ni.

11 Tongana e lu aye ti yingo na yâ ti ala, si e ko aye ti mitele na mbage ti ala andâ e hunda ye mingi la?+ 12 Tongana ambeni zo ayeke nga na droit* so na ndö ti ala, e yeke ti e na ni ahon so ape? Ye oko, e sara kusala na droit so pëpe,+ me e ngbâ ti kanga bê ti e na gbele aye kue, si e sara pëpe mbeni ye so akanga lege na nzoni tënë na ndö ti Christ.+ 13 Ala hinga pëpe so akoli so ayeke sara kusala ti Nzapa ayeke te aye ti temple? Nga ala hinga pëpe so azo so ayeke sara kua lakue na gbele gbalaka ayeke wara ti ala mbeni mbage ti ye ti gbalaka ni?+ 14 A yeke nga tongaso si Seigneur amû yanga ti tene ala so ayeke fa nzoni tënë awara ye ti ala na lege ti nzoni tënë ni.+

15 Me mbi sara kusala pëpe na mbeni oko ti aye so.+ Biani, mbi sû mbeti na ndö ti aye so ti tene a sara tongaso na mbi pëpe, ndali ti so ahon tënë mbi kui ahon ti tene—zo oko ayeke sara ande pëpe si nda ti tënë so mbi yeke na ni ti pika kate ti mbi alï ngu!+ 16 Tongaso, tongana mbi yeke fa nzoni tënë, a yeke mbeni ye ti pika kate ti mbi dä la pëpe, ndali ti so a yeke ye so a hunda na mbi ti sara ni la. Biani, mawa na mbi tongana mbi fa nzoni tënë ape!+ 17 Tongana mbi sara ye so na bê ti mbi wani, mbi yeke wara mbeni futa. Me même tongana mbi sara ni na bê use, kamême a zia mbeni ye na maboko ti mbi ti bata ni.+ 18 Tongaso, futa ti mbi ni ayeke nyen? A yeke so tongana mbi yeke fa nzoni tënë, mbi lingbi ti sara si azo awara nzoni tënë senge senge, si tongana a ndu nzoni tënë ni, mbi sara ye na komandema* ti mbi ahon ndö ni pëpe.

19 Biani, atâa so mbi yeke ngbâa ti zo oko pëpe, mbi sara terê ti mbi ngbâa ti azo kue, si mbi wara mingi ti azo. 20 Na popo ti aJuif, mbi ga tongana mbeni Juif si mbi wara aJuif.+ Na popo ti azo so ayeke na gbe ti ndia, mbi ga tongana zo so ayeke na gbe ti ndia, atâa so mbi wani mbi yeke na gbe ti ndia pëpe, si mbi wara ala so ayeke na gbe ti ndia.+ 21 Na popo ti ala so ayeke na ndia pëpe, mbi ga tongana zo so ayeke na ndia pëpe, atâa so na gbele Nzapa mbi yeke zo so ayeke na ndia, nga na gbele Christ mbi yeke na gbe ti ndia,+ si mbi wara ala so ayeke na ndia pëpe. 22 Na popo ti ala so awoko, mbi ga tongana zo so awoko,+ si mbi wara azo so awoko. Mbi ga ye kue ndali ti mara ti azo nde nde kue, si na yâ ti ye kue mbi sö fini ti ambeni. 23 Me mbi sara ye kue ndali ti nzoni tënë si mbi wara mbage ti mbi dä legeoko na ambeni zo.+

24 Ala hinga pëpe so na yâ ti mbeni mandako ti kpengo loro, azo ti kpengo loro ni kue ayeke kpe loro, me gï zo oko la si ayeke wara futa ni? Tongaso, ala kpe loro ni ti tene ala wara ni.+ 25 Zo kue so ayeke sara mbeni mandako ayeke kanga nzara ti bê ti lo na yâ ti aye kue. Tâ tënë, ala yeke sara tongaso ti wara mbeni couronne so alingbi ti buba,+ me e, e sara tongaso ti wara mbeni couronne so alingbi ti buba pëpe.+ 26 Ni la, mbi yeke kpe loro senge senge pëpe.+ Lege so mbi yeke fi gobo ayeke ti pika yâ ti pupu pëpe. 27 Me mbi pika* terê ti mbi+ na mbi sara lo tongana ngbâa, ndali ti so mbi sara mbeto ti tene tongana mbi fa tënë na azo awe, na nda ni mbi ga zo so a yeda na lo pëpe.

10 Aita, mbi ye si ala hinga so akotara ti e kue ayeke lani na gbe ti mbinda+ na ala kue ahon na yâ ti ngu-ingo,+ 2 na a batize ala kue na yâ ti Moïse na lege ti mbinda ni nga na lege ti ngu-ingo ni. 3 Ala kue ate lani oko kobe so Nzapa amû,+ 4 na ala kue anyon oko ngu so Nzapa amû.+ Ndali ti so ala yeke nyon lani ngu so asigi na kota tênë so Nzapa amû so amû peko ti ala, na kota tênë so aduti tongana tapande ti Christ.+ 5 Me, mingi ti ala anzere na lê ti Nzapa pëpe, ndali ti so ala kui na yâ ti benyama.+

6 Tongaso, aye so aga atapande ndali ti e si e duti pëpe azo so asara nzara ti aye ti sioni tongana ti so lani azo so asara nzara ni.+ 7 Nga, ala ga pëpe azo ti vorongo ayanda, tongana ti so lani ambeni asara, gï tongana ti so Mbeti ti Nzapa atene: “Azo ni aduti ti te na ti nyon. Na pekoni, ala londo ti sara ngia.”+ 8 Nga, zia e ngbâ na yâ ti lango-sioni* pëpe tongana ti so lani ambeni na popo ti ala asara lango-sioni,* na azo 23 000 na popo ti ala akui na yâ ti lango oko.+ 9 Nga, a yeke nzoni e zia Jéhovah* na tara pëpe tongana ti so lani ambeni azia lo na tara,+ na ala kui na peko ti so angbo adë ala.+ 10 Zia ala ga azo ti dikongo tënë na gbe ti go pëpe tongana ti so lani ambeni na popo ti ala adiko tënë na gbe ti go,+ na ala kui na tïtî wafutingo ye.+ 11 Biani, aye so asi na ala tongana atapande, na a sû ni na Mbeti ti Nzapa ti gboto mê ti e,+ e so nda ti aye ti angoi nde nde aga na ndö ti e.

