USE MBETI SO PAUL ATOKUA NA ATHESSALONICIEN

1 Paul, Sylvain* na Timothée+ atokua mbeti so na azo ti congrégation ti Thessalonique so asara beoko na Nzapa Babâ ti e nga na Seigneur Jésus Christ:

2 Zia kota nzobe nga na siriri so alondo na Nzapa Babâ ni nga so alondo na Seigneur Jésus Christ aduti na ala.

3 Aita, e bâ so a yeke ngbanga ti e ti kiri singila lakue na Nzapa ndali ti ala, na a yeke na lege ni ti sara tongaso, ngbanga ti so mabe ti ala angbâ gï ti kono mingi nga ndoye so ala oko oko kue ayeke na ni si ala yeke fa na popo ti ala angbâ gï ti maï.+ 4 Ni la, e pika kate ti e na ndö ti ala+ na yâ ti acongrégation ti Nzapa ngbanga ti gbungo ngangu ti ala nga na mabe ti ala na yâ ti aye ti ngangu kue so a sara na ala nga na yâ ti aye ti vundu* so ala yeke kanga bê ti ala dä.+ 5 Aye so kue afa polele so fango ngbanga ti Nzapa ayeke mbilimbili, na a yeke sara si a diko ala azo so alingbi na Royaume ti Nzapa so biani ala yeke bâ pasi ndali ni so.+

6 Biani na lê ti Nzapa a yeke na lege ni ti tene lo kiri peko ti pasi na azo so ayeke sara pasi na ala,+ 7 me ti ala, so ala yeke bâ pasi na ye ti vundu ni, e na ala e yeke wu pupu na ngoi so Seigneur Jésus+ ayeke sigi* na yayu, lo na angangu ange ti lo,+ 8 na yâ ti mbeni wâ so aza ngangu, tongana lo yeke kiri na peko ti sioni na azo so ahinga Nzapa pëpe nga na azo so asara ye alingbi pëpe na nzoni tënë na ndö ti Seigneur ti e Jésus.+ 9 Ala ni so ayeke wara ande ngbanga so ayeke futingo ti biani biani,+ na ala yeke girisa na lê ti Seigneur nga na gbele gloire ti ngangu ti lo, 10 na ngoi so lo yeke ga ti tene a mû gloire na lo tënë ti azo ti be-vulu ti lo, na ti tene na lango ni so azo so abâ lo, bê ti ala adö na popo ti ala kue so ayeke lani na mabe, ngbanga ti so tënë so e fa, ala yeda na ni na mabe.

11 A yeke ndali ti atënë so la si lakue e yeke sambela ndali ti ala, ti tene Nzapa ti e adiko ala azo so alingbi na iringo ndo so lo iri na ala,+ nga ti tene na ngangu ti lo, lo sara biani ye kue ti nzoni so anzere na lo ti sara, na lo sara si kusala oko oko kue so ala sara ni na mabe ahunzi kue, 12 si a lingbi ti mû gloire na iri ti Seigneur ti e Jésus na lege ti ala, na ala nga a mû gloire na ala legeoko na lo, a lingbi na kota nzobe ti Nzapa ti e nga na ti Seigneur Jésus Christ.

2 Ye oko, aita, na ndö ti tënë ti ngoi so Seigneur ti e Jésus Christ+ ayeke duti dä nga ti bungbingo e na terê ti lo,+ e hunda na ala 2 ti zia si li ti ala aga kirikiri hio pëpe wala terê ti ala adö pëpe ndali ti mbeni tënë so yingo* atene+ wala ndali ti mbeni tënë so a tene na yanga wala ndali ti mbeni mbeti so mo bâ mo tene e la si e tokua ni, so atene lâ ti Jéhovah*+ asi awe.

3 Zia mbeni zo ahanda ala na mbeni ye oko pëpe, ngbanga ti so lâ ni so ayeke ga kozoni pëpe si kua ti a-apostat*+ alondo nga a hinga zo-ti-kpengo-ndia-pepe,+ molenge so a yeke futi lo ande.+ 4 Lo yeke zo ti kengo tënë na lo bâ terê ti lo so lo yeke na ndö ti azo kue so a iri ala “nzapa” wala so a yeke voro ala, tongaso lo duti na yâ ti temple ti Nzapa na lo fa terê ti lo dandara tongana mbeni nzapa. 5 So mbi yeke lani na terê ti ala, ala dabe ti ala so mbi yeke sara ka tënë ti aye so na ala ape?

6 Fadeso ala hinga ye so ayeke kanga lege awe, si lo fa terê ti lo na ngoi ti lo. 7 Tâ tënë, tënë ti kpengo ndia pëpe so zo amä yâ ni pëpe so ato nda ti sara kua ti lo awe;+ me a yeke ngbâ ye so zo amä yâ ni pëpe juska gï na ngoi so a yeke zi zo so ayeke kanga lege fadeso. 8 Na pekoni awe, zo-so-akpe-ndia-pepe so ayeke fa ande terê ti lo na gigi, lo so Seigneur Jésus ayeke fâ lo na pupu ti yanga ti lo+ na lo neka lo na lege ti ye so afa+ so lo yeke dä. 9 Me ngoi so zo-so-akpe-ndia-pepe ayeke duti dä ayeke na lege ti kusala ti Satan,+ na lege ti akusala kue ti ngangu, afä nga na aye ti kpene ti mvene,+ 10 na lege ti sarango kusala na akode kue so ayeke mbilimbili pëpe ti handa+ na azo so ayeke gue ti wara futingo, so ayeke futa ti ala la, ngbanga ti so ala fa pëpe so ala yeke na kota nzara ti tâ tënë si ala wara salut. 11 Ndani la Nzapa azia si bibe ti handango zo asara si ala hon kirikiri, si ala mä na bê na mvene,+ 12 ti tene a fâ ngbanga na li ti ala kue ndali ti so ala mä na bê na tâ tënë pëpe, me ala wara ngia na yâ ti ye so ayeke kirikiri.

