MBETI SO PAUL ATOKUA NA A-ÉPHÉSIEN

1 Mbi Paul, bazengele ti Christ Jésus na lege ti ye so bê ti Nzapa aye, mbi tokua mbeti so na azo ti be-vulu so ayeke na Éphèse,+ so ayeke be-ta-zo na dutingo beoko na Christ Jésus:

2 Zia kota nzobe nga na siriri so alondo na Nzapa Babâ ti e nga so alondo na Seigneur Jésus Christ aduti na ala.

3 Zia a gonda Nzapa so ayeke nga Babâ ti Seigneur ti e Jésus Christ, ndali ti so na ando so ayeke na yayu lo mû na e nzoni ye kue ti yingo ndali ti so e yeke beoko na Christ,+ 4 tongana ti so lo soro e ti duti beoko na Christ kozo si a zia gere ti dunia, si e lingbi ti ga nzoni-kue nga ti duti na sioni oko pëpe+ na lê ti lo na yâ ti ndoye. 5 Nzapa aleke kozo awe+ ti tene a mû e ti ga amolenge ti lo+ na lege ti Jésus Christ, a lingbi na ye so anzere na lo nga na ye so bê ti lo aye,+ 6 ti tene a sepela gloire ti kota nzobe ti lo+ so lo sara na e na lege ti Molenge ti lo so lo ndoye lo mingi.+ 7 Na lege ti ye so Molenge ni afuta ti zi azo, a zi e na lege ti mênë ti lo,+ biani a pardonné afaute ti e+ alingbi na mosoro ti kota nzobe ti lo.

8 Lo sara si kota nzobe so asi singo na mbage ti e na mungo na e ndara kue nga na nzoni hingango ndo kue, 9 na lege so lo sara si e hinga tënë so lo honde ndani,+ tënë ti ye so bê ti lo aye. Na tënë ni so ague oko na ye so anzere na lo so lo wani lo leke na bê ti lo ti sara, 10 so andu tënë ti bango lege ti aye ti lo tongana ngoi ni so a soro awe alingbi kue, so ti tene: a yeke kiri ti bungbi aye kue oko na yâ ti Christ, aye so ayeke na yayu na aye so ayeke na sese.+ Biani, na yâ ti Christ 11 e nga a mû e ti ga ahéritier+ legeoko na lo, na lege so Nzapa, so ayeke sara aye kue alingbi na ye so bê ti lo aye, asoro e kozo awe, 12 si a lingbi ti sepela gloire ti Nzapa na lege ti e so e yeke akozo zo so azia beku ti ala na Christ. 13 Me, ala nga ala zia beku ti ala na lo na peko ti so ala mä tâ tënë, so ayeke nzoni tënë ti salut ti ala. Na lege ti lo nga, na peko ti so ala mä na bê awe, a kpo mbeni nzoroko na terê ti ala,+ yingo vulu so a mû zendo ni ândö; 14 a yeke yingo vulu so la si afa na e kozo atene e yeke wara ande héritage ti e+ ni biani, ti ku na zingo azo so ayeke ti Nzapa wani+ na lege ti mbeni ye so a futa ti zi e,+ si a sepela gloire ti lo.