12 Ni la, zia zo so abâ ti lo atene ni luti awe asara hange si lo tï pëpe.+ 13 Mbeni tara nde asi na ala pëpe, gï ti so ayeke si ka na azo kue.+ Me Nzapa ayeke be-ta-zo, na lo yeke zia ande pëpe si a tara ala ahon ti so ala lingbi ti kanga bê dä,+ me tongana tara ni ayeke si na ala, lo yeke leke nga lege ti tene ala lingbi ti gbu ngangu dä.+

14 Tongaso, ala so mbi ndoye ala mingi so, ala kpe vorongo ayanda.+ 15 Mbi yeke sara tënë na azo so ahinga ti bâ nda ti ye nzoni la. Ala wani abâ yâ ti tënë so mbi tene. 16 Kopo ti tënë nzoni so e iri tënë nzoni dä ayeke mungo mbage na mênë ti Christ la ape?+ Mapa so e kungbi yâ ni ayeke mungo mbage na terê ti Christ la ape?+ 17 Ndali ti so mapa ni ayeke oko, e nga, atâa so e yeke mingi, e yeke terê oko,+ ndali ti so e kue e yeke kangbi yâ ti mapa oko so.

18 Ala bâ Israël na lege ti mitele: Ala so ayeke te asandaga ni, ala na gbalaka ni ayeke kangbi ye na popo ti ala la ape?+ 19 Ka mbi tene nyen? Mbi tene so ye so a mû na sandaga na mbeni yanda ayeke mbeni ye? wala yanda ayeke mbeni ye? 20 Ên-ën. Me mbi tene so aye so azo ti amara ayeke mû na sandaga, ala yeke mû ni na asioni yingo, me na Nzapa pëpe.+ Mbi ye si ala ga azo so ala na asioni yingo akangbi ye na popo ti ala pëpe.+ 21 Ala lingbi ti nyon kopo ti Jéhovah* nga na kopo ti asioni yingo pëpe. Ala lingbi ti te ye na “table ti Jéhovah”*+ nga na table ti asioni yingo pëpe. 22 Wala ‘e yeke pusu Jéhovah* ti sara mbanda’?+ E yeke na ngangu ahon lo?

23 A mû lege na zo ti sara ye kue, me ye kue la si ayeke sara nzoni na zo pëpe. A mû lege na zo ti sara ye kue, me a yeke ye kue la si akpengba zo pëpe.+ 24 Zia zo oko oko angbâ ti gi ye so asara nzoni na mba ti lo, me pëpe ye so asara nzoni gï na lo wani.+

25 Ala te nyama kue so a kä ni na lê ti gara, na ala hunda ndani pëpe ndali ti conscience ti ala, 26 biani “sese na aye kue so ayeke na ndö ni ayeke ti Jéhovah.”*+ 27 Tongana mbeni zo so amä na bê pëpe atisa ala si ala yeda ti gue, ala te ye kue so a zia na gbele ala, na ala hunda ndani pëpe ndali ti conscience ti ala. 28 Me tongana a si so mbeni zo atene na ala atene: “So ayeke mbeni ye so a mû na sandaga awe”, ala te pëpe ndali ti zo so afa tënë ni na ala nga ndali ti conscience.+ 29 Mbi ye ti sara tënë ti conscience ti mo pëpe, me ti mba ti mo so. Ndali ti so ngbanga ti nyen a lingbi conscience ti mbeni zo nde la si afâ ngbanga na ndö ti liberté ti mbi?+ 30 Tongana mbi kiri singila na Nzapa awe si mbi yeke te nyama, ngbanga ti nyen a lingbi a sara sioni tënë ti mbi ndali ti mbeni ye so mbi kiri singila na Nzapa ndali ni awe?+

31 Ni la, wala ala yeke te ye, wala ala yeke nyon ye wala ala yeke sara mbeni ye nde, ala sara ye kue ndali ti gloire ti Nzapa.+ 32 Ala sara hange si aJuif, aGrec nga na congrégation ti Nzapa apika gere ngbanga ti ala pëpe,+ 33 gï tongana ti so mbi yeke gi ti nzere na azo kue na yâ ti aye kue, mbi yeke gi ye so asara nzoni gï na mbi wani pëpe,+ me ye so asara nzoni na azo mingi si ala wara lege ti sö fini ti ala.+

11 Ala ga azo so asara ye tongana mbi, tongana ti so mbi nga mbi sara ye tongana Christ.+

2 Mbi gonda ala ngbanga ti so, na yâ ti aye kue, ala ngbâ ti dabe ti ala na mbi na ala ngbâ ti gbu ngangu angobo so mbi fa na ala. 3 Me mbi ye si ala hinga so mokonzi ti akoli kue ayeke Christ,+ mokonzi ti wali ayeke koli+ na mokonzi ti Christ ayeke Nzapa.+ 4 Koli kue so ayeke sambela wala so ayeke tene prophétie na lo kanga ye na li ti lo, lo zia kamene na lê ti mokonzi* ti lo. 5 Me wali kue so asambela wala atene prophétie+ na lo kanga ye na li ti lo pëpe, lo zia kamene na lê ti mokonzi ti lo, ndali ti so a yeke mo bâ mo tene lo yeke wali so a kio kuä ti li ti lo. 6 Tongana mbeni wali akanga ye na li ti lo pëpe, a yeke nzoni lo fâ kuä ti li ti lo. Me tongana a yeke ye ti kamene na mbeni wali ti fâ kuä ti li ti lo wala ti kio ni, a yeke nzoni lo kanga ye na li ti lo.

7 A yeke ngbanga ti mbeni koli ti kanga ye na li ti lo pëpe, ndali ti so lo yeke image na gloire ti Nzapa,+ me wali ayeke gloire ti koli. 8 Ndali ti so koli aga na lege ti wali pëpe, me wali la si aga na lege ti koli.+ 9 Na ndö ni, a sara koli ndali ti wali pëpe, me a sara wali ndali ti koli.+ 10 Ni la, ndali ti a-ange, a yeke ngbanga ti wali ti duti na mbeni ye na li ti lo so afa so lo yeke na gbe ti komandema.+

11 Nga, tongana a ndu tënë ti Seigneur, tongana koli ayeke pëpe, wali nga kue ayeke pëpe; na tongana wali ayeke pëpe, koli nga kue ayeke pëpe. 12 Legeoko tongana wali abâ gigi na lege ti koli,+ koli nga kue abâ gigi na lege ti wali, me ye kue alondo na Nzapa.+ 13 Ala wani ala bâ tënë so: A yeke na lege ni ti tene mbeni wali asambela Nzapa na lo zia li ti lo senge? 14 Gigi wani afa na ala pëpe so tongana mbeni koli ayeke na yongoro kuä ti li, a yeke ye ti kamene ndali ti lo? 15 A fa nga pëpe so tongana mbeni wali ayeke na yongoro kuä ti li, a yeke mbeni gloire ndali ti lo? Ndali ti so a mû kuä ti li na wali tongana ye ti kangango na li ti lo. 16 Me tongana mbeni zo aye ti dë gaba na ndö ti mbeni ngobo nde, e yeke na mbeni ngobo nde pëpe, na acongrégation ti Nzapa nga ayeke na ni pëpe.

