KOZO MBETI SO PAUL ATOKUA NA ATHESSALONICIEN

1 Paul, Sylvain*+ na Timothée+ atokua mbeti so na azo ti congrégation ti Thessalonique so asara beoko na Nzapa Babâ ni nga na Seigneur Jésus Christ:

Zia kota nzobe ti Nzapa nga na siriri aduti na ala.

2 E yeke kiri singila lakue na Nzapa na ngoi so e yeke sara tënë ti ala kue na yâ ti asambela ti e,+ 3 ndali ti so e yeke dabe ti e lakue na kusala so mabe apusu ala ti sara, ngangu kua so ndoye apusu ala ti sara ni nga na gbungo ngangu so ala yeke gbu ndali ti beku ti ala+ na Seigneur ti e Jésus Christ, na lê ti Nzapa ti e nga Babâ ti e. 4 Aita so Nzapa andoye ala, e hinga so lo soro ala awe, 5 ndali ti so nzoni tënë so e fa asi na ala kâ lani gï pëpe na lege ti tënë ti yanga, me a si nga na ngangu, na yingo vulu nga na bê so ayeda na tënë ni kue; nga ala hinga ye so e sara lani ndali ti nzoni ti ala. 6 Ala ga azo so asara ye tongana ti e+ nga tongana ti Seigneur,+ ndali ti so e bâ so ala yeda na tënë ni na yâ ti apasi mingi+ na ngia so alondo na yingo vulu, 7 tongaso si ala ga mbeni tapande ndali ti azo kue so amä na bê si ayeke na Macédoine nga na Achaïe.

8 Ti tâ tënë ni, tënë ti Jéhovah* so alondo na ala kâ so, a mû gï yâ ti Macédoine nga na Achaïe pëpe, me tënë ti mabe ti ala na Nzapa amû ndo kue,+ ye so asara si e lingbi ti tene mbeni tënë oko na ndö ni pëpe. 9 Azo so angbâ ti fa tongana nyen si ti kozoni e si lani na popo ti ala, nga tongana nyen ala dö lege ti ayanda ti ala+ azia ti ga ti sara kua tongana angbâa na tâ Nzapa so ayeke na fini, 10 nga ti ku Molenge ti lo so ayeke londo na yayu ti ga,+ lo so Nzapa azingo lo na kuâ, so ti tene Jésus, lo so azi e na gbe ti ngonzo so ayeke ga.+

2 Aita, ala wani ahinga biani atene guengo so lani e gue e bâ ala so, peko ni angbâ senge pëpe.+ 2 Atâa so kozoni e bâ pasi lani na a sara ye ti kamene na e na kodro ti Philippes,+ tongana ti so ala hinga ni, Nzapa+ ti e asara si e zi mbeto na yâ ti e ti fa nzoni tënë ti lo na ala na yâ ti kota tiri. 3 Wango so e mû alondo pëpe na yâ ti atënë so ayeke na lege ni pëpe, e mû ni na sioni bê pëpe nga na tënë ti handango zo pëpe, 4 me, legeoko tongana ti so Nzapa abâ so e lingbi awe ti tene lo zia nzoni tënë ni na maboko ti e ti bata, e nga e yeke sara tënë ni ti nzere na lê ti azo pëpe, me ti nzere na lê ti Nzapa, lo so ayeke bâ ye so ayeke na yâ ti bê ti e.+

5 Biani, ala hinga so e ga na ala na anzerengo tënë lâ oko pëpe, wala na tënë ti handango lê ti zo ti honde ndö ti kota bê ti e;+ Nzapa ayeke témoin ni! 6 Nga e gi lâ oko pëpe ti wara gloire na mbage ti azo, na mbage ti ala wala na mbage ti ambeni zo nde, atâa so e lingbi fade ti duti mbeni nengo kungba na ndö ti ala ndali ti so e yeke abazengele ti Christ.+ 7 E sara tongaso pëpe, me na ngoi so e yeke lani na popo ti ala, e sara ye na ala na nzoni bê tongana mbeni mama so ayeke mû me na amolenge ti lo na lo bata ala nzoni. 8 Ndali ti so e ye ala mingi, e yeke lani na ngia ti fa na ala gï nzoni tënë ti Nzapa pëpe, me e mû nga terê ti e* kue+ na ala, ngbanga ti so ala ga azo so e ye ala mingi.+

