USE MBETI SO PAUL ATOKUA NA ACORINTHIEN

1 Paul, mbeni bazengele ti Christ Jésus na lege ti ye so bê ti Nzapa aye, na ita ti e Timothée,+ atokua mbeti so na congrégation ti Nzapa so ayeke na Corinthe, nga na azo ti be-vulu kue so ayeke na yâ ti sese ti Achaïe+ kue:

2 Zia kota nzobe nga na siriri so alondo na Nzapa Babâ ti e, nga so alondo na Seigneur Jésus Christ aduti na ala.

3 Zia a gonda Nzapa na Babâ ti Seigneur ti e Jésus Christ,+ Babâ so ayeke sara nzoni bê mingi na zo+ nga Nzapa ti dengo bê kue,+ 4 lo so adë bê ti e na yâ ti atara kue so e wara,*+ si e lingbi ti dë bê ti ala+ so ayeke na yâ ti tara* nde nde kue, na lege ti dengo bê so Nzapa angbâ ti dë bê ti e na ni.+ 5 Legeoko tongana ti so apasi so e bâ ndali ti Christ awu mingi,+ dengo bê so e wara na lege ti Christ nga awu mingi. 6 Tongana e yeke na lê ti atara,* ndani ayeke ti tene bê ti ala adë na ala wara salut. Tongana a yeke dë bê ti e, ndani ayeke ti tene bê ti ala adë, si ala wara lege ti gbu ngangu na yâ ti a-oko pasi so e yeke bâ nga so. 7 Tongaso beku so e yeke na ni na ndö ti ala ayengi pëpe, ndali ti so e hinga e tene gï tongana ti so ala yeke bâ pasi tongana e, ala yeke wara ande dengo bê nga tongana e.+

8 Aita, e ye si ala hinga tënë ti pasi so e bâ lani na yâ ti kodro-komanda ti Asie:+ A sara lani pasi mingi na e, pasi ni ahon ngangu ti e biani, na a sara si e hinga pëpe wala e yeke ngbâ na fini.+ 9 Ti tâ tënë ni, e wani e bâ ti e lani so a dë ngbanga ti kuâ na li ti e awe. Ye so asi ti tene e zia bê ti e na e wani pëpe, me na Nzapa+ so ayeke zingo akuâ. 10 Lo zi e lani tâ na lê ti kuâ tongaso, na e yeke na beku so lo yeke kiri ti zi e ande.+ 11 Ala nga, ala lingbi ti sara mbeni ye ndali ti e na lege ti vorongo terê ti ala na Nzapa.+ Tongana ala sara ni, a yeke sara si azo mingi ayeke kiri ande singila na Nzapa ndali ti e ngbanga ti so a sara nzoni bê na e na peko ti sambela ti azo mingi.+

12 Ye so e pika kate ti e ngbanga ni ayeke so conscience ti e ayeda so sarango ye ti e na yâ ti dunia so, na mbilimbili na mbage ti ala, ayeke na mbeni lege so ayeke nzoni-kue nga na vuru bê so alondo na Nzapa; a yeke na lege ti ndara ti dunia so pëpe,+ me na lege ti kota nzobe ti Nzapa. 13 Biani tënë so e yeke sû na ala ayeke mbeni tënë nde pëpe, gï so ala lingbi ti diko* nga ti mä yâ ni, mbi yeke nga na beku so ala yeke ngbâ ande ti mä yâ ni kue,* 14 legeoko tongana ti so ala nga kue ala mä kamême lani yâ ni, so e yeke ga ye so ala yeke pika kate ti ala ngbanga ni, gï tongana ti so ala nga ala yeke duti ande ye so e yeke pika kate ti e ngbanga ni na lâ ti Seigneur ti e Jésus.

15 Tongaso, na lege ti beku so, mbi leke na bê ti mbi kozoni ti gue na ala kâ, si ala lingbi ti wara lege ti duti na ngia ti fani use ni.* 16 Biani, mbi ye ti duti kete na ala na ngoi so mbi yeke gue na Macédoine; na kiringo ti mbi na Macédoine mbi yeke kiri na mbage ti ala kâ awe si na nda ni ala zia mbi na lege ti gue na Judée.+ 17 Biani, na ngoi so mbi leke tënë so na bê ti mbi, mbi bâ ni tongana tënë ti ngia? Wala aye so mbi leke ti sara, mbi leke ti sara ni alingbi na ye ti mitele? si mbi tene “En, en” na pekoni “Ên-ën, ên-ën”? 18 Me tongana ti so Nzapa ayeke be-ta-zo, atënë so e tene na ala ayeke “en” na “ên-ën” pëpe. 19 Biani, Jésus Christ, Molenge ti Nzapa, so mbi na Silvain* na Timothée+ e fa tënë ti lo na popo ti ala, aga lani “en” na “ên-ën” pëpe, me ti lo “en” ni ayeke gï “en.” 20 Ngbanga ti so atâa wungo ti azendo ti Nzapa ayeke oke, kue aga “en” na lege ti lo.+ Tongaso nga, na lege ti lo e tene “Amen” na Nzapa,+ si e lingbi ti mû gloire na Nzapa. 21 Me zo so afa atene e na ala e yeke ti Christ nga zo so asoro e* ayeke Nzapa.+ 22 Lo kpo nga nzoroko ti lo na ndö ti e+ na lo mû na e ye so afa atene ye so ayeke ga ayeke si biani, ye ni so ayeke yingo so lo+ zia na yâ ti bê ti e.

23 Mbi iri Nzapa ti duti tongana témoin ti ke mbi:* a yeke ti tene ala kiri ala wara vundu pëpe si mbi de mbi si na Corinthe pëpe. 24 Mbi tene pëpe so e yeke azo so akomande na ndö ti mabe ti ala,+ me e yeke amba ti ala awakua ndali ti ngia ti ala, ndali ti so a yeke na lege ti mabe ti ala si ala yeke luti so.

2 Biani, mbi leke na bê ti mbi ti kiri ti gue na ala kâ na yâ ti vundu pëpe. 2 Ndali ti so tongana mbi zia vundu na bê ti ala, zo wa la si ayeke zia ngia na bê ti mbi zo wa? Gï ala so mbi zia vundu na bê ti ala so ape? 3 Mbi sû lani tënë so biani na ala, si tongana mbi ga, mbi duti na vundu pëpe ndali ti ala so mbi doit ti duti na ngia ndali ti ala; ndali ti so mbi hinga so ye so asara si mbi yeke na ngia ayeke oko ye so la asara si ala nga kue ayeke na ngia. 4 Biani, a yeke na kota vundu nga na mawa mingi na bê si mbi sû lani mbeti na ala na ngu ti lê mingi; mbi ye pëpe si ala duti na vundu,+ me mbi ye si ala hinga ndoye so mbi yeke na ni mingi na mbage ti ala.