13 Ye oko, aita so Jéhovah* andoye ala, e bâ so a yeke ti e ti kiri singila na Nzapa lakue ndali ti ala, ngbanga ti so, ngbene ye na tongo nda ni, Nzapa asoro ala+ ti wara salut na lege so lo sara si ala ga nzoni-kue+ na lege ti yingo ti lo; nga lo soro ala na lege ti mabe ti ala na tâ tënë. 14 A yeke ndali ti salut so la si lo iri ala na lege ti nzoni tënë so e fa, ti tene ala wara gloire ti Seigneur ti e Jésus Christ.+ 15 Tongaso, aita, ala luti ngangu+ na ala bata angobo so a fa na ala lani,+ atâa a fa ni na ala na yanga wala na lege ti mbeti so e tokua. 16 Nga, zia Seigneur ti e Jésus Christ na Nzapa Babâ ti e so andoye e+ nga so amû na e dengo bê ti lakue lakue nga na nzoni beku+ na lege ti kota nzobe ti lo 17 adë bê ti ala na asara si ala luti ngangu* na yâ ti nzoni kusala nga na nzoni tënë kue.

3 Ti hunzi na ni, aita, ala ngbâ ti sambela ndali ti e,+ si tënë ti Jéhovah* angbâ ti gue na li ni hio hio+ na angbâ ti mû gonda na ni gï tongana ti so a yeke mû gonda na ni na popo ti ala. 2 Ala ngbâ nga ti sambela ndali ti e si a zi e na maboko ti asioni zo so ayeke sara sioni na amba ti ala,+ ndali ti so mabe ayeke ye so azo kue la si ayeke na ni pëpe.+ 3 Me Seigneur ayeke be-ta-zo, na lo yeke sara ande si ala luti ngangu nga lo yeke bata ala si Zo ti sioni asara ye na ala pëpe. 4 Nga, ndali ti so e yeke azo ti Seigneur e zia bê ti e kue na ala, so yanga so e mû na ala, ala yeke sara ye alingbi na ni na ala yeke ngbâ ande ti sara ye alingbi na ni. 5 Zia Seigneur angbâ ti fa lege nzoni na bê ti ala si ala ndoye Nzapa+ nga ala gbu ngangu+ ndali ti Christ.

6 Fadeso, aita, na iri ti Seigneur Jésus Christ e mû yanga na ala, e tene: Ala gboto terê ti ala yongoro na ita kue so atambela kirikiri+ na so atambela pëpe alingbi na ngobo so e fa na ala.*+ 7 Ndali ti so ala wani ahinga tongana nyen a lingbi ala sara ye tongana ti e,+ ngbanga ti so e sara ye lani kirikiri na popo ti ala pëpe 8 nga e te kobe ti mbeni zo senge senge pëpe.*+ Me, bï na lâ e sara kua ngangu na gbiki ti li ti e si e ga mbeni nengo kungba na ndö ti mbeni zo na popo ti ala pëpe.+ 9 E tene pëpe so e yeke na droit pëpe ti hunda ye na ala,+ me e ye lani ti sara tongaso ti tene e ga mbeni tapande ndali ti ala si ala sara ye tongana e.+ 10 Nga, so e yeke lani na terê ti ala, e yeke mû ka yanga so na ala, e tene: “Tongana mbeni zo aye ti sara kua pëpe, zia lo te nga ye pëpe.”+ 11 E mä a tene ambeni zo na popo ti ala+ ayeke tambela kirikiri, ala yeke sara kua oko pëpe, me ala yeke yôro yanga ti ala na yâ ti atënë so abâ ala pëpe.+ 12 E mû yanga na azo tongaso na e wa ala mingi na iri ti Seigneur Jésus Christ, e tene: ala duti na siriri na ala sara kua ti ala si ala te kobe ti peko ti kua ti ala.+

13 Ti ala, aita, zia bê ti ala awoko na sarango nzoni ye pëpe. 14 Me tongana mbeni zo ake ti mä tënë ti e so ayeke na yâ ti mbeti so, ala zia lê ti ala na ndö ti lo nzoni, ala zia ti sara songo na lo+ tongaso si kamene asara lo. 15 Ye oko, ala bâ lo tongana mbeni wato pëpe, me ala ngbâ ti gboto mê ti lo+ tongana mbeni ita.

16 Zia Seigneur ti siriri amû na ala siriri lakue na yâ ti ye kue.+ Zia Seigneur aduti na ala kue.

17 So bara ti mbi Paul la, so mbi wani+ mbi sû na maboko ti mbi, so ayeke fä so ayeke na yâ ti ambeti ti mbi oko oko kue. So lege ti sungo mbeti ti mbi la.

18 Kota nzobe ti Seigneur ti e Jésus Christ aduti na ala kue.