MBETI SO PAUL ATOKUA NA APHILIPPIEN

1 Paul na Timothée, angbâa ti Christ Jésus, atokua mbeti so na azo ti be-vulu kue so ayeke beoko na Christ Jésus, so ayeke na kodro ti Philippes.+ E tokua nga mbeti so na azo ti bango ndo na ndö ti congrégation nga na awakua ti mungo maboko:+

2 Zia kota nzobe nga na siriri so alondo na Nzapa Babâ ti e nga so alondo na Seigneur Jésus Christ aduti na ala.

3 Tongana mbi dabe ti mbi na ala, mbi yeke kiri singila lakue na Nzapa 4 na yâ ti asambela ti mbi kue ti vorongo terê na Nzapa so mbi sara ni ndali ti ala kue. Mbi yeke voro terê ti mbi na ngia na bê+ 5 ndali ti maboko so ala mû na nzoni tënë* a londo na kozo lango ni juska na ndembe so. 6 Mbi hinga biani mbi tene lo so ato nda ti nzoni kusala na popo ti ala, lo yeke gue ande na ni a hunzi+ juska na lâ ti Christ Jésus.+ 7 A yeke tâ na lege ni ti tene mbi bi bê ti mbi tongaso na ndö ti ala kue, ngbanga ti so ala yeke na yâ ti bê ti mbi, ala so awara mbage ti ala na yâ ti kota nzobe ti Nzapa legeoko na mbi, atâa tongana a ndu tënë ti chaîne+ so mbi yeke na yâ ni wala tongana a ndu tënë ti gbungo koko ti nzoni tënë+ na ti sarango si gere ni aluti ngangu na lege ti ndia.

8 Nzapa ahinga tongana nyen nzara ti bango ala kue asara mbi ngangu nga so yengo so mbi ye na ala akpa mara ti yengo so Christ Jésus aye na zo. 9 Ye so mbi ngbâ ti sambela ndali ni ayeke ti tene ndoye ti ala angbâ gï ti wu mingi ahon ti kozo+ legeoko na tâ hingango ye+ nga na kode kue ti bango yâ ti aye nzoni,+ 10 si ala hinga biani aye so ayeke akota ye mingi ahon atanga ni,+ tongaso si ala duti na sioni oko pëpe na ala ga pëpe mbeni ye ti pikango gere ndali ti ambeni zo+ juska na lâ ti Christ; 11 nga ti tene lengo ti mbilimbili asi singo na yâ ti fini ti ala, lengo ti mbilimbili so aga na lege ti Jésus Christ,+ si Nzapa awara gloire na gonda.

12 Aita, mbi ye si ala hinga so aye so asi na mbi a sara si nzoni tënë akiri amaï, 13 na aturugu kue ti Gbia ti Rome nga na tanga ti azo ni kue ahinga+ so mbi yeke na yâ ti chaîne+ ndali ti mabe ti mbi na Christ. 14 Nga, so a kanga mbi na yâ ti chaîne asara si bê ti mingi ti aita na yâ ti Seigneur akiri awara ngangu si ala yeke fa so ala yeke na ngangu mingi ahon ti kozo ti tene tënë ti Nzapa na mbeto pëpe.