17 Me na ngoi so mbi yeke mû awango so, mbi yeke gonda ala pëpe, ngbanga ti so ala yeke bungbi terê ti ala ndali ti nzoni pëpe, me ndali ti sioni. 18 Kozoni kue, tongana ala bungbi na yâ ti mbeni congrégation, mbi mä a tene kangbi ayeke na popo ti ala; na mbi mä na bê na ambeni tënë ni. 19 Biani, asecte ayeke duti ande nga na popo ti ala,+ si na popo ti ala a lingbi nga ti hinga polele azo so Nzapa ayeda na ala.

20 Tongana ala bungbi ndo oko, a yeke biani ti te Kobe ti Seigneur pëpe.+ 21 Ndali ti so tongana ala yeke te ni, zo oko oko ate kobe ti lo kozoni awe, ye so asara si nzara ayeke na yâ ti ambeni me ti ambeni sämba asara ala. 22 Ti tâ tënë ni, ala yeke na ada so ala lingbi ti te kobe nga ti nyon ye na yâ ni ape? Wala ala yeke bâ congrégation ti Nzapa na nene ni pëpe na ala yeke zia kamene na lê ti ala so ayeke na ye ape so? Mbi tene ande nyen na ala? A lingbi mbi gonda ala? Na ndö ti ye so, mbi gonda ala pëpe.

23 Biani, Seigneur afa na mbi tënë so mbi yeke fa nga na ala: Na bï+ so a yeke kä lo, Seigneur Jésus amû mbeni mapa, 24 na tongana lo kiri singila na Nzapa awe, lo kungbi yâ ni, na lo tene: “So ayeke tongana tapande ti terê ti mbi+ so ayeke ndali ti ala. Ala ngbâ ti sara ye so ti dabe ti ala na mbi.”+ 25 Na peko ti so ala te kobe ti lakui ni awe, lo sara tongaso nga na kopo ni,+ lo tene: “Kopo so ayeke tongana tapande ti fini mbele+ na lege ti mênë ti mbi.+ Lakue tongana ala yeke nyon ni, ala ngbâ ti sara ye so ti dabe ti ala na mbi.”+ 26 Ndali ti so lakue tongana ala yeke te mapa so na ala yeke nyon kopo so, ala yeke fa tënë ti kuâ ti Seigneur juska lo ga.

27 Ni la, zo so ate mapa ni wala anyon kopo ti Seigneur na lege ni pëpe, tënë ayeke duti ande na li ti lo na ndö ti tënë ti terê na ti mênë ti Seigneur. 28 Kozoni kue zia mbeni zo abâ terê ti lo mbilimbili ti bâ wala lo lingbi;+ gï na pekoni awe si lo te mapa ni na lo nyon kopo ni. 29 Biani zo so ate na anyon, tongana lo bâ terê ni so nzoni pëpe, lo te na lo nyon ngbanga na li ti lo wani. 30 Ndani la si azo mingi na popo ti ala awoko, ala yeke na kobela nga ambeni mingi akui* awe.+ 31 Me tongana e bâ terê ti e mbilimbili ti bâ wala e lingbi, a yeke fâ ande ngbanga na li ti e pëpe. 32 Me tongana a fâ ngbanga na li ti e, andâ Jéhovah*+ la si ayeke se e so, tongaso si e ga pëpe azo so a fâ ngbanga ti sioni na li ti ala legeoko na dunia so.+ 33 Tongaso, aita, tongana ala bungbi ti te ni, ala ku mba si. 34 Tongana nzara asara mbeni zo, zia lo te ye na yanga-da, si ala bungbi ndali ti ngbanga pëpe.+ Me âdu ti tanga ti atënë ni, mbi yeke leke ni ande tongana mbi si kâ.

12 Aita, âdu ti amatabisi ti yingo,+ mbi ye si ala hinga tënë na ndö ni. 2 Ala hinga so na ngoi so ala de lani azo ti dunia* so, a yeke pusu ala nga a yeke gboto ala lani kirikiri ti gue na ala ti voro ayanda so ayeke sara tënë pëpe.+ 3 Fadeso, mbi ye si ala hinga so tongana yingo ti Nzapa apusu mbeni zo ti sara tënë, lo yeke tene pëpe: “Deba ayeke na ndö ti Jésus!” Me a yeke gï na lege ti yingo vulu+ si mbeni zo alingbi ti tene: “Jésus ayeke Seigneur!”

4 Yâ ti amatabisi ayeke nde nde, me gï oko yingo la si ayeke dä.+ 5 Yâ ti akusala ayeke nde nde,+ me gï oko Seigneur la si ayeke dä. 6 Yâ ti alege ti sarango kusala ayeke mingi, me a yeke gï oko Nzapa la si amû na azo kue alege ti sarango kua so kue.+ 7 Me yingo ayeke sara kusala na yâ ti zo oko oko ndali ti mbeni nzoni ye.+ 8 Na lege ti yingo, a mû na mbeni zo matabisi ti sarango tënë na ndara; na lege ti oko yingo so, a mû na mbeni zo nga matabisi ti sarango tënë na hingango ye; 9 na lege ti oko yingo so a mû na mbeni zo mabe;+ na lege ti oko yingo so, a mû na mbeni zo matabisi ti savango azo;+ 10 a mû na mbeni zo alege ti sarango akusala ti ngangu;+ a mû na mbeni zo matabisi ti tenengo aprophétie; a mû na mbeni zo ngangu ti bâ yâ ti atënë so alondo na yingo;+ a mû na mbeni zo matabisi ti sarango tënë na ayanga nde nde;+ a mû na mbeni zo matabisi ti fango nda ti atënë so a tene na ayanga nde nde.+ 11 Me a yeke gï oko yingo ni la si asara akusala so kue, na a kangbi ni na zo oko oko alingbi na ye so yingo ni aye.