5 So mbeni zo asara si vundu aga,+ lo zia vundu na bê ti mbi pëpe, me lo zia vundu kamême na bê ti ala kue. Mbi ye ti son bê ti ala pëpe na yâ ti tënë ti mbi. 6 Sukungo so mingi ti ala asuku na koli so alingbi awe, 7 me ti fadeso, a yeke nzoni ala pardonné lo na bê ti ala kue nga ala dë bê ti lo+ si vundu so asara lo mingi so awoko lo pëpe.+ 8 Ni la, mbi wa ala ti fa na lo so biani ala ndoye lo.+ 9 Ndani la mbi sû nga mbeti so na ala ti hinga mbilimbili wala ala yeke mä yanga na yâ ti ye kue. 10 Tongana ala pardonné mbeni zo ndali ti mbeni ye, mbi kue mbi pardonné zo ni. Biani, ti mbi, ye so mbi pardonné ni awe, tongana biani mbi pardonné mbeni ye, a yeke ndali ti nzoni ti ala na lê ti Christ, 11 si Satan+ awara go na ndö ti e pëpe, ngbanga ti so e hinga nzoni mingi aye so lo ye ti sara.*+

12 Tongana mbi si lani na Troas+ ti fa nzoni tënë na ndö ti Christ, si fini yanga-da azi na mbi lani na yâ ti kusala ti Seigneur, 13 bê* ti mbi ayeke lani gï na nduzu ngbanga ti so mbi wara ita ti mbi Tite+ pëpe, ni la mbi tene na adisciple ni kâ ti ngbâ nzoni na mbi zia ala mbi gue na Macédoine.+

14 Me singila na Nzapa so ayeke mû li ni lakue ti hon na e na yâ ti kpongo molongo tongana azo so asö benda si e yeke tambela legeoko na Christ, nga so lo sara si na lege ti e a yeke mä fion ti hingango ye na ndö ti Nzapa na ndo kue! 15 Ti Nzapa, e yeke pendere fion ti Christ na lê ti ala so a ngbâ ti sö ala nga na lê ti ala so ayeke gue ti wara futingo. 16 Ti ala so ayeke gue ti wara futingo, e yeke fion ti kuâ so ayeke gue na zo na kuâ,+ ti ala so a ngbâ ti sö ala, e yeke fion ti fini so ayeke gue na zo na fini. Zo wa la alingbi biani na kusala so? 17 E la e lingbi na ni. Biani, e yeke pëpe azo so ayeke kä tënë ti Nzapa+ kango tongana ti so ambeni zo mingi ayeke kä ni, me e yeke sara tënë na vuru bê tongana azo so Nzapa si atokua ala, so ayeke na gbe ti lê ti lo, nga na terê ti Christ.

3 E yeke kiri ti sara nzoni tënë ti e wani? Wala tongana ti ambeni zo, e yeke na bezoin ti ambeti so a sara nzoni tënë ti e na yâ ni ti tene e gue na ni na ala? wala e yeke na bezoin ti ambeti so ala si asû ni na so asara nzoni tënë ti e? 2 Ala la si ayeke mbeti ti e ni,+ mbeti so a sû na ndö ti bê ti e, na so azo kue ahinga ni na ayeke diko ni. 3 Ndali ti so a yeke polele so ala yeke mbeni mbeti ti Christ so e so e yeke awakua+ si e sû ni; a sû ni na encre pëpe, me na yingo ti Nzapa so ayeke na fini; a sû ni na lê ti akete tableau ti tênë pëpe,+ me na lê ti akete tableau ti mitele, so ti tene na ndö ti bê.+

4 Na lege ti Christ, e lingbi ti tene tënë so na bê ti e kue na gbele Nzapa. 5 E wani pëpe la si e bâ terê ti e so e lingbi biani nga a yeke na lege ti ngangu ti e wani si e sara ye so pëpe; me Nzapa la asara si e lingbi biani;+ 6 a yeke lo la si lo bâ e tongana azo so alingbi biani ti duti awakua ti mbeni fini mbele;+ e yeke awakua ti mbeti ti andia pëpe,+ me awakua ti yingo. Biani, mbeti ti andia afâ ngbanga ti kuâ na li ti zo,+ me yingo amû fini na zo.+

7 Tongana andia so aga na ngbanga ti kuâ na li ti zo na so a kpaka agere-mbeti ni na lê ti atênë+ abâ gigi lani na yâ ti gloire, ye so asara si amolenge ti Israël alingbi ti bâ lê ti Moïse aninga pëpe ndali ti gloire ti lê ti lo,+ gloire so ayeke hon hongo so, 8 ngbanga ti nyen si mungo yingo+ na azo aduti na yâ ti gloire mingi ahon ni ape?+ 9 Tongana andia so aga na ngbanga na li ti zo+ ayeke lani na gloire,+ kusala ti dikongo azo tongana azo ti mbilimbili ayeke duti na gloire mingi ahon ni.+ 10 Biani, même ye so ândö a mû gloire na ni, a zi gloire ni ngbanga ti so gloire ti mbeni so ahon ni mingi.+ 11 Ndali ti so tongana ye so ayeke hon hongo aga lani na yâ ti gloire,+ ye so ayeke ngbâ ti lo ngbango ayeke ga na yâ ti gloire mingi ahon ni.+

12 So e yeke na mara ti beku tongaso,+ e yeke sara tënë na kamene oko pëpe, 13 nga e yeke sara ye pëpe tongana ti ngoi so Moïse azia lani voile na lê ti lo+ si amolenge ti Israël angbâ ti bâ pëpe hunzingo ti ye so a yeke zi ni fade zingo so. 14 Me lege ti hingango ndo ti ala akanga lani.+ Biani, juska laso na ngoi so a yeke diko ngbene mbele ni,+ oko voile so angbâ tongaso, a zi ni pëpe ngbanga ti so a yeke zi ni gï na lege ti Christ.+ 15 Ni la, juska laso, tongana a yeke diko ambeti ti Moïse,+ mbeni voile angbâ na ndö ti bê ti ala.+ 16 Me tongana mbeni zo atourné na mbage ti Jéhovah,* a zi voile ni.+ 17 Jéhovah* ayeke Yingo.+ Ndo so yingo ti Jéhovah* ayeke dä, liberté ayeke dä.+ 18 Na oko ngoi so lê ti e so a zi voile dä awe ayeke za gloire ti Jéhovah* tongana ti tatara, a changé e kue ti ga tongana oko image so na ti wara gï kota gloire na kota gloire na peko ti terê,* gï tongana ti so Jéhovah,* lo so ayeke Yingo, ayeke sara.*+

4 Ni la, so e wara kusala so ndali ti so Nzapa asara nzoni bê na e, e yeke kiri na peko pëpe. 2 Me e ke aye so a sara zo kamene, aye so asara ni na gbemingo, na e yeke tambela na lege ti mayele pëpe, nga e yeke ba yâ ti tënë ti Nzapa pëpe,+ me e yeke sara si tâ tënë asigi polele, e yeke sara nzoni tënë ti e na gbele conscience ti azo kue na lê ti Nzapa.+ 3 Ni la, nzoni tënë so e yeke fa ni so tongana a yeke honde ni na gbe ti voile, a yeke honde ni na gbe ti voile na popo ti azo so ayeke gue ti wara futingo. 4 A yeke na popo ti azo so si nzapa ti aye ti ngoi so*+ asara si bibe ti azo so amä na bê pëpe avuko,+ tongaso si sungo* ti nzoni tënë ti gloire na ndö ti Christ, so ayeke image ti Nzapa,+ asu na ndö ti ala pëpe.+ 5 Ndali ti so e yeke fa tënë na ndö ti e wani pëpe, me na ndö ti Jésus Christ lo so ayeke Seigneur, me ti e, e yeke tongana angbâa ti ala ndali ti Jésus. 6 A yeke Nzapa la si atene: “Zia lumière alondo na yâ ti bingo aza,”+ na lo za lumière na ndö ti bê ti e ti sara si bê ti e ni asu+ na gloire ti hingango ye na ndö ti Nzapa na lege ti lê ti Christ.

7 Ye oko, e yeke na mosoro+ so na yâ ti ata ti sese,+ si ngangu so ahon ti so zo ayeke na ni aduti ti so alondo na Nzapa, me na e wani pëpe.+ 8 A pete e ngangu mbage na mbage kue, me e lingbi lakue ti yengi terê ti e; e hinga mbeni ye ti sarango ni pëpe, me lakue e wara mbeni lege ti sigi dä;+ 9 azo asara ye ti ngangu na e, me a dö e a zia gï tongaso pëpe;+ a kinda e, me a futi e pëpe.+ 10 Lakue na yâ ti terê ti e, e yeke hinga apasi ti kuâ so a sara na Jésus,+ si a lingbi nga ti bâ fini ti Jésus na yâ ti terê ti e. 11 Biani e so e yeke na fini, e yeke tingbi lakue na kuâ+ lê na lê ndali ti Jésus, si a lingbi nga ti bâ fini ti Jésus na yâ ti terê ti e so ayeke kui kuingo. 12 Tongaso kuâ ayeke sara kua na yâ ti e, me fini ayeke sara kua na yâ ti ala.

