MBETI SO PAUL ATOKUA NA ACOLOSSIEN

1 Paul, bazengele ti Christ Jésus na lege ti ye so bê ti Nzapa aye, nga Timothée+ ita ti e, 2 atokua mbeti so na azo ti be-vulu nga na aita be-ta-zo ti Colosses so ayeke sara beoko na Christ Jésus:

Zia kota nzobe nga na siriri so alondo na Nzapa Babâ ti e aduti na ala.

3 Tongana e yeke sambela ndali ti ala, e yeke kiri singila lakue na Nzapa Babâ ti Seigneur ti e Jésus Christ, 4 ndali ti so e mä tënë ti mabe ti ala na Christ Jésus nga ndoye so ala yeke na ni na mbage ti azo ti be-vulu kue 5 ndali ti beku so ala yeke na ni na ndö ti aye so a bata ni na ala na yayu.+ Ala mä lani tënë ti beku so tongana a fa tâ tënë ti nzoni tënë so na ala. 6 Nzoni tënë so, a si na ala, legeoko tongana ti so a yeke lë lengo na a yeke maï gï maïngo na yâ ti dunia mobimba,+ a yeke sara nga tongaso na popo ti ala, a londo na lango so ala mä na ala hinga mbilimbili kota nzobe ti Nzapa na yâ ti tâ tënë. 7 A yeke Épaphras,+ mba ti e ngbâa so e ndoye lo mingi, si afa ye so na ala; lo yeke wakua be-ta-zo ti Christ so ayeke sara kua na iri ti e. 8 A yeke lo nga la si afa na e tënë ti ndoye so yingo ti Nzapa amû lege na ala ti duti na ni.

9 Ndani nga la si, ti e, a londo na lango so si e mä na tënë ni, e zia lâ oko pëpe ti sambela ndali ti ala+ na ti hunda ti tene ala si singo na tâ hingango ye+ ti ye so bê ti Nzapa aye na ndara kue nga na gbungo nda ti ye kue na lege ti yingo,+ 10 si ala tambela na lege so alingbi na lê ti Jéhovah,* ti mû ngia mingi na lo. Na oko ngoi ni ala yeke ngbâ ande ti lë lengo na yâ ti nzoni kusala kue nga ti maï na yâ ti tâ hingango ye na ndö ti Nzapa,+ 11 na zia a sara si ala kpengba na lege ti ngangu kue alingbi na pendere ngangu ti lo,+ si ala lingbi ti gbu ngangu na yâ ti aye kue na ngoi so ala yeke kanga bê ti ku nga ala yeke na ngia. 12 Ala kiri singila na Babâ ni so asara si ala lingbi biani ti wara mbage na héritage ti azo ti be-vulu+ so ayeke na yâ ti lumière.

13 Lo zi e na gbe ti komandema ti bingo+ na lo gue na e na yâ ti royaume ti Molenge ti lo so lo ndoye lo mingi. 14 Na lege ti Molenge so, a zi e na lege ti ye so a futa ti zi azo, so ti tene a pardonné asiokpari ti e.+ 15 Lo yeke image ti Nzapa so lê ayeke bâ lo pëpe,+ kozo ye* na popo ti aye kue so Nzapa asara,+ 16 ngbanga ti so a yeke na lege ti lo la si a sara tanga ti aye kue na yayu nga na ndö ti sese, aye so lê abâ nga na aye so lê abâ pëpe,+ atâa a yeke atrône wala amokonzi wala agouvernement wala akomandema. A sara tanga ti aye kue na lege ti lo+ nga ndali ti lo. 17 Nga, lo yeke kozo na tanga ti aye kue+ na a yeke na lege ti lo la si tanga ti aye kue abâ gigi, 18 na lo yeke li ti terê ni, so ayeke congrégation.+ Lo yeke tongo nda ti ye kue, lo yeke kozo molenge so ayeke kozo zo so azingo na popo ti akuâ,+ si lo lingbi ti ga lo so ayeke kozo na yâ ti aye kue, 19 ndali ti so Nzapa abâ so a yeke nzoni ti zia si aye kue asi singo na yâ ti Molenge ni,+ 20 nga ti tene na lege ti lo Nzapa asara si songo akiri na popo ti lo na tanga ti aye kue,+ atâa a yeke aye so ayeke na ndö ti sese wala aye so ayeke na yayu. Lo leke songo so na lege ti mênë ti Christ+ so lo tuku na ndö ti keke ti pasi.*