12 Legeoko tongana ti so terê ayeke gï oko me lo yeke na amembre mingi, na amembre so kue, atâa so ala yeke mingi, ala yeke terê oko,+ ti Christ nga kue ayeke tongaso. 13 A yeke na lege ti yingo oko si a batize e kue na yâ ti terê oko, atâa aJuif, wala aGrec, angbâa wala azo so a zi ala awe. Nga, a sara si e kue e nyon yingo oko so.

14 Biani, terê ayeke gï membre oko pëpe, me amembre mingi.+ 15 Tongana gere atene: “So mbi yeke maboko pëpe, mbi yeke ti mbi mbeni membre ti terê pëpe,” so la asara si lo yeke mbeni membre ti terê ni ape? 16 Nga, tongana mê atene: “So mbi yeke lê pëpe, mbi yeke ti mbi mbeni membre ti terê pëpe,” so la asara si lo yeke mbeni membre ti terê ni ape? 17 Tongana ngbongboro terê kue ayeke fade gï lê, ka mango ndo ayeke duti ti lo na ndo wa? Wala tongana terê kue ayeke fade gï mê, ka mango fion ti ye ayeke duti ti lo na ndo wa? 18 Me Nzapa azia amembre ti terê oko oko na place ti ala, tongana ti so bê ti lo aye.

19 Tongana amembre ti terê kue ayeke fade gï membre oko, ka ngbongboro terê ni ayeke duti ti lo na ndo wa? 20 Ye oko, amembre ti terê ayeke mingi, me ngbongboro terê ni ayeke gï oko. 21 Lê alingbi pëpe ti tene na maboko: “Mbi yeke na bezoin ti mo pëpe.” Wala li nga alingbi pëpe ti tene na agere: “Mbi yeke na bezoin ti ala pëpe.” 22 Me ye ni ayeke ti lo tongaso: amembre ti terê so a bâ a tene ala woko ahon ambeni, ala la si ayeke kota ye, 23 me ambage ti terê ni so e bâ e tene a kpa ti mû gonda na ni mingi pëpe, ala la si e mû gonda na ni mingi. Tongaso ambage ti terê ti e so amû kamene na zo ayeke ambage so si a ne ala mingi,+ 24 me ambage ti terê ti e so e ne ala mingi ayeke na bezoin ti mbeni ye pëpe. Ye oko, Nzapa aleke terê ni, na lo sara si a mû nengo mingi na mbage ti terê so ye amanke ni, 25 tongaso si kangbi aduti na yâ ti terê ni pëpe, me amembre ni kue abi bê ti ala na mba.+ 26 Tongana membre oko abâ pasi, atanga ni kue abâ pasi legeoko na lo;+ wala tongana a mû gloire na mbeni membre oko, atanga ti membre ni kue asara ngia legeoko na lo.+

27 Ala yeke terê ti Christ,+ na zo oko oko ayeke membre ti terê ni.+ 28 Nga, Nzapa azia azo oko oko na place ti ala na yâ ti congrégation: kozoni, abazengele;+ use ni, aprophète;+ ota ni, awafango ye;+ na pekoni, akusala ti ngangu;+ na matabisi ti savango azo;+ akusala ti mungo maboko, akode ti mungo li ni,+ sarango tënë na ayanga nde nde.+ 29 A yeke azo kue la si ayeke abazengele? A yeke azo kue la si ayeke aprophète? A yeke azo kue la si ayeke awafango ye? A yeke azo kue la si ayeke sara akusala ti ngangu? 30 A yeke azo kue la si ayeke na matabisi ti savango azo? A yeke azo kue la si ayeke sara tënë na ayanga nde nde?+ A yeke azo kue la si ayeke kiri peko ti ayanga ni?+ 31 Me ala ngbâ ti yapu na gingo amatabisi+ so ahon ati so. Me zia mbi fa na ala mbeni ye so ayeke nzoni mingi ahon atanga ni.+

13 Tongana mbi sara tënë na ayanga ti kodro ti azo nga na ti a-ange, me mbi yeke na ndoye pëpe, mbi ga tongana totongo ti mbeni cloche wala ti mbeni cymbale. 2 Nga, tongana mbi yeke na matabisi ti tenengo prophétie na mbi hinga nzoni mingi atënë kue so Nzapa ahonde ndani nga mbi hinga ye kue,+ tongana mbi yeke na mabe kue ti zi ahoto ti zia na mbeni ndo nde, me mbi yeke na ndoye pëpe, mbi yeke ye oko pëpe.+ 3 Tongana mbi mû aye ti mbi kue ti bata na azo+ nga tongana mbi kä terê ti mbi na kuâ ti tene mbi pika kate ti mbi na pekoni, me mbi yeke na ndoye pëpe,+ mbi yeke wara ye oko na pekoni pëpe.

4 Ndoye+ ahinga ti kanga bê ti ku+ nga lo sara nzoni na zo.+ Ndoye asara kota bê pëpe,+ lo pika kate na ndö ti ye pëpe, lo zia si baba ahon ndö ti lo pëpe,+ 5 lo sara ye ti songo bê ti zo pëpe,+ lo gi gï aye so anzere na lo pëpe,+ lo yeke sara ngonzo hio hio pëpe.+ Lo yeke diko pëpe sioni so a sara na lo.+ 6 Lo wara ngia na yâ ti ye ti kirikiri pëpe,+ me lo wara ngia na yâ ti tâ tënë. 7 Lo kanga bê na gbele aye kue,+ lo mä na bê na aye kue,+ lo zia beku na ndö ti aye kue,+ lo gbu ngangu na yâ ti aye kue.+