9 Aita, biani ala dabe ti ala na ngangu kua nga na pasi ti e. Tongana e yeke fa lani nzoni tënë ti Nzapa na ala, e sara kua bï na lâ si e ga mbeni nengo kungba na ndö ti mbeni zo na popo ti ala pëpe.+ 10 Ala yeke atémoin ni, na Nzapa kue ayeke témoin ni, so na yâ ti sarango ye ti e na mbage ti ala, aita so amä na bê, ala bâ tongana nyen e yeke lani be-ta-zo, e yeke mbilimbili nga tënë ayeke na li ti e pëpe. 11 Tongana ti so ala hinga ni nzoni, e zia pëpe ti wa ala oko oko kue, ti dë bê ti ala nga ti sara tënë mingi na ala,+ legeoko tongana ti so mbeni babâ+ ayeke sara na amolenge ti lo, 12 si ala ngbâ ti tambela na lege so alingbi na lê ti Nzapa,+ lo so lo iri ala na yâ ti Royaume+ nga na gloire ti lo.+

13 Ndani la si e nga e kiri singila lakue na Nzapa ndali ti so,+ na ngoi so ala yamba tënë ti Nzapa so e fa lani na ala, ala yamba ni tongana tënë so alondo na azo pëpe, me tongana tënë ti Nzapa, na a yeke tënë ti lo biani, tënë ni so ayeke sara nga kua na yâ ti bê ti ala, aita so amä na bê. 14 Biani, ala ga azo so amû tapande ti acongrégation ti Nzapa so ayeke na Judée na so asara beoko na Christ Jésus, ndali ti so ala komanse ti bâ na maboko ti azo ti kodro ti ala+ a-oko pasi so aita ti Judée nga abâ ni na maboko ti aJuif 15 so afâ même Seigneur Jésus+ nga na aprophète, na ala sara nga ye ti ngangu na e.+ Nga, ala yeke mû ngia na Nzapa pëpe, me ala ke ye so ayeke ndali ti nzoni ti azo kue, 16 ndali ti so ala tara ti kanga lege na e ti fa tënë na azo ti amara si a sö fini ti azo so,+ na ye ti peko ni ayeke so aJuif so angbâ gï ti sara siokpari mingi. Me na nda ni ngonzo ti Nzapa atï na ndö ti ala awe.+

17 Me, aita, na ngoi so a kangbi popo ti e na ala na ngangu ndali ti kete ngoi (e yeke na terê ti ala pëpe, me bê ti e ayeke na ndö ti ala), e sara ngangu kue ti bâ lê ti ala ndali ti so nzara ti ala asara e mingi. 18 Ndani la, e ye lani ti gue na ala kâ, na mbi Paul mbi tara ti gue fani oko, même fani use ni, me Satan akanga lege na e. 19 Beku ti e, wala ngia ti e wala couronne ti e so e yeke pika ande kate ngbanga ni na gbele Seigneur ti e Jésus na ngoi so lo yeke duti dä so ayeke nyen? A yeke ala ape?+ 20 Biani, ala la si ayeke gloire ti e nga na ngia ti e.

3 Tongaso, na ngoi so e lingbi ti kanga bê ti e na ni encore ape, e bâ so a yeke nzoni mingi ti tene gï e oko e ngbâ na Athènes,+ 2 na e tokua ita ti e Timothée,+ wakua ti Nzapa* so ayeke fa nzoni tënë na ndö ti Christ, ti gue ti kpengba ala na ti dë bê ti ala si asara nzoni na mabe ti ala, 3 tongaso si aye ti vundu so ayengi mbeni zo pëpe. Ndali ti so ala wani ala hinga so e lingbi ti kpe amara ti pasi tongaso pëpe.+ 4 Na ngoi so e yeke ândö na terê ti ala, lakue e yeke tene na ala kozoni so a lingbi ye ti vundu asi na e, gï tongana ti so a si awe, tongana ti so ala hinga.+ 5 Ndani la, na ngoi so mbi lingbi ti kanga bê ti mbi na ni encore ape, mbi tokua ndo na ala kâ ti hinga tënë na ndö ti dutingo ti ala be-ta-zo,+ ndali ti so mbi hinga pëpe wala Wahanda+ atara ala awe, na tongaso peko ti ngangu kua ti e angbâ senge.