13 E yeke na yingo ti mabe so ague oko na ti mabe so Mbeti ti Nzapa asara tënë ni atene: “Mbi yeke lani na mabe, ndani la mbi sara tënë,”+ e nga kue e yeke na mabe, ndani la e sara tënë. 14 E hinga so Lo so azingo lani Jésus na kuâ, lo yeke zingo e ande gï tongana ti Jésus, na lo yeke mû e na ala kue ti gue na ni na gbele Jésus.+ 15 Aye kue ayeke ndali ti ala, si kota nzobe ti Nzapa so awu mingi awe akiri aga gbani gbani ngbanga ti azo mingi so ayeke kiri singila na lo, na tongaso a yeke sara si Nzapa awara gloire mingi.+

16 Tongaso e kiri na peko pëpe, me atâa zo ti e ti gigi ayeke buba bubango, zo ti e ti yâ ni angbâ ti lo ti kiri gï fini lâ na lâ. 17 Atâa so pasi* ni ayeke ye so aninga pëpe nga ye so ayapu, a yeke sara si e wara mbeni gloire so angbâ gï ti ga kota* mingi nga ayeke ti lakue lakue;+ 18 na oko ngoi ni e zia lê ti e pëpe na ndö ti aye so lê ayeke bâ, me na ndö ti aye so lê ayeke bâ pëpe.+ Ndali ti so aye so lê ayeke bâ ayeke ti kete ngoi, me aye so lê ayeke bâ pëpe ayeke ti lakue lakue.

5 E hinga so tongana a si so da ti e so ayeke na sese, so ti tene tente so, abuba,+ e yeke wara ande na yayu mbeni da so alondo na Nzapa, mbeni da so angbâ lakue lakue, so maboko ti zo la si asara ni pëpe.+ 2 E yeke dema biani na ngoi so e yeke na yâ ti da ti lango so, na e ye mingi ti yü da ti lango ti e so ayeke ti yayu,+ 3 si na peko ti so e yü ni awe, a yeke wara ande e na terê senge pëpe. 4 Biani, e so e yeke na yâ ti tente so, e yeke dema, na ye ahon ndö ti e awe; ndali ti so e ye pëpe ti zi da ni so na terê ti e, me e ye ti yü mbeni da ni so,+ si fini amene ye so ayeke kui kuingo.+ 5 A yeke Nzapa si aleke e ndali ti ye so,+ lo la si lo mû na e mbeni ye ti fa atene ye so ayeke ga ayeke si biani, ye ni so lo mû na e ayeke yingo ti lo.+

6 Tongaso, lakue e yeke na mbeto oko pëpe na e hinga so na ngoi so e ngbâ na yâ ti da ti e so ayeke terê ti e ti zo, e yeke yongoro na Seigneur,+ 7 e yeke tambela na lege ti mabe, me pëpe na lege ti ye so lê abâ. 8 Me e yeke na mbeto oko pëpe nga a nzere na e mingi ti duti yongoro na terê ti e ti zo na ti gue ti sara kodro na Seigneur.+ 9 Tongaso, wala a yeke na ngoi so e yeke sara kodro na lo wala e yeke yongoro na lo, e zia na gbele e ti nzere na lê ti lo. 10 A lingbi e kue e luti na devant ti ngende ti fango ngbanga ti Christ, si zo oko oko awara futa ti aye so lo yeke sara na yâ ti terê ti lo ti zo, a lingbi na aye so lo yeke sara, wala a yeke ye ti nzoni wala a yeke ye ti sioni.+

11 So e hinga kpengo mbeto ti Seigneur awe, e yeke ngbâ ti ga na azo ti yeda na tënë so e fa, me Nzapa ahinga e na asarango ye ti terê ti e nzoni mingi. Ye oko, mbi yeke na beku so conscience ti ala amû nga lege na ala ti hinga e na asarango ye ti terê ti e nzoni mingi. 12 E kiri e yeke sara nzoni tënë ti e na ala la pëpe, me e yeke fa na ala mbeni ye so ayeke pusu ala ti pika kate ti ala ndali ti e, si ala lingbi ti kiri tënë na azo so ayeke pika kate ti ala ndali ti ye so lê abâ,+ me ala yeke pika kate ti ala pëpe ndali ti ye so ayeke na yâ ti bê ti zo. 13 Tongana e yeke lani azo so li ti ala ayeke dä pëpe,+ a yeke ndali ti Nzapa; me tongana e yeke azo so abata bibe ti ala nzoni, a yeke ndali ti ala. 14 Ndoye so Christ ayeke na ni apusu e ti sara ye, ngbanga ti ye so e bâ ayeke so: zo oko akui ndali ti azo kue;+ tongaso azo kue akui lani awe. 15 Lo kui ndali ti azo kue si ala so ayeke na fini, ala lingbi ti ngbâ na fini ndali ti ala wani mbeni pëpe,+ me ndali ti lo so akui ndali ti ala na so a zingo lo na kuâ.

16 Ti fadeso, e hinga mbeni zo oko pëpe na lege ti mitele.+ Atâa tongana e hinga lani Christ na lege ti mitele, biani a yeke tongaso si e hinga lo fadeso mbeni pëpe.+ 17 Tongaso, tongana mbeni zo ayeke beoko na Christ, lo yeke mbeni fini création;+ angbene ye ahon awe, bâ, afini ye abâ gigi. 18 Me aye kue alondo na Nzapa, lo so asara si songo akiri na popo ti e na lo na lege ti Christ,+ nga lo mû na e kusala ti kiringo na songo,+ 19 so ti tene so, na lege ti Christ, Nzapa ayeke kiri na songo na popo ti lo na azo ti dunia;+ lo yeke diko afaute ti ala pëpe,+ na lo zia na tïtî e tokua ti kiringo na songo ni.+

20 Tongaso e yeke alembe+ na place ti Christ,+ mo bâ mo tene na lege ti e Nzapa ayeke voro yanga na azo. Tongana azo so ayeke na place ti Christ, e voro azo, e tene: “Ala kiri ala sara songo na Nzapa.” 21 Lo so lani lo sara siokpari lâ oko pëpe,+ Nzapa asara si lo ga siokpari ndali* ti e, si na lege ti lo e ga mbilimbili na lê ti Nzapa.+

6 So e yeke sara kusala legeoko na Nzapa,+ e voro nga yanga na ala ti tene ala yeda na kota nzobe ti Nzapa na ala hon nde pëpe na ye so kota nzobe ni aye.+ 2 Ndali ti so lo tene: “Na mbeni ngoi ti sarango nzoni na zo, mbi mä mo lani, nga na mbeni lango ti salut, mbi mû lani maboko na mo.”+ Bâ, fadeso a yeke biani ngoi so a sara nzoni na zo. Bâ, fadeso a yeke lango ti salut.