8 Ndoye ayeke hon lâ oko pëpe. Me tongana a yeke amatabisi ti tenengo prophétie, a yeke kaï ni ande biaku; tongana a yeke sarango tënë na ayanga nde nde,* a yeke hunzi ande; tongana a yeke hingango ye, a yeke kaï ni ande biaku. 9 E hinga gï mbage ti aye+ nga e tene gï mbage ti aprophétie. 10 Me tongana ye so alingbi kue aga ande, ye so ayeke gï mbage ti aye a yeke kaï ni ande biaku biaku. 11 Tongana mbi de lani kete molenge, mbi yeke sara tënë tongana kete molenge, mbi yeke gbu li tongana kete molenge, kode ti sarango tënë ti mbi ayeke tongana ti kete molenge, me so mbi ga koli awe, mbi zia lege ti asarango ye ti kete molenge awe. 12 Ti fadeso, e yeke bâ ye na tatara ti wen, me ye ni asigi polele pëpe, me na ngoi so ayeke ga a yeke duti ande lê na lê. Ti fadeso, mbi hinga gï mbage ti aye, me na ngoi ni so ande mbi yeke hinga ye tâ nzoni* legeoko tongana ti so a hinga mbi tâ nzoni. 13 Ye oko, fadeso, aye ota so, mabe, beku na ndoye angbâ. Me ye so ayeke kota mingi na popo ti aye ota so ayeke ndoye.+

14 Ala tomba peko ti ndoye; ye oko, ala ngbâ ti sara ngangu ti gi* amatabisi ti yingo, me a yeke nzoni ala tene prophétie.+ 2 Zo so asara tënë na mbeni yanga nde, lo yeke sara tënë na azo pëpe me na Nzapa, ngbanga ti so zo oko ayeke mä lo pëpe,+ atâa so a yeke na lege ti yingo la si lo tene atënë so Nzapa ahonde ndani.+ 3 Ye oko, zo so ayeke tene prophétie ayeke kpengba azo, lo yeke wa ala nga lo yeke dë bê ti ala na lege ti tënë ti yanga ti lo. 4 Zo so asara tënë na mbeni yanga nde lo kpengba gï lo wani, me zo so atene prophétie lo kpengba congrégation. 5 Mbi ye si ala kue asara tënë na ayanga nde nde,+ me ti bê ti mbi, mbi ye mingi ti tene ala tene prophétie.+ Biani, zo so atene prophétie ayeke kota ahon zo so ayeke tene ayanga nde nde, ndali ti so tongana zo so atene ayanga nde nde akiri peko ti tënë ti lo ni pëpe, lo lingbi pëpe ti kpengba congrégation. 6 Me ti fadeso, aita, tongana mbi ga na mbage ti ala na tenengo ayanga nde nde, ye ti nzoni wa la mbi yeke sara na ala? Mbi yeke sara nzoni na ala gï tongana mbi sara tënë na ala na lege ti matabisi ti fango peko ti mbeni ye so Nzapa afa na mbi,+ wala matabisi ti hingango ye,+ wala ti tenengo prophétie wala ti fango ye.

7 Même aye so ayeke na fini pëpe ayeke toto, atâa a yeke flûte wala harpe. Tongana popo ti totongo ti aye ni ayeke dä pëpe, a yeke hinga ande tongana nyen go ti ye so a yeke hûru ni na flûte wala go ti ye so a yeke pika ni na harpe? 8 Ti tâ tënë ni, tongana go ti trompette atoto polele pëpe, zo wa la ayeke leke terê ti lo ti sara bira zo wa? 9 Legeoko nga, na yanga ti ala, tongana ala tene pëpe tënë so zo alingbi ti gbu ndani hio, zo ayeke hinga ande nda ti tënë so ala yeke tene so tongana nyen? Biani, ala yeke sara ande tënë gï na yâ ti pupu senge. 10 Na yâ ti dunia so mara ti atotongo ti ayanga ti kodro ayeke mingi, me mbeni oko so ndani ayeke pëpe ayeke dä pëpe. 11 Tongana mbi mä yâ ti totongo ti yanga ti kodro so a yeke tene so pëpe, mbi yeke duti ande wande na lê ti zo so ayeke sara tënë ni, na zo so ayeke sara tënë ni ayeke duti wande na lê ti mbi. 12 Tongaso ala nga, ndali ti so ala ye mingi ti wara amatabisi ti yingo, ala gi ti wu mingi na yâ ni ti kpengba congrégation.+

13 Ni la, zia zo so ayeke sara tënë na mbeni yanga nde asambela ti tene lo kiri peko ti tënë ni.+ 14 Ndali ti so tongana mbi yeke sambela na mbeni yanga nde, a yeke matabisi ti yingo so mbi wara ni la si ayeke sambela, me hingango ndo ti mbi asara ye oko pëpe. 15 Tongaso, mbi yeke sara nyen? Mbi yeke sambela na matabisi ti yingo, me mbi yeke sambela nga na hingango ndo ti mbi. Mbi yeke he bia ti sepela na lege ti matabisi ti yingo, me mbi yeke he nga bia ti sepela na lege ti hingango ndo ti mbi. 16 Tongaso pëpe, tongana mo yeke sepela Nzapa na matabisi ti yingo so mo wara, zo so ayeke ti lo senge zo ayeke tene ande “Amen” na tënë ti singila ti mo na Nzapa ni tongana nyen? so lo mä pëpe yâ ti tënë so mo yeke tene so? 17 Ti tâ tënë ni, mo kiri singila na Nzapa na mbeni lege so ayeke nzoni mingi, me mo yeke kpengba mba ti mo ni pëpe. 18 Mbi kiri singila na Nzapa so mbi yeke tene ayanga ti kodro mingi ahon ala kue. 19 Ye oko, na yâ ti mbeni congrégation, mbi ye mingi ti sara gï atënë oku na hingango ndo ti mbi, si mbi wara nga lege ti fa ye na ambeni zo na yanga,* ahon ti sara atënë saki bale-oko na mbeni yanga ti kodro nde.+

20 Aita, ala ga akete molenge pëpe na lege ti gbungo nda ti ye,+ me tongana a ndu tënë ti sioni ala duti akete molenge.+ Ye oko, zia ala ga akangba na lege ti gbungo nda ti ye.+ 21 A sû tënë so na yâ ti Ndia, a tene: “Jéhovah* atene: ‘Mbi yeke sara ande tënë na azo so na ayanga ti kodro ti awande nga na yanga ti awande, me atâa so kue, ala yeke dengi mê ande ti mä mbi pëpe.’”+ 22 Ni la, ayanga ti kodro ayeke mbeni fä pëpe ndali ti azo so amä na bê,+ me a yeke fä ndali ti azo so amä na bê pëpe. Âdu ti tenengo prophétie, a yeke ndali ti azo so amä na bê, me pëpe ndali ti azo so amä na bê pëpe. 23 Tongaso, tongana congrégation kue abungbi ndo oko na azo ni kue ayeke tene ayanga nde nde, si ambeni senge zo wala ambeni zo so amä na bê pëpe aga alï, azo ni so ayeke tene ande so ye asara li ti ala la ape? 24 Me na ngoi so ala kue angbâ ti tene prophétie, si mbeni zo so amä na bê pëpe wala mbeni senge zo aga alï, tënë ti ala ni kue ayeke fa sioni ti lo na lo nga ayeke mû lege na lo ti bâ yâ ti asarango ye ti lo nzoni, 25 na atënë ti bê ti lo so ahonde ayeke sigi polele, tongaso lo yeke kuku ande, lo kpo li ti lo na sese na lo voro Nzapa, lo tene: “Nzapa ayeke biani na popo ti ala.”+

