MBETI SO PAUL ATOKUA NA AGALATE

1 Mbi Paul, mbi yeke bazengele ndali ti so azo la airi mbi pëpe wala na lege ti mbeni zo pëpe, me mbi ga bazengele na lege ti Jésus Christ+ nga na lege ti Nzapa Babâ ni,+ lo so azingo Jésus Christ na kuâ, 2 mbi tokua mbeti so na acongrégation ti Galatie, mbi na aita kue so ayeke na terê ti mbi:

3 Zia kota nzobe na siriri ti Nzapa Babâ ti e nga na ti Seigneur Jésus Christ aduti na ala. 4 Lo mû terê ti lo ndali ti asiokpari ti e+ si lo lingbi ti zi e na yâ ti asioni ye ti ngoi so+ alingbi na ye so bê ti Nzapa ti e nga Babâ ti e aye,+ 5 lo so a lingbi a mû gloire na lo lakue lakue nga kpu na kpu. Amen.

6 Li ti mbi akpe kue ndali ti so gï hio tongaso a yeke hon na ala yongoro na lo so airi ala na lege ti kota nzobe ti Christ na a yeke sara si ala mû peko ti mbeni nzoni tënë nde.+ 7 A yeke mbeni nzoni tënë nde pëpe; me ambeni zo la si ayeke son li ti ala+ nga aye ti buba yâ ti nzoni tënë na ndö ti Christ. 8 Ye oko, même tongana a yeke e wala mbeni ange so alondo na yayu la si afa na ala mbeni nzoni tënë nde na ti so e fa na ala awe so, zia a deba lo! 9 Tongana ti so e tene fade awe, mbi kiri mbi tene nga: Atâa zo wa si ayeke fa na ala mbeni nzoni tënë nde na ti so ala yeda na ni awe so, zia a deba lo!

10 Biani, a yeke azo la si mbi yeke gi ti nzere na lê ti ala? A yeke gï Nzapa ape? Wala mbi yeke gi ti nzere na lê ti azo? Tongana mbi ngbâ fade ti nzere na lê ti azo, ka mbi yeke ngbâa ti Christ pëpe. 11 Aita, mbi ye ala hinga so nzoni tënë so mbi yeke fa na ala alondo na zo pëpe,+ 12 ndali ti so mbi wara ni na lege ti mbeni zo pëpe, nga mbeni zo la si afa ni na mbi pëpe, me mbi wara ni gï na lege ti ye so Jésus Christ si afa na mbi.

13 Biani, ala mä lani tënë ti ngbene sarango ye ti terê ti mbi na yâ ti bungbi ti nzapa ti aJuif:+ mbi yeke sara lani ye ti ngangu ahon ndö ni na congrégation ti Nzapa nga mbi gi ti futi ni,+ 14 na mbi maï lani mingi na yâ ti bungbi ti nzapa ti aJuif ni ahon azo mingi ti mara ti mbi so ngu ti mbi na ala ayeke oko, ndali ti so mbi yapu lani mingi na batango angobo ti akotara ti mbi+ ahon tanga ti azo ni. 15 Me tongana Nzapa, lo so asara si a dü mbi nga lo so airi mbi na lege ti kota nzobe ti lo,+ abâ so a yeke nzoni 16 ti fa Molenge ti lo na gigi na lege ti mbi, si mbi lingbi ti fa nzoni tënë ti lo na amara,+ mbi gue hio ti hunda wango na mbeni zo pëpe; 17 mbi monté nga na Jérusalem pëpe ti bâ ala so aga lani abazengele kozo ti mbi, me mbi gue na Arabie, si na pekoni mbi kiri mbi ga na Damas.+

18 Ngu ota na pekoni, mbi monté na Jérusalem+ ti bâ Céphas,*+ na mbi sara lango 15 na terê ti lo. 19 Me mbi bâ mbeni bazengele nde pëpe, gï Jacques+ ita ti Seigneur awe. 20 Âdu ti aye so mbi yeke sû ni na mbeti na ala, na lê ti Nzapa, mvene la mbi yeke tene so pëpe.