15 Tâ tënë, ambeni ayeke fa tënë ti Christ na kota bê nga ti sara na mandako, me ambeni nga ayeke fa ni na nzoni bê. 16 Ala so ayeke fa ni na nzoni bê so, a yeke ndoye la si apusu ala ti fa tënë ti Christ, ndali ti so ala hinga so a zia mbi ge ti gbu koko ti nzoni tënë ni.+ 17 Me ti ala so ayeke fa tënë ni na kota bê nga ti sara na mandako so, ala yeke fa tënë ni gï ti gi na yanga, me na nzoni bê pëpe, ndali ti so ti bê ti ala, ala ye ti mû vundu na mbi na yâ ti chaîne ti mbi. 18 Ye ti peko ni ayeke nyen? Atâa ala yeke fa tënë ni na nzoni bê wala na nzoni bê pëpe, kota ye ni ayeke so azo ayeke fa tënë ti Christ, so la anzere na bê ti mbi. Biani, bê ti mbi nga ayeke ngbâ ande ti nzere lakue, 19 ndali ti so mbi hinga so ye so ayeke mû ande salut na mbi na lege ti vorongo terê ti ala na Nzapa+ nga na lege ti yingo ti Jésus Christ so mbi wara.+ 20 Ye so alingbi na ye so mbi yeke ku kungo nga na beku ti mbi so kamene ayeke sara ande mbi oko pëpe, me so na lege ti sarango tënë ti mbi na kamene oko pëpe, a yeke gonda ande Christ fadeso na lege ti terê ti mbi, gï tongana ti kozo, atâa na lege ti fini wala na lege ti kuâ.+

21 Ti mbi, ti ngbâ na fini ayeke Christ,+ na ti kui ayeke lege ti warango ye.+ 22 Tongana a yeke ti tene mbi ngbâ na fini na yâ ti mitele, so ayeke lengo ti kusala ti mbi, me ye so a lingbi mbi soro ni, mbi fa ni pëpe. 23 Aye use so asara si mbi yeke gi bê ti mbi; me ye so mbi ye ayeke ti tene a zi mbi nga mbi duti legeoko na Christ,+ na so la ayeke nzoni mingi.+ 24 Me, ti tene mbi ngbâ na yâ ti mitele ayeke nzoni mingi ngbanga ti ala. 25 So na bê ti mbi ye ni ayeke biani tongaso, mbi hinga so mbi yeke ngbâ ande, na mbi yeke duti na ala kue ndali ti maïngo ti ala nga ndali ti ngia so mabe ti ala ayeke na ni, 26 si na yâ ti Christ Jésus ngia ti ala ahon ndö ni ndali ti mbi so mbi kiri mbi yeke na terê ti ala.

27 Ala sara ye* gï tongana ti so alingbi na nzoni tënë so a fa na ndö ti Christ+ si tongana mbi ga ti bâ ala wala tongana mbi yeke dä pëpe, mbi lingbi ti mä sango ti ala, so ala luti ngangu na yâ ti yingo oko, nga ala yeke tiri na terê ti mba tongana âme oko*+ ndali ti mabe so aga na lege ti nzoni tënë, 28 nga ala dö na mbeto oko pëpe na gbele azo so akanga lege na ala. Ye so afa biani so azo ni so ayeke gue ti ala na futingo,+ me ti ala, a yeke ga na ala salut;+ ye so alondo na Nzapa, 29 ndali ti so a yeke ngbanga ti Christ la si a mû pasa ni na ala ti tene ala mä gï na bê na lo pëpe, me nga ti tene ala bâ pasi ndali ti lo.+ 30 Gï oko tiri so ala bâ na ala mä tënë ni fadeso na ndö ti mbi,+ ni la ala nga ala yeke tiri ni so.

2 Tongana mbeni tënë ti kpengba zo na yâ ti Christ, wala mbeni tënë ti dengo bê so a tene ni na ndoye, wala bingo bê na mba, wala tâ yengo terê nga bango mawa ti mba ayeke na popo ti ala, 2 ala sara si mbi duti na ngia biani ndali ti so bibe ti ala ague oko, ndali ti so ndoye ti ala nga ague oko, ala duti beoko,* bibe ti ala aduti gï na ndö ti tënë oko,+ 3 ala sara mbeni ye na gingo yanga+ wala na fango terê pëpe,+ me ala sara terê ti ala kete* na ala bâ amba ti ala tongana azo so ayeke kota ahon ala;+ 4 na ziango lê ti ala gï na ndö ti aye ti ala wani pëpe,+ me nga na ndö ti aye ti amba ti ala.+