21 Biani, ala so ândö ala yeke yongoro na Nzapa na ala yeke awato ti lo ngbanga ti so ala yeke bi bê ti ala lani gï na ndö ti asioni kusala, 22 fadeso Nzapa asara si songo akiri na popo ti lo na ala na lege ti terê ti lo so lo kä na kuâ, ti tene lo ga na ala na gbele Nzapa tongana azo so ayeke nzoni-kue, so sioni oko ayeke na terê ti ala pëpe nga so tënë oko ayeke na li ti ala pëpe,+ 23 gï tongana biani ala ngbâ lakue na yâ ti mabe,+ ala luti na ndö ti gere ti mabe ni+ nga ala luti ngangu+ na ala zia si a hon na ala yongoro pëpe na terê ti beku ti nzoni tënë so ala mä ni, nzoni tënë so a fa ni na création kue so ayeke na gbe ti yayu+ na so mbi Paul mbi ga wakua ni.+

24 Fadeso mbi yeke na ngia ndali ti apasi so mbi bâ ngbanga ti ala.+ Ti mbi, na yâ ti terê ti mbi, mbi yeke hunzi tanga ti aye ti vundu ti Christ ndali ti terê ti lo+ so ayeke congrégation.+ 25 Mbi ga wakua ti congrégation so, a lingbi na kusala so Nzapa amû na mbi ti bâ lege ti aye+ ndali ti nzoni ti ala, ti fa tënë ti Nzapa kue kue kue, 26 tënë so Nzapa ahonde ndani+ na yâ ti angoi so ahon awe+ nga so lo honde ndani na azo ti angoi so ahon awe. Me fadeso a fa ndani na azo ti be-vulu ti lo,+ 27 ala so Nzapa ayeke na ngia ti sara si ala hinga wala gbâ ti mosoro ti tënë so lo honde ndani+ so ayeke nyen na popo ti amara. Tënë ni so ayeke Christ so asara beoko na ala, so ti tene ala yeke na beku ti tene a mû gloire na ala legeoko na lo.+ 28 A yeke lo la si e yeke fa tënë ti lo, e yeke gboto mê ti azo kue nga e yeke fa ye na ala kue na lege ti ndara kue, si e lingbi ti ga na zo oko oko kue na Nzapa tongana zo so akpengba awe so asara beoko na Christ.+ 29 Ndani la, mbi yeke sara ngangu biani, mbi yeke tiri na lege ti ngangu ti lo so ayeke sara kua na yâ ti mbi.+

2 Mbi ye ala hinga tâ kota tiri so mbi yeke tiri ndali ti ala, ndali ti ala so ayeke na Laodicée+ nga ndali ti ala kue so ade ti bâ lê ti mbi lâ oko pëpe, 2 si bê ti ala alingbi ti dë,+ tongaso si ala kue atingbi ti ga oko na yâ ti ndoye+ ti tene ala wara mosoro so ayeke gbungo nda ti ye nzoni so ala yeke na ni, so ayeke polele nga so ayeke tâ gï ni la awe, ti tene ala wara tâ hingango ye ti tënë so Nzapa ahonde ndani, so ayeke Christ.+ 3 A yeke na yâ ti lo la si a honde ngangu amosoro kue ti ndara na ti hingango ye.+ 4 Mbi tene tongaso si mbeni zo ahanda ala pëpe na atënë so ague na zo ti ye peko ti mbeni ye. 5 Atâa so mbi wani mbi yeke dä pëpe, bê ti mbi ayeke na ala, mbi yeke na ngia nga mbi yeke bâ so aye ayeke tambela na lege ni+ na popo ti ala nga mabe ti ala na Christ ayengi pëpe.+

6 So ala yeda na Seigneur Christ Jésus awe, zia ala ngbâ ti tambela beoko na lo, 7 gunda ti ala alï sese na ala kpengba na yâ ti lo,+ ala yengi pëpe na yâ ti mabe+ gï tongana ti so a fa lani na ala, nga ala kiri singila mingi mingi na Nzapa.+