15 Ndani la, mbi kue, ngbene ye so mbi mä tënë ti mabe so ala yeke na ni na Seigneur Jésus nga na ndoye so ala fa na mbage ti azo ti be-vulu kue, 16 mbi zia lâ oko pëpe ti kiri singila na Nzapa ndali ti ala. Mbi ngbâ lakue ti sara tënë ti ala na yâ ti asambela ti mbi, 17 si Nzapa ti Seigneur ti e Jésus Christ, Babâ so ayeke na gloire, amû na ala yingo ti ndara na yingo ti fango na gigi aye so Nzapa afa na ngoi so ala yeke manda ti hinga lo mbilimbili,+ 18 si lê ti bê ti ala azi ti bâ ndo nzoni, tongaso si ala hinga beku wa la lo iri ala ndali ni, mosoro ti gloire wa la lo bata ni tongana héritage na azo ti be-vulu,+ 19 nga na kota ngangu ti lo na mbage ti e so e mä na bê.+ Kota ti ngangu ti lo so, a bâ ni na yâ ti lege so lo sara kusala na ngangu ti lo 20 na mbage ti Christ tongana lo zingo lo na kuâ na lo zia lo na mbage ti maboko ti lo ti koli+ na yayu, 21 na nduzu kâ na ndö ti gouvernement kue, komandema kue, ngangu kue, na ndö ti ala kue so akomande nga na ndö ti airi kue so a yeke di ni,+ gï na yâ ti aye ti ngoi so pëpe, me nga na yâ ti aye ti ngoi so ayeke ga. 22 Lo zia nga aye kue na gbe ti gere ti lo+ na lo sara si lo duti li ti aye kue ti congrégation,+ 23 so ayeke terê ti lo,+ na so lo si yâ ni, nga lo si aye kue na yâ ti aye kue.

2 A yeke ala si Nzapa amû fini na ala, atâa so ala kui lani awe na yâ ti afaute nga na asiokpari ti ala+ 2 so ala tambela dä ândö alingbi na aye ti dunia so;+ a lingbi nga na mokonzi so ayeke na ndö ti komandema ti pupu+ so angoro e, yingo+ so ayeke sara kua fadeso na yâ ti amolenge ti kengo yanga. 3 Biani, a yeke na popo ti azo so la si ândö e yeke sara ye alingbi na anzara ti mitele ti e,+ e yeke sara aye so mitele na bibe aye,+ nga ngbene ye so a dü e, e yeke amolenge so e lingbi na ngonzo ti Nzapa+ tongana ti atanga ni. 4 Me ndali ti kota ndoye so lo ndoye na e,+ Nzapa, so ayeke sara nzoni bê mingi+ na zo, 5 asara si e kiri na fini legeoko na Christ, même na ngoi so e kui lani awe na yâ ti afaute ti e.+ A yeke ndali ti kota nzobe ti Nzapa la si a sö ala so. 6 Nga, Nzapa azingo e legeoko na Christ na lo zia e ti duti legeoko na Christ na yayu, ndali ti so e yeke azo so asara beoko na Christ Jésus,+ 7 si na yâ ti aye ti ngoi so ayeke ga, a lingbi ti fa na gigi mosoro ti kota nzobe ti lo so ayeke mingi ndali ti so lo sara nzoni bê na mbage ti e so e yeke azo so asara beoko na Christ Jésus.

8 Biani, na lege ti kota nzobe so, a sö ala na lege ti mabe;+ na a yeke ye so ala wani la asara ni pëpe, me a yeke matabisi so Nzapa la amû na ala. 9 Songo ala ni ayeke ngbanga ti akusala pëpe,+ si mbeni zo awara ti lo mbeni ye ti pikango kate ndali ni pëpe. 10 E yeke kusala ti maboko ti Nzapa na lo sara e+ na lege ti beoko so e yeke na ni na Christ Jésus+ ti sara anzoni kusala, akusala so Nzapa afa ni ândö awe ti tene e sara ni.