5 Ala bata na li ti ala bango ndo so, so lani Christ Jésus nga ayeke na ni,+ 6 lo so, atâa lani lo yeke na yâ ti terê so ayeke tongana ti Nzapa,+ a ga même na li ti lo lâ oko ape ti tara ti pensé so lo lingbi terê na Nzapa.+ 7 Lo sara tongaso pëpe, me lo dö aye ti lo kue lo zia, lo mû terê ti ngbâa+ na lo ga tongana zo.+ 8 Mingi ahon so, tongana lani lo ga zo ti mitele,* lo sara terê ti lo kete na lo ga zo so amä yanga juska na kuâ,+ kuâ na ndö ti keke ti pasi.*+ 9 Ndali ti tënë so, Nzapa ayâa lo na nduzu na mbeni kota ndo so ahon ti kozo ni,+ na nzoni bê Nzapa amû na lo iri so ayeke na ndö ti tanga ti airi kue,+ 10 si na iri ti Jésus genou oko oko kue akuku; genou ti ala so ayeke na yayu, ti ala so ayeke na ndö ti sese nga na ti ala so ayeke na gbe ti sese,+ 11 na yanga* oko oko kue atene polele so Jésus Christ ayeke Seigneur+ ndali ti gloire ti Nzapa Babâ ni.

12 Ndani la, aita so mbi ndoye ala mingi, so ala yeke mä yanga lakue, gï pëpe tongana mbi yeke na terê ti ala, me nga fadeso ala yeke nduru mingi ti mä yanga ahon ti kozo tongana mbi yeke dä pëpe, ala ngbâ ti sara kua ndali ti salut ti ala wani juska aga nzoni; ala sara ni tongana azo so ayeke na mbeto nga so terê ti ala adö. 13 Teti so Nzapa la, a lingbi na ye so anzere na bê ti lo, asara si ala yapu, na lege so lo zia na yâ ti bê ti ala nzara ti sara ye nga na ngangu ti sara ye ni so. 14 Ala sara aye kue na dikongo tënë na gbe ti go+ wala na papa pëpe,+ 15 si ala duti na sioni oko pëpe nga na tënë oko na li ti ala pëpe, tongana amolenge ti Nzapa+ so ayeke na sioni oko pëpe na popo ti azo ti ngoi so, so sarango ye ti ala aba bango na ayeke kirikiri mingi.+ Na popo ti azo so, ala yeke su ti ala tongana aye ti zango lumière na yâ ti dunia,+ 16 ala ngbâ ti gbu tënë ti fini ngangu.+ Tongaso, mbi lingbi ti wara lege ti duti na ngia na lâ ti Christ, na hingango so mbi kpe loro ni lani senge senge pëpe wala mbi sara kua ngangu senge senge pëpe. 17 Me, même tongana a yeke tuku mbi tongana ti so a yeke tuku na sandaga ti sämba+ na ndö ti sandaga+ nga na kusala so ayeke nzoni-kue* so mabe apusu ala ti sara ni, mbi yeke na ngia na terê ti mbi anzere legeoko na ala kue. 18 Tongaso ala nga, ala duti na ngia na terê ti ala anzere legeoko na mbi.

19 Fadeso, mbi yeke na beku ti tokua Timothée+ fafadeso na ala kâ tongana bê ti Seigneur Jésus aye, si tongana mbi mä ande sango ti ala, âme ti mbi aduti na ngia. 20 Mbi yeke na mbeni zo nde pëpe so ayeke na mara ti bibe ti lo so na so ayeke bâ ande biani lege ti aye so agbu bê ti ala. 21 Atanga ni kue ayeke gi gï aye so agbu bê ti ala wani, me aye so agbu bê ti Jésus Christ pëpe. 22 Me, ala hinga biani ye so lo sara ti fa so lo lingbi, ndali ti so legeoko tongana mbeni molenge+ na babâ ti lo, lo sara kua na terê ti mbi tongana ngbâa ti sara si nzoni tënë amaï. 23 Tongaso, tongana mbi bâ ye so ayeke si ande na mbi awe, bâ zo so mbi yeke na beku ti tokua lo na ala la. 24 Biani, tongana bê ti Seigneur aye, mbi yeke na beku so na yâ ti kete ngoi mbi wani nga mbi yeke gue ande kâ.+