3 E yeke sara kue ti ga pëpe mbeni ye so asara si zo apika gere, si a kasa kusala ti e pëpe;+ 4 me na yâ ti aye kue, e wani e sara nzoni tënë ti e tongana awakua ti Nzapa+ na lege so e gbu ngangu na yâ ti aye mingi, so ti tene, na yâ ti apasi, angoi so ye amanke e, akpale,+ 5 na yâ ti apika, akanga,+ awusuwusu, akua ti ngangu, abï so e lango pëpe na angoi so e te kobe pëpe.+ 6 E fa so e yeke awakua ti Nzapa na lege so e duti na sioni oko pëpe, na lege ti hingango ye, kangango bê ti ku,+ sarango nzoni na zo,+ na lege ti yingo vulu, na lege ti ndoye ti handango lê ti zo pëpe,+ 7 na lege ti atënë so ayeke tâ tënë nga na lege ti ngangu ti Nzapa.+ E fa nga ni na gbungo aye ti bira ti mbilimbili+ na maboko ti e ti koli* nga na ti wali,* 8 na yâ ti gloire nga na yâ ti kamene, na lege so a yeke tene sioni tënë na iri ti e nga a yeke tene nzoni tënë na iri ti e; a bâ e tongana azo ti handango azo, andâ e yeke tene tâ tënë. 9 E sara nga nzoni tënë ti e wani na lege so a bâ e tongana azo so a hinga ala pëpe, andâ a hinga e nzoni; a bâ e tongana azo so ayeke kui kuingo,* andâ e yeke na fini;+ a bâ e tongana azo so a punir ala, me a fâ e pëpe;+ 10 a bâ e tongana azo so ayeke na vundu, me e yeke na ngia lakue; a bâ e tongana awayere, me e sara si azo mingi aga awamosoro; a bâ e tongana azo so ayeke na ye oko pëpe, andâ e yeke na aye kue.+

11 Aita ti Corinthe, e sara tënë na ala polele nga ndoye so ayeke na bê ti e amaï.* 12 E ke ti fa ndoye ti e na ala pëpe,+ me ala la ake ti fa tâ ndoye so ayeke na bê ti ala. 13 Ni la, ti sara nga tongaso na e, mbi sara tënë na ala tongana amolenge ti mbi, ala nga ala maï ndoye so ayeke na bê ti ala.+

14 Ala bungbi oko pëpe na azo so amä na bê pëpe na gbe ti joug oko so alingbi terê pëpe.+ Biani, songo wa ayeke na popo ti mbilimbili na kpengo ndia ape?+ Wala lumière na bingo aduti ndo oko?+ 15 Nga, mango terê wa la si atingbi Christ na Bélial?*+ Wala nyen la si abungbi zo so amä na bê* na zo so amä na bê pëpe?+ 16 Nga mango terê wa la si ayeke na popo ti temple ti Nzapa na ayanda?+ Ndali ti so e yeke mbeni temple ti Nzapa so ayeke na fini,+ gï tongana ti so Nzapa atene: “Mbi yeke sara ande kodro na popo ti ala+ na mbi yeke tambela na popo ti ala, mbi yeke ga Nzapa ti ala na ala yeke ga azo ti mbi.”+ 17 “Jéhovah* atene: ‘Tongaso ala sigi na popo ti azo ni, ala duti nde, ala zia ti ndu sioni ye’;+ ‘na mbi yeke yamba ala ande.’”+ 18 “Jéhovah,* lo so ngangu ti lo ahon angangu kue, atene: ‘Mbi yeke duti ande babâ ti ala,+ na ala yeke duti ande amolenge ti mbi ti koli na amolenge ti mbi ti wali.’”+

7 Aita so mbi ndoye ala mingi, so e yeke na azendo so,+ zia e sukula terê ti e wani ti zi aye kue so asara si terê na bibe+ aga sioni, nga na lege ti kpengo mbeto ti Nzapa zia e gi ti ga azo so ayeke nzoni-kue ahon ti kozo.

2 Ala leke mbeni ndo na e na yâ ti bê ti ala.+ E sara sioni na zo oko pëpe, e buba sarango ye ti zo oko pëpe, e wara go na ndö ti zo oko pëpe.+ 3 Mbi sara tënë so pëpe ti fâ ngbanga na ndö ti ala. Ndali ti so mbi tene kozoni awe so, atâa e yeke na fini wala e kui, ala yeke lakue na yâ ti bê ti e. 4 Mbi yeke sara tënë na ala na kamene oko tongaso pëpe. Mbi pika kate ti mbi mingi na ndö ti ala. Bê ti mbi adë kue nga mbi yeke na ngia mingi na yâ ti pasi ti e kue.+

5 Biani, na ngoi so e si lani na Macédoine,+ e wara lege ti wu terê ti e pëpe,* me e ngbâ ti bâ pasi na alege nde nde kue: na gigi tiri ayeke dä, na yâ ni a yeke mbeto. 6 Me, Nzapa, lo so ayeke dë bê ti ala so vundu ahon ndö ti ala,+ adë bê ti e na lege so Tite aduti na terê ti e, 7 gï na lege ti dutingo ti lo na terê ti e pëpe, me nga na lege ti dengo bê so lo wara ngbanga ti ala, ndali ti so lo kiri lo sara tënë ti ala na e, lo tene so ala yeke na kota nzara ti bâ mbi, ala yeke na vundu mingi nga ala bibe ti ala na mbi. Tongaso terê ti mbi akiri anzere mingi.

8 Atâa tongana mbeti so mbi tokua na ala azia vundu na bê ti ala,+ vundu asara mbi ndali ni pëpe. Même tongana kozoni vundu asara mbi (so mbi bâ mbeti ni azia vundu na bê ti ala, atâa vundu ni ayeke gï ti kete ngoi), 9 fadeso mbi yeke na ngia. Mbi yeke na ngia gï pëpe ndali ti so mbeti ni azia vundu na bê ti ala, me ndali ti so vundu ni ague na ala ti changé bê ti ala. Vundu so ala wara ague oko na ye so bê ti Nzapa aye, tongaso si mbeni ye ti sioni awara ala pëpe ndali ti e. 10 Ndali ti so vundu so ague oko na ye so bê ti Nzapa aye asara si zo achangé bê ti lo ti wara salut, so ye ti sara mawa ni la pëpe;+ me vundu so ayeke ti dunia so aga na kuâ. 11 Ala bâ ye so vundu so ague oko na ye so bê ti Nzapa aye aga na ni: ala sara ye na ngangu ti ala kue, ala gi ti zi tënë na li ti ala, bê ti ala ason na sioni ye so asi, ala yeke na mbeto ti Nzapa, ala ye mingi ti sara ye, ala yapu na sarango ye, ala leke ye ti sioni so asi.+ Na yâ ti ye kue, ala fa so ala yeke na tënë oko pëpe na li ti ala na ndö ti tënë so. 12 Biani, tongana mbi sara lani mbeti na ala, mbi sara ni pëpe ndali ti zo so asara sioni;+ mbi sara ni nga pëpe ndali ti zo so a sara sioni na lo, me mbi sara ni ti tene na popo ti ala nga na gbele Nzapa a bâ ngangu so ala sara ti mä tënë ti e. 13 Ndani la si bê ti e adë.

Me na ndö ti bê ti e so adë, e kiri e duti na ngia mingi ndali ti ngia so Tite ayeke na ni, ndali ti so ala kue ala sara si bê ti lo adë. 14 Ndali ti so tongana lani mbi pika kate na ndö ti ala na lê ti lo, kamene asara mbi na pekoni pëpe; me tongana ti so aye kue so e tene na ala ayeke tâ tënë, tongaso nga a bâ so pikango kate so e pika na lê ti Tite ayeke tâ tënë. 15 Nga, tongana lo dabe ti lo na lege so ala kue amä yanga+ nga lege so ala yamba lo lani na mbeto nga na dongo terê, lo kiri lo ye ala mingi. 16 Mbi yeke na ngia so na alege nde nde kue mbi lingbi ti zia bê ti mbi na ndö ti ala.*