6 Me so Timothée alondo na ala kâ, singo ti lo na e ge la,+ na lo tene na e nzoni tënë na ndö ti mabe ti ala nga na ndö ti ndoye ti ala. Lo tene so ala ngbâ lakue ti dabe ti ala na e na anzoni ye so e sara, na ala sara nzara ti bango e tongana ti so e nga e sara nzara ti bango ala. 7 Ndani la, aita, ndali ti so ala fa so ala yeke be-ta-zo, bê ti e adë ndali ti ala na yâ ti pasi nga na yâ ti vundu ti e kue,+ 8 ndali ti so e bâ so e kiri e wara ngangu* ndali ti so ala luti ngangu na yâ ti Seigneur. 9 Singila ti nyen la si e lingbi ti mû na Nzapa ngbanga ti ala na peko ti kota ngia so e wara ni na gbele Nzapa ti e ndali ti ala so? 10 Bï na lâ e yeke voro terê ti e mingi na lo ti tene e bâ lê ti ala na e zia na ndö ti mabe ti ala ye so amanke dä si mabe ti ala ni akpengba.+

11 Zia Nzapa, lo so ayeke Babâ ti e, nga na Seigneur ti e Jésus afa lege na e nzoni ti si na ala kâ. 12 Nga, zia Seigneur asara si ala maï, biani, ala si singo, na ndoye na mbage ti mba+ nga na mbage ti azo kue, gï tongana ti so e nga e yeke na ni na mbage ti ala, 13 si lo lingbi ti sara si bê ti ala ayengi pëpe, ala duti na tënë na li ti ala pëpe nga nzoni-kue na lê ti Nzapa Babâ ti e,+ na ngoi so Seigneur ti e Jésus+ ayeke duti dä, lo na azo ti lo ti be-vulu kue.

4 Ti hunzi na ni, aita, legeoko tongana ti so e wa ala lani na ndö ti lege so a lingbi ala tambela na ni nga ala mû ngia na Nzapa,+ tongana ti so ala yeke tambela fadeso, e hunda na ala nga e wa ala na iri ti Seigneur Jésus ti ngbâ ti sara ni mingi ahon so. 2 Ndali ti so ala hinga yanga so e mû lani na ala na iri ti Seigneur Jésus.

3 Bâ, ye so Nzapa aye ayeke ti tene ala ga nzoni-kue,+ ala gbanzi terê ti ala na lango-sioni.*+ 4 A yeke nzoni zo oko oko na popo ti ala ahinga ti kanga nzara ti terê* ti lo wani+ si lo duti nzoni-kue+ nga na nengo terê, 5 me pëpe na lege ti nzara ti terê+ so a kanga ni pëpe tongana ti so amara so ahinga Nzapa pëpe ayeke nga na ni.+ 6 A yeke nzoni mbeni zo ague ahon pëpe katikati ti ye so ayeke na lege ni nga lo gi ti wara go na ndö ti ita ti lo pëpe na ndö ti tënë so, ndali ti so Jéhovah* ayeke fâ ngbanga na ndö ti aye so kue, gï tongana ti so e sara tënë ni kozo na ala nga e gboto mê ti ala ngangu dä. 7 Biani, Nzapa airi e pëpe ndali ti sioni ye, me ti duti azo so ayeke nzoni-kue.+ 8 Ni la, tongana mbeni zo ake tënë so, lo yeke ke zo pëpe, me lo yeke ke Nzapa,+ lo so azia yingo vulu ti lo na yâ ti ala.+

9 Me, âdu ti tënë ti yengo terê tongana aita,+ a yeke mbeni ye ti tene mbi sû mbeti na ala ndali ni pëpe, ndali ti so Nzapa afa na ala ti ye terê na popo ti ala.+ 10 Tâ tënë, a yeke ye so ala yeke sara ni na aita kue so ayeke na yâ ti Macédoine kue. Me, aita, e wa ala mingi ti ngbâ ti sara ni mingi mingi ahon ti kozo. 11 Ala sara kue ti duti gï na siriri+ nga ti sara gï ye so abâ gï ala wani,+ ti sara kua na maboko ti ala wani+ gï tongana ti so e mû lani yanga na ala ti sara; 12 tongaso si ala tambela na lege ni na lê ti azo ti gigi+ nga mbeni ye amanke ala pëpe.

13 Nga, aita, e ye ala hinga tënë na ndö ti azo so akui,*+ si ala sara mawa ahon ndö ni pëpe tongana tanga ti azo so ayeke na beku pëpe.+ 14 Ndali ti so tongana e mä na bê so Jésus akui na lo zingo na kuâ,+ e mä na bê nga so ala so akui beoko na Jésus, Nzapa ayeke ga ande na ala legeoko na lo.+ 15 Bâ ye so e ye ti fa na ala na lege ti tënë ti Jéhovah* la: E so e yeke na fini si e yeke ngbâ juska na ngoi so Seigneur ayeke duti dä, e yeke hon ande kozo pëpe na ala so akui awe, 16 ndali ti so Seigneur wani ayeke londo na yayu ti descend, lo yeke mû ande yanga na kota go, na go so ayeke ti archange+ nga na trompette ti Nzapa; na ala so akui beoko na Christ ayeke londo ande kozoni.+ 17 Na pekoni, e so e yeke na fini si e ngbâ, a yeke mû e ande legeoko na ala na yâ ti mbinda+ ti gue ti tingbi na Seigneur+ na yâ ti pupu; na tongaso e yeke duti lakue lakue na terê ti Seigneur.+ 18 Ni la, ala ngbâ ti dë bê ti mba na tënë so.