11 Tongaso, ala girisa pëpe so ândö, na lege ti mitele, ala yeke azo ti amara. Azo so “afâ ganza awe,” ganza so maboko ti zo la si afâ ni, a yeke iri lani ala azo so “afâ ganza pëpe.” 12 Na ngoi ni so ala yeke lani na Christ pëpe, ala yeke yongoro na mara ti Israël, nga ndali ti so ala yeke awande, tënë ti ambele ti zendo ni+ abâ ala pëpe; ala yeke lani na beku oko pëpe nga ala yeke na Nzapa pëpe na yâ ti dunia ni.+ 13 Me so fadeso ala yeke beoko na Christ Jésus, ala so ândö ala yeke yongoro na Nzapa, ala ga nduru na lo na lege ti mênë ti Christ ni. 14 Christ ayeke siriri ti e,+ lo so asara si abungbi use so aga oko+ nga lo kungbi gbagba so aluti ti kangbi popo ti ala.+ 15 Na lege ti mitele ti lo, lo zi ye so adü kengo terê ni, so ti tene Ndia, so na yâ ni a yeke wara acommandement na ambela, si lo sara abungbi use so ti ga oko na lo na ti ga mbeni fini zo oko,+ nga lo sara si siriri akiri na popo ti ala; 16 nga, na lege ti keke ti pasi*+ ti lo, lo sara si abungbi use so akiri asara songo biani biani na Nzapa na ala ga terê oko, ngbanga ti so lo fâ lani kengo terê ni+ na lege ti lo wani. 17 Na lo ga lo fa nzoni tënë ti siriri na ala, ala so ayeke yongoro nga na ala so ayeke nduru, 18 ngbanga ti so na lege ti lo, e abungbi use so, e wara lege ti ga nduru na Babâ ni na lege ti yingo oko.

19 Tongaso, ala yeke mbeni pëpe awande wala azo ti mbeni kodro nde,+ me ala yeke amolenge ti kodro+ legeoko na azo ti be-vulu nga ala yeke azo ti da ti Nzapa,+ 20 na a leke ala na ndö ti gere ti da ni so ayeke abazengele nga na aprophète,+ na Christ Jésus ayeke ti lo tênë ti coin ti fondation ni.+ 21 Na yâ ti lo, ambage ti terê ti da ni kue atingbi oko+ nga akono ti ga mbeni temple so ayeke nzoni-kue ndali ti Jéhovah.*+ 22 Na yâ ti lo nga, a yeke leke ala legeoko ti ga mbeni ndo so Nzapa aduti na yâ ni na lege ti yingo ti lo.+

3 Ndali ti tënë so, mbi Paul so mbi yeke zo ti kanga+ ndali ti Christ nga ngbanga ti ala, azo ti amara nde— 2 biani, ala mä tënë ti kusala so a mû na mbi,+ so ayeke ti bâ lege ti kota nzobe ti Nzapa ndali ti nzoni ti ala, 3 ala mä so a yeke na lege ti mbeni ye so Nzapa afa na mbi la si mbi hinga tënë so lo honde ndani, gï tongana ti so mbi sû mbeni nduru tënë na ndö ni fade awe. 4 Ni la, na dikongo mbeti so, ala lingbi ti bâ tongana nyen la mbi gbu nda ti tënë na ndö ti Christ, tënë so Nzapa ahonde ndani.+ 5 A fa tënë ni so pëpe na azo ti ngoi so ahon awe, tongana ti so a fa ndani fadeso na lege ti yingo+ na abazengele ti lo so ayeke nzoni-kue nga na aprophète, 6 so atene, azo ti amara ayeke ga amba ti e ahéritier, amba ti e amembre ti terê ni+ nga amba ti e so awara nga zendo ni ndali ti so ala sara beoko na Christ Jésus na lege ti nzoni tënë. 7 A yeke ndali ti kota nzobe ti Nzapa la si mbi ga wakua ti ye so. Lo mû na mbi matabisi so senge senge alingbi na lege so ngangu ti lo+ ayeke sara kua.

8 Mbi so mbi yeke tâ kete ahon lo so ayeke tanga ti azo ti be-vulu kue,+ a mû na mbi kota nzobe ti Nzapa so,+ si mbi fa na azo ti amara nde nzoni tënë ti amosoro ti Christ so zo alingbi ti gbu ndani kue pëpe, 9 na mbi lingbi ti fa na azo kue tongana nyen, a yeke bâ lege ti tënë so Nzapa ahonde ndani+ ngbene ye ândö giriri kâ. Nzapa so asara aye kue ahonde nda ti tënë so na yâ ti lo wani. 10 Ye so asi ti tene na lege ti congrégation,+ agouvernement nga na akomandema so ayeke na yayu ahinga kota ndara ti Nzapa so yâ ni awu mingi.+ 11 Ye so alingbi na ye so lo leke ti sara, ye so ayeke lakue lakue, so lo zia gere ni na sese ândö awe na so andu Christ+ Jésus Seigneur ti e, 12 so ndali ti lo e wara lege ti sara tënë na kamene pëpe nga e yeke gi bê ti e pëpe tongana e yeke ga nduru+ na Nzapa na lege ti mabe ti e na Christ. 13 Tongaso, mbi hunda na ala ti tene bê ti ala awoko pëpe ngbanga ti apasi so mbi bâ ndali ti ala, ndali ti so apasi so ayeke ndali ti gloire ti ala.+