8 Aita, e yeke tene na ala tënë ti kota nzobe ti Nzapa so lo sara na acongrégation ti Macédoine.+ 2 Na ngoi ti mbeni kota tara, na yâ ti pasi, ala fa so ala yeke na ngia mingi na ala mû ye mingi* na zo, atâa so ala yeke na yâ ti kota yere. 3 Ye so ala sara alingbi na ngangu ti ala,+ na mbi lingbi ti tene so ala sara ni ahon ndö ti ngangu ti ala biani,+ 4 nga ala wani ahunda e mingi ti tene e zia lege na ala ti mû ye na nzobe nga ti mû mbage na yâ ti kusala ti mungo maboko so a yeke sara ni ndali ti azo ti be-vulu.+ 5 Ala mû ye ni gï tongana ti so e ku fade pëpe, me ala mû terê ti ala kozoni kue na Seigneur nga na e na lege ti ye so bê ti Nzapa aye. 6 Tongaso, e wa Tite+ ti hunzi kua ti rongo matabisi so ala mû ni na nzobe so, ndali ti so lo la lo komanse kua ni na popo ti ala. 7 Gï tongana ti so ala yeke na aye so kue mingi awe, ala yeke na mabe, ala hinga ti sara tënë, ala hinga ye, ala yapu na sarango ye nga ala wu mingi na yâ ti ndoye ti e na mbage ti ala, zia ala wu mingi nga na ndö ti tënë ti mungo ye na nzobe.+

8 A yeke pëpe ti mû yanga na ala si mbi yeke sara tënë so, me mbi sara tënë so ndali ti ambeni mba ti ala so ayapu na sarango ye nga ti bâ wala ala yeke na tâ ndoye biani. 9 Ala hinga kota nzobe ti Seigneur ti e Jésus Christ: atâa so lo yeke lani zo ti mosoro, lo ga wayere ndali ti ala+ ti tene ala ga azo ti mosoro na lege ti yere ti lo.

10 Mbi yeke fa tënë ti bê ti mbi na ndö ti tënë so:+ Ye ni so ayeke ndali ti nzoni ti ala, ndali ti so mbi bâ so a sara ngu oko awe la si ala komanse ti sara ni. Ala ye gï pëpe ti sara ni, me ala komanse ti sara ni awe. 11 Tongaso, zia ala hunzi nga ni legeoko tongana ti so lani bê ti ala aye biani ti sara ni, ala mû nga ye so ala yeke na ni so ti hunzi na ni. 12 Tongana bê ti zo aye biani ti mû ye, a yeke yamba ye ni alingbi na ye so lo yeke na ni,+ me a yeke yamba ni pëpe alingbi na ye so lo yeke na ni pëpe. 13 Ndali ti so mbi ye pëpe si mungo ye ni awoko na ambeni zo, na a kpengba na ala. 14 Me ti tene ye ni alingbi terê, mbi ye si ye so ala yeke na ni ahon ndö ni akanga fadeso lê ti ye so amanke azo so, nga ye so azo so ayeke na ni ahon ndö ni akanga lê ti ye so amanke ala, si ye ni alingbi terê. 15 Legeoko tongana ti so Mbeti ti Nzapa atene: “Zo so ayeke fade na ni mingi, ti lo ahon ndö ni pëpe, na zo so ayeke fade na ni kete, ti lo ayeke kete mingi pëpe.”+

16 Singila na Nzapa ndali ti so lo zia na yâ ti bê ti Tite+ oko bibe ti e so ayeke ti yapu na sarango ye na mbage ti ala, 17 ndali ti so lo yeke biani nduru ti yeda na wango ni, nga lo yapu mingi na sarango ye, a yeke na bê ti lo wani la si lo yeke gue na ala kâ. 18 Me na terê ti lo, e yeke tokua nga ita so tënë ti gonda so lo wara ndali ti nzoni tënë amû yâ ti acongrégation kue. 19 Na gï ndali ti tënë so pëpe, me nga ndali ti so acongrégation asoro lo ti duti na terê ti e na yâ ti tambela ni ngbanga ti matabisi so a mû na nzoni bê, matabisi so e si e yeke bâ lege ni ndali ti gloire ti Seigneur nga ti fa so bê ti e aye mingi ti mû maboko na ambeni zo. 20 Ni la, e kpe ti tene mbeni zo asara sioni tënë na ndö ti e ndali ti kota nginza so a mû na so e yeke bâ lege ni.+ 21 Biani, e ‘leke na bê ti e ti sara ye kue mbilimbili, gï na lê ti Jéhovah* pëpe, me na lê ti azo nga.’+

22 Nga, e yeke tokua legeoko na ala ita ti e so fani mingi e tara lo na yâ ti aye mingi nga e bâ so lo yapu na sarango ye, me ti fadeso lo yapu na sarango ye mingi ahon ti kozo ndali ti so lo zia bê ti lo kue na ala. 23 Ye oko, tongana ala yeke na kite na ndö ti Tite, bâ lo yeke zo so amû mbage legeoko na mbi na yâ ti kusala nga mba ti mbi wakua ndali ti nzoni ti ala; wala tongana ala yeke na kite na ndö ti aita ti e ni, bâ ala yeke abazengele ti acongrégation na ala yeke gloire ti Christ. 24 Tongaso, na lê ti acongrégation ni, zia ala fa na aita ni ye so afa atene ala yeke na ndoye+ nga ala fa ye so e pika kate ti e na ndö ti ala ndali ni.

9 Âdu ti kusala so a sara ni ndali ti azo ti be-vulu,+ mbi bâ so a yeke kota ye pëpe ti sû mbeti na ala ndali ni. 2 Mbi hinga so bê ti ala ayeke lakue nduru ti sara ye, na mbi pika kate na ndö ni na lê ti aita ti Macédoine, mbi tene so a sara ngu oko fadeso awe la aita ti sese ti Achaïe aleke terê ti ala ti mû ye, nga yapungo terê ti ala so azia nzara ti sarango ye na bê ti mingi ti aita ti Macédoine. 3 Me mbi yeke tokua aita ni si, na ndö ti tënë so, pikango kate ti e na ndö ti ala angbâ senge pëpe, me ti tene ala leke terê ti ala biani awe tongana ti so mbi yeke tene lani. 4 Tongaso pëpe, tongana a si so mbi na aita ti Macédoine e gue kâ na aita ni abâ so ade ala leke terê ti ala pëpe, gï ala oko pëpe me e nga kue e yeke duti ande na kamene ngbanga ti so e zia bê ti e kue na ndö ti ala. 5 Tongaso, mbi bâ so a yeke nzoni ti hunda na aita ni ti si ti ala kozoni na ala kâ, nga ti bungbi kozoni matabisi ti nzobe so ala mû zendo awe ti mû so, tongaso si ye ni alingbi ti duti nduru tongana mbeni matabisi so a mû ni na nzobe, me pëpe mbeni ye so a mû ni mungo na likisi na tïtî ala.

6 Me na ndö ti tënë so mbi tene fade, zo kue so alu ye kete kete, lo yeke ko ande ni kete kete nga; na zo kue so alu ye mingi mingi, lo yeke ko ande ni mingi mingi nga.+ 7 Zia zo oko oko asara tongana ti so lo leke na bê ti lo ti sara, na vundu na bê pëpe wala a gbu lo gbungo na ngangu pëpe,+ ndali ti so Nzapa andoye zo so amû ye na ngia.+

8 Nga, Nzapa alingbi ti sara si kota nzobe ti lo kue asi singo na mbage ti ala, si atâa so ala yeke na aye kue alingbi ala awe, ala lingbi ti wara aye mingi ti mû lege na ala ti sara na nzoni kusala kue.+ 9 (Legeoko tongana ti so Mbeti ti Nzapa atene: “Lo kangbi ye mingi mingi, lo mû ye na awayere, mbilimbili ti lo angbâ lakue lakue.”+ 10 Lo so amû ngongoa mingi na zo ti lungo ye nga na mapa ti tengo ni, lo yeke mû ande na ala ngongoa ti tene ala lu na lo sara si ngongoa ni awu nga lo yeke sara ande si aye ti peko ti mbilimbili ti ala awu mingi.) 11 Nzapa airi tënë nzoni na ndö ti ala na yâ ti ye kue si na alege nde nde kue ala lingbi ti mû ye mingi na azo, si na lege ti ye so e sara, mara ti mungo ye mingi tongaso apusu azo ti kiri singila na Nzapa, 12 ndali ti so kusala so ala yeke sara ni ndali ti nzoni ti azo ayeke gï pëpe mungo na azo ti be-vulu+ aye mingi so amanke ala, me nga a yeke ti sara si a kiri singila mingi na Nzapa. 13 Ndali ti ye so kusala ti mungo maboko so asara, azo ni amû gloire na Nzapa ngbanga ti so ala yeda na nzoni tënë na ndö ti Christ, tongana ti so ala tene ni dandara, na ngbanga ti so ala mû na nzoni bê matabisi mingi na azo ti be-vulu nga na azo kue.+ 14 Azo ti be-vulu avoro terê mingi na Nzapa ndali ti ala, na ala ye mingi ti bâ ala ngbanga ti kota nzobe ti Nzapa so ayeke na ndö ti ala, kota nzobe so mbeni ye ti lingbi na ni ayeke dä pëpe.