26 Tongaso, aita, a lingbi ala sara nyen? Na ngoi so ala bungbi, mbeni oko ayeke na mbeni psaume, mbeni ayeke fa ye, mbeni ayeke tene peko ti ye so Nzapa afa na lo, mbeni ayeke tene mbeni yanga nde nga mbeni ayeke fa nda ti atënë.+ Zia ala sara aye so kue ti kpengba mba ti ala. 27 Nga, tongana mbeni zo ayeke sara tënë na mbeni yanga nde, zia a duti gï zo use wala ota awe, na mbeni atene ti lo ahunzi awe si mbeni atene ti lo. Nga, a lingbi mbeni zo aduti dä ti kiri peko ti atënë ni.+ 28 Me tongana mbeni zo ti kiri peko ti atënë ni ayeke dä pëpe, a lingbi lo duti kpô na yâ ti congrégation ni na lo sara tënë ni gï na yâ ti bê ti lo wani nga na Nzapa. 29 Nga, zia aprophète use wala ota+ asara tënë, na zia atanga ni agi ti bâ nda ti tënë ni. 30 Me tongana Nzapa afa mbeni ye na mbeni zo ni nde na ngoi so lo yeke na popo ti ala, zia kozo zo ni aduti kpô. 31 Biani, ala kue ala lingbi ti tene prophétie, zo oko na peko ti mba ti lo, tongaso si ala kue amanda ye na ala kue alingbi ti kpengba.+ 32 Nga, a lingbi aprophète aduti na ngangu na ndö ti amatabisi ti yingo so ala yeke na ni. 33 Nzapa ayeke Nzapa ti wusuwusu pëpe, me ti siriri.+

Tongana ti so a yeke tambela na yâ ti acongrégation kue ti azo ti be-vulu, 34 zia awali angbâ ti duti kpô na yâ ti acongrégation, ndali ti so a mû lege na ala pëpe ti sara tënë,+ me zia ala woko terê na gbe ti akoli+ tongana ti so Ndia atene. 35 Tongana ala ye ti manda mbeni ye, zia ala hunda akoli ti ala na yanga-da, ndali ti so a yeke ye ti kamene tongana wali asara tënë na yâ ti congrégation.

36 Tënë ti Nzapa ni abâ gigi na ala kâ, wala gï ala la si tënë ni asi na ala?

37 Tongana mbeni zo abâ terê ti lo so lo yeke prophète wala lo yeke na mbeni matabisi ti yingo, a lingbi lo yeda na aye so mbi yeke sû ni na ala na mbeti, ndali ti so a yeke commandement ti Seigneur. 38 Me tongana mbeni zo asara sanka ti ye so, a yeke sara ande sanka ti lo. 39 Ndani la, aita ti mbi, ala ngbâ ti sara ngangu ti gi ti tene aprophétie,+ me ala kanga lege pëpe na mbeni zo ti sara tënë na ayanga nde nde.+ 40 Me ala zia si ye kue atambela na lege ni nga na yâ ti wusuwusu pëpe.+

15 Aita, fadeso mbi yeke dabe ti ala na ndö ti nzoni tënë so mbi fa lani na ala,+ so ala yeda na ni nga so ala ngbâ na yâ ni. 2 Na lege ti nzoni tënë so mbi fa na ala, a yeke sö fini ti ala fadeso tongana ala gbu ni ngangu. Tongana a yeke tongaso pëpe, andâ ala ga azo so amä na bê gï senge senge.

3 Na popo ti akozo ye so mbi fa na ala, aye so mbi manda ayeke nga na yâ ni, so Christ akui ndali ti asiokpari ti e alingbi na tënë ti Mbeti ti Nzapa.+ 4 Biani a lu lo,+ na a zingo lo na kuâ+ na ota lango ni+ a lingbi na tënë ti Mbeti ti Nzapa.+ 5 Lo si na Céphas,*+ na pekoni lo si na adisciple bale-oko na use.+ 6 Na pekoni, lo si na aita ahon 500 na ngoi oko;+ mingi ti aita so angbâ na fini juska laso, me ambeni akui* awe. 7 Na peko ti ye so, lo si na Jacques,+ nga na pekoni lo si na abazengele kue.+ 8 Me ndangba ti azo ni kue so lo si na lo ayeke mbi,+ tongana mbeni molenge so a dü lo kozo si ngoi ti dungo lo alingbi.

9 Mbi yeke zo so ayeke kete mingi na popo ti abazengele ni kue, mbi lingbi ti tene a iri mbi bazengele pëpe, ngbanga ti so mbi sara lani ye ti ngangu na congrégation ti Nzapa.+ 10 Me na lege ti kota nzobe ti Nzapa mbi ga zo so ala yeke bâ lo fadeso. Nga, kota nzobe ti Nzapa na mbage ti mbi angbâ senge senge pëpe, me mbi sara kua ngangu mingi ahon ala kue. Ye oko, a yeke mbi la si mbi sara kua tongaso pëpe, me a yeke kota nzobe ti Nzapa so ayeke na mbi la si asara ni. 11 Atâa a yeke mbi wala ambeni bazengele ni, a yeke tongaso la si e yeke fa tënë nga a yeke tongaso si ala mä na bê.