8 Ala sara hange si mbeni zo agbu ala na kûkû pëpe na lege ti senda-ndara na senge senge tënë ti handa+ so alondo na ngobo ti azo, so ague oko na aye ti dunia so, so ayeke tongana aye ti amolenge, me a gue oko na Christ pëpe, 9 ngbanga ti so a yeke na yâ ti lo la si asarango ye ti terê ti Nzapa kue kue kue aga mbeni terê na aduti dä.+ 10 Ni la, ala manke mbeni ye oko pëpe na lege ti lo, lo so lo yeke li ti gouvernement kue nga na komandema kue.+ 11 Ndali ti songo so ala yeke na ni na lo, a fâ nga ala na ganza, so ayeke ganza ti Christ,+ so maboko la si afâ ni pëpe na zingo terê ti zo+ so siokpari ayeke dä, 12 ndali ti so a lu ala na Christ na yâ ti batême ti lo,+ nga ndali ti songo so ala yeke na ni na lo, a zingo ala nga na kuâ+ ndali ti mabe ti ala na yâ ti ye so Nzapa asara, Nzapa so azingo Christ na kuâ.+

13 Nga, atâa so ala kui lani awe na yâ ti afaute ti ala, na yâ ti dutingo ti ala ti zo so a fâ lo na ganza pëpe, Nzapa asara si ala kiri na fini na ala ga oko na Christ.+ Nzapa asara nzoni bê, lo pardonné afaute ti e kue+ 14 na lo mbô mbeti so a sû ni+ si a zia tënë na li ti e, so na yâ ni a yeke wara ambela+ so afâ ngbanga na li ti e;+ na Nzapa alungula ni na lege so lo pika ni na pointe na ndö ti keke ti pasi.*+ 15 Lo zi aye kue na terê ti gouvernement na akomandema si ala ngbâ terê senge, lo fa ala dandara tongana azo so a kinda ala awe;+ na lege ti keke ti pasi ni lo yeke gboto ala gbotongo na yâ ti molongo ti azo so asö benda awe si ayeke tambela na yâ ni.*

16 Ndani la, zia mbeni zo afâ ngbanga na li ti ala pëpe ndali ti tengo ye na nyongo ye+ wala ndali ti mbeni matanga wala batango mbeni fini nze+ wala lâ ti sabbat;+ 17 ndali ti so aye so kue ayeke gbe ti dê ti mbeni ye so ayeke ga ande,+ me tâ ye ni ayeke ti Christ.+ 18 Ala zia si mbeni zo anzi futa ti ala pëpe,+ mbeni zo so ayeke wara ngia na yâ ti sarango terê ti lo kete so ayeke gï ti mvene ni nga na yâ ti mbeni lege ti vorongo a-ange. Zo tongaso “aluti mingi na ndö ti” aye so lo bâ, na bibe ti lo ti mitele asara si baba ahon ndö ti lo senge senge, 19 me lo ngbâ na terê ti li ni pëpe,+ so ti tene, lo so na lege ti lo, terê ni kue ayeke wara ye nga abungbi oko na yâ ti mango terê na lege ti ando so abio ni atingbi dä nga na lege ti akamba ti terê ni. Nga na lege ti lo, a sara si terê ni kue angbâ gï ti kono na konongo ti so Nzapa aye.+

20 Tongana ala kui legeoko na Christ awe na ndö ti tënë ti aye ti dunia so,+ so ayeke tongana aye ti amolenge, ngbanga ti nyen ala kiri ala woko terê na gbe ti ambela so, mo bâ mo tene ala ngbâ na yâ ti dunia ni? Ambela+ so atene: 21 “Mû ye so pëpe, tara ye so pëpe, ndu ye so pëpe;” 22 so kue so ayeke gï acommandement nga na afango ye ti azo+ na ndö ti tënë ti aye so tongana a sara kua na ni awe a yeke hunzi hunzingo. 23 Ambela so akpa ye so ayeke na ndara, na a yeke bâ ni na lege ti vorongo Nzapa ti li ti zo wani, sarango terê kete so ayeke gï ti mvene ni na sarango terê ti zo na pasi.+ Me, aye so kue so ayeke senge senge na yâ ti bira so zo ayeke sara na nzara ti bê ti lo.