14 Ndali ti tënë so, mbi kuku na genou ti mbi na gbe ti Babâ ni, 15 lo so na lege ti lo asewa kue na yayu nga na sese awara iri ti ala. 16 Mbi voro lo si, a lingbi na mosoro ti gloire ti lo, lo sara si zo ti yâ ni ti ala+ akpengba na mungo na ala ngangu na lege ti yingo ti lo 17 ti sara si, ndali ti mabe ti ala, Christ aduti na yâ ti bê ti ala legeoko na ndoye+ so a lingbi a duti na popo ti ala. Mbi voro lo nga ti tene lo sara si gunda ti ala alï sese+ na ala luti nzoni na ndö ti gere ni so akpengba,+ 18 tongaso si ala na azo ti be-vulu kue alingbi biani ti gbu nda ti largeur ni, longueur ni, yongo ni na nduzu nga lingo ni, 19 si ala hinga ndoye so Christ+ ayeke na ni, so ahon hingango ye, na ala si singo na anzoni sarango ye kue so alondo na Nzapa.

20 Nzapa, na lege ti ngangu ti lo so ayeke sara kua na yâ ti e,+ alingbi biani ti sara ye mingi ahon ndö ti aye kue so e hunda wala so e bi bê ti e dä.+ 21 Zia a mû na lo gloire na lege ti congrégation nga na lege ti Christ Jésus, ti si na azo ti ngoi kue ndali ti lakue lakue nga kpu na kpu. Amen.

4 Tongaso, mbi so mbi yeke zo ti kanga+ ngbanga ti Seigneur, mbi voro yanga na ala ti tambela alingbi+ na iringo ndo so lani a iri na ala, 2 ti sara terê ti ala kete na yâ ti aye kue+ nga ti sara ye na ngangu pëpe, ti duti na kangango bê ti ku;+ ala kanga bê na mba na yâ ti ndoye,+ 3 ala sara ngangu ti bata beoko ti yingo na yâ ti kamba ti siriri so abungbi ala oko.+ 4 Terê ayeke oko,+ yingo ayeke oko,+ gï tongana ti so beku ayeke oko na yâ ti iringo ndo so a iri na ala, beku+ so lani a iri ala ndali ni; 5 Seigneur ayeke oko,+ mabe ayeke oko, batême ayeke oko; 6 Nzapa ayeke oko nga lo yeke Babâ ti azo kue, lo so ayeke na ndö ti azo kue, na lege ti azo kue nga na yâ ti azo kue.

7 A mû kota nzobe ni na zo oko oko na popo ti e alingbi na lege so Christ ahaka matabisi ni si lo mû ni senge senge.+ 8 Ndani la a tene: “Tongana lo monté na nduzu, lo gue na azo so a gbu ala na ngbâa. Lo mû akoli tongana amatabisi.”+ 9 Tënë “lo monté” aye ti tene nyen? A ye ti tene so lo descend nga na ando so ayeke na gbe ni, so ti tene na sese. 10 Lo so lo descend lani ayeke nga gï lo la si lo monté+ na nduzu kâ yongoro na peko ti ayayu kue,+ ti sara si aye kue aga tâ tënë.