25 Me, mbi bâ so a yeke nzoni mbi tokua na ala Épaphrodite, ita ti mbi, mba ti mbi zo ti kua nga mba ti mbi turugu ti Christ, me lo yeke zo ti tokua ti ala nga zo so ala tokua lo ti sara kua na mbi,+ 26 ndali ti so lo ye mingi ti bâ lê ti ala kue nga vundu asara lo mingi ngbanga ti so ala mä a tene lo tï kobela. 27 Ti tâ tënë ni, lo tï kobela nduru na kuâ; me Nzapa asara nzoni bê na lo. Biani, Nzapa asara gï nzoni bê na lo pëpe, me lo sara nzoni bê na mbi nga si mbi wara vundu na ndö ti vundu pëpe. 28 Tongaso, mbi tokua lo tâ gï hio na ala, si na bango lo, ala kiri ala duti na ngia na vundu ti mbi adë kete. 29 Ni la, ala yamba lo na ngia mingi tongana ti so lakue ala yeke yamba na azo ti Seigneur, na ala ngbâ ti bâ mara ti azo tongana lo so na nene ni mingi,+ 30 ndali ti so lo ga lani nduru na kuâ ngbanga ti kusala ti Christ* nga lo zia âme ti lo na lê ti kuâ, tongaso si lo kanga dû ti peko ti ala so ala yeke na ndo so pëpe ti sara kusala ndali ti nzoni ti mbi.+

3 Ti hunzi na ni, aita ti mbi, ala ngbâ ti duti na ngia na yâ ti Seigneur.+ Ti mbi, ti kiri ti sû mbeti na ndö ti a-oko tënë so ason mbi pëpe, a yeke ti bata ala nzoni.

2 Ala sara hange na ambo, ala sara hange na azo so ayeke sara sioni na amba ti ala, ala sara hange na ala so afâ zo na ganza.+ 3 E yeke azo so afâ tâ ganza ni,+ so ayeke sara kusala so ayeke nzoni-kue na Nzapa na lege ti yingo ti lo na e pika kate na ndö ti Christ Jésus+ nga e zia bê ti e kue na ndö ti aye ti mitele pëpe, 4 atâa so mbi yeke na araison ahon tanga ti azo kue ti zia bê ti mbi kue na ndö ti aye ti mitele.

Tongana mbeni zo abâ ti lo so lo yeke na araison ti zia bê ti lo kue na ndö ti aye ti mitele, mbi yeke na ni ahon lo: 5 A fâ mbi na ganza lango miombe+ na peko ti dungo mbi, mbi yeke zo ti Israël, ti mara ti Benjamin, mbi yeke Hébreu na babâ na mama ti mbi kue ayeke aHébreu;+ âdu ti tënë ti ndia, mbi yeke Farizien;+ 6 âdu ti sarango ye na yapungo terê, mbi sara ngangu na congrégation;+ âdu ti gango zo ti mbilimbili na lege ti kpengo ndia, mbi yeke mbeni zo so a wara tënë na li ti lo oko pëpe. 7 Me ti aye so lani mbi yeke bâ nzoni dä, na bê ti mbi wani mbi dö ni mbi zia* ndali ti Christ.+ 8 Ahon so, ndali ti hingango ye na ndö ti Christ Jésus Seigneur ti mbi so mbeni ye ti hon ni ayeke dä pëpe, mbi dö aye kue mbi zia. Ndali ti lo, mbi dö aye kue mbi zia, na mbi bâ aye ni tongana gbâ ti azende si mbi lingbi ti wara Christ 9 na a bâ so mbi yeke beoko na lo; so mbi yeke beoko na lo so, a yeke ndali ti mbilimbili ti mbi wani pëpe, mbilimbili so aga na lege ti sarango ye alingbi na ndia, me a yeke ndali ti mbilimbili so aga na lege ti mabe+ na Christ,+ mbilimbili so alondo na Nzapa na lege ti mabe.+ 10 Ye so mbi ye ayeke ti tene mbi hinga Christ nga na ngangu ti zingongo ti lo na kuâ,+ ti bâ pasi+ tongana lo, ti kui mara ti kuâ ti lo,+ 11 ti bâ wala mbi lingbi ti wara lege ti zingo na zingongo ti akuâ so ayeke si ti lo kozo.+