3 Me, tongana a zingo ala na kuâ legeoko na Christ awe,+ zia ala ngbâ lakue ti gi aye so ayeke na yayu, ndo so Christ aduti dä na terê ti Nzapa na mbage ti maboko ti lo ti koli.+ 2 Ala zia li ti ala angbâ gï na ndö ti aye so ayeke na yayu,+ me na ndö ti aye so ayeke na sese pëpe.+ 3 Ndali ti so ala kui awe, na a honde fini ti ala legeoko na Christ alingbi na ye so bê ti Nzapa aye. 4 Na ngoi so Christ so ayeke fini ti e+ ayeke fa terê ti lo na gigi, a yeke fa ande ala nga legeoko na lo na yâ ti gloire.+

5 Tongaso ala sara si amembre ti terê ti ala+ so ayeke na sese so akui tongana a ndu lango-sioni,* sioni ye, nzara ti terê so a kanga ni pëpe,+ sioni nzara ti bê na sarango bê ti ye, so ayeke vorongo ayanda. 6 A yeke ndali ti aye so la si ngonzo ti Nzapa ayeke ga. 7 A yeke na yâ ti aye so la si ândö+ ala nga ayeke tambela dä, na ngoi so lani ala ngbâ na yâ ni. 8 Me ti fadeso, ala zi aye so kue yongoro na ala: ngonzo, songo bê, sioni bê,+ zongango ndo+ nga na abuba tënë+ so asigi na yanga ti ala. 9 Ala tene mvene na popo ti ala pëpe.+ Ala zi ngbene zo+ nga na asarango ye ti terê ti lo kue, 10 na ala yü fini zo+ so na lege ti tâ hingango ye asara si lo yeke ga gï fini alingbi na image ti Zo so asara ni;+ 11 ge so, Grec wala Juif ayeke dä pëpe, fango ganza wala fango ganza pëpe ayeke dä pëpe, wala wande, wala zo ti Scythe,* wala ngbâa, wala zo so ayeke ngbâa pëpe ayeke dä pëpe; me Christ la si ayeke aye kue na lo yeke na yâ ti aye kue.+

12 So ala yeke azo so Nzapa asoro ala awe,+ azo ti be-vulu na so a ndoye ala, ala yü tâ bango mawa ti zo,+ sarango nzoni na zo, sarango terê kete,+ sarango ye na ngangu pëpe;+ ala yü nga kangango bê ti ku.+ 13 Ala ngbâ ti kanga bê na amba ti ala na popo ti ala, na ti pardonné mba na bê ti ala kue,+ même tongana mbeni zo ayeke na tënë ti dema na terê ti mba ti lo.+ Gï tongana ti so Jéhovah* apardonné ala na bê ti lo kue, ala nga ala doit ti sara tongaso.+ 14 Me, na ndö ti aye so kue, ala yü ndoye, ndali ti so ndoye+ ayeke kamba so abungbi ye mbilimbili.+

15 Nga, ala zia siriri ti Christ afa lege na bê ti ala,+ siriri so a iri ala ndali ni na yâ ti terê oko. Ala fa singila ti bê ti ala. 16 Ala zia tënë ti Christ aduti mingi mingi na yâ ti ala na ndara ni kue. Ala ngbâ ti fa ye na azo nga ala ngbâ ti wa terê* na popo ti ala na lege ti apsaume,+ abia ti sepelango na Nzapa, abia ti yingo so a he ni nzoni; ala ngbâ ti he bia na Jéhovah* na yâ ti bê ti ala.+ 17 Ye kue so ala tene ni wala ala sara ni, ala sara ni na iri ti Seigneur Jésus, na ala kiri singila na Nzapa Babâ na lege ti lo.+

18 Awali, ala woko terê na gbe ti akoli ti ala+ tongana ti so alingbi na azo ti Seigneur. 19 Akoli, ala ngbâ lakue ti ye awali ti ala+ na ala sara ngonzo mingi* na terê ti awali ti ala pëpe.+ 20 Amolenge, ala mä yanga ti ababâ na amama ti ala na yâ ti aye kue,+ ndali ti so sarango tongaso anzere na bê ti Seigneur. 21 Ababâ, ala son bê* ti amolenge ti ala pëpe,+ si bê ti amolenge ni awoko pëpe. 22 Angbâa, ala mä yanga ti azo so ayeke awa ti ala+ na yâ ti aye kue, gï pëpe na ngoi so azo ni ayeke bâ ala, gï ti nzere na lê ti azo, me ala sara ni na vuru bê nga na mbeto ti Jéhovah.* 23 Aye kue so ala yeke sara, ala sara ni na âme* ti ala kue mo bâ mo tene ala sara ni na Jéhovah,*+ me na azo pëpe, 24 ndali ti so ala hinga so Jéhovah* la si ayeke mû na ala futa ti héritage ni.+ Ala sara kua tongana angbâa na Wa ni, so ayeke Christ. 25 Ti tâ tënë ni, zo so asara sioni, lo yeke wara ande ye ti peko ti sioni so lo sara,+ ndali ti so Nzapa ayeke sara kangbi na popo ti azo pëpe.+