21 Na pekoni, mbi gue na yâ ti akodro ti Syrie na ti Cilicie.+ 22 Me acongrégation ti Judée so ayeke sara beoko na Christ ahinga ti ala lê ti mbi pëpe. 23 Lani ala yeke mä gï mango, a tene: “Koli so asara lani ye ti ngangu na e+ so, fadeso lo yeke fa nzoni tënë ti mabe so ândö lo gi ti futi ni so.”+ 24 Tongaso, ala komanse ti mû gloire na Nzapa ndali ti mbi.

2 Ngu 14 na pekoni, mbi kiri mbi monté na Jérusalem, mbi na Barnabas;+ mbi mû nga Tite na terê ti mbi.+ 2 Me mbi gue kâ ndali ti so yingo afa na mbi ti gue. Mbi fa na ala nzoni tënë so mbi yeke fa na popo ti azo ti amara, me mbi fa ni gï na gbele aita so ayeke akpengba zo ni, ti bâ si loro so mbi kpe lani wala ti so mbi ngbâ ti kpe ni so ayeke senge senge pëpe. 3 Ye oko, même Tite+ so lo yeke na terê ti mbi, a gbu lo na ngangu pëpe ti fâ ganza,+ atâa so lo yeke ti lo Grec. 4 Me tënë so alondo ndali ti aita ti wataka so alï gï yeke tongaso,+ ala so ayeke hara na popo ti e tongana azo so ayeke bembe ndo ti sara sioni na liberté+ ti e so e wara ni na dutingo beoko na Christ Jésus, ti mû e biani biani na ngbâa;+ 5 e yeda ti zia terê ti e na gbe ti aita so pëpe,+ même gï ndali ti ngbonga oko, si tâ tënë so ayeke na yâ ti nzoni tënë angbâ na popo ti ala.

6 Ala so a bâ ala tongana akota zo ni+ (atâa ala yeke lani tongana nyen, a sara ye oko na mbi pëpe, ndali ti so Nzapa ayeke bâ ti lo mbeni zo pëpe tongana ti so azo ayeke bâ), ala so ayeke akpengba zo ni, ala fa mbeni fini ye na mbi pëpe. 7 Ahon so, tongana ala bâ so a zia lani na maboko ti mbi nzoni tënë ti fa na azo so afâ ganza pëpe,+ gï tongana ti so a zia ni lani na maboko ti Pierre ti fa na azo so afâ ganza 8 (lo so lo mû lani ngangu na Pierre ti sara kusala ti lo ti bazengele na popo ti azo so afâ ganza, lo la si lo mû nga ngangu na mbi ti sara kusala ti mbi ti bazengele na popo ti azo ti amara),+ 9 tongana Jacques,+ Céphas* na Jean, so a bâ ala tongana apilier ti congrégation, ahinga so a mû na mbi+ kota nzobe ti Nzapa awe, ala bara mbi na Barnabas+ na maboko ti ala ti koli ti fa so e na ala kue e yeke sara oko kusala ni, si e gue ti e na azo ti amara, na ala gue ti ala na azo so afâ ganza. 10 Me a tene na e ti bi bê na aita so ayeke awayere. Na a yeke tâ ye so mbi nga, na bê ti mbi kue, mbi sara ngangu ti sara ni.+

11 Ye oko, tongana Céphas*+ asi lani na Antioche,+ mbi luti na lo na lê ti lo, ndali ti so a yeke polele so lo sara ye na lege ni pëpe.* 12 Kozo si ambeni koli so alondo na Jacques+ aga, lo yeke te ka ye na azo ti amara;+ me na ngoi so akoli so asi awe, lo zia lege ni, lo gboto terê ti lo na lo duti nde, ngbanga ti so mbeto ti ala so aye tënë ti fango ganza asara lo.+ 13 Tanga ti aJuif ni atï nga na peko ti lo na yâ ti ngia ti handango lê so, même Barnabas kue atï na peko ti ala na yâ ti sarango ye ti ala ni. 14 Me tongana mbi bâ so ala yeke tambela mbilimbili pëpe alingbi na tâ tënë so ayeke na yâ ti nzoni tënë,+ mbi sara tënë so na Céphas* na lê ti ala kue, mbi tene: “Tongana mo so mo yeke Juif, mo yeke sara ye tongana ti azo ti amara, me tongana ti aJuif pëpe, ngbanga ti nyen mo yeke gbu na ngangu azo ti amara ti sara ye alingbi na ngobo ti aJuif?”+