12 Mbi tene pëpe so mbi wara futa ni awe wala mbi ga ti mbi zo so ayeke mbilimbili-kue awe, me mbi yeke tomba peko ni+ ti bâ wala mbi lingbi nga ti gbu ye so Christ Jésus kue agbu mbi ndali ni.+ 13 Aita, mbi bâ ti mbi so mbi de ti gbu ye ni pëpe; me ye oko so mbi hinga ayeke so: Mbi yeke girisa aye kue so ayeke na peko ti mbi+ na mbi yôro go ti mbi na mbage ti aye so ayeke na devant,+ 14 mbi ngbâ ti kpe loro ni ti wara ye so ayeke na gbele mbi so ayeke futa+ ti iringo ndo ti gue na yayu,+ iringo ndo so Nzapa airi na lege ti Christ Jésus. 15 Tongaso, e kue so e kpengba awe,+ zia e duti na mara ti bango ndo tongaso, na tongana ala yeke na mbeni bibe nde na ndö ti mbeni tënë, Nzapa ayeke fa ande na ala bango ndo so e sara tënë ni fade. 16 Atâa nyen la asi, ndo so e maï ngbii si e si dä awe so, zia e ngbâ ti tambela mbilimbili na ndö ti oko lege ni so.

17 Aita, ala kue ala ga azo so asara ye tongana mbi,+ na ala zia lê ti ala na ndö ti azo so ayeke tambela alingbi na tapande so ala bâ na mbage ti e. 18 Azo mingi ayeke dä (mbi yeke sara ka tënë ti ala lani, me fadeso mbi yeke sara tënë ti ala nga na ngu ti lê) so ayeke tambela tongana awato ti keke ti pasi* ti Christ. 19 Ala yeke gue gï ti tene a futi ala, nzapa ti azo so ayeke yâ ti ala, gloire ti ala ayeke biani kamene so asara ala, na ala bi bê ti ala na ndö ti aye ti sese.+ 20 Me, e yeke amolenge ti kodro+ so ayeke ti yayu,+ na a yeke kâ la si mbeni sauveur ayeke londo ti ga, Seigneur Jésus Christ so lê ti e ayeke na lege ti ku lo;+ 21 lo la si lo yeke kiri ande ti leke terê ti e ti kamene so ti kpa terê* ti lo so ayeke na gloire+ na lege ti kota ngangu ti lo so amû lege na lo ti zia aye kue na gbe ti lo.+

4 Ndani la, aita ti mbi so mbi ndoye ala mingi nga so nzara ti bango ala asara mbi mingi so, ala so ayeke ngia ti bê ti mbi na couronne ti mbi,+ ala so mbi ndoye ala mingi, ala luti ngangu+ na yâ ti Seigneur tongana ti so mbi tene fade awe.

2 Mbi mû wango na Évodie nga mbi mû wango na Syntyche ti tene ala duti na oko bibe na yâ ti Seigneur.+ 3 Biani, mbi hunda na mo nga, mo so mo yeke tâ mba ti mbi wakua, ti ngbâ ti mû maboko na awali so, so atiri na terê ti mbi ndali ti nzoni tënë ni, na terê ti Clément nga na terê ti tanga ti amba ti mbi wakua, so iri ti ala ayeke na yâ ti mbeti ti fini.+

4 Ala duti lakue na ngia na yâ ti Seigneur. Mbi kiri mbi tene: Ala duti na ngia!+ 5 Zia azo kue ahinga so ala yeke sara ye ahon ndö ni pëpe.+ Seigneur ayeke nduru. 6 Ala gi bê ti ala na ndö ti mbeni ye pëpe,+ me na yâ ti aye kue, na lege ti sambela, na lege ti vorongo terê na Nzapa nga na sambela ti kiringo singila, ala hunda na Nzapa+ aye so agbu bê ti ala, 7 na fade siriri+ ti Nzapa so ahon ndö ti bibe kue ayeke bata bê ti ala+ nga na lege ti hingango ndo ti ala* na lege ti Christ Jésus.