15 Singila na Nzapa ndali ti matabisi ti lo so lo mû ni senge senge, so a lingbi ti fa ndani kue pëpe.

10 Mbi Paul, mbi voro yanga na ala na lege ti sarango ye ti Christ na ngangu pëpe nga na lege ti sarango nzoni ti lo;+ mbi so tongana mbi yeke na popo ti ala+ mbi kpa mbeni zo so adë dengo, me tongana mbi yeke dä pëpe mbi yeke sara ye na ala na mbeto pëpe.+ 2 Biani, mbi voro ala: Mbi ye pëpe si na ngoi so mbi yeke duti na terê ti ala kâ, mbi son na ndö ti zo, tongana ti so mbi leke na bê ti mbi awe ti mû angangu desizion na terê ti ambeni so abâ e tongana azo so ayeke tambela alingbi na abibe ti e ti mitele. 3 Atâa so e yeke azo ti mitele, e yeke tiri bira alingbi na abibe ti e ti mitele pëpe. 4 Aye ti bira ti e ayeke ti mitele pëpe,+ me Nzapa asara si aye ti bira so akpengba ti kinda na aye so gere ni aluti ngangu.+ 5 E yeke kinda atënë so ayeke na lege ni pëpe nga na kota ye kue so alondo ti ke hingango ye ti Nzapa.+ Na e mû bibe kue na ngbâa ti sara si bibe ni amä yanga ti Christ. 6 Nga na peko ti so ala fa so ala ga azo ti mango yanga na yâ ti ye kue awe,+ e yeke duti nduru ti punir azo kue ti kengo yanga.

7 Ala yeke bâ ti ala gï ye so lê ti zo abâ. Tongana mbeni zo abâ biani so lo yeke ti Christ, zia lo kiri lo dabe ti lo na tënë so: Gï tongana ti so lo yeke ti Christ, e nga kue e yeke ti Christ. 8 Ndali ti so tongana a si so mbi pika kate ti mbi ahon ndö ni kete ndali ti komandema so Seigneur amû na e ti leke ala si ala luti me ti sara si ala tï pëpe,+ kamene ayeke sara mbi pëpe. 9 Mbi ye pëpe ti tene ala bâ atene mbi yeke gi lani ti zia mbeto na bê ti ala na lege ti ambeti ti mbi. 10 Ndali ti so ambeni atene: “Atënë ti yâ ti ambeti ti lo ane nga ayeke na ngangu, me tongana lo yeke na terê ti e, lo yeke na ngangu pëpe nga lo yeke tene mbeni sörö tënë pëpe.” 11 Zia zo tongaso ahinga tënë so nzoni: Oko sarango ye ti e so asigi na yâ ti ambeti so e tokua na ala na ngoi so e yeke dä pëpe so, a yeke gï ni la si e yeke sara ande tongana e yeke na terê ti ala.+ 12 Ndali ti so e wani e yeke zia pëpe si ye ahanda e ti zia terê ti e na popo ti ambeni so ala wani+ si ayeke sara nzoni tënë ti ala wala ti haka terê ti e na ala. Biani, na bango terê ti ala tongana azo so alingbi awe, gï na lege ti andia ti ala wani, nga na hakango terê ti ala gï na ala wani, ala fa so hingango ndo amanke ala.+

13 Ye oko, e yeke pika ande kate pëpe ahon akatikati ti ndo so a mû na e ti sara kua dä, me e yeke pika kate ti e gï na yâ ti katikati ti ndo so Nzapa adiko yongo ni si amû na e, ndo so ala nga kue ayeke na yâ ni.+ 14 Ti tâ tënë ni, e yeke hon pëpe akatikati ti ndo so a fa na e ti sara kua dä; e yeke hon ni gï tongana fade ala yeke na yâ ni pëpe; me e yeke hon akatikati so pëpe ndali ti so e la e yeke akozo zo so a si juska na ala ti fa nzoni tënë na ndö ti Christ.+ 15 Ên-ën, e yeke pika kate ti e pëpe na ndö ti ngangu kusala ti mbeni zo nde ahon akatikati ti ndo so a mû na e ti sara kua dä. Me e yeke na beku so, na ngoi so mabe ti ala ayeke kono, e lingbi ti sara kota kua mingi na popo ti ala na yâ ti ndo so a mû na e. Na pekoni e yeke sara ande même kota kua ahon ti fadeso, 16 ti fa nzoni tënë na akodro so ayeke kâ na peko ti ala, si e pika kate ti e pëpe na ndö ti mbeni ye so a sara ni awe na yâ ti mbeni ndo so a mû na mbeni zo nde. 17 “Me zo so ayeke pika kate, zia lo pika kate na ndö ti Jéhovah.”*+ 18 A yeke pëpe zo so ayeke sara nzoni tënë ti lo wani si a yeke yeda na lo,+ me a yeke yeda gï na zo so Jéhovah* si asara nzoni tënë ti lo.+

11 Mbi ye si ala kanga bê ti ala na mbi na mbeni kete ye so ayeke na lege ni pëpe so mbi yeke sara. Biani, ala yeke kanga bê ti ala na mbi! 2 Mbi sara mbanda ti ala tongana ti Nzapa, ndali ti so mbi wani mbi mû zendo ti mû ala na mariage na mbeni koli oko, so ayeke Christ. Na mbi ye ti mû ala na lo tongana mbeni maseka-wali so ade ti hinga koli pëpe na so ayeke na sioni oko pëpe.+ 3 Me mbeto asara mbi, ndali ti so mbi hinga pëpe wala, legeoko tongana ti so ngbo ahanda lani Ève na lege ti mayele ti lo,+ mbeni ye abuba hingango ndo ti ala si ala gue yongoro na dutingo na vuru bê nga na dutingo na sioni oko pëpe so Christ alingbi na ni.+ 4 Ndali ti so tongana mbeni zo aga, na lo fa tënë ti mbeni Jésus nde na Jésus so e fa tënë ti lo awe, wala ala wara mbeni yingo nde na ti so ala wara kozoni, wala mbeni nzoni tënë nde na ti so ala yeda na ni kozoni,+ ala yeke kanga bê ti ala hio na zo so. 5 Biani, mbi bâ so akota bazengele ti ala ni ahon mbi na mbeni ye oko tongaso pëpe.+ 6 Même tongana kode ti sarango tënë amanke mbi,+ ti tâ tënë ni hingango ye amanke mbi pëpe. Me, na alege kue, e fa hingango ye ni na ala na yâ ti ye kue.