11 Na lo mû ambeni tongana abazengele,+ ambeni tongana aprophète,+ ambeni tongana awafango nzoni tënë,+ ambeni tongana aberger na awafango ye.+ 12 Lo mû ala tongaso ti kiri na azo ti be-vulu na nzoni lege,* ti sara kua ndali ti azo, na ti leke terê ti Christ,+ 13 juska e kue e ga oko* na yâ ti mabe nga na yâ ti tâ hingango ye na ndö ti Molenge ti Nzapa, ti ga tongana mbeni koli so akpengba kue awe,+ ti yo ti lingbi na yongo so Christ ayo na ni kue; 14 ti tene e ngbâ akete molenge mbeni pëpe, so ayengi ala mbage na mbage tongana amapo ti ngu nga so apupu ti fango ye kue+ ague na ala kirikiri na lege ti handa ti azo, nga na lege ti amvene so a leke ni na mayele. 15 Me na tenengo tâ tënë, zia e kono na lege ti ndoye na yâ ti ye kue na gbe ti lo so lo yeke li ni, so ti tene Christ.+ 16 A yeke na lege ti lo la si terê ni kue+ abungbi oko na yâ ti mango terê nga asara kua maboko na maboko na lege ti ando oko oko so abio ni atingbi dä si ayeke mû na amembre ni ye so ala bezoin ni. Tongana membre ni oko oko asara kua na lege ni, a yeke mû maboko na terê ni ti kono na ngoi so lo yeke kpengba terê ti lo wani na yâ ti ndoye.+

17 Tongaso, bâ tënë so mbi tene na so mbi kiri mbi tene ni na lê ti Seigneur la: Mbi tene so ala tambela mbeni pëpe tongana ti azo ti amara, so ayeke tambela+ na peko ti abuba ye* so ayeke na yâ ti li ti ala.+ 18 Hingango ndo ti ala ayeke na yâ ti bingo, nga ala gue yongoro na fini so alondo na Nzapa, ngbanga ti so hingango ndo ayeke na ala pëpe, ngbanga ti so bê ti ala akpengba. 19 So ala dö nzoni lege ti tambela kue ala zia awe, ala bi terê ti ala na yâ ti sarango sioni ye sân kamene*+ ti sara sioni ye nde nde kue na bê ti warango ye.

20 Me ala manda lani so Christ ayeke tongaso ape, 21 gï tongana ala mä lo lani nga a fa ye na ala na lege ti lo alingbi na tâ tënë so ayeke na yâ ti Jésus. 22 A fa na ala ti zi ngbene zo+ so alingbi na ngbene lege ti sarango ye ti terê ti ala na so ayeke buba gï bubango alingbi na anzara ti bê ti lo so ayeke handa zo.+ 23 A yeke nzoni ala ngbâ lakue ti sara si bibe so ayeke fa lege na ala* akiri fini ni,+ 24 na a yeke nzoni ala ngbâ lakue ti yü fini zo+ so a sara lo alingbi na ye so bê ti Nzapa aye na so ague oko na tâ lege ti mbilimbili nga na tâ lege ti dutingo be-ta-zo.

25 Ndani la, so ala ke handango zo awe so, zia zo oko oko na popo ti ala atene tâ tënë na mba ti lo,+ ndali ti so e yeke amembre ti terê oko.+ 26 Tongana ngonzo asara ala, zia ala sara siokpari pëpe;+ ala zia lâ akui na ndö ti ala na ngonzo na bê pëpe,+ 27 nga ala zia lege na Zabolo pëpe.*+ 28 Zia zo ti nzi anzi ye encore ape, me ahon ti nzi ye, zia lo sara kua ngangu, lo sara nzoni kua na maboko ti lo+ wani tongaso si lo wara mbeni ye ti kangbi na zo so ayeke na bezoin ni.+ 29 Ala zia fungo tënë asigi na yanga ti ala pëpe,+ me gï atënë so ayeke nzoni ti kpengba zo, tongana a yeke ngoi ni, si a sara ye ti nzoni na azo so ayeke mä ni.+ 30 Nga, ala mû vundu na yingo vulu+ ti Nzapa pëpe, yingo vulu so a sara na nzoroko+ na terê ti ala ti ku na lango ti zingo ala na lege ti ye so a futa ti zi azo.+