15 E so a dü e Juif, na e yeke pëpe awasiokpari so alondo na popo ti azo ti amara, 16 e hinga e tene a yeke diko mbeni zo tongana zo ti mbilimbili ndali ti akusala ti ndia pëpe, me gï ndali ti mabe+ ti lo na Jésus Christ,+ e nga e mä na bê na Christ Jésus, tongaso si a lingbi ti diko e tongana azo ti mbilimbili ndali ti mabe ti e na Christ, me pëpe ndali ti akusala ti ndia, ngbanga ti so, na lege ti akusala ti ndia, a yeke diko zo* oko pëpe tongana zo ti mbilimbili.+ 17 Tongana e so e yeke gi ti tene a diko e tongana azo ti mbilimbili na lege ti Christ, a bâ so e yeke nga awasiokpari, a ye ti fa so Christ ayeke wakua ti siokpari? Oko pëpe! 18 Tongana ye so mbi kungbi ni ândö na sese awe so, mbi kiri mbi leke ni na nduzu, mbi fa so mbi yeke mbeni zo ti kengo ndia la. 19 Na batango ndia,+ mbi kui awe tongana a ngbâ gï ndia ni, si mbi kiri mbi duti na fini ndali ti Nzapa. 20 A pika mbi na pointe na ndö ti keke legeoko na Christ+ awe. A yeke mbi si mbi ngbâ na fini mbeni pëpe,+ me a yeke Christ si ayeke na fini na lo sara beoko na mbi. Biani, fini so mbi yeke na ni fadeso na yâ ti terê ti mbi ti zo, mbi yeke na ni ndali ti mabe ti mbi na Molenge ti Nzapa,+ lo so andoye mbi si lo kä terê ti lo na kuâ ndali ti mbi.+ 21 Mbi ke kota nzobe ti Nzapa pëpe,*+ ndali ti so tongana fade zo ayeke ga mbilimbili na lege ti ndia, andâ Christ akui gï senge senge.+

3 Ala azo ti Galatie so li ti ala ayeke dä pëpe so, ala so a fa polele na ala awe tënë na ndö ti Jésus Christ so a pika lo na pointe na ndö ti keke so,+ zo wa la ague na ala na yâ ti sioni sarango ye so zo wa?+ 2 Mbi ye ala kiri gï tënë so na mbi: Ala wara lani yingo ndali ti akusala ti ndia wala ndali ti so ala mä na bê na tënë so ala mä?+ 3 Li ti ala ayeke dä ape tongaso? So ala komanse ni ândö na lege ti yingo so, ala yeke hunzi ni na lege ti mitele?+ 4 Gbâ ti apasi so ala bâ lani so, a yeke gï senge senge? Mbi bâ ti mbi so a yeke senge senge ape! 5 Lo so amû na ala yingo na lo sara akusala ti ngangu+ na popo ti ala, lo sara ni ndali ti so ala sara akusala ti ndia wala ndali ti so ala mä na bê na tënë so ala mä? 6 Gï tongana ti so Abraham “amä na bê na Jéhovah,* na Nzapa adiko ni na lo tongana mbilimbili.”+

7 Ti tâ tënë ni, ala hinga so azo so agbu mabe ngangu, ala la si ayeke amolenge ti Abraham.+ 8 Mbeti ti Nzapa abâ kozo awe so Nzapa ayeke diko azo ti amara tongana azo ti mbilimbili ngbanga ti mabe, Mbeti ti Nzapa ni afa ândö giriri nzoni tënë so na Abraham atene: “Na lege ti mo, a yeke iri tënë nzoni ande na ndö ti amara kue.”+ 9 Tongaso, ala so agbu mabe ngangu, a ngbâ ti iri tënë nzoni na ndö ti ala tongana ti Abraham so ayeke lani na mabe.+