7 Wala so mbi sara terê ti mbi kete na mbi yeke na ngia ti fa nzoni tënë ti Nzapa na ala senge senge si ala ga kota so, mbi sara siokpari la?+ 8 Mbi mû ye* ti ambeni congrégation na ngangu na lege so mbi yeda ti mû aye so acongrégation ni amû na mbi ti mû maboko na mbi, si mbi sara na kusala na ala.+ 9 Ye oko, tongana mbi yeke lani na terê ti ala na ye amanke mbi, mbi ga mbeni nengo kungba na ndö ti zo oko pëpe, ngbanga ti so aita so alondo na Macédoine si aga amû na mbi aye mingi so amanke mbi.+ Biani, na alege kue mbi bata terê ti mbi si mbi ga mbeni nengo kungba na ndö ti ala pëpe na mbi yeke ngbâ gï ti sara tongaso.+ 10 Mbi yeke tene tâ tënë tongana ti so Christ atene: Na yâ ti akodro ti Achaïe a yeke kanga ande lege na mbi pëpe ti pika kate ti mbi.+ 11 Mbi sara tongaso ngbanga ti nyen? Ngbanga ti so mbi ndoye ala ape? Nzapa ahinga so mbi ndoye ala.

12 Ye so mbi yeke sara so, mbi yeke ngbâ ande ti sara ni+ si mbi lingbi ti zi ye so ambeni zo ayeke gï ti luti na ndö ni ti tene a bâ so ala lingbi na oko kusala so e yeke na ni, so ala yeke pika kate ti ala dä so. 13 Biani, azo tongaso ayeke abazengele ti wataka; kua ti ala ayeke gï ti handa azo, na ala yeke sara terê ti ala tongana abazengele ti Christ.+ 14 A yeke ye ti dongo bê pëpe, ngbanga ti so Satan wani ayeke sara terê ti lo lakue tongana mbeni ange ti lumière.+ 15 Tongaso, a yeke fini ye pëpe tongana awakua ti lo nga ayeke sara terê ti ala lakue tongana awakua ti mbilimbili. Me ye so ayeke si ande na ala na nda ni ayeke lingbi na akusala ti ala.+

16 Mbi kiri mbi tene: Zia mbeni zo abâ mbi pëpe tongana zo so ayeke sara ye ahon ndö ni. Ye oko, tongana biani ala bâ mbi tongaso, zia ala yeda na mbi tongana zo so ayeke sara ye ahon ndö ni, si mbi nga mbi lingbi ti pika kate ti mbi kete. 17 Tënë so mbi yeke tene so, mbi mû na peko ti tapande ti Seigneur la pëpe, me mbi yeke tene ni tongana ti zo so ayeke sara ye ahon ndö ni, tongana ti zo so lo tene lo hinga biani awe nda ti ye so lo yeke pika kate ti lo ndali ni. 18 So azo mingi ayeke pika kate ndali ti aye ti sese, mbi kue mbi yeke pika ande kate ti mbi. 19 So ala yeke azo so ayeke “sara ye ahon ndö ni pëpe” so, a nzere na ala ti kanga bê na azo so ayeke sara ye ahon ndö ni. 20 Ti tâ tënë ni, ala yeke kanga bê ti ala na zo kue so agbu ala na ngbâa, zo kue so ate aye so ala yeke na ni, zo kue so agbu na ngangu ye so ala yeke na ni, zo kue so asara terê ti lo kota zo na ndö ti ala, zo kue so apika lê ti ala.

21 Kamene asara e ti tene tënë so, ngbanga ti so na lê ti ambeni zo mo bâ mo tene e yeke na ngangu pëpe ti sara kua na komandema ti e na lege ni.

Me tongana mbeni zo ayeke na mbeto pëpe ti sara mbeni ye, mbi yeke tene tënë so tongana zo so ayeke sara ye ahon ndö ni, mbi kue mbi yeke duti na mbeto pëpe ti sara ni. 22 Ala yeke aHébreu? Mbi nga kue.+ Ala yeke azo ti Israël? Mbi nga kue. Ala yeke hale* ti Abraham? Mbi nga kue.+ 23 Ala yeke awakua ti Christ? Mbi kiri tënë tongana mbeni zo so fou asara lo, mbi yeke wakua ti Christ ahon ala mingi, mbi hon ala mingi na aye so: angangu kua,+ akanga so mbi sara,+ apika so mbi wara nga fani mingi mbi sigi na yanga ti kuâ.+ 24 Fani oku aJuif apika mbi na zaza yanga ni 39,+ 25 fani ota a pika mbi na akeke,+ fani oko a bo mbi na tênë,+ fani ota bateau atuku na mbi,+ mbi sara lâ oko na bï oko na yâ ti kota ngu; 26 fani mingi mbi yeke gï na yâ ti tambela, na yâ ti akpale na lê ti akota ngu, na maboko ti azo ti gbungo ye ti azo na ngangu, na maboko ti azo ti kodro ti mbi wani,+ na maboko ti azo ti ambeni mara nde,+ mbi wara akpale na yâ ti gbata,+ na yâ ti benyama, na lê ti ngu-ingo, na maboko ti aita ti wataka, 27 na yâ ti ngangu kua nga na pasi; fani mingi na bï mbi lango pëpe;+ ti ambeni a yeke nzara ti kobe na nzara ti ngu;+ fani mingi mbi yeke na kobe pëpe;+ mbi yeke na yâ ti dê nga mbi yeke na bongo pëpe.*

28 Na ndö ti mara ti aye so kue, ye so agbu bê ti mbi si mbi yeke gi bê ti mbi dä lâ na lâ ayeke tënë ti acongrégation kue.+ 29 Zo wa la si awoko, si mbi woko ape? Zo wa la si mabe ti lo atï, si bê ti mbi ason ape?

30 Tongana a yeke tënë ti pikango kate, mbi yeke pika ande kate ti mbi na ndö ti aye so afa so mbi woko. 31 Nzapa nga Babâ ti Seigneur Jésus, lo so a lingbi a gonda lo lakue lakue, ahinga so mbi yeke tene mvene pëpe. 32 Na Damas, gouverneur so ayeke na gbe ti Gbia Arétas azia azo ti bata yanga ti gbagba ti gbata ni ti gbu mbi, 33 me a zia mbi na yâ ti mbeni sakpa na a yôro mbi na lê ti mbeni fenêtre ti terê ti gbagba ni+ si mbi descend na sese na mbi kpe na maboko ti lo.

12 A lingbi mbi pika kate ti mbi. Nzoni ye ti peko ni ayeke dä pëpe; me fadeso mbi yeke sara tënë ti ambeni ye ti ndima so mbi bâ tongana vision+ nga na ti aye so Seigneur afa na mbi.+ 2 Mbi hinga mbeni koli so ayeke beoko na Christ. A sara ngu 14 awe, a mû lo a hon na lo juska na ota yayu ni; wala a hon na lo na terê ti lo ti zo, wala na terê ti lo ti zo pëpe, mbi hinga pëpe; Nzapa la si ahinga ni. 3 Ti tâ tënë ni, mbi hinga mbeni koli tongaso so a hon na lo, wala a hon na lo na terê ti lo ti zo wala na terê ti lo ti zo pëpe, mbi hinga pëpe; Nzapa la si ahinga ni. 4 A mû koli so a hon na lo na paradis na lo mä ambeni tënë so zo akpa ti tene peko ni pëpe, atënë so a mû lege na zo ti tene ni pëpe. 5 Mbi yeke pika ande kate ti mbi na ndö ti koli tongaso; mbi yeke pika kate na ndö ti mbi wani pëpe, me gï na ndö ti aye so afa so mbi woko. 6 Ndali ti so tongana mbi ye ti pika kate ti mbi, mbi yeke ga ande pëpe zo so ayeke sara ye ahon ndö ni, ngbanga ti so mbi yeke tene tâ tënë. Me mbi gbanzi terê ti mbi ti pika kate ti mbi si mbeni zo alingbi ti gonda mbi pëpe ahon ye so lo bâ mbi na sarango ni, wala ye so lo mä mbi na tenengo ni, 7 gï ndali ti gbâ ti aye so Nzapa afa na mbi.