8 Ti hunzi na ni, aita, ye kue so ayeke tâ tënë, ye kue so zo ayeke ne ni, ye kue so ayeke mbilimbili, ye kue so ayeke nzoni-kue, ye kue so zo alingbi ti ye ni, ye kue so a sara nzoni tënë ni, atâa a yeke ye so ayeke nzoni mingi, wala ye so a lingbi ti gonda ni, ala ngbâ ti bi bê ti ala* na ndö ti aye so.+ 9 Aye so ala manda ni, ala yeda na ni, nga ala mä ni na ala bâ ni na mbage ti mbi, ala ngbâ ti sara ni;+ na Nzapa ti siriri ayeke duti ande na ala.

10 Mbi yeke na ngia mingi na yâ ti Seigneur so fadeso ala kiri ato nda ti bi bê ti ala na mbi awe.+ Ala bi bê ti ala na mbi, me ala wara lege ti sara mbeni ye pëpe. 11 Mbi yeke sara tënë so pëpe ngbanga ti so ye amanke mbi, ndali ti so, na angoi kue, mbi manda ti zia bê ti mbi gï na ndö ti ye so mbi yeke na ni.+ 12 Mbi hinga lege ti duti na yâ ti yere,+ mbi hinga lege ti duti na ye mingi. Na yâ ti aye kue nga na angoi kue mbi hinga lege ti duti nzoni, atâa yâ ti mbi asi wala mbi duti na nzara, atâa mbi yeke na gbâ ti ye wala ye amanke mbi. 13 Mbi wara ngangu ti sara aye kue ndali ti lo so lo mû ngangu ni na mbi.+

14 Ye oko, ala sara nzoni so ala mû maboko na mbi na yâ ti pasi ti mbi. 15 Ti tâ tënë ni, ala, aita ti Philippes, ala hinga nga so na peko ti so a fa nzoni tënë na ala ti kozoni, na ngoi so mbi londo lani na Macédoine ti hon, mbeni congrégation nde asara beoko na mbi pëpe na ndö ti tënë ti mungo ye na zo nga na ti warango ye na maboko ti zo, gï ala oko awe,+ 16 ndali ti so même so mbi yeke na Thessalonique, ala tokua na mbi aye so amanke mbi, ala tokua ni gï fani oko pëpe me fani use. 17 Mbi yeke gi gingo ti wara matabisi pëpe, me ye so mbi yeke gi gingo biani ayeke lengo so ayeke dü mbeni mosoro mingi na ndö ni na ala. 18 Me, mbi yeke na aye kue alingbi na mbi na mbi yeke na ni gbani gbani. Fadeso, ye asi mbi singo, so mbi wara na maboko ti Épaphrodite+ aye so ala tokua na mbi, mbeni ye so fion ni afun pendere,+ sandaga so a yeda na ni nga so anzere na lê ti Nzapa. 19 Ande Nzapa ti mbi ayeke mû na ala gbâ ti aye kue so amanke ala+ alingbi na gbâ ti mosoro ti gloire ti lo na lege ti Christ Jésus. 20 Zia a mû gloire na Nzapa ti e nga Babâ ti e lakue lakue nga kpu na kpu. Amen.

21 Ala bara na mbi azo ti be-vulu kue so ayeke beoko na Christ Jésus. Aita so ayeke na terê ti mbi atokua bara na ala. 22 Azo ti be-vulu kue, me mbilimbili ala so ayeke ti da ti César,+ atokua bara na ala.

23 Kota nzobe ti Seigneur ti e Jésus Christ aduti na bibe so ala yeke na ni so.