10 Ala kue so azia bê ti ala na ndö ti akusala ti ndia, deba ayeke na li ti ala. Ndali ti so Mbeti ti Nzapa atene: “Aye so kue a sû na yâ ti mbeti ti Ndia ti tene zo akpe ni, zo kue so ayeke kpe ni pëpe, deba ayeke na li ti lo.”+ 11 Nga, a yeke polele so Nzapa adiko zo oko pëpe tongana zo ti mbilimbili ndali ti ndia,+ ndali ti so “zo ti mbilimbili ayeke ngbâ ande na fini ndali ti mabe.”+ 12 Ndia ahunda na zo pëpe ti duti na mabe, me “zo so asara ye alingbi na aye so, lo yeke ngbâ ande na fini ndali ni.”+ 13 Na vongo e,+ Christ azi e+ na gbe ti deba so Ndia aga na ni na li ti e na lege so lo ga zo so deba ni ayeke na li ti lo na place ti e, ndali ti so Mbeti ti Nzapa atene: “Deba ayeke na li ti zo kue so a kanga lo na ndö ti keke.”+ 14 Ye ni asi tongaso ti tene tufa so aga na ndö ti Abraham alingbi ti ga na ndö ti amara na lege ti Christ Jésus,+ si na lege ti mabe ti e, e lingbi ti wara yingo so a mû zendo ni.+

15 Aita, mbi yeke mû tapande ti ye so azo ayeke sara ka lakue ti sara na tënë so na ala: Mbele so ambeni zo ate na popo ti ala awe, atâa so a yeke azo la si asara ni, mbeni zo alingbi ti sara si atï na ngu pëpe wala ti zia mbeni ye na ndö ni pëpe. 16 A sara tënë ti azendo ni na Abraham nga na hale*+ ti lo. A tene pëpe “na ahale,”* tongana ti ahale* mingi, me a tene: “Na hale* ti mo,” so ayeke Christ.+ 17 Nga, mbi sara tënë so, mbi tene: Ti mbele so Nzapa amû ngangu na ni ândö awe, Ndia so abâ gigi ngu 430 na pekoni+ amingo ngangu ti mbele ni so pëpe, si zendo ni alï ngu pëpe. 18 Tongana héritage ni aga ngbanga ti ndia, a ye ti tene so a ga ngbanga ti zendo ni pëpe; me, ti bâ ni nzoni, Nzapa amû lani héritage ni na nzoni bê na Abraham na lege ti mbeni zendo.+

19 Tongaso, a mû Ndia ni ngbanga ti nyen? A zia Ndia na terê ni ti tene a fa akengo ndia na gigi,+ juska hale* ni asi,+ lo so a mû zendo ni na lo. A mû Ndia ni na lege ti a-ange+ na maboko ti mbeni walekengo-songo.+ 20 Tongana zo ayeke gï oko, a hunda ti wara mbeni walekengo-songo pëpe, me Nzapa ayeke gï oko. 21 Tongaso, Ndia akanga lege na azendo ti Nzapa? Oko pëpe! Ndali ti so tongana a mû fade mbeni ndia si na lege ni azo awara fini, andâ mbilimbili abâ gigi biani ndali ti ndia. 22 Me Mbeti ti Nzapa akanga aye kue na gbe ti siokpari, si a lingbi ti mû na azo so amä na bê zendo so abâ gigi ngbanga ti mabe na Jésus Christ.