31 Ala zi mara ti batango zo na bê nde nde kue, songo bê,+ ngonzo, dengo kongo na ndö ti zo na zonga,+ ala zia ni yongoro kâ, ala zi nga mara ti aye nde nde kue so asara sioni na zo.+ 32 Me ala sara nzoni na mba, ala bâ mawa ti zo mingi,+ ala pardonné mba na popo ti ala na bê ti ala kue legeoko tongana ti so Nzapa nga apardonné ala na bê ti lo kue+ na lege ti Christ.

5 Tongaso, ala ga azo so asara ye tongana ti Nzapa,+ ndali ti so ala yeke amolenge so lo ndoye ala mingi, 2 na ala ngbâ ti tambela na yâ ti ndoye,+ gï tongana ti so Christ nga andoye e*+ na lo kä terê ti lo na kuâ ndali ti e* ti ga tongana offrande nga na sandaga so a mû na Nzapa, mbeni ye so fion ni afun pendere.+

3 Tongana ti so a lingbi na azo ti be-vulu,+ zia a sara même tënë ti lango-sioni,* tënë ti sioni ye nde nde kue wala ti bê ti warango ye na popo ti ala pëpe.+ 4 Nga, zia a sara tënë ti asarango ye ti kamene, abuba tënë nga na angia ti buba+ na popo ti ala pëpe, ndali ti so a yeke aye so akpa oko pëpe; me ahon ti sara tënë ti aye so, zia ala kiri singila na Nzapa.+ 5 Biani, ala hinga ye so awe, na ala wani ahinga ni nzoni mingi so zo ti sarango lango-sioni,*+ wala zo so ayeke na yâ ti sioni ye, wala zo ti sarango bê ti ye,+ so ti tene zo ti vorongo ayanda, ayeke na mbeni héritage oko pëpe na yâ ti Royaume ti Christ na ti Nzapa.+

6 Ala zia mbeni zo ahanda ala na asenge senge tënë pëpe, ndali ti so a yeke ndali ti aye so mbi londo ti sara tënë ni so si ngonzo ti Nzapa ayeke ga na ndö ti azo ti kengo yanga. 7 Ndani la, zia mbeni ye abungbi ala na azo so pëpe. 8 Ândö ala yeke bingo, me fadeso ala yeke lumière+ ndali ti so ala sara beoko na Seigneur.+ Ala ngbâ ti tambela tongana amolenge ti lumière, 9 ndali ti so ye so lumière alë ayeke mara ti alege nde nde kue ti nzoni bê, alege nde nde kue ti mbilimbili nga na ti tâ tënë.+ 10 Ala ngbâ ti bâ yâ ti aye nzoni ti hinga ye so anzere+ biani na lê ti Seigneur. 11 Ala zia ti yôro terê ti ala legeoko na azo so na yâ ti akusala so alë lengo pëpe si ayeke ti bingo,+ me ahon ti yôro terê ti ala dä, zia ala sigi na nda ti aye so. 12 A yeke même ye ti kamene ti fa peko ti aye so azo so ayeke sara na hondengo ni so. 13 Aye kue so a yeke fa sioni ni na gigi, a yeke lumière la asara si a fa ni na gigi, ndali ti so ye kue so a fa ni na gigi ayeke lumière. 14 Ndani la a tene: “Mo so mo yeke lango, zingo, londo na popo ti akuâ,+ na Christ ayeke su ande na ndö ti mo.”+