5 Aita, âdu ti ngoi ni nga na alango ni so a soro awe, mbeni ye ti tene a sû mbeti na ala ndali ni la pëpe. 2 Ndali ti so ala wani ahinga nzoni mingi so lâ ti Jéhovah*+ ayeke ga tâ gï tongana mbeni zo ti nzi na bï.+ 3 Na ngoi so azo ni ayeke tene: “Siriri na nzoni duti ayeke dä!” mo ye ti bâ, futingo ayeke ga gï hio tongaso na ndö ti ala+ gï tongana ti so songo yâ ayeke gbu mbeni mama ti ngo; na ala yeke kpe ande oko pëpe. 4 Me ala, aita, ala yeke na yâ ti bingo pëpe, si lango ni so anzi ala nzingo tongana ti so kota lâ ayeke nzi azo ti nzi, 5 ndali ti so ala kue ayeke amolenge ti lumière nga amolenge ti kota lâ.+ E yeke ti bï wala ti bingo pëpe.+

6 Tongaso, zia e lango pëpe tongana ti so atanga ni ayeke lango,+ me zia lê ti e angbâ na zingo ni+ na e zia li ti e kpô.+ 7 Ndali ti so azo so ayeke lango, ala yeke lango na bï, na azo so ayeke soulé, ala yeke soulé na bï.+ 8 Me ti e so e yeke azo ti kota lâ, a yeke nzoni e zia li ti e kpô na e yü na kate ti e bongo ti wen ti mabe na ti ndoye nga e yü beku ti salut tongana casque,+ 9 ndali ti so Nzapa asoro e, ti tene ngonzo ti lo atï na ndö ti e pëpe, me ti tene e wara salut+ na lege ti Seigneur ti e Jésus Christ. 10 Lo kui ndali ti e si,+ atâa e lango pëpe wala e lango,* e lingbi ti duti na fini legeoko na lo.+ 11 Ni la, ala ngbâ ti dë bê ti mba nga ti kpengba mba+ gï tongana ti so ala yeke sara so.

12 Aita, e hunda na ala ti ne azo so ayeke sara kua ngangu na popo ti ala, so ayeke fa lege na ala na yâ ti kusala ti Seigneur nga so ayeke gboto mê ti ala. 13 E hunda nga na ala ti tene, na lege ti ndoye, ala ne azo so mingi mingi ndali ti kusala so azo so ayeke sara.+ Ala duti na siriri na popo ti ala.+ 14 Na mbage nga, aita, e wa ala mingi: Ala gboto mê ti azo so ayeke sara ye kirikiri,+ ala sara tënë so adë bê ti azo so vundu asara ala mingi,* ala mû maboko na azo so awoko nga ala kanga bê ti ala na azo kue.+ 15 Ala bâ si mbeni zo akiri sioni ndali ti sioni na mba ti lo pëpe,+ me lakue ala tomba peko ti ye so ayeke nzoni ndali ti amba ti ala nga ndali ti azo kue.+

16 Ala duti na ngia lakue.+ 17 Ala ngbâ ti sambela lakue.+ 18 Ala kiri singila ngbanga ti aye kue.+ A yeke ye so bê ti Nzapa aye na mbage ti ala na lege ti Christ Jésus la. 19 Ala mingo wâ ti yingo pëpe.+ 20 Ala bâ tenengo aprophétie tongana buba ye pëpe.+ 21 Ala gi ti bâ wala aye kue ayeke tâ tënë;+ ala gbu ngangu ye so ayeke nzoni mingi. 22 Ala gbanzi terê ti ala na mara ti aye ti sioni kue.+

23 Zia Nzapa ti siriri wani asara si ala ga tâ nzoni-kue. Na yâ ti aye kue, zia a bata yingo na âme* nga na terê so ayeke ti ala kue si a duti na sioni oko pëpe na ngoi so Seigneur ti e Jésus Christ ayeke duti dä.+ 24 Zo so airi ala so, lo yeke be-ta-zo, lo yeke sara ye so ande nga.

25 Aita, ala ngbâ ti sambela ndali ti e.+

26 Ala bara aita ni kue na ala su ngbangba ti ala tongana ti aita.

27 Mbi hunda na ala mingi na iri ti Seigneur ti tene a diko mbeti so na aita kue.+

28 Kota nzobe ti Seigneur ti e Jésus Christ aduti na ala.