23 Ye oko, kozoni si mabe aga, a zia e na gbe ti ndia ti bâ ndo na ndö ti e tongana azo ti kanga, ti ku mabe so a fa kozo awe a tene ayeke si ande.+ 24 Ni la, Ndia aga zo ti bango ndo na ndö ti e ti gue na e na Christ,+ si a diko e tongana azo ti mbilimbili na lege ti mabe.+ 25 Me so mabe ni asi fadeso awe,+ e yeke mbeni pëpe na gbe ti mbeni zo so ayeke bâ ndo na ndö ti e.+

26 Biani, na lege ti mabe ti ala na Christ Jésus,+ ala kue ayeke amolenge ti Nzapa.+ 27 Biani, ala kue so a batize ala lani na yâ ti Christ, ala yü Christ+ na terê ti ala awe. 28 Juif wala Grec+ ayeke dä pëpe, ngbâa wala zo so ayeke ngbâa pëpe ayeke dä pëpe,+ koli wala wali ayeke dä pëpe,+ ndali ti so ala kue ayeke zo oko nga beoko na Christ Jésus.+ 29 Nga, tongana ala yeke ti Christ, ala yeke biani hale* ti Abraham,+ ala yeke ahéritier+ ndali ti mbeni zendo.+

4 Mbi tene, atâa so héritier ni ayeke seigneur na ndö ti aye kue, na yâ ti angoi so lo ngbâ kete molenge, lo hon terê na mbeni ngbâa oko pëpe, 2 me lo yeke na gbe ti azo so ayeke bâ ndo na ndö ti lo nga na gbe ti azo ti bango lege ti aye ti yâ ti da ni juska ti si na lango so babâ ti lo afa ni kozo awe. 3 Legeoko nga, e nga kue, na ngoi so e de lani amolenge, aye ti dunia so,+ so ayeke tongana aye ti amolenge, angbâ ti mû e na ngbâa. 4 Me tongana ngoi ni alingbi kue awe, Nzapa atokua Molenge ti lo, so mbeni wali la si adü lo+ nga lo duti na gbe ti ndia,+ 5 si lo zi ala so ayeke na gbe ti ndia na vongo ala,+ tongaso si a lingbi ti mû e ti ga amolenge ti Nzapa.+

6 Ndali ti so ala yeke amolenge ti Nzapa, Nzapa atokua yingo+ ti Molenge ti lo na yâ ti bê ti e+ si a dekongo, atene: “Abba,* Babâ!”+ 7 Tongaso, mo yeke ngbâa mbeni pëpe, me mo yeke mbeni molenge ti Nzapa; ni la, tongana mo yeke mbeni molenge ti Nzapa, Nzapa asara nga si mo ga mbeni héritier.+

8 Ye oko, so lani ala hinga Nzapa pëpe so, ala yeke sara kua tongana angbâa na ala so ayeke biani anzapa pëpe. 9 Me fadeso, so ala hinga Nzapa awe so, wala biani so Nzapa ahinga ala awe so, a sara tongana nyen la si ala kiri na terê ti aye so ayeke abuba ye+ nga aye ti amolenge na ala ye ti kiri ti duti angbâa ti aye ni so?+ 10 Ala ngbâ ti bata ngangu mingi ambeni lango, ambeni nze,+ ambeni ngoi nga na ambeni ngu. 11 Mbeto asara mbi ngbanga ti ala, so peut-être ngangu kua so mbi sara lani ndali ti ala so ayeke ngbâ gï senge senge.