12 Tongana e yeke fa tënë e tene so a zingo Christ na kuâ awe,+ a sara tongana nyen si na popo ti ala ambeni zo ayeke tene so zingongo ti akuâ ayeke dä ape? 13 Biani, tongana zingongo ti akuâ ayeke dä pëpe, andâ a zingo nga Christ na kuâ pëpe. 14 Me tongana a zingo Christ na kuâ pëpe, biani tënë so e yeke fa ayeke senge senge, na mabe ti ala nga ayeke senge senge. 15 Nga, tongana biani a yeke zingo ande akuâ pëpe, andâ Nzapa azingo Christ lani na kuâ pëpe. Na a yeke bâ e tongana azo so ayeke sara tënë ti mvene na li ti Nzapa,+ ngbanga ti so e tene lo zingo Christ na kuâ.+ 16 Ndali ti so tongana a yeke zingo ande akuâ pëpe, andâ Christ kue a zingo lo na kuâ pëpe. 17 Na ndö ni, tongana a zingo Christ na kuâ pëpe, mabe ti ala ayeke ye senge nga ala ngbâ lakue na yâ ti asiokpari ti ala.+ 18 Tongaso, a ye ti tene nga so ala so akui beoko na Christ, ti ala ahunzi awe.+ 19 Tongana a yeke gï na yâ ti fini so la si e yeke na beku na Christ, andâ e yeke azo so mawa ti e ahon ti tanga ti azo kue.

20 Me, a zingo Christ na kuâ awe, na lo yeke tongana kozo li ti ye na popo ti azo so akui.+ 21 Ndali ti so kuâ aga na lege ti koli oko,+ zingongo ti akuâ aga nga na lege ti koli oko.+ 22 Legeoko tongana ti so na yâ ti Adam ala kue ayeke kui,+ tongaso nga na yâ ti Christ ala kue ayeke wara fini.+ 23 Me zo oko oko na molongo ti lo: Christ kozo li ti ye,+ na pekoni ala so ayeke ti Christ na ngoi so lo yeke duti dä.+ 24 Nga, tongana lo futi agouvernement kue, akomandema kue nga na ngangu kue awe, na nda ni, lo yeke mû ande Royaume ni na lo so ayeke Nzapa nga Babâ ti lo.+ 25 Ndali ti so a lingbi lo komande tongana gbia juska Nzapa azia awato ti lo kue na gbe ti gere ti lo awe si.+ 26 Ti kuâ so ayeke ndangba wato ni, a yeke futi lo ande biaku biaku.+ 27 Ndali ti so Nzapa “azia ye kue na gbe ti gere ti lo.”+ Me tongana a tene so ‘a zia aye kue na gbe ti lo’,+ a yeke polele so zo ti ziango aye ni kue na gbe ti lo ayeke ti lo na yâ ni pëpe.+ 28 Me tongana aye kue aga ande na gbe ti lo awe, Molenge ni nga ayeke duti ande na gbe ti Lo so azia aye kue na gbe ti lo Molenge ni,+ si Nzapa aga aye kue ndali ti zo oko oko kue.+

29 Tongana ye ni ayeke tongaso pëpe, ala so a yeke batize ala ti tene ala duti akuâ, ala yeke sara ande nyen?+ Tongana a yeke zingo akuâ oko pëpe, ngbanga ti nyen a ngbâ ti batize nga ala ti tene ala ga akuâ? 30 Ngbanga ti nyen fini ti e nga ayeke lakue na lê ti kuâ?+ 31 Lâ na lâ mbi yeke bâ kuâ lê na lê, tâ gï tongana ti so mbi yeke na ngia mingi ndali ti ala na yâ ti Christ Jésus Seigneur ti e. 32 So mbi tiri na anyama ti ngonda na Éphèse tongana ti so ambeni zo asara so,*+ ye ti nzoni wa la mbi wara na pekoni? Tongana a yeke zingo akuâ pëpe, “zia e te, e nyon ngbanga ti so kekereke e yeke kui kuingo.”+ 33 Zia ambeni zo ahanda ala pëpe. Ti sara songo na asioni zo ayeke buba anzoni sarango ye ti zo.+ 34 Ala zingo, zia li ti ala aga dä, a lingbi na lege so ayeke mbilimbili nga ala ngbâ na yâ ti siokpari pëpe, ndali ti so ambeni zo ahinga ye oko pëpe na ndö ti Nzapa. Mbi yeke sara tënë so ti zia kamene na lê ti ala.

35 Ye oko, mbeni zo ayeke tene ande, atene: “A yeke zingo akuâ tongana nyen? Mara ti terê wa la si ala yeke zingo na ni?”+ 36 Mo zo so li ti mo ayeke dä pëpe so! Ye so mo lu ayeke kiri na fini gï tongana akui si. 37 Ti mo, ye so mo lu, mo lu pëpe terê ni so ayeke maï ande, me senge lê ni. A lingbi ti duti lê ti blé wala mbeni ngongoa nde. 38 Me Nzapa ayeke mû na ngongoa ni mbeni terê tongana ti so bê ti lo aye, nga lo yeke mû na angongoa oko oko terê so alingbi na angongoa ni. 39 Terê kue ayeke legeoko pëpe, terê ti azo ayeke nde, terê ti anyama ayeke nde, terê ti andeke na ti asusu ayeke nga nde nde. 40 Aterê so ayeke ti yayu ayeke dä,+ na aterê so ayeke ti sese ayeke nga dä.+ Me gloire ti aterê so ayeke ti yayu ayeke nde, nga gloire ti aterê so ayeke ti sese ayeke nde. 41 Gloire ti lâ ayeke nde, gloire ti nze ayeke nde+ na gloire ti atongoro ayeke nga nde. Biani, gloire ti mbeni tongoro ayeke nde na ti mbeni.

42 Zingongo ti akuâ ayeke nga tongaso. A lu terê ni terê so ayeke buba bubango, na a zingo ni terê so alingbi ti buba pëpe.+ 43 A lu ni na yâ ti kamene, a zingo ni na yâ ti gloire.+ A lu ni na yâ ti wokongo, a zingo ni na yâ ti ngangu.+ 44 A lu ni terê so ayeke ti zo ti sese, a zingo ni terê so ayeke ti yingo. Tongana terê so ayeke ti zo ti sese ayeke dä, terê so ayeke ti yingo ayeke nga dä. 45 Ni la, Mbeti ti Nzapa atene: “Kozo koli, Adam, aga zo* so ayeke na fini.”+ Ndangba Adam aga mbeni yingo so amû fini.+ 46 Ye oko, kozo terê ni ayeke ti yingo pëpe, me a yeke terê so ayeke ti zo ti sese. Terê so ayeke ti yingo aga na pekoni. 47 Kozo koli ni ayeke ti sese na a leke lo na fuku ti sese.+ Use koli ni ayeke ti yayu.+ 48 Ala so a leke ala na fuku ti sese ayeke nga tongana lo so a leke lo na fuku ti sese; ala so ayeke ti yayu ayeke nga tongana lo so ayeke ti yayu.+ 49 Gï tongana ti so e kpa lo so a leke lo na fuku ti sese,+ e yeke kpa ande nga lo so ayeke ti yayu.+