4 Awa ti angbâa, ala sara lakue ye so ayeke mbilimbili nga na lege ni na angbâa ti ala, ndali ti so ala hinga so ala nga kue ala yeke na mbeni Wa ti ala na yayu.+

2 Ala ngbâ lakue ti sambela.+ Na ndö ti tënë ti sambela ni, zia lê ti ala angbâ na zingo ni na ala kiri singila.+ 3 Na oko ngoi ni ala sambela nga ndali ti e+ si Nzapa azi mbeni yanga-da na e ti fa tënë ni nga ti fa na azo tënë ti Nzapa so lo honde ndani, tënë so andu Christ, so ndali ni si mbi yeke na yâ ti chaîne,+ 4 tongaso si mbi fa tënë ni polele tongana ti so a lingbi mbi fa ni na azo.

5 Ala ngbâ lakue ti sara ye na ndara na mbage ti azo so ayeke na gigi, na sarango kusala nzoni na ngoi ti ala.*+ 6 Zia lakue tënë ti yanga ti ala aduti nzoni, ala zia ingo dä,+ si ala hinga tongana nyen la a lingbi ala kiri tënë na zo oko oko.+

7 Tychique,+ ita ti mbi so mbi ndoye lo mingi, wakua be-ta-zo nga mba ti mbi ngbâa na yâ ti Seigneur, ayeke fa ande na ala tënë ti aye kue so asi na mbi. 8 Mbi yeke tokua lo na ala ti tene ala hinga ye so asi na e nga ti tene lo dë bê ti ala. 9 Lo yeke gue legeoko na Onésime,+ ita ti mbi so ayeke be-ta-zo nga so mbi ndoye lo mingi, lo so lo yeke ti ala kâ. Aita so ayeke fa ande na ala aye kue so asi ge.

10 Aristarque,+ mba ti mbi so a bi mbi na lo na kanga, atokua bara na ala; Marc,+ fami ti Barnabas, abara ala nga (lo la si a mû lani yanga na ala ndali ti lo a tene: tongana lo si na ala kâ, ala yamba lo+ nzoni so), 11 na Jésus, so a iri lo Justus; ala so ayeke ti azo so afâ ganza. Gï ala so la si ayeke amba ti mbi wakua ndali ti Royaume ti Nzapa, na a yeke ala la si aga azo so adë bê ti mbi mingi.* 12 Épaphras,+ lo so lo yeke ti ala kâ, mbeni ngbâa ti Christ Jésus, atokua bara na ala. Lakue lo yeke tiri ngangu ndali ti ala na yâ ti asambela ti lo ti tene na nda ni ala ga azo so akpengba kue awe nga so amä na bê ngangu na ye kue so bê ti Nzapa aye. 13 Mbi yeke tene nzoni tënë ti lo, so lo yeke sara kua ngangu mingi ndali ti ala, ndali ti azo so ayeke na Laodicée nga na ala so ayeke na Hiérapolis.

14 Luc,+ docteur so e ndoye lo mingi, atokua bara na ala, Démas+ kue abara ala. 15 Ala bara na mbi aita ti Laodicée, ala bara nga ita-wali Nymphas nga na congrégation so ayeke na da ti lo.+ 16 Tongana ala diko mbeti so na popo ti ala awe, ala leke si a diko ni+ nga na yâ ti congrégation ti aita ti Laodicée, ala diko nga mbeni mbeti ni so ayeke ti Laodicée so. 17 Nga, ala tene tënë so na Archippe,+ ala tene: “Mo zia bê ti mo na ndö ti kusala so mo yeda ti wara ni na yâ ti Seigneur, si mo sara ni a hunzi.”

18 So bara ti mbi Paul la, so mbi wani mbi sû na maboko ti mbi.+ Ala bi bê ti ala lakue na achaîne+ so mbi yeke na yâ ni so. Kota nzobe ti Nzapa aduti na ala.