12 Aita, mbi voro ala, ala ga tongana mbi, ngbanga ti so mbi kue mbi yeke ândö tongana ala.+ Ala sara lani mbeni ye ti sioni na mbi pëpe. 13 Me ala hinga so a yeke lani ndali ti mbeni kobela so ayeke na terê ti mbi la mbi wara lege ti fa na ala nzoni tënë ti kozoni. 14 Atâa so kobela ti mbi ni ayeke lani mbeni tara ndali ti ala, ala zere mbi ndali ni pëpe wala ala ke mbi* ndali ni pëpe, me ala yamba mbi tongana mbeni ange ti Nzapa, tongana Christ Jésus. 15 Tongaso, ngia so ala yeke na ni lani so ayeke na ndo wa? Mbi hinga biani mbi tene so tongana fade lege ayeke dä, ka ala yeke zi tâ lê ti ala ti mû na mbi.+ 16 Tongaso, mbi ga wato ti ala ngbanga ti so mbi tene tâ tënë na ala? 17 Azo ni aye gï ti mû ala mungo na mbage ti ala, me a yeke na nzoni bê pëpe, ndali ti so azo ni so aye gï ti zi ala na terê ti mbi, tongaso si ala ye gï ti mû peko ti azo ni so. 18 Ye oko, a yeke nzoni ye mingi tongana zo agi na bê ti lo kue ti mû ala na mbage ti lo ndali ti mbeni ye so ayeke tâ nzoni, na lo sara tongaso na ngoi kue, me gï pëpe na ngoi so mbi yeke na terê ti ala, 19 amolenge ti mbi,+ ala so mbi kiri mbi yeke mä songo ti dungo ala juska Christ amaï kue na yâ ti ala. 20 Me mbi ye ti duti na terê ti ala gï fafadeso na ti sara tënë na ala na mbeni lege nde, ngbanga ti so li ti mbi akpe kue ndali ti ala.

21 Ala tene na mbi si, ala so aye ti duti na gbe ti ndia so: Ala mä Ndia ni ape? 22 Na tapande, Mbeti ti Nzapa atene so Abraham awara lani amolenge-koli use, lo dü oko na wali so ayeke ngbâa+ na lo dü mbeni na wali so ayeke ngbâa pëpe.+ 23 Me ti lo so wali so ayeke ngbâa si adü lo, lo dü lo tongana ti so azo ayeke dü ka na ni;*+ ti lo so wali so ayeke ngbâa pëpe si adü lo, lo dü lo na lege ti mbeni zendo.+ 24 Aye so aduti tongana mbeni toli; awali so aduti tapande ti ambele use: oko ni ayeke ti Hoto ti Sinaï,+ so a dü amolenge ti ga angbâa, a yeke Agar. 25 Agar ayeke tapande ti Sinaï,+ mbeni hoto so ayeke na Arabie, na lo lingbi na Jérusalem ti laso, ndali ti so lo na amolenge ti lo ayeke angbâa. 26 Me Jérusalem ti nduzu ayeke ngbâa pëpe, lo yeke mama ti e.

27 Biani, Mbeti ti Nzapa atene: “Mo duti na ngia wali-ngombo so mo dü molenge pëpe so; mo sungba na ngia na mo dekongo na ngia, mo wali so mo mä songo ti dungo molenge pëpe so; ndali ti so amolenge ti wali so koli ni adö lo azia ayeke mingi ahon amolenge ti lo so ayeke wali ti koli ni.”+ 28 Aita, ala yeke amolenge ti zendo ni legeoko tongana ti so Isaac ayeke ni ândö.+ 29 Me legeoko tongana ti so ândö molenge so a dü lo tongana ti so azo ayeke dü ka na ni* akomanse ti sara ye ti ngangu na molenge ni so a dü lo na lege ti yingo so,+ laso ye ni ayeke nga tongaso.+ 30 Ye oko, Mbeti ti Nzapa atene nyen? A tene: “Tomba wali-ngbâa so, lo na molenge ti lo, ndali ti so molenge ti wali-ngbâa so ayeke ga ande héritier pëpe legeoko na molenge ti wali so ayeke ngbâa pëpe so.”+ 31 Tongaso, aita, e yeke pëpe amolenge ti wali so ayeke ngbâa, me ti wali so ayeke ngbâa pëpe.

5 A yeke ti wara mara ti liberté so la si Christ azi e. Tongaso, ala luti ngangu+ na ala zia terê ti ala pëpe si a kiri na ala na gbe ti joug ti ngbâa.+

2 Bâ, mbi Paul, mbi tene ti mbi na ala mbi tene tongana a fâ ala na ganza, Christ ayeke duti ande ye oko pëpe na ala.+ 3 Nga, mbi kiri mbi tene na koli kue so a fâ lo na ganza awe, mbi tene: a yeke ngbanga ti lo ti sara ye kue so Ndia ahunda.+ 4 Ala kue so ayeke gi ti tene a diko ala tongana azo ti mbilimbili na lege ti ndia,+ ala kangbi na Christ awe. Ala gue yongoro awe na kota nzobe ti lo. 5 Ti e, na lege ti yingo, e yeke ku kungo mbilimbili so e yeke na beku ti wara ni, mbilimbili so aga na lege ti mabe. 6 Âdu ti aye so andu Jésus Christ, tongana zo afâ ganza wala lo fâ ganza pëpe, so la ayeke kota ye pëpe.+ Me kota ye ni ayeke mabe so asara kusala na lege ti ndoye.