50 Me, aita, mbi tene tënë so na ala: mitele na mênë alingbi pëpe ti lï na yâ ti Royaume ti Nzapa, wala terê so ayeke buba bubango alingbi pëpe ti wara terê so alingbi ti buba pëpe. 51 Bâ, mbi yeke sara na ala tënë ti mbeni ye so Nzapa ahonde ndani: E kue e yeke lango na yâ ti kuâ ande pëpe, me ti e kue, a yeke changé terê ti e,+ 52 gï hio tongaso, tongana ti so zo ayeke ko lê ti lo, na ngoi ti ndangba trompette.+ Biani trompette ayeke toto ande na a yeke zingo akuâ na mbeni terê so alingbi ti buba pëpe, nga a yeke changé terê ti e. 53 Ndali ti so a lingbi terê so ayeke buba bubango ayü terê so alingbi ti buba pëpe,+ na a lingbi terê so ayeke kui kuingo ayü fini so alingbi ti hinga kuâ pëpe.+ 54 Me na ngoi so terê so ayeke buba bubango ayü terê so alingbi ti buba pëpe, na terê so ayeke kui kuingo ayü fini so alingbi ti hinga kuâ pëpe, na ngoi ni so tënë so Mbeti ti Nzapa atene so ayeke ga tâ tënë: “A mene kuâ biaku biaku awe.”+ 55 “Kuâ, songo benda ti mo ni ayeke na ndo wa? Kuâ, kî ti mo so mo yeke kpo na zo ayeke na ndo wa?”+ 56 Siokpari ayeke kî so akpo zo na kuâ,+ me ngangu ti siokpari alondo na Ndia.*+ 57 Me singila na Nzapa, ndali ti so lo sara si e sö benda na lege ti Seigneur ti e Jésus Christ!+

58 Ndani la, aita ti mbi so mbi ndoye ala mingi, ala luti ngangu,+ ala yengi pëpe, ala duti lakue na ye mingi ti sara+ na yâ ti kusala ti Seigneur; na tongana a yeke tënë ti aye ti Seigneur, zia ala hinga so ngangu kua so ala sara ayeke ngbâ senge senge pëpe.+

16 Na ndö ti tënë ti bungbingo nginza ndali ti azo ti be-vulu,+ ala sara nga gï tongana ti so mbi mû lani yanga na acongrégation ti Galatie ti sara. 2 Na kozo lango ti yenga oko oko, zia zo oko oko azi mbeni ye abata na da ti lo alingbi na ye so lo yeke na ni, si tongana mbi si kâ a lingbi ande ti bungbi nginza na ngoi ni so pëpe. 3 Me tongana mbi si kâ, akoli kue so ala sara nzoni tënë ti ala na yâ ti mbeti ti ala,+ ala la si mbi yeke tokua ala ande na Jérusalem na matabisi so ala mû na nzoni bê. 4 Ye oko, tongana a yeke nzoni ti tene mbi kue mbi gue kâ, mbi na ala e yeke gue ande.

5 Me tongana mbi hon na yâ ti Macédoine awe mbi yeke si ande na ala kâ, ndali ti so mbi leke ti hon na yâ ti Macédoine.+ 6 Peut-être mbi yeke duti ande na ala ndali ti kete ngoi, wala mbi yeke duti na ala na ngoi ti dê kue, si ala lingbi ti zia mbi na lege ti gue na ndo so mbi ye ti gue dä so. 7 Ndali ti so mbi ye ti bâ gï ala bango ti hon pëpe, me bê ti mbi aye ti ngbâ ngoi kete na terê ti ala,+ tongana Jéhovah* aye. 8 Me mbi ngbâ na Éphèse+ juska na Matanga ti Pentecôte; 9 ngbanga ti so mbeni kota yanga-da azi na mbi ti sara kusala,+ me azo ti kangango lege ayeke mingi.

10 Tongana Timothée+ asi, ala bâ si lo duti na popo ti ala na mbeto pëpe, ngbanga ti so lo nga kue lo yeke sara kusala ti Jéhovah*+ gï tongana ti so mbi yeke sara. 11 Tongaso, zia mbeni zo abâ lo tongana mbumbuse zo pëpe. Ala zia lo na lege na yâ ti siriri, si lo ga na mbi ge, ngbanga ti so mbi na aita e yeke ku lo.

12 Âdu ti ita ti e Apollos,+ mbi voro yanga na lo mingi ti gue na ala kâ legeoko na aita ni. Me ti bê ti lo, lo ye ti gue fadeso pëpe, lo yeke gue ande kâ tongana lo wara lege ni.

13 Zia lê ti ala angbâ na zingo ni,+ ala luti ngangu na yâ ti mabe,+ ala sara ye tongana akoli,*+ ala kpengba.+ 14 Zia aye kue so ala sara, ala sara ni na ndoye.+

15 Ti fadeso, aita, mbi mû wango so na ala: Ala hinga so a yeke azo ti da ti Stéphanas la si ayeke akozo zo so aga adisciple na Achaïe nga so ala mû terê ti ala ti sara kua na azo ti be-vulu. 16 Zia ala nga ala ngbâ ti woko terê na gbe ti mara ti azo tongaso nga na ala kue so ayeke sara ye maboko na maboko nga ayeke sara kua ngangu.+ 17 Me mbi yeke na ngia ndali ti so Stéphanas,+ Fortunatus na Achaïcus ayeke dä na terê ti mbi, ngbanga ti so ala kanga dû ti peko ti ala, so ala yeke dä pëpe so. 18 Ndali ti so ala dë bê ti mbi na ti ala. Ni la, zia ala mû nengo na azo tongaso.

19 Acongrégation ti kodro-komanda ti Asie atokua bara na ala. Aquila na Prisca nga na congrégation so ayeke na da ti ala+ abara ala mingi mingi na yâ ti Seigneur. 20 Aita kue abara ala. Ala bara terê na popo ti ala na ala su ngbangba ti mba tongana aita.

21 So bara ti mbi Paul la, so mbi wani mbi sû na maboko ti mbi.

22 Tongana mbeni zo aye Seigneur pëpe, zia a deba lo. Seigneur ti e, mo ga! 23 Zia kota nzobe ti Seigneur Jésus aduti na ala. 24 Zia ndoye ti mbi aduti na ala kue so asara beoko na Christ Jésus.