15 Tongaso, zia ala sara hange mingi na tambela ti ala si aduti tongana ti azo ti buba pëpe, me tongana ti azo ti ndara, 16 na sarango kusala nzoni na ngoi ti ala,*+ ndali ti so ngoi ni ayeke sioni. 17 Ndani la, ala zia ti ga azo so li ti ala ayeke dä pëpe, me ala ngbâ ti gi ti hinga wala ye so bê ti Jéhovah* aye ayeke nyen.+ 18 Nga, ala zia vin asoulé ala pëpe,+ ye so ague na zo ti sara ye ahon ndö ni,* me ala zia si yingo vulu asi ala singo lakue 19 si ala sara tënë na popo ti ala* na lege ti apsaume, na lege ti abia ti sepelango na Nzapa, na lege ti abia ti yingo, nga ala he bia+ na ala pika mozoko+ ti gonda na Jéhovah* na yâ ti bê ti ala,+ 20 na iri ti Seigneur ti e Jésus Christ+ ala kiri singila lakue+ ndali ti aye kue na Nzapa so ayeke Babâ ti e.

21 Ala woko terê na gbe ti mba+ ndali ti mbeto ti Christ. 22 Zia awali awoko terê na gbe ti akoli ti ala+ tongana ti so ala yeke woko terê na gbe ti Seigneur, 23 ndali ti so koli ayeke li ti wali ti lo+ tongana ti so Christ nga ayeke li ti congrégation,+ so ayeke terê ti lo na so lo yeke sauveur ni. 24 Biani, gï tongana ti so congrégation ayeke woko terê na gbe ti Christ, zia awali nga awoko terê na gbe ti akoli ti ala na yâ ti aye kue. 25 Akoli, ala ngbâ lakue ti ndoye awali ti ala+ gï tongana ti so Christ nga andoye congrégation na lo kä terê ti lo na kuâ ndali ti congrégation ni,+ 26 si lo lingbi ti sara si congrégation ni aga nzoni-kue, lo sukula ni na ngu na lege ti tënë ti Nzapa,+ 27 si lo fa congrégation ni pendere na lê ti lo wani, na mbeni saleté na terê ni pëpe wala na mbeni terê so anokpo nokpongo pëpe wala mbeni mara ti ye tongaso pëpe,+ si congrégation ni aduti nzoni-kue na sioni oko pëpe na terê ti lo.+

28 A yeke tongaso si a lingbi akoli andoye awali ti ala tongana terê ti ala wani. Zo so andoye wali ti lo andoye terê ti lo wani, 29 ndali ti so mbeni koli ake terê* ti lo wani lâ oko pëpe; me lo mû kobe na ni nga lo yeke ye ni mingi, tongana ti so Christ nga kue ayeke sara na congrégation, 30 ngbanga ti so e yeke amembre ti terê ti lo.+ 31 “Ndani la, koli ayeke zia ande babâ na mama ti lo, lo yeke ngbâ ande na terê ti* wali ti lo na ala use kue ayeke ga terê oko.”+ 32 Tënë so, so Nzapa ahonde ndani,+ ayeke kota mingi. Ti so, mbi yeke sara tënë ti Christ nga na ti congrégation.+ 33 Ye oko, a lingbi koli oko oko na popo ti ala andoye wali ti lo+ legeoko tongana ti so lo ndoye terê ti lo wani. Na mbage, a lingbi wali ane koli ti lo mingi.+

6 Amolenge, ala mä yanga ti ababâ na amama ti ala+ alingbi na ye so bê ti Seigneur aye, ndali ti so sarango tongaso ayeke mbilimbili. 2 “Mo ne babâ na mama ti mo.”+ A yeke kozo commandement so mbeni zendo ayeke na terê ni: 3 “Tongaso si ye aga nzoni na mo, na mo lingbi ti ngbâ aninga na ndö ti sese.” 4 Ti ala ababâ, ala son bê ti amolenge ti ala pëpe,+ me ala ngbâ ti bata ala alingbi na fango lege+ nga na wango ti gbotongo mê* so alondo na Jéhovah.*+