7 Kozo, ala yeke kpe loro lani nzoni.+ Zo wa la akanga lege na ala ti ngbâ ti sara ye alingbi na tâ tënë zo wa? 8 Mara ti fango ye tongaso alondo pëpe na lo so airi ala so. 9 Kete levure asara si mengo farine ni kue asuku.+ 10 Mbi hinga biani mbi tene ala so ayeke beoko na Seigneur,+ ala yeke yeda na mbeni tënë nde pëpe. Me zo so ayeke ga na kpale na ala so,+ atâa lo yeke zo wa, lo yeke yô ande ngbanga so alingbi na lo. 11 Ti mbi, aita, tongana mbi ngbâ ti fa tënë ti fango ganza, ngbanga ti nyen la si a ngbâ ti sara ye ti ngangu na mbi? Tongana a yeke tongaso, ka a zi tënë ti keke ti pasi*+ so ayeke son bê ti zo so awe. 12 Mbi ye si azo so ayeke tara ti ga na kpale so na ala afâ gï ganza pëpe, me ala zi gï terê ti ala ti koli ni kue ma.*

13 Biani, aita, a iri ala ti duti na liberté. Me ala mû liberté so tongana mbeni lege ti sara na ye ti mitele pëpe.+ Me na lege ti ndoye, ala sara kua na mba na popo ti ala tongana angbâa.+ 14 Ndali ti so atënë ti Ndia kue aga tâ tënë* na yâ ti tënë oko so: “Mo doit ti ndoye mba ti mo tongana mo wani.”+ 15 Me tongana ala ngbâ ti te terê na ti sara sioni na mba,+ ala sara hange si ala futi terê na popo ti ala pëpe.+

16 Ti mbi, mbi tene: Ala ngbâ ti tambela na lege ti yingo+ na ala yeke sara ande ye ti nzara ti mitele oko pëpe.+ 17 Ndali ti so mitele na lege ti nzara ti lo aye yingo pëpe, na yingo aye mitele pëpe; mitele na yingo amä terê pëpe, a sara si ambilimbili ye so ala ye ti sara, ala sara ni pëpe.+ 18 Nga, tongana yingo la ayeke fa lege na ala, ala yeke na gbe ti ndia pëpe.

19 Akusala ti mitele ayeke polele; a yeke lango-sioni,*+ sioni ye, sarango sioni ye sân kamene,*+ 20 vorongo yanda, sarango yorö,+ kengo terê, tiri, kota bê, sungbango na ngonzo lakue, papa, kangbi, tënë ti secte, 21 sarango bê ti ye, nyongo sämba ahon ndö ni,+ pumba ti kirikiri nga na ambeni ye tongaso.+ Mbi gboto mê ti ala na ndö ti aye so legeoko tongana ti so mbi gboto mê ti ala kozo awe: Azo so angbâ ti sara aye so, Royaume ti Nzapa ayeke ga ande ti ala pëpe.+

22 Na mbage, lengo ti yingo ayeke ndoye, ngia, siriri, kangango bê ti ku, sarango nzoni na zo, nzoni bê,+ mabe, 23 sarango ye na ngangu pëpe, kangango nzara ti bê.+ Mbeni ndia ti ke aye so ayeke dä pëpe. 24 Nga, ala so ayeke ti Jésus Christ apika mitele na pointe na ndö ti keke legeoko na angangu nzara na ambeni nzara ti mitele ni.+

25 Tongana e duti na fini na lege ti yingo, zia e ngbâ ti tambela nga mbilimbili legeoko na yingo ni.+ 26 Zia e fa terê ti e pëpe,+ e dü tënë ti mandako na popo ti e pëpe,+ e sara kota bê na terê ti mba nga pëpe.