Ti tene mbi gonda terê ti mbi ahon ndö ni pëpe, a zia mbeni kî na yâ ti terê ti mbi,+ mbeni ange ti Satan, ti ngbâ ti pika mbi, tongaso si mbi lingbi ti gonda terê ti mbi ahon ndö ni pëpe. 8 Fani ota mbi voro yanga na Seigneur ti tene lo zi kî so na terê ti mbi, 9 me lo tene biani na mbi, lo tene: “Kota nzobe ti mbi alingbi na mo awe; ndali ti so na ngoi so mo woko, ngangu ti mbi aga ye so alingbi kue.” Ni la, mbi ye mingi ti pika ande kate ti mbi na ndö ti awokongo ti mbi,+ tongaso si ngangu ti Christ angbâ tongana mbeni tente na ndö ti mbi. 10 Tongaso, ndali ti Christ, mbi wara ngia na yâ ti awokongo ti mbi, na yâ ti azonga, na yâ ti angoi so aye amanke mbi, na yâ ti aye ti ngangu so a sara na mbi nga na yâ ti akpale. Biani, na ngoi so mbi woko, a yeke na ndembe ni so la si mbi yeke na ngangu.+

11 Mbi ga zo so ayeke sara ye ahon ndö ni. Ndali ti so tongana ala sara fade nzoni tënë ti mbi, ka a pusu mbi pëpe ti ga tongana zo so ayeke sara ye ahon ndö ni. Même tongana mbi yeke ye oko pëpe, akota bazengele ti ala ni ahon mbi na ye oko pëpe.+ 12 Biani, ala wani ala bâ aye so afa atene mbi yeke bazengele: gbungo ngangu mingi,+ afä, aye ti kpene nga na akusala ti ngangu.+ 13 Nyen la ala yeke na ni pëpe si ambeni congrégation ayeke na ni? Gï so mbi ga mbeni nengo kungba na ndö ti ala pëpe.+ Ala pardonné mbi na sioni ti mbi ni so!

14 Ala bâ, a yeke ti fani ota ni la mbi leke terê ti mbi ti gue na ala kâ, mbi yeke ga ande mbeni nengo kungba na ndö ti ala pëpe. Ndali ti so mbi yeke gi ti mû aye ti ala pëpe,+ me a yeke ala wani si mbi yeke gi; ngbanga ti so a yeke ti amolenge+ ti bata ye ndali ti kekereke ti ababâ na amama ti ala pëpe, me a yeke ti ababâ na amama ti bata ye ndali ti kekereke ti amolenge ti ala. 15 Ti mbi, mbi yeke duti ande na ngia mingi ti mû aye ti mbi kue nga ti kä terê ti mbi kue ndali ti ala.*+ So mbi ndoye ala ahon ndö ni so, ala yeke ndoye mbi gï kete? 16 Ti tâ tënë ni, mbi ga lani kungba na ndö ti ala pëpe.+ Ye oko, ala tene mbi yeke “zo ti mayele” na mbi gbu ala “na lege ti handango ndo.” 17 Me mbi wara go pëpe na ndö ti ala na lege ti mbeni oko ti aita so mbi tokua na ala kâ. Mvene la? 18 Mbi hunda mingi na Tite ti gue kâ nga mbi tokua ita ni legeoko na lo. Tite awara go oko pëpe na ndö ti ala, ni la ape?+ E kue e tambela lani gï na oko bibe so, ni la ape? E kue e sara ye gï legeoko, ni la ape?

19 Ala bâ ti ala atene, atënë so kue e tene so, e yeke gbu koko ti e na gbele ti ala la? A yeke na gbele Nzapa la si e ngbâ ti sara atënë so tongana azo so asara beoko na Christ. Me, aita ti mbi so mbi ndoye ala mingi, aye kue so e sara ayeke ti kpengba ala. 20 Mbeto asara mbi, si na mbeni lege, tongana mbi si kâ mbi wara ala pëpe tongana ti so mbi ye, nga mbi duti na lê ti ala pëpe tongana ti so ala ye. Me mbeto asara mbi ti wara ala na yâ ti tiri, kota bê, kota ngonzo, papa, dikongo sioni tënë na peko ti zo, dikongo atënë na gbe ti go,* sarango ye na baba nga na yâ ti wusuwusu. 21 Peut-être tongana mbi kiri mbi si kâ, Nzapa ti mbi ayeke zia kamene na lê ti mbi na gbele ala, na mbi yeke wara vundu ndali ti mingi ti ala so asara lani siokpari me so achangé bê ti ala pëpe na sioni ye, lango-sioni* nga na sarango sioni ye sân kamene,* aye so ala ngbâ na yâ ni.

13 Mbi yeke gue na ala kâ ti fani ota ni la. “Na lege ti tënë ti yanga ti atémoin use wala ota, gere ti tënë kue aluti nzoni.”+ 2 Atâa so mbi yeke dä fadeso pëpe, a yeke mo bâ mo tene mbi yeke dä tongana ti fani use ni awe, na mbi yeke tokua tënë so kozoni na ala so asara lani siokpari nga na atanga ni kue ti gboto mê ti ala, si tongana mbi kiri mbi si kâ mbeni zo ti kpe punition ayeke ti lo ande dä pëpe, 3 ndali ti so ala yeke gi ti bâ mbeni ye so afa atene Christ ayeke sara tënë na lege ti mbi, Christ so awoko pëpe na yâ ti songo ti lo na ala, me lo yeke ngangu na popo ti ala. 4 Biani, a yeke ndali ti wokongo si a fâ lo lani na ndö ti keke, me na ngangu ti Nzapa+ lo yeke na fini. Ti tâ tënë ni, e nga kue e woko legeoko tongana ti so lo woko lani,+ me e yeke duti ande na fini legeoko na lo ndali ti oko ngangu ti Nzapa so ayeke sara kua na popo ti ala.+

5 Ala ngbâ ti bâ yâ ti asarango ye ti ala ti bâ wala ala yeke na yâ ti mabe, ala ngbâ ti bâ terê ti ala nzoni wala ala wani ala yeke tongana nyen.+ Christ ayeke beoko na ala, ala hinga tongaso ape? Me Christ ayeke beoko na ala pëpe tongana a ke ala. 6 Mbi yeke biani na beku so ala yeke hinga ande so a ke e pëpe.

7 E sambela Nzapa si ala lingbi ti sara mbeni ye ti sioni oko pëpe. Ye so apusu mbi ti sara tongaso ayeke pëpe ti tene a bâ e tongana azo so a yeda na ala, me ti tene ala sara ye so ayeke nzoni mingi, atâa tongana a bâ e tongana azo so a ke ala. 8 Ndali ti so e lingbi ti sara mbeni ye ti ke tâ tënë pëpe, me e yeke sara gï ye ndali ti tâ tënë ni. 9 Même tongana e woko, si ala yeke ti ala na ngangu, e yeke lakue na ngia. E yeke sambela ti tene ala kiri na nzoni lege. 10 Ndani la, atâa so mbi yeke na terê ti ala pëpe, mbi sû aye so na ala na mbeti si tongana mbi yeke na terê ti ala, mbi lingbi ti son na ndö ti ala pëpe, ndali ti so Seigneur amû na mbi komandema+ ti leke ala si ala luti, me ti sara si ala tï pëpe.

11 Ti hunzi na ni, aita, ala ngbâ ti duti na ngia, ti zia si a kiri na ala na nzoni lege, ti yeda si ambeni zo adë bê ti ala,+ ti duti na oko bibe,+ ti duti na siriri;+ na Nzapa ti ndoye nga na ti siriri+ ayeke duti ande na ala. 12 Ala bara terê na popo ti ala na ala su ngbangba ti mba tongana ti aita. 13 Azo ti be-vulu kue atokua bara na ala.

14 Zia kota nzobe ti Seigneur ti e Jésus Christ, ndoye ti Nzapa nga na aye ti nzoni so e kue e wara na lege ti yingo vulu aduti na ala kue.