5 Angbâa, ala mä yanga ti azo so ayeke awa ti ala;+ ala mä yanga ti ala na vuru bê, na mbeto nga na terê so adö, mo bâ mo tene ala yeke mä yanga ti Christ, 6 ala sara ni gï pëpe na ngoi so a yeke bâ ala, gï ti nzere na lê ti azo,+ me ala sara ni tongana angbâa ti Christ; zia ala sara ye so bê ti Nzapa aye na âme* ti ala kue.+ 7 Ala sara kua ti ngbâa na nzoni bê, mo bâ mo tene ala sara ni na Jéhovah,*+ me na azo pëpe 8 ndali ti so ala oko oko kue ahinga so aye ti nzoni kue so zo asara ni, lo yeke wara ande futa ti peko ni na tïtî Jéhovah,*+ atâa zo ni ayeke ngbâa wala ngbâa pëpe. 9 Ti ala awa ti angbâa nga, ala ngbâ ti sara tongaso na angbâa ti ala, ala son na ngangu na ndö ti angbâa ni pëpe, ndali ti so ala hinga so Wa ti ala kue ayeke na yayu+ na lo yeke sara kangbi na popo ti azo pëpe.

10 Ti hunzi na ni, aita, ala ngbâ ti wara ngangu+ na yâ ti Seigneur na lege ti kota ngangu ti lo. 11 Ala yü aye ti bira kue+ so alondo na Nzapa si ala wara lege ti luti ngangu ti ke amayele ti Zabolo, 12 ndali ti so e yeke tiri*+ na mitele na mênë pëpe, me e yeke tiri na agouvernement, akomandema, amokonzi ti dunia ti bingo so nga na asioni yingo+ so ayeke na yayu. 13 Ndani la, ala yü aye ti bira kue so alondo na Nzapa+ si ala wara lege ti gbu lê ni na lâ ti sioni, nga tongana ala sara aye kue ahunzi awe, ala luti ngangu.

14 Tongaso, ala luti ngangu, ala kanga tâ tënë na gbe ti yâ ti ala tongana ceinture,+ ala yü mbilimbili tongana bongo ti wen+ na kate ti ala, 15 ala yü nzara ti fa nzoni tënë ti siriri+ tongana poro na gere ti ala. 16 Na ndö ti aye so kue, ala mû kota vala ti mabe,+ so na ni ala yeke wara ande lege ti mingo wâ ti akokora kue ti Zo ti sioni.+ 17 Nga, ala yeda ti mû casque ti salut,+ ala mû épée ti yingo, so ayeke tënë ti Nzapa;+ 18 na oko ngoi ni, na lege ti mara ti asambela nde nde kue+ nga na atënë ti vorongo terê na Nzapa, ala ngbâ ti sambela na ngoi kue na lege ti yingo.+ Ti sara tongaso, zia lê ti ala angbâ lakue na zingo ni nga ala voro terê ti ala mingi na Nzapa ndali ti azo ti be-vulu kue. 19 Ala sambela nga ndali ti mbi si a mû na mbi tënë na ngoi so mbi zi yanga ti mbi, tongaso si mbi sara tënë na mbeto pëpe na ndö ti tënë so Nzapa ahonde ndani, so ayeke nzoni tënë+ 20 so mbi yeke sara kusala tongana mbeni lembe+ ni na yâ ti achaîne, si tongana a ndu nzoni tënë ni, mbi lingbi ti sara tënë na mbeto pëpe tongana ti so a lingbi mbi sara.

21 Fadeso, ti tene ala nga ala hinga tënë na ndö ti mbi, tongana nyen mbi yeke sara ni, Tychique,+ mbeni ita so mbi ndoye lo mingi nga so ayeke be-ta-zo na yâ ti kusala ti Seigneur, ayeke fa ande aye kue na ala.+ 22 A yeke tâ ndali ti tënë so la si mbi yeke tokua lo na ala, si ala lingbi ti hinga ambeni ye na ndö ti e na lo lingbi nga ti dë bê ti ala.

23 Zia aita aduti na siriri na ndoye nga na mabe so alondo na Nzapa Babâ ni nga na Seigneur Jésus Christ. 24 Zia kota nzobe ti Nzapa aduti na ala kue so andoye Seigneur ti e Jésus Christ na mbeni ndoye so ayeke buba pëpe.