6 Aita, même tongana mbeni zo amû sioni lege sân ti tene lo hinga ni, ala so akpengba awe na lege ti yingo, ala tara ti kiri na zo so na nzoni lege, na ala sara ni na ngangu pëpe.+ Me, ala wani ala sara hange si+ ala nga ala tï na yâ ti tara pëpe.+ 2 Ala ngbâ ti yô aye so ane amba ti ala na popo ti ala,+ na tongaso ala yeke sara ande ye alingbi na ndia ti Christ.+ 3 Tongana mbeni zo abâ terê ti lo so lo yeke mbeni ye, andâ lo yeke ye oko pëpe,+ lo yeke handa terê ti lo wani la. 4 Me zia zo oko oko atara kua ti lo ti bâ wala a yeke tongana nyen,+ tongaso si lo duti na ngia ndali ti kua ti lo wani, me na hakango terê ti lo na mbeni zo nde pëpe.+ 5 Biani, zo oko oko ayeke yô ande kungba ti lo wani.*+

6 Nga, zo kue so a yeke fa tënë ni na lo,* zia lo na zo so afa ye na lo* akangbi aye kue ti nzoni na popo ti ala.+

7 Zia ala handa terê ti ala pëpe: A yeke he ka Nzapa pëpe. Ndali ti so ye so mbeni zo ayeke lu, gï ni la lo yeke ko ni ande.+ 8 Zo so ayeke lu ye ndali ti mitele, lo yeke ko ande ye so abuba awe so alondo na mitele ti lo, me zo so ayeke lu ye ndali ti yingo, lo yeke ko ande fini ti lakue lakue so alondo na yingo.+ 9 Tongaso, zia e dö lege ti sarango ye ti nzoni e zia pëpe, ngbanga ti so tongana ngoi ni alingbi, e yeke ko ande lengo ni tongana e woko pëpe.*+ 10 Biani, tongana e wara lege ti sara ni,* zia e sara ye ti nzoni na azo kue, me mbilimbili na ala so ayeke aita ti e na yâ ti mabe.

11 Ala bâ tongana nyen mbi sû mbeti so na ala na maboko ti mbi wani, ala bâ mbi sû ni na agere ti mbeti so ayeke kota kota.

12 A yeke azo kue so aye azo abâ ala na nzoni lê la si ayeke tara ti gbu ala na ngangu ti tene ala fâ ganza. Azo ni so asara tongaso gï ti tene a sara ye ti ngangu na ala pëpe ngbanga ti keke ti pasi* ti Christ. 13 Même azo so afâ ganza awe ayeke bata Ndia pëpe.+ Me ala ye si a fâ ala na ganza ti tene ala pika kate ndali ti ye so a sara na terê ti ala. 14 Mbi lingbi ti pika kate ti mbi lâ oko pëpe, me mbi yeke pika ni gï ndali ti keke ti pasi* ti Seigneur ti e Jésus Christ,+ so ndali ti lo, na bango ndo ti mbi, a fâ dunia so awe,* nga na bango ndo ti dunia ni, a fâ mbi awe.* 15 Fango ganza wala fango ganza pëpe ayeke kota ye pëpe,+ me zo so ayeke mbeni fini création si ayeke kota ye.+ 16 Ala kue so ayeke sara ande ye na lege ni alingbi na ndia ti sarango ye so, siriri na nzoni bê ayeke duti na ndö ti ala, biani na ndö ti Israël ti Nzapa.+

17 Ti fadeso, zia mbeni zo ason li ti mbi pëpe, ndali ti so na ndö ti poro ti terê ti mbi, mbi yeke na anzoroko so afa atene mbi yeke mbeni ngbâa ti Jésus.+

18 Aita, kota nzobe ti Seigneur ti e Jésus Christ aduti na bibe so ala yeke na ni